Uko bimeze kuba mu bihugu bitekanye kurusha ibindi ku isi mu 2026

Ubu hari intambara nyinshi ziri kuba kurusha ikindi gihe cyose kuva mu Ntambara ya Kabiri y'Isi Yose. Abaturage bo muri Islansde, Nouvelle-Zélande n'ahandi barasobanura ibyiza bituma ibihugu byabo biba amahoro.

Isi yarushijeho kubamo amahoro make kurusha uko yari imeze umwaka ushize, nk'uko bigaragara mu kigereranyo cy'amahoro ku isi . Muri rusange amahoro yagabanutse mu bihugu 99, ikaba ibaye imyaka 12 yikurikiranya amahoro agabanuka kw'isi. Nyamara muri iyo sura igenda irushaho kuba mbi, hari itsinda rito ry'ibihugu rikomeje kwitandukanya n'ibindi.

Steve Killelea, washinze akaba na perezida mukuru w'ikigo cy'ubukungu n'amahoro, cyashyizeho icyo gipimo mu 2007, yagize ati: "Nubwo twagize iri gabanuka rikomeye, ntabwo byagize ingaruka ku bihugu biri kw'isonga."

Iki gipimo gikora urutonde rw'ibihugu 163 mu bipimo 23, kuva ku ikoreshwa ry'amafaranga mu gisirikare n'intambara zikomeje kugeza ku kigero cy'ukwica undi muntu n'uko abantu babona umutekano. Ibihugu bitekanye cyane akenshi biba bifite ikigero cy'urugomo kiri hasi n'inzego zikora neza, icyizere kiri hejuru mu mibereho, umubano mwiza n'abaturanyi hamwe n'ubuzima bwiza bw'abaturage.

Twaganiriye n'abaturage bo mu bihugu bitanu bifite umutekano cyane ku isi kugira ngo tumenye uko uwo mutekano umeze umunsi ku wundi, igifasha kuwukomeza n'uburyo abagenzi bashobora kwishimira ituze n'umutekano.

1. Islande

Islande(Iceland) iri kw'isonga kuri uru rutonde kuva mu 2008 kandi ikomeje kuba igihugu gitekanye ku isi ku mwaka wa 19 cyikurikiranya. Yazamutseho 2% mu 2026, ifashwa no kugabanuka cyane kw'imyigaragambyo irimo urugomo, kandi ikomeje kuza ku mwanya wo hejuru mu bijyanye n'umutekano, kugira amakimbirane make no kuba nta bya gisirikare byinshi bihaba.

Urutonde rw'ibihugu 10 bya mbere ku gipimo cy'amahoro ku isi mu 2026

1. Iskande(Iceland)

2. Nouvelle-Zélande

3. Ubusuwisi

4. Slovenia

5. Irlande

6. Autriche(Austria)

7. Portugal

8. Singapur

9. Finlande

10. Ubuyapani

Umuyobozi wa Visit Iceland Oddný Arnarsdóttir aragira ati:"Amahoro ari hose muri Iceland , ariko nanone ni amahitamo aturuka mu miryango yacu ifitanye ubumwe,". Uwo mugore abishingira ku kwiyemeza kugendera mu buringanire harimo uburinganire hagati y'abagabo n'abagore, aho Iceland ihora iza mu bihugu biri imbere ku isi - hamwe no muri seruvisi zikomeye ku baturage n'imbaraga zisubira.

Uko kwiyemeza kurenze politiki, aho abaturage bagaragaza ko bafite ubumwe bukomeye mu kubaho kwabo no gusangira inshingano. Arnarsdóttir yagize ati: "Tuzi neza uburyo dufite amahirwe yo kugira iyi mimerere y'amahoro. Bigaragaza akamaro ko gukomeza umuryango ufunguye kandi ushyira mu gaciro."

Kuba Islande iri kure y'ibindi bihugu nabyo bigira uruhare. Eyrún Aníta Gylfadóttir, ushinzwe iyamamazabikorwa muri Rangá Hotel, yagize ati: "Kuba Islande (Iceland) iri kure bivuze ko idahungabanywa n'ibibazo mpuzamahanga."

''Imisozi y'agatangaza, umwuka mwiza n'amazi meza menshi bigira uruhare runini mu mibereho myiza y'abaturage hano."

Abashyitsi barashishikarizwa gusura ahantu nyaburanga hazwi cyane muri iki gihugu. Arnarsdóttir abereka ahantu nyaburanga harenga 220 hakwirakwiriye hirya no hino muri Islande, harimo Ingoro Ndangamurage y'Igihugu iri mu murwa mukuru n'Ingoro Ndangamurage iri mu nkengero za Westfjords. Yagize ati: "Nkunda inzu ndangamurage zacu zitangaje." Aha hantu hafasha kuvuga inkuru n'imigenzo yo mu gace, ndetse anashishikariza abantu gushakisha byinshi no kumenya ibintu bitandukanye bya Islande."

2. New Zealand ( Nouvelle-Zélande)

Iki gihugu cya New Zealand cyangwa se Nouvelle-Zélande kiri ku mwanya wa kabiri mu bihugu bitekanye ku isi (cyazamutse kiva ku mwanya wa gatatu mu 2025), kikaba ari cyo gihugu gitekanye cyane mu karere ka Aziya na Pasifika. Umutekano wacyo watewe ahanini n'igabanuka ry'intwaro zitumizwa mu mahanga, kandi kikaba gikomeje kuba kimwe mu bihugu bitekanye kandi bifite intwaro nke.

Amahoro menshi aturuka ku bumenyi bw'isi. Warwick Woodley, Umunya-Nouvelle-Zélande akaba n'uwashinze NZ Golden Visa, yagize ati: "Kuba kure cyane y'ahantu hose bivuze ko Nouvelle-Zélande yirinze cyane akajagari ka politiki gakurura andi mahanga mu makimbirane." Ariko hari ikintu abona mu muco. Abantu bakunda gutuza no kuvuga ibintu uko biri, yavuze ko "muri rusange bashishikajwe no gukora ibintu kuruta gukurura ibintu."

Umutekano hano urasanzwe cyane ku buryo udakunze kuvugwaho. Woodley yagize ati: "Abantu benshi ntibanawutekerezaho cyane, ibyo bikaba ari ikimenyetso cyiza cy'uko atari ikibazo muri rusange." "Imbunda ntabwo ari ikibazo cy'ubuzima bwa buri munsi hano ." Yongeyeho ko mu turere dutandukanye abantu babaho nk'abaziranye kandi bagafashanya. "Uko kumva ko turi abanyamuryango bigira uruhare runini mu gihugu cy'abaturage miliyoni eshanu, aho bigoye kubaho utazi abaturanyi bawe."

Kuba abaturage baho ari bake kandi bivuze ko byoroshye kubona ibintu bakeneye.

3. Ubusuwisi

Ubusuwisi, bwavuye ku mwanya wa gatanu umwaka ushize bugera ku mwanya wa gatatu muri 2026, aho umubare muke w'ibikorwa by'ibyaha uhuzwa na politiki imaze igihe kinini yo kutagira aho ibogamira mu gisirikare, bigatuma ari kimwe mu bihugu bitekanye ku isi.

Umwanditsi ukorera i Geneve Cornelia Choe, yagize ati: "Abantu basa nkaho biteguye guha undi muntu amahirwe hano." Bituma habaho icyizere, kwizera ko muri rusange abantu bazakora ibikwiye kandi ko ubuzima bwa buri munsi bukomeza uko bikwiye nta kibazo."

Cornelia Choe aragira ati: Wenda iyi ni yo kamere nyakuri y'amahoro: ntibivuze ko nta bibazo bihari rimwe na rimwe, ariko intego rusange ni ugushaka uburyo bwo kubikemura mu buryo bwiza.

4: Slovenia

Sloveniya yinjiye mu bihugu bitanu bya mbere bitekanye ku isi ku nshuro ya mbere. Imikorere myiza ya Slovenia iterwa no kuba ikoresha amafaranga make mu gisirikare ndetse n'umutekano uri ku kigero cyo hejuru.

Icyo ukora cyose muri Slovenia, uzashimishwa n'uburyo abantu bagufata neza.

Jerneja Zver, utuye i Ljubljana akaba ayobora ibikorwa bya Intrepid Travel mu Burayi bw'Iburasirazuba, yagize ati: "Abanya-Slovenia baha agaciro umuryango kandi bamara igihe kinini basura pariki cyangwa ubusitani, ibyo ntekereza ko bituma twumva dutuje kurushaho." Zver avuga ko wikendi ze nyinshi aba ari hanze, atembera mu misozi, atwara igare, anyerera ku rubura (neige/snow) cyangwa asohokana n'inshuti n'umuryango. Yavuze ko umuco ukomeye ushyira imbere uburinganire hagati y'akazi n'ubuzima, bituma abantu bumva ko bafitanye isano.

Zver yagize ati: "Mu gihe amakimbirane n'ibibazo bibangamiye ibice byinshi by'isi muri iki gihe, numva mfite amahirwe menshi yo kwita Sloveniya iwacu. Nishimira utuntu duto nari gufata nk'aho tworoheje, nzi ko nshobora kubaho ubuzima bwanjye bwa buri munsi mu mutekano nta bwoba."

5. Irlande

Irlande iri ku mwanya wa gatanu, ifite amanota menshi kubera kugira umubare muto w'ibikorwa by'urugomo no kugira uruhare ruto mu ntambara mpuzamahanga.

Kubera iki gihugu cyigeze kugira imvururu , umutekano ufatwa nk'ikintu cy'ingenzi. Didi Ronan, washinze hoteli ya Native West Cork, yagize ati: "Ubunararibonye bw'amateka ya Irlande nk'igihugu butuma abaturage bayo bamenya neza akaga k'ivangura n'akamaro ko kwakira neza abandi bantu."

Ronan avuga ko uyu muco wo kwakira abashyitsi waturutse ku mategeko ya Brehon, yayoboye Irlande mu gihe kinini cy'ikinyagihumbi cya mbere, agategeka abantu gucumbikira abashyitsi n'abagenzi no kubagaburira . Yagize ati: "Biri muri ADN yacu."

Umuco wo kutagira aho ubogamiye muri Irlande uha iyi leta amahoro ku rwego mpuzamahanga, kuko iki gihugu kidafatanya mu ntambara z'amahanga cyangwa mu mashyirahamwe ya gisirikare. Ronan yagize ati: "Mu bihe by'imvururu ku isi no mu buryo butunguranye hari ikintu gihumuriza umutima nko kuruhuka ku rutare ruri kure mu nyanja ya Atlantika, kumva umuziki mwiza no gusoma igitabo nyuma yo gutembera."

Ku bashyitsi, inzira yihuse yo kugera ku ruhande rw'amahoro rwa Irlande ni ukunyura mu bidukikije byayo, haba mu ishyamba cyangwa mu rugendo rwo ku nkombe. Ronan agira abashyitsi inama yo gufata ubwato bujya ku kirwa cya Cape Clear, gusura amatongo yo mu gihe cya kera ya Three Castle Head cyangwa gusura uruziga rw'amabuye rwa Drombeg hafi ya Glandore.