Ukraine: Russia irahakana ko izatangaza intambara yeruye tariki 09/05

Uburusiya bwahakanye ibivugwa ko kuwa mbere buzatangaza intambara yeruye muri Ukraine, bubyita "ibidafite ishingiro".

Kugeza ubu Moscow ntivuga ko iri mu ntambara, ahubwo ibitero byayo ibyita "ibikorwa bidasanzwe bya gisirikare".

Ariko abategetsi mu burengerazuba bahwihwisa ko Perezida Vladimir Putin ashobora gukoresha akarasisi k'intsinzi ka buri mwaka tariki 09 Gicurasi(9) agatangaza intambara yeruye.

Ariko Dmitry Peskov umuvugizi w'ibiro bya Kremlin, yavuze ko izo mpuha nta kuri "na busa" zifite.

Minisitiri w'ingabo w'Ubwongereza Ben Wallace mu cyumweru gishize yavuze ko akarasisi ka Moscow ko kwibuka intsinzi ku ba Nazi no kurangira kw'intambara ya II y'isi - gashobora gukoreshwa mu gutangaza intambara n'ibitero bishya muri Ukraine birimo ingabo nyinshi kurushaho.

Wallace yabwiye LBC radio ati: "Nta makuru mbifiteho, [ariko] ntabwo byantungura ko ashobora gukoresha uriya munsi akavuga ati 'ubu turi mu ntambara n'aba-Nazi b'isi kandi tugomba guhagurutsa abarusiya benshi'."

Abategetsi mu Burusiya bavuga ko ibitero kuri Ukraine bigamije "kwambura intwaro" cyangwa "guca aba-Nazi" muri icyo gihugu, bavuga ko leta ya Kyiv irimo aba-Nazi nk'impamvu yo kubatera.

Uretse akarasisi kaba buri mwaka i Moscow, hari andi makuru avuga ko Kremlin yaba irimo gutegura igisa n'akarasisi no mu mujyi wa Mariupol muri Ukraine, umujyi ubu wafashwe hafi ya wose.

Ingabo za Ukraine ubu zisigaye mu gace kamwe gusa kawo - uruganda runini rw'ibyuma rwa Azovstal.

Amakuru aheruka avuga ko nyuma yo guhungisha abasivile bari barurimo ibitero kuri uru ruganda byongeye kubura, kandi ubu bitagishoboka kuvugana n'abasirikare barurimo.

Abategetsi ba Ukraine bavuga ko imihanda y'uyu mujyi iri gukuburwa ivanwamo ibisigazwa by'intambara, imirambo, na bombe zitaraturika.

Igice kinini cy'uyu mujyi cyahindutse amatongo kubera ibisasu by'ingabo z'abarusiya byamaze ibyumweru biharaswa ubudakuraho.

Alyona Shkrum umunyapolitiki muri Ukraine yabwiye BBC ko yiteze ko ibintu bishobora kumera nabi kurushaho kuri uriya munsi Uburusiya bwizihiza intsinzi.

Madamu Alyona ati: "Kuri Putin n'ubwami ashaka kubaka, uriya ni umunsi udasanzwe, sibyo?

"Rero afata umunsi w'intsinzi akawuhindura impamvu yo kurwanya aba-Nazi, ariko ni icengezamatwara riteye isoni."

Yongeraho ati: "Twiteze ko ku itariki 09 Gicurasi hano i Kyiv bizakomera, kimwe n'i Odesa na Mariupol, no mu yindi mijyi."