စစ်ကောင်စီတပ်လေကြောင်းတိုက်ခိုက်မှုမှာ တပ်ဖွဲ့ဝင် ၆ ဦးကျဆုံးတယ်လို့ အေအေပြော

တိုက်ရိုက် ထုတ်လွှင့်ချက်

1. ၂ ဇူလိုင် ၂၀၂၂အာဆီယံအထူးသံတမန် နဲ့နိုင်ငံရေးပါတီ ၇ ခုတွေ့, အခြေခံဥပဒေအသစ်ပြန်ဆွဲဖို့ ဆွေးနွေးမှုတွေရှိ

   မြန်မာနိုင်ငံဆိုင်ရာ အာဆီယံအထူးသံတမန် နဲ့ ကြံ့ခိုင်ရေးပါတီ အပါအဝင် နိုင်ငံရေးပါတီ ၇ ခု ဒီကနေ့ ဇူလိုင် ၂ ရက်မနက်က ရန်ကုန်မြို့ Lotte ဟိုတယ်မှာ နှစ်နာရီကြာတွေ့ခဲ့ကြပါတယ်။

   ကြံ့ခိုင်ရေးပါတီ၊ ပအိုဝ်းအမျိုးသားအဖွဲ့ချုပ်၊ ဇိုမီးဒီမိုကရေစီအဖွဲ့ချုပ်၊ မွန်ညီညွတ်ရေးပါတီ၊ တအာင်း(ပလောင်) အမျိုးသားပါတီ၊ ရခိုင့်ဦးဆောင်ပါတီနဲ့ ရခိုင်အမျိုးသားပါတီတို့ တက်ရောက်ခဲ့ကြပါတယ်။

   အာဆီယံအထူးသံတမန် နဲ့ တွေ့တဲ့အခါ ကြံ့ခိုင်ရေးပါတီ ဥက္ကဋ္ဌ ဦးသန်းဌေးက ပါတီဝင် ၁,၈၀၀ ကျော် အသတ်ခံထားရတဲ့အကြောင်းပြောပြခဲ့ပါတယ်။

   ရခိုင့်ဦးဆောင်ပါတီက ဖွဲ့စည်းပုံအခြေခံဥပဒေကို ပြင်ဆင်မယ့်အစား အသစ်ပြန်ရေးဆွဲသင့်တယ်လို့ ဆွေးနွေးခဲ့တဲ့အကြောင်း ပါတီဥက္ကဋ္ဌ ဒေါက်တာအေးမောင်က ဘီဘီစီကိုပြောပါတယ်။

   လက်ရှိပဋိပက္ခတွေပြေလည်ရေးအတွက် မြန်မာနိုင်ငံဆိုင်ရာ အာဆီယံအထူးသံတမန်အနေနဲ့ ဒေါ်အောင်ဆန်းစုကြည်နဲ့ တွေ့ဆုံပြီး ဒေါ်အောင်ဆန်းစုကြည်ရဲ့သဘောထားကို အများပြည်သူသိအောင်ထုတ်ပြန်ပေးဖို့ ကိုလည်း တောင်းဆိုခဲ့တဲ့အကြောင်း ဒေါက်တာအေးမောင်ကဆက်ပြောပါတယ်။

   အာဆီယံအထူးသံတမန်ကလည်း သူ့အနေနဲ့ ဒေါ်အောင်ဆန်းစုကြည်နဲ့တွေ့ခွင့်ရဖို့ကြိုးစားခဲ့ပေမဲ့ မအောင်မြင်ခဲ့တဲ့အကြောင်း နိုင်ငံရေးပါတီတွေကိုပြန်ရှင်းပြခဲ့ပါတယ်။

   အာဆီယံအထူးသံတမန်ဟာ အပစ်ရပ်(NCA)လက်မှတ်ရေးထိုးထားတဲ့ တိုင်းရင်းသားလက်နက်ကိုင်(၇)ဖွဲ့နဲ့ လည်း မနေ့ကတွေ့ခဲ့ပါသေးတယ်။

2. ၂ ဇူလိုင် ၂၀၂၂မင်းတပ်မြို့နယ်က ကျေးရွာတွေထဲ စစ်တပ်က လေကြောင်းနဲ့ပစ်ခတ်လို့ ဒေသခံနှစ်ဦးသေဆုံး၊, ဒဏ်ရာရသူတွေလည်းရှိ

   ချင်းပြည်နယ်ထဲက မင်းတပ်မတူပီလမ်းမကြီးအောက်ဘက်၊ မိုင်လေးဆယ်အနီးမှာရှိတဲ့ ချပ်ကျေးရွာထဲကို ဒီကနေ့ ဇူလိုင် ၂ ရက်နေ့က စစ်ကောင်စီဘက်က လေကြောင်းပစ်ခတ်မှု လုပ်ခဲ့တာကြောင့် အရပ်သားနှစ်ဦးသေဆုံးပြီး ထိခိုက်ဒဏ်ရာရသူတွေလည်း ရှိခဲ့တယ်လို့ ဒေသခံတွေကပြောပါတယ်။

   ‘’ဝမ္မသူးဘက်ကနေလေယာဥ်တက်သွားတာ။ မင်းတပ်ဘက်ကိုသွားမယ်ထင်တာ ။ ချပ်ရွာဘက်ကို တက်သွားတာ။ အဲဒီဘက်မှာ စာသင်ကျောင်းထဲ နည်းနည်းလေး လူစုတာများလို့ထင်တယ်။ လက်နက်ကြီးတွေနဲ့ချတယ်။ ထိတဲ့နှစ်ယောက်ကတော့ဆုံးသွားတယ်။ ဒဏ်ရာရတဲ့လူတွေလည်းများတယ်။ အကုန်ပြေးကြရတော့ ဆေးအဖွဲ့တွေလည်းအခုမှသွားနေရတယ်’’ လို့ ဒေသခံတစ်ဦးက ဘီဘီစီကိုပြောပါတယ်။

   လက်ရှိမှာတော့ ချပ်ကျေးရွာဒေသခံအများစုဟာ ဘေးလွတ်ရာနေရာတွေကို တိမ်းရှောင်နေကြရတယ်လို့ ဒေသခံတွေကပြောပါတယ်။ စစ်ကောင်စီဘက်ကတော့ အရပ်သားနေထိုင်ရာကျေးရွာတွေထဲကိုလေကြောင်းနဲ့ ပစ်ခတ်တာတွေ နဲ့ပတ်သက်ပြီး သတင်းထုတ်ပြန်တာမရှိသေးသလို ဘီဘီစီကလည်း ဆက်သွယ်မေးမြန်းဖို့ကြိုးစားနေပါတယ်။

3. ၂ ဇူလိုင် ၂၀၂၂ကျောက်တော်မှာ အရပ်သားတစ်ဦး မိုင်းနင်းမိပြီး ဒဏ်ရာအပြင်းအထန်ရ, အရပ်သားတွေမိုင်းနင်းမိပြီးထိခိုက်၊ သေဆုံးတာတွေ ဆက်ဖြစ်နေ

   ရခိုင်ပြည်နယ်၊ ကျောက်တော်မြို့နယ်၊ ဝက်မှိုင်းကျေးရွာမှာ မနေ့ဇူလိုင် ၁ ရက်နေ့က မြေမြှုပ်ုပ်င်းပေါက်ကွဲမှုဖြစ်ခဲ့ပြီး အရပ်သားတစ်ဦးထိခိုက်ဒဏ်ရာရခဲ့တယ်လို့ ဒေသခံတွေကပြောပါတယ်။ မနေ့မွန်းလွဲ ၁ နာရီလောက်က ဝက်မှိုင်းကျေးရွာက အသက် ၄၀ ကျော်အရွယ် ဦးသန်းစိန်မောင် ဟာ ကျေးရွာအနီး နွားကျောင်းနေရင်း မြေမြှုပ်မိုင်းကို နင်းမိခဲ့တာဖြစ်ပြီး ဒဏ်ရာကြောင့် ညာဘက်ခြေထောက်ပြတ်တောက်သွားတယ်လို့ ရွာသားတွေကပြောပါတယ်။

   မိုင်းနင်းမှုဖြစ်တဲ့နေရာအနီးမှာ စစ်ကောင်စီရဲ့တပ်ရင်းဌာနချုပ်ဖြစ်တဲ့ ခလရ ၃၇၅ တည်ရှိတယ်လို့လည်း ဒေသခံတွေကဆိုပါတယ်။ ဒဏ်ရာအပြင်းအထန်ရရှိခဲ့တဲ့ ဦးသန်းစိန်မောင်ကိုတော့ မနေ့ကနေ့လယ်လောက်က ကျောက်မြို့ပြည်သူ့ဆေးရုံကို ပို့ဆောင်ပေးခဲ့ပြီး ဒဏ်ရာပြင်းထန်တဲ့အတွက် စစ်တွေဆေးရုံကြီးကို ဆက်လက်ပို့ဆောင်လိုက်ရတယ်လို့ သိရပါတယ်။

   လက်ရှိကာလဟာ တောင်သူတွေမိုးစပါးစိုက်ပျိုးဖို့အတွက် လယ်ထွန်နေကြချိန်ဖြစ်ပြီး လယ်ကွင်းအနီးတောင်သူတွေသွားလာနေချိန်မှာ မိုင်းတွေမကြာခဏတွေ့ရတဲ့အတွက် မကြာခဏပေါက်ကွဲ ဒဏ်ရာရတာတွေလည်းရှိတယ်လို့ ဒေသခံတွေကပြောပါတယ်။ ပြီးခဲ့တဲ့ ဇွန်လ ၁၇ ရက်နေ့ကလည်း ရသေ့တောင်မြို့နယ် မယူကမ်းဒေသ အောင်ဗလကျေးရွာအုပ်စု သာစည်ကုန်းကျေးရွာက လင်မယားနှစ်ဦးတို့မှာ ကျေးရွာအနီးလယ်ကွင်းထဲမှာ အလုပ်လုပ်နေချိန် ကန်သင်းပေါ်မှာထောင်ထားတဲ့ မိုင်းပေါက်ကွဲပြီး မျက်လုံးနဲ့ ခန္ဓာကိုယ်မှာ ဒဏ်ရာရတဲ့ဖြစ်စဥ်ဖြစ်ခဲ့ပါတယ်။

   ဒါ့အပြင် မေလ ၁၅ ရက်နေ့ကလည်း မင်းပြားမြို့နယ် ပန်းမြောင်းကျေးရွာက အမျိုးသားတစ်ဦးဟာ သပေါ့စာတဲ့စုက သူ့ရဲ့လယ်ကွင်းနားမှာ ထင်းခုတ်နေချိန် မိုင်းပေါက်ကွဲပြီး သေဆုံးသွားခဲ့သလို ပလက်ဝမြို့နယ်အတွင်းမှာလည်း ဇွန်လအတွင်း မိုင်းပေါက်ကွဲမှုနှစ်ကြိမ်ိမ်စ်ပွားခဲ့ပြီး စစ်ဘေးရှောင်တွေနဲ့ ကျေးရွာသားတွေ ထိခိုက်ခဲ့ရပါတယ်။ ရခိုင်ပြည်နယ်အတွင်းမှာတော့ စစ်ကောင်စီနဲ့ အေအေတို့အကြား ပစ်ခတ်ရပ်စဲထားတဲ့ တစ်နှစ်ကျော်ကာလအတွင်း မြေမြှုပ်မိုင်းနဲ့ စစ်ကျန်လက်နက်ပေါက်ကွဲမှု အကြိမ်ရေ ၄၀ ခန့်ရှိခဲ့ပြီး လူထိခိုက်သေဆုံးတဲ့အကြိမ်အရေအတွက်ကတော့ ၂၀ ခန့်ရှိနေပြီဖြစ်တယ်လို့ ရခိုင်တိုင်းရင်းသားမျိုးနွယ်များ အစည်းအရုံး REC ရဲ့ မှတ်တမ်းတွေအရ သိရပါတယ်။ အခုနောက်ပိုင်း မိုင်းပေါက်ကွဲမှုကြောင့် ထိခိုက်ဒဏ်ရာရရှိသူတွေထဲမှာတော့ စစ်ဘေးရှောင်တွေပိုများလာနေပြီး အရင်စစ်ပွဲတွေဖြစ်ပွားနေတဲ့ကာလက စွန့်လွှတ်ထားခဲ့ကြတဲ့ လယ်ယာမြေတွေကို ပြန်လည်လုပ်ကိုင်ကြရာမှာ အခုလို မိုင်းပေါက်ကွဲမှုတွေနဲ့ ရင်ဆိုင်နေကြရတာဖြစ်တယ်လို့ ဒေသခံတွေကပြောပါတယ်။

4. ၂ ဇူလိုင် ၂၀၂၂တရုတ်နိုင်ငံခြားရေး၀န်ကြီး ၀မ်ယီ ဒီနေ့ မြန်မာနိုင်ငံကို ရောက်ရှိမယ်, မြန်မာမှာ စစ်တပ်က အာဏာသိမ်းပြီးနောက် တရုတ်အဆင့်မြင့်အရာရှိကြီး တစ်ဦးရဲ့ ပထမဆုံးမြန်မာခရီးစဥ် ဖြစ်

   တရုတ်နိုင်ငံခြားရေး၀န်ကြီး မစ္စတာ ၀မ်ယီ ဟာ ဒီနေ့ ဇူလိုင် ၂ ရက်နေ့မှာ မြန်မာနိုင်ငံကို ရောက်ရှိလာမယ်လို့နိုင်ငံခြားရေး၀န်ကြီးဌာန တာ၀န်ရှိသူတစ်ဦးက ပြောပါတယ်။

   မစ္စတာ၀မ်ယီဟာမြန်မာခရီးစဥ်အတွင်း နိုင်ငံခြားရေး၀န်ကြီး ဦးဝဏ္ဏမောင်လွင်နဲ့တွေ့ဆုံဖို့ရှိတယ်လို့သိရပြီး စစ်ကောင်စီဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နဲ့ သီးသန့်တွေ့ဆုံဖို့ရှိမရှိတော့မသိရသေးပါဘူး။

   မဲ‌ခေါင်လန်ချန်း ၀န်ကြီးအဆင့် အစည်းအဝေးကို ပုဂံမှာ ဇူလိုင် ၂ ရက်ကနေ ၅ရက်အထိ ကျင်းပမှာဖြစ်ပြီး အဲဒီအစည်းအ‌ဝေးကိုတက်ရောက်ဖို့အတွက် မစ္စတာ ၀မ်ယီ ရောက်ရှိလာမှာဖြစ်ပါတယ်။မဲ‌ခေါင်ဒေသတွင်းနိုင်ငံတွေဖြစ်တဲ့ ကမ္ဘောဒီးယား၊ လာအို၊ မြန်မာ၊ ထိုင်း၊ ဗီယက်နမ် က နိုင်ငံခြားရေး၀န်ကြီးတွေလည်း တက်ရောက်ဖို့ရှိနေတာဖြစ်ပါတယ်။ဒါဟာ မြန်မာနိုင်ငံအစိုးရရဲ့ အချုပ်အခြာအာဏာနဲ့ တည်ရှိမှုကို အသိအမှတ်ပြုခြင်းသာဖြစ်ပြီး မဲ‌ခေါင်နိုင်ငံအားလုံးတစ်သားတည်းရှိတာကိုပြသတာပဲဖြစ်တယ်လို့ ဗိုလ်ချုပ်ဇော်မင်းထွန်း က မနေ့က သတင်းစာရှင်းလင်းပွဲမှာ ပြောကြားသွားခဲ့ပါတယ်။

   မဲခေါင်-လန်ချန်း ပူးပေါင်းဆောင်ရွက်မှု အစီအစဉ်ဟာ ၂၀၁၄ ခုနှစ် က မြန်မာက အိမ်ရှင်အဖြစ် လက်ခံကျင်းပတဲ့ အာဆီယံ - တရုတ် ထိပ်သီးအစည်းအဝေးမှာ တရုတ်ဝန်ကြီးချုပ်လီခချန်းရဲ့အဆို ပြုချက်အရ မဲခေါင်ဒေသအတွင်း ဖွံ့ဖြိုးမှုကွာဟချက်လျှော့ချဖို့နဲ့ စဉ်ဆက်မပြတ် ဖွံ့ဖြိုးတိုးတက်မှုရရှိရေးအတွက် ပူးပေါင်းဆောင်ရွက်ရန် ရည်ရွယ်လျက် ဖွဲ့စည်းခဲ့တာဖြစ်ပါတယ်။

   ဒီအစည်းဝေးတွေကို တရုတ်အပါအဝင် မဲခေါင်ဒေသတွင်း (၅) နိုင်ငံက အလှည့်ကျ ဥက္ကဋ္ဌ အဖြစ်တာဝန်ယူကာ အိမ်ရှင်အဖြစ် လက်ခံကျင်းပရခြင်း ဖြစ်ပြီး ဒီနှစ်မှာတော့ မြန်မာ အလှည့်ကျ အိမ်ရှင်အ ဖြစ် ဆောင်ရွက်တာဖြစ်ပါတယ်။ ဒီတစ်ခေါက်အစည်းအ‌ဝေးမှာ ဒေသတွင်းနိုင်ငံတွေနဲ့ သဘောတူညီမှု စာချုပ်တွေ၊ နားလည်မှု စာချွန်လွှာတွေ လက်မှတ်ရေးထိုးသွားဖို့ရှိနေပါတယ်။

   နောက်ဆုံးရရှိတဲ့သတင်းတွေအရ မစ္စတာဝမ်ယီဟာ ဒီကနေ့ မြန်မာနိုင်ငံကို ရောက်လာပြီ ဖြစ်ပါတယ်။ သူ့ကို ညောင်ဦးလေဆိပ်မှာ တရုတ်နဲ့မြန်မာ တာဝန်ရှိသူတွေက ကြိုဆိုခဲ့ကြပါတယ်။

5. ၂ ဇူလိုင် ၂၀၂၂PR စနစ်မှာ တရားမဲ့ပြုကျင့်ရင် ပါတီကရတဲ့မဲတွေပါ ပယ်ဖျက်မယ်လို့ ရွေးကောက်ပွဲကော်မရှင်ပြော

   အချိုးကျကိုယ်စားပြုစနစ်(PR)နဲ့ ကျင်းပမယ့် ရွေးကောက်ပွဲတွေမှာ တရားမဲ့ပြုကျင့်ရင် သက်ဆိုင်ရာမဲဆန္ဒနယ်မှာ ပါတီကရခဲ့တဲ့ ဆန္ဒမဲတွေကိုပါ ပယ်ဖျက်မယ်လို့ ပြည်ထောင်စုရွေးကောက်ပွဲကော်မရှင်က မနေ့ကလုပ်တဲ့သတင်းစာရှင်းလင်းပွဲမှာ ထုတ်ပြန်လိုက်ပါတယ်။

   ပီအာရ်စနစ်ဟာ ပါတီကိုပဲမဲပေးရမှာဖြစ်ပြီး ပါတီကရတဲ့မဲကိုမှ ကိုယ်စားလှယ်လောင်းတွေကို အချိုးကျပြန်ခွဲပေးတဲ့စနစ်ဖြစ်ပါတယ်။ ဒါကြောင့် တရားမဲ့ပြုကျင့်ခဲ့ရင် ကိုယ်စားလှယ်လောင်းတစ်ဦးတည်းကိုသာမက ဦးစားပေးအလိုက်စီစဥ်ထားတဲ့ တခြားကိုယ်စားလှယ်လောင်းတွေပါ ထိခိုက်စေမယ့် ပြင်းထန်တဲ့အရေးယူမှုလည်းဖြစ်လာပါတယ်။ ယခင် နိုင်သူအကုန်ယူစနစ်မှာ တရားမဲ့ပြုကျင့်မှုပေါ်ပေါက်ခဲ့ရင် သက်ဆိုင်ရာ ကိုယ်စားလှယ်လောင်းတစ်ဦးထဲပဲ အရေးယူခံရပြီး ကိုယ့်ပါတီထဲကတခြားကိုယ်စားလှယ်လောင်းတွေအပေါ် သက်ရောက်မှုမရှိပါဘူး။

   ၂၀၂၀ ရွေးကောက်ပွဲမှာ ရွေးကောက်ပွဲနဲ့ပတ်သက်တဲ့အမှု တစ်ထောင်ကျော်ဖြစ်ခဲ့တယ်လို့ ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးခင်မောင်ဦးက မနေ့ဇူလိုင် ၁ ရက်က ပြုလုပ်တဲ့ သတင်းစာရှင်းလင်းပွဲမှာပြောပါတယ်။

   အလားတူ ပြည်ထောင်စုရွေးကောက်ပွဲကော်မရှင်ဥက္ကဋ္ဌဟောင်း ဦးလှသိန်းအပါအဝင် ရွေးကောက်ပွဲလုပ်ငန်းစဥ်တွေ၊မဲမသမာမှုတွေနဲ့ တရားမဲ့ပြုကျင့်မှုတွေမှာ ပါဝင်ပတ်သက်ကျူးလွန်သူ ၄၈၉ ဦးကို အရေးယူထားတယ်လို့ ဦးခင်မောင်ဦးက ဆက်ပြောပါတယ်။

6. ၂ ဇူလိုင် ၂၀၂၂အာဆီယံအထူးသံတမန် မစ္စတာ ပရက်ဆော့ခွန်း ဒေါ်အောင်ဆန်းစုကြည်နဲ့ တွေ့ဆုံခွင့်ရဖို့ ထပ်မံ ကြိုးစားပေမဲ့မအောင်မြင်သေး, ဇူလိုင် ၁ ရက်မှာ အာဆီယံအထူးသံနဲ့ စစ်ကောင်စီရဲ့ ငြိမ်းချမ်းရေးဆွေးနွေးမှုကော်မတီ ခေါင်းဆောင် ဒုတိယဗိုလ်ချုပ်ကြီး ရာပြည့်တို့တွေ့

   ကမ္ဘောဒီးယားဝန်ကြီးချုပ်ရဲ့ငြိမ်းချမ်းရေးဆိုင်ရာ မူဝါဒတွေကို စစ်ကောင်စီကိုမျှဝေခဲ့တယ်လို့ ထုတ်ပြန်

   မြန်မာနိုင်ငံကိုတစ်ပတ်ကြာရောက်ရှိနေတဲ့ အာဆီယံအထူးသံတမန် မစ္စတာ ပရက်ဆော့ခွန်းက ဖမ်းဆီးအကျဉ်းချခံထားရတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ သူ့ခရီးစဉ်အတွင်း တွေ့ခွင့်ပေးဖို့ထပ်မံတောင်းဆိုထားပေမဲ့ အင်မတန်ခက်ခဲတဲ့အခြေအနေမှာရှိနေတယ်လို့ မနေ့ ဇူလိုင် ၁ ရက်က အပစ်ရပ်တိုင်းရင်းသားလက်နက်ကိုင်အဖွဲ့တွေနဲ့တွေ့ဆုံချိန်မှာ ပြောကြားခဲ့တယ်လို့ ဆွေးနွေးပွဲမှာ ပါဝင်သူတချို့က ပြောကြားပါတယ်။

   အခုလို တွေ့ဆုံခွင့်ထပ်မံတောင်းဆိုထားတာနဲ့ပတ်သက်လို့ ဒေါ်အောင်ဆန်းစုကြည်ထံ ဆက်သွယ်လာတာလည်း မရှိသေးဘူးလို့ တရားရုံးနဲ့နိီးစပ်တဲ့အသိုင်းအ၀ိုင်းက ပြောပါတယ်။ ဒေါ်အောင်ဆန်းစုကြည်နဲ့ တွေ့ခွင့်ပေးဖို့ ပြီးခဲ့တဲ့ မတ်လက သူ့ရဲ့ပထမခရီးစဉ်အတွင်းမှာလည်း တောင်းဆိုခဲ့ပေမဲ့ စစ်ကောင်စီကတော့ လိုက်လျောခဲ့တာမရှိပါဘူး။

   ဒီတောင်းဆိုမှုကို မလိုက်လျောပေမဲ့တစ်ဖက်မှာတော့ စစ်ကောင်စီက အာဆီယံအထူးသံကို သူ့ရဲ့ ငြိမ်းချမ်းရေး ကော်မတီက ဦးဆောင်သူတွေ၊ စစ်ကောင်စီဥက္ကဋ္ဌရဲ့ ငြိမ်းချမ်းရေးစကား၀ိုင်းကို တက်ရောက်ခဲ့တဲ့ အပစ်ရပ်လက်မှတ်ထိုးတိုင်းရင်းသားလက်နက်ကိုင်အဖွဲ့ တွေနဲ့ တွေ့ဆုံခွင့်ပြုခဲ့ပါတယ်။

   အာဆီယံအထူးသံတမန် မစ္စတာပရက်ဆော့ခွန်းနဲ့ စစ်ကောင်စီက ငြိမ်းချမ်းရေးဆွေးနွေးမှုအတွက် ဖွဲ့စည်းထားတဲ့ NSPNC(အမျိုးသားစည်းလုံး ညီညွတ်ရေးနှင့်ငြိမ်းချမ်းရေးဖော်ဆောင်မှုညှိနှိုင်းရေးကော်မတီ) ဥက္ကဋ္ဌဒုတိယ ဗိုလ်ချုပ်ကြီးရာပြည့်တို့ ဦးဆောင်တဲ့အဖွဲ့ မနေ့ ဇူလိုင် ၁ ရက်က တွေ့ဆုံခဲ့တယ်လို့ ကမ္ဘောဒီးယားနိုင်ငံခြားရေးဝန်ကြီးဌာက ဒီနေ့ ဇလိုင် ၂ ရက်မနက်ပိုင်း ထုတ်ပြန်လာပါတယ်။ အဲဒီလိုတွေ့ဆုံရာမှာ အချက်သုံးချက်ကို အဓိကဆွေးနွေးခဲ့တယ်လို့ ထုတ်ပြန်ချက်က ဆိုပါတယ်။

   အဲဒီအချက်တွေကတော့ တစ်နိုင်ငံလုံးဆိုင်ရာ ပစ်ခတ်တိုက်ခိုက်မှုရပ်စဲရေးစာချုပ် (NCA) မှာ ပါဝင်လက်မှတ်ရေးထိုးထားတဲ့တိုင်းရင်းသားလက်နက်ကိုင်တွေနဲ့ စေ့စပ်ဆွေးနွေးရေး ဖြစ်ပေါ်တိုးတက်မှုတွေ၊ တစ်ခါ ကမ္ဘောဒီးယားပြည်တွင်း ငြိမ်းချမ်းရေးအတွက် ဝန်ကြီးချုပ် ဟွန်ဆန်ရဲ့ Win Win Situation (နှစ်ဦးနှစ်ဖက်ကျေနပ်ပြေလည်တဲ့ အောင်မြင်မှုမူဝါဒ) ကို အကောင်အထည်ဖော်ခဲ့ရာမှာ ကမ္ဘောဒီးယားရဲ့ အတွေ့အကြုံကို မျှဝေတာ၊ သွားလာရခက်ခဲတဲ့ ဒေသတွေမှာရှိတဲ့ မြန်မာပြည်သူတွေအတွက် လူသားချင်းစာနာမှုအကူအညီနဲ့ COVID-19 ကာကွယ်ဆေးထိုးနှံပေးရာမှာ အမျိုးသားစည်းလုံးညီညွတ်ရေးနှင့် ငြိမ်းချမ်းရေးတည်ဆောက်ရေးကော်မတီ (NSPNC) ရဲ့ အခန်းကဏ္ဍတို့ကိုဆွေးနွေးခဲ့တယ်လို့ဆိုပါတယ်။

7. ၂ ဇူလိုင် ၂၀၂၂ပူတာအိုကနွားတွေမှာ ဖြစ်ပွားနေတဲ့အရေပြားနာကြောင့် နွားတချို့သေဆုံး, အနံ့ဆိုးပြင်းထန်လွန်းပြီး ကူးစက်နှုန်းမြင့်တက်လာမှာကို ဒေသခံတွေစိုးရိမ်

   ရောဂါအမည်တပ်ဖို့ သက်ဆိုင်ရာက စစ်ဆေးနေဆဲ

   ပူတာအို ခရိုင် ပူတာအို မြို့နဲ့ ကျေးရွာ တချို့မှာ မွေးမြူထားတဲ့ နွားတွေမှာ ပြီးခဲ့တဲ့​ဇွန်လနောက်ဆုံးပတ်ကစလို့အရေးပြားနာ တွေ ဖြစ်ပွားနေတာပါ။ရောဂါဖြစ်နေတဲ့ နွားတွေကို ပူတာအို မြို့နယ် မွေးမြူးရေးနှင့်ကုသရေးဦးစီးဌာနက လက်လှမ်း မီသလောက် ဆေးကုသပေးတာ၊ နွားပိုင်ရှင်တွေကို ရောဂါကာကွယ်ရေးအသိပညာပေးတာ၊ ဆေးတွေ ဖြန့်၀ေတာလို့ ပြုလုပ်ပေးနေတယ်လို့ဆိုပါတယ်။

   ဒါ့အပြင် နွားတွေမှာ ဖြစ်ပွားနေတဲ့ ရောဂါနဲ့ပတ်သက်ပြီး တိတိကျကျ သိဖို့ ရောဂါဖြစ်ပွားနေတဲ့ နွားတွေရဲ့ဓာတ်ခွဲ နမူနာယူပြီး ဓာတ်ခွဲခန်း ပို့ဆောင်စစ်ဆေးထားတယ်လို့ ပူတာအို မြို့နယ် မွေးမြူးရေးနှင့်ကုသရေးဦးစီးဌာနက တာ၀န်ရှိသူကပြောပါတယ်။လက်ရှိပူတာအို မြို့နယ် အတွင်းမှာ နွားတွေ ရောဂါဖြစ်ပွားမှုနဲ့ပတ်သက်ပြီး သူက အခုလိုပြောပါတယ်။

   "လောလောဆယ်မှာတော့ အသစ်ထပ်ပြီးမှ မတွေ့ရဘူး။ တွေ့ရတာ နည်းသွားတယ်။ ပြီးခဲ့တဲ့တစ်ပတ်လောက်အတွင်းမှာတော့ နည်းနည်းပျံ့လာတာလေးတွေ ရှိတာပေါ့။ ကျွန်တော်တို့ဝနးထမ်းတွေအနေအထား သူတို့ရဲ့ တွေ့ရှိချက်အရဆိုရင် တိတိကျကျပြောမယ်ဆိုရင် ဓာတ်ခွဲခန်းအဖြေရမှ ဒါကိုတိတိကျကျပြောကြားလို့ရမှာ လက်ရှိအနေအထားအရ မျက်မြင်တွေ့ရှိတဲ့လက္ခဏာ အရဆိုရင် အရေအပြားရောဂါတစ်မျိုးလို့ပဲ ပြောရင်အဆင်ပြေမယ်နဲ့တူပါတယ်။ လောလောဆယ်အနေအထားကတော့သေဆုံးရင်လဲမြှုပ်ကြတယ်ပေါ့ဗျာ။ ချက်ပြီးမှ စားကြတဲ့အနေအထားတော့မရှိပါဘူး။ ပြီးတော့ မြှုပ်တဲ့နည်းတူ လူတွေကို ကူးစက်တဲ့ ဖြစ်တယ်ဆိုတဲ့ အထောက်အထားလည်း တစ်စုံတစ်ရာတွေ့ရှိရခြင်းလည်း မရှိသေးပါဘူး" လို့သူကပြောပါတယ်။

   ရောဂါဖြစ်နေတဲ့နွား တွေရဲ့ ခန္ဓာကိုယ်မှာ အနာတွေက ပြည်တွေ ရွှဲစိုနေတာတွေ့ရပြီး သူတို့ဆီက ထွက်နေတဲ့ အနံ့အသက်တွေက ဖြတ်သန်းသွားလာသူတွေအတွက် မခံနိုင်အောင် အနံ့ပြင်းထန်လွန်းတယ်လို့ ဒေသခံတွေက ပြောပါတယ်။ဌာနဆိုင်ရာဘက်ကတော့ ဖြစ်ပွားမှုနည်းသွားပြီဆိုပေမဲ့ ဒေသခံတွေကတော့ ရောဂါဖြစ်နေတဲ့နွားတွေကို ပူတာအိုမြို့ပေါ်လမ်းမတွေမှာတွေ့နေရဆဲလို့လည်းဆိုပါတယ်။

   "လမ်းမပေါ်မှာဒီအတိုင်း လွှတ်နေကြလို့ မနေ့ကတောင်ပြောလိုက်သေးတယ်။ ကိုယ့်နွားကိုယ်ထိန်းရင်ကောင်းမယ်ဆိုပြီး ... သွားလာနေရင်နဲ့တောင် နံလို့ အန်လိုက်သေးတယ် နှစ်ခါတောင်ရှိပြီီ" လို့ဒေသခံတစ်ဦးက ဆိုပါတယ်။ ပူတာအို မြို့နယ် မွေးမြူးရေးနှင့်ကုသရေးဦးစီးဌာန ရဲ့ စာရင်းအရ နွား အကောင်ရေ ၃၀ခန့် ရောဂါဖြစ်နေပြီးတော့ ရောဂါဖြစ်နေတဲ့နွားတွေနဲ့ပတ်သက်ပြီး ပိုင်ရှင်တွေအနေနဲ့ကလည်း ပူးပေါင်းဆောင်ရွက်မှု အားနည်းတယ်လို့ ဆိုပါတယ်။

   လက်ရှိ ပူတာအို မြို့နယ် မွေးမြူးရေးနှင့်ကုသရေးဦးစီးဌာနကနေ ကုသပေးနေတဲ့ နွားအကောင်ရေထဲမှာတော့ သေဆုံးတဲ့ နွားမရှိသေးဘူးလို့ဆိုပေမဲ့ အဲဒီလိုအရေပြားအနာတွေပေါက်ပြီးနောက်သေဆုံးတဲ့နွား ၃ ကောင်ထက်မနည်း ရှိနေတယ်လို့ဒေသခံတွေဆီက သိရပါတယ်။ ပူတာအို့မြို့ရဲ့ ကျေးလက်ဒေသတွေမှာတော့ နွားတွေကို လယ်ယာလုပ်ငန်းတွေမှာယနေချိန်ထိ အားထားအသုံးပြုနေရတာတွေရှိနေပါသေးတယ်။

8. ၂ ဇူလိုင် ၂၀၂၂မန္တလေးမှာ သုံးလအတွင်း ဖမ်းဆီးခံရသူလူငယ်ပေါင်း ၈၀ ကျော်ခန့်ရှိလာ

   စစ်ကောင်စီတပ်ဖွဲ့၀င်တွေဟာ ဇွန်လကုန်ပိုင်းကစလို့ မန္တလေးမြို့က ပုသိမ်ကြီး၊ ချမ်းမြသာစည်၊ အောင်မြေသာစံမြို့နယ်တွေက ရပ်ကွက်တချို့ကို ညစဥ် ၀င်ရောက်စစ်ဆေးမှုတွေ ပြုလုပ်နေပါတယ်။

   ရပ်ကွက်နေသူတွေထဲက ဒေသခံတချို့ကို အမည်နဲ့တကွလာရောက် ရှာဖွေဖမ်းဆီးသွားသလို တချို့နေအိမ်မှာ ရှိတဲ့ မိသားစု၀င်အားလုံးကိုပါ ဖမ်းဆီးခေါ်ဆောင်တာတွေ ရှိတယ်လို့ ဒေသခံတွေက ပြောပါတယ်။ အခုလို ဖမ်းဆီးခံရသူ လူငယ်တချို့ဟာ မြို့ပြပြောက်ကျားတပ်ဖွဲ့နဲ့ ဆက်နွှယ်တယ်ဆိုပြီး အဖမ်းခံရသလို တချို့က သာမန်အရပ်သားလူငယ်တွေ ဖြစ်နေပါတယ်။

   မန္တလေးမြို့တွင်း ဧပြီလကနေ ဇွန်လကုန်ထိ ဖမ်းဆီးခံရတဲ့ လူငယ်တွေဟာ အယောက် ၈၀ ကျော်ရှိနိုင်တယ်လို့ ဆိုပါတယ်။ မန္တလေးမြို့မှာ နိုင်ငံရေးအမှုတွေ လိုက်ပါဆောင်ရွက်နေတဲ့ ရှေ့နေသုံးဦးလည်း ဒီရက်ပိုင်းအတွင်းမှာ ဖမ်းဆီးခံရပါတယ်။ အခုလိုစစ်အာဏာသိမ်းမှုကိုဆန့်ကျင်တဲ့သူတွေ နဲ့ ဆက်နွှယ်မှုရှိသူတွေကို သံသယနဲ့ဖမ်းဆီးတာတွေ တစ်ဖက်မှာရှိနေပြီး မြို့တွင်းဖြတ်သန်းသွားလာတဲ့ ယာဉ်တွေကို သွားလာစစ်ဆေးတာတွေ နေ့စဉ်မပျက်ရှိပေမယ့် ခိုးယူလုယက်ဒုစရိုက်မှုတွေလဲ ခပ်စိတ်စိတ်ဖြစ်ပေါ်နေပါတယ်။ တရားဥပဒေစိုးမိုးမှုမရှိဘဲ သတင်းပေးတာအပေါ်မူတည်ပြီး ဖမ်းချင်သလိုဖမ်းနေတာကြောင့် မလုံခြုံမှုတွေကိုလည်းခံစားနေရတယ်လို့မြို့ခံအမျိုးသမီးတစ်ဦးက ပြောပါတယ်။

   စစ်ကောင်စီတပ်ဖွဲ့တွေက မန္တလေးမြို့မှာ ရက်ဆက်ဆိုသလို ဖမ်းဆီးတာတွေ ရှိသလို စစ်ကောင်စီသတင်း လူတချို့လဲ ပစ်ခတ်ခံရတာတွေ ရှိပါတယ်။ ဇွန်လ ၃၀ ရက်ညနေပိုင်းမှာ ပုသိမ်ကြီးမြို့နယ်က မဟာမြိုင်အုပ်ချုပ်ရေးမှူးနဲ့ ကုန်းတန်းရပ်က စစ်ကောင်စီသတင်းပေးလို့ ယူဆရသူတစ်ယောက် သေနတ်နဲ့နှစ်ချက်ပစ်ခံရတယ်လို့ ဒေသတွင်း သတင်းတွေမှာ ဖော်ပြထားပါတယ်။ ဓာတ်ပုံ-CJ ပုံစာ-မန္တလေးမြို့တွင်း အခြေအနေ/ပုံဟောင်း

9. ၁ ဇူလိုင် ၂၀၂၂သေ့ဘောဘိုးရွာကို စစ်ကောင်စီ လေယာဉ်က ဗုံးကြဲလို့ ကလေးတယောက် အမျိုးသမီးတယောက် သေဆုံး

   စစ်ကောင်စီရဲ့ လေယာဉ်တစင်းက ဗုံးလာကြဲတဲ့အတွက် ဇူလိုင်လ ၁ ရက် ည၇ နာရီခွဲလောက်အချိန်မှာ ထိုင်း၊ မြန်မာနယ်စပ်စည်းအနီးက သေ့ဘောဘိုးရွာအတွင်းမှာ ကလေးတယောက်နဲ့ အမျိုးသမီးတယောက် သေဆုံးသွားတယ်လို့ ဒေသခံတွေက ပြောပါတယ်။

   နောက်ထပ် လူ ၆ ယောက်လည်း ဒဏ်ရာတွေရသွားတယ်လို့ ဒေသခံက ပြောသလို၊ အဲဒီဘက်မှာ စစ်ကောင်စီ တပ်တွေကို ဆန့်ကျင်တိုက်ပွဲဝင်နေတဲ့ Cobra စစ်ကြောင်း (ကရင်အမျိုးသားအစည်းအရုံး - KNU)က သူတို့ရဲ့ လူမှုမီဒီယာ စာမျက်နှာမှာ ဒီသတင်းကို ထုတ်ပြန်ထားပါတယ်။

   စစ်ကောင်စီတပ်တွေ အခြေစိုက်ထားရာ သေ့ဘောဘိုးစခန်းကို KNU ဦးဆောင်တဲ့ ပူးပေါင်းတပ်တွေက ပြီးခဲ့တဲ့ မေလအတွင်းက သိမ်းယူနိုင်ခဲ့ကြတာဖြစ်ပြီး အခု လေယာဉ်ကနေ ဗုံးကြဲတာခံခဲ့ရတဲ့ သေဘော့ဘိုးရွာဟာ အဲဒီစခန်းနဲ့ သိပ်မဝေးတဲ့ အရပ်မှာ ရှိတာပါ။

   စစ်ကောင်စီ လေယာဉ်ဟာ လေးကေ့ကော်ဘက်ကိုလည်း ဗုံးကြဲသွားတာဖြစ်ပြီး စခန်းကုန်း နေရာတွေကိုသာမက “ရွာထဲကိုလည်း ဗုံးကြဲသွားတာ”လို့ ဒေသခံက ဘီဘီစီကို ပြောပါတယ်။

   လေးကေ့ကော်၊ သေ့ဘောဘိုး၊ ဝေါလေလမ်းကြောင်းတလျောက် စစ်ကောင်စီတပ်တွေနဲ့ KNU ဦးဆောင်တဲ့ ပူးပေါင်းတပ်တွေအကြား အခုလပိုင်းတွေအတွင်း တိုက်ပွဲတွေ ဆက်တိုက်လိုလို ဖြစ်နေသလို၊ တိုက်ပွဲတွေပြင်းထန် နေတာ ၆ ရက်လောက် ရှိလာနေပါတယ်။

   စစ်ကောင်စီက ဒေသတွင်းကို ရဟတ်ယာဉ်တွေနဲ့ စစ်ကူအင်အား ထပ်ဖြည့်တာတွေလုပ်ဆောင်နေသလို၊ စစ်လေယာဉ်တွေ သုံးပြီး တိုက်ခိုက်မှုတွေ လုပ်ဆောင်နေပါတယ်။

   အဲဒီဒေသက တိုက်ပွဲဖြစ်စဉ်တွေအတွင်း အရပ်သားတွေကို စစ်ကောင်စီတပ်တွေက တိုက်ခိုက်မှုတွေရှိတယ်ဆိုတဲ့ စွပ်စွဲချက်တွေ ထွက်ခဲ့သလို အခုညမှာလည်း ရွာဘက်ကို လေယာဉ်က ဗုံးကြဲတယ်ဆိုတဲ့ သတင်းထွက်ပေါ် လာတာပါ။

   သေ့ဘောဘိုးရွာနဲ့ သောင်ရင်းမြစ်ခြားတဲ့ ထိုင်းဘက်က မော်လီချိုင်းရွာမှာလည်း ဒီအဖြစ်ကြောင့် ကြောက်လန့် တကြားတွေ ဖြစ်နေပြီး ထိုင်းစစ်တပ်က တပ်ဖွဲ့တဖွဲ့ရောက်လာတယ်လို့ သိရပါတယ်။

   ဒီည ဖြစ်ရပ်နဲ့ ပတ်သက်ပြီး စစ်ကောင်စီဘက်က တစုံတရာ ထုတ်ပြန်တာမျိုး မတွေ့ရသေးပါဘူး။

10. ၁ ဇူလိုင် ၂၀၂၂ဇွန်လတစ်လအတွင်း ကယားပြည်နယ်ထဲက စစ်ရေးအခြေအနေနဲ့တိုက်ပွဲဖြစ်စဥ်တွေအကြောင်း KNDF ထုတ်ပြန်လာ

    ကယား(ကရင်နီ)ပြည်နယ်မှာ ပြီးခဲ့တဲ့ ဇွန်လအတွင်း စစ်ကောင်စီနဲ့ ကရင်နီဒေသကာကွယ်ရေးတပ်တွေကြား ထိတွေ့တိုက်ပွဲအကြိမ် ၃၀ အထိဖြစ်ခဲ့ပြီး ဒီတိုက်ပွဲတွေမှာ စစ်ကောင်စီတပ်သားစုစုပေါင်း အယောက် ၃၀ သေဆုံးတယ်လို့ ကရင်နီအမျိုးသားများကာကွယ်ရေးတပ် KNDF က ထုတ်ပြန်လာပါတယ်။

    စစ်ကောင်စီတပ်တွေက စစ်ကြောင်းထိုးဝင်ရောက်လာတာကြောင့် ဖရူဆိုမြို့နယ်အတွင်းမှာ တိုက်ပွဲတွေဖြစ်ခဲ့သလို ဒီးမောဆိုမြို့နယ်ရပ်ကွက်တွေအတွင်းခြေကုတ်ယူတပ်စွဲထားတဲ့ စစ်ကောင်စီတပ်တွေကို ကရင်နီပူးပေါင်းတပ်တွေက ဝင်ရောက်တိုက်ခိုက်ခဲ့တာတွေကြောင့်လည်း ထိတွေ့တိုက်ပွဲတွေရှိခဲ့တယ်လို့ KNDF ရဲ့ထုတ်ပြန်ချက်ကဆိုပါတယ်။ ရှမ်းကယားနယ်စပ်မှာရှိတဲ့ ဖယ်ခုံမြို့နယ်မှာလည်း စစ်ကောင်စီဘက်က စစ်အင်အားဖြည့်တင်းတာတွေလုပ်နေပြီး မိုးဗြဲမြို့နယ်အတွင်းဝါရီဆူဖလိုင်မှာလည်း ထိတွေ့တိုက်ပွဲတွေရှိခဲ့တယ်လို့ ထုတ်ပြန်ပါတယ်။

    ဇွန်လ ၁၅ ရက်နေ့က ဖရူဆိုမြို့နယ် ထီးပေါ်ဆိုနဲ့ ဒေါညေးခူတို့မှာ စစ်ကောင်စီဘက် စစ်ကြောင်းထိုးဝင်ရောက်လာပြီး တိုက်ပွဲတွေဖြစ်ခဲ့သလို ဒီတိုက်ပွဲတွေမှာတော့ ဒေါညေးခူဘုရားကျောင်းနဲ့ ဘုန်းတော်ကြီးနေအိမ်ကို စစ်ကောင်စီဘက်က မီးရှို့ဖျက်ဆီးခဲ့တယ်လို့ KNDF ဘက်က ထုတ်ပြန်ပါတယ်။

    ဇွန်လ ၂၅ ရက်မှာတော့ ဒီးမောဆိုမြို့နယ်၊ ဒေါငံခါးရပ်ကွက်၊ ကုန်းသာ၊ ပူဖားကျေးရွာနဲ့ သေးဆူလဲ ကျေးရွာတွေမှာဖြစ်ခဲ့တဲ့ နှစ်ဖက်တိုက်ပွဲကတော့ ၈နာရီကျော်အထိကြာမြင့်ခဲ့ပြီး စစ်ကောင်စီဘက်က ထိခိုက်သေဆုံးမှုများခဲ့တယ်လို့ KNDF ကထုတ်ပြန်ပါတယ်။ အလားတူ ဒီရက်ပိုင်းမှာပဲ လွိုင်ကော်မြို့နယ်နဲ့ လွိုင်လင်လေးမြို့နယ်ထဲကို စစ်ကြောင်းထိုးလာတဲ့ စစ်ကောင်စီတပ်တွေနဲ့ ကရင်နီပူးပေါင်းတပ်တွေ ထိတွေ့တိုက်ပွဲဖြစ်ခဲ့ပြီး စစ်ကောင်စီဘက်က တပ်ရေး ဗိုလ်ကြီးနဲ့တပ်ကြပ်ကြီး အဆင့်ရှိသူ ၂ ဦးအပါအဝင် စုစုပေါင်း ၄ ဦးသေဆုံးခဲ့ပြီး စစ်ကောင်စီဘက်က လက်နက်တချို့သိမ်းဆည်းရမိကြောင်း KNDF ကထုတ်ပြန်လာပါတယ်။

    စစ်အာဏာသိမ်းပြီးနောက်ပိုင်း ၂၀၂၁ မေလကတည်းက နှစ်ဖက်တိုက်ပွဲတွေပြင်းထန်နေတဲ့ ကယားပြည်နယ်ထဲက စစ်ရေးသတင်းတွေနဲ့ပတ်သက်လို့ KNDF ဘက်ကတော့ တောက်လျောက် သတင်းထုတ်ပြန်ခဲ့ပါတယ်။ စစ်ကောင်စီဘက်ကတော့ ကယားပြည်နယ်အတွင်းက တိုက်ပွဲအခြေအနေတွေနဲ့ပတ်သက် လို့ ရံဖန်ရံခါသာ သတင်းထုတ်ပြန်လေ့ရှိသလို ဇွန်လအတွင်းကတိုက်ပွဲတွေနဲ့ပတ်သက်လို့ သတင်းထုတ်ပြန်တာမရှိသေးပါဘူး။

11. ၁ ဇူလိုင် ၂၀၂၂သွေးလွန်တုတ်ကွေး မဖြစ်ရေး ဘယ်လို ကာကွယ်မလဲ

12. ၁ ဇူလိုင် ၂၀၂၂တိုက်ပွဲမဖြစ်တဲ့ လက်နက်ကိုင်အဖွဲ့တွေနဲ့ တွေ့မယ့် အာဆီယံ အထူးသံရဲ့ မြန်မာ့ငြိမ်းချမ်းရေး ကြိုးပမ်းမှု

13. ၁ ဇူလိုင် ၂၀၂၂ဥကရိထ စခန်း မကျသေး ဘူးလို့ စစ်ကောင်စီပြော, လူနေရပ်ကွက်တွေကို အကာအကွယ်ယူပစ်ခတ်မှုတွေ လုပ်တယ်လို့ အပြန်အလှန် စွပ်စွဲ

    ကရင်ပြည်နယ်၊​ မြ၀တီမြို့တောင်ဘက်၊ ဝေါလေဒေသအနီး ဥကရိထ စစ်ကာင်စီစခန်းကို KNU/KNDO နဲ့ ပီဒီအက်ဖ်တွေ မသိမ်းပိုက်နိုင်သေးဘူးလို့ စစ်ကောင်စီ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ဒီနေ့ ဇူလိုင် ၁ ရက်က နေပြည်တော်မှာ ပြုလုပ်နေတဲ့ သတင်းစာရှင်းလင်းပွဲမှာ ပြောကြားသွားပါတယ်။

    "ဥကရိထ စခန်းဟာ ကရင်ပြည်နယ်မြ၀တီမြို့အတွင်း လုံခြုံရေးဆောင်ရွက်နေတဲ့စခန်းဖြစ်ပါတယ်။ အဲဒီစခန်းကို ဇူလိုင် ၂၆ ရက်နေ့က နယ်ဒါးမြ ၊ စောစလုံးနဲ့ စောအယ်စေး၀ါးတို့ ပူးပေါင်းပြီး သာလွန်အင်အားနဲ့ အကြိမ်ကြိမ် လက်နက်ကြီးလက်နက်ငယ်တွေနဲ့ လာရောက်တိုက်ခိုက်ခဲ့ပါတယ်။ ဇွန်လ ၂၉ ရက်နေ့တစ်ရက်တင်းတင် ၈ ကြိမ် လက်နက်ကြီးလက်နက်ငယ်တွေ သုံးပြီး လာရောက်ပစ်ခတ်ပါတယ်။ တပ်မတော်ဘက်ကလည်း လေကြောင်းပစ်ကူလက်နက်ကြီးပစ်ကူနဲ့ ပြန်လည်ခုခံတာကြောင့် စခန်းသိမ်းပိုက်နိုင်ခြင်းမရှိဘဲ တစ်ဖက်က အကျအဆုံးများနေတယ်လို့ မြေပြင်သတင်းတွေ သိထားပါတယ်။ တိုက်ပွဲအတွင်း ဒဏ်ရာရသေဆုံးသူတွေကို တစ်ဖက်ကိုပို့ဆောင်နေတဲ့အခြေအနေကိုလည်းတွေ့ရပါတယ်" လို့ ပြောကြားသွားပါတယ်။

    ဒါပေမဲ့ ပူးပေါင်းတပ်တွေနဲ့ ဒေသခံတွေကတော့ ဒီနေ့ဇူလိုင် ၁ ရက် မနက်အထိဖြစ်ပွားနေတဲ့ ဥကရိထတိုက်ပွဲ ခြောက်ရက်ကြာတဲ့အထိ ပြင်းထန်နေပြီး စစ်တပ်က ဥကရိထ အနီးတ၀ိုက်ကျေးရွာတွေ အရပ်သားတွေကို စစ်ရှောင်ခွင့်မပေးဘဲ ပိတ်ဆို့ထားပြီး လက်နက်ကြီးလက်နက်ငယ်တွေ လေကြာင်းပစ်ကူတွေနဲ့ ပစ််ခတ်နေတာကြောင့် ဒေသခံ နှစ်ရာကျော် ပိတ်မိနေတယ်လို့ ပြောကြားထားပါတယ်။

    စစ်တပ်ဘက်ကတော့ KNU နဲ့ ပီဒီအက်ဖ်တွေက ရွာထဲ စာသင်ကျောင်းနဲ့လူနေအိမ်အဆောက်အဦတွေကို နေရာယူပြီးတိုက်ခိုက်နေတာသာဖြစ်ပြီး ဒါကိုတပ်မတော်က လုပ်တယ်လို့စွပ်စွဲကြောင်း ဗိုလ်ချုပ်ဇော်မင်းထွန်းက ပြောသွားပါတယ်။

    ဒါ့အပြင် ဇူလိုင် ၂၉ နဲ့ ၃၀ ရက်နှစ်ရက်တာအတွင်း စစ်ကူလာရောက်တဲ့ စစ်ကောင်စီတပ်တွေကို ပူးပေါင်းတပ်တွေက တိုက်ခိုက်တာကြောင့် စစ်တပ်ဘက်က နှစ်ဦးသေဆုံးပြီး ပူးပေါင်းတပ်တွေဘက်က တစ်ဦး သေဆုံးခဲ့တယ်လို့ဆိုပါတယ်။

    စစ်တပ်ဘက်က အကျအဆုံးအထိအခိုက်သတင်းကိုတော့ ဗိုလ်ချုပ်ဇော်မင်းထွန်းက ပြောကြားသွားတာမရှိပါဘူး။

    လက်ရှိမှာ စစ်တပ်ရဲ့လေကြောင်းကတိုက်ခိုက်မှုတွေကြား အရပ်သားတချို့ ထိခိုက်ဒဏ်ရာရတာရှိပြီး စစ်ကောင်စီတပ်ရဲ့လေယာဥ်တစ်စီး ထိုင်းနိုင်ငံလေပိုင်နက်ထဲ ရောက်ရှိသွားတာကြောင့် ထိုင်းစစ်တပ်ဘက်က သတိပေးတဲ့အနေနဲ့ လေယာဥ်ပျံတက်ခဲ့ရပြီး မြန်မာစစ်တပ်ဘက်ကိုလည်း သတိပေးခဲ့ရပါတယ်။

14. ၁ ဇူလိုင် ၂၀၂၂အာဏာသိမ်းပြီးနောက် ကိုယ်လက်အင်္ဂါချွတ်ယွင်းသေဆုံးတဲ့ ကလေး ၃၈၂ ယောက်ရှိနေပြီး ကလေးငယ် ၁၄၀၀ အကျဥ်းချခံထားရတယ်လို့ ကုလပြော

    တစ်စုံတစ်ရာ အရေးယူဆောင်ရွက်တာမရှိရင် ပိုဆိုးလာနိုင်တယ် လို့ ဆို စစ်အာဏာသိမ်းပြီးနောက် မြန်မာနိုင်ငံမှာ ကိုယ်လက်အင်္ဂါချွတ်ယွင်းသေဆုံးတဲ့ကလေး ၃၈၂ ယောက်အထိရှိနေပြီး ကလေး ၁၄၀၀ လောက်ဟာလည်း အကျဥ်းချခံထားရတယ်လို့ ကုလသမဂ္ဂရဲ့ မြန်မာနိုင်ငံဆိုင်ရာ လူ့အခွင့်အရေး အထူးကိုယ်စားလှယ် သောမတ်စ် အင်ဒရူးက ဇွန် ၂၉ ရက်နေ့က ပြောပါတယ်။

    နိုင်ငံကနေထွက်ပြေးလာတဲ့ အစားထိုးမရတဲ့ ထိခိုက်နစ်နာမှုကို ခံစားခဲ့ရတဲ့ လူငယ်တွေနဲ့ သူက တွေ့ဆုံခဲ့တယ်လို့လည်း ဆွစ်ဇာလန်နိုင်ငံ ဂျနီဗာမှာ ကျင်းပတဲ့ ကုလသမဂ္ဂ လူ့အခွင့်အရေး ကောင်စီ အစည်းအဝေးမှာ မြန်မာနိုင်ငံရဲ့ အခြေအနေနဲ့ ပတ်သက်ပြီး သူက အကျယ်တဝင့် တင်ပြသွားပါတယ်။

    စစ်အာဏာသိမ်းပြီးတဲ့နောက် ကလေးတွေအပေါ်ကို ကျူးလွန်ခဲ့တဲ အကြမ်းဖက်မှုအတွက် မြန်မာ စစ်တပ်က တာဝန်ရှိတယ်လို့ လည်း မြန်မာနိုင်ငံဆိုင်ရာ လူ့အခွင့်အရေး အထူးကိုယ်စားလှယ် သောမတ်စ် အင်ဒရူးကဆိုပါတယ်။ ကလေးတွေဟာ ထိုးကြိတ်၊ ရိုက်နှက် နှိပ်စက်ခံနေရပြီး တချို့ဆိုရင် ဆေးလိပ်မီးနဲ့ ထိုးခံရတာ၊ သွားတွေ လက်သည်းခွံတွေ အချွတ်ခံရတာတွေ ရှိတယ်လို့လည်း သူကပြောပါတယ်။

    ဒါ့အပြင် လိင်ပိုင်းဆိုင်ရာ တိုက်ခိုက်ခံရတာတွေ အသတ်ခံရမယ်ဆိုပြီး လှောင်ပြောင်ခံရတာတွေ ရှိတယ်လို့လည်း ဆိုပါတယ်။ ၂၀၂၂ ခုနှစ်အတွက် ကုလသမဂ္ဂရဲ့ လူသားချင်း စာနာမှုဆိုင်ရာ အကူအညီပေးရေး အစီအစဥ်က မြန်မာနိုင်ငံအတွက် ၁၀.၅ ရာခိုင်နှုန်းပဲ ရန်ပုံငွေရသေးတာကြောင့် တချို့ အကူအညီပေးရေး အစီအစဥ်တွေကို ရပ်ဆိုင်းရဖွယ်လည်း ရှိတယ်လို့လည်း ဆိုပါတယ်။ ဒါ့အပြင်ပုံမှန်ကာကွယ်ဆေးမထိုးရတာကြောင့် ကလေး ၃၃,၀၀၀ ကလည်း ကာကွယ်လို့ရပေမဲ့ အသက်အန္တရာယ် စိုးရိမ်ရတယ်လို့ ဆိုပါတယ်။ ကလေး ၅ သန်းနီးပါးလည်း အရေးပေါ် အကူအညီလိုအပ်နေတယ်လို့ သူကပြောပါတယ်။

    ကုလသမဂ္ဂ လူ့အခွင့်အရေး ကောင်စီ အစည်းအဝေးမှာ မြန်မာနိုင်ငံဆိုင်ရာ လူ့အခွင့်အရေး အထူးကိုယ်စားလှယ် သောမတ်စ် အင်ဒရူး ပြောကြားချက်တွေနဲ့ပတ်သက်ပြီး လှိုက်လှိုက်လှဲလှဲ ကြိုဆိုကြောင်းနဲ့မြန်မာနိုင်ငံက ကလေးသူငယ်တွေကို အကာအကွယ်ပေးဖို့ နိုင်ငံတကာအသိုင်းအဝိုင်းက အမြန်ဆုံးအရေးယူဆောင်ရွက်ပေးဖို့တိုက်တွန်းကြောင်းကိုလည်း အမျိုးသားညီညွတ်ရေးအစိုးရ NUG ရဲ့ လူ့အခွင့်အရေးဆိုင်ရာ ဝန်ကြီးဌာနက မနေ့ဇွန်လ ၃၀ က တိုက်တွန်းထုတ်ပြန်ထားပါတယ်။

15. ၁ ဇူလိုင် ၂၀၂၂ဥကရိထတိုက်ပွဲ- ၆ ရက်မြောက်နေ့အထိ တိုက်ပွဲတွေ ဆက်ပြင်းထန်နေပြီး အရပ်သားတချို့ ပိတ်မိနေ

    ကရင်အမျိုးသားလွတ်မြောက်ရေးတပ် KNLA /KNDO ပူးပေါင်း အဖွဲ့ တွေနဲ့ စစ်ကောင်စီတပ်တို့ တိုက်ပွဲတွေ ဖြစ်ပွားနေတဲ့ ဥကရိထ စခန်းသိမ်းတိုက်ပွဲဟာ ၆ ရက် ကြာတဲ့နေ့အထိ တိုက်ပွဲ ပြင်းထန်နေဆဲ အခြေ အနေမှာ ရှိနေပါတယ်။

    ဝေါလဒေသတိုက်ပွဲ နယ်မြေ အတွင်းမှာရှိတဲ့ နိပွန်ဖောင်ဒေးရှင်းက တည်ဆောက်ပေးထားတဲ့ ဂျပန်အိမ်ရာနဲ့ ဝေါလေဒေသကရပ်ကွက်တွေအတွင်း ဒေသခံတွေကို စစ်ဘေးရှောင်ခွင့် မပေးဘဲ ရပ်ကွက် ၊လမ်းမထိပ်တွေမှာ စစ်ကောင်စီ တပ်တွေက ပိတ်ဆို့ နေရာယူ ထားပြီး လေကြောင်းတိုက်ခိုက်မှုနဲ့ မြေပြင်ကနေ လက်နက်ကြီး ပစ်ခတ်မှုတွေ ပြုလုပ်နေတယ်လို့ ဒေသခံတွေက ပြောပါတယ်။

    အဲဒီလို စစ်တပ်က ပိတ်ဆို့ထားပြီး ပစ်ခတ်တာတွေပြုလုပ်နေသလို နှစ်ဖက်တိုက်ပွဲတွေကြား ဒီကနေ့ ဇူလိုင် ၁ ရက် မနက်အထိ ဒေသခံတွေ ရပ်ရွာတွေအတွင်း နှစ်ရာကျော်လောက် ပိတ်မိနေတယ်လို့ ထွက်ပြေးလွတ်မြောက်လာတဲ့ စစ်ရှောင်တွေက ပြောပါတယ်။

    "တိုက်ပွဲ စဖြစ်ခဲ့တဲ့ ဇွန် ၂၆ ရက် နေ့လယ်ပိုင်းတည်းကစပြီး ကျွန်မတို့ စစ်ဘေးရှောင်ဖို့ လုပ် တာမှာ စစ်ကောင်စီ တပ်တွေ က ရပ်ကွက် ထဲ က မထွက် လာဖို့ တားထားတယ်၊ သူတို့က ရပ်ကွက်ထိပ် လမ်းမ ထိပ်တွေ မှာ လူနေအိမ် တွေ ကို အကာအကွယ် လုပ်ပြီး ကရင် အဖွဲ့ တွေ နဲ့ ပစ်ခတ်တာတွေ လုပ်နေတယ်၊ ရဟတ်ယာဉ် တွေ က ဝေါလေ စစ်ဗျူဟာကို စစ်ကူတွေ လက်နက်တွေ၊ ရိက္ခာတွေ လာချ တာ ဇွန် ၃၀ ရက် မနက်တစ်ပိုင်းလုံးပါပဲ။ အခု ဒီမနက် လည်း မိုးလင်းကတည်းက ပစ်နေတယ်။ လေယာဉ် ရော လက်နက်ကြီး တွေ ရော ပစ်နေတဲ့ ကြားကပဲ ကျွန်မတို့ ဝေါလေချောင်းဘေးကို ခက်ခက်ခဲခဲ ပြေးခဲ့ ရတယ်။ ဂျပန်အိမ်ရာ ၄၅ လုံးတန်းမှာ မိသားစု ၃၀ လောက် ပိတ်မိနေတယ်။ တပ်ပေါင်းစုကုန်း၊ ရပ်ကွက် ၁၊ ၂ ဘက်တွေ မှာ လူတွေ နှစ်ရာ နီး ပါး လောက် ကျန်နေသေးတယ်" လို့ ဝေါလေ ရပ်ကွက်ဒေသခံအမျိုးသမီးတစ်ဦးက ပြောပါတယ်။

    လက်ရှိ အချိန်ထိ လေးကေ့ကော် -သေ့ဘောဘိုး -ဝေါလေ လမ်းပိုင်းမှာ စစ်ကောင်စီ စစ်ကူတပ်တွေနဲ့ KNLA/KNDO ပူးပေါင်းတပ်တွေ နှစ်ဖက် စစ်ကြောင်း ဖြန့်ကျက် တိုက်ခိုက် မှု အပြင်းအထန် ဖြစ်ပွားနေပြီး ဇွန်လ ၃၀ ရက် မနေ့ မနက်ပိုင်းက ဥကရိထ စစ်စခန်းကို စစ်ကူလာတဲ့ စစ်ကောင်စီ တပ်မ ၄၄ လက်အောက်ခံ ကွန်မန်ဒို စစ်ကြောင်းကို KNLA ပူးပေါင်းတပ်မှ ကြားဖြတ်တိုက်ခိုက်ခဲ့တယ်လို့ ဆိုပါတယ်။

    အဲဒီတိုက်ပွဲအတွင်း KNLA ပူးပေါင်း တပ်ဖွဲ့ ဘက်မှ စစ်ကောင်စီစစ်ကူတပ်ရဲ့ လက်နက်ခဲယမ်းတွေ၊ ဒရုန်း ပစ် လက်နက်တွေနဲ့ လက်နက်ကြီး ၊ လက်နက်ငယ် တချို့ သိမ်းပိုက် ရရှိခဲ့ ပြီး နောက် ဝေါလေ ချောင်းကမ်းအနီး ထိုင်းနိုင်ငံ ဘက်ကိုထွက်ပြေးသွားတဲ့ စစ်ကောင်စီ တပ်ဖွဲ့၀င်တွေကို အရှင် ဖမ်းဆီး ရမိ ထားကြောင်း KNLA ပူးပေါင်းတပ်တွေ လွှင့်တင်ထားတဲ့ ရုပ်သံ အထောက်အထားများအရ သိရပါတယ်။

    ဇွန် ၂၉ ရက်နဲ့ ၃၀ ရက် နှစ်ရက်အတွင်း လေးကေ့ကော် ၊ရသေ့ဂူ၊ ရေတံခွန်တောင်ကုန်းတွေဘက်ကို လက်ခတ်တောင် ၊ လေးကေကော်အမြှောက်ကုန်း၊ မေတ္တာလင်းမြိုင် ရွှေညောင်ပင်ကုန်း စတဲ့ စစ်ကောင်စီတပ်စခန်းတွေဘ်ကနေလက်နက်ကြီးတွေနဲ့ပစ်ကူခဲ့ပြီး နှစ်ရက်တိုက်ပွဲအတွင်း စစ်ကောင်စီ ဘက်မှ နှစ်ဦးသေဆုံး၊ ၇ ဦးဒဏ်ရာရရှိခဲ့သလို KNLAပူးပေါင်းတပ်တွေဘက်ကလည်း စစ်သည်တစ်ဦးသေဆုံး၊ နှစ်ဦး ဒဏ်ရာရရှိကြောင်း ကော်ဘရာ စစ်ကြောင်းက ဇူလိုင် ၁ ရက် ဒီမနက်မှာ သတင်းထုတ်ပြန်လာပါတယ်။ စစ်ကောင်စီတပ်ဘက်ကတော့ ဥကရိထ တိုက်ပွဲနဲ့ပတ်သက်လို့အသေးစိတ်ထုတ်ပြန်လာတာမရှိသေးပါဘူး။

16. ၃၀ ဇွန် ၂၀၂၂ချင်းပြည်နယ်မှာ တိုက်ပွဲတွေ ပြင်းထန်လာ

17. ၃၀ ဇွန် ၂၀၂၂ဧရာဝတီသတင်းဌာန ဓာတ်ပုံသတင်းထောက်ဟောင်း ကိုဇော်ဇော်ကို စွဲချက်တင် အမိန့်ချ

    ဧရာဝတီသတင်းဌာနဓာတ်ပုံသတင်းထောက်ဟောင်းကိုဇော်ဇော်ကိုစစ်အာဏာသိမ်းသပိတ်စစ်ကြောင်းမှာပါဝင်မှု၊ဆန္ဒပြဓာတ်ပုံတွေပေးပို့မှုနဲ့ဇွန်၂၉ ရက်နေ့မှာ မန္တလေးအိုးဘိုအကျဥ်းထောင် အထူးတရားရုံးက စွဲချက်တင်အမိန့်ချခဲ့တယ်လို့တရားရုံးအသိုင်းဝိုင်းကပြောပါတယ်။

    ကိုဇော်ဇော်ကိုပုဒ်မ၅၀၅-ကနဲ့ စွဲဆိုခံထားရပြီးနောက်အပတ်အမှုရုံးချိန်းအတွက်ဇူလိုင်၆ရက်နေ့ချိန်းဆိုထားပါတယ်။အဲ့ဒီနေ့မှာအမှုအတွက်ကိုဇော်ဇော်ကိုစတင်စစ်ဆေးမှာ ဖြစ်ပါတယ်။

    ကိုဇော်ဇော်ဟာစွဲချက်တင်အမိန့်မချခင်ထောင်တွင်းတရားရုံးရင်ဆိုင်ချိန်မှာကျန်းမာရေးနဲ့ပက်သက်ပြီးနေထိုင်မှုအခက်ခဲတွေနဲ့ကြုံရပါတယ်။ဝမ်းသွားနေလို့ပုဆိုးဝတ်ဖို့အခက်ခဲရှိတာကြောင့်လက်ထိပ်ခဏဖြုတ်ပေးဖို့ပြောတာမရရှိခဲ့ဘူးလို့ထောင်နဲ့နီးစပ်သူတွေကတဆင့်သိရပါတယ်။ဒါပေမဲ့အခြားတရားရင်ဆိုင်နေရဆဲအကျဉ်းသားတချို့တရားခွင်မှာခဏတဖြုတ်လက်ထိတ်ဖြုတ်ခွင့်ရသလိုသက်သေမပါသူတွေပါတွေ့ခွင့်ရတာတွေရှိတယ်လို့လည်းထောင်နဲ့နီးစပ်သူတွေကပြောပါတယ်။

18. ၃၀ ဇွန် ၂၀၂၂စစ်ကောင်စီ ဥက္ကဋ္ဌနဲ့ အာဆီယံအထူးသံတွေ့

    စစ်ကောင်စီ ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နဲ့ အာဆီယံ အထူးသံတမန် ကမ္ဘောဒီးယားနိုင်ငံခြားရေးဝန်ကြီး ပရာ့ဆော့ခွန်းတို့ ဒီကနေ့ နေပြည်တော်မှာ တွေ့ဆုံခဲ့တယ်လို့ စစ်ကောင်စီဘက်က သတင်းထုတ်ပြန်ပါတယ်။

    အာဆီယံသံတမန်နဲ့ တွေ့ဆုံစဥ်မှာ အာဆီယံ ဘုံသဘောတူညီချက် ၅ ချက် ဆောင်ရွက်နေတဲ့ကိစ္စ၊ မြန်မာနိုင်ငံတွင်းက ပဋိပက္ခတွေ၊ တိုင်းရင်းသားလက်နက်ကိုင်တွေနဲ့ ငြိမ်းချမ်းရေးဆွေးနွေးမှုနဲ့ မြန်မာနိုင်ငံအတွက် လူသားချင်းစာနာမှု ထောက်ထားမှုဆိုင်ရာ အကူအညီတွေ ရရှိရေးဆောင်ရွက်မှု စတာတွေကို ဆွေးနွေးခဲ့တယ်လို့ဆိုပါတယ်။

    ဒီဆွေးနွေးပွဲမှာ အာဆီယံ ဘုံသဘောတူညီချက် ၅ ချက် အကောင်အထည်ဖော်ဆောင်ရွက်မှုတွေ တိုးတက်မှု ရှိနေတာတွေကို ဆွေးနွေးခဲ့တယ်လို့ စစ်ကောင်စီဘက်က ပြောပေမဲ့ အာဏာသိမ်းပြီးနောက် အာဆီယံ ဥက္ကဋ္ဌ အလှည့်ကျ နိုင်ငံတွေက မြန်မာ့နိုင်ငံရေး အကျပ်အတည်းကို ဦးဆောင်ဖြေရှင်းနေရာမှာ အာဆီယံနိုင်ငံတွေ သဘောတူထားကြတဲ့ ဘုံသဘောတူညီချက် ၅ ရပ် တိုးတက်မှုတွေ မရှိဘူးဆိုပြီး စစ်ကောင်စီကို အာဆီယံနိုင်ငံတချို့အပါအ၀င် နိုင်ငံတကာက ပြင်းပြင်းထန်ထန် ဝေဖန်မှုတွေ ရှိနေပါတယ်။

    ဒီတစ်ခေါက်မှာတော့ အာဆီယံအထူးသံတမန်မှာ အပစ်ရပ်လက်မှတ်ထိုးထားတဲ့ တိုင်းရင်းသားလက်နက်ကိုင်အဖွဲ့တချို့နဲ့ တွေ့ဆုံဖို့ ရှိနေပေမဲ့ အာဆီယံ ကိုယ်စားလှယ် တောင်းဆိုထားတဲ့ ကိစ္စတချို့ကိုတော့ စစ်ကောင်စီက လိုက်လျောထားတာ မရှိပါဘူး။

19. ၃၀ ဇွန် ၂၀၂၂ရှေ့နေသုံးဦး မန္တလေးမှာ ထပ်အဖမ်းခံရ

    နိုင်ငံရေးအမှုတွေလိုက်တဲ့ရှေ့နေသုံးယောက်ဟာမနေ့(ဇွန်၂၉)ရက်ညနေပိုင်းမှာမန္တလေးအိုးဘိုအကျဉ်းထောင်အမှုလိုက်အပြန်မှာဖမ်းဆီးခံရတယ်လို့တရားရုံးအသိုင်းဝိုင်းကပြောပါတယ်။

    ရှေ့နေဦးတင်ဝင်းအောင်၊ရှေ့နေဦးသုတနဲ့အမျိုးသမီးရှေ့နေတစ်ဦးတို့ပုဒ်မ၅၀၅အမှုတွေကိုလိုက်ပါဆောင်ရွက်သူတွေလို့သိရပါတယ်။

    သူတို့ကို စစ်ကောင်စီအဖွဲ့တွေကဖမ်းဆီးခေါ်ဆောင်သွားချိန်ကစပြီးလက်ရှိအချိန်ထိမိသားစုနဲ့အဆက်သွယ်မရသလိုဘာကြောင့်ဖမ်းဆီးခေါ်ဆောင်သွားတယ်ဆိုတာမသိရသေးဘူးလို့ဆိုပါတယ်။

    မန္တလေးတိုင်းမှာတရားလွှတ်တော်ရှေ့နေတွေနဲ့၅၀၅အမှုတွေလိုက်ပါဆောင်ရွက်နေတဲ့ရှေ့နေတွေအနည်းဆုံး၈ယောက်ကိုစစ်ကောင်စီကဖမ်းဆီးထားပြီးတချို့ကိုအကြမ်းဖက်မှုတိုက်ဖျက်ရေးဥပဒေနဲ့တရားစွဲဆိုခံထားရတယ်လို့တရားရုံးအသိုင်းအဝိုင်းကနေသိရပါတယ်။

20. ၃၀ ဇွန် ၂၀၂၂ဥကရိထစခန်းသိမ်းတိုက်ပွဲ-ထိုင်းလေပိုင်နက်ထဲ စစ်ကောင်စီလေယာဥ်ဖြတ်ပျံလို့ ထိုင်းစစ်တပ် တိုက်လေယာဥ် ပျံတက်ခဲ့ရ

    မြန်မာ-ထိုင်းနယ်စပ်မှာ စစ်ကောင်စီတပ်ရဲ့ တိုက်လေယာဥ်တစ်စင်းဟာ ထိုင်းလေပိုင်နက်ထဲအထိ ဝင်ရောက် ပျံသန်းခဲ့တာကြောင့် ထိုင်းစစ်တပ်က တိုက်လေယာဥ် တစ်စင်းဟာ လုံခြုံရေးအတွက် ရုတ်တရက် ပျံတက် ခဲ့ရတယ်လို့ သိရပါတယ်။

    ကရင်ပြည်နယ်၊ မြဝတီမြို့တောင်ဘက် ဝေါလေဒေသထဲက စစ်ကောင်စီရဲ့ ဥကရိထ စစ်အခြေစိုက်စခန်းကို KNLA/KNDO ပူးပေါင်းတပ်ဖွဲ့တွေက သိမ်းပိုက်ဖို့ကြိုးစားတဲ့ တိုက်ပွဲပြင်းထန်ချိန် စစ်ကောင်စီက တိုက်လေယာဥ်သုံးတိုက်ခိုက်မှုတွေ လုပ်နေတာဖြစ်ပါတယ်။

    အဲဒီလိုတိုက်ခိုက်ချိန် စစ်ကောင်စီရဲ့တိုက်လေယာဥ်တစ်စင်းဟာ ထိုင်းနိုင်ငံ၊ တက်ခရိုင်ထဲက ဖော့ဖရာမြို့နယ် လေပိုင်နက်ထဲ ဝင်ရောက် ဖြတ်ပျံခဲ့တာဖြစ်ပါတယ်။

    ဒီအခြေအနေကြောင့် အဲဒီလေပိုင်နက်ကို ကင်းလှည့်ဖို့ ထိုင်းလေတပ်က F 16 အမျိုးအစားလေယာဥ်တစ်စင်း ပျံတက်ခဲ့သလို ဒီကိစ္စနဲ့ပတ်သက်ပြီး ထိုင်းစစ်သံမှူးကို မြန်မာဘက်နဲ့ စကားပြောဖို့ တာဝန်ပေး ထားလိုက်ပြီလို့ ထိုင်းစစ်တပ်ဘက် ပြောပါတယ်။

    တစ်ဖက်မှာလည်း အဲဒီလေယာဥ် ပျံသန်းမှု လမ်းကြောင်းအောက်က ကျေးရွာ ဒေသခံတွေဟာ လုံခြုံရာ ခိုဝင်ပုန်းအောင်းခဲ့ရတယ်လို့ သိရပါတယ်။

    ဒါ့ပြင် လေယာဥ်ပျံသန်းမှုအောက်မှာရှိခဲ့တဲ့ မြေပြင်က ထိုင်းမူလတန်းကျောင်းတစ်ကျောင်းဟာလည်း အရေးပေါ်အခြေအနေကြေညာပြီး သက်ဆိုင်ရာမိဘတွေကို ကလေးတွေကို လာခေါ်ဖို့ ကြေညာခဲ့ရသလို ကျောင်းကိုလည်း ပိတ်ထားတယ်လို့ သိရပါတယ်။

    ဝေါလေဒေသထဲ ဥကရိထစစ်စခန်းကို သိမ်းဖို့ ကြိုးစားနေတဲ့ KNLA/KNDO တပ်ဖွဲ့တွေနဲ့ စစ်ကောင်စီတပ် တို့ တိုက်ပွဲဖြစ်နေတာ ၅ ရက်ထဲဝင်လာပြီဖြစ်ပြီး စစ်ကောင်စီဘက်က တိုက်လေယာဥ်သုံး တိုက်ခိုက်နေတာ ဖြစ်ပါတယ်။