कोरोना व्हायरसः सांगलीमधल्या आणखी 12 जणांना लागण

सांगली जिल्ह्यातल्या आणखी 12 जणांना कोरोनाची लागण झाल्याचं स्पष्ट आज स्पष्ट झालं आहे. यामुळे राज्यातील कोरोनाग्रस्तांची संख्या 147 वर गेली आहे.

आज सकाळी राज्याचे आरोग्यमंत्री राजेश टोपे यांनी लोकांना घाबरुन जाऊ नये असे आवाहन केले.

कोरोना बरा होतोच. घाबरून जाऊ नये, असं आवाहन टोपे यांनी केलं आहे.

मास्क फक्त रुग्ण आणि डॉक्टरांच्या उपयोगासाठी आहे असं सांगत आरोग्यसाठी काम करणाऱ्यांसाठी प्रोत्साहनपर तरतूद करणाार असल्याचं त्यांनी स्पष्ट केलं आहे.

आरोग्य विभागाचे जनसंपर्क अधिकारी अनुप यादव यांनी बीबीसी मराठीशी बोलताना सांगितले, "सांगलीमध्ये आणखी 12 जणांची कोरोना टेस्ट पॉझिटिव्ह आली आहे. त्यामुळे सांगलीत आता कोरोनाबाधित रुग्णांची संख्या एकूण 21 झाली आहे. सुरुवातीला चार दिवसांपूर्वी परदेशाहून परत आलेल्या चार जणांना कोरोनाची लागण झाल्याचं समोर आलं. त्यानंतर त्यांच्या संपर्कात त्यांचेच पाच कुटुंबीय आल्याने त्यांनाही कोरोनाची लागण झाली आहे. आता नव्याने 12 रुग्ण मिरज येथील रुग्णालयात दाखल झाले आहेत."

खासगी डॉक्टरांनी दवाखाने बंद ठेवू नयेत - राजेश टोपे

खासगी डॉक्टरांनी दवाखाने बंद ठेवू नयेत. महासंकटाच्या काळात असंवेनशीलता दाखवू नका, असं आरोग्यमंत्री राजेश टोपे यांनी म्हटलंय.

नागरिकांनी रक्तदान करण्यांचं आवाहनही टोपे यांनी केलं आहे.

सध्याच्या रुग्णांच्या जवळच्या व्यक्तींची तपासणी करण्यात येईल. सोशल डिस्टन्सिंगचा नियम कुणीही मोडू नये, असंही त्यांनी स्पष्ट केलंय.

गरिब घटकांसाठी राज्य आणि केंद्र सरकार प्रयत्नशील आहे. तसंच अत्यंत शिस्तीने त्यांनी रेशनचं धान्य घेऊन जावं, असंही त्यांनी म्हटलंय.

हे वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.'बीबीसी विश्व' रोज संध्याकाळी 7 वाजता JioTV अॅप आणि यूट्यूबवर नक्की पाहा.)