Arsenal za ta yi wasa biyar cikin watan Satumba

Karanta rubutu kawai domin rage cin data

An wallafa 30 Agusta 2022

Arsenal ta fara kakar bana da kafar dama, wadda ta hada maki 12 a wasa hudu a kakar Premier League ta 2022/23.

Cikin wasannin da ta yi ta ci kwallo 11 an zura mata biyu a raga da karawa biyu ba tare da kwallo ya shiga ragarta ba.

Ranar 5 ga watan Agusta ta fara da cin Crystal Palace 2-0 a Selhurst Park, kuma Gabriel Martinelli ne ya ci mata kwallo sai Marc Guehi na Palace da ya ci gida.

Arsenal ta fara wasa a gida ranar 13 ga watan Agusta, inda ta doke Leicester City 4-2 a Emirates, Gabriel Jesus ne ya zura biyu sai Granit Xhaka da Gabriel Martinelli da kowannensu ya ci daya.

Wasa na uku kuwa Gunners zuwa ta yi ta casa Bournemouth 3-0 ranar 20 ga watan Agusta, kyaftin Martin Odegaard ne ya zura biyu a raga da kuma William Saliba.

Arsenal ta ci wasa na hudu a jere ranar 27 ga watan Agusta, inda ta doke Fulham 2-1 a wasan hamayya a Emirates, Martin Odegaard da Gabriel suka samar mata maki ukun da take bukata.

Arsenal ta yi wannan gwanintar bayan da ta dauko sabbin 'yan wasa a bana ciki har da Gabriel Jesus da Zinchenko.

Gunners ta nuna cewar a shirye take ta yi gogayya da kungiyoyi kamar Liverpool da Chelsea da Tottenham da Manchester City wajen lashe Premier League a bana.

Skip Wanda aka fi karantawa and continue reading

Wanda aka fi karantawa

End of Wanda aka fi karantawa

Tottenham tana cikin wadanda za a yi gwa-gwa-gwa da ita, Manchester United ma na son yin abin a zo a gani, shi ya sa take ta yin cefane.

Ranar 31 ga watan Agusta Arsenal za ta karbi bakuncin Aston Villa a wasan mako na biyar a gasar Premier League.

Aston Villa ba ta kokari sosai a kakar nan, wadda ta ci wasa daya, tana ta 15 a kasan teburi mai maki uku a wasa hudun da ta kara.

Daga nan Gunners za ta fuskanci karawa biyar a cikin watan Satumba, ciki har da fafatawa biyu a Europa League.

Wasa biyar da Arsenal za ta yi cikin watan Satumba

Arsenal za ta ziyarci Old Trafford domin fuskantar Manchester United a wasan farko cikin watan Satumba.

Daga nan Arsenal za ta je Zurich, domin buga wasan farko a cikin rukuni da za ta kara a Europa League, bayan da ta yi ta biyar a kakar da ta wuce a teburin Premier League.

Arsenal za ta buga wasan Premier na gaba da Everton a Emirates fafatawa ta uku a cikin watan na Satumba.

Gunners za ta kara wasa na biyu a gida amma a Europa League da PSV Eindhoven.

Skip content and continue reading