Ụlọikpe amaala Donald Trump ikpe n'ebubo 34 niile e boro ya maka ime mpụ

Akụkọ dị mkpa na Naijiria na mbaụwa n'ọnwa Mee, afọ 2024.

Mkpuchi Na Eme Ozugbo

Uche Akolisa, Chinonso Ugorji, Michael Ilediagu

22 Mee 2024Ikuku anwụrụ si n’igwe na-enye ọkụ latrịk egbụọla ụmụakwụkwọ na Naịjirịa
Ebe foto si, Getty Images
Ụmụakwụkwọ mahadum asaa anwụọla ka ha kuru ikuku sitere n’igwe na-enye ọkụ latrịk n'ụlọ egwu dị na Bayelsa steeti n’Naịjirịa.
Ekwuru na ụmụakwụkwọ ndị a mụrụ anya n’abalị Mọnde ebe ha na arụ ọrụ egwu wee daa n'ụra dịka igwe ọkụ latrịk ahụ ka na-arụ ọrụ.
A na-enyo enyo na ọbụ ikuku carbon monoxide ha kuru gburu ha mana ndị uweojii kwuru na nyocha ka na-aga n'ihu.
Ọtụtụ ụlọọrụ na ezinaụlọ na Naịjirịa na-adabere na igwe ọkụ latrịk n'ihi na ha anaghị enwe ọkụ.
Akụkọ kwuru na achọpụtara ozu isii n'ụtụtụ Tuzdee, ebe otu onye n'ime ha, nke ka na-eku ume ka e bugara ụlọọgwụ dị nso mana o mechara nwụọ.
Ndị bi na mpaghara ahụ tiri mkpu gbata gbata mgbe chọpụtara ozu ha n’ụlọ egwu ahụ.
Mgbe ndị uweojii bịara, ha bupuru ozu ụmụakwụkwọ ahụ maa gbochie ndị mmadụ ịbata ebe ahụ.
Ọnụ na-ekwuru ndị uweojii na steetị ahụ bụ Musa Mohammed gwara BBC na-ebidola nnyocha iji chọpụta ma ọ bụ ikuku carbon monoxide sitere n’igwe ọkụ jeneratọ gburu ndị ahụ.
Ụmụakwụkwọ ahụ bụ ụmụakwụkwọ mahdum Niger Delta University (NDU) dị na Amassoma. Ha ji iti egwu wee na-akwado onwe ha.
Nke a abụghị oge mbụ ikuku anwụrụ sitere na igwe ọkụ latrịk na-egbu ndị mmadụ n’Naịjirịa, maba kachaa emepụta mmanụ ụgbọala n’Afrịka.
N’afọ 2009, ihe ruru mmadụ 13 sị n’otu ezịnaụlọ nke gunyere ụmụaka nwụrụ ka ha kuru uzu ọkụ sitere na igwe ọkụ latrịk mgbe ha na-arahụ ụra n’Imo steetị dị na mpaghara ọnwụwa anyanwụ Naịjirịa.
Nnyocha ụlọọrụ International Energy Agency mere kwuru na ndị Naịjirịa bụ igwe ọkụ latrịk ka ha ji egbo mkpa ọkụ ruru pasentị 40.
Ọkụ latrịk na anaghị adị bụkwa nsogbu ndi mmadụ na-enwe naagbegheghi na Naịjirịa so na mba kachaị emepụta mmanụ n’Afrịka.
Onyeisiala Bola Tinubu nyere iwu na nso nso a ka ụlọọrụ gọọmentị ọbụla zuta naanị ọgbọala na igwe jeneratọ nke na-anaghị eku uzu ọkụ iji chekwaba ndụ ndị mmadụ.
22 Mee 2024NLC agbajọọla N54,000 ụgwọ opekatampe dịka nzụkọ na-aga n'ihu
Ebe foto si, NLC
Gọọmentị etiti bụ ndị kwerenkwa na mbụ sị na ha ga akwụ ụgwọọnwa opekatampe N48,000 ekwụọla na ha ga emezi ego ahụ ka ọ bụrụ N54,000.
N'agbanyeghi nke a, otu jikọrọ ndị ọrụ gbajọrọ ego ahụ gọọmentị kwerenkwa ya ọhụrụ.
Mana ndị ọrụ bụ Nigeria Labour Coungress (NLC) na ndị ahịa bụ Trade Union Congress (TUC) na ekwu na ha chọrọ ka akwụọ ha N615,000 dịka ụgwọọnwa opekatampe.
Nzụkọ ndị NLC, TUC na gọọmentị etiti Naịjirịa mere na ụbọchị Tusde amịtahị ezi mkpụrụ nke mere e jị tinye nzụkọ ọzọ taa bụ Wenzde.
Onyeisi otu NLC bụ Joe Ajero na-ekwu na ụgwọ ọhụrụ gọomentị etiti weputara "enweghi ka ọ ha ma ncha".
21 Mee 2024Ndị uweojii ememilaala ndị ekperima, napụta ha ngwaọgụ na Delta steeti
Ebe foto si, NIGERIAN POLICE
Ndị uweojii Naịjirịa ememilaala ụfọdụ ndị ojiegbe na Delta steeti ma napụta ha ngwaọgụ iri ha zuru n’ohi tinyekwara nke ha onwe ha.
Ọnụ na-ekwuru ndị uweojii Naịjirịa bụ Olumuyiwa Adejobi kwupụtara nke a n’ozi o zipụrụ n’ụbọchị Tuzde 21 Mee 2024.
Dịka ozi ahụ siri kwuo, ndị uweojii si na ngalaba FID-IRT na ndị ekperima ahụ kwakọrịtara onwe ha mgbọ bụ nke mere e ji memilaa ụfọdụ n’ime ha.
Na nso nso a ka ndị ndị ekperima wakporo ma gbuo ndị uweojii iri na atọ n’okeọhịa Ohoro dị n’Ughelli nke Delta steeti.
Ebe foto si, NIGERIAN POLICE
Ebe foto si, NIGERIAN POLICE
21 Mee 2024Ihe mere NLC ji nye gọọmentị Anambra abalị abụọ ịmezu ihe ha chọrọ
Ebe foto si, NLC/Facebook
Otu abụọ jikọrọ ndị ọrụ na Naịjirịa bụ NLC nakwa TUC n'ịchafụ agwaala ndị otu ha n'\Anambra steeti ha kwado maka abụbụọrụ n'ụbọchị TRọzde maọbụrụ na gọọmetị steeti ah u emezughi ihe ha kwuru.
Cheta na abalị ole ma ole gara aga, ha nyere ọchịchị Gọvanọ soludo abalị asaa iji manye ụgwọ opekatampe na steeti ahụ nke e tinyere n'afọ 2019.
Ihe ndị ọzọ ha bituru aka bụ etinyeghi ndị ọrụ odeeakwụkwọ ebighebi kemgbe afọ abụọ, atụmatụ ụgwọ ezumike nka erubeghi ndị nwe ya aka, mwepu ụgwọ N12,000 wage award n'etiti ihe ha kpọrọ 'oke ahụhụ na agụrụ n'ala"
N'akwụkwọ edemede nke otu ndị ọrụ ahụ dere n'izu gara aga, ha kwuru na ha edebuola edemede ọzọ n'ụbọchị ise nke ọnwa Maachị mana ọ mịtaghị mkpụrụ.
N'ozi edemede nke ọnwa Mee, ndị isi oche na ndị odeakwụkwọ otu ndị orụ bụ Humphrey Nwafor, Gaius Chukwuka, Chris Ogbonna nakwa Alex Ebi, ha sị na ha gbarụrụ ihu maka atụmatụ 'contributory pension' dịka wayo eji anapụ ndị ọrụ ụgwọ ezumike nka n'etinyeghi ụgwọ nke gọọmentị nakwa nke ndị ọrụ enweghi ike inweta ma ha laa ezumike nka ahụ.
"Ọ bụrụ na emezughi ihe ndị a anyị rụtụrụ aka, anyị enweghi ike ịkwe ka udo na ezumike n'Anambra steeti.
N'aka nke ya Gọvanọ na-achị Anambra steeti akpọọla oku ka otu ndị ọrụ nwee ndidi.
N'zoi nke ọnụ na-ekwuru ya bụ Christian Aburime weputara, ọ sị "anyị amalitela atụmatụ ịza mkpa niile nke ndị orụ wetaara anyị
Ọ ga-adị mma ka NLC cheta ihe niile gọomentị Soludo na-eme iji hụ maka ọdịmma ndị ọrụ na steetị ahụ".
20 Mee 2024Hope Uzodimma agaala leta ndị nwere ihe mberede n’Imo steeti
Aka na-achị Imo steeti bụ Hope Uzodimma agaala leta ndị zutere ihe mberede n’okporoụzọ IMSU Junction n’ụbọchị Satọde gara aga.
Ọ bụ n’ụbọchị Mọnde 20 Mee 2024 ka Uzodimma gara leta ndị ahụ nwere ihe mberede okporoụzọ n’ebe ha na-anara ọgwụgwọ n’ụlọọgwụ Federal University Teaching Hospital Owerri (FUTHO).
N’oge ọ na-ekwu okwu, onye nọchitere anya Gọvanọ Uzodimma na njem ahụ bụ osote ya, Chinyere Ekomaru, kwuru na gọvanọ enyela iwu ka e mee nnyocha iji chọpụta ihe butere ọdachị ahụ.
Ọ makwara ọkwa na gọọmenti Imo ga-akwụ ụgwọ ụlọọgwụ mmadụ niile nwetara ihe mmerụahụ n’ihe mberede ahụ.
N’oge ya na ndị ahụ nwere ihe mberede na-akparịtaụka, Ekomaru kpuhere na gọọmenti ga-agbakọorọ ụlọọgwụ ahụ aka iji hụ na ha nwetara onwe ha na-egbughị oge.
Cheta na Gọvanọ Uzodimma ezipụrụla ezinaụlọ ndị tufuru ndị nke ha n’oge ihe mberede ahụ ozi nkasiobi ma kwee nkwa na gọọmenti ya ga-eme ezi nnyocha banyere njinji ahụ.
Mmadụ isii tụfuru ndụ ha ebe ọtụtụ ndị ọzọ nwetara ihe mmerụahụ n’ụbọchị Satọde n’ihe mberede mere n’okporoụzọ IMSU Junction nke dị n’isi obodo Imo steeti bụ Owerri.
20 Mee 2024Gaza War: ICC eweputala akwụkwọ ịnwụchi Netanyahu na onyeịsị Hamas
Ebe foto si, Getty Images /EPA
Onyeisi ndị na ekpere International Criminal Court (ICC) ikpe bụ Karim Khan KC etinyela akwụkwọ ka a nwụchie onyeisiala mba Israel bụ Benjamin Netanyahu nakwa onye ịsị Hamas, Yahya Sinwar maka ebubo ịgbụ ọtụtụ mmadụ.
Karim Khan KC kwuru na ha were ọtụtụ ihe akaebe na egosi na ndị Israel gburu ọtụtụ ndi aka ha di ọcha nke megidere ikike diara mmadụ.
Na okwu ya “Site na ihe akaebe anyị nwetere, nke anyị nyọchala ma tulee ọfụma, enwere nkweye na okpekatampe ndị ịsị Hamas mmadụ atọ gunyere Hahya Sinwar nwere dara ịwụ mba ụwa na mba Israel na abalị asaa nke ọnwa Oktọba, na afọ 2023”.
“Iwụ ha dara gunyere igbu mmadụ, ntọrọ mmadụ, ịdịna nwanyị n’ike na ịkpọchapụ ọgbọdọ so na ịda ịwụ agha na ihe ndị ọzọ” “enwekwara m nkweye taata, site na ihe akaebe anyị nwetara ma nyọchaa ọfụma na Praịm Mịnịsta ndị Israel, Benjamin Netanyahu na onyeisi ndiagha Israel daala ịwụ agha na mba Palestine bịdọ na ụbọ nke asatọ na ọnwa ọktọba, 2023”.
“Ịwụ ha dara gunyere ịjị ịkpọ ndị Palestine agụrụ dịka ụsorọ e jị anụ agha. Ịtụ ogbunigwe ebe ndị nkịtị nọ, igbu mmadu na ọha na ihe ndị ọzọ”
20 Mee 2024Ụlọikpe kachasị na Saụt Afrịka egbochiela Jacob Zuma ịzọ ọkwa ọchịchị
Ebe foto si, EPA
Ụlọikpe kasịelu na Saụt Afrịka amachiela onye bubu onyeisiala mba ahụ bụ Jacob Zuma ịzọ ọkwa na ntụlịaka a ga eme n’ịzụụka na abịaabịa maka ndị ome ịwụ na mba ahụ.
Ụlọikpe ahụ mara Zuma ikpe maka nnụpụịsị, tụọ ya nga ọnwa ịrị na ise ma machie ya iso mee ntụlịaka.
Na afọ 2021 ka amara Zuma ikpe maka na ọ bịahị kwụrụ ọnụ ya na oge a na eme nyọcha gbasara ọchịchị ya dịka onyeisiala mba Saụt Afrịka ka ọchịchị ya gwụrụ na afọ 2018.
Zụma sonyere otu ndọrọndọrọ ọchịchị uMkhonto weSizwe (MK) nwere na achụ nta vọọtụ kengbe ya na ndị African National Congress (ANC) bụ ndị nọ na ọchịchị sere okwu.
Ode akwụkwụ ndị MK, Sihle Ngubane kwuru na ihe ụlọikpe kwụrụ bụ ihe nwute mana ọ gahị emetụta ịchụnta vọọtụ ha ma kwụọ na ihu Jacob Zuma ka ga adị n’ịhụ akwụkwọ eji eme ntụlịaka na Maay 29.
Na okwu Shihle “ọ ka bụ onyeisi otu ndọrọndọrọ ọchịchị anyị. Ihe ụlọikpe kwụrụ a ma mmetụta ịchụnta vọọtụ anyị”.
19 Mee 2024Mba DR Congo apịnyụọla atụmatụ ịnapụ ọchịchị n'ike taa
Ebe foto si, Getty Images
Ndị agha mba Kongo ekwuola na ha apịnyụọla atụmatụ ndị bu egbe nwara ịnapụ ọchịchị n'ike n'aka onyeisiala Felix Tshisekedi n'isi obodo Kinshasa.
Ọnụ na-ekwuru ndị agha mba ahụ bụ Sylavin Ekenge kwuru n'igwe onyonyo na anwụchiela ụfọdụ mmadụ nakwa na ihe niile dị "jụụ".
Okwu ya na-abịa dịka ọ gachara ụfọdụ elekere awakporo ụlọ ezi enyi onyeisiala Felix Tshisekedi n'ụzụ ụtụtụ ụbọchị ụka bụ Vital Kamerhe.
Ndị hụrụ ebe ihe mere kwuru na ndị bu egbe ruru iri abụọ wakporo ụlọ nwoke ahụ ma soro ndị nchekwa nọ ebe ahụ kwaa mgbọ.
Ndị nche abụọ nakwa otu onye ji egbe nwụrụ na nwakpo mere na be Kamerhe dịka onye na-ekwuchitere ya si kwuo.
O nwebeghi ihe onyeisiala Tshisekedi kwuru maka ihe a mere.Ndị ntaakụko mba ahụ na-ekwu na ndị mere ya bụ mwakpo bụ ndị otu akpọrọ 'New Zaire Movement' bụ nke Christian Malanga a chụpụrụ na mba ahụ binyere aka na ya.
19 Mee 2024Oke ifufe egbuola mmadụ 7 na Houston, Texas
Ebe foto si, Rex Features
Oke ifufe na egbe eluigwe egbuola mmadụ asaa ma kopu eriri ọkụ latrik ihe karịrị mmadụ narị puku ise (500,000) na mpaghara ọwụwa anyanwụ Texas.
Ihe kachasị gbuo ndị mmadụ bụ osisi ndị dara ada, eriri ọkụ latrik na amụma mmiri.
Ugbua, oke ifufe ahụ echewela ihu n’obodo gbara Texas agbataobi bụ Louisiana dịka etinyere ihe ịdọ aka na ntị maka idemmiri.
Akụkọ kwuru na mmadụ atọ nwụrụ n’abalị Fraịde 17 Mee 2024, ndị gụnyere agadị nwaanyị gbara afọ 85 ọkụ latrik dọgburu site n’amụma mmiri, otu nwoke gbara afọ 57 nwụrụ dịka ọ na-ewezuga osisi poolu latrik dara ada nakwa nwoke ọzọ ọkụ latrik dọgburu.
19 Mee 2024Onye nkuzi Mahadum na mmadụ ise ọzọ anwụọla n'ihe mberede IMSU
Ndụ funariri mmadụ isii n'abalị satọde mgbe otu ụgbọala gwongworo kwakọtara ụgbọala ndị ọzọ nakwa ndị nkịtị kwụ n'ebe akporọ IMSU junction dị n'Owere Imo steeti.
Otu onye nọ ebe ihe mere ma sorokwa buga ndị merụrụ ahụ ụlọọgwụ gwara BBC Igbo na ihe ahụ mere ebe elekere asaa nke mgbede.
Ụgbọala ukwu ahụ bụ nke dara iwu usoro okpoorụzọ ma kụrụ ụgbọala ndị nọ ebe ahụ kụnye ha n'osisi ọkụ latrik dị nso ebe ahụ ka ọ kọwara.
Ọ sị na otu onye nwụru ebe ahụ kpọm kwem ebe mmadụ ise ndị ọzọ nwụrụ n'ụlọọgwụ FMC dị n'Owerre.
Otu onye n'ime ndị nwụrụ na ya bụ ọdachi bụ Dr Nicholas Isinnwa bụ onye nkuzi na Mahadum IMSU dị nso n'ebe ihe ahụ nọ me.
Nwanne onye nkuzi ahụ sị na ọnwụ ya bụ nke dị njọ ma wute ya.
Ọnụ na-ekwuru ndị uweojii n'Imo steeti kwetara na mmadụ isii nwụrụ na ya bụ ọdachi ebe ndị ọzọ na-anata ọgwụgwọ n'ụlọọgwụ FMC dị n'Owere.
Ebe foto si, Supplied
18 Mee 2024Nyere nụ m aka kpọlata ụmụ m - Nwaanyị ụmụ ya na-efu efu na-arịọ ndị nchekwa n'Abia
Ebe foto si, OSINACHI FAMILY
Eze obodo Ama’ba Oboro dị n’okpuruọchịchị Ikwuano nke Abia steeti bụ Eze Emmanuel O’tuwa nke mbụ arịọla gọọmenti na ndị ọrụ nchekwa Abịa steeti ka ha mee ngwangwa napụta ụmụntakịrị atọ si n’otu ezinaụlọ a tọọrọ n’obodo ya na nso nso a.
N’ozi e mere ka o ruo anyị aka, Eze O’tuwa kwuru na ọ bụghị naanị na obi ndị obodo ahụ na-agba ọbara kama ọnọdụ ọjọọ ahụ aghasaala ha ahụ.
O kwupụtara mkpa ọ dị ndị ọrụ nchekwa ịgbasi mbọ ike iji hụ na a chọtara ụmụaka ahụ ma kpọghachitere ha ndị mụrụ ha.
N’okwu ya, nne ụmụntakịrị ahụ bụ Glory Osinachi sịrị na onye ọkada amaghị onye ọ bụ zuuru ụmụ ya atọ n’ụbọchị Fraịde ma kpọrọ ha gawa ebe amaghị.
Osinachi sịrị na ụmụ ya gara ileta nne ha ochie n’Ama’ba Ime oge ha lọtara akwụkwọ n’ụbọchị Fraịde izuụka gara aga ma si etu ahụ bụrụ ndị furu efu.
O kwuru na enyela mkpesa n’ụlọọrụ ndị uweojii dị n’Ikwuano ma kpọkuo ndị ọrụ nchekwa niile ka ha nyeere ezinaụlọ ya aka ịchọta ụmụ ya na-efu efu.
Ka osiladị, ụlọọrụ ndị uweojii n’Abịa steeti ekwuola na ha na-achọ onye ọkada ahụ tọọrọ ụmụnne atọ n’Ama’ba Ime Oboro.
Ọnụ na-ekwuru ndị uweojii n’Abịa steeti bụ Maureen Chinaka kwuru na ndị uweojii nwetara mkpesa banyere okwu ahụ dịka ha na-eme nnyocha banyere ya.
Ọ bụ n’ụbọchị Fraịde 10 Mee 2024 ka anyị nwetara ozi na onye ọkada tọọrọ ụmụnne atọ n’oge ọ na-akpọlata ha ụlọakwụkwọ dị n’Ama’ba Ime Oboro dị n’okpuruọchịchị Ikwuano nke Abịa steeti.
Ụmụntakịrị ahụ gụnyere Gideon Osinachi gbara afọ asatọ, Divine Osinachi gbara afọ isii na Israel Osinachi gbara afọ anọ.
18 Mee 2024Sean 'Diddy' Combs: Ihe onyonyo yiri nke Diddy gosiri ebe ó na-eti Cassie Ventura ihe agbaala
Ebe foto si, Getty Images
Max Matza, BBC News
Ihe onyonyo CCTV gosiri ebe onye yiri otiegwu mba Ameríka a ma ama bụ Sean "Diddy" Combs dịka ọ na-eti ọgụegwu Casandra "Cassie" Ventura ihe n’otu ụlọnkwari n’afọ 2016 agbaala.
Ihe onyonyo ahụ nke ụlọntaakụkọ CNN gosiri, pụtara ihe dịka Ventura gbara p.Diddy akwụkwọ n’afọ gara aga.
Ventura enwebeghị ihe o kwuru maka ihe onyonyo ahụ mana ọkaiwu ya kwuru na o gosiri ụdị “agwa mkpagbu Combs na-akpa.".
Ọkaiwu Combs asaghị BBC ajụjụ banyere okwu ahụ.
BBC enyochabeghị ihe onyonyo ahụ nke e cherere n’ọbu n’abalị ise nke ọnwa Maach afọ 2016 ka e sere ha.
Dịka CNN si kwuo, e sere ihe onyonyo n’ụlọ nkwari ‘InterContinental Hotel’ dị Los Angeles bụ nke mechierela ugbua.
Ihe onyonyo ahụ gosiri ka Nwaada Ventura na-ahapụ ọnụụlọ hotel na-agaje ebe igwe e ji arị ụlọelu , oge otu nwoke eyighị akwa elu kama ọ ma tọwel n’ukwu ji ọkụ ọkụ chụso nwaada ahụ.
Oge ọ gbakwudoro ya, o jidere ya tụọ ya n’ala, ụfọdụ ngwogwo nwaanyị bu daa n’ala.
Ọ gbara ya ọkpa dịka ọ nọ n’ala, tupu ọ tụta akpa nke nwaanyị ma gbakwa ya ụkwụ ọzọ. Ma mailite ịdọkpụ ya n’akwa elu nke nwaanyị yi.
Onye ahụ na-akụ nwaanyi ahụ ihe pụrụ nwa oge ma lọghachi kwaa ya aka dịka ọ na-agbali ikulite. Ọ gara n’ihu nọrọ ala n’oche na nso igwe e ji arị elu ụlọelu ma tụọ otu ihe.
Ọkaiwu na-anọchite Nwada Ventura bụ Douglas Wigdor, kwuru na o zi o wepụtara sị: "Ihe onyonyo ahụ na0-achịgharị eriri afọ agbala akaebe ezie ụdị agwa mgbagbu Maazi Comb na-akpa.”
"Ọnụ agaghị akọli ụdị ịka obi Nwaada Ventura nwere ịpụta gbaa ihe a n’anwụ.”
Ụlọọrụ ọkaiwu Gọọmenti nke mpaghara Los Angeles kwuru ụbọchị Fraide na ọkụkụ ihe ahụ e gosiri n’ihe onyonyo eteela aka o mere nke na a gaghị eji li maka ya kpụpụ mmadụ ụlọikpe.
Ozi ha kwuru sị, "Anyị hụrụ ihe onyonyo a dị nnukwu njọ nke na ọ hịara ahụ ikiri.”
"Ọ bụru na ihe mere ebe ahụ bụ n’afọ 2016 ka o mere, anyị agaghị enweli ike ịkpụpụ onye ahụ ụlọikpe n’ihi na ọ gafeela oge e nwere ike iji boo mmadụ ebube maka iti mmadụ ihe.”
N’akwụkwọ ọ gbara n’afọ gara aga, Nwaada Ventura boro ebubo na “n’ebe Maach afọ 2016” na oke mmanya na-egbu Maazị Combs, ọ kụọ Nwaada Ventura ọkpọ n’ihu , kụnye ya anya ojii n’anya.”
"Ka ụra buru ya, Nwaada Ventura gbalịrị isi n’ọnụụlọ ụlọ nkwari ahụ pụọ, mana dịka ọ na-apụ, Maazi Combs tetara ma malite tiwe ya ya mkpu n’isi.
"O soro ya pụta na paseji ụlọnkwari dịka ọ na-eti ya mkpu n’isi. O jidere ya, ma buru karama e ji etinye flawa tụọ ya, karama awa, dịka ọ na-agba ọsọ ị gbalaga.”
Akwụkọ ahụ ha jiri gba akwụkwọ ahụ bokwara ebubo na Diddy kwuru ụlọ nkwari ahụ ego dị dọla $50,000 (£39,000) ka ha fichapụ ihe onyonyo ahụ nke igwe onyonyo CCTV ha sere.
E kpeziri n’ọnwa Novemba afọ gara aga, akwụkwọ ọ gbaburu Combs nke o ji ebo ya ebubo ndina n’ike nakwa ịgba mgbere mmadụ maka iji ha agba akwụna afọ 10 gara aga n’ọnụ ego a maghị.
Ọkaiwu Combs bụ Benjamin Brafman,kwur oge ahụ na ikweta, ka ha kpezie okwu ahụ, wepụta ya n’ụlọikpe, “ apụtaghị na Comb mere ihe ọjọọ.”
"Mkpebi Maazi Combs ka e kpezie e gosighị na aghụghọ ọ gọrọ na o meghi ihe ndị e boro ya achịtaghị aja.
“ Obi dị ya ụtọ na ya na ya nwere nkwekọrịta, dịka ọ na-ekele Nwaada Ventura ma si ya, ya gazie.”
Kemgbe ahụ, ọtụtụ ụmụnwaanyị ndị ọzọ agbaala akwụkwọ na-ebo otiegwu rapper ahụ ebubo mmetọ.
Ndị ọrụnchekwa awakpoola ụlọ ya dị na Los Angeles, Miami na Florida, n’ọnwa gara aga dịka ha na-enyocha ya maka ebuboo ịgba mgbere mmadụ(human trafficking).
A nabatara Nwaada Ventura n’okpuru ụlọ egwu Combs' a kpọrọ, “Bad Boy”, . Nwaada ahụ tiputara egwu ndị wuru ewu n’agbata afọ 2000, Comb sonyere n’ụfọdụ egwu ndị ahụ nwaada ahụ tipụtara.
Egwu ya wuru ewu gụnyere Me & U, Long Way to Go na ‘Official Gir, nke otiegwu a ma ama bụ Lil Wayne sonyere na ya.
18 Mee 2024Ndị ojiegbe awakpoola ndịagha n’Abịa steeti
Ebe foto si, Getty Images
Ndị ojiegbe amaghị ndị ha bụ awakpoola ndịagha sitere na 14 Brigade Army Headquaters Ohafia ma gbuo ndịagha amatabeghị ọnụọgụ ha.
Ọ bụ mgbe ọ kụrụ ihe dịka elekere 8 nke abalị n’ụbọchị Fraịde 17 Mee 2024 ka awakporo ndịagha ahụ ebe ha na-arụ ọrụ na Park Road n’akụkụ Milverton dị n’Aba, Abịa steeti.
Ozi anyị nwetara kwuru na ndịagha gbara mbọ iguzogide ha mana o dọghị anya ma ndị ekperima ahụ ebuuru ngwaọgụ ndịagha nwụrụ anwụ rie mbọmbọ.
Ụfọdụ ndị nọ na mpaghara Milverton kpuhere na ndịagha anaghị ekwe ka ụmụnwoke gafee mpaghara ahụ ebe a na-agwa ndị nke nwaanyị ka ha chịlie aka elu dịka ha na-agafe.
Otu onye bi na St Michael’s Road gwara ndị ntaakụkọ anyị na ndịagha jiiri iwe pụta n’abalị Fraịde ma na-anwụchi nwoke ọbụla ha hụrụ.
Tupu ruo mgbe e bipụtara akụkọ a, ọnụ na-ekwuru ndịagha 14 Brigade Army Headquarters Ohafia bụ Lt. Omale Innocent ekweghị azaghachi ozi ndị ezigaara ya n’ọbaozi Whatsapp ya.
Ọnọdụ a na-abịa dịka ọ gachara ọnwa ole na ole awakporo ndịagha na Ngwa Road mana enweghị onye tụfuru ndụ ya.
18 Mee 2024Ndị ọkwọụgbọala emeela ngagharịiwe maka ọnwụ onye otu ha na ndị njem n'Abia steeti
Ndị ọkwọụgbọala zọchiri n’okporoụzọ jikọtara steeti ise dị n’ala Igbo iji mee mkpesa maka ọnwụ onye otu ha na ndị njem n’oge ha na-aga Enugwu steeti.
Nke a mere n’ụbọchị Tọzde 16 Mee 2024.
Akụkọ kwuru na ndị ọkwọụgbọala ahụ mere mkpesa maka ọnwụ onye otu ha na ndị njem oge ụgbọala trọk kpọkara ha n’ebe ndị uweojii na-anọ n’akụkụ ahịa ehi dị na mpaghara Umuchieze, okpuruọchịchị Umunneochi nke Abịa steeti.
Ụfọdụ ndị mmadụ kwuru na ndị uweojii kwụsiri ụgbọala bọọsụ bu ndị njem 18 n’abalị Wenezde 15 Mee 2024 mana mgbe onye ọkwọụgbọla zachara ha oku, ha ekweghị ka ọ pụọ n’ihi na ha chọrọ iji ụgbọala ya kwụsị ndị ọzọ tinyere ụgbọala trọk nọ ebe dị anya.
Dịka akụkọ siri kwuo, mbọ niile a gbara ịkwụsị ya bụ trọk kụrụ afọ n’ala n’ihi na breekị ya anaghị arụ ọrụ bụ nke mere o ji kpọkaa ụgbọala bọọsụ ahụ.
Ka osiladị ndị uweojii Abịa steeti nwụchiri onye ọkwọụgbọala trọk ahụ amatabeghị aha ya ma jichie ya.
N’ihi ọnọdụ ahụ, ndị ọkwọụgbọala kwachiri okporoụzọ siri Enugu gawa Aba na Pọtakọt iji mee mkpesa maka ndị nwụrụ n’ihe mberede ahụ.
18 Mee 2024Fake surgery: Ụlọikpe amaala Dr Anuoluwapo Adepoju ikpe
Ebe foto si, INSTAGRAM/MEDCONTOUR
Ụlọikpe amaala otu onye dọkịta na-edozi ahụ bụ Anuoluwapo Adepoju ikpe n’ihi na akaọrụ ya na-ebutere ndị mmadụ ihe mmerụahụ.
Onye bụbu onyeisioche ụlọọrụ Federal Competition and Consumer Protection Commission (FCCPC) bụ Babatunde Irukera kwupụtara nke a.
Akụkọ kwuru na ụlọikpe ukwu etiti dị na Legọs mara Dr Anu ikpe n’ihi ebubo ise FCCPC boro ya.
N’oge ọ na-achabi ikpe n’okwu ahụ, Ọkaikpe Mohammed Liman chọpụtara na aka Dr Anu dị n’ebubo e boro ya ma nye ya ohere ịkwụ nha otu narị puku naịra (N100,000) karịa ịga mkpọrọ.
Dr Anu, onye hiwere ụlọọrụ MedContour Services Ltd danyere na nsogbu n’afọ 2020 dịka ọtụtụ mmadụ boro ya ebubo na ahụ ọ wara ha na-ebutere ha ọtụtụ ihe mmerụahụ.
Otu n’ime ndị Dr Anu wara ahụ bụ Nneka Onwuzuligbo nwụrụ n’afọ 2020 dịka ọtụtụ akụkọ kwuru na ihe butere ọnwụ ya bụ n’ihi ahụ Dr Anu wara ya.
N’oge ahụ, Irukeka bụụrụ onyeisioche ụlọọrụ na-ahụ maka mkpesa ụmụ mmadụ na Naịjirịa bụ FCCPC.
17 Mee 2024Onye ọkada ezurula ụmụaka atọ n'Abia steeti
Ebe foto si, Getty Images
Ndịuweojii Abia steeti ekwuola na ha na ebidola nnyocha ka a chọpụta ebe nwoken ọkada kpọrọ ụmụaka atọ milaa gara.
A na-enyo na otu onye na-anya okada ezurula ụmụaka atọ n'ime obodo Amaoba Ire Oboro dị n' Okpuru Ọchịchị Ikwuano dị n'Abia steeti.
Akụkọ kwuru na nwoke ọkada ahụ bụ onye na-ebute ụmụaka n'ụlọakwụkwọ.
Mana ka ọ dị ugbu a, enweghị onye maa ebe onye okada ahụ maọbụ ụmụaka nọ.
Ọnụ na-ekwuchitere ndị uweoji na steeti ahụ bu Maureen Chinaka gwara BBC Igbo na ndị uweoji nọ na mpaghara obodo ahụ nwetara mkpesa banyere akụkọ ahụ.
Chinaka gara n'ihu kwuo na ebidola nnyocha ka achọpụta ebe nwoke ahụ kpọrọ ụmụaka ahụ gaa.
17 Mee 2024Etu nwa IKB si nwụọ n'ihe mberede okporoụzọ n'Amerịka
Ebe foto si, IKB Igboanugo/Facebook
Akwa arịrị na iru uju ejuputala n’ ezinaụlọ Ichie Ikechukwu Igboanugo a ma dịka ‘IKB’ dịka nwa ha nwoke bụ Uzochukwu Davis Igboanugo lara mmuo n’ihe mberede nke okporoụzọ n’Amerịka.
Uzokwu Igboanugo, onye bụ dọkịta na-ahụ maka anya nwụ®ụ n’ọnwa Eprelu ka ọ gbachara afọ 32ka ọkwọ ụgbọala ya ala ọrụ, dịka nna ya bụ IKB si kwuo n’ozi o wepụtara na soshal media.
IKB kwuru n’ozi ahụ sị, “Ọkwọụgbọla mmanya na-egbu ka ụra buru ka ọna-ekwo ọsọ ọ ga kụo ụgbọala m nwa m nwoke kwọ si ọrụ ala ụra.”
IKB onye gbara ma na nwa ya alụbeghị nwanwaanyị, kọwara nwa ya dịka ‘onye anaghị achọ nsogbu.
Cheta na IKB bụ nnukwu ọgaranya ụlọọrụ na-emepụta ngwahịa ama ama bụ ma kọwaa na nwa ya nwoke bụ dibia oyibo n’ala ọrụ na mba USA, oge onye ọkwọ ụgbọala ṅụrụ mmanya ma na-arahụ ụra na moto ya weere iwe gwọgbụo nwa ya nwoke.
Dịka o siri kọwaa, nwunye ya na ụmụ ya ndị ọzọ nọ na nnụkwu iru uju na ibe akwa, nke ojirị yọọ ka Gọọmentị Amerịka ka ha mee ihe ha kwesiri ime n’ihi ndụ a napụrụ nwa ya nwoke n’ike.
16 Mee 2024A tọrọla ụkọchukwu Rev. Fr. Basil Gbuzuo n'Anambara steeti
Ndị ụlọụka 'Catholic Archdiocese Onitsha' ekwụola na ndị ji egbe a tọrọla otu onye ụkọchukwu aha bụ Rev. Fr. Basil Gbuzuo.N'ozi Chancellor Onitsha Archdiocese bụ Rev. Fr. Prudentius E. Aroh wepụtara, o mere ka amata na a tọrọ onye ụkọchukwu ahụ ụbọchị wenezde 15 Mee 2024 n'okporoụzọ Eke Nkpor-Obosi bypass.N'okwu ya, Rev. Fr. Basil Gbuzuo bụ onye ụkọchukwu Holy Trinity Catholic Parish nke dị n'Ogidi.Ka ọ dị ugbu a, enwebeghi ozi ọbụla enwetagoro site n'aka ndị tọrọ ya.Metropolitan Archbishop Onitsha bụ His Grace, Most Rev. Valerian I. Okeke, kpọrọ ndị otu Kristi n'ụwa gba gburugburu ka ha sonyere ha n'ekpere banyere ọnọdụ a iji hụ na azọpụtara ụkọchukwu Rev. Fr. Basil Gbuzuo.
Ebe foto si, Catholic Archdiocese Onitsha
16 Mee 2024Mmadụ atọ anwụọla n'ihe mberede ụgbọala n'Abia steeti
Ebe foto si, NPF
Ndị uweojii Abia steeti e kwụola na mmadụ atọ anwụọla ebe mmadụ anọ ndị ọzọ merụrụ ahụ n'ihe mberede okporoụzọ mere n' okporoụzọ awara awara si Pọtakọt gawa Enugwu na mpaghara ụmụchieze n'okpuru ọchịchị ụmụeneochị nke steeti.
Onye na-ekwuchite ndị uweojii steeti ahụ bụ Maureen Chinaka mere ka a mata na nnyocha e mere gosiri na nnukwu ụgbọala 'Mac Trailer' nwere akara KGE 22, nke onye n'anya ya bụ Amaechi Chucks Nwankwo kopụrụ wee suo ụgbọala bọọsụ.
N'okwu Chinaka, e bugara ndị ahụ merụrụ ahụ n'ụlọọgwụ Christy the King nke dị na Ngodo Isiochi ebe ha natara nleta tupu a sị ha lawa bee ha.
Ebe ozu ndị nwụrụ anwụ ka e bugara ụlọ oba ozu. Akụkọ kwuru na ndị uweojii anwụchiela onye ọkpụ ụgbọala Trailer bụ Amaechi Chucks Nwankwo ebe a na-eme nnyocha banyere ihe kpatara nkopụ nnukwu ụgbọala ahụ.
16 Mee 2024Anambara steeti emebeghị ntuliaka Okpuru Ọchịchị kemgbe afọ 18- Ifeanyi Ubah
Ebe foto si, Ifeanyi Ubah/Facebook
Senetọ na-anọchite mpaghara 'Anambra-South' n'Ụlọomeiwu bụ Ifeanyi Ubah agbarụọla ihu na Gọọmentị chierela Anambra steeti emebeghị ntuliaka okpuru ọchịchị na steeti ahụ kemgbe afọ 18.Uba, onye bụ onye otu APC kwuru nke a ụbọchị Wenezde dịka ndị omeiwu na-adọrịta ụka n'okwu nke Senetọ Kawu, Suleiman Abdulrahman na-anọchite Kano-South kpalitere iji kpoo oku ka Ọchịchị Onyeisiala Bola Tinubu kwalite ọchịchị ime obod, tụrụ arịị na nsogbu nchekwa na ndị ntorobia enweghị ọrụ gbanyere ụkwụ n'enweghị mmepe n'ime ime obodo.