Ubwato bwafunze ubunigo bwa Suez buri gufata ibicuruzwa bya miliyari $9.6 ku munsi

Ever Given ubwato rutura bwikorera kontineri bwahagamye mu bunigo bwa Suez buri guhagarika ibicuruzwa bibarirwa agaciro ka miliyari $9.6 buri munsi, nk'uko bigaragazwa n'imibare ya kompanyi y'ubwikorezi bwo mu nyanja.

Iyi mibare iva kuri miliyoni $400 zibarwa ku isaha imwe z'ibicuruzwa bica muri ubu bunigo bwifashishwa cyane mu guhuza uburasirazuba n'uburengerazuba.

Imibare ya kompanyi izobereye mu bwikorezi bwo mu nyanja, Lloyd's List, iha agaciro ka miliyari $5.1 ibicuruzwa bigana iburengerazuba na miliyari $4.5 ku bigana iburasirazuba, bica muri Suez ku munsi.

Mu gihe hakomeje umuhate wo kugobotora ubu bwato, inzobere muri iyo mirimo zivuga ko bishobora gufata ibyumweru.

Ever Given, ubwato bukoreshwa na Evergreen Marine kompanyi yo muri Taiwan, bureshya n'ibibuga bine bya football, ni bumwe mu bunini ku isi bwikorera za kontineri, bushobora gutwara izigera ku 20,000.

Guhagama kwabwo muri iyi nzira y'ubunigo byateje umubyigano w'andi mato menshi agana mu byerekezo byombi aciye muri ubu bunigo bwa Suez mu majyaruguru ya Misiri.

Jon Monroe ufite ikigo cy'ubushabitsi mu bwikorezi bwo mu nyanja yagize ati: "Turatekereza byinshi, kontineri z'ibicuruzwa byahagaritswe, n'imirongo miremire y'amato ari ku byambu byinshi ategereje kugenda"

Ubu bunigo bunyuramo ibicuruzwa bigera kuri 12% byo ku isi, birimo cyane cyane ibitoro, imyenda, ibikoresho by'ubwubatsi, iby'inganda, n'ibikoze mu mbaho.

Llyod's List ivuga ko ubu hari amato arenga 160 ategereje gutambuka. Harimo amato 41 manini y'ibicuruzwa n'andi 24 manini atwaye ibitoro.

BIMCO, ihuriro ry'ibigo by'ubwikorezi bwo mu nyanja, rivuga ko uku gukerererwa kw'ibicuruzwa kuzakomeza kwiyongera kandi kuzagira ingaruka.

Alan Baer, ukuriye ikigo OL USA ikora ibaruramari yabwiye BBC ati: "Buri munsi umwe wo gukererwa mbona ko uvuze iminsi ibiri yo kuva mu bukererewe."

Yongeraho ati: "Iminsi itatu ishize isobanuye iminsi itandatu yo gukerererwa. Sinahamya ko ari uko bizagenda neza neza ariko ni hafi yabyo".

Kompanyi nini z'ubwikorezi mu nyanja ku isi, Maersk na Hapag-Lloyd, zivuga ko ubu ziri kureba uko zanyuza ibicuruzwa ahandi.

Urwego rwa leta ya Misiri rwa Suez Canal Authority (SCA) ruvuga ko hari gukorwa ibishoboka mu gusubiza ubu bwato mu mazi, hakoreshejwe amato asunika n'ibikoresho rutura bicukura bikigizayo ubutaka.