'Yadda aka kashe mijina Musulmi mahaddacin AlKur’ani kan zargin yi wa Annabi batanci'

Batun batanci ga addini a sassa daban-daban na duniya wani batu ne mai sarkakiya da ke bukatar taka-tsantsan.

Addinai da kasashe na da dokokin hukunta batanci ga addini.

A kasashen da ke bin tsarin shari’ar Musulunci an tanadar da hukuncin kisa.

A jihohi da dama na arewacin Najeriya ma – inda ake amfani da tsarin na shari’ar musulunci da kuma dokokin kasa a lokaci guda – an tanadi hukuncin kisa ga duk wanda ya yi batanci ga addinin Islama.

To amma wani batu da a baya-bayan nan ke sake janyo cece-ku-ce da tayar da jijioyin wuya shi ne yadda wasu fusatattun mutane kan far wa wadanda aka zarga da yin batanci ga addinin Islama.

Akalla mutane biyu ne aka kashe a yanayi mai sarkakiya a baya-bayan nan.

An kashe wata daliba kirista a Sakkwato mai suna Deborah Emmanuel, da kuma wani matashi musulmi mai suna Ahmad Usman a Abuja babban birnin kasar.

BBC ta zanta da iyalan wadanda lamarin ya shafa kan halin da suka shiga - da kuma malaman addinai kan wannan batu.

"Kun cuce ni, kun cuci rayuwata"

Ba mabiya addinin Kirista ne kaɗai fusatattu kan far wa ba dangane da batun ɓatanci ga addini.

Cikin watan Yuni, wasu wadanda suka harzuƙa sun far wa wani matashi Musulmi mai suna Ahmad Usman, suka lakaɗa masa duka, suka kashe shi, kana suka ƙona gawarsa bisa zargin cewa ya yi ɓatanci ga addinin Musulunci.

Lamarin ya faru ne a unguwar Lugbe da ke Abuja babban birnin Najeriya.

Na ziyarci gidansu Ahmad, inda na tarar da ƴan uwa da abokan arziki na cikin jimani - cikinsu har da matarsa Zainab, mai zaman takaba.

Watansu takwas da aure kafin a kashe shi. Tana da juna biyu, tana fatan samun ɗansu na fari kuma na ƙarshe.

Zainab na zub da hawaye, dangi na rarrashinta. Ta musanta zargin da aka yi wa mijin nata, tana mai cewa ƙazafi ne.

Ahmad mai shekaru 30 da haihuwa, ɗan banga ne.

Bayanai sun nuna cewa yayin da Ahmad ke sintiri, sai suka yi jayayya da wani malamin addinin Musulunci kan bukatar malamin ya kiyaye dokar hana fita da dare.

Daga nan Malamin ya zarge shi da yi wa addinin Musulunci ɓatanci.

Washegari kuma fustattun suka kashe Ahmad a kusa da ofishin ƴan bangar.

Abokan aikinsa sun ce zaƙaƙurin jami’i ne.

"Wannan ƙazafi da suka yi masa, shi ne ya fi damuna a zuciya’’ a cewar Zainab.

"A kullum mijina ba shi da wata magana sai dai ka ji ya ce ‘mu yi wa Annabi salati’ kuma shi mutum ne da ya haddace Alkur’ani a kansa."

Ta haƙiƙance cewa babu yadda mai gidan nata zai yi wa Annabi ɓatanci.

Mai dakin Ahmad ta ce saboda irin yadda take jin zafin wannan "ƙazafi" ba za ta yafe wa wadanda suka kashe mata miji ba – amma ta roki Allah "Ya shiryi masu irin wannan hali’’ na ɗaukar doka a hannu ba tare da hujja ba.

"Sun cuce ni, kuma sun cuci iyayensa’’ in ji matar mai juna biyu. Ta yi imanin jajircewarsa a kan aiki ne ya aka yi masa "sharri" kuma lamarin ya kai ga kashe shi.

Zainab ta ce a marainiya ta taso, iyayenta sun rasu tun tana jaririya.

Tana daukar mijin nata tamkar "uwa da uba" saboda yadda yake kula da ita yana kuma tausaya mata, yana share mata hawaye.

Ta ce wadanda suka kashe shi "sun cuce ni, sun cuci iyayensa" kuma yanzu "ban san yadda rayuwa zata kasance mini ba.’’

‘Mijina ya mutu da burin ganin ɗanmu na fari.‘

Malama Zainab Ahmad ta kuma nuna bacin rai kan yadda fusatattun suka ƙona gawar mijinta bayan sun kashe shi tana mai cewa "Allah ne kadai ke hukunci da wuta, ba mu ba.’"

Ta bayyana lamarin a matsayin tsabagen nuna tsana tana mai cewa "ƙiyayyar ta yi yawa."

A ganinta, sun yi masa ƙazafi ne saboda ƙoƙarinsa na tabbatar da bin doka a aikinsa na ɗan sintiri.

Zainab ta ce a kullum ‚‘ko na rufe idona sai in riƙa ganinsa, kamar yana nan.‘

Yanzu hotunan mijinta ke ɗebe mata kewa, musamman hotunan da yake murmushi kuma kullum tana yi masa addu’ar samun rahama.

Ta kara da cewa babban fatanta yanzu shi ne Allah Ya taimake ta ta haihu lami lafiya kasancewar mijinta ya bar ta da juna biyu, kuma shi ma kafin mutuwarsa "burinsa shi ne ya ga abin da zan haifa." 

Alhinin mahaifi

Shi kuwa Usman Shehu wanda shi ne mahaifin Ahmad, ya shaida wa BBC cewa ya ma kira ɗan nasa a waya a lokacin da ake kashe shi.

An amsa kiran, amma Ahmad din bai samu damar yi masa magana ba.

Mahaifin ya ce bai san me ke faruwa ba a lokacin, illa ya ji kwarmniya da ƙarar duka da sara.‘kat! kat!! kat!!

Sai daga bisani aka shaida masa cewa an kashe ɗan nasa. Lamarin ya dugunzuma shi da ma sauran dangi.

Malam Shehu ya bayyana Ahmad a matsayin gatansa saboda yadda yake kula da shi.

Ya bayyana Ahmad a matsayin ‘ɗa mai ƙwazo, ya ƙara da cewa "gaskiya na yi babban rashi. Har in koma ga Allah ba zan manta ba."

Hukumomi dai sun bayyana cewa suna gudanar da bincinke dangane da kashe Ahmad Usman kuma an kama wasu da ake zargi yayin da iyalansa ke fatan a yi adalci a lamarin.

Kisan Deborah Emmanuel a Sakkwato kan batun ɓatanci ga Musulunci

Makwanni kalilan kafin kashe Ahmad Usman a Abuja, wasu dalibai da ransu ya baci sun kashe wata ɗaliba Kirista mai suna Deborah Emmanuel a Sakkwato saboda batun ɓatanci ga addinin Musulunci a cikin watan Mayu.

Daliban sun far wa Deborah ne saboda wani saƙon murya da ta sa a dandalin Whatsapp na ‘yan ajinsu wanda ya harzuka dalibai Musulmai.

Daga nan wadanda suka fusata suka yi mata duka, suka kashe ta, kana suka ƙona gawarta.

An yi ta yaɗa hotunan lamarin a dandulan intanet. Kisan ya haifar da cece-ku-ce da tayar da jijiyar wuya dangane da batun batanci ga addini.

Mahaifiyarta Mrs Alheri Emmanuel ta ce a kullum tana cikin jimamin na rashin Deborah mai shekaru 21.

"Na yafe wa waɗanda suka kashe ƴata Deborah’’

Riƙe da hoton Deborah, Alheri na ƙoƙarin share hawayenta, mijinta da sauran ‘yan uwa na rarrashinta.

Ta ce lokacin da aka sanar da ita cewa an kashe ƴarta Deborah, sai da ta fadi a ƙasa ta suma kuma aka kai ta asibiti.

"Na ji kamar mashi aka soka mani a zuciya," inji Mrs Alheri.

Mahaifiyar, ta ce kashe Deborah ya katse burinsu. Dama fatansu shi ne idan ta yi karatu, ta samu aikin yi, ta taimaka wa iyaye da kuma ƙannenta.

A cewar Alheri, ƴar tata tana da tausayin iyaye kuma ta yi ta ƙarfafa masu gwiwa da fadin cewa idan Allah Ya sa ta kammala karatu kuma ta samu aikin yi, za ta share masu hawaye.

Alheri Emmanuel da mijinta Emmanuel Garba, sun bayyana cewa ko da yake kashe Deborah ya yi masu ciwo ƙwarai, to amma sun yafe wa wadanda suka kashe ta.

"Allah da muke bi, ya ce mu yafe, don shi ma ya yafe mana", a cewar Mrs Alheri.

To amma ta bukaci hukumomi da su dauki mataki domin magance matsalar daukar doka a hannu a Najeriya domin kiyaye sake faruwar hakan ga wani a nan gaba amma ba domin kisan ‘yar tata ba.

Ta ce "na Deborah ya riga ya faru, babu dabara."

Yayin da aka yi ta ka-ce-na-ce a kan batun kashe Deborah a fadin Najeriya, wasu masu sharhi sun jadda bukatar iyaye su rika bai wa ƴaƴansu tarbiya kan mutunta addinin wasu da kuma zamantakewa mai kyau.

Sai dai Alheri Emmanuel ta ce sun bai wa Deborah "tarbiyar mai kyau."

"Ya kamata a rika girmama addini"

Najeriya kasa ce mai mabiya addinai daban-daban, kuma ko a cikin addini daya, a kan samu bambance-bambancen ra’ayoyi.

Sau da yawa batun addini kan kawo zaman tankiya tsakanin al’umma.

A cewar Rabaran Nkem Osuigwe na Majami’ar Faith Baptist da ke birnin Fatakwal, kamata ya yi mutane su rika girmama addinan juna da kuma kauce wa batanci.

Shi ma Sheikh Muhammad Kabir Adam na Babban Masallaci na ƙasa da ke Abuja, ya ce wajibi ne mutane su riƙa kiyaye batutuwan addini da za su iya kawo ɓacin rai musamman ma iyaye su rika kwabar ‘ya’yansu.

To amma duka malaman addinan sun bayyana ko da batun batanci ga addini ya taso, bai kamata a rika daukar doka a hannu ba.

Rabaran Osuigwe ya ce"idan wannan salo na kai wa wannan hari da kai wa wancan hari saboda zargin batanci ga addijni ya ci gaba, to zai iya kai Najeriya ta ruguza kanta da kanta. Ya kamata a bar doka ta rika aiki."

Najeriya dai ba kasa da ake tafiyar da ita bisa koyarwar wani addini guda tsantsa ba.

To amma kuma al’umominta - Musulmi da Kirista duka – suna da ra’ayi matuka na kishin addini.

Dokokin tarayya sun tanadi daurin shekara biyu a gidan yari ga duk wanda aka samu da laifin cin zarafin addini.

Sai dai kuma, a jihohi kimanin 12 a arewacin Najeriya inda ake da shari’ar Musulunci, hukuncin kisa aka tanadar ga duk wanda ya yi ɓatanci ga addini.

Kotunan Musulunci sun yanke hukunce-hukunce na kisan cikin shekarun baya-bayan nan, amma kuma babu ko mutum guda da aka zartas da hukuncin a kansa.

A maimaikon hakan, fustattun mutane ne kan far wa wadanda aka zarga da yin batanci, a wasu lokutan su kashe su kamar yadda aka gani a lamarin Deborah da na Ahmad Usman.

"Ɗaukar doka a hannu ya saɓa wa tsarin shari’ar Musulunci"

Malaman addinin Kirista da na Musulunci daban-daban dai suna kiran a rika yin hattara wajen daukar doka a hannu.

Sheikh Muhammad Kabir Adam, limami a Babban Masallaci na Kasa da ke Abuja ya ce batanci ga addini ko annabi Muhammad (SAW), shi ne al’amari mafi ‘’bala’i da fitina’’ a wajen Muslmi a duk fadin duniya.

Ya ce shi kansa, idan aka yi wa addinin Musulunci ko annabi batanci, yakan ji matukar bakin ciki da bacin rai da kuma tashin hankali.

Ya jaddada cewa hukuncin duk wanda aka samu da laifin yin batanci ga addini, shi ne kisa ta hanyar da dokoki da tsarin shari’a suka shimfida.

To amma Sheikh Muhammad Kabir ya ce "daukar doka a hannu ba daidai ba ne."

Idan aka yi batancin, ‘’ba ni da kai ne za mu yi hukunci ba, a’a, hukuma ce za ta yi hukunci’’ bayan an yi bincike.

To amma ya ja hankalin mahukunta da su rika hukunta duk wanda aka samu da laifin batanci ga addini.

Ya kuma ce wasu daga cikin abubuwan da ake dubawa a yayin bincike a tsarin shari’ar Musulunci, sun hada da lafiyar ƙwaƙwalwa ko kuma hankalin wanda ake zargi, da kuma tantance ko tilasta masa aka yi ya yi batancin - ba bisa radin kansa ba.

Sheikh Muhammad Kabir ya ce idan aka tabbatar da hankalinsa kuma ba tilasta masa aka yi ba, to za a yanke wa wanda ya aikata laifin batanci ga addini hukuncin kisa daidai da matakan shari’a.

Amma idan bincike ya gano akasin haka, to hukuncin kisa ba zai hau kan wanda ake zargin ba.

Mene ne ya sa wasu kan fusata su kashe wadanda ake zargi?

Yadda mutane kan far wa wadanda ake zargi da aikata laifi cikin fushi ya kasance wani babban lamari a Najeriya.

Yana haddasa zaman zullumi a kasa ko a tsaknain al’umomi.

Wasu na ganin karancin ilmi da kuma tsana ko kiyayya na daga cikin abubuwan da ke sanya wasu daukar doka a hannunsu su kashe wadanda ake zargi da aikata laifi ba tare da an gudanar da bincike don tabbatar da gaskiyar lamari ba.

Dokta Kabiru Adamu, shugaban kamfanin Beacon Consulting mai bincike kan lamuran tsaro, ya shaida wa BBC cewa wani babban dalili kuma shi ne ‘’rashin yarda tsakanin hukumomi da al’umma.’’

Masanin harkar tsaron, ya ce bangaren shari’a na cike da matsaloli kamar jinkiri, da cin hanci da rashawa da kuma a wasu lokutan akan wanke wanda ake ganin kamar karara ya aikata laifi.

To amma Dokta Kabiru ya ce, duk da matsalolin da ake fuskanta a fannin shari’a, babu hujja ta daukar doka a hannu yadda a raunata ko kuma a kashe mutum da ake zargi.

Ya ce yin haka na da "hatsarin gaske" domin sau da yawa akan samu wadanda akan yi wa kazafi bayan kashe su, kuma a gano basu aikata laifin ba.

Ya ce ‘’shi ya sa bin tsarin shari’ar ke da matukar muhimanci’’

Hukumomi dai sun kama wasu da ake zargi da hannu a kisan Ahamd Usman da kuma kisan Deborah.

Sun ce shari’a na tafe – inda kakakin rundunar ‘yansandan Najeriya, Muyiwa Adejobi, ya shaida wa BBC cewa suna iya kokarinsu wajen shawo kan lamuran yadda jama’a ke daukar doka a hannunsu musamman wadanda kan kai ga kisa abinda ya bayyana a matsayin ce ‘’babban laifi’’ a kasa.

Haka nan, hukumomi na cewa suna kokarin inganta tsarin shari’a da hukunta laifuka don ya zama mai nagarta.

Masana da masu sharhi na cewa wajibi ne mutane su kauce wa yi addini batanci musamman don gudun bacin rai.

To amma yayin da ake wannan, ga dangin wadanda aka riga aka kashe, radadin zai ci gaba da wanzuwa.