Igikombe cy'isi 2022 Senegal v Ubuholandi: Aliou Cissé 'ababajwe' no kuba Sadio Mané adahari

Yatangajwe

Umutoza w'ikipe y'igihugu ya Sénégal Aliou Cissé avuga ko umuryango mugari w'umupira w'amaguru "ubabajwe" no kuba Sadio Mané adahari ariko ko ikipe ye "ihangana n'iyi mbogamizi" muri iki gikombe cy'isi.

Iyi kipe, yegukanye igikombe cy'Afurika cy'ibihugu (CAN/AFCON) mu kwezi kwa kabiri uyu mwaka, iratangira imikino yayo mu itsinda A ryo mu gikombe cy'isi ikina n'Ubuholandi kuri uyu wa mbere, saa kumi n'ebyiri z'umugoroba (18h) ku isaha yo mu Rwanda no mu Burundi.

Rutahizamu Mané wa Bayern Munich na Sénégal ntabwo azakina imikino y'iri rushanwa kubera imvune yo mu ivi.

Cissé yagize ati: "Ntabwo turimo kuvuga Abanya-Sénégal gusa ahubwo [turimo kuvuga] abantu bo mu bice bitandukanye byo ku isi ndetse n'umuryango wose w'umupira w'amaguru urababaye".

Skip content and continue reading

End of content

Yongeyeho ati: "Ahagarariye umugabane w'Afurika hamwe na Sénégal.

"Nahamagawe kuri telefone n'abantu bo mu bice bitandukanye by'isi.

"Abatoza bose bubaka amakipe bayubakiye ku mukinnyi wabo w'intyoza [mwiza cyane], ni na ko bimeze kuri twebwe.

"Natwe dufite ikipe ikomeye, y'abakinnyi bafite ubunararibonye n'ab'urubyiruko biteguye guhangana n'iyi mbogamizi".

Skip Ibisomwa cane and continue reading
Ibisomwa cane

End of Ibisomwa cane

Kapiteni Virgil van Dijk w'Ubuholandi yavuze ko yavuganye na Mané bahoze bakinana muri Liverpool.

Yongeyeho ati: "Nk'inshuti nashakaga gusa kumenya uko ameze. Ndababaye mu mwanya we. Nzi ukuntu yakoze cyane ku bw'ibi [iki gikombe cy'isi] kandi ashaka kugirira akamaro Sénégal.

"Yabaye ingirakamaro cyane cyane mu myaka micyeya ishize. Biragoye. Birumvikana azaba ari igihombo gikomeye kuri bo. Twizeye ko dushobora kubyungukiramo gacyeya".

Amakuru ku makipe

Krépin Diatta, umukinnyi ukina ku ruhande w'ikipe ya Monaco, na rutahizamu Bamba Dieng w'ikipe ya Marseille, ni bo bitezwe gusimbura Mané.

Ariko myugariro Abdou Diallo w'ikipe ya RB Leipzig ashobora kudakina kubera ikibazo cyo mu ivi.

Ikipe y'igihugu y'Ubuholandi ntifite rutahizamu Memphis Depay, watsinze ibitego 12 mu mikino yo gushaka itike y'igikombe cy'isi, kubera imvune yo mu itako.

Myugariro Denzel Dumfries arashidikanywaho, mu gihe umukinnyi ukina hagati mu kibuga Marten de Roon afite ikibazo cyo mu mugongo.

Ibindi wamenya ku mukino

  • Uyu ni wo mukino wa mbere ugiye guhuza Sénégal n'Ubuholandi mu marushanwa yose.
  • Iyi ni inshuro ya mbere Sénégal n'Ubuholandi byombi biboneye icyarimwe itike yo gukina imikino y'igikombe cy'isi. Ubuholandi ntibwabonye itike y'igikombe cy'isi mu bikombe bibiri Sénégal yo yakinnyemo (mu 2002 no mu 2018).