England v Senegal: Mbere y'umukino wa 1/8 Gareth Southgate avuga ko guhabwa 'amahirwe menshi' nta cyo bivuze

Umutoza w'ikipe y'igihugu y'Ubwongereza Gareth Southgate avuga ko kuba ari bwo buhabwa "amahirwe menshi" nta kintu na kimwe bivuze, mu gihe ikipe ye yitegura gukina na Sénégal mu mukino wa kimwe cy'umunani (1/8) cy'igikombe cy'isi muri Qatar.

Ikipe y'igihugu y'Ubwongereza – The Three Lions – irakina n'ikipe y'igihugu ya Sénégal – Les Lions de la Téranga – ifite igikombe cy'Afurika cy'ibihugu (CAN/AFCON), mu mukino utangira ku isaha ya saa tatu za nijoro (21h) ku isaha yo mu Rwanda no mu Burundi.

Ubwongereza bwageze muri iki cyiciro nyuma yo kuyobora itsinda B, ku wa kabiri bwatsinze Wales (Pays de Galles) ibitego 3-0.

Ni mu gihe Sénégal yarangije ari iya kabiri mu itsinda A, inyuma y'Ubuholandi.

Southgate yagize ati: "Turaza kuba dufatwa nk'abafite amahirwe menshi yo gutsinda.

"Ariko ibyo rwose nta kintu na kimwe bivuze mu mukino utagira uwo kwishyura.

"Ntabwo bivuze ko nta gitutu kiri kuri Senegal kuko buri kipe yose ikina ku rwego mpuzamahanga igira igitutu cyinshi kiva mu gihugu cyayo bwite ndetse n'ikiva hanze [y'igihugu]".

Uyu mukino ubera ku kibuga Al Bayt Stadium, ni wo wa mbere uhuje ibi bihugu byombi, kandi ikipe iwutsinda, muri kimwe cya kane izakina n'Ubufaransa bwatsindikiye igikombe cy'isi cy'ubushize cyangwa Pologne (Poland).

'Dufitiye Senegal icyubahiro cyinshi cyane'

Mu kwezi kwa kabiri uyu mwaka, Sénégal ku nshuro ya mbere yatsindiye igikombe cya CAN, ubwo iyi kipe y'umutoza Aliou Cissé yatsindaga Misiri kuri za penaliti.

Ikipe ya Sénégal yagize ikibazo gikomeye mbere yuko iyi mikino y'igikombe cy'isi itangira, ubwo yatangazaga ko rutahizamu wayo ukomeye Sadio Mané atazayikinira kubera imvune yo mu ivi.

Yayigize ubwo yari arimo gukinira ikipe ya Bayern Munich, hasigaye igihe kitageze ku byumweru bibiri ngo Sénégal ikine umukino wayo wa mbere muri iki gikombe cy'isi.

Ariko intsinzi za Sénégal kuri Qatar yakiriye iyi mikino, no kuri Équateur, nyuma y'umukino ubanza Sénégal yatsinzwemo n'Ubuholandi, zatumye igera muri iki cyiciro cy'aho amakipe akina akuranamo (itsinzwe ihita isezererwa) ku nshuro ya mbere mu myaka 20 yari ishize.

Southgate yagize ati: "Twatangajwe cyane na Senegal.

"Begukanye igikombe cy'Afurika kandi bariyizera cyane ndetse bafite umuhate ukomeye no kugira icyizere mu ikipe yabo.

"Bafite abakinnyi bamwe beza cyane ufashe umukinnyi ku giti cye bashobora guteza ibibazo, kandi ni n'ikipe imeze neza.

"Cissé yakoze akazi keza cyane. Tuzi ingano y'akazi kadutegereje".

Umutoza Cissé wa Sénégal ntabwo yashoboye kwitabira ikiganiro n'abanyamakuru cyo ku wa gatandatu cya mbere yuko umukino uba, kubera uburwayi, bituma haba gushidikanya niba uyu munsi aza kuba ari muri ka gace kagenewe abatoza ku kibuga.

Mu gihe Sénégal igeze muri iki cyiciro cyo gukuranamo mu gikombe cy'isi ku nshuro ya kabiri gusa, Ubwongereza bwo burimo gushaka kugera muri kimwe cya kane (1/4) mu marushanwa yikurikiranya ku nshuro ya mbere kuva mu 2006, nyuma yuko bugeze muri kimwe cya kabiri mu myaka ine ishize.

Ikipe y'umutoza Southgate yasezerewe na Croatia muri kimwe cya kabiri ku gitego cy'intsinzi cyo mu gihe cy'inyongera, mu gikombe cy'isi cyabereye mu Burusiya mu 2018.

Nyuma yaho, Ubwongereza bwaje gutsindwa n'Ubutaliyani kuri za penaliti mu gikombe cy'Uburayi cya Euro 2020, ku mukino wa nyuma wabereye ku kibuga cya Wembley mu Bwongereza ku mpeshyi yo mu mwaka ushize.