တရားမဝင်မြေရှားသတ္တုတူးဖော်ရေးလုပ်ငန်းတွေ အရှိန်အဟုန်မြှင့်ဆောင်ရွက်နေ

တိုက်ရိုက် ထုတ်လွှင့်ချက်

1. ၆ သြဂုတ် ၂၀၂၂ဒီပဲယင်းမြို့နယ် ကိုင်းကံရွာမှာ ရွာလုံးကျွတ်နီးပါးမီးရှို့ခံရပြီး အလောင်း ၃ လောင်းတွေ့၊ လျှော်ဖြူရွာမှာ တစ်ယောက်အသတ်ခံရ, အရပ်သား ၁၀ ယောက် အဖမ်းခံထားရ

   စစ်ကိုင်းတိုင်း ၊ ဒီပဲယင်းမြို့နယ်က ကိုင်းကံရွာက အိမ်ခြေ ၂၀၀ ကျော်နဲ့ ရွာလုံးကျွတ်နီးပါး ၊ လျှော်ဖြူရွာက အိမ် ၂ အိမ်ကို ဒီနေ့ ဩဂုတ် ၆ ရက်မှာ စစ်ကောင်စီတပ်တွေက မီးရှို့သွားတယ်လို့ ဒေသခံတွေက ပြောပါတယ်။

   လျှော်ဖြူရွာက အရပ်သားတစ်ယောက်အသတ်ခံရပြီး ၁၀ ယောက်ကို ဖမ်းဆီးသွားသလို ရွာလုံးကျွတ်နီးပါး မီးရှို့ခံရတဲ့ ကိုင်းကံရွာမှာလည်း ရုပ်အလောင်း ၃ လောင်း ရှာတွေ့တယ်လို့ ဒေသခံတွေဆီကနေ သိရပါတယ်။

   ပြီးခဲ့တဲ့ ဩဂုတ် ၄ ရက် မနက် ၁၀ နာရီလောက်က ရဟတ်ယာဉ် ၂ စီးနဲ့ စစ်ကောင်စီတပ်အင်အား ၄၀ ဝန်းကျင်လောက် ချထားခဲ့သလို ၊ တိုက်လေယာဉ်နှစ်စီးနဲ့ လည်းကျေးရွာပတ်ဝန်းကျင်တွေကို ပစ်ခတ်ခဲ့တဲ့အကြောင်း၊ ထွက်မပြေးနိုင်တဲ့ ကိုင်းကံရွာက အရပ်သား ၈၀ လောက်ကို ဖမ်းဆီးထားပြီး ရွာမှာ တပ်စွဲထားခဲ့တယ်လို့ ဆိုပါတယ်။

   ဒီနေ့ ဩဂုတ် ၆ ရက် မနက်မှာ ဖမ်းဆီးထားသူတစ်ချို့ကို ပြန်လွှတ်ပြီး ရွား ပတ်ဝန်းကျင်ကို ပစ်ခတ်ပြီးနောက် စစ်ကြောင်းပြန်ထွက်သွားခဲ့ပါတယ်။

   အဖမ်းခံထားရသူတွေထဲက တချို့ကို ပြန်ရှာလို့မတွေ့သေးတာကြောင့် စစ်ကြောင်းနဲ့အတူ အဖမ်းခံထားရတယ်လို့ ယူဆတဲ့အကြောင်း ဒေသခံတစ်ယောက်က ပြောပါတယ်။

   “သူတို့ မနက်ပိုင်းက ထွက်သွားတယ်။ အခြေအနေကြည့်ပြီး အခု နေ့ လယ် ၃ နာရီခွဲလောက်မှ မီးဝင်ငြှိမ်းတာ၊ အခုထိမငြိမ်းသေးဘူးဗျ။ တစ်ရွာလုံး အနိဌာရုံပဲဗျာ။ အသတ်ခံထားရတဲ့ အလောင်း ၃ လောင်းမှာလည်း ထိုးသွင်းဒဏ်ရာတွေ၊ မျက်နှာယောင်ကိုင်းနေတာတွေ၊ နားထဲကို ထိုးသွင်းထားတာတွေနဲ့ ပစ်ခတ်ဒဏ်ရာတွေတွေ့တယ်။ ဘာတိုက်ပွဲမှ မဖြစ်ဘူး။ အကြောင်းမဲ့သပ်သပ် ဝေဟင်ရော ၊ မြေပြင်ရော ကြားညပ်တိုက်တာ”လို့ အဲ့ဒီဒေသခံက ပြောပါတယ်။

   ကိုင်းကံရွာကနေ မနက် ၆ နာရီလောက်က ထွက်သွားတဲ့ အဲ့ဒီစစ်ကြောင်းဟာ အနားက လျှော်ဖြူကျေးရွာကို မနက် ၈ နာရီမှာ ဝင်ရောက်ပြီး မီးရှို့ကာ အရပ်သားတစ်ယောက်ကိုသတ်ပြီး ၁၀ ယောက်ကို ဖမ်းဆီးသွားတာဖြစ်တယ်လို့လည်း သိရပါတယ်။

   အဖမ်းခံထားရသူတွေထဲမှာ ကိုင်းကံရွာက ၂ ယောက်၊ မကျည်းအုပ်ရွာက ၁ ယောက်၊ လျှော်ဖြူရွာက ၇ ယောက်ဖြစ်တယ်လို့ ဒီပဲယင်းညီနောင်များအဖွဲ့က သတင်းထုတ်ပြန်ထားပါတယ်။

2. ၆ သြဂုတ် ၂၀၂၂မြိုင်မြို့နယ် ၊ ကျောက်ဆောက်ရွာမှာ အသက် ၄ နှစ်ကလေးအပါဝင် ရွာသား လေးယောက်အလောင်းတွေ့

   မကွေးတိုင်း၊ မြိုင်မြို့နယ် အရှေ့ပိုင်း ကျောက်ဆောက်ရွာထဲကို စစ်ကောင်စီတပ်တွေက ဩဂုတ် ၄ ရက်က စစ်ကြောင်းထိုးခဲ့ပြီးနောက် အသက် ၄ နှစ်ကလေးအပါဝင် ၊ ရွာသားလေးယောက်ဟာ ကျည်ဒဏ်ရာတွေနဲ့သေဆုံးနေတာကို မနေ့က သြဂုတ် ၅ရက် ညနေပိုင်းမှာ တွေ့ရတယ်လို့ ရွာထဲကို ခဏတာ ဝင်ကြည့်ခဲ့တဲ့ ဒေသခံတွေက ဘီဘီစီကို ပြောပါတယ်။

   ကျည်ဒဏ်ရာတွေနဲ့ သေဆုံးသူတွေထဲမှာ အသက် ၄ နှစ်အရွယ်ကလေး၊ ဒေသကာကွယ်ရေးတပ်ဖွဲ့ဝင်တစ်ယောက်နဲ့ ရွာသား နှစ်ယောက်ဖြစ်တယ်လို့လည်း ပြောပါတယ်။ ကျောက်ဆောက်ရွာထဲကို စစ်ကောင်စီတပ်တွေ က ပစ်ခတ်ဝင်ရောက်ခဲ့ပြီး ဒေသခံ ရွာသား ၂၇ ယောက်ကို ဖမ်းဆီးခဲ့တာပါ။ မနေ့ ဩဂုတ် ၅ ရက် မှာတော့ ဖမ်းထားသူတွေကိုပြန်လွှတ်ပေးခဲ့တယ်လို့ ဆိုပါတယ်။

   '' တပ် ၅ ရက်နေ့ မနေ့ကရွာကနေထွက်သွားတယ်၊ ဒါပေမဲ့ ကင်းပုန်းတွေရှိနေလို့ ပြန်မဝင်ရဲကြသေးဘူး။ ရွာက ၁၂ ဘီးကားပေါ် ရွာသားတွေရဲ့ ဆိုင်ကယ်တွေတင်ပြီး မောင်းယူသွားတယ်'' လို့ ဒေသခံတစ်ယောက်က ပြောပါတယ်။

   ရွာကိုလည်း မီးရှို့ထားခဲ့ပြီး နေအိမ်ဘယ်လောက်မီးလောင်ခံရလဲဆိုတာကိုတော့ သေချာမသိကြရသေးပါဘူး။

   မြိုင်မြို့နယ်ထဲမှာ စစ်ကောင်စီတပ်တွေကို ဒေသကာကွယ်ရေးတပ်တွေက ပြောက်ကျားတိုက်ခိုက်မှုတွေကြောင့် စစ်ကောင်စီသေဆုံးတာတွေရှိသလို စစ်ကောင်စီရဲ့ ပစ်ခတ်မှုတွေကြောင့် ဒေသကာကွယ်ရေးတပ်တွေသေဆုံးတာတွေလည်း ရှိနေတာပါ။

3. ၆ သြဂုတ် ၂၀၂၂မြန်မာ့အကျပ်အတည်းကိုဖြေရှင်းဖို့မှာ သူ့အနေနဲ့ စူပါဟီးရိုးမဟုတ်လို့ နေ့ချင်းညချင်းဖြေရှင်းနိုင်မှာမဟုတ်ကြောင်း အာဆီယံသံပြော

   နှစ်ပေါင်းများစွာကြာနေတဲ့ မြန်မာ့အကျပ်အတည်းကိုဖြေရှင်းဖို့ရာမှာ သူ့အနေနဲ့ စူပါဟီးရိုးမဟုတ်လို့ နေ့ချင်းညချင်းဖြေရှင်းနိုင်မှာမဟုတ်ကြောင်း အာဆီယံအလှည့်ကျ ဥက္ကဋ္ဌ ကမ္ဘောဒီးယားရဲ့ နိုင်ငံခြားရေးဝန်ကြီး ပရတ်ဆော့ခွန်းကဒီကနေ့ သြဂုတ် ၆ရက် မှာ ကမ္ဘောဒီးယားနိုင်ငံ ၊ ဖနွမ်ပင်မြို့မှာ သတင်းထောက်တွေနဲ့တွေ့ဆုံစဥ်ပြောခဲ့တယ်လို့ ဖနွမ်ပင်ပို့စ်က ဖော်ပြပါတယ်။

   မြန်မာနိုင်ငံဆိုင်ရာ အာဆီယံအထူသံလည်းဖြစ်တဲ့ သူ့အနေနဲ့ မြန်မာနိုင်ငံကို ၂ခေါက်သွားထားပြီး စစ်ခေါင်းဆောင်နဲ့တွေ့ထားပေမဲ့ ထင်ရှားတဲ့ရလဒ်ချက်ချင်းမထွက်သေးလို့ လူအချို့ရဲ့ မျှော်လင့်ချက်ကြီးနေတဲ့ အပေါ်မှာ သူက အခုလိုတုံ့ပြန်တာပါ။

   '' မြန်မာနိုင်ငံအရေးကူညီဖို့နဲ့ပတ်သက်ပြီး ကျွန်တော် AMM - အာဆီယံဝန်ကြီးများအစည်းအဝေးမှာပြောခဲ့သလိုပါပဲ။ အများကြီးအားစိုက်ထုတ်ခဲ့တယ်။ ဒါပေမဲ့ ကျွန်တော်က အာဆီယံသံတမန်ပါ။ စူပါဟီးရိုး မဟုတ်သလို စူပါမန်းလည်းမဟုတ်ဘူး။ ကျွန်တော်ထင်ပါတယ်။ မြန်မာ့အရေးကို စူပါမန်းတောင် နေ့ချင်းညချင်းတောင်ဖြေရှင်းနိုင်မှာမဟုတ်ဘူး '' လို့ ပရတ်ဆော့ခွန်းကပြောပါတယ်။

   '' ဒါပေမဲ့ ဘယ်လိုပဲဖြစ်ပါစေ။ ကျွန်တော့်အနေနဲ့ မြန်မာ့အကျပ်အတည်းကို ဖြေရှင်းဖို့ကိုယ်စွမ်းညဏ်စွမ်းရှိသရွေ့ ကြိုးစားမှာပါ'' လို့ သူကဆက်ပြောပါတယ်။

   ထင်ရှားတဲ့ နိုင်ငံရေးသမား ၂ဦးနဲ့ အရပ်သား ၂ဦး ကို ‌ကွပ်မျက်ခဲ့တဲ့ အပေါ်မှာ အာဆီယံ နိုင်ငံတွေအားလုံးက ကန့်ကွက် ရှုတ်ချကြသလို ဒါဟာ မြန်မာ့ အရေးဖြေရှင်းမှုမှာ ဆုတ်ယုတ်မှုအဖြစ် သဘောတူကြပါတယ်။

   ပရတ်ဆော့ခွန်းဟာ လာမယ့် စက်တင်ဘာလပထမပတ်ထဲ မြန်မာပြည်ကို တတိယအကြိမ်လာဖို့ရှိတယ်လို့သိရပါတယ်။ အာဆီယံအထူးသံဟာ ပြီးခဲ့တဲ့ အခေါက်တုန်းကတော့ နိုင်ငံတော်အတိုင်ပင်ခံ ဒေါ်အောင်ဆန်းစုကြည် နဲ့တွေ့ဆုံခွင့်ရရေး စစ်ကောင်စီကိုတောင်းဆိုထားပါတယ်။

4. ၆ သြဂုတ် ၂၀၂၂ချင်းတွင်းမြစ်အတွင်း သွားနေတဲ့ စစ်ကောင်စီရေယာဥ်အချို့ကို ဒေသကာကွယ်ရေးတပ်တိုက်ခိုက်, မြစ်ကမ်းဘေး ဝဲယာကရွာတွေကို စစ်ကြောင်းထိုးနေလို့ ဒေသခံတွေဘေးလွတ်ရာပြေးရ

   စစ်ကိုင်းတိုင်း ၊ မုံရွာဘက် ကနေ သြဂုတ် ၄ရက်က ချင်းတွင်းမြစ်အတွင်း အထက်ကိုဆန်တက်လာတဲ့ စစ်ကောင်စီရေယာဥ်အချို့ ကို ဒေသကာကွယ်ရေးအဖွဲ့တွေက သြဂုတ် ၅ ရက်က ပစ်ခတ်တိုက်ခိုက်ခဲ့တယ်လို့ ဒေသကာကွယ်ရေးတပ်ဒေါင်းနီအဖွဲ့ က ရုပ်သံဖိုင်နဲ့ သတင်းထုတ်ပြန်ထားပါတယ်။ တိုက်ခိုက်ခံရမှုကြောင့် ရေယာဉ်တစ်စီး လက်နက်ထိမှန်ကာ စက်ချို့ယွင်းခဲ့တယ်လို့ ဆိုပါတယ်။

   တိုက်ခိုက်ခံရမှုနောက်မှာ စစ်ကောင်စီနဲ့ ဒေသကာကွယ်ရေးတပ်တွေ ချင်းတွင်းမြစ်ကြောင်းတစ်လျှောက် တိုက်ပွဲနဲ့ ထိတွေ့တာတွေဆက်ရှိနေတယ်လို့ ‌ဒေသခံတွေကပြောပါတယ်။

   လက်ရှိမှာတော့ ချင်းတွင်းမြစ်အတွင်း ကနီမြို့ကို ဦးတည်ပြီး အဆန် သွားနေတဲ့ ‌စစ်ကောင်စီတပ်ဖွဲ့ဝင်တွေပါတဲ့ရေယာဥ်တွေဟာ ချင်းတွင်းမြစ်ကမ်းဘေးဝဲယာ ကရွာတွေကို ဒီကနေ့ အထိ စစ်ကြောင်းထိုးတာကြောင့် ဒေသခံသောင်းချီ ထွက်ပြေးတိမ်းရှောင်နေရတယ်လို့ စစ်ရှောင်ကူညီသူတစ်ဦးကပြောပါတယ်။

   '' မိုးကရွာ ၊ ပြေးစရာက အခက်အခဲရှိတော့ စစ်ရှောင်တွေ ဒုက္ခရောက်ကြတာရှိတယ်။ တိုက်ပွဲတွေကလည်းဆက်ရှိနိုင်တော့ အိမ်လည်းမပြန်ရဲကြသေးဘူး'' လို့ ဆိုပါတယ်။

   စစ်ကောင်စီတပ်တွေဟာ ရေကြောင်းအပြင် ကုန်းကြောင်းလည်းဖြန့်ကျက်စစ်ကြောင်း ထိုးတာတွေရှိနေလို့ ထွက်ပြေးတဲ့နေရာမှာ အခက်အခဲရှိနေတယ်လို့ သိရပါတယ်။

5. ၆ သြဂုတ် ၂၀၂၂အရာတော်မြို့နယ်၊ မင်းရွာမှာ နေအလုံး ၂၀၀ ကျော် မီးရှို့ခံရ, ထွက်မပြေးနိုင်တဲ့ အသက် ၉၀ နီးပါးအရွယ် အဖွားအိုမီးလောင်သေဆုံးခဲ့

   စစ်ကိုင်းတိုင်း၊ အရာတော်မြို့နယ်၊ မင်းရွာကို ဩဂုတ် ၄ ရက်ကစပြီး စစ်ကြောင်းထိုးလာတဲ့ စစ်ကောင်စီတပ်တွေက ရွာကိုမီးရှို့ခဲ့တာကြောင့် နာတာရှည်ရောဂါနဲ့ အိပ်ရာထဲလဲနေလို့ ထွက်မပြေးနိုင်တဲ့ အသက် ၈၈ နှစ်အရွယ် အဘွားအိုတစ်ယောက် မီးလောင်သေဆုံးသွားတယ်လို့ မိသားစုဝင်တွေနဲ့ ဒေသခံတွေက ပြောပါတယ်။

   '' အခါတိုင်း သုံးခါ ၊ လေးခါ လောက် စစ်ကြောင်းဝင်တုန်းက သူ့ကို ထမ်းပြီးပြေးတာ။ အဖွားက နားလည်းမကောင်းတော့ဘူး။ စကားလည်းသိပ်မပြောနိုင်ဘူး၊ ထားတဲ့အတိုင်း နေရတာ။ ဒီတစ်ခါက ကျနော်တို့က အလုပ်ကိစ္စနဲ့ရွာအပြင်ကို ရောက်နေတာ၊ စစ်ကြောင်းက ဝင်တဲ့အချိန်မှာ ရွာထဲကို ပြန်ဝင်လို့မရတော့ သူ့ကံပဲလို့ပဲ မှတ်လိုက်ရတော့တယ်။ ပြေးနေရတဲ့အချိန်လည်း အဖွားကို သနားလို့ ငိုပဲနေရတယ်။ ဒီနေ့မနက်မှ ရွာထဲပြန်ဝင်တော့ အသားစတွေပဲ ကျန်တော့တယ်။ စိတ်မကောင်းဖြစ်လွန်းလို့ ဘာပြောရမှန်းမသိပါဘူးဗျာ '' လို့ မီးလောင်သေဆုံးသွားတဲ့ အဖွားအိုရဲ့ မိသားစုဝင်တစ်ယောက်က ဘီဘီစီကို ပြောပါတယ်။

   မင်းရွာကို ဩဂုတ် ၄ ရက် မနက်ပိုင်းက စစ်ကောင်စီ စစ်ကြောင်းဝင်လာပြီးနောက် ဘုန်းကြီးကျောင်းမှာရှိနေတဲ့ အရပ်သား ၄ ယောက်ကို ဓားစာခံအနေနဲ့ ဖမ်းခေါ်လာချိန်မှာ ဒေသပြည်သူ့ကာကွယ်ရေးတပ်တွေက ဝင်ရောက်တိုက်ခိုက်ခဲ့တယ်လို့ ဒေသကာကွယ်ရေးတပ်ဖွဲ့ဝင်တစ်ယောက်က ပြောပါတယ်။

   “တိုက်ပွဲဖြစ်တော့ စစ်ကောင်စီဘက်က အကျဆုံးရှိတယ်ဗျ။ ကျနော်တို့ဘက်က အကျဆုံးမရှိပေမဲ့ ကျည်မလောက်လို့ နောက်ဆုတ်ခဲ့တာ၊ အဲ့အချိန်မှာရွာကို သူတို့ကဝင်စီးကြတာ။ ဒီနေ့မနက်ပိုင်းမှာလည်း စစ်ကြောင်းကို ကင်းထောက်သွားတဲ့ တပ်ဖွဲ့ဝင်တစ်ယောက် ပစ်သတ်ခံလိုက်ရတယ်”

   ဩဂုတ် ၄ ရက်က အပြန်အလှန်ပစ်ခတ်တာတွေရှိပြီးနောက် စစ်ကောင်စီတပ်တွေက မင်းရွာထဲကို ပစ်ခတ်ဝင်ရောက်တာနဲ့ ညနေပိုင်းမှာ စစ်ရဟတ်ယာဉ်တစ်စီးက ငါးမိနစ်ကြာ ပစ်ခတ်တာတွေရှိခဲ့တယ်လို့ ပြောပါတယ်။

   အဲဒီနေ့မှာပဲ ရွာကို မီးရှို့ခဲ့တာဖြစ်ပြီး စစ်ကောင်စီတပ်တွေ ထွက်သွားချိန်မှာ ရွာထဲကို ဝင်ကြည့်တဲ့အခါ ကားတာယာကွင်းတွေနဲ့အတူ စုပုံပြီးမီးရှို့ထားတဲ့ စစ်ကောင်စီအလောင်း ၆လောင်းကို တွေ့ရသလို အိမ်ခြေ ၁၀၀၀ ဝန်းကျင်ရှိတဲ့ ရွာလည်း အိမ်ခြေ ၂၀၀ ကျော် မီးလောင်ကျွမ်းသွားတယ်လို့ ဒေသခံတွေက ပြောပါတယ်။

   မင်းရွာဟာ အရာတော်မြို့နယ်တောင်ပိုင်း၊ အရာတော်-မြင်းမူလမ်းဘေးမှာရှိတဲ့ ကျေးရွာအုပ်စုရွာကြီးဖြစ်ပြီး စည်ကားတဲ့ရွာတစ်ရွာဖြစ်ပါတယ်။

6. ၆ သြဂုတ် ၂၀၂၂မြစ်ကြီးနားမြို့ ပလနရဲစခန်းမှာ ပစ်ခတ်မှုဖြစ်

   ကချင်ပြည်နယ်၊ မြစ်ကြီးနားမြို့နယ် ၊ ပလနရပ်ကွက် နယ်မြေရဲစခန်းမှာ ဒီနေ့ ဩဂုတ် ၆ မနက် ၅ နာရီလောက်က ၁၀ မိနစ်ကြာ ပစ်ခတ်မှုတွေဖြစ်ခဲ့ပြီး စစ်ကောင်စီရဲတပ်ဖွဲ့ဝင်အချို့ ဒဏ်ရာရပြီး တစ်ဦး သေဆုံးတာရှိတယ်လို့ ဒေသခံတွေကပြောပါတယ်။

   အဲဒီနောက်ပိုင်း လုံခြုံရေးတင်းကျပ်စစ်ဆေးတာတွေရှိနေတယ်လို့ ဆိုပါတယ်။ အဲဒီရဲစခန်းအနားက စစ်ဆေးရေးဂိတ်ဟာ ဖြတ်သန်းသွားလာတဲ့ ကုန်တင်ကားတွေ၊ အိမ်စီးကားတွေ၊ ဆီကားတွေကို အခကြေးငွေတွေ တစ်သိန်းကျပ်အထိ ကောက်ယူတာတွေရှိလို့ မကြာခဏပစ်ခံရတာတွေရှိတယ်လို့ ဒေသခံတွေက ပြောကြပါတယ်။

   '' ခဏခဏ ဖြစ်တယ်။ တခါတလေ တစ်ချက်နှစ်ချက်ပေါ့၊ ဒီတစ်ခါကျတော့ နည်းနည်းတော့ကြမ်းတယ်။ လက်နက်ငယ်သံတွေ လေးချက်လောက်အရင်ကြားတယ်။ ပြီးတော့ လက်နက်ကြီးသံတွေပါ ကြားရတယ်။ ပစ်တာတွေပြီးတော့ သေတယ်လို့ကြားရတယ် '' လို့ ဒေသခံအမျိုးသမီးတစ်ယောက်က ဘီဘီစီကို ပြောပါတယ်။

   ရဲတပ်သားသေဆုံးမှုနဲ့ပတ်သက်လို့ ဘီဘီစီအနေနဲ့ သီးခြားအတည်ပြုနိုင်တာမရှိသေးသလိုဘယ်အဖွဲ့က ဝင်ရောက်ပစ်ခတ်တယ်ဆိုတာ မသိရသေးပါဘူး။ ပလနရဲစခန်းကို ပြီးခဲ့တဲ့ ဧပြီ ၂၁ ရက် ညပိုင်းကလည်း ပြည်သူ့ကာကွယ်ရေးတပ်ဖွဲ့ ဘက်က ပစ်ခတ်ခဲ့သေးတယ်လို့ သိရပါတယ်။

7. ၆ သြဂုတ် ၂၀၂၂ကန်ပက်လက်မြို့ထဲက CDM ဝန်ထမ်းတွေအတွက် တက္ကသိုလ်တစ်ခုနဲ့ချိတ်ဆက် သင်တန်းပေးမယ်

   ချင်းပြည်နယ်၊ ကန်ပက်လက်မြို့မှာ CDM ဝင်ထားတဲ့ ပြည်သူ့ဝန်ထမ်းတွေအတွက် နိုင်ငံရေး၊ စီးပွားရေး အပါဝင် ဘာသာရပ် ၁၀ ခုကျော်ကို ပြည်တွင်းတက္ကသိုလ်တစ်ခုနဲ့ ချိတ်ဆက်သင်ကြားပေးမှာဖြစ်တာကြောင့် ပညာသင်ဆုဝင်ရောက်လျှောက်ထားကြဖို့ ကန်ပက်လက်မြို့နယ် ပြည်သူ့အုပ်ချုပ်ရေးအဖွဲ့က သတင်းထုတ်ပြန်ထားပါတယ်။

   “ ကျမတို့ ချင်းပြည်နယ်က မတိုးတက်တဲ့ပြည်နယ်တစ်ခုဖြစ်တော့ ပညာရေးအရမ်းအားနည်းတယ်။ ရဲဘော်တွေဆိုရင်လည်း ခံယူချက်ကြောင့်သာ ပါဝင်ကြတာ၊ ကိုယ်ထူကိုယ်ထ ကျောင်းတွေဖွင့်တာတောင် သင်ပေးမယ့်သူခက်တယ်၊ ၁၀ တန်းအောင်တဲ့သူတောင် ရှားပါးတဲ့အခြေအနေဖြစ်တယ်။ ကျမတို့ ပြန်လည်ထူထောင်ရေး လုပ်တဲ့အခါမှာ ဖက်ဒရယ်နဲ့ပတ်သက်တာတွေကို နားလည်ပြီး တာဝန်ယူနိုင်ဖို့ အခုကတည်းက လုပ်ထားတာပါ။ ရဲဘော်တွေကတော့ အင်တာနက်ခက်ခဲတော့ CDM တွေကို အရင်ဦးစားပေးတဲ့သဘောပါ။ “

   နိုင်ငံ‌ရေး၊ စီးပွားရေး၊ စီမံခန့်ခွဲရေး၊ အင်္ဂလိပ်စာ၊ ဖက်ဒရယ်ဆိုင်ရာ၊ အုပ်ချုပ်ရေးဆိုင်ရာသင်တန်းတွေကို အများစုရွေးချယ်တက်ရောက်ကြတယ်လို့လည်း ပြောပါတယ်။

   CDM တွေ၊ ကြားကာလပြည်သူ့အုပ်ချုပ်ရေးလုပ်ငန်းစဉ်မှာ ပါဝင်သူတွေ၊ အင်တာနက်လက်လှမ်းမီသူတွေက ဩဂုတ် ၈ ရက်နောက်ဆုံးထား ဆက်သွယ်နိုင်ပြီး သင်တန်းပြီးသွားရင် သင်တန်းကရရှိတဲ့ အသိပညာတွေကို ပြည်သူ့အုပ်ချုပ်‌ရေး အဖွဲ့ရဲ့ တော်လှန်ရေးကာလ နဲ့ ဖက်ဒရယ်တည်ဆောက်ရေးကာလတွေမှာ ပြန်အသုံးပြုရမှာဖြစ်တယ်လို့ ကြေညာချက်မှာ ပါရှိပါတယ်။

8. ၆ သြဂုတ် ၂၀၂၂မင်းပြားမြို့နယ်မှာ မိုင်းနင်းမိလို့ ဒေသခံတစ်ဦး ခြေထောက်ပြတ်ဒဏ်ရာရ

   ရခိုင်ပြည်နယ် မင်းပြားမြို့နယ်မှာ ဩဂုတ်လ ၅ ရက် မနေ့ကမနက်ပိုင်း က မိုင်းနင်းမိပြီးဒေသခံကျေးရွာသားတစ်ဦး ခြေထောက်တစ်ဖက် ပြတ်သွားခဲ့‌တယ်လို့ ဒေသခံတွေကပြောပါတယ်။

   မိုင်းပေါက်ကွဲမှုကြောင့် ခြေပြတ်ဒဏ်ရာရရှိခဲ့တဲ့သူဟာ မင်းပြားမြို့နယ်မြောက်ဘက် လေးမြို့မြစ်အရှေ့ဘက်ကမ်းမှာရှိတဲ့ မြစ်နားကျေးရွာက အသက် ၆၃ နှစ်အရွယ်ရှိပြီလို့ ဒေသခံတွေကပြောပါတယ်။

   မိုင်းပေါက်ကွဲမှုဖြစ်ပွားခဲ့တဲ့နေရာဟာ ကျေးရွာရဲ့အရှေ့ဘက် တစ်မိုင်ခန့်အကွာ တာတမံရဲ့အောက်ဘက် တောင်ကုန်းပေါ်မှာ ထင်းခုတ်သွားချိန် မြေမြှုပ်မိုင်းကို နင်းမိခဲ့တာဖြစ်တယ်လို့ဆိုပါတယ်။ အဲ့ဒီတောင်ကုန်းရဲ့အနီးဝန်းကျင်မှာ စစ်ကောင်စီတပ်စခန်းသုံးခု တည်ရှိတယ်လို့ ဒေသခံတွေက ပြောဆိုကြပါတယ်။

   “မိုင်းပေါက်ကတာက မနေ့က မနက်ပိုင်း ၇ နာရီခွဲလောက်မှာ ကြားလိုက်ရတယ်။ အခုဒဏ်ရာရတဲ့ဦးရွှေစိန်အောင်က အဲ့ဒီဘက်ကိုမနက်ပိုင်း သွားတာတွေ့လိုက်တဲ့အတွက် သူ့ကိုလှမ်းပြီးတော့ ဖုန်းဆက်တဲ့အခါမှာ သူကဖုန်းကိုင်ပြီး ခြေပြတ်သွားပြီဆိုတာပြောလို့ သိရတာပါ”လို့ မြစ်နားကျေးရွာသားတစ်ဦးက ပြောပါတယ်။

   မိုင်းပါက်ကွဲမှုဖြစ်ပွားခဲ့တဲ့နေရာဟာ ဒေသခံကျေးရွာသားတွေ နွားကျောင်းတာ၊ ထင်းခုတ်တာနဲ့ ဟင်းခူးတာတွေကို မကြာခဏသွားရောက်လုပ်ကိုင်နေကြတဲ့နေရာတစ်ခုဖြစ်ပြီး အရင်က အခုလို မျိုးမကြုံဖူးဘူးလို့ ပြောကြပါတယ်။

   မိုင်းပေါက်ကွဲဒဏ်ရာရရှိထားတဲ့ ဦးရွှေစိန်အောင်ကို ရွာသားတွေသွားရောက်ရှာဖွေကြတဲ့အခါမှာလည်း နောက်ထပ်မိုင်းပေါက်ကွဲမှုတွေ ဆက်ဖြစ်မှာကို စိုးရိမ်ကြတာကြောင့် အသက်စွန့်ပြီးတော့ လိုက်ရှာခဲ့ကြရသလို လူနာကို မင်းပြားဆေးရုံ ကို မနက် ၉ နာရီခွဲလောက်မှာ ပို့ဆောင်ပေးနိုင်ခဲ့ပြီး လက်ရှိမှာတော့ ညာဘက်ခြေထောက်ကို ဖြတ်ထားရတယ်လို့ သိရပါတယ်။

   စစ်ပွဲတွေရပ်စဲထားကြတဲ့ တစ်နှစ်ကျော်အကြာမှာတော့ ရက္ခိုင့်တပ်တော်နဲ့စစ်ကောင်စီတို့အကြား နှစ်ဘက်စစ်ရေးတင်းမာမှု တွေ မြင့်တက်လာခဲ့ပြီး တချို့မြို့နယ်တွေမှာလည်း တိုက်ပွဲတွေ ကြိုကြားကြိုကြားဖြစ်ပွားစပြုလာခဲ့တဲ့အချိန်မှာ ရခိုင်ပြည်နယ်နဲ့ ချင်းပြည်နယ် ပလက်ဝမြို့နယ်တွေမှာ အခုလိုမိုင်းပေါက်ကွဲမှုတွေ ဆက်တိုက်ကြုံတွေ့လာနေကြရတာ ဖြစ်ပါတယ်။

   ဒေသခံတွေ လုပ်ကိုင်စားသောက်နေကြတဲ့ တောတောင်တွေ၊ ဥယျာဉ်ခြံတွေ၊ လယ်ကွင်းတွေ စတဲ့နေရာတွေထိ မိုင်းပေါက်ကွဲမှုတွေနဲ့ ရင်ဆိုင်နေကြရပြီး ပြီးခဲ့တဲ့ ဇူလိုင်လအတွင်း ကျောက်တော်၊ မြောက်ဦး၊ မင်းပြား၊ အမ်း၊ မြေပုံ၊ ပလက်ဝစတဲ့မြို့နယ်တွေအတွင်း မိုင်းပေါက်ကွဲမှုတွေ ကြောင့် အရပ်သားသေဆုံးမှုတွေ အများဆုံးဖြစ်ပွားခဲ့ပါတယ်။

   အခုလို ကျေးရွာအနီးဝန်းကျင်နေရာတွေမှာ မိုင်ပေါက်ကွဲမှုတွေဆက်ဖြစ်လာနေတဲ့အတွက် အကျပ်အတည်းတွေနဲ့ရင်ဆိုင် နေကြရတဲ့ကာလမှာ တောတောင်တွေကိုမှိခိုနေကြရတဲ့ ဆင်းရဲသားဒေသခံတွေအတွက် ဘဝရပ်တည်ရေးတွေ အခက်အခဲဖြစ်လာနေတယ်လို့ ရခိုင်ဒေသခံတွေက ပြောဆိုကြပါတယ်။

   အခုဇူလိုင်လအတွင်း ရခိုင်မှာမိုင်းပေါက်ကွဲမှုငါးကြိမ်ဖြစ်ပွားခဲ့ကာ သေဆုံးသူသုံးဦး၊ ထိခိုက်ဒဏ်ရာရသူ ငါးဦးအထိရှိခဲ့ပြီး အခု ဩဂုတ်လအတွင်း မင်းပြားမြို့နယ်မှာ နောက်ထပ်မိုင်းပေါက်ကွဲမှုတစ်ခု ထပ်မံဖြစ်ပွားခဲ့ပြီး ထိခိုက်ဒဏ်ရာရသူတစ်ခုရှိခဲ့တာဖြစ်ပါတယ်။

9. ၆ သြဂုတ် ၂၀၂၂မြန်မာစစ်တပ် ရဲ့ မြန်မာ့အရေးဖြေရှင်းမှု တိုးတက်မှုမပြမခြင်း အာဆီယံအစည်းအဝေးတက်ခွင့်ဆက်ပိတ်ထားမယ်

   မြန်မာအာဏာသိမ်းစစ်တပ်အနေနဲ့ အာဆီယံရဲ့ မြန်မာ့အရေးဖြေရှင်းဖို့ ချထားတဲ့ ငြိမ်းချမ်းရေးလုပ်ငန်းစဥ်တွေမှာတိုးတက်မှုမပြမခြင်း အာဆီယံအစည်းအဝေးတွေကို တက်ရောက်ခွင့်ပိတ်ထားမယ်လို့ အာဆီယံက ဆုံးဖြတ်ကြောင်း အာဆီယံအလှည့်ကျ ဥက္ကဋ္ဌ ကမ္ဘောဒီးယားရဲ့ နိုင်ငံခြားရေးဝန်ကြီး ပရတ်ဆော့ခွန်းကပြောတယ်လို့ ဒီကနေ့ သြဂုတ် ၆ရက် ရိုက်တာသတင်းကဖော်ပြပါတယ်။

   ၅၅ကြိမ်မြောက် အာဆီယံနိုင်ငံခြားရေးဝန်ကြီးများအစည်းအဝေးကို သြဂုတ် ၃ရက်က စပြီး ဇူလိုင် ၅ရက် အထိ ကမ္ဘောဒီးယားနိုင်ငံ ၊ ဖနွမ်ပင်မြို့မှာကျင်းပခဲ့တာပါ။ '' တိုးတက်မှုကိုပြဖို့လုပ်ဆောင်ဖို့လိုပါတယ်။

   ဒါမှသာ တိုးတက်မှုအပေါ်မှာ မူတည်ပြီးဆုံးဖြတ်ချက်ကို ကျွန်တော်တို့လုပ်ဆောင်နိုင်မှာပါ'' လို့ ပရတ်ဆော့ခွန်းက ပြောကြောင်း ရိုက်တာသတင်းကဆိုပါတယ်။

   မနေ့ သြဂုတ် ၅ရက်က အာဆီယံနိုင်ငံခြားရေးဝန်ကြီးများအစည်းအဝေးနဲ့မိတ်ဖက်နိုင်ငံများ အစည်းအဝေးမှာတော့ အမေရိကန်နိုင်ငံခြားရေးဝန်ကြီး အန်တိုနီဘလင်ကန်က မြန်မာစစ်တပ်က ကျင်းပမယ်ဆိုတဲ့ ရွေးကောက်ပွဲကို အသိအမှတ်မပြုဖို့နဲ့ ဒါဟာအတုအယောင်ရွေးကောက်ပွဲဖြစ်လို့ကန့်ကွက်ကြဖို့ဆိုပြီး နိုင်ငံတကာ အသိုင်းအဝိုင်းကိုတိုက်တွန်းထားပါတယ်။

   မြန်မာပြည်တွင်းမှာ အတိုက်အခံတွေနဲ့တော်လှန်ရေးအင်အားစုတွေအပေါ် စစ်တပ်ရဲ့ ဖိနှိပ်မှုတွေအတွက်လည်း တာဝန်ယူရမှာဖြစ်ပြီး ရုရှားနိုင်ငံခြားရေးဝန်ကြီး လတ်ဗရော့ရဲ့ မြန်မာခရီးစဥ်ဟာလည်း မြန်မာအရေးအာဆီယံရဲ့ ကြိုးစားချက်ကို မထီမဲ့မြင်ရာပြုရာကျတယ်လို့ပြောကြောင်း နိုင်ငံတကာသတင်းတွေကဖော်ပြပါတယ်။

   ၃ရက်တာလုပ်ခဲ့တဲ့ အာဆီယံနိုင်ငံခြားရေးဝန်ကြီးများအစည်းအဝေးမှာ မြန်မာအရေး၊ ထိုင်ဝမ်အရေး ကို အဓိက ဆွေးနွေးခဲ့ကြပြီး မြန်မာစစ်တပ်က အာဆီယံဘုံသဘောတူညီချက် ၅ရပ်ကိုအကောင်အထည်မဖော်တာနဲ့ နိုင်ငံရေးအကျဉ်းသားလေးဦးကို ကွပ်မျက်ခဲ့တဲ့ အပေါ် အာဆီယံနိုင်ငံတွေက အပြင်းအထန်ကန့်ကွက်ခဲ့တာလည်းဖြစ်ပါတယ်။

   (၅၅) ကြိမ်မြောက် အာဆီယံနိုင်ငံခြားရေးဝန်ကြီးများအစည်းအဝေးအပြီး ထုတ်ပြန်ခဲ့တဲ့ ကြေညာချက်ပါ မြန်မာ့အရေးနဲ့ပတ်သက်တဲ့ စာပိုဒ်နဲ့ပတ်သက်ပြီး “မြန်မာနိုင်ငံ၏ဖြစ်ပေါ်တိုးတက်မှုများ” ခေါင်းစဉ်အောက်တွင် မြန်မာနိုင်ငံ က တူညီဆန္ဒ(၅)ရပ် အကောင်အထည်ဖော်ရာတွင် တိုးတက်မှုမရှိကြောင်း ဖော်ပြချက်သည် မြန်မာနိုင်ငံ၏ အမှန်တကယ်ကြိုးပမ်းဆောင်ရွက်နေမှုများကိုမျက်ကွယ်ပြု၍ လျစ်လျူရှုရာ ရောက်သည့်အတွက်ကန့်ကွက်ပါသည်'' ဆိုပြီး စစ်ကောင်စီ နိုင်ငံခြား ရေးဝန်ကြီးဌာနက သြဂုတ်လ ၅ ရက် က ထုတ်ပြန်ထားပါတယ်။

10. ၆ သြဂုတ် ၂၀၂၂လက်နက်ရောင်းချတာတွေရပ်တန့်ဖို့ ကုလရဲ့မြန်မာသံအမတ်ကြီး ဦးကျော်မိုးထွန်းတောင်းဆို

    မြန်မာစစ်တပ်ကို လက်နက်တွေရောင်းချနေတဲ့ နိုင်ငံများအနေနဲ့ လက်နက်တင်ပို့ရောင်းချတာတွေ ရပ်တန့်ပေးဖို့ ကုလသမဂ္ဂရဲ့ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်း က တောင်းဆိုလိုက်ပါတယ်။

    သြဂုတ် ၄ရက်က နယူးယောက်မြို့ ကုလသမဂ္ဂရုံးမှာလုပ်တဲ့ နျူကလီးယား လက်နက် မပြန့်ပွားရေးစာချုပ်အဖွဲ့ဝင်နိုင်ငံများ၏ လုပ်ဆောင်မှုများ ပြန်လည်သုံးသပ်ရေးဆိုင်ရာ (၁၀) ကြိမ်မြောက် ညီလာခံအထွေထွေမူဝါဒရေးရာမိန့်ခွန်းပြောကြားမှုမှာ အဲဒီလို တောင်းဆိုခဲ့တာပါ။

    မြန်မာနိုင်ငံအနေနဲ့ ပြီးခဲ့တဲ့ ၅ နှစ် အရပ်သားအစိုးရလက်ထက်မှာ နျူကလီးယားလက်နက် ဖျက်သိမ်းရေးကို အဓိကဦးစားပေးလုပ်ငန်းအဖြစ် တက်ကြွစွာပါဝင်ဆောင်ရွက်ခဲ့တာကြောင့် အာဏာသိမ်းစစ်တပ် က နျူကလီးယား ဖျက်သိမ်းရေးနဲ့ ပတ်သက်ပြီး အရင်အရပ်သားအစိုးရရဲ့ ကြိုးပမ်းဆောင်ရွက်ခဲ့မှုတွေကို ဖျက်ဆီးခြင်း မပြုနိုင်ဖို့ နိုင်ငံတကာအသိုင်းအဝိုင်းက စောင့်ကြည့်ပေးဖို့ဆိုပြီးလည်းတိုက်တွန်းခဲ့ပါတယ်။

    နျူကလီးယား လက်နက်အန္တရာယ်ဟာ သဘာဝပတ်ဝန်းကျင်၊ လူသားချင်းစာနာမှု၊ စီးပွားရေး အကျပ်အတည်းနဲ့ ကျန်းမာရေးကဏ္ဍအပါအဝင် နောက်ဆက်တွဲဘေးအန္တရာယ်တွေ ဖြစ်ပွားလာမှာဖြစ်လို့ နျူးကလီးယားလက်နက် မပြန့်ပွားရေးစာချုပ် (NPT) အရ နျူးကလီးယားလက်နက် ဖျက်သိမ်းရေးနှင့် ငြိမ်းချမ်းစွာအသုံးပြုရေးအတွက် စာချုပ်ပါအချက်တွေကို အကောင်အထည်ဖော်ဖို့တိုက်တွန်းတယ်လို့ဆိုပါတယ်။

    မြန်မာနိုင်ငံအနေဖြင့် နျူကလီးယားလက်နက်ဖျက်သိမ်းရေးနဲ့ မပြန့်ပွားရေးဆိုင်ရာ ကတိကဝတ်များကို ဆက်လက်ပြီး အပြည့်အဝလိုက်နာ ဆောင်ရွက်သွားမယ်လို့လည်းပြောကြားခဲ့ကြောင်းထုတ်ပြန်ထားပါတယ်။

    မြန်မာကိုလက်နက်ရောင်းချမှုအများဆုံးနိုင်ငံက ရုရှားနိုင်ငံဖြစ်ပြီး အာရှပစိဖိတ်ဒေသအတွင်း စစ်ရေးနဲ့ စစ်လက်နက်ရောင်းချမှုတွေကို လေ့လာရေးသားတဲ့ Janes Defence အပတ်စဉ်မဂ္ဂဇင်းရဲ့ သုတေသနပြုလုပ်ချက်အရ မြန်မာနိုင်ငံရဲ့ ကာကွယ်ရေးအသုံးစရိတ်က တစ်နှစ်ကို အမေရိကန်ဒေါ်လာ ၂ ဒသမ ၄ နဲ့ ၂ ဒသမ ၅ ဘီလျံလောက်ရှိတယ်လို့ ဆိုပါတယ်။

11. ၅ သြဂုတ် ၂၀၂၂စစ်ကောင်စီ တပ်ဖွဲ့ဝင် ၄ ဦး စီဒီအမ်လုပ်ပြီး ကေအန်ယူထံခိုလှုံတယ်လို့ဆို

    မြဝတီမြို့တောင်ဘက် ဖလူး-ဝေါလေ လမ်းပိုင်း၊ ဝေါလေ ၃ ထပ်ကွေ့ကို တိုက်ခိုက်နေတဲ့ တပ်မ ၄၄ လက်အောက်ခံ ခမရ ၂ တပ်ရင်း စစ်ကူ စစ်ကြောင်းက စစ်သည် ၄ ဦး သြဂုတ် ၃ ရက်မှာ စီဒီလုပ်ပြီး ကေအန်ယူထံ ခိုလှုံလာတယ်လို့ ဒေသ သတင်းရင်းမြစ်တွေက ပြောပါတယ်။

    စစ်သက် နှစ် ၃၀ ကျော်တဲ့ တပ်ကြပ်ကြီး တစ်ဦးနဲ့ စစ်သည် ၃ ယောက် စီဒီအမ်ဝင် ခိုလှုံလာတာဖြစ်ပါတယ်။ သူတို့ဟာ ရခိုင်ဘက်မှာ ရှေ့တန်းမှာ တာဝန်ကျပြီးနောက် အနားမရဘဲ ဘားအံဘက်ကို တာဝန်ကျပြီး အခုတိုက်ပွဲနေရာကို ရောက်လာတာ ဖြစ်တယ်လို့ ဆိုပါတယ်။

    KNLA ပူးပေါင်းတပ်တွေရဲ့ ဒရုန်းနဲ့ စနိုက်ပါတိုက်ခိုက်မှုတွေကို ခံရတဲ့အပြင် အထက်အရာရှိတွေရဲ့ ဖိနှိပ်အမိန့်ပေးမှုတွေကြောင့် စီဒီအမ်ပြုလုပ်ခဲ့ကြတာလို့ ဆိုပါတယ်။

    အဲဒီဝေါလေ တောင်ကြောက ၃ ထပ်ကွေ့ နေရာမှာ စစ်ကောင်စီ တပ်တွေနဲ့ KNLA ပူးပေါင်းတပ်တွေ တိုက်ပွဲပြင်းထန်နေပါတယ်။ စစ်ကောင်စီတပ်တွေ အကျအဆုံးရှိလို့ ညနေပိုင်းမှာ စစ်ကြောင်းပြန်ဆုတ်သွားတယ်လို့ KNLA ကော်ဘရာ စစ်ကြောင်းက ထုတ်ပြန်ထားပြီး စစ်ကောင်စီဘက်ကတော့ ဒီတိုက်ပွဲ သတင်းထုတ်ပြန်တာ မရှိပါဘူး။

    ၃ ထပ်ကွေ့ တစ်ဝိုက်က စစ်ကောင်စီ တပ်သားတွေ ပြီးခဲ့တဲ့ သီတင်းပတ်ထဲမှာလည်း စီဒီအမ် လုပ်ခဲ့တာတွေ ရှိပါသေးတယ်။

    ဒီဒေသတစ်ဝိုက်မှာ ပြီးခဲ့တဲ့နှစ်ကုန်ပိုင်းမှာ လေးကေ့ကော်ဒေသကို စစ်ကောင်စီတပ်တွေ ဝင်ရောက်ပြီး ရှာဖွေဖမ်းဆီးမှုတွေ လုပ်ပြီးနောက်ပိုင်းကတည်းက တိုက်ပွဲတွေ ဖြစ်နေခဲ့တာပါ။

12. ၅ သြဂုတ် ၂၀၂၂ပို့ကုန်ရငွေ ၆၅ ရာခိုင်နှုန်းသာ မြန်မာငွေနဲ့ လဲဖို့လို၊ ဒေါ်လာစျေး ၂၁၀၀ လို့ ပြင်ဆင်သတ်မှတ်

    ဒေါ်လာစျေးမြင့်တက်လာပြီး ပြည်တွင်း ဒေါ်လာ လိုအပ်ချက်များပြားလာချိန်မှာ ပို့ကုန်တင်ပို့သူတွေဟာ ပြည်ပပို့ကုန် ရငွေတွေကို ဗဟိုဘဏ်က သတ်မှတ်ထားတဲ့ နှုန်းထားနဲ့ မြန်မာငွေ လဲလှယ်ပေးနေရတာကို အခုအခါမှာ ပို့ကုန်ရငွေ ပမာဏရဲ့ ၆၅ ရာခိုင်နှုန်းကိုသာ လဲလှယ်ဖို့ လိုတော့တယ်လို့ ဗဟိုဘဏ်က ဒီကနေ့ ရက်စွဲနဲ့ ကြေညာခဲ့ပါတယ်။

    ဒီကြေညာချက်မတိုင်မီက ပို့ကုန်ရငွေအားလုံးကို မြန်မာငွေ လဲလှယ်ပေးနေရတာ ဖြစ်ပါတယ်။ ဒီအခြေအနေကြောင့် ပြည်ပ ပို့ကုန်၊ သွင်းကုန် လုပ်ကိုင်သူတွေဟာ ရငွေကို သတ်မှတ်ထားတဲ့ ၁၈၅၀ ကျပ်နှုန်း နဲ့ လဲလှယ်ပေးနေရပြီး သွင်းကုန်အတွက် လိုအပ်တဲ့ ဒေါ်လာငွေကို ပြင်ပပေါက်စျေးအမြင့်နဲ့ ပြန်ဝယ်ယူရတာကြောင့် လုပ်ငန်းလုပ်ကိုင်ရာမှာ အခက်အခဲများစွာ ဖြစ်ပေါ်နေပါတယ်။

    ဒါ့အပြင် ဒေါ်လာ ဗဟိုဘဏ်ရည်ညွှန်းဈေးနှုန်းကိုလည်း ၂၁၀၀ ကျပ် ကို ပြောင်းလဲ သတ်မှတ်လိုက်ပါတယ်။

    မြန်မာနိုင်ငံမှာ ဒေါ်လာစျေးမြင့်တက်လာပြီးနောက် ဗဟိုဘဏ်က ဧပြီလဆန်းကတည်းက ၁၈၅၀ ကျပ် သတ်မှတ်ထားတာကို အခုလို ပြင်ဆင်လိုက်တာ ဖြစ်ပြီး အခု ပြင်ဆင်လိုက်တဲ့ စျေးနှုန်းကလည်း ပြင်ပ စျေးနှုန်းထက် နည်းနေသေးပြီး တစ်ဒေါ်လာ ပြင်ပပေါက်စျေးက ၂၇၀၀ ကျပ် ရှိနေပါတယ်။

    အမေရိကန် ဗဟိုဘဏ်အတိုးနှုန်းမြှင့်တင်ပြီးနောက်ပိုင်း ကမ္ဘာ့နိုင်ငံတွေမှာ ဒေါ်လာ တန်ဖိုး မြင့်တက်၊ ဒေါ်လာပိုရှားပါးလာခဲ့သလို စစ်ကောင်စီကလည်း မြန်မာနိုင်ငံရဲ့ ကုန်သွယ်ရေးကို အိမ်နီးချင်းနိုင်ငံတွေရဲ့ ငွေကြေးတွေနဲ့ပါ ကုန်သွယ်ရေး အကောင်အထည်ဖော်ဖို့ ကြိုးစားနေခဲ့ပါတယ်။ ဒါပေမဲ့ ပြည်ပရင်းနှီးမြှုပ်နှံမှုတွေ လျော့ကျနေတဲ့ မြန်မာနိုင်ငံမှာ စျေးကွက်မှာ ဒေါ်လာ လိုအပ်ချက်က တောက်လျှောက် ကြီးမားနေပါတယ်။

13. ၅ သြဂုတ် ၂၀၂၂သင်ဇာဝင့်ကျော်နဲ့ နန်းမွေစံကို လိင်အသားပေးဓာတ်ပုံ၊ ဗီဒီယိုတွေ လူမှုကွန်ရက်မှာ အခကြေးငွေနဲ့ ဖြန့်ချိတယ်ဆိုပြီး အရေးယူ

    သရုပ်ဆောင် သင်ဇာ၀င့်ကျော်နဲ့ နန်းမွေစံတို့ကို လိင်အသားပေးဓာတ်ပုံ၊ ဗီဒီယိုတွေ လူမှုကွန်ရက်မှာ အခကြေးငွေနဲ့ ဖြန့်ချိတယ်လို့ စွပ်စွဲထားပြီး အမှုဖွင့် အရေးယူဖို့ ဆောင်ရွက်နေတယ်လို့ စစ်ကောင်စီ မီဒီယာတွေက ကြေညာခဲ့ပါတယ်။

    သူတို့နှစ်ဦးကို အဲဒီ စွပ်စွဲမှုနဲ့ပတ်သက်ပြီး အီလက်ထရောနစ် ဆက်သွယ်ဆောင်ရွက်ရေး ဥပဒေ ပုဒ်မ ၃၃(က) နဲ့ အရေးယူဖို့ ဆောင်ရွက်နေတယ်လို့ ဆိုပါတယ်။

    သင်ဇာဝင့်ကျော်ဟာ ဇူလိုင်လမှာ ရှမ်းပြည်တိုးတက်ရေးပါတီ/ရှမ်းပြည်တပ်မတော် SSPP/SSA နယ်မြေထဲမှာ ရိုက်ကူးရေးသွားရောက်ခဲ့မှုအတွက် စစ်ကောင်စီရဲ့ ခေါ်ယူစစ်ဆေးခြင်းကို ခံခဲ့ရပြီး SSPP ရဲ့ ညှိနှိုင်းပေးမှုနောက်မှာ ပြန်လွတ်မြောက်လာသူ ဖြစ်ပါတယ်။

    နန်းမွေစံဟာ ပြီးခဲ့တဲ့ လပိုင်းတွေအတွင်း ဖခင်ဖြစ်သူ ကျန်းမာရေးကြောင့် ထိုင်းနိုင်ငံကို ထွက်ခွာပြီး ဖခင်အတွက် ဆေးဝါးကုသဖို့ ကြိုးစားခဲ့ပေမဲ့ သူ့ရဲ့နိုင်ငံကူးလက်မှတ်ကို အာဏာပိုင်တွေက သိမ်းဆည်းခဲ့တာကြောင့် ပြည်ပကို ထွက်ခွာလို့ မရခဲ့ပါဘူး။ အဲဒီနောက်မကြာခင်မှာလည်း သူ့ရဲ့ဖခင် ကွယ်လွန်ခဲ့ပါတယ်။ ဒါ့အပြင် နန်းမွေစံဟာ ၂၀၁၉ ခုနှစ်တုန်းကလည်း ဆေးကုသခွင့်လက်မှတ် အသိမ်းခံထားရတဲ့ ဆရာဝန်တစ်ဦး ဖြစ်ပါတယ်။

    အီလက်ထရောနစ်ဆက်သွယ်ဆောင်ရွက်ရေးဥပဒေ ပုဒ်မ ၃၃ (က) ဟာ ပြစ်မှုထင်ရှားရင် အနည်းဆုံး ထောင် ငါးနှစ်ကနေ ၇ နှစ်ထိချမှတ်နိုင်တဲ့အပြင် ငွေဒဏ်လည်းချမှတ်နိုင်တယ်လို့ ဥပဒေဖော်ပြချက်မှာပါရှိပါတယ်။

14. ၅ သြဂုတ် ၂၀၂၂

15. ၅ သြဂုတ် ၂၀၂၂ထားဝယ်မှာ စစ်ကောင်စီကဖမ်းသွားတဲ့ အမျိုးသားတစ်ဦး အလောင်းကို နာရီပိုင်းအတွင်းလမ်းဘေးမှာပြန်တွေ့

    တနင်္သာရီတိုင်းဒေသကြီး၊ ထားဝယ်ခရိုင်ထဲကဘုမ္မော်ရပ်ကွက်ထဲမှာ မနေ့ သြဂုတ် ၄ ရက်ညပိုင်းက အသက် ၅၀ ဝန်းကျင် ဦးစိုးမြင့်ဆိုသူကို စစ်ကောင်စီတပ်ဖွဲ့ဝင်တွေက လာရောက်ဖမ်းဆီးသွားပြီးအဲဒီညမှာပဲ အလောင်းကိုပြန်တွေ့တယ်လို့ လောင်းလုံးမြို့နယ်လုံးဆိုင်ရာ အကသသပိတ်ကော်မတီကထုတ်ပြန်ထားပါတယ်။

    ည ပိုင်း ၁၀ နာရီလောက်မှာပဲ လာရောက်ဖမ်းဆီးသွားတာဖြစ်ပြီး ည၁၁နာရီလောက်မှာ ထားဝယ်မြို့အတွင်းက ဇဟာလမ်းမကြီးဘေးမှာ ထိုးကြိတ်ဒဏ်ရာ၊ သေနတ်ဒဏ်ရာတွေနဲ့အတူပြန်တွေ့ရတာဖြစ်ပြီး အလောင်းကိုတော့ ထားဝယ်ဆေးရုံကို ပို့ဆောင်ထားပြီလို့ ဖြစ်စဥ်ကိုသိရှိတဲ့ လောင်းလုံးသပိတ်ကော်မတီဝင်ကပြောပါတယ်။

    ‘’ ဦးစိုးမြင့်က သရက်ချောင်းမြို့နယ်ထဲက ကနက်သီရိရွာကပါ။ ဘုမ္မော်ရပ်ကွက်မှာလာရှောင်နေရင်းအဖမ်းခံရတာ၊ ဘာကြောင့်ဖမ်းတယ်ဆိုတာကိုမသိရသေးပါဘူး။ အလောင်းကိုတော့ ထားဝယ်ဆေးရုံကနေမိသားစုကပြန်ရပါတယ်’’ လို့ လောင်းလုံးမြို့နယ်လုံးဆိုင်ရာ အကသသပိတ်ကော်မတီကတာဝန်ရှိသူကပြောပါတယ်။

    ပြီးခဲ့တဲ့ ဇွန်လထဲမှာလည်း ထားဝယ်ခရိုင်၊ လောင်းလုံးမြို့နယ်ထဲက ကျေးရွာတွေထဲမှာဒေသခံတချို့ကို စစ်ကောင်စီနဲ့ ပျူစောထီးအဖွဲ့တွေက သွားရောက်ပစ်ဖမ်းဆီးခဲ့တာကြောင့်ဒေသခံပြည်သူ ၆ ဦးသေဆုံးပြီး ဒဏ်ရာရသူတွေလည်းရှိတဲ့အကြောင်း ဒေသခံတွေကပြောဆိုကြသလို ထားဝယ်သပိတ်ကော်မတီတွေကလည်းထုတ်ပြန်ထားပါတယ်။

    ထားဝယ်ခရိုင်နဲ့မြိတ်ခရိုင်တွေထဲမှာတော့ စစ်ကောင်စီဘက်က စစ်အာဏာသိမ်းတာကိုဆန့်ကျင်တဲ့ပြည်သူတွေကိုပစ်ခတ်ဖမ်းဆီးတာတွေ CDM ဝန်ထမ်းတွေကိုဖမ်းဆီးတာတွေဆက်တိုက်ဆိုသလိုရှိနေသလို စစ်အာဏာသိမ်းတာကိုဆန့်ကျင်တဲ့ သပိတ်စစ်ကြောင်းတွေလည်းနေ့စဉ်လိုလိုဆက်ရှိနေပါတယ်။

16. ၅ သြဂုတ် ၂၀၂၂မြိုင်မြို့နယ်ကျောက်ဆောက်ရွာမှာ ရွာသား ၂၇ ဦး ဖမ်းဆီးခံထားရ

    မကွေးတိုင်းဒေသကြီး၊ မြိုင်မြို့နယ် အရှေ့ပိုင်းမှာရှိတဲ့ ကျောက်ဆောက်ကျေးရွာထဲကို မနေ့သြဂုတ် ၄ ရက်နေ့ကနေစတင်ပြီး စစ်ကောင်စီတပ်ဖွဲ့တွေက ရွာသားတွေကို ဖမ်းဆီးပြီး တပ်စွဲထားတယ်လို့ ဒေသခံတွေကပြောပါတယ်။

    ဒီကနေ့ သြဂုတ် ၅ ရက်မနက်ပိုင်းအထိလည်း ရွာအတွင်းတပ်စွဲထားဆဲဖြစ်ပြီး ဒေသခံနေအိမ်တချို့ မီးရှို့ဖျက်ဆီးခံရသလို ဒေသခံရွာသား ၂၇ ယောက်ကိုလည်း ဖမ်းဆီးပြီး ဒေသကာကွယ်ရေးတပ်တွေအကြောင်းခြိမ်း‌‌ခြောက်စစ်ဆေးမေးမြန်းတာတွေလုပ်နေတယ်လို့လည်း ဒေသခံတွေကပြောပါတယ်။

    ကျောက်ဆောက်ရွာထဲကို စစ်ကောင်စီတပ်တွေဝင်လာချိန်မှာ သံဃာတော်အယောင်ဆောင်ပြီးဝင်ရောက်လာတာဖြစ်တယ်လို့ မြိုင်မြို့နယ်ပြည်သူ့ကာကွယ်ရေးအဖွဲ့ကလည်းထုတ်ပြန်ထားပါတယ်။

    "ဘုန်းကြီးနှစ်ပါးက ရှေ့ပြေးအနေနဲ့အရင်လာတယ်။ လမ်းကြောင်းရှင်းပြီဆို အနောက်ကနေကျန်တဲ့ စစ်ကောင်စီတပ်ဖွဲ့တွေလိုက်လာတယ်။ သူတို့က ကတ္တရာလမ်းပိုင်းကို အသုံးပြုနိုင်ဖို့ကြိုးစားနေတာ။ အခုလည်းပြေးချိန်မရတဲ့ ရွာသားတွေကပိတ်မိပြီးအဖမ်းခံထားရတယ်။ အခုနောက်ပိုင်းမှာ ရွာတွေကို စစ်ကြောင်းဝင်ပြီဆို လူသားဒိုင်းအဖြစ်ဖမ်းဆီးထားတာကြောင့် တိုက်ပွဲတွေဖြစ်ဖို့ ကိုသတိထားလုပ်ဆောင်နေရတယ်’’ လို့ မြိုင်မြို့နယ်ပြည်သူ့ကာကွယ်ရေးအဖွဲ့က တာဝန်ရှိသူက ဘီဘီစီကိုပြောပါတယ်။

    အခုလို သာသနာကိုအတုအယောင်ပြုလုပ်ပြီး ခုတုံးလုပ်ဆောင်နေတာတွေအတွက် ပြည်သူ့ကာကွယ်‌ရေးအဖွဲ့တွေအနေနဲ့ ပြန်လည်တိုက်ခိုက်လုပ်ဆောင်သွားမှာဖြစ်ပြီး ရဟန်းသံဃာတွေအနေနဲ့ မြိုင်-ပခုက္ကူလမ်းပိုင်းကိုဖြတ်သန်းသွားလာတာမလုပ်လို့ လျှောက်ထားကြောင်းကိုလည်း မြိုင်-ပကဖကထုတ်ပြန်ထားပါတယ်။

    မြိုင်မြို့နယ်အတွင်းက လမ်းပိုင်းတွေနဲ့ စစ်ဆေးရေးဂိတ်တွေမှာ ဒေသကာကွယ်ရေးတပ်တွေ အားကောင်းပြီး ထိန်းချုပ်နိုင်တာတွေရှိတာကြောင့် စစ်ကောင်စီအနေနဲ့ လမ်းပိုင်းတွေကို ပြန်လည်ချုပ်ကိုင်ဖို့ အင်အားသုံးကြိုးစားလာတာတွေရှိတယ်လို့လည်း မြိုင်ဒေသကာကွယ်ရေး တပ်တွေဘက်ကပြောပါတယ်။

    ဒီလို စစ်ကြောင်းထိုးရာမှာ ကျေးရွာအတွင်းက ပြည်သူတွေကို ဖမ်းဆီးပြီး လူသားဒိုင်းအဖြစ် သွားလာလှုပ်ရှားတာတွေ၊ ကျေးရွာအတွင်း ဓါးစာခံအဖြစ်ဖမ်းဆီးတာတွေကို ပုံစံပြောင်းလုပ်ဆောင်နေတယ်လို့လည်း မြိုင်ဒေသကာကွယ်ရေးတပ်တွေရဲ့ပြောပြချက်အရသိရပါတယ်။

    လက်ရှိမှာတော့ မြိုင်မြို့နယ်အတွင်းမှာ စစ်ကောင်စီတပ်ဖွဲ့တွေကို ပြောက်ကျားတိုက်ခိုက်မှုတွေနဲ့စစ်ကောင်စီတပ်သားသေဆုံးမှုတွေရှိနေသလို စစ်ကောင်စီတပ်ဖွဲ့ဝင်တွေရဲ့ ပစ်ခတ်မှုကြောင့် ဒေသကာကွယ်ရေးတပ်ဖွဲ့ဝင်တွေ သေဆုံးမှုတွေရှိနေတဲ့အကြောင်းကိုလည်းမြိုင်မြို့နယ်ပြည်သူ့အုပ်ချုပ်ရေးအဖွဲ့ကသတင်းထုတ်ပြန်ထားပါတယ်။

17. ၅ သြဂုတ် ၂၀၂၂တက္ကသိုလ်ကျောင်းသား ၄ ဦးကို စစ်ကောင်စီ ထောင် ၃ နှစ်စီချ

    ပြီးခဲ့တဲ့ မတ်လမှာ စစ်ကောင်စီက ဖမ်းဆီးထားတဲ့ တက္ကသိုလ်‌ကျောင်းသား ၄ ဦးကို ပုဒ်မ ၅၀၅-ကနဲ့ တရားစွဲဆိုပြီး ဒီကနေ့ သြဂုတ်လ ၅ ရက်နေ့မှာ အင်းစိန်အကျဉ်းထောင်တွင်းတရားရုံးမှာ ထောင်ဒဏ် ၃ နှစ်စီချမှတ်လိုက်တယ်လို့ ရန်ကုန်စီးပွားရေးတက္ကသိုလ်ကျောင်းသားများသမဂ္ဂက ဒီကနေ့ မှာပဲထုတ်ပြန်လာပါတယ်။

    စီးပွားရေးတက္ကသိုလ်ကျောင်းသား ကိုကျော်ထက်အောင်၊ ကိုသက်အောင်မိုး၊ မုံရွာစီးပွားရေးတက္ကသိုလ်ကျောင်းသူဟောင်း မမိုးမဥ္ဇူ(ခ)ရှလောင်ဝ်နဲ့ ရန်ကုန်အနောက်ပိုင်းတက္ကသိုလ်က ကိုစိုင်းမင်းခန့်ကျော်တို့ကို ပြီးခဲ့တဲ့ မတ်လအတွင်းက ဗိုလ်တစ်ထောင်မြို့နယ်မှာ ဖမ်းဆီးသွားတာဖြစ်ပြီး ဖမ်းဆီးပြီး ၅ လနီးပါးအကြာမှာ အခုလို ထောင်ဒဏ် ၃ နှစ်စီချမှတ်လိုက်တာဖြစ်ပါတယ်။

    ဒီတက္ကသိုလ်‌ကျောင်းသား ၄ဦးဟာ အခုချမှတ်လိုက်တဲ့ ပုဒ်မ ၅၀၅-က အပြင် ရန်ကုန်အရှေ့ပိုင်းခရိုင်တရားရုံးမှာလည်း နောက်ထပ်အမှုတွေထပ်ပြီးရင်ဆိုင်ရဖို့ရှိနေတယ်လို့ လည်းရန်ကုန်စီးပွားရေးတက္ကသိုလ်ကျောင်းသားများသမဂ္ဂရဲ့ ထုတ်ပြန်ချက်အရသိရပါတယ်။

    ပြည်တွင်းမှာ စစ်အာဏာသိမ်းပြီးတဲ့နောက်ပိုင်း စစ်အာဏာသိမ်းတာကိုဆန့်ကျင်တဲ့ကျောင်းသားလူငယ်တွေနဲ့ ကျောင်းသား သမဂ္ဂအဖွဲ့ဝင်လူငယ်တွေကိုစစ်ကောင်စီက ဆက်တိုက်ဖမ်းဆီးပြီး နှစ်ရှည်ထောင်ဒဏ်ချမှတ်ခံထားရသူတွေအပြင် သေဒဏ်ချမှတ်ခံထားရသူတွေလည်းရှိနေပါတယ်။

18. ၅ သြဂုတ် ၂၀၂၂အိုးဘို‌ထောင်မှာ နိုင်ငံရေးအကျဉ်းသားတွေအစာငတ်ခံဆန္ဒပြနေကြပြီး တိုက်ပိတ်ခံရသူတွေလည်းရှိ, ထောင်တွင်းတရားရုံးထုတ်တွေမထွက်ဘဲ ဆန္ဒထုတ်ဖော်နေကြ

    မန္တလေး၊ အိုးဘိုအကျဉ်းထောင်မှာ ရှိတဲ့ နိုင်ငံရေးအကျဉ်းသားတချို့ အခုရက်ပိုင်းမှာပဲ အစာငတ်ခံ ဆန္ဒထုတ်ဖော်တာတွေလုပ်နေပြီးအကျဉ်းသားတချို့ထောင်ဆေးရုံမှာ တိုက်ပိတ်ခံထားရတယ်လို့အကျဥ်းထောင်နဲ့ နီးစပ်သူတွေက ဘီဘီစီကိုအတည်ပြုပြောပါတယ်။

    ပြီးခဲ့တဲ့ ဇူလိုင်လအတွင်းက အထင်ကရ နိုင်ငံရေးတက်ကြွလှုပ်ရှားသူ ၂ ဦးအပါအဝင်အရပ်သား နှစ်ဦးကိုသေဒဏ်စီရင်လိုက်တာကို ကန့်ကွက်တာ၊ သေဒဏ် စီရင်ပြီးသူတွေကို နိုင်ငံရဲ့ သူရဲကောင်းအဖြစ်မှတ်တမ်းတင်တယ်ဆိုတဲ့ အချက်တွေပါတဲ့ နိုင်ငံရေးအကျဥ်းသားတွေရဲ့လက်ရေးမူတွေလည်း အိုးဘိုထောင်အတွင်းကနေ အခုရက်ပိုင်းမှာပဲ ကျယ်ကျယ်ပြန့်ပြန့်ထွက်ပေါ်လာပါတယ်။

    ဒီအခြေအနေတွေကြောင့် အခုသြဂုတ်လ အစောပိုင်းကစလို့ ထောင်တွင်းကနေ ခရိုင်တရားရုံးထုတ်တာတွေကို မထွက်ဘဲ ဆန္ဒထုတ်ဖော်တာတွေ၊ အစာငတ်ခံ ဆန္ဒပြတာတွေကို တချို့အကျဥ်းဆောင်တွေမှာ တစ်ဆောင်လုံးနီးပါးလုပ်တာတွေလည်းရှိနေတယ်လို့ထောင်နဲ့နီးစပ်သူတွေကပြောပါတယ်။

    ‘’ဆေးရုံရောက်တာ နှစ်ယောက်ရှိတယ်၊ ကုပေးမယ်လည်းမထင်ပါဘူး။ ရှေ့နေဦးတင်ဝင်းအောင်ကိုလည်း ခြေထောက်တွေ ဓါးနဲ့မွှန်းထားတယ်။ ခြေထောက်တွေလည်းကျိုးတယ်၊ လက်လည်းကျိုးတယ်။ အခုထိလည်းမသက်သာသေးဘူး။ ပြည်ကြီးတံခွန်က ကလေးတွေဆိုလည်း ရေတောင်မသောက်ကြဘူးပြောတယ်။ ကြိုးမိန့်တွေကိုတိုက်ပိတ်ထားတာရှိသလို ကြိုးမိန့်မဟုတ်ဘဲတိုက်ပိတ်ထားတာတွေလည်း ရှိတယ်’’ လို့ အိုးဘိုထောင်တွင်းနီးစပ်သူတစ်ဦးက ဘီဘီစီကိုပြောပါတယ်။

    အိုးဘိုအကျဥ်းထောင်တွင်းမှာတော့ ကြိုးမိန့်ပေးခံထားရသူ အယောက် ၂၀ ကျော်ရှိနေပြီး လက်ရှိမှာသေဒဏ်ချမှတ်ခံထားရသူတွေကို အရပ်အမောင်း၊ လည်ပင်းဆိုဒ်နဲ့ ကိုယ်အလေးချိန် တိုင်းတာတွေ၊ ဆီးချိုသွေးချိုတိုင်းတာတွေ အခုရက်ပိုင်းအတွင်းမှာ လုပ်နေတယ်လို့ ထောင်ဝန်ထမ်းကဆင့် သိရတဲ့အချက်တွေကို နီးစပ်သူတွေကပြန်ပြောခဲ့တာပါ။

    အိုးဘိုထောင်တွင်း လက်ရှိဖြစ်နေတဲ့ တိုက်ပိတ်ခံရတာတွေ၊ သေဒဏ်စီရင်ချမှတ်မှုတွေနဲ့ပတ်သက်ပြီး အကျဥ်းဦးစီးဌာနဘက်ကို ဘီဘီစီကဆက်သွယ်မေးမြန်းနေပေမယ့်ဆက်သွယ်လို့မရသေးပါဘူး။အိုးဘိုထောင်အတွင်းမှာ မနေ့သြဂုတ် ၄ ရက် ညပိုင်းက သေနတ်ပစ်ခတ်သံတွေကြားနေရတယ်လို့ နီးစပ်သူတွေကပြောဆိုကြပေမယ့် အကြောင်းအရင်းအတိအကျကိုတော့ မသိရသေးဘူးလို့ထောင်တွင်းနီးစပ်သူကပြောပါတယ်။

19. ၅ သြဂုတ် ၂၀၂၂ပြင်ဦးလွင်နဲ့နောင်ချိုကြားမှာ စစ်ကောင်စီနဲ့ မန္တလေး PDF တိုက်ပွဲဖြစ်

    မန္တလေးတိုင်းဒေသကြီး၊ ပြင်ဦးလွင်မြို့နဲ့ နောင်ချိုမြို့နယ်ကြားမှာ ပြီးခဲ့တဲ့ သြဂုတ်လ ၃ ရက်နေ့ကနေစပြီး ဒီကနေ့ သြဂုတ် ၅ ရက်နေ့လယ်ပိုင်းအထိ စစ်ကောင်စီနဲ့ ဒေသကာကွယ်ရေးတပ်တွေကြား ထိတွေ့တိုက်ပွဲဖြစ်ခဲ့တယ်လို့မန္တလေး PDF က ပြောပါတယ်။

    ပြင်ဦးလွင်နဲ့ နောင်ချို့မြို့ကြားမှာရှိတဲ့ မန္တလေး ပြည်သူ့ကာကွယ်ရေးတပ်ဖွဲ့တွေလုံခြုံရေးယူထားတဲ့ နယ်မြေကို စစ်ကောင်စီဘက်က ပြီးခဲ့တဲ့ရက်ပိုင်းကစလို့ အင်အားအလုံးအရင်းနဲ့ ဝင်ရောက်စီးနင်းတိုက်ခိုက်ခဲ့တာကြောင့်နှစ်ဖက်ထိတွေ့တိုက်ပွဲတွေဖြစ်ခဲ့တယ်လို့ ဆိုပါတယ်။

    ပြီးခဲ့တဲ့ ရက်ပိုင်းက တိုက်ပွဲတွေမှာလည်း စစ်ကောင်စီက လက်နက်ကြီးတွေအသုံးပြုပစ်ခတ်ခဲ့တာတွေရှိပြီး ဒီကနေ့ သြဂုတ် ၅ ရက်နေ့ တိုက်ပွဲဖြစ်တဲ့နေရာဟာ လူနေကျေးရွာရပ်ကွက်တွေနဲ့ နီးစပ်တာကြောင့် ဒေသခံပြည်သူတွေအတွက်လည်း အန္တရာယ်ရှိတယ်လို့ မန္တလေး PDF ပြောရေးဆိုခွင့်ရှိသူ ရဲဘော်မိုးကြိုးက ဘီဘီစီကိုပြောပါတယ်။

    မန္တလေးပြည်သူ့ကာကွယ်ရေးတပ်ဖွဲ့တွေဟာ အရင်က မန္တလေးမြို့အထွက် စစ်ကောင်စီ စစ်ဆေးရေးဂိတ်တချို့ကိုလည်း ဖောက်ခွဲတာတွေ ရှိခဲ့ပြီး MDY PDF တွေ အထိခိုက်မရှိဘဲ ဆောင်ရွက်နိုင်ခဲ့တယ်လို့ ဆိုပါတယ်။

    ပြီးခဲ့တဲ့ ဇူလိုင်လထဲမှာလည်း နောင်ချိုနဲ့ပြင်ဦးလွင်မြို့နယ်အတွင်းမှာ စစ်ကောင်စီနဲ့ မန္တလေး PDF ကြားထိတွေ့တိုက်ပွဲတွေရှိခဲ့တဲ့အကြောင်း မန္တလေး PDF ကထုတ်ပြန်ထားပါတယ်။

    လက်ရှိမှာလည်း ပြည်သူလူထုရဲ့ထောက်ပံ့ကူညီမှုတွေနဲ့ မန္တလေး PDF အဖွဲ့ဝင်တွေဟာ လစဉ် ထောက်ပံ့ကြေး တစ်ဦးကို တစ်သောင်းကျပ် ရနေပြီဖြစ်တယ်လို့ ပြည်သူ့ကာကွယ်ရေးတပ်မတော်- မန္တလေးက ဒီကနေ့ သြဂုတ် ၅ ရက်နေ့မှာ သတင်းထုတ်ပြန်ထားပါတယ်။

20. ၅ သြဂုတ် ၂၀၂၂မြင်းမူ၊ လက်ပံကျင်းကျေးရွာမှာ ဒေသခံ အလောင်း ၃ လောင်းထပ်တွေ့, သေဆုံးသူ ၁၃ ယောက်အထိရှိလာ

    စစ်ကိုင်းတိုင်းဒေသကြီး၊ မြင်းမူမြို့နယ်ထဲက ကျေးရွာတွေကို ပြီးခဲ့တဲ့ ဇူလိုင်လကတည်းကစပြီးအခုသြဂုတ်လ ပထမပတ်အထိ စစ်ကောင်စီက စစ်ကြောင်းထိုးဝင်ရောက်တာတွေရှိနေပြီး နေအိမ်မီးရှို့ခံရတာတွေနဲ့ တိုက်ပွဲတွေနဲ့ ဆက်ရှိနေတယ်လို့ ဒေသခံတွေကပြောပါတယ်။

    မနေ့ သြဂုတ် ၄ ရက်နေ့ ညနေပိုင်းမှာလည်း မြင်းမူမြို့နယ်ထဲက မင်းရွာအနီးမှာ ဒေသကာကွယ်ရေးတပ်တွေနဲ့ ထိတွေ့တိုက်ပွဲဖြစ်အပြီး မင်းရွာပတ်လည်နဲ့ ဂွေးပင်တောရွာ တောင်ဘက်မှာ စစ်ကောင်စီက လေကြောင်းတိုက်ခိုက်မှုတွေလုပ်ခဲ့တယ်လို့ ဒေသခံတွေကပြောပါတယ်။

    "စစ်ကြောင်းက မြင်းမူတစ်မြို့တည်းကို ၃ ခုလောက်ထိုးနေတော့ အကုန်ပြေးရတာ။ ဒေသကာကွယ်‌ရေးတပ်တွေဘက်က မိုင်းဆွဲတိုက်ခိုက်မှုတွေလုပ်ပြီး သူတို့ဘက်ကအထိအခိုက်အကျအဆုံးများပြီဆို လေကြောင်းပစ်ကူသုံးပြီဆိုတော့ ရွာမကပ်ရဲကြတော့ဘူး" လို့ ဒေသခံတစ်ဦးက ဘီဘီစီကိုပြောပါတယ်။

    ပြီးခဲ့တဲ့ သြဂုတ်လ ၁ ရက်နေ့ကလည်း မြင်းမူမြို့နယ်၊ လက်ပံကျင်းကျေးရွာကို စစ်ကောင်စီက လေကြောင်းပစ်ခတ်မှုလုပ်ပြီး ကလေးငယ်တွေအပါအဝင် ဒေသခံ ၁၆၀ ကျော်လောက်ကို ဓါးစာခံအဖြစ်ဖမ်းဆီးထားခဲ့ပြီးနောက်ပိုင်း စစ်တပ်ပြန်ထွက်ခွာချိန်မှာ ဒေသခံအလောင်း ၁၀ လောင်းတွေ့ရတဲ့ အကြောင်းကိုလည်း ဒေသခံတွေက ဓါတ်ပုံမှတ်တမ်းတွေနဲ့ တကွ ဘီဘီစီကိုဆက်သွယ်ပြောပြထားခဲ့ပါတယ်။

    စစ်ကောင်စီတပ်တွေထွက်ခွာပြီးနောက်ပိုင်း ဒေသကာကွယ်ရေးတပ်တွေက လက်ပံကျင်းကျေးရွာအတွင်း နယ်မြေရှင်းလင်းရေးတွေလုပ်ဆောင်ရာမှာ ဒီကနေ့ သြဂုတ်လ ၅ ရက်နေ့မှာလည်း ဒေသခံအလောင်း ၃ လောင်းထပ်ပြီးတွေ့တာကြောင့် လက်ပံကျင်းကျေးရွာအတွင်းသေဆုံးသူ ၁၃ ဦးအထိရှိလာနေပြီလို့ ဒေသကာကွယ်ရေး တပ်တွေရဲ့ပြောပြချက်အရသိရပါတယ်။

    ဒါ့အပြင် ကျေးရွာအတွင်းက ၇ တန်းကျောင်းသူတစ်ဦးအပါအဝင် အမျိုးသမီးတစ်ဦးပျောက်ဆုံးနေတာကြောင့် ရှာဖွေမှုတွေဆက်လုပ်နေတယ်လို့ နယ်မြေရှင်းလင်းရေးသွားရောက်နေတဲ့ ဒေသကာကွယ်ရေးတပ်ဖွဲ့တွေကပြောပါတယ်။

    လက်ရှိမှာဆိုရင်လည်း မြင်းမူမြို့နယ်အတွင်းက ကျေးရွာတွေမှာတော့ စစ်ကောင်စီရဲ့ ရွာစလှည့်စစ်ကြောင်းထိုးမှုတွေကြောင့် ဒေသခံကျေးရွာတွေဟာ မြင်းမူမြို့ပေါ် ကို ထွက်ပြေးတိမ်းရှောင်နေကြရတယ်လို့ စစ်ရှောင်နေရတဲ့ ဒေသခံတွေကပြောပါတယ်။