Ukraine: Abagera kuri 60 bapfuye nyuma yuko igisasu gikubise ishuri - Zelensky

Abantu bagera kuri 60 bapfuye nyuma y'uko igisasu kirashwe ku ishuri mu burasirazuba bwa Ukraine, nk'uko bivugwa na Perezida Volodymyr Zelensky.

Guverineri Serhiy Gaidai w'akarere ka Luhansk yemeje ko abantu babiri bapfuye, avuga ko hari ubwoba ko abantu 60 bapfuye bakaba barenzweho n'ibyasenyutse kuri iryo shuri ryo mu cyaro cya Bilohorivka.

Yongeyeho ko abantu bagera hafi kuri 90 bari bacumbitse muri iyo nyubako ndetse 30 batabawe, barindwi muri bo bakomeretse.

Gaidai yavuze ko indege y'intambara y'Uburusiya yateye icyo gisasu ku wa gatandatu.

Ibyo ashinja Uburusiya ntibyashoboye kugenzurwa mu buryo bwigenga kandi Uburusiya nta cyo bwahise bubitangazaho.

Akarere ka Luhansk kari kuberamo imirwano ikaze, mu gihe abasirikare b'Uburusiya n'abarwanyi bashaka ubwigenge bashyigikiwe n'Uburusiya bashaka kugota abasirikare ba Ukraine. Hashize amezi arenga abiri Uburusiya butangije igitero kuri Ukraine.

Icyaro cya Bilohorivka kiri hafi y'umujyi wa Severodonetsk uri mu maboko y'abasirikare ba Ukraine. Ku wa gatandatu hatangajwe imirwano ikaze mu nkengero y'uwo mujyi.

Ikinyamakuru Ukrayinska Pravda cyo muri Ukraine kivuga ko icyo cyaro cyabaye "isibaniro" mu mirwano yo mu cyumweru gishize.

Icyo gisasu cyashyize hasi inyubako ifatwa n'inkongi y'umuriro, bitwara amasaha atatu kugira ngo abazimya umuriro bashobore kuwuzimya, nkuko Guverineri yabivuze, mu butumwa yanditse ku rubuga rwa Telegram.

Yavuze ko hafi abatuye muri icyo cyaro bose bari bamaze igihe bacumbitse mu gice cyo hasi cy'iryo shuri.

Yavuze ko umubare wa nyuma w'abapfuye uzamenyekana gusa ari uko hamaze gukurwaho ibyasenyutse.

Mu gitondo cyo kuri iki cyumweru, hari amakuru ko imirwano mishya irimo kubera mu burasirazuba bwa Ukraine.

Abategetsi b'abashaka ubwigenge bavuze ko abasirikare ba leta ya Ukraine barashe ku mujyi wa Donetsk no ku mujyi wa Holmivskyi, nkuko bivugwa n'ibitangazamakuru bya leta y'Uburusiya.

Kuva Uburusiya bwatera Ukraine ku itariki ya 24 y'ukwezi kwa kabiri, umuryango w'abibumbye (ONU/UN) umaze kubarura abasivile batari munsi ya 2,345 bapfuye hamwe n'abandi 2,919 bakomerekeye muri Ukraine, nkuko bikubiye mu mibare mishya yatangajwe mu kwezi gushize n'umukuru w'ishami rya ONU ryita ku burenganzira bwa muntu.

Abarwanyi babarirwa mu bihumbi na bo byemezwa ko bishwe cyangwa barakomereka ku mpande zombi ziri muri iyi ntambara.

Bivugwa ko abantu barenga miliyoni 12 bamaze guhunga kuva iyi ntambara yatangira, muri bo abagera kuri miliyoni 5.7 bakaba barahungiye mu bihugu bihana imbibi na Ukraine, naho abandi bagera kuri miliyoni 6.5 byibazwa ko bahungiye mu bindi bice by'imbere muri Ukraine.

Igice kinini cy'umujyi wa Luhansk - hamwe na Donetsk bigize igice cy'akarere ka Donbas - kimaze imyaka umunani kigenzurwa n'abashaka ubwigenge bashyigikiwe n'Uburusiya.