UK: Liz Truss yinjiye mu guhatanira kuyobora ishyaka rya Conservative

Minisitiri w'ububanyi n'amahanga w'Ubwongereza Liz Truss yinjiye mu guhatanira gusimbura Boris Johnson.

Mu nyandiko yasohoye mu kinyamakuru The Daily Telegraph atangaza gahunda ze, Truss yasezeranyije gutangira kugabanya imisoro "guhera ku munsi wa mbere" akimara kuba umukuru w'ishyaka.

Benshi muri 11 bashaka umwanya w'umukuru w'ishyaka rya Conservative, riri ku butegetsi mu Bwongereza, batangaje gahunda zihangana mu buryo butandukanye ku kugabanya imisoro, nka kimwe mu bintu by'ingenzi bigize gahunda zabo.

Abadepite bo mu ishyaka rya Conservative bo mu kanama kazwi nka 1922 Committee gategura amatora yo guhatanira uwo mwanya, baraterana kuri uyu wa mbere ngo bafate icyemezo ku ngengabihe no ku mategeko ajyanye n'aya matora y'umuyobozi.

Icyo gikorwa, kigizwe n'ibyiciro bibiri, kizatuma abadepite b'aba Conservative bakora ijonjora ry'abakandida basigare ari babiri, binyuze mu matora yo mu byiciro, mbere yuko abagize ishyaka rya Conservative batora uwegukana uwo mwanya.

Truss, w'imyaka 46, yasobanuye ko azakora nk'iby'abacyeba be bateganya, birimo nko kugabanya imisoro ku bigo by'ubucuruzi no kuvugurura ubucuruzi.

Yabwiye ikinyamakuru The Daily Telegraph ko "atari byo kongera imisoro ubu", anavuga ko atowe yahita akora "igikorwa cy'ako kanya" mu gufasha ku bijyanye n'ikiguzi cy'imibereho.

Yagize ati: "Abo dukorana barabizi ko icyo mvuze ngikora kandi nkaba nsezeranya gusa ibintu mbona ko nzashobora gushyira mu bikorwa. Nshobora kugirirwa icyizere ko nzatanga umusaruro".

Uyu Minisitiri w'ububanyi n'amahanga yavuze ko azahatana mu matora nk'umu-Conservative kandi ategeke nk'umu-Conservative - ishyaka rikomeye ku bya kera.