Umugabo wo muri Amerika ugemura 'cakes' ari mu mazi abira aregwa kuziba

Umugabo ugemura 'cakes' mu modoka mu mujyi wa New York wigereraga ku bubiko bwa 'cakes' zikosha zigura amadolari 90 y'Amerika imwe imwe, arashinjwa kuziba akongera akazicuruza azungukamo.

Bivugwa ko David Lliviganay yibye izi 'cakes' zizwi ku izina rya "Lady M" zifite agaciro k'amadolari 90,000.

Kompanyi ikora izo 'cakes' izwi cyane kubera ko izindi 'cakes' zayo zogeye zizwi ku izina rya "Mille Crêpes", ibyamamare bitandukanye bikunze gushyira amafoto yazo ku rubuga rwa Instagram.

Bivugwa ko Bwana Lliviganay yibye 'cakes' zirenga 1,000 mu gihe kibarirwa mu mezi nkuko bivugwa n'ikinyamakuru New York Times.

Mu ntangiriro y'uyu mwaka, yemereye urukiko ko yibye ndetse biteganyijwe ko akatirwa mu mpera y'uku kwezi kwa cyenda, ariko hari ikindi kirego cyatanzwe i New York na banyiri iyo kompanyi.

Nkuko bikubiye muri icyo kirego, Bwana Lliviganay yagiye akura izo 'cakes' mu byuma byo kuzikonjesha ('freezers') guhera mu kwezi kwa 11 umwaka ushize kugera mu kwezi kwa kabiri uyu mwaka, nuko azigurisha ku bandi bacuruzi.

Inshuro nyinshi yafashwe ku mashusho ya camera zicunga umutekano (CCTV) afata izo 'cakes', nkuko bikubiye mu nyandiko z'urukiko.

Inyandiko z'urukiko zivuga kandi ko iyo kompanyi yabitahuye ubwo yasangaga 'cakes' zayo za 'crêpe' ziri kugurishwa ahandi ku giciro cyo hasi.

Iyo kompanyi iri gushaka kugaruza amafaranga y'izo 'cakes' zaburiwe irengero ndetse igasaba n'impozamarira.

Izo 'cakes' za Mille Crêpes zigurwa n'umugabo zigasiba undi, zikorwa bafata uduce tugerekeranye tumeze nk'umugati worohereye cyane, tukoroswaho amavuta.

Iyo kompanyi ikora izo 'cakes' - yagaragaye mu kinyamakuru cya Oprah Winfrey ndetse no mu kiganiro cyo kuri televiziyo gikorwa na Martha Stewart, ukora ubushabitsi wahoze ari n'umunyamideli - yatangiye mu mwaka wa 2002.

Ubu imaze kugaba amashami mu bice bitandukanye muri Amerika ndetse no ku mugabane w'Aziya.