د هند ختیځ ایالت کې پر دوو ښځو جنسي تېری؛ لومړي وزیر "شرموونکې پېښه" بللې

د هند په شمال ختیځ ایالت مانیپور کې هغې ویډیو غوسه راپارولې، چې پکې لیدل کېږي دوه ښځې د یوې ډلې له خوا بربنډې راکاږل کېږي.

پولیس وايي، د جنسي تیري قضیه یې پرانیستې او تر دې دمه یې په تور یو کس نیول شوی او ډېر ژر به نور هم ونیول شي.

د هند لومړي وزیر نرېندرا مودي دا پېښه د هند لپاره "شرموونکی" یاده کړې او ویلي یې دي چې "هېڅ یو مجرم به و نه بښل شي."

ښاغلي مودي ویلي:"زه خلکو ته ډاد ورکوم چې قانون به پلی کېږي، هغه څه چې د مانیپور له لوڼو سره شوي هېڅکله به و نه بښل شي."

سترې محکمې هم د پېښې په اړه اندېښنه څرګنده کړې. د هند لوی څارنوال ډی ای چاندرا چود ویلي"محکمه د دغه ویډیو په اړه واقعا اندېښمنه ده" او له حکومته یې وغوښتل چې ژر تر ژره دې اقدام وکړي.

پولیس وايي پر دغو ښځو برید د مې پر څلورمه شوی، خو د پنج شنبې پر ورځ وروسته له هغې چې دا ویډیو پر خواله رسنیو خپره شوه د خبرونو سرټکی شوه.

د هند حکومت د ټولنیزو رسنیو له ټولو شرکتونو غوښتنه کړې، چې دا ویډیو له خپلو پلټفارمونو لېري کړي.

په مانیپور کې د مې په میاشت د میټي او کوکي توکمونو تر منځ شخړې پیل شوي، چې تر دې دمه پکې لږ تر لږه ۱۳۰ کسان وژل شوي او ۶۰ زره شاوخوا بې ځایه شوي دي.

د دوو ښځو زړه بوږنوونکې ویډیو پرون د چارشنبې پر ورځ پر خواله رسنیو په پراخه کچه خپره شوه.

ویډیو کې لیدل کېږي چې دا دوه ښځې د یوه ډله سړیو له خوا راکاږل کېږي او په کشولو یې کروندې ته بیايي.

هند کې د سیمه ییزو قبایلي مشرانو ټولنې په یوه خبرپاڼه کې ویلي، چې دا ظلمونه د کنګ پوکپي ولسوالۍ په یوه کلي کې د کوکي زو قبایلي ټولنې د ښځو پر وړاندې ترسره شوی دی.

دا ادعا هم شوې چې پر دغو ښځو ډله ییز جنسي تېری شوی.

دې پېښې د سیاستوالو سخت غبرګونونه هم راپارولي دي. فدرالي وزیرې سمرتي ایراني دا پېښه غندلې او "غیر انساني"یې بللې ده.

د اپوزیسون ډېرو مشرانو د بهارتیا جنتا ګوند پر حکومت هم نیوکه کړې، چې په ایالت کې د تاوتریخوالي د کمولو لپاره د اړتیا سره سم کار نه کوي.

د کانګرس ګوند مشرې پریانکا ګاندي وادرا ویلي:"په مانیپور کې د ښځو پر وړاندې د جنسي تاوتریخوالي عکسونه زړه بوږنوونکي دي."

د ډیلي اعلی وزیر ارویند کجریوال هم دغه پېښه غندلې ده او ویلي یې دي:"دا ډول ناوړه کار په هندي ټولنه کې د زغملو وړ نه دی."