Amatora Uganda 2021: Abapolisi barashirwa hejuru ku mazu

Inyandiko gusa
Abajejwe umutekano ba Uganda mu gikorwa co kwubahiriza umukwabu kubera coronavirus i Kampala mu mwaka uheze

Ahavuye isanamu, Getty Images

Insiguro y'isanamu, Abajejwe umutekano barashirwa hejuru y'amaduka ku murwa mukuru Kampala
Yatangajwe

Igipolisi muri Uganda kivuga ko kiza gushira abapolisi ku mazu maremare ku murwa mukuru Kampala, nk'ingingo y'umutekano ku munsi w'amatora.

Iyi minsi iheze y'imbere y'ano matora yaranzwe n'uruhagarara hamwe n'akaguma kaguyemwo abantu.

Umwihwezo w'amasanamu yafashwe na kamera z'umutekano (CCTV) mu myiyerekano yo mu kwezi kwa cumi na rimwe, yakurikiye ifatwa ry'umukandida mu matora ya Prezida, Bobi Wine, yerekanye ko abaha amabwiriza abari mu myiyerekano bari hejuru y'amazu.

Ivyo vyagaragaye mu rwandiko igipolisi co ku murwa mukuru Kampala casohoye.

Kuwa mbere, umugabo yari hejuru ku nyubako y'isoko rya kijambere yarashe uwujejwe umutekano yariko arakizura akoresheje umwampi n'umuheto, nk'uko urwo rwandiko rubandanya rubivuga.

Prezida Museveni mu rugendo rwo kwiyamiriza igiturire mu mpera z'umwaka uheze

Ahavuye isanamu, Getty Images

Insiguro y'isanamu, Prezida Yoweri Museveni, amaze imyaka 35 ku butegetsi, ahiganwa n'abandi bakandida 10

Uwo mugabo mu nyuma yaciye araswa apfira kwa muganga kubera ibikomere.

Abafise ibikorwa vy'ubudandaji muri ayo mazu baremeye ko abo bapolisi bashirwa hejuru kuri ayo mazu, nk'uko igipolisi kibivuga.

Mu ntango z'ino ndwi, abajejwe umutekano baremeye ko bazokwongera umutekano mu bice bifatwa nk'ibishobora kuberamwo ubugizi bwa nabi.

Skip Ibisomwa cane and continue reading
Ibisomwa cane

End of Ibisomwa cane

Bobi Wine afatwa yagirizwa igikorane kitemewe n'amategeko mu ndwi iheze

Ahavuye isanamu, Getty Images

Insiguro y'isanamu, Ifatwa rya Bobi Wine, abonwa nk'uwukomeye mu bahanganye na Museveni, ryateje akaguma kaguyemwo abantu

Ibiduga bitamenwa n'amasasu hamwe n'abajejwe umutekano bagenda n'amaguru baragaragaye bakizura amabarabara ya Kampala muri ino minsi.

Prezida Yoweri Museveni arondera kurongora igihugu ikiringo kigira gatandatu nyuma y'imyaka 35 ari ku butegetsi.

Uwo mukambwe w'imyaka 76 ahiganwa n'abandi bakandida 10, barimwo uwuzwi cane w'imyaka 38, umunyamuziki yahindutse umunyapolitike Robert Kyagulanyi, azwi cane nka Bobi Wine.