Manchester United za ta kara korar ma'aikata 200

Manchester United za ta kara rage ma'aikata 200, ''domin ƙungiyar ta koma samun ribar kasuwanci.''

An kori ma'aikata kimanin 250 a bara a shirin da shugaba, Sir Jim Ratcliffe ya ɗauka na rage kashe-kashen kuɗin ƙungiyar, domin samun riba.

A wani taro da ma'aikata ranar Litinin, babban jami'i Omar Berrada ya sanar da ma'aikata cewar za a sake rage mutane a wani sabon tsari, domin bunkasa United.

A wata sanarwa da ƙungiyar ta fitar ''Wannan shirin ana yi ne domin mayar da ƙungiyar kan yadda za ta ke cin riba, bayan hasara a kaka biyar a jere tun daga 2019.

Ta kara da cewar ''Tana ɗaukar wadan nan matakan, domin bunkasa United da samar da kuɗin shiga ta yadda za a haɓɓaka ingantattun ayyukanta.''

''"Wannan zai samar da ingantaccen tsarin kudi, inda ƙungiyar za ta iya saka hannun jari a kwallon kafa ta maza da mata da kuma ingantattun ababen more rayuwa."

Berrada ya ce: "Muna da alhakin sanya Manchester United a matsayi mafi girma don samun nasara a cikin kungiyoyinmu na maza da na mata da kuma makarantar horar da matasa.''.

"Wadannan hukuncin mai tsauri ya zama dole mu ɗauka, don mayar da ƙungiyar kan ingantaccen tsarin hada-hadar kudi.

''Muna hasarar ƙudi a shekara biyar baya a jere, ba za mu bari hakan ya yi ta faruwa ba.

"Babban abubuwan da muka sa a gaba a matsayin kungiya shine samar da nasara a filin wasa ga magoya bayanmu da kuma inganta kayan aikin mu. Ba za mu iya saka hannun jari kan wadannan manufofin ba idan har muna ci gaba da asarar kudi."