'Muzokubitwa kabiri ivyo mube mubizi' – Nkurunziza yabwiraga nde?

Inyandiko gusa
Perezida Nkurunziza avuga ko intarambara y'amasasu bayihagaritse burundu, ngo kereka uzigerezaho

Ahavuye isanamu, RTNB

Insiguro y'isanamu, Perezida Nkurunziza avuga ko intarambara y'amasasu bayihagaritse burundu, ngo kereka uzigerezaho
Yatangajwe

Mu ijambo risoza icyumweru ishyaka CNDD-FDD riri ku butegetsi mu Burundi ryise icyumweru cy'intwari, Perezida Pierre Nkurunziza yaburiye abo muri iri shyaka avuga ko "bashaka guhemuka".

Iri jambo yarivugiye muri Commune Mubimbi mu ntara ya Bujumbura mu mpera y'icyumweru gishize aho yatangiye avuga iby'urugamba iri shyaka rye ryarwanye n'aho rigeze ubu.

Bwana Nkurunziza yavuze ko urugamba rw'amasasu rwamaze imyaka hafi 15 ariko ngo ubu rwararangiye burundu kereka uzigerezaho.

Ati: "Muri CNDD-FDD twarahagaritse intambara burundu, mugabo uzotuvyoronga tuzamwereka ko turya dukarabye, uzigerezaho yatsa umuriro azicuza icyo awakirije".

Ijambo rye rigarukamo Imana kenshi, avuga ko abashaka guhemuka bazaba bahemukiye Imana n'abenegihugu batazagira amahoro.

Bamwe mu bayoboke b'ishyaka CNDD-FDD cyane ishami ry'urubyiruko 'Imbonerakure' bavugwa na raporo y'abakoze iperereza ba ONU mu bikorwa byo kugirira nabi abatari muri iryo shyaka.

Bavugwa kandi mu bikorwa bihohoterwa uburenganzira bwa muntu nk'ubwicanyi, urugomo, gutera ubwoba, gufunga binyuranyije n'amategeko n'ibindi.

Ubutegetsi bw'u Burundi bwagiye buhakana ibivugwa n'ishami ry'umuryango w'abibumbye ryita ku burenganzira bwa muntu rivuga ko ryabonye mu Burundi.

Skip Ibisomwa cane and continue reading
Ibisomwa cane

End of Ibisomwa cane

Araburira abo mu ishyaka rye

Bwana Nkurunziza we yaburiye abo mu ishyaka rye avuga ko ntawarihemutsemo ngo bimuhire.

Ati: "Erega ubu hoho birakomeye, ibaze Imana tuyiha ikibanza cya mbere muri CNDD-FDD umwaka ushize rero twaravyonyoye tuyiha ikibanza ca mbere mu ibwirizwa shingiro, muzokubitwa kabiri ivyo mube mubizi kandi ntimubifate minenegwe naje kukuburira".

Bwana Nkurunziza ntiyaciye ku ruhande yavuze ko abwira 'Abagumyabanga' (abayoboke ba CNDD-FDD) gusa hamwe n'abaciye muri iri shyaka.

Ati: "Imana iriteguye neza neza gukubitisha inkoni y'icyuma umugumyabanga azohirahira ahemuke".

Iri shyaka rizaba rihanganye n'ayandi mu matora y'umukuru w'igihugu ateganyijwe umwaka utaha, kugeza ubu ntabwo riratangaza umukandida waryo muri ayo matora.

Bwana Nkurunziza akaba yaremeje ko ataziyamamaza muri ayo matora.