ဥကရိထ စခန်းသိမ်းတိုက်ပွဲ - စစ်ကောင်စီတပ်က အင်အားသုံးလာနေတယ်လို့ဆို
ကရင်ပြည်နယ်၊ မြဝတီမြို့တောင်ဘက် ဝေါလေ ဒေသက စစ်ကောင်စီတပ်ရဲ့ ဥကရိထ စခန်းကို သိမ်းဖို့ ကြိုးစားနေတဲ့ KNLA/KNDO ပူးပေါင်း စစ်ကြောင်းနဲ့ စစ်ကောင်စီတပ်တို့ ဒီနေ့ ဇွန်လ ၂၉ ရက်အထိ တိုက်ပွဲ ဆက်ဖြစ်နေတုန်းလို့ မြေပြင်အခြေအနေသိရှိသူတွေက ဘီဘီစီကို ပြောပါတယ်။
အဲဒီစစ်စခန်းကို KNLA/KNDO ပူးပေါင်း စစ်ကြောင်းက သိမ်းဖို့ ကြိုးစားနေတာ ပြီးခဲ့တဲ့ ဇွန်လ ၂၆ ရက်ကတည်းက ဖြစ်တာကြောင့် ဒီနေ့ပါ အပါအဝင်ဆိုရင် တိုက်ပွဲဖြစ်တာ ၄ ရက်ထဲ ဝင်လာပြီဖြစ်ပါတယ်။
တစ်ချိန်တည်းမှာပဲ စစ်ကောင်စီတပ်ဟာ ဝေါလေဗျူဟာကုန်းဘက်ကို အင်အားနဲ့ လက်နက်ခဲယမ်းတွေ ပို့ထားတယ်ဆိုပြီး မြေပြင်အခြေအနေ သိရှိသူတွေက ပြောပါတယ်။
စစ်စခန်းနေရာအချို့ကို သိမ်းပိုက်ထားနိုင်ပြီဖြစ်ပေမဲ့ ဝေါလေ ဗျူဟာစစ်ကောင်စီစခန်းက လက်နက်ကြီး ပစ်ခတ်မှုတွေ၊ တိုက်လေယာဉ်နဲ့ဗုံးကြဲတိုက်ခိုက်မှုတွေနဲ့အတူ နယ်မြေ ရှင်းလင်းရေး တိုက်ပွဲ ဆက်ဖြစ်နေတယ်လို့လည်း သိရပါတယ်။
‘’မနေ့က ညနေပိုင်းမှာ သူတို့ လက်နက်ကြီး ကတုတ်ကို ဖြိုတိုက်နိုင်ပြီးတော့ စခန်းထဲ ၀င်နိုင် နေပါပြီ။ ဒါပေမဲ့ စစ်ကောင်စီက ဝေါလေ ဗျူဟာကုန်းဘက်ကို လက်နက်ကြီးတွေ၊ ခဲယမ်းတွေ မနေ့ညနေက ရဟတ်ယာဉ်နဲ့ လာချပေးထားတော့ အဲဒီကနေ တစ်ညလုံး နက်နက်ကြီးတဲ့ တောက်လျှောက်ပစ်နေတယ်။ လေယာဉ်ကလည်း ၂စီး တောက်လျှောက်လာပြန်ပစ်နေတာ ၁၀ ကြိမ်ထက်မနည်းဘူး။ ကင်ထောက်တစ်စင်းကလည်း ဝဲပျံနေတယ်။ မြေပြင် စစ်စခန်းထဲက စစ်ကောင်စီရဲ့ စစ်ကတုတ်တွေထဲမှာ ပိတ်မိပြီး ခံပစ်နေတဲ့စစ်သားတွေရှိနေသေးတာကို ဒီမနက်ပိုင်းမှာ ဆက်ရှင်းနေတုန်းပါပဲ။ တချို့ ဘန်ကာ တွေ ကိုတော့ ကရင်အဖွဲ့ တွေ မီးရှို့ ဖျက်နေပြီ’’လို့ KNLA/KNDO ပူးပေါင်းစစ်ကြောင်းနဲ့နီးစပ်တဲ့ စစ်ရေး သတင်းအရင်းအမြစ်ကပြောပါတယ်။
အဲဒီစခန်းသိမ်းပွဲအနေနဲ့ ကရင်အမျိုးသားအစည်းအရုံး -ကေအန်ယူတပ်မဟာ ၆ နယ်မြေ လက်အောက်ခံ KNLA /KNDO ပူးပေါင်းအဖွဲ့တွေနဲ့ စစ်ကောင်စီတပ်တို့ တိုက်ပွဲ ဖြစ်ပွားနေတာဖြစ်ပါတယ်။
အဲဒီ တိုက်ပွဲ အတွင်း စစ်ကောင်စီဘက်ကျ အကျအဆုံးများသလို KNLA/KNDO ပူးပေါင်းအဖွဲ့ တွေဘက်က ၈ ဦး ကျဆုံးပြီး ၂၅ ဦး ခန့် လက်နက်ကြီးအစမှန်တဲ့ဒဏ်ရာတွေ ရထားတဲ့အတွက် ဆေးကုသမှု့ ခံယူ နေကြရတယ်လို့ သိရပါတယ်။