You’re viewing a text-only version of this website that uses less data. View the main version of the website including all images and videos.
पुन्हा एकदा नरेंद्र मोदी पंतप्रधान होणार आहेत. निकाल ते सत्तास्थापनेच्या सर्व ताज्या घडामोडी पाहा बीबीसी मराठीच्या या लाईव्ह पेजवर.
“मी श्री नरेंद्र मोदी यांचं या ऐतिहासिक विजयासाठी अभिनंदन करतो. त्यांच्यासोबत मला दिल्लीच्या जनतेच्या भल्यासाठी काम करायचंय,”असं दिल्लीचं मुख्यमंत्री अरविंद केजरीवाल यांनी ट्वीट केलं.
आम आदमी पार्टी दिल्लीत सातही जागांवर पिछाडीवर आहे.
"भारताच्या जनतेने दिलेल्या निर्णयाचा मी स्वीकार करतो. विजयी मतदार, नरेंद्र मोदी यांच्यासह NDAचे अभिनंदन.
"खासदार म्हणून मला निवडून देणाऱ्या वायनाडच्या मतदारांचे मनापासून आभार.
"अमेठीच्या नागरिकांचेही आभार. निवडणूक प्रचारात अथक मेहनत घेणाऱ्या काँग्रेस कार्यकर्त्यांना धन्यवाद", असं काँग्रेस अध्यक्ष राहुल गांधी यांनी ट्वीट केलं आहे.
"लोकसभा निवडणुकांतील पराभवाची मीमांसा केली जाईल. कोणत्या कारणांमुळे आम्ही जनतेपर्यंत पोहोचू शकलो नाही याची कारणं शोधण्यात येतील", असं मध्य प्रदेशचे मुख्यमंत्री कमनलाथ यांनी म्हटलं आहे.
“पुन्हा देशाला स्थिर सरकार मिळालं आहे. हे कोट्यवधी भारतीयांचं नशीब आहे. राष्ट्रवादी विचारांचा विजय आहे. लोकशाहीला बळकट करणाऱ्या प्रत्येकाचे अभिनंदन. लोकशाहीचा आदर्श पुन्हा एकदा जगासमोर मांडला गेला आहे. नवीन सरकार जनसामान्यांचं आशाअपेक्षा पूर्ण करेल अशी खात्री वाटते. निकालासह मतदानाची प्रक्रिया पूर्ण झाली आहे. याबरोबरच सगळी कटूता संपुष्टात येईल. विन्रमतापूर्वक जनभावनेचा स्वीकार करा”, अशा शब्दांत राष्ट्रीय स्वयंसेवक संघाचे सरकार्यवाह भैय्याजी जोशी यांनी म्हटलं आहे.
सांगलीत भाजपचे संजयकाका पाटील यांनी विजय मिळवला. त्यांनी स्वाभिमानी शेतकरी संघटनेचे विशाल पाटील आणि वंचित बहुजन आघाडीचे गोपीचंद पाडळकर यांना नमवत बाजी मारली.
या निवडणुकीत सर्वांत मोठी मोहीम ठरली ती भाजपची ’मैं भी चौकीदार’ मोहीम. राहुल गांधी आणि काँग्रेसच्या ’चौकीदार चोर है’ मोहिमेला प्रत्युत्तर म्हणून ही मोहीम देशभरातल्या लाखों भाजप कार्यकर्त्यांनी आणि मोदी समर्थकांनी राबविली.
आज निवडणुकीचा निकाल स्पष्ट होताच पंतप्रधान मोदी यांनी एक ट्वीट केलं, “आता चौकीदार मोहिमेला एक पाऊल पुढे नेण्याची वेळ आहे. याच भावनेने भारताच्या प्रगतीच्या काम करत राहा.
“माझ्या ट्विटरवरून चौकीदार हा शब्द मी काढतोय, पण तो आता माझा अविभाज्य भाग आहे. तुमचाही तो असावा, हा प्रयत्न करा,” असं ते या ट्वीटमध्ये म्हणाले.
"देशाच्या जनतेने चौकीदार बनून देशाची महान सेवा केली आहे. चौकीदार आता जातीवाद, भ्रष्टाचार आणि नेते-व्यापाऱ्यांमधल्या हितसंबंधांपासून देशाला वाचवणारं एक शक्तिशाली प्रतीक बनलं आहे."
हातकणंगले मतदार संघात शिवसेना उमेदवार धैर्यशील माने यांचा 93,504 मतांनी विजय झाला आहे. या ठिकामी राजू शेट्टी यांची हॅटट्रिक हुकली आहे.
कौन कहता है आसमां में सुराख नहीं हो सकता ... अशा शब्दांत स्मृती इराणी यांनी आपल्या भावना व्यक्त केल्या. उत्तर प्रदेशातील अमेठी मतदारसंघात स्मृती इराणींविरुद्ध काँग्रेस अध्यक्ष राहुल गांधी यांनी आपला पराभव मान्य केला. मात्र निवडणूक आयोगाने यासंदर्भात अधिकृत घोषणा केलेली नाही.
पंतप्रधान नरेंद्र मोदी यांनी ट्वीटर हँडलवरून 'चौकीदार' शब्द काढून टाकला आहे. "चौकीदार शब्दामागची भावना आता पुढच्या पातळीवर नेण्याची आवश्यकता आहे. पुढच्या वाटचालीत हा शब्द लक्षात ठेवा आणि भारताच्या प्रगतीसाठी काम करत राहा. ट्वीटर हँडलवरून चौकीदार शब्द काढून टाकत आहे. मात्र तो माझ्या आयुष्याचा अविभाज्य भाग राहील. तुमच्या सगळ्यांच्या आयुष्यातही चौकीदार शब्द सदैव स्मरणात राहील", असं मोदींनी म्हटलं आहे.
नंदुरबार मतदारसंघातून भाजपच्या उमेदवार डॉ. हिना गावित विजयी झाल्या आहेत.
औरंगाबाद मतदारसंघात एमआयएमचे इम्तियाज जलील सातत्याने आघाडीवर होते. मात्र सध्या सुरू असलेल्या फेरीत विद्यमान खासदार चंद्रकांत खैरे यांनी 4 हजार पाचशे 66 मतांनी आघाडी घेतली आहे.
चंद्रकांत खैरे (शिवसेना) - 3,36,238
इम्तियाज जलिल (एमआयएम) - 3,31,672
हर्षवर्धन जाधव (अपक्ष) - 2,46,536
सुभाष झांबड (काँग्रेस) - 78,312
जनतेनं कौल स्पष्टपणे दिला आहे. मी नरेंद्र मोदी आणि भाजपचं अभिनंदन करतो. निवडणुकीच्या काळात काम करणाऱ्या कार्यकत्यांचे आभार. आमची लढाई ही विचारधारांची लढाई आहे. या निवडणुकीत नरेंद्र मोदी आणि भाजप जिंकल्याचं आम्ही स्वीकारतो आणि त्यांचं अभिनंदन करतो.
अमेठीमध्ये स्मृती इराणी जिंकल्या आहेत. अमेठीच्या जनतेनं आपला निर्णय दिला आहे. मी स्मृती इराणींचं अभिनंदन करतो.
- राहुल गांधी
मराठी मतं फोडण्यासाठी बरेच प्रयत्न करण्यात आले. त्यांना तुम्ही काय उत्तर देणार? या प्रश्नावर उद्धव ठाकरे म्हणाले, मी कोणाला काही उत्तरं देत नाही. एवढंच म्हणेन- 'लाव रे ते फटाके!'
थेट नाव न घेता उद्धव ठाकरे यांनी महाराष्ट्र नवनिर्माण सेनेचे अध्यक्ष राज ठाकरे यांची खिल्ली उडवली.
"निवडणुकांतील यशाकरता भाजप आणि मित्रपक्षांचं मन:पूर्वक अभिनंदन. दक्षिण आशियाई प्रदेशात शांतता, विकास आणि प्रगतीकरता भारताच्या बरोबरीने काम करू", अशा शब्दांत पाकिस्तानचे पंतप्रधान इम्रान खान यांनी आपल्या भावना व्यक्त केल्या आहेत.
"गोपाळ शेट्टींचं अभिनंदन. ईव्हीएम मशीन्समध्ये आम्हाला गडबड असल्याचं आढळून आलं आहे. त्यासंदर्भात निवडणूक आयोगाकडे तक्रार दाखल करणार आहोत. पदार्पणातच माझ्यासारखी कामगिरी कोणाची झालेली नाही. मला माझ्या कामगिरीचा अभिमान आहे", अशा शब्दांत उर्मिला यांनी आपल्या भावना व्यक्त केल्या.
लोकसभा निवडणुकांमध्ये एकही उमेदवार नसलेल्या महाराष्ट्र नवनिर्माण सेनेचे अध्यक्ष राज ठाकरे यांनी 'अनाकलनीय' अशा शब्दात लोकसभा निकालांचं वर्णन केलं आहे. त्यांच्या वर्णनावर प्रतिक्रियांचा पाऊस पडला आहे.