BBC News, Ìgbò
Wụga n’ọdịnaya

You’re viewing a text-only version of this website that uses less data. View the main version of the website including all images and videos.

Take me to the main website

Kanada akwadoola ịnabata Palestine dịka mba nweere onwe ya

Nchịkọta akụkọ ndị kachasị mkpa mere na mbaụwa n'ọnwa Julaị 2025.

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

  1. Ụlọọrụ WAEC ekwuola na a kagbughị ule nke afọ 2025

    Ụlọọrụ na-ahụ maka ule ndị gụchara ụlọakwụkwọ sekọndịrị bụ West African Examinations Council (WAEC) nke Naịjirịa ekwuola na ha akagbughị ule nke afọ 2025.

    Na nzaghachi akụkọ na-efegharị na soshal midịa nke kwuru na ụlọọrụ ahụ kagburu akwụkwọ ule niile nke afọ a, ozi si n’aka ọnụ na-ekwuru ụlọọrụ ahụ bụ Moyosola Adexina nke o wepụtara na soshal midịa, kwuru na a ga-ewepụta mpụtara ule ahụ tupu ụbọchị Mọnde, 4 Ọgọst, 2025.

    Adexina gara n’ihu kwuo na ka ọ dị ugbua, ndị nkụzi enyechaala ụmụakwụkwọ akara edemede nke ule ahụ.

    Ọ gwakwara ndị ọhaneze ka ha gbara ozi ọbụla esighị n’akara nke ama ama na ọ bụ nke ndị ụlọọrụ ahụ ọsọ n’ihi na ha na a bụ karị ozi ụgha.

  2. Onye na-achọ mgbanwe n'ọchịchị Kenya e boro ebubo iyi ọha egwu na-aga ụlọikpe maka ngagharịiwe megide gọọmenti

    Otu onye ndọrọndọrọ a ma ama na mba Kenya bụ Boniface Mwangi na-aga ụlọikpe maka ebubo ịkwado iyi ọha egwu na ngagharịiwe megide gọọmenti n’ọnwa gara aga nke kpalitere ọnwụ mmadụ iri na itoolu.

    Cheta na ndị ọrụ nnyocha kwuru na ha nwetere ekwentị, kọmputa na akwụkwọ ndetu sitere n'ụlọ Mwangi dị na Lukenya na mpụga isi obodo Nairobi, yana akụrụngwa kọmpụta, ngwa anwụrụ anyammiri “tear gas” na ngwa egbe enweghị mgbọ n'ụlọọrụ ya dị n'obodo ahụ.

    Njide ya kpalitere ọtụtụ nkatọ, ebe ndị otu na-ahụ maka ikike dịrị mmadụ na-ekwu na ọ bụ iji gbochie olu mmegide.

    Mana onye na-achọ mgbanwe n’ọchịchị Kenya gọnarịrị ebubo ahụ, na-ekwu n’akara soshal midịa X: "Abụghị m onye na-eyi ọha egwu."

  3. Ndịagha Izrel gburu ndị Palestine 67 na-achọ enyemaka n’ugwu Gaza – Mịnịstrị ndị Hamas

    Ndịagha Izrel egbuola opekatampe mmadụ iri isii na asaa na-eche ụgbọala gwongworo enyemaka nke ụlọọrụ UN na mpaghara ugwu Gaza, mịnịstrị ahụike nke Hamas kwuru.

    Ngalaba ụlọọrụ UN World Food Programme kwuru na gwongworo iri abụọ na ise ya "zutere oke igwe mmadụ agụụ na-agụ bụ ndị a gbara egbe", obere oge ka ha si Izrel gafere.

    Mana ndịagha nchekwa Izrel (IDF) kwuru na ha 'gbapụrụ egbe ịdọ aka na ntị “iji wepụ ihe iyi egwu”. Ndịagha Izrel rụrụ ụka banyere ọnụọgụgụ ndị akụkọ kwuru nwụrụ anwụ.

    Cheta na mịnịstrị dọrọ aka na ntị n’ụbọchị Satọde 19 Julaị 2025 banyere oke agụụ na-abawanye na Gaza. Ha kwukwara na ọnụọgụgụ ndị mmadụ na-abata n’ụlọọrụ ya "n'ọnọdụ nke oke ike ọgwụgwụ" na-arị elu.

    Ha gara n’ihu kwuo na Sọnde na o dekọtara ọnwụ mmadụ iri na asatọ “n'ihi oke agụụ na ụkọ nri” n'ime awa iri abụọ na anọ gara aga.

  4. Ụtụtụ ọma, Igbo ndị ọma

    Nnọọ n’ọgbakọ BBC News Igbo taa bụ Mọnde 21 Julaị.

    Dịka unu na-esonyere anyị taa, anyị ga na-ewetere unu akụkọ ihe na-eme n’ala Igbo, Naịjirịa nakwa ụwa niile.

    Ekpere anyị bụ na naanị iheọma ga-ezute anyị niile n’izu ọhụrụ a.

    Biko sonyekwara anyị n'akara soshal midịa nke gụnyere Facebook, Instagram na ọbaozi WhatsApp Channelụ anyị.

    Ndewo!

  5. Akụkọ ụgha kwuru na anyị kwadoro nkewapụta ọtụtụ steeti ọhụrụ - Sịnet Naịjirịa

    Ụlọ omeiwu kacha na Naịjiria akọwala ihe ha ma maka akụkọ kwuru na ha kwadoro nkewapụta steeti iri atọ na otu ọhụrụ ma kwuo na akụkọ ahụ bụ akụkọ ụgha.

    Onye na-ekwuchitere ndi sịneti bụ Yemi Adaramodu gwara BBC na naanị ụlọ omeiwu agaghị ekewapụtawu steeti ọhụrụ na Naịjiria.

    Yemi sị na e nwere usoro dị icheiche ịkewaputa steeti ọhụrụ na-agafe tupuu e mee ya.

    N’okwu ya, a ga-emezi iwu Naịjirịa, ndị nnọchiteanya n’ụlọ omeiwu nke steeti niile nọ na Naịjiria ga-enye nkwado ha, a ga-enyekwa ohere ka ndị amaala Naịjirịa nyekwa nkwado maka ya tupuu e mee ya.

    Nkọwa a na-abia dịka akụkọ na-efegharị na soshal midia kwuru na ndị omeiwu nyere nkwado ka ekewapụta steeti ọhụrụ.

  6. Onyeisiala mba Kamerun Paul Biya dị afọ 92 ji soshal midia na-achọ vootu ndi ntoroọbịa

    Onyeisiala mba Kamerun bụ Paul Biya na-agba mbọ inweta mkpụrụ obi ndị ntoroọbịa obodo ya ka ha tụọrọ ya vootu.

    Paul Biya na-eme nke a dịka ọ na-akwado ịzọ ọkwa Onyeisiala mba ahụ ọzọ nke a ga-eme n’ọnwa Ọktoba.

    Akụkọ kwuru na Biya nọ na-agbasa ọzi site n’akara soshal midia ya gunyere Facebook na X nke a na-akpọ twitter.

    Mana ndị okacha mara gwara BBC na ọ dika atụmatụ ahụ ga-akpụ afọ n’ala n’ihi na ọtụtụ ndị ntoorọbịa mba ahụ na-adabere n’ọba ọzi Whatsapp – ebe ọzi Paul Biya anaghị erụ.

    Ha sị na nsogbu ọzọ chere ya aka mgba bụ na ọtụtụ ndị mmadụ kwenyere na ọbughị ya na-ede ihe ndị ahụ.

    N’aka nke ọzọ, ihe mere ndị ntoorọbịa ji di ya oke mpa bu na ihe ruru pasent 60 n’ime ọnụọgụgụ ndị mmadụ nile nọ na Kamerun nọ n'okpuru afọ 25 nke pụtara na ha nwere ike ikpebi ntuliaka ahụ.

  7. Mmadụ 14 anwụọla n’idemmiri na mbuze ala mere na Saụt Korea

    Ihe ruru mmadụ iri na anọ anwụọla n’idemmiri na mbuze ala mere na Saụt Korea n’ihi oke mmiriozuzo, ụlọọrụ na-ahụ maka ọdachi na mba ahụ kwuru.

    A na-atụ egwu na ọnụọgụgụ ndị nwụrụ anwụ nwereike ịrị elu ka ọrụ nnapụta na-aga n'ihu, dịka a na-ekwu na mmadụ iri na abụọ na-efu efu.

    Ihe onyonyo gosiri ndị mmadụ ka ha na-awagharị na nnukwu apịtị n’obodo ezumike nke Gapyeong bụ nke ọdachi mbuze ala dakwasịrị na Sọnde dịka ha na-agafe akwammiri mebiri emebi ịga n'ụlọ nchekwa.

    N'ebe ndịda, aja na irighiri ihe kpuchiri otu obodo dum n’ihi mbuze ala mere n’etiti Chungcheon, dịka vidiyo e mere na mpaghara ahụ na Satọde siri gosi.

    Ihe fọrọ nke nta ka ọ bụrụ mmadụ iri puku apụọla n'ụlọ ha kemgbe mmiriozuzo ahụ malitere na Wednezde, ebe ihe karịrị ezinụlọ iri puku anọ na otu enwezighị ọkụ latrik ugbua, dịka ụlọọrụ mgbasa ozi mpaghara si kọọ.

  8. Ọtụtụ ndị nwụrụ dịka ụgbọmmiri ndị njem Ha Long Bay kpuru na Vietnam

    Ihe ruru mmadụ iri atọ na asaa anwụọla ebe ọtụtụ ka na-efu efu dịka ụgbọmmiri ndị njem kpuru na Vietnam maka ọnọdụ ihuigwe dị njọ.

    Ihe mberede ahụ mere na Ha Long Bay, ebe njem nlegharịanya na-ewu ewu n’ugwu nke mba ahụ.

    A kọrọ na ọtụtụ n'ime ndị njem ahụ bụ ezinụlọ ndị Vietnam si n’isi obodo Hanoi bịa.

    Nnukwu mmiri ozuzo na-egbochi ịchọ ndị dị ndụ, ndị nnapụta na-ekwu, mana ka ọ dị ugbu a, a dọpụtala mmadụ iri na otu dị ndụ n'ime mmiri ahụ.

    Ụgbọmmiri ahụ, aha ya bụ Wonder Seas, bu mmadụ iri ise na atọ mgbe o kpuru dịka o zutere oke mmiriozuzo na mberede, nkwupụta sitere na ndị nchekwa okeala Vietnam na ndịagha mmiri kwuru.

  9. Ọgụ na-aga n’ihu na ndịda Syrịa n’agbanyeghị ịkwụsị ọgụ Onyeisiala mba ahụ kwupụtara

    Ọgụ ka na-aga n’ihu na ndịda Syrịa n’agbanyeghị ịkwụsị ọgụ Onyeisiala mba ahụ kwupụtara.

    Akụkọ kwuru na ndịagha nke Druze chụpụrụ ndịagha Bedouin n’obodo Suweida mana ọgụ ka na-aga n’ihu na mpaghara ndị ọzọ na mba ahụ.

    Ka ọ dị ugbua, ulọmgbasa ozi BBC enyochabeghị nke a n’onwe ha.

    Cheta na e boro ndịagha gọọmenti nke Onyeisiala Ahmed al-Sharaa zigara ka ha sonye na nkwụsị ọgụ na mmalite izuụka a, ebubo isonye na mwakpo awakporo otu Druze.

    Ihe karịrị mmadụ narị itoolu ka e kwuru na e gburu n’izuụka gara aga. A na-ebo akụkụ niile ebubo ime arụ.

    N’aka nke ọzọ, Onye odeakwụkwọ nke mba Amerịka, Marco Rubio, rịọrọ ka a kwụsị "ndina n'ike na igbu mmadụ nke ndị aka ha dị ọcha" na Syrịa, n’ozi o wepụtara n’akara soshal midịa X na Satọde.

  10. Ndị be anyị, ụtụtụ ọma

    Nnọọ n’ọgbakọ BBC News Igbo taa bụ Sọnde 20 Julaị.

    Ka Chineke zaa ekpere gị niile n’izu a.

    Dịka unu na-esonyere anyị taa, anyị ga na-ewetere unu akụkọ ihe na-eme n’ala Igbo, Naịjirịa nakwa ụwa niile.

    Biko sonyekwara anyị n'akara soshal midịa nke gụnyere ọbaozi WhatsApp Channelụ anyị.

    Udo dịrị gị!

  11. E nweela mkpebi ịkwụsị ọgụ dị n’etiti DR kongo na ndịagha nnupuisi M23

    Mba DR Kongo na ndịagha nnupụisi M23 ebienyela aka n’akwụkwọ nkwekọrịta ịkwụsị ịkwa mgbọ na Qatar.

    Nkwekorịta a bụ iji chepụta atụmatụ ga-eweta udo zuruoke n’etiti ha.

    Akụkọ kwuru na DR Kongo na ndịagha M23 ga-emejupụta iwu dị na nkwekọrịta ahụ na Julaị 29, 2025 ebe a ga-enwe nkwekọrịta ikpeazụ ga-esoro usoro nkwekọrịta Amerịka wetara n’etiti DR Kongo na Rụwanda n’Ọgọst 18, 2025.

    Esemokwu dị n’etiti DR Kongo na otu M23 gbara ọtụtụ afọ, kawanyere njọ na mbido afọ a oge otu M23 machiri ma nwere ọnọdụ na mpaghara ọwụwa anyanwụ DR Kongo nwere ihe ọnatarachi nakwa isi obodo Goma, Bukavu nakwa ọdụ ụgbọelu abụọ.

    Otu UN kwuru na ọtụtụ puku mmadụ anwụọla site n’ọgụ a ebe ọtụtụ ndị ọzọ gbara ọsọ n’ụlọ ha dị iche iche kemgbe ọ malitere. Mana otu M23 kwuru na ọ bụ naanị mmadụ 1,000 nwụrụ.

  12. A katọọla mmachi Gọvanọ Okpebholo machiri Peter Obi ịbata Edo steeti

    Ọtụtụ ndị Naịjirịa akatọọla mmachi Gọvanọ Monday Okpebholo na-achi Edo Steeti machiri Peter Obi ịbata na steeti ahụ ma ọ bụrụ na ọ gwaghị ya.

    O kwuru na ọ bụrụ na Peter Obi emeghị nke a, ihe ọbụla ọ hụrụ ya nwere.

    N’ihe onyonyo fesara na soshal midia, Gọvano Okpebholo boro ebubo na oge ikpeazụ Peter Obi bịara Edo Steetị ma nye ụlọakwụkwọ nọọsụ nde naira iri na ise (15 million), nsogbu dapụtara dịka ọ lara nke butere ọnwụ mmadụ atọ.

    Gọvanọ Okpebholo kwuru nke a n’ụbọchị Fraịde 18 Julaị, 2025 oge ọ nabatara ndị ndọrọndọrọ ọchịchị si patị PDP bata APC

    Onwebeghị ihe ndi uweojji steeti ahụ kwuru gbasara ebubo ahụ kwuru na mmadụ atọ nwuru oge Peter Obi gara nleta n’ụlọakwụkwọ Philomena College of Nursing Sciences dị na Benin, isi obodo steeti ahụ ụbọchị Tuzde 8 Julaị, 2025.

    N’aka nke ọzọ, Peter Obi ekwubeghị ihe ọbụla banyere mmachi nakwa ebubo ndị ahụ Gọvanọ Okpebholo boro ya, mana ọtụtụ ndị mmadụ ọkachasị ndị ntorobịa akatọọla mmachi a, dịka ha kwuru na iwu Naịjiria kwadoro onye ọbụla ime njem n’ebe ọbụla masịrị ya na Naịjirịa.

  13. Gọọmenti Syria ekwupụtala ịkwụsị ọgụ dị n’etiti Bedouin na Druze

    Onyeisiala Syrịa bụ Ahmed al-Sharaa ekwuola na enweela nkwekọrịta ịkwụsị ịkwa mgbọ na mpaghara Suweida. Nke a na-abịa dịka ọtụtụ mmadụ nwụrụ site na mwakpo na dị n’etiti ndị Bedouin na Druze.

    Otu abụọ a boro onwe ha ebubo dị iche iche n'esemokwu a ruru otu izuụka.

    Mana ugbua, Onyeisiala al-Sharaa kwuru na oge eruela mgbe a ga-ejikọ aka ma weta udo na mpaghara abụọ ahụ nakwa na Syrịa niile.

    Akụkọ kwuru na enweghị onye ma ka nkwekọrịta a ọ ga-amịta mkpụrụ dịka e kwuru na ọgụ ahụ ka na-aga n’ihu n’ụbọchị Satọde 19, Julaị, 2025.

    Nkwupụta nkwekọrịta ịkwụsị ịkwa mgbọ a na-abịa dịka ụlọọrụ na-ahụ maka nchekwa na Syrịa zigara ndịagha na Suweida iji kwụsị ọgụ ahụ. Atụmatụ a bụ nke wetara nkwado Izrel.

  14. Trump akpụpụla Murdoch na Wall Street Journal ụlọikpe maka edemede ha dere maka Epstein

    Onyeisiala Donald Trump akpụpụla ụlọọrụ nwe Wall Street Journal bụ Dow Jones na onye nwe ya bụ Rupert Murdoch n’ụlọikpe ma kwuo ka ha kwụọ ya ijeri dọla iri ($10m) maka ebubo na a hụrụ akwụkwọ ozi ncheta ụbọchị ọmụmụ o degara Jeffrey Epstein tupu a kpụpụ ya ụlọikpe.

    Trump kwuru na ebubo ahụ metọrọ aha ya ma kwuo na akwụkwọ ozi ahụ e kwuru na o zigara Epstein bụ adịgboroja.

    Nke a na-abịa dịka ministrị na-ahụ maka ikpe n’Amerịka gwara ọkaikpe ka ọ gbaa n’anwụ ihe akaebe ọbụla gbasara ikpe Epstein iji chọpụta nke bụ eziokwu banyere akụkọ kwuru na aka Onyeisiala Trump dị na ya.

    Na nzaghachi ha, otu onye na-ekwu ụlọọrụ Dow Jones gwara BBC na ihe ha dere bụ eziokwu ma kwuo na ha bụ ụlọmgbasaozi kewnyere n’eziokwu. O kwuru na ha kwụrụ chịm ịzara ọnụ ha n’ikpe ahụ.

  15. Mmadụ atọ anwụọla n'ogige ụlọnkuzị ndị uweojii na Los Angeles

    Ndị uweojii atọ anwuola n'ogige ụlọnkuzi ndị uweojji dí na Los Angeles oge ihe a na-amaghị gbawapụrụ n’ụtụtụ ụbọchị Fraịde 18 Julaị, 2025.

    Ọkaikpe ukwu mba Amerịka bụ Pam Bondi kọwara ya dịka oke ọdachi.

    Ọnụ na-ekwuru ndị uweojii Los Angeles Sheriff’s Department kwuru na ọ bụ na ogige Biscailuz Center Academy Training ka ihe ahụ mere.

    Akụkọ kwuru na a na-eme nnyocha iji chọpụta ihe ahụ gbawapụrụ mana a na-ekwu na ọ dịka ọ bụ oge ndị uweojii na-hụ maka ogbunigwe na-ahazi ogbunigwe ha ka otu n’ime ya gbawapụrụ ma gbuo mmadụ atọ ahụ.

    Ka ọ dị ugbua a, ndị uweojii ekwubeghị ihe ọbụla banyere njiji ahụ dịka ha na-aga n’ihu ime nnyocha.

    E kwuru na otu onye merụrụ ahụ na-enweta nleta n’ụlọọgwụ.

  16. Ọ bụ ọrịa akwara mere ụkwụ na aka Onyeisiala Trump jiri zaa – Obi ọchịchị White House

    Obi ọchịchị White House mba Amerịka ekwuola na Onyeisiala Donald Trump nwere ọrịa akwara. Nke a na-abịa dịka ọtụtụ foto pụtara na soshal midia gosiri na o merụrụ ahụ n’azụ aka ya.

    Odeakwụkwọ White House bụ Karoline Leavitt kwuru na e nnyochara Onyeisiala Trump ahụ ngwa ngwa ọ chọpụtara na ụkwụ ya zara.

    Ọ gara n’ihu kwuo na ahụ ahụ o merụrụ n’aka ya bụ nke sitere n’oke ikwe ndị mmadụ n’aka.

    Onyeisiala Donald Trump gbara afọ 70 nọrọ n’oge gara kwuo na ya bụ onyeisiala kahcasị nwee ezi ọnọdụ ahụike n’Amerịka.

    Nnyocha kwuru na nsogbu a Onyeisiala Trump na-enwe ka a na-akpọ ‘chronic venous insufficiency’ nke na-eme ma ọ bụrụ na akwara dị n’ụkwụ mmadụ kwụsị ịmịta ọbara n’obi. Ọ bụ nke la mere ụkwụ jiri zaa

    Mana Leavitt mere ka o doo anya na Onyeisiala Trump nọ n’ezi ọnọdụ ahụike ugbua.

  17. Atọhapụla mmadụ 24 e jidere maka ikwado Biafra n'ụzọ iwu na-akwadoghị kemgbe afọ 2020 n'Ebonyi - Ifeanyi Ejiofor, ọkaiwu IPOB Okaiwụ ndị IPOB, Gọọmentị ga-akwu ụgwọ maka ịjide mmadụ 24 na-akwado Biafra n'ụzọ iwu na-akwadoghị afọ anọ n'Ebonyi Steeti - Ifeanyi Ejiofor, ọkaiwu IPOB Okaiwụ ndị IPOB

    Ifeanyi Ejiofor, ọkaiwu ndị nọchịrị anya ndị Ipob ekwuola na gọọmentị Ebonyi steeti ga-akwụ ụgwọ maka ịjide mmadụ ruru iri abụọ na anọ (24) na-akwado Biafra n'ụlọ mkpọrọ n'ụzọ iwu na-akwadoghị kemgbe ogụ afọ anọ.

    O kwuru nke a mgbe BBC Igbo gbara ya ajụjụ ọnụ ịmmara ihe ọzọ o bụ n'obi ime dịka umu ntoorobia ndịa ahụ gọọmenti nwuchịrị nwerela onwe ha n'ubọchị taa bụ Tọzde, Julaị 17, 2025.

    "Anyị ebidola usoro iji nweta nkwụghachi site n'idere gọọmentị steeti akwụkwọ ozi n'ihi njide n'ụzọ iwu na-akwadoghị ruo ogologo oge. Ọ bụrụ na ha emeghị ya, anyị ga-eme ihe ndị ọzọ ịwu kwuru site ịga n'ụlọ ikpe".

    Goomenti Ebonyi steeti kemgbe ọnwa Mee 24, afọ 2020 nwụchịrị ndị out IPOB ruru iri ato na isii (36) mana ụbọchị taa bụ Tọzde, Julaị 17, 2025 ụlọịkpe ukwu na steeti ahụ kpebiri ka atọhapụ ma wepụ ebubo nille eboro mmadụ iri abụọ na anọ nke fọrọ

  18. Gọvano Ebonyi Steeti akpọọla oku udo n'Ezza oge emume iri ji ọhụrụ

    Obodo Ezza Ezekunna dị n’Ebonyi Steeti emeela emume iri ji ọhụrụ ha n’ogige Civic Centre dị n’okpuru ọchịchị Ezza Saụt.

    Emume iri ji ọhụrụ a na-abịa abalị ise obodo Ezza mere emume iri ji ọhụrụ ha.

    Ọtụtụ ndị enyi na ikwu na ibe obodo ahụ bịara emume ahụ iri ji ọhụrụ ahụ.

    N’okwu ya n’emume ahụ, Gọvanọ Francis Nwifuru ji ohere ahụ kpọọ oku ka ndị obodo ahụ kwado ọchịchị gọọmenti ya iji hụ na e nwere ezi ọganihu na steeti ahụ.

    Gọvanọ Nwifuru gwara ndị obodo Ezza ka ha biri n’udo ma kwado ọchịchị onyekwuouche ya.

  19. Gọọmenti Enugwu Steeti amapụtala atụmatụ ịjị weta ezi nchekwa n'Eha-Amufu

    Gọọmenti Enugwu steeti ehiwela otu Joint Task Force ọrụ ha bụ ịchọpụta ma buo agha megide ndị omekome na-egbu mmadụ n'Eha-Amufu dị n'opkuru ọchịchị Isiuzo.

    Otu Joint task Force ahụ isi ụlọọrụ ha dị n'Ogbete Eha-Amufu, gụnyere ndịagha, ndị uweojii nakwa ndị ọrụ Civil Defence.

    Iji gosi na ha kwadosiri ike, gọọmenti Gọvanọ Peter Mbah na ndịagha ụgbọelu enwela nkwekọrịta ka ha jiri ụgbọelu helikọpta ha na-efegharị n'ime ọhịa nakwa gburu gburu obodo ahụ iji nyochapụta ogige ndị omekome ahụ dị iche iche.

    Ndị bịara mmemme nhiwe ahụ gụnyere onye ndụmọdụ Gọvanọ na nchekwa bụ Vincent Onyeabọr, ndị isi JTF nakwa onyeisi ụlọakwụkwọ ụgbọelụ "Air Force Base" Emene Enugwu bụ Air Commodore D.E Laha na Wing Commander O. Adeniyi.

    Vincent Onyeabor kọwara na ụgbọelu halikọpta ndị ahụ ga na-efeghari kwa mgbe kwa mgbe n'urukpuru Eha-Amufu iji nyere ndị ọrụ JTF aka chọpụta ebe ndị mwakpo ahụ nọ.

    Bishopụ ụka Anglikan nke Eha-Amufu bụ Bishọpụ Olinya kelere gọọmenti ka o siri nụ mkpu akwa ha ma gbatara ha ọsọ enyemaka. Ọ gwara gọọmenti ka ọ ghara ịlaghachi azụ na nkwa iweghachite ezi nchekwa o kwere ha.

    Ọtụtụ ndị obodo Eha-Amufu kwupụtara obi aṅụrị ha n'atụmatụ ahụ gọọmenti wepụtara iji weta ezi nchekwa n'obodo.

  20. Lee ihe Peter Obi kwuru oge ọ gara mgbaru n'ụlọ Muhammadu Buhari dị na Daura Katsina Steeti.

    Cheta na ndị ndọrọndọrọ ọchịchị gunyere osote Onyeisiala Naịjirịa bụ Kashim Shettima, Peter Obi, Atiku Abubakar na Nasir El-Rufai gara njem mgbaru n'ụlọ Buhari iji tie ezinaụlọ ya aka n'obi.