Prince Philip: Boris Johnson ntazitabira gushyingura, nkuko bivugwa n'ibiro bye

Boris Johnson ntazitabira gushyingura Igikomangoma Philip ku wa gatandatu utaha mu rwego rwo gutuma "abantu benshi bashoboka bo mu muryango" bajya kumushyingura, muri iki gihe cy'amabwiriza yo kwirinda coronavirus, nkuko byavuzwe n'ibiro bye No 10 Downing Street.

Abantu 30 gusa - byitezwe ko ari abana b'Igikomangoma, abuzukuru n'abandi ba hafi mu muryango - bashobora kwitabira umuhango wo kumushyingura no kumusezeraho kuri shapeli ya St George's Chapel i Windsor.

Rubanda yasabwe kutazahagera.

Ku wa gatandatu, Igikomangoma Charles, umuhungu w'Igikomangoma Philip, yagarutse ku buzima bwa "papa nkunda", avuga ko azakumburwa "cyane".

Avuga ari mu rugo rwe rwa Highgrove mu karere ka Gloucestershire, Igikomangoma Charles yavuze ko se yari "umuntu wihariye cyane... hejuru ya byose wari gutangazwa cyane n'ibintu bikora ku mutima byamuvuzweho".

Igikomangoma Charles yavuze ko umuryango we "ushimira byimazeyo" abantu kubera ibi, yongeraho ati: "Bizadusigasira muri uku kubura uwacu wihariye no muri iki gihe cyihariye cy'akababaro".

Igikomangoma Philip yatabarutse ari mu ngoro ya Windsor Castle ku wa gatanu, afite imyaka 99.

Muri iki gitondo haraba amasengesho yo kumusabira muri Katederali ya Canterbury.

Ibikorwa byo kwitegura kumushyingura mu mpera y'icyumweru gitaha, ingoro ya Buckingham Palace yavuze ko "ahanini cyane" bizahura n'ibyifuzo by'Igikomangoma Philip. Byahujwe n'amabwiriza yo kwirinda icyorezo cya coronavirus.

Icyo gikorwa kizanyura kuri televiziyo, kizaba ari umuhango aho kuba igikorwa kinini cyo ku rwego rwa leta akenshi kiba iyo hari umwami watanze (watabarutse).

Mu bo mu muryango w'ibwami bazitabira gushyingura Igikomangoma Philip, harimo n'Igikomangoma Harry, indege izamukura mu rugo rwe muri leta ya California muri Amerika imujyane mu Bwongereza.

Umugore we Meghan Markle, utwite umwana wabo wa kabiri, yagiriwe inama n'umuganga we yo kudakora urugendo, nkuko ingoro ya Buckingham Palace yabivuze.

Ku munsi nyirizina wo gushyingura, mu gihugu hazaho umunota wo guceceka ku isaha ya 15:00 BST - hazaba ari saa kumi z'umugoroba (16h) mu Rwanda no mu Burundi.

Isanduku y'Igikomangoma Philip izatwarwa ikuwe muri Windsor Castle ijyanwe muri St George's Chapel iri mu modoka ya Land Rover yahinduwe mu buryo bwihariye. Igikomangoma Philip yagize uruhare mu kuyiha iyo foroma.

Abantu umunani bazaterura isanduku bayigeze muri St George's Chapel. Ihabwe ikaze n'umukuru wa Windsor na musenyeri mukuru wa Canterbury.

Aba bantu 10 ntabwo babarirwa mu mubare w'abemerewe kwitabira kumushyingura.

Urutonde rw'abatumirwa ruzatangazwa ku wa kane.