Fios ga shireadh mu thubaist rathaid mharbhtach air Taobh Sear Rois
Thachair an tubaist air an A862 faisg air Àird Ilidh feasgar Diluain
- Air fhoillseachadh
Tha na poilis a' sireadh fiosrachaidh an dèidh mar a chaill fear-motar-baidhg a bheatha ann an tubaist air rathad an A862 faisg air Àird Ilidh beagan mhìltean tuath air Inbhir Pheofharain.
Fhuair iad aithris mu thubaist eadar motar-baidhsagal BMW GS1250 agus Volkswagen Passat liath mu 4:05f feasgar Diluain.
Chaidh na seirbheisean èiginn a ghairm ann agus dhearbh iad gun robh fear, 59, a bha a' draibheadh a' mhotar-bhaidhg air bàsachadh.
Cha deach duine eile a ghoirteachadh.
Bha an rathad dùinte fhad 's a rinneadh sgrùdadh air làrach na tubaiste.
Tha an Sàirdseant Niall Dòmhnallach ag ràdh gu bheil "ar smuaintean le teaghlach agus caraidean an duine a chaochail".
Thuirt e: "Tha an sgrùdadh againn a' leantainn agus dh'iarrainn air duine sam bith a chunnaic an tubaist neo gin de na carbadan mus do thachair i fios a chur thugainn.
"Bu mhath leam cuideachd air duine aig a bheil dealbhan dash-cam a thighinn air adhart."
Faodaidh daoine fiosrachadh a thoirt seachad air an àireamh fòn 101, taobh a-muigh.