BBC News, Ìgbò
Wụga n’ọdịnaya

You’re viewing a text-only version of this website that uses less data. View the main version of the website including all images and videos.

Take me to the main website

Kanada akwadoola ịnabata Palestine dịka mba nweere onwe ya

Nchịkọta akụkọ ndị kachasị mkpa mere na mbaụwa n'ọnwa Julaị 2025.

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

  1. Otu United Nations ga-akwụsị enyemaka ikesa nri na mpaghara Ugwu Naịjirịa

    Ngalaba ụlọọrụ United Nations na-ahụ maka enyemaka ike ihe nri a na-akpọ World Food Programme ekwuola na ha ga-akwụsị enyemaka ikesa nri ha na-eme na mpaghara Ugwu nke Naịjirịa.

    Na nkwupụta ha mere n’ụbọchị Wenezde 23 Julaị, 2025 mkpebi a bụ maka ụkọ ego nakwa ogụ a na-alụ na mpaghara Ugwu nke na-akpali aguu ebe ahụ.

    Onye na-ahụ maka ụlọọrụ World Food Programme na Naịjiria bụ David Stevenson si na ezinaụlọ ndị mmadụ bi na mpaghara ugwu na-agba mbọ ihu na ha gbanahụrụ aguu dịka ọ si na aguu na-emekpa mmadụ ruru nde iri atọ na otu ahụ na Naịjirịa.

  2. Ọkaibe n'ịgba mgba bụ Hulk Hogan anwụọla n'afọ 71

    Ọgba mgba a ma ama bụ Hulk Hogan anwụọla dịka ọ gbachara afọ iri asaa na otu

    Akụkọ kwuru na ndị gbata gbata nwetara oku n'akara ekwenti na ụlọ ya na mpaghara Florida maka nsogbu ọ nọ na-enwe n’obi ya nke a na-akpọ 'Cardiac arrest' n’okwu bekee. E kwupụtara ọnwụ ya mgbe e bugaara ya n'ụlọọgwụ.

    Hogan, onye ezigbo aha ya bụ Terry Bollea bụ onye ọkachasị ike n'ịgba mgba n'agbata afọ 1980 ruo 1990.

    A mụrụ ya n'afọ 1953 mana o bidoro gbawa mgba n'afọ 1977.

    ịgba mgba ya nwere nsogbu n'afọ 2015 site n'okwu ịkpa oke agbụrụ nke kwụsịrị mmekọrịta ya na egwuregwu mgba.

    N'ọnwa ndị gara aga e nwere akụkọ fesara na ahụike ya adighị mma mana n'afọ gara aga mgbe a na-agba ya ajụjụọnụ, Hogan kwuru na a waala ya ahụ opekatampe ugboro iri abụọ na ise kamgbe afọ iri gara aga.

    Lee ụfọdụ ndi ziteere ezinaụlọ ya ozi nkasi obi

    Onye odeakwụkwọ nchekwa mba Amerịka bụ Pete Hegseth tinyere foto ya na Hogan sere mgbe ha na ya ji ọkọlọtọ mba Amerịka n'ogige a na-alu ọgụ n'akara soshial midia ya.

    Nwa onyeisiala mba Amerịka bu Donald Trump Jr. dere sị 'ka mkpụrụ obi ya laa n'udo" n'akara soshial midia ya ma tinye foto ha abụọ sere mgbe a na-eme achụmnta vootu na mpaghara Wisconsin.

    Ezigbo enyi Hulk Hogan bụ kwa onye a ma ama n'ịgba mgba bụ Ric Flair sị na ọ tụrụ ya n'anya nke ukwuu ịnụ maka ọnwụ ya.

  3. Ụlọikpe agwala ndị uweojii kwụọ nde naịra 10 maka ịnwuchi ndị ngagharịiwe EndSARS

    Ụlọikpe ukwu dị na legọs enyela kọmishọna ndị uweojji na steeti ahụ na onyeisi ndi uweojii Naịjiria iwu ka ha kwụọ ụfọdụ ndị mere ngagharịiwe EndSARS ego dị nde naịra iri maka ịmetọ ikike dịịrị ha.

    Ọkaikpe Musa Kakaki, na mkpebi ya, kwuru na a kpagburu ndị na-eme ngagharịiwe n'ụzọ na-ezighi ezi dịka a naara ha ikike iwu obodo nyere ha mgbe ha na-eme ncheta afọ anọ ndị otu ha nwụrụ anwụ.

    Ụfọdụ ndị mere ngagharịiwe gbara akwụkwọ mkpesa a gụnyere Hassan Taiwo Soweto, Uadiale Kingsley, Ilesanmi Kehinde, Osopale Adeseye, Olamilekan Sanusi, Osugba Blessing, nakwa ndị ọzọ

  4. Ndị mmadụ bi na Nsirimo, Ụmụahịa n’Abịa steeti etiela mkpu maka ajọ ụzọ, ide mmiri

    Ndị mmadụ bi na Nsirimo dị n’Ụmụahịa, Abịa Steeti arịọla gọọmenti steeti ahụ ka ọ gbatara ha ọsọ enyemaka maka mkpamkpa kpara n’ebe ahụ.

    Ha kwuru na ọnọdụ ajọ ụzọ na mpaghara ahụ so tinye ndị niile na-azụ ahịa na gburugburu ahụ n’ihe ụkọ nakwa ọnọdụ gbatagbata.

    Otu onye na-azụ ahịa n’ebe ahụ bụ Ogechi Ifeanyi kwuru na mgbe ọbụla oke mmiri zoro nae be ahụ na adọ mmiri ma ide mmiri mechaa.

    Mgbe ndị ntaakụkọ gara ebe ahụ, ụgbọala ha enweghị ike ịgafe okporo ụzọ ahụ.

    Ọnụ na-ekwuru Onyeisi oche gọọmenti okpuru ọchịchị Umuahia Saụt bụ Obinna Ibe kwuru na Onyeisi oche na-ahụ maka mpaghara ahụ ga-eje ebe ahụ na mmiri kwụsị izo ma kwuo na ụzọ ahụ dị oke mkpa.

  5. A họpụtala Nentawe Yilwatda dịka onyeisioche ọhụrụ pati APC

    Ndịisi pati jị ọkwa ọchịchị na Naịjiria bụ All Progressive Congress (APC) ahọpụtala Nentawe Yilwatda ka ọ bụrụ onyeisioche ha.

    Nke a na-abia dịka onye bụbu onyeisioche ha, Umar Ganduje gbara arụkwaghịm n'ọnwa Juun n’ihi ọnọdu ahụike ya.

    Onyeisioche ndị Gọvanọ niile nọ na patị APC nke a na-akpọ Progressive Governors’ Forum bụ Hope Uzodimma họpụtara ya maka ọkwa a dịka onyeisioche nke ụlọ nnọchiteanya Naịjiria, Abbas Tajudeen na ndị ọzọ nyere nkwado nke ha na nzụkọ ha n'ụbọchị Tọzde 24 Julaị, 2025

    Tupu a họpụta ya, Yilwatda dị afọ iri ise na isii bụ Mịnịsta na-ahụ maka ọdịmma mmadụ na mbelata ụbịam na Naịjirịa.

  6. A ga m akpọ ndị ndu mba Thailand na Kambodịa – Praịm Mịnịsta mba Malaysia

    Praịm mịnịsta mba Malaysia bụ Anwar Ibrahim ekwuola na tupuu taa agaa na ya na ndị ndu mba Thailand nakwa Kombodịa ga-ekwu okwu.

    Anwar Ibrahim gwara ndị ntaakụkọ nke a ma kwuo na “naanị ihe anyị na-atụ anya n’aka ha abụọ bụ ka agha kwụsị, ka ha nọrọ ala n’oche kpaa ihe na-ese okwu ma nwee nkwekọrịta”.

    Anwar Ibrahim bụ onyeisi Asean bụ otu jịkọrọ mba niile dị na mpaghara ahụ nke Thailand na Kambodịa so n’ime ya.

  7. Agha adaala n’etiti mba Thailand na Kambodịa

    Agha adaala n’etiti mba Thailand na Kambodịa na mpaghara obodo dị n’oke ala ha abụọ.

    Nsogbu dapụtara n’etiti ndịagha mba abụọ ahụ n’ebe oke ala ha na-azọ azọ nke mere ha jiri bido na-akwakọrịta onwe ha mgbọ.

    Etu ọnọdụ si dị ugbua mmadụ iri na abụọ anwụọala ebe ihe karịrị mmadụ iri na anọ meruru ahụ.

    Nsogbu dị n’etiti mba abụọ ahụ bidoro ihe dịka afọ iri atọ garaaga mgbe ha kechara oke ala ha n'oge mba Fransi bụ ndị wakporo Kambodia nyeghachịrị Kambodịa ọchịchị.

    Ọgbaaghara ọhụrụ nke a dapụtara mgbe e gburu onyeagha mba Kambodia n’oke ala ahụ n’ọnwa Mee afọ a bụ oge ha na ndị Thailand na-enwe nsogbu.

  8. Ụmụ Igbo, mma mma nu

    Nnọọ n’ọgbakọ BBC News Igbo taa bụ Tọzde 24 Julaị.

    Anyị ga na-ewetere unu akụkọ ihe na-eme n’ala Igbo, Naịjirịa nakwa ụwa niile dịka unu na-esonyere anyị.

    Biko sonyekwara anyị n'akara Facebook, Instagram na ọbaozi WhatsApp Channelụ anyị.

    Anyị na-asị ka udo chịa na ndụ anyị niile.

    Ya gazie!

  9. Mba UK kwuru na ha ga-ebelata ego ha na-emefu n’ihe enyemaka mba ụwa

    Gọọment mba UK ekwupụtala atụmatụ ibelata ego enyemaka ha na-enye ndị Afrịka dịka ha kọwaara na agụmaakwụkwọ ụmụaka na ahụike ụmụnwaanyị ka ihe ahụ ga-aka emetụta.

    Cheta na gọọmenti UK kwuru n'ọnwa a Febụwarị nke afọ 2025 na ha ga-ebelata ego enyemaka ha na-enye mba ndi ọzọ site na pasent 40.

    Mana gọọmentị kwuru na ha ga-echekwa ego a na-etinye na ngalaba enyemaka dị iche iche gụnyere ego ha na-enye ndị otu mba ụwa dịka ụlọakụ nke mba ụwa bụ World Bank.

    Ha kwuru na ha ga-echekwa ego ha na-enye maka ịgba ọgwụ mgbochi Gavi, ma kwuo na mba UK ga-aga n'ihu na-arụ ọrụ enyemaka mmadụ n'ebe ndị dịka Gaza, Yukren na Sudan.

  10. Ndị Sịnetị akwadola ka Onyeisiala Tinubu biri ijeri dọla iri abụọ na otu

    Ndị omeiwu Sịnetị nọọrọ n’ụbọchị Tuzde 22 Julaị, 2025 kwadoo ka Onyeisiala Bola Tinubu biri ego dị ijeri dọla iri abụọ na otu ($21bn) site na mba ofesi dịka ego mmefu gọọmentị site n’afọ 2025 ruo afọ 2026.

    Nkwado a na-abịa dịka kọmitii ụlọomeiwu na-ahụ maka ụgwọ gọọmentị ji wepụtara akwụkwọ ha ma gosi ụlọomeiwu site n’aka onyeisi ha bụ Sịnetọ Aliyu Wamakko.

    E nwekwara atụmatụ ịtụkọ ego ruru ijeri dọla abụọ ($2bn) site n’ime obodo.

    Tinubu kwuru na a ga-eji ego ahụ agbazitere rụọ okporoụzọ, ọrụ ugbo, nchekwa, ọkụ latrik nakwa mgbasaozi tekịnụzụ.

    E tinyela ijeri dọla atọ ($3bn) maka iwulite ọkporoụgbọoloko site na Portharcourt ruo Maiduguri.

    Ọtụtụ ndị sịnetọ kwadoro atụmatụ a, ma kwuo na ọ bụ ji menyere mpaghara ọbụla na Naịjirịa ma kwuo na ọ bụkwa iji gbasoo ugboro nwulite obodo na-aga n’ihu na mbaụwa.

  11. Gọvanọ Enugwu steeti, Peter Mbah enyela mmadụ isii ọrụ kọmịshịọna ọhụrụ

    Gọvanọ na-achị Enugwu steeti bụ Peter Mbah enyela mmadụ isii ọrụ kọmịshịọna ọhụrụ ma nwegharịa ụlọọrụ kọmịshịọna atọ ndị ọzọ.

    Gov Mbah mere nke a dịka ọ nwegharịrị ụlọọrụ ndị ọrụ ya ma nwepụtakwa onyeisi ndị ọrụ ọhụrụ n’Enugwu steeti bụ Drọkịnta Godwin Anigbo.

    Chizoba Ogbodo bụ onye si na mịnịstrị na-ahụ maka iwu obodo (Ministry of Justice) hụrụ na e duru ndị ahụ niile e nyere ọrụ n’iyi ọrụ n’ime obi Gọọmenti steeti ahụ.

    Kọmịshịọna ndị e nyere ọkwa ọhụrụ gunyere:

    • Benjamin Osita Okoh (Kọmịshịọna na-ahụ maka ọrụ na mmepe obodo).
    • Benedett Ekwutosi Okoli (Kọmịshịọna na-ahụ maka ịzụnite mmadụ na iwepụ ụbịamụ/agụụ).
    • Enyinna Franklin Ogbonna (Kọmịshịọna na-ahụ maka ọkụ na ọnatarachi dị n’ala).
    • Samuel Ogbu-Nwobodo (Kọmịshịọna na-ahụ maka azụmaahịa, ọrụ bara mbara na ebe gọọmenti na-etinye akụnụba).
    • Ọkacha mara George Ugwu (Kọmịshịọna na-ahụ maka ahụike).
    • Ben Collins Ndu Jr. (Kọmịshịọna na-ahụ maka akụnụba dị na mmiri).

    Mbah gwara ndị niile o nyere ọrụ na gọọmenti ya nwere ka ya si amara nke onye na-eme n’ọkwa o ji ma gwa ha gbaa mbọ mee nke ọma n’ohere e nyere ha ịga ozi.

  12. Ndị mmadụ na-azọ nri n’agbanyeghị ogbunigwe na-ada na Gaza

    Dịka ogbunigwe mba Izrel na-ada na Gaza, igwe mmadụ na-anụ ọgụ na azọ nri.

    N’akụkọ a, foto gosiri etu ogbunigwe si gbasasịa ụlọ ndị mmadụ nakwa etu ndị ọrụ gbatagbata si enwe nnsogbu ị bubata ihe ha ji enyere ndị mmadụ aka.

    Photo nke a gosiri ụmụ Palestine bu nnukwu akpa ‘fụlawa’ nke si mpaghara Khan Younis.

    Ogbunigwe mba Izrel tụrụ na mpaghara Ugwu Beit Lahia gbasara ọnọdụ ahụihe ebe nke ahụ dịka foto ụgbọala ụlọọgwụ ha si gosi.

  13. Oke agụụ na-emekpa ndị bị gburugburu Gaza ahụ - Ọtụtụ ụlọọrụ enyemaka

    Ihe karịrị ụlọọrụ enyemaka dị otu nari ekwuola na 'oke agụụ' ezuola gburugburu Gaza ugbua dịka ha na-ebo mba Izrel ebubo igbochi ibubata nrị na mpaghara dị iche iche na Gaza.

    kemgbe abali abụọ, mmadu iri atọ na atọ anwụọla n'ihi erighị nri na-edozi ahụ, dịka Mịnịstrị ahụike nke ndị Hamas na-ahụ maka ya na Gaza siri kwuo.

    Nkwupụta ụlọọrụ ahụ wepụtara kwuru na ha "na-ahụ etu ndị ọrụ ibe ha na ndị mmekọ ha si ala n'iyi n'ihu ha".

    Cheta na mba Izrel kwuru n’ụbọchị Tuzde 22 Julaị, na-enwere "ugbọala gwongworo rụrụ nari itoolu na iri ise bu ngwa nri na ihe enyemaka ndị ọzọ nke na-achọ ka ndị na-arụ ọru enyemeka bịa nara ma kesara ya ndị mmadụ.

  14. Praịm Minista mba Japan anabatala nkwekọrịta azụmahịa nke Onyeisiala Trump

    Praịm Minista mba Japan Shigeru Ishiba ekwuola na ya nabatara nkwekọrịta azụmahịa nke Onyeisiala mba Amerịka kwuru dị n’etiti mba abụọ ahụ.

    Japan, otu n’ime mba ha na mba Amerịka kachasị azụ ahịa, kwetara na ha na mba Amerịka enweela nkwekọrịta ga-eme ka tarifu na ụtụisi a na-akwụ n’ụgbọala si mba Japan belata site na pasent 25 ruo pasent 15.

    Cheta na Onyeisiala Donald Trump kwuru na mba Amerịka, Japan na Philippine enweela nkwekọrịta azụmahịa, n’ihe ga-abụ nnukwu mgbanwe n’agha tarifu ya.

    Onyeisiala mba Amerịka kwupụtakwara nkwekọrịta nke ha na mba Philippine ma kwuo ọtụtụ ihe banyere nkwekọrịta ha na Indonesịa nke e kwupụtara izu gara aga.

    Nkwupụta ndị a na-abịa tupu abalị mbụ nke ọnwa Ọgọst nke Onyeisiala Trump kwuru na tarifu ga-amalite arị elu.

    Ka ọ dị ugbua, obi ọchịchị mba Amerịka ewepụtabeghị ozi ọbụla banyere nkwekọrịta ndị ahụ.

  15. Ụmụ Igbo, mma mma nu

    Nnọọ n’ọgbakọ BBC News Igbo taa bụ Wenezde 23 Julaị.

    Anyị ga na-ewetere unu akụkọ ihe na-eme n’ala Igbo, Naịjirịa nakwa ụwa niile dịka unu na-esonyere anyị.

    Biko sonyekwara anyị n'akara Facebook, Instagram na ọbaozi WhatsApp Channelụ anyị.

    Anyị na-asị ka udo chịa na ndụ anyị niile.

    Ya gazie!

  16. Lee etu nnukwu ụgbọala gwongworo si daa n’ime ahịa n’Abia steeti

    Nnukwu ụgbọala gwongworo dara n’ime ahịa osisi (Timber) n’Umuahia, Abia steeti n’ụbọchị Tuzde Julai 22, 2025 nke mere na ọtụtụ ndị ahịa jiri gbanarị ọnwụ.

    Ụgbọala ahụ mebiri ọtụtụ ihe dịka ọgba tumtum nakwa ngwaahịa ndị mmadụ.

    Ndị ahịa ihe ahụ metụtara gunyere Helen Onwuegbu, Oluchi Asoha kenerele Chineke na mmadụ anwụghị n’ihe mgberede ahụ.

    Ha kwuru na ọ bụ ọnọdụ ajọ ụzọ, mkpamkpa idere mmiri na-akpa ebe ahụ so n’ihe na-akpata ihe mgberede okporoụzọ na mpaghara ahụ.

    Onyeozo kwuru okwu bụ onyeisi otu jịkọrọ ndị ahịa Osisi bụ Luke Anozie Ufomadu nyọrọ gọọmenti ka ha tinye anya n’ihe gbasara ajọ ụzọ na mpaghara ahịa ahụ.

  17. Ụlọọrụ UN adọọla Izrel aka na ntị banyere etu mwakpo ha si emetụta Gaza

    Onyeisi ụlọọrụ UN adọọla mba Izrel aka na ntị banyere etu mwakpo ha si emetụta ndị bi na Gaza dịka ọnọdụ ọdịmma mmadụ na-akawanye njọ n'oge mwakpo ahụ.

    Onye odeakwụkwọ mba ofesi nke mba UK bụ David Lammy gwara BBC na ọ 'na-arịa ọrịa' maka "ihe dị egwu" a na-ahụ na Gaza.

    O sonyekwara mba iri abụọ na asaa ndị ọzọ n'ịkatọ ogbugbu "dị egwu" nke ọtụtụ narị ndị Gaza na-agba mbọ inweta nri n’ebe enyemaka Izrel.

    Cheta na UN kwuru na Mọnde na ọ na-anata akụkọ banyere ndị na-eri nri na-adịghị edozi ahụ na-abata n’ụlọọrụ ahụike n’ọnọdụ ahụike jọrọ njọ.

    N’aka nke ọzọ, ụlọọrụ World Health Organization kwuru na mwakpo Izrel mere na mpaghara etiti Gaza emebiela ọrụ ụlọọrụ ahụ na-arụ, dịka a wakporo ụlọọrụ ya; mana Izrel ekwubeghị okwu banyere ya.

  18. A na-enye ndị kwagara mba Amerịka a chụgara ụlọmkpọrọ na El Salvador mmekpaahụ - Venezuela

    Mba Venezuela ekwuola na ọ ga-amalite inyocha ebubo kwuru na a na-enye ndị kwagara mba Amerịka a chụgara n’ụlọmkpọrọ dị na El Salvador mmekpaahụ nke megidere ikike dịrị mmadụ.

    Akụkọ kwuru na a chụgara ihe karịrị ndị Venezuela mmadụ narị abụọ na iri ise n’akụkụ Karakas na Fraịde. A kpọchiri ha n’ụlọmkpọrọ na El Salvador kemgbe ọnwa Maachị ka a chụpụrụ ha n’Amerịka.

    Onye ọkaiwu Venezuelan Tarek William Saab kwuru na enweela “mmekpaahụ dị n'usoro” n'ime ụlọmkpọrọ, nke gụnyere mmetọ mmekọahụ, iti ihe kwa ụbọchị na inye ndị mkpọrọ nri rere ure.

    Ka ọ dị ugbua, ndị ọchịchị El Salvador ekwubeghị ihe ọbụla maka nke a.

  19. Igbo ndị ọma, ụtụtụ ọma

    Nnọọ n’ọgbakọ BBC News Igbo taa bụ Tuzde 22 Julaị.

    Anyị ga na-ewetere unu akụkọ ihe na-eme n’ala Igbo, Naịjirịa nakwa ụwa niile dịka unu na-esonyere anyị.

    Biko sonyekwara anyị n'akara soshal midịa nke gụnyere Facebook, Instagram na ọbaozi WhatsApp Channelụ anyị.

    Ka ụbọchị taa mara anyị niile mma.

    Udo dịrị gị!

  20. United Kingdom na mba ruru 25 akpọọla oku ka agha kwụsị na Gaza maka ahụhụ ndị nkịtị na-ata

    United Kingdom na mba ndị ọzọ ruru iri abụọ na ise ejikọọla aka ọnụ kpọọ oku ka agha kwụsị na Gaza ugbua.

    Ha mere ka a mata nke a site n'ozi ha na mba ndị ọzọ binyereaka ma kwuo na “agha ahụ dị na Gaza kwesiri ịkwụsị ugbua maka na ahụhụ ndị mmadụ na-ata adịla nnukwu karịa”.

    Ha kwuru na usoro mba Izrel wepụtara ndị ọlụ enyemaaka gbatagbata dị njo, na-akpalịte ntisa obodo ma megide ikike dịaala mmadụ.

    Ha katọrọ etu e si egbu ndị nkịtị na Gaza, ụmụaka bu ndị na-achọ ịkute mmiri ọṅụṅụ, ma kwuo na "ọ dị njọ na ndị Palestin ruru 800 na-achọ enyemaaka ka e gburu".

    Ha kpọrọ oku ka ndị niile so anụ agha chekwaa ikike dịaala mmadụ na Gaza ma katọọ atụmatụ ịchụpụ ndị Palestine na be ha, ikegharị ala ha na ihe ndị ọzọ.

    Ha kwuru na ha kwadoro usoro udo mba Amerịka, Katar, na Ijipt wepụtara maka Gaza ma kwee nkwa na ha ga-enyere aka ka agha kwụsị ozigbo ozigbo na Gaza.

    Mba dị icheiche binyere aka n’akwụkwọ ozi ahụ gunyere Australia, Austria, Belgium, Kanada, Denmark, Estonia, Finland, Fransi, Iceland, Ireland, Italy, Japan, Latvia, Lithuania, Luxembourg, Netherlands, New Zealand, Norway, Poland, Portugal, Slovenia, Spen, Sweden, Switzerland dgz.