Ever Given: Ubwato rutura bwari bwaheze mu bunigo bwa Suez 'bwagobotowe'

Ubwato rutura bwari bwahagamye mu bunigo bwa Suez kuva kuwa kabiri, biravugwa ko bwagobotowe bugasubira kureremba ku mazi.

Amashusho yashyizwe ku mbuga nkoranyambaga kuwa mbere, yerekana igice cy'inyuma cya Ever Given kigana ku nkombe z'ubunigo, bihita bifungura inzira yose.

Inchcape, kompanyi ya serivisi zo mu nyanja, nayo yatangaje ko ubu bwato bwagobotowe.

Gusubiza ubu bwato ku mazi ni ibikorwa byifashishije ubwato busunika n'imashini zicukura zigizayo umucanga.

Ubu bunigo buca mu Misiri ni imwe mu nzira zifashishwa kurusha izindi mu bucuruzi ku isi.

Gufunga ubu bunigo k'ubu bwato bwa kompanyi ya Evergreen, byatumye andi mato ajya kuzunguruka Africa ngo agere iburengerazuba.

Inzobere mu ibaruramari zavuze ko gufunga ubu bunigo bwa Suez bwacyererezaga miliyari $9.6 ku munsi.

Nyuma y'iminsi myinshi kuvana ubu bwato aho bwahagamye byanga, ku cyumweru abatabazi batangiye kugabanya kuri kontineri hafi 20,000 bwikoreye kugira ngo bworoherwe.

Mbere, inzobere zari zabwiye BBC ko imirimo yo kugobotora ubu bwato ishobora gufata ibyumweru.

Ubu bwato bureshya na 400m bugapima toni 200,000 bwahagamye kuwa kabiri ushize nyuma yo gukubitwa n'umuyaga ukomeye. Kompanyi nyinshi zizobereye mu butabazi bwo mu nyanja zariyambajwe.

Hafi 12% by'ibicuruzwa ku isi binyura muri iyi nzira y'ubunigo ireshya na 193Km, ihuza inyanja ya Mediterane n'inyanja Itukura, ikaba iya bugufi ihuza Aziya n'Uburayi.

Inzira yindi ishoboka ni iyo kuzenguruka Africa uciye munsi ya Africa y'Epfo, ishobora gufata ibyumwer bibiri by'urugendo ku mato manini.