တနင်္သာရီတိုင်း ဒေသကြီးအတွင်းက ထားဝယ်နဲ့ မြိတ်ခရိုင်တွေထဲက ကျေးရွာတွေအနီးမှာ စစ်ကောင်စီနဲ့ဒေသကာကွယ်ရေးတပ်တွေကြား တိုက်ပွဲတွေပြင်းထန်နေပြီးစစ်ရေးဆက်လက်ပြင်းထန်နိုင်တဲ့အခြေအနေဖြစ်နေတယ်လို့ဒေသကာကွယ်ရေးတပ်တွေဘက်ကပြောပါတယ်။
မနေ့ဇူလိုင် ၁၄ ရက်မနက်ပိုင်းမှာလည်း ပုလောမြို့နယ်ထဲက ပဝကုန်းကျေးရွာမှာ နှစ်ဖက်တိုက်ပွဲတွေပြင်းထန်ခဲ့ပြီး နှစ်ဖက်သေဆုံးမှုတွေလည်းရှိခဲ့ပါတယ်။ပုလောနယ်ထဲက ပဝကုန်းကျေးရွာထဲမှာတပ်စွဲထားတဲ့ စစ်ကောင်စီတပ်စခန်းကို ပုလောဒေသကာကွယ်ရေးတပ်ဘက် ဝင်ရောက်တိုက်ခိုက်ခဲ့တာဖြစ်ပြီး ဒါဟာ နန်းထိုက်အောင်စစ်ဆင်ရေးဖြစ်တယ်လို့ ပုလောဒေသကာကွယ်ရေးတပ်ဘက်ထုတ်ပြန်ပါတယ်။
‘’ မနေ့ကတိုက်ပွဲကတော့ စစ်ကောင်စီတပ်တွေတပ်စွဲထားတဲ့ တပ်စခန်းကို ဒေသကာကွယ်ရေးတပ်တွေဘက်က ဝင်တိုက်တာပါ။ ဒေသကာကွယ်ရေးတပ်တွေဘက်ကကျဆုံးတာတွေရှိသလို ကျွန်တော်တို့ရဲ့ ဗီဒီယိုမှတ်တမ်းတွေအရ စစ်ကောင်စီတပ်သား၁၀ ယောက်လောက် ထိခိုက်ဒဏ်ရာရသေဆုံးတာတွေရှိတယ်။ တနင်္သာရီတိုင်းတစ်တိုင်းလုံးမှာ စစ်ပူနေတယ်၊ တချို့နေရာတွေမှာ စစ်ကောင်စီကစစ်ကြောင်းထိုးနေတာရှိသလို ထားဝယ်လမ်းမှာဆို စစ်ကောင်စီကသူတို့နိုင်သလောက်ခြေကုပ်ပြန်ယူနေတယ်။ တစ်တိုင်းလုံးမှာနန်းထိုက်အောင်စစ်ဆင်ရေးတွေထပ်ရှိလာနိုင်သလို မြို့သိမ်း၊ရွာသိမ်းတိုက်ပွဲတွေလည်း ထပ်ဖြစ်လာနိုင်ပါတယ်’’ လို့ တနင်္သာရီတိုင်း ဒေသကြီး စစ်ဒေသကွပ်ကဲရေးအဖွဲ့ ပြောရေးဆိုခွင့်ရှိသူက ဘီဘီစီကိုပြောပါတယ်။
ဒါ့အပြင် မနေ့ဇူလိုင် ၁၄ ရက်နေ့မနက်ပိုင်းက မြိတ်မြို့ကနေထားဝယ်မြို့ဘက်ကိုမောင်းနှင်လာတဲ့ ရွှေဝယ်မင်းခရီးသည်တင်မှန်လုံယာဥ်ဟာ တိုက်ပွဲဖြစ်ခဲ့တဲ့ ပဝကုန်းကျေးရွာအနီးမှာ ရပ်နားချိန် မိုင်းစထိမှန်ပြီး ခရီးသည် ၄ ဦးဒဏ်ရာရခဲ့တယ်လို့လည်းဒေသတွင်းသတင်းတွေမှာဖော်ပြထားပါတယ်။မြိတ်-ထားဝယ်ကားလမ်းပေါ်မှာတော့ စစ်ကောင်စီနဲ့ဒေသကာကွယ်ရေးတပ်ဖွဲ့တွေ ထိတွေ့တိုက်ပွဲတွေမကြာခဏရှိတဲ့အကြောင်းဒေသတွင်းသတင်းတွေမှာဖော်ပြကြသလိုဒေသကာကွယ်ရေးတပ်တွေဘက်ကလည်း ထုတ်ပြန်ထားပါတယ်။
တခါ မနေ့ ဇူလိုင် ၁၄ ရက်မှာပဲ တိုက်ပွဲတွေအပြင် တနင်္သာရီတိုင်း ရေဖြူမြို့ရှေ့ဖက်ကမ်း၊ နဝဒေးလမ်းမှာရှိတဲ့ စစ်ဘက်လုံခြုံရေးတပ်ဖွဲ့ (စရဖ)ရုံးကို ပြည်သူ့ကာကွယ်ရေးပူးပေါင်းတပ်ဖွဲ့တွေက ဖောက်ခွဲတိုက်ခိုက်ခဲ့ပြီး ဒါဟာလည်း နန်းထိုက်အောင်စစ်ဆင်ရေးတစ်ခုဖြစ်တယ်လို့ ဒေသကာကွယ်ရေးတပ်တွေကထုတ်ပြန်ပါတယ်။ဒီဖောက်ခွဲမှုကြောင့် စရဖအဆောက်အဦတစ်ခုလုံးပြိုကျပျက်စီးသွားသလို ရေဖြူအနောက်ဖက်ကမ်းကစစ်ကူလာတဲ့ စစ်ကောင်စီတပ်ကားတွေကို ထပ်မံမိုင်းဆွဲတိုက်ခိုက်ခဲ့တာကြောင့် စစ်ကောင်စီတပ်သား ၅ ဦးထက်မနည်းသေဆုံးပြီး ဒဏ်ရာရသူတွေလည်းရှိတယ်လို့ တနင်္သာရီတိုင်းစစ်ဒေသကွပ်ကဲရေးအဖွဲ့က ဒီကနေ့ ဇူလိုင်၁၅ မှာ ထုတ်ပြန်လာပါတယ်။
တိုက်ပွဲတွေဆက်ဖြစ်နေသလို စစ်ကောင်စီဘက်က အင်အားတိုးတာတွေကြောင့် ပုလောနယ်ထဲက ဒေသခံတချို့ဟာလည်း ဘေးလွတ်ရာကိုတိမ်းရှောင်ရတာတွေရှိနေတယ်လို့ စစ်ရှောင်အရေးကူညီနေသူတွေကပြောပါတယ်။
စစ်ရှောင်တွေဟာ ရာသီဥတုဘေးဒဏ်ကြားမှာ ကျန်းမာရေးအရစိတ်ပူရတာတွေရှိသလို စစ်ကောင်စီရဲ့ ပိတ်ဆို့မှုတွေကြောင့် စားနပ်ရိက္ခာအခက်အခဲတွေလည်း ရင်ဆိုင်နေတယ်လို့သိရပါတယ်။
“ နောက်ဆုံးအနေအထားအရ ပုလောဘက်မှာ ဘယ်လောက်ဖြစ်နေလဲဆိုရင် စစ်ကောင်စီဘက်က လမ်းပန်းဆက်သွယ်ရေးတွေပိတ်ဆို့ထားတာကြောင့် စစ်ရှောင်တွေက အရင်ကဆို အပြင်ကဆန်ဝယ်ယူတာ အလှူရှင်နဲ့ ချိတ်ဆက်တာ လုပ်ပြီး ရိက္ခာသိုလှောင်ပြီး စားကြတယ်။အခုဆိုရင် ရိက္ခာပြတ်တောက်တာတွေကြောင့် အနီးက စပါးတွေကို ဝယ်ပြီး ကြိတ်စားရတဲ့အခြေအနေဖြစ်နေတယ်။ ဒါက ရေရှည်အတွက်လည်း မကောင်းတဲ့အခြေအနေဖြစ်ပါတယ်။ကျန်းမာရေးအတွက်ကျတော့ တချို့နေရာ စစ်ရှောင်စခန်းရှိတဲ့နေရာတွေမှာ ကြိုတင်ပြင်ဆင်ထားတာရှိပေမယ့် တချို့နေရာတွေမှာ စစ်ရှောင်စခန်းမရှိပဲခေတ္တရှောင်နေရတာတွေရှိတော့ ကျန်းမာရေးအတွက်ကြိုတင်ပြင်ဆင်ထားတာတွေလည်းမရှိဘူး။အချိန်ကြာလာတာနဲ့ အမျှခက်ခဲနိုင်ပါတယ်လို့ ‘’ စစ်ရှောင်တွေကို အကူအညီပေးနေတဲ့ ဒေါနတနင်္သာရီ စစ်ရှောင်ကူညီရေးအဖွဲ့က တာဝန်ရှိသူက ပြောပါတယ်။
လက်ရှိမှာတော့ တနင်္သာရီတိုင်း၊ ထားဝယ်ခရိုင်နဲ့ မြိတ်ခရိုင်ထဲက စစ်ရှောင်တွေဟာ စစ်ရှောင်စခန်းရယ်လို့သတ်မှတ်နေထိုင်နေသူတွေရှိသလို တိုက်ပွဲဖြစ်ရင် ဘေးလွတ်ရာ ပြေးရပြီး တိုက်ပွဲသံတွေငြိမ်သွားရင် နေရပ်ပြန်နေထိုင်ရတဲ့အခြေအနေတွေလည်းရှိနေတယ်လို့ သိရပါတယ်။