An tsayar da ranar El Clasico tsakanin Real da Barca a La Liga

An tsayar da ranar da za a buga wasan hamayya na El Clasico a gasar La Liga tsakanin Real Madrid da Barcelona wasan farko a kakar nan.

Tuni mahukuntan babbar gasar tamaula ta Sifaniya ta tsayar da ranar 16 ga watan Oktoba, domin fafatawar tsakanin manyan kungiyoyin tamaula biyu na kasar.

Karawar za ta zama ta mako na tara da Real Madrid za ta karbi bakuncin kungiyar Camp Nou a gumurzun da za su yi a Santiago Bernabeu.

Bayan da aka buga wasan mako na shida a La Liga, Real Madrid ce ta daya a kan teburi mai maki 18, wadda ta lashe dukkan karawar da ta yi a bana.

Barcelona ce ta biyu da tazarar maki biyu tsakaninta da Real Madrid, bayan da ta buga canjaras a wasan makon farko da Rayo Vallecano.

El Clasico na bana zai kara jan hankalin 'yan kallo, bayan da Barcelona ta sayo 'yan wasa da yawa a bana.

To sai dai ana ganin za a buga wasan na hamayya tsakanin Karim Benzema da Robert Lewandowski, wadanda suka yi kaurin suna wajen zura kwallaye a raga.

Benzema ne ya lashe kyautar takalmin zinare a Sifaniya a bara, shi kuwa Lewandowski, wanda ya koma Barca a bana daga Bayern Munich, shi ne kan gaba da takwas a raga a La Liga.

To sai dai watakila Real Madrid ta amfana da wasan, bayan da masu tsaron Barcelona biyu ke jinya da ya hada da Jules Kounde da kuma Ronald Araujo.

Kungiyoyin biyu sun kara sau uku a bara

2021/2022

Spanish La Liga Lahadi 20 ga watan Maris 2022               

•          Real Madrid    0 - 4     Barcelona       

Spanish Super Cup Laraba 12 ga watan Janairu 2022          

•          Barcelona        2 - 3     Real Madrid   

Spanish La Liga Lahadi 24 ga watan Oktoban 2021     

•          Barcelona        1 - 2     Real Madrid   

Wasannin da Real Madrid za ta buga kafin El Clasico

Spanish La Liga Lahadi 2 ga watan Oktoba        

•          Real Madrid  da Osasuna         

Champions League Laraba 5 ga watan Oktoba          

•          Real Madrid da Shakhtar         

Spanish La Liga Asabar 8 ga watan Oktoba     

•          Getafe da Real Madrid   

Champions League Talata 11 ga watan OOktoba 

•          Shakhtar da Real Madrid   

Spanish La Liga Lahadi 16 ga watan Oktoba        

•          Real Madrid  da Barcelona

Wasannin da Barcelona za ta yi kafin ta je Santiago Bernabeu

Spanish La Liga Asabar 1 ga watan Oktoba        

•          Mallorca da Barcelona       

Champions League Talata 4 ga watan Oktoba 

•          Inter da Barcelona      

Spanish La Liga Lahadi 9 ga watan Oktoba         

•          Barcelona da Celta Vigo     

Champions League Laraba 12 ga watan Oktoba           

•          Barcelona  da Inter   

Spanish La Liga Lahadi 16 ga wata Oktoba        

•          Real Madrid da Barcelona