စစ်ကောင်စီတပ်လေကြောင်းတိုက်ခိုက်မှုမှာ တပ်ဖွဲ့ဝင် ၆ ဦးကျဆုံးတယ်လို့ အေအေပြော

တိုက်ရိုက် ထုတ်လွှင့်ချက်

1. ၃၀ ဇွန် ၂၀၂၂မင်းတပ်မြို့တိုက်ပွဲမှာ CDF ရဲဘော်သုံးယောက်၊ စစ်‌ကောင်စီဘက်က လေးယောက်၊ အရပ်သားတစ်ယောက် သေဆုံး

   ချင်းပြည်နယ် တောင်ပိုင်း မင်းတပ်မြို့နယ်ထဲမှာ မနေ့ဇွန် ၂၉ ရက်က ဖြစ်ခဲ့တဲ့ တိုက်ပွဲမှာ CDF ရဲဘော်သုံးယောက်၊ စစ်ကောင်စီဘက်က လေးယောက်သေဆုံးပြီး အရပ်သားတစ်ယောက် လက်နက်ကြီးထိမှန် သေဆုံးတယ်လို့ မင်းတပ် CDF ကနေ သိရပါတယ်။

   CDF ရဲဘော်တစ်ယောက်က တိုက်ပွဲအတွင်းမှာ လက်နက်ကြီးထိမှန် သေဆုံးတာဖြစ်ပြီး နှစ်ယောက်က တိုက်ပွဲပြီးချိန်မှာ ပျောက်သွားခဲ့တဲ့အကြောင်း၊ ဒီနေ့ ဇွန် ၃၀ မှာတော့ စစ်ကောင်စီက သတ်သွားတဲ့ အဲ့ဒီရဲဘော်နှစ်ယောက်ရဲ့ အလောင်းကို ပြန်ရှာတွေ့ခဲ့တာလို့ မင်းတပ်ကာကွယ်ရေးအဖွဲ့က ပြောရေးဆိုခွင့်ရှိသူက ပြောပါတယ်။

   “ကျနော်တို့ မနေ့က ပျောက်သွားတဲ့ရဲဘော်တွေကို လိုက်ရှာတယ်ပေါ့နော်။ လူခွဲပြီးရှာတော့ နေ့လယ် ၁၂ ခွဲလောက်မှာတွေ့တယ်။ ဖမ်းဆီးပြီးမှ အသတ်ခံရတဲ့ပုံစံမျိုး။ ဒီနေ့တော့ စစ်တပ်က ဆုတ်သွားတယ်''လို့ ပြောပါတယ်။

   တိုက်ပွဲအတွင်း အရပ်သားကလေးငယ်တစ်ဦးလည်း လက်နက်ကြီးထိမှန်သေဆုံးခဲ့ပါတယ်။ဇွန်လ ၂၉ ရက် ည ၁၀ နာရီခွဲခန့်ကလည်း မင်းတပ်မြို့နယ်မှာ စစ်ကောင်စီတပ်သား အချင်းချင်းပစ်ခတ်မှု ဖြစ်ပွားခဲ့လို့ သုံးဦးသေဆုံးပြီး ဒဏ်ရာရသူများလည်းရှိကြောင်း ချင်းကာကွယ်ရေးတပ်-မင်းတပ်(CDF)က သတင်းထုတ်ပြန်ထားပါတယ်။

   ဒီလို ချင်းပြည်နယ်တောင်ပိုင်းမှာ အခုလို တိုက်ပွဲတွေဖြစ်နေသလို မြောက်ပိုင်းမှာလည်း စစ်ကောင်စီဘက်က တပ်တွေတိုးချဲ့နေတယ်လို့ ကာကွယ်ရေးတပ်တွေဆီကနေ သိရပါတယ်။

   စစ်ကောင်စီတပ်တွေဟာ မကွေးတိုင်း ထီးလင်းမြို့နယ်ကနေ ချင်းပြည်နယ် မင်းတပ်မြို့၊ မြောက်ပိုင်းမှာလည်း စစ်ကိုင်းတိုင်းကလေးမြို့နယ်ကနေ တီးတိန် မြို့တွေဘက်ကို စစ်ကြောင်းထိုး သွားလာတာတွေ ရှိနေတာ‌ကြောင့် ချင်းပြည်နယ်မှာ တိုက်ပွဲတွေဖြစ်နိုင်တယ်လို့ သုံးသပ်နေကြပါတယ်။

   မင်းတပ်မြို့နယ်ထဲက စစ်ရေး‌ခြေအနေနဲ့ ပတ်သက်ပြီးတေ့ စစ်ကောင်စီဘက်က သတင်းထုတ်ပြန်တာမရှိသေးပါဘူး။

2. ၃၀ ဇွန် ၂၀၂၂တရုတ်က မြန်မာကို ကူညီတဲ့ ကိုဗစ်ကာကွယ်ရေး ၂ သန်းကို အာဆီယံ အထူးသံ လက်ခံ

   မြန်မာနိုင်ငံကို အလုပ်သဘောခရီးစဥ်ရောက်နေတဲ့ အာဆီယံအထူးသံတမန် ကမ္ဘောဒီးယားနိုင်ငံခြားရေး ဝန်ကြီး ပရက်ဆော့ခွန်းဟာ ထိုင်းနိုင်ငံက မြန်မာကို လူသားချင်းစာနာမှုအဖြစ်ကူညီတဲ့ ကိုဗစ်ကာကွယ်ဆေး ၂ သန်းကို ဒီနေ့ ဇွန်လ ၃၀ ရက်မှာ လက်ခံခဲ့တယ်လို့သိရပါတယ်။

   မြန်မာနိုင်ငံကို လူသားချင်းစာနာမှု အကူအညီပေးရေးအစီအစဥ် တစ်စိတ်တစ်ပိုင်းအနေနဲ့ ပေးတဲ့ဒီအစဥ်ကို ရန်ကုန်မြို့မှာရှိတဲ့ တရုတ်သံအမတ်ကြီးနေအိမ်မှာ ပြုလုပ်ခဲ့တာဖြစ်ပါတယ်။

   ‘’လူသားချင်းစာနာမှု အကူအညီပေးတဲ့နေရာမှာ အရောင်အသွေးမပါသင့်ပါဘူး။ မြန်မာ့အရေးမှာ ပြင်ပက ပါဝင်သင့် ပါဝင်ထိုက်သူတွေအားလုံးဟာ နိုင်ငံရေး မတူကွဲပြားချက်တွေကို ဘေးဖယ်ထားပြီး လူသားချင်းစာနာမှု ခေါင်းစဥ်အောက်ကနေ မြေပြင်အခြေအနေတိုးတက်အောင် လုပ်သင့်ပါတယ်။ မြန်မာပြည်ရဲ့ ဘယ်နေရာမဆို အရေးပါပါပါတယ်။ ဒီ့ထက်ပိုအရေးကြီးတာက ပထမဆုံး ခြေလှမ်း စတင်ဖို့ ဖြစ်ပါတယ်’’ လို့ အထူးသံတမန်က ကာကွယ်ဆေးလက်ခံပွဲမှာ ပြောထားပါတယ်။

   အဲဒီကာကွယ်ဆေးတွေကို သွားလာရေးခက်ခဲပြီး လက်လှမ်းမီတဲ့ဒေသတွေမှာ ထိုးနှံပေးသွားမှာ ဖြစ်ပြီး ပြီးခဲ့တဲ့မေလတုန်းက ဖနွမ်ပင်မြို့မှာ ပြုလုပ်ခဲ့တဲ့ မြန်မာကို စာနာမှုအကူအညီပေးရေးတိုင်ပင်မှု အစည်း အဝေးမှာရခဲ့တဲ့ရှေ့ဆောင်အစီအစဥ် တစ်စိတ်တစ်ပိုင်းလည်းဖြစ်ပါတယ်။

   လက်ရှိမှာ ကမ္ဘောဒီးယားနိုင်ငံဟာ အာဆီယံအဖွဲ့ကြီးရဲ့ အလှည့်ကျဥက္ကဋ္ဌတာဝန်ယူထားတာြဖစ်ပြီး ကမ္ဘောဒီးယားနိုင်ငံခြားရေးဝန်ကြီးလည်းဖြစ်၊ ဒုတိယဝန်ကြီးချုပ်လည်းဖြစ်တဲ့ မစ္စတာ ပရက်ဆော့ခွန်းဟာ မြန်မာ့အရေး အာဆီယံ အထူးသံတမန်အဖြစ်တာဝန်ယူထားတာဖြစ်ပါတယ်။

   မစ္စတာ ပရက်ဆော့ခွန်းဟာ မြန်မာ့အရေးအတွက်ဆိုပြီး မြန်မာကို ၅ ရက်ကြာခရီးစဥ်အဖြစ် ဒုတိယအကြိမ် ‌ရောက်နေတာဖြစ်ပြီး စစ်ကောင်စီအပြင် တစ်နိုင်ငံလုံးအပစ်ရပ်လက်မှတ်ထိုးမှာ ပါဝင်ထားတဲ့ တိုင်းရင်းသား လက်နက်ကိုင် အဖွဲ့ ၁၀ ဖွဲ့ထဲက ၇ ဖွဲ့နဲ့တွေ့ဆုံဖို့ရှိနေပါတယ်။

3. ၃၀ ဇွန် ၂၀၂၂ဆီထွက်သီးနှံအပါဝင် လယ်ယာထွက်ကုန်တွေကို လိုင်စင်ကြေးတိုးမြှင့်မယ်

   ပြောင်း၊ ပဲ ၊ နှမ်းအပါအ၀င် ဆီထွက်သီးနှံ နဲ့ မြန်မာ့လယ်ယာထွက်ကုန်ပစ္စည်းတွေကို ထိုင်းမြန်မာနယ်စပ်ကနေ တင်ပို့တဲ့အခါ အရင်က တစ်တန်ကို လိုင်စင်ကြေး ဒေါ်လာ ၃၁၀ ကောက်ခံခဲ့တာကနေ ဇူလိုင် ၁ ရက် မနက်ဖြန်ကစပြီး တစ်တန်ကို ဒေါ်လာ ၃၆၀ ထိ ကူးသန်းရောင်း၀ယ်ရေး၀န်ကြီးဌာနက တိုးမြှင့်သတ်မှတ်လိုက်ပါတယ်။

   “ဒါက ပြည်တွင်းပေါက်စျေးနဲ့ အိတ်စပို့ပေါက်စျေး အတွက် ချိန်ဆပြီး ဖြစ်သင့်တဲ့ စျေးနှုန်းကိုပြောင်းလဲ သတ်မှတ်တာပါ” လို့ စီးပွားကူးသန်း၀န်ကြီးဌာန ညွှန်ကြားရေးမှူးချုပ် ဦးမင်းမင်းက ပြောပါတယ်။

   ထိုင်းဘက်ကို မြန်မာကုန်သည်တွေက တင်ပို့သမျှ ကုန်ပစ္စည်းအားလုံးအပေါ် ၂ ရာခိုင်နှုန်း အခွန်ပေးဆောင်ရတာတွေရှိထားပါတယ်။ ဒါကြောင့် အခုလို လိုင်စင်ကြေးထပ်မံတိုးမြှင့်လိုက်တဲ့အခါ အခွန်နဲ့ပါပေါင်းလိုက်ရင် ပေးရတဲ့အခွန်အခတွေ ပိုပြီးမြင့်တက်သွားမှာဖြစ်တယ်လို့ ထိုင်းမြန်မာနယ်စပ် ကုန်သည်တစ်ဦးကပြောပါတယ်။

   ဒါ့အပြင် စစ်ကောင်စီက နယ်စပ်ကုန်သွယ်ရေးမှာ သက်ဆိုင်ရာ နယ်စပ်တွေ အလိုက် အရင်က ဘတ်ငွေ ၊ ယွမ်ငွေ စသဖြင့် သတ်မှတ်ငွေ ပေးချေလို့ ရပေမယ့် အခုတော့ အမေရိကန်ဒေါ်လာနဲ့ပဲ ငွေပေးချေဖို့ သတ်မှတ်လိုက်တာကြောင့် အခက်အခဲတွေ ပိုရှိလာတယ်လို့ ကုန်သည်တွေက ပြောပါတယ်။

   ပြီးခဲ့တဲ့ ဧပြီလဆန်းပိုင်းတည်းက အမေရိကန်ငွေလဲနှုန်းကိုတစ်ဒေါ်လာ ကျပ် ၁၈၅၀ သတ်မှတ်လိုက်တဲ့နောက်ပိုင်း နယ်စပ်ကုန်သွယ်ရေးမှာ ငွေကြေးစီးဆင်းမှုအပါအ၀င် အခက်အခဲမျိုးစုံ ကို ရင်ဆိုင်နေရတယ်လို့ မြ၀တီနယ်စပ်က ကုန်သည်တွေက ဆိုကြပါတယ်။

   ကုန်ပစ္စည်းတွေကို သတ်မှတ်ထားတဲ့နှုန်းနဲ့လဲလှယ်ရပေမဲ့ ကုန်သည်ဘက်ကပြန်လည်ထုတ်ယူရတဲ့အခါမှာတော့ စစ်ကောင်စီက သတ်မှတ်ထားတဲ့ ဗဟိုဘဏ်ဈေးနုန်းနဲ့သာ တွက်ချက်ထုတ်ယူလို့ရတာကြောင့် နစ်နာ ဆုံးရှုံးမှုတွေ ဖြစ်နေကြတာပါ။

   အခုဆို နယ်စပ်ကုန်သွယ်ရေးလုပ်ကိုင်တဲ့ ကုန်သည်တစ်ချို့လုပ်ငန်း ရပ်နားထားကြတယ်လို့လည်း သိရပါတယ်။

4. ၃၀ ဇွန် ၂၀၂၂မြန်မာဝမ်ပေါင်ကုမ္ပဏီအနေနဲ့ NUG နဲ့အတိအလင်းတွေ့ဆုံဆွေးနွေးပူးပေါင်းဖို့ ကြေးနီစီမံကိန်းဒေသခံတွေတောင်းဆို, ဝမ်ပေါင်ကုမ္ပဏီထုတ်ပြန်ချက်က လက်တွေ့နဲ့ကွဲလွဲနေတယ်လို့ ဒေသခံတွေပြော

   စစ်ကိုင်းတိုင်း၊ ဆားလင်းကြီးမြို့နယ်မှာ လက်ပံတောင်းတောင် ကြေးနီသတ္တုစီမံကိန်း အကောင်ထည်ဖော်နေတဲ့ မြန်မာဝမ်ပေါင်ကုမ္ပဏီရဲ့ထုတ်ပြန်ချက်တွေဟာ လက်တွေ့အခြေအနေတွေနဲ့ ကွဲလွဲနေတာကြောင့် နှစ်နိုင်ငံအကျိုးစီးပွား ရေရှည်ခိုင်မြဲချင်တယ်ဆိုရင် အမျိုးသားညီညွတ်ရေးအစိုးရ NUG နဲ့ အတိအလင်း ဆွေးနွေးပူးပေါင်းဖို့ ကြေးနီစီမံကိန်းဒေသခံတွေက ဒီနေ့ ဇွန် ၃၀ ရက်မှာတောင်းဆိုလိုက်ပါတယ်။

   ဝမ်ပေါင်ကုမ္ပဏီရဲ့ ထုတ်ပြန်ချက်ထဲမှာ တရုတ်လက်အောက်ခံ ကြေးနီစီမံကိန်းတွေထဲမှာ စစ်ကောင်စီတပ်တွေ ဝင်ထွက်သွားလာနေတာ၊ အကူအညီထောက်ပံ့ပေးတာတွေမရှိဘူးဆိုတဲ့ အချက်လက်ဟာ လက်တွေ့မှာ ကွဲလွဲနေတာဖြစ်တယ်လို့ ကြေးနီစီမံကိန်းဒေသခံတွေက ပြောပါတယ်။

   “ အာဏာစသိမ်းပြီး သိပ်မကြာဘူး စီမံကိန်းတွေထဲမှာ စကစတွေ တပ်စွဲနေတာပဲ။ သူတို့တွေက တရုတ်စီမံကိန်းတွေကို လုံခြုံရေးပေးထားတယ်။ အခု ရွာတွေကို ဝင်ပြီးမီးရှို့တာ၊ စစ်ကြောင်းထိုးတာတွေကလည်း အဲ့ဒီစီမံကိန်းတွေထဲမှာ တပ်စွဲထားတဲ တပ်တွေလည်းပါတယ်။” လို့ ံကျေးရွာ ဒေသခံတစ်ယောက်က ဘီဘီစီကို ပြောပါတယ်။

   လက်ပံတောင်းကြေးနီစီမံကိန်း စတင်ချိန်မှာ မိုးကြိုးပြင်ကျေးရွာက ဒေါ်ခင်ဝင်းဟာ စီမံကိန်းဆန့်ကျင်ဆန္ဒပြတဲ့သပိတ်ကို အင်အားသုံးဖြိုခွင်းခံရချိန်မှာ ဦခေါင်းကျည်ထိမှန်သေဆုံးခဲ့ရပါတယ်။

   အာဏာသိမ်းပြီးချိန်မှာတော့ မိုးကြိုးပြင်မြောက်ရွာက နှစ်ယောက်၊ အောင်ချမ်းစည်ကျေးရွာက တစ်ယောက်၊ တုံရွာသစ်ရွာက နှစ်ယောက်၊ ဖောင်းတကာကျေးရွာက သုံးယောက်၊ ဒုံးတောရွာက ဆယ့်တစ်ယောက်၊ ရွာသာကျေးရွာက နှစ်ယောက်၊ ဂုဏ်တောရွာက နှစ်ယောက် စုစုပေါင်း နှစ်ဆယ့်သုံးယောက် အသတ်ခံထားရတယ်လို့ ဆိုပါတယ်။

   ဒါ့အပြင် လက်ပံ‌တောင်းစီမံကိန်းဝန်းကျင်က ပြည်သူတွေကလည်း ထွက်ပြေးတိမ်းရှောင်နေရပြီး တုံတောကျောင်း၊ တုံရွာသစ်တို့လည်း မီးရှို့ခံထားရတဲ့ အချက်အလက်တွေကို ဝမ်ပေါင်ရဲ့ ထုတ်ပြန်ချက်မှာ ဖော်ပြထားတာ မတွေ့ရဘူးလို့လည်း ဒေသခံတွေက ပြောပါတယ်။

   ဝမ်ပေါင်ကုမ္ပဏီဟာ လက်ရှိပဋိပက္ခတွေမှာ ပါဝင်ပတ်သက်တာမရှိဘူးလို့ ထုတ်ပြန်ထားပေမဲ့ ဒီအချက်တွေဟာ စစ်ကောင်စီကို ပူးပေါင်းထောက်ပံ့နေတဲ့ တရုတ်ရင်းနှီးမြှုပ်နှံမှုလုပ်ငန်းတွေနဲ့ တရုတ်အစိုးရရဲ့ ပြည်သူတွေရဲ့သဘောထားမှာ ထင်ရှားနေတယ်လို့ ဆိုပါတယ်။

   ဝမ်ပေါင်ကုမ္ပဏီကအနေနဲ့ ရင်းနှီးမြှပ်နှံမှု အကျိုးစီးပွားတွေကို မထိခိုက်စေချင်ရင်၊ ဒေသခံတွေအပေါ် စစ်မှန်တဲ့ စိတ်စေတနာကောင်းရှိရင် စစ်ကောင်စီကို ထောက်ပံ့နေတာတွေရပ်ဆိုင်းပြီး ပြည်သူလူထုလိုလားတဲ့ အဖွဲ့အစည်းတွေနဲ့ပူးပေါင်းဆောင်ရွက်သင့်တယ်လို့ ဒေသခံတွေကတောင်းဆိုလိုက်တာ ဖြစ်ပါတယ်။

   လက်ပံတောင်းတောင် သတ္တုတွင်းစီမံကိန်းကို လက်နက်ကိုင်အဖွဲ့တွေက တိုက်ခိုက်နေတာဟာ ဝန်ထမ်းတွေရဲ့ လုံခြုံရေးကို အလေးမထားတာဖြစ်သလို စီမံကိန်းပတ်ဝန်းကျင်ကိုလည်း ထိခိုက်ပျက်စီးစေနိုင်တာကြောင့် ပြင်းပြင်းထန်ထန် ကန့်ကွက်တဲ့အကြောင်း၊ စီမံကိန်းအနေနဲ့ လတ်တလောက် ပဋိပက္ခဖြစ်စဉ်တွေမှာ ပါဝင်ပတ်သက်လိုခြင်း မရှိတာကြောင့် လက်နက်ကိုင်အဖွဲ့များအနေနဲ့ ဝန်ထမ်းတွေရဲ့ အသက်အန္တရာယ် ကင်းရှင်းခွင့်၊ လွတ်လပ်စွာရွေးချယ်ခွင့်ကို လေးစားပေးဖို့ မြန်မာဝမ်ပေါင်ကုမ္ပဏီက ထုတ်ပြန်ထားတာဖြစ်ပါတယ်။

5. ၃၀ ဇွန် ၂၀၂၂ဥကရိထ စခန်းသိမ်းတိုက်ပွဲ - ရွာ ၅ ရွာက ဒေသခံတွေ ထွက်ပြေးတိမ်းရှောင်နေရ

   ကရင်ပြည်နယ်၊ မြဝတီမြို့တောင်ဘက်၊ ဝေါလေဒေသ၊ ကရင်အမျိုးသားအစည်းအရုံး-ကေအဲန်ယူရဲ့ တပ်မဟာ ၆ နယ်မြေက စစ်ကောင်စီခြေကုတ်စခန်း ဥကရိထကို KNLA/KNDO ပူးပေါင်းတပ်တွေက သိမ်းပိုက်ဖို့ ကြိုးစားနေတဲ့တိုက်ပွဲမှာ ဥကရိထအပါအဝင် ရွာ ၅ ရွာက ဒေသခံတွေ ထွက်ပြေးတိမ်းရှောင်နေရ ပါတယ်။

   ဥကရိထစစ်စခန်းတိုက်ပွဲမှာ စစ်ကောင်စီကလေကြောင်းကနေဗုံးကြဲတာတွေကြောင့် ဥကရိထ၊ ရွှေအေးမြိုင်၊ ဝါးမီးထစတဲ့ကျေးရွာ ၅ ရွာကဒေသခံတွေဟာ မြန်မာ-ထိုင်းနယ်စပ်က ဝေါလေချောင်း၊ တောင်ယာကုန်းတွေနဲ့ထိုင်းနိုင်ငံဘက်ခြမ်းကို ထွက်ပြေးတိမ်းရှောင်နေကြရတယ်လို့ ဝေါလေချောင်းဘေး ပြောင်းစိုက်ခင်းတွေမှာ စစ်ဘေးရှောင်နေရသူတွေက ပြောပါတယ်။

   ‘’ဝေါလေက စစ်ကောင်စီဗျူဟာကုန်းက မြို့အလယ်မှာလို ဖြစ်နေတာ။ ရပ်ကွက် ၂ ခု က စစ်ဗျူဟာကုန်း ဘေးမှာပဲ။ သိပ်မဝေးတဲ့နေရာမှာက ရုံးတွေ၊ ဆေးရုံတွေ၊ထိုင်းနယ်စပ်နားမှာ ဝေါလေချောင်းရိုး တစ်လျှောက်မှာက လူနေရပ်ကွက်တွေရှိနေတော့ အကုန်ရှောင်ပြေးကြရတယ်။ အခုက လေယာဉ် လာပစ်လိုက်၊ ဗျူဟာကုန်းကို စစ်ကူနဲ့လက်နက်ခဲယမ်းတွေ လာချလိုက်၊ လူနာတွေ ပြန်သယ်သွားလိုက် လုပ်နေတယ်။ သူတို့ ဗုံးကြီးတွေ ကြဲချလိုက်ရင် မြေကြီးမှာနေရာ အများကြီး ထပေါက်ကုန်တာ ယမ်းငွေ့ တွေ အလုံးလိုက်ဖုံးသွားတယ်’’ လို့ ဒေသခံတစ်ဦးက ပြောပါတယ်။

   ဒါ့အပြင် ဒီနေ့မနက်မှာလည်း ဝေါလေမြို့အထွက်ကုန်းမှာ စစ်ကောင်စီ စစ်ကူစစ်ကြောင်းနဲ့ ကရင်ပူးပေါင်းအဖွဲ့တွေပစ်ခတ်မှုဖြစ်ချိန် ဝေါလေဗျူဟာကုန်းလက်နက်ကြီးတွေပစ်ခတ်တာကြောင့် ဝေါလေဘုန်းကြီး ကျောင်းကုန်းဘက်၊ မော်ကိုထိုင်းစစ်တပ်ဂိတ်ဘက်၊ ဝေါလေချောင်းဘေးပြောင်းစိုက်ခင်းတွေဘက်မှာ ဒေသခံ ၂ထောင်လောက် ရှောင်နေကြရပါတယ်။

   ဒေသခံတွေဟာ နေရပ်စွန်ခွာထွက်ပြေးခိုလှုံနေရတဲ့အတွက် စားသောက်စရာ၊ နေရာထိုင်ခင်းအခက်အခဲတွေ ကြုံတွေနေရတယ်လို့ သိရပါတယ်။

   ထိခိုက်ဒဏ်ရာရတဲ့ဒေသခံတွေကို ထိုင်းဘက်ခြမ်းမှာရှိတဲ့ဖုတ်ဖရမြို့လူမှုကူညီရေးအသင်းတွေက ကျန်းမာရေးစောင့်ရှောက်မှုပေးနေပြီး ဖုတ်ဖရဆေးရုံကို ပို့ဆောင်ကုသပေးနေတယ်လို့လည်း သိရပါတယ်။

6. ၃၀ ဇွန် ၂၀၂၂ဂျပန်ဘီယာ ကီရင်က သူ့ရှယ်ယာတွေကို မြန်မာစစ်တပ်နဲ့ဖက်စပ်လုပ်ကိုင်နေတဲ့လုပ်ငန်းဆီ ရောင်းချမယ်

   ဂျပန်ဘီယာလုပ်ငန်းဖြစ်တဲ့ ကီရင်ဟာ မြန်မာပြည်တွင်းမှာရှိနေတဲ့သူရဲ့လုပ်ငန်းရှယ်ယာတွေကို စစ်တပ်ပိုင် မြန်မာ့စီးပွားရေးဦးပိုင်လီမိတက်(MEHL) နဲ့အကျိုးတူပါဝင်နေတဲ့ကုမ္ပဏီ မြန်မာဘရူဝါရီ (MBL)ကိုရောင်းချတော့မယ်လို့ ဂျပန်သတင်းဌာန Nikkei Asia က ဒီနေ့ ဇွန်လ ၃၀ ရက်မှာ သတင်းဖော်ပြထားပါတယ်။

   ကီရင်ဟာ MBL ကုမ္ပဏီမှာပါဝင်တဲ့ သူ့ရှယ်ယာ ၅၁ ရာခိုင်နှုန်းကို ဒေါ်လာ ၁၆၃ သန်းနဲ့ရောင်းချမှာဖြစ်တယ်လို့ လည်းဆိုပါတယ်။

   ကီရင်ကုမ္ပဏီရဲ့ ရှယ်ယာတွေကို စစ်တပ်ပိုင် ဦးပိုင်(MEHL)ကို ရောင်းချမယ်ဆိုရင် ဖြစ်လာနိုင်မယ့် ဝေဖန်မှုတွေကို ရှောင်ရှားဖို့ MBL ကို ရှယ်ယာရောင်းချဖို့ စီစဥ်ခဲ့တာလို့ သတင်းမှာဖော်ပြပါတယ်။

   မြန်မာပြည်မှာ စစ်တပ်အာဏာသိမ်းတဲ့ ၂၀၂၁ ခုနှစ်၊ ဖေဖော်ဝါရီလ ကတည်းက MEHL နဲ့ စီးပွားရေးလုပ်ကိုင်တာကို ကီရင်က အဆုံးသတ်ဖို့ကြိုးစားခဲ့တာဖြစ်သလို မြန်မာနိုင်ငံကနေ လုပ်ငန်းငန်းထွက်ခွာမယ်လို့ ပထမဆုံးကြေညာခဲ့တဲ့ ဂျပန်ကုမဏီတစ်ခုလည်းဖြစ်ပါတယ်။

   ရှယ်ယာတွေကို ဇွန်လကုန်မှာ ရောင်းချဖို့ စီစဥ်ခဲ့တာဖြစ်ပြီး ဥရောပနဲ့ အမေရိကန်ကုမ္ပဏီတွေလို ပြင်ပ ရှယ်ယာရှင်တွေကို ရောင်းချဖို့ ကြိုးစားခဲ့ပေမဲ့ ရှာဖွေမရတဲ့အဆုံးမှာ အကျိုးတူပူးပေါင်းနေတဲ့ မြန်မာဘရူဝါရီ (MBL)ကို ပဲ ရောင်းချရမယ့်အခြေအနေဖြစ်ခဲ့တာလို့ သတင်းမှာဖ်ောပြပါတယ်။

   ကီရင်ဟာ MBL လုပ်ငန်းအောက်ကနေ မြန်မာဘီယာအပါအဝင် ဘီယာအမှတ်တံဆိပ် ၅ မျိုးခန့်ကို ထုတ်လုပ်နေတာဖြစ်ပါတယ်။ မြန်မာဘီယာဟာ စစ်တပ်အာဏာသိမ်းမှုဖြစ်ပြီးတဲ့နောက် စစ်တပ်ကို သွယ်ဝိုက်ငွေရှာပေးတာမျိုးမဖြစ်အောင် လူထုက စစ်တပ်ထုတ်ကုန်အသုံးမပြုရေးလှုံ့ဆော်မှုမှာ ထိပ်ဆုံးက ပါဝင်တဲ့ တံဆိပ်တစ်ခုဖြစ်ပါတယ်။

7. ၃၀ ဇွန် ၂၀၂၂သဘောထားမတူတဲ့ လူပုဂ္ဂိုလ်အချို့ကို အသက်အန္တရာယ်ပြုဖို့ စာရင်းပြုစုထားတာမျိုးမရှိလို့ NUG ရှင်းလင်း

   အမျိုးသားညီညွတ်ရေးအစိုးရအတိုင်ပင်ခံကောင်စီ၊ အမျိုးသားညီညွတ်ရေးအစိုးရနဲ့ တိုင်းရင်းသားညီနောင်မဟာမိတ်အဖွဲ့တွေက အမြင်သဘောထားမတူသူတွေကို အသက်အန္တရာယ်ရန်ရှာဖို့ စာရင်းပြုစုထားတယ်ဆိုတာ မဟုတ်မှန်ဘူးလို့ အမျိုးသားညီညွတ်ရေးအစိုးရ NUG က ဒီနေ့ ဇွန် ၃၀ မှာ သတင်းထုတ်ပြန်ပါတယ်။

   အာဏာသိမ်း စစ်ကောင်စီနဲ့ လက်အောက်ခံအဖွဲ့အစည်းတွေက တော်လှန်ရေးကို ပုံဖျက်တဲ့ သတင်းတု၊ သတင်းမှားတွေကို ရည်ရွယ်ချက်ရှိရှိ ထုတ်လုပ်ဖြန့်ချိနေတဲ့အကြောင်း၊ သဘောထားမတူသူတွေကို အသက်အန္တရာယ်ပေးဖို့ NUCC၊ NUG နဲ့ တိုင်းရင်းသားညီနောင်မဟာမိတ်တွေက အစည်းအဝေးဆုံးဖြတ်ချက်နဲ့အတူ လုပ်ငန်းစဉ်တွေပါ ချမှတ်ထားသလို လုပ်ကြံဖန်တီးထားတာဖြစ်တယ်လို့ ထုတ်ပြန်ချက်မှာ ပါရှိပါတယ်။

   အဲ့လို သတင်းမှားမျိုးကို ပြီးခဲ့တဲ့ ၈ လ ကျော်ကလည်း သတင်းဖြန့်ခဲ့ဖူးတဲ့အပြင် နိုင်ငံတကာကို ပေးဖို့ခဲ့တဲ့ သာဓကလည်းရှိတယ်လို့ ဆိုပါတယ်။

   အာဏာသိမ်းထားပြီး ဒီမိုကရေစီ၊ လူ့အခွင့်အရေးနဲ့ လူသားလုံခြုံရေးရဲ့ ဘုံရန်သူဖြစ်တဲ့ စစ်ကောင်စီကိုသာ အမြစ်ပြတ်တွန်းလှန်နိုင်ရေးကို အမျိုးသားညီညွတ်ရေးအစိုးရက ဦးတည်နေတာဖြစ်ပြီး ဒီလို သဘောထားမတူသူတွေကို အသက်အန္တရာယ်ပေးမယ့်ကိစ္စဟာ NUG ရဲ့ မူဝါဒ၊ လုပ်ငန်းစဉ်၊ ရည်မှန်းချက်တွေ မကိုက်ညီတာကြောင့် ဘယ်လိုနည်းနဲ့မှ လုပ်ကိုင်သွားမှာမဟုတ်ဘူးလို့လည်း ထုတ်ပြန်ထားပါတယ်။

8. ၃၀ ဇွန် ၂၀၂၂ပင်းတယမြို့အထွက် ရဲကင်းစခန်းတစ်ခုပစ်ခတ်ခံရလို့ စစ်သားတစ်ဦးသေဆုံး, ပင်းတယ-ရွာငံလမ်းကို ရက်အကန့်အသတ်မရှိ ပိတ်ထားကြောင်း ဒေသကာကွယ်ရေးတပ်ဖွဲ့အရေးပေါ်ထုတ်ပြန်

   ရှမ်းပြည်နယ်တောင်ပိုင်း၊ ပင်းတယမြို့မှာ မြို့အထွက် ရဲကင်းစခန်းကို မနေ့ ဇွန်လ ၂၉ ရက်က ‌ဒေသခံမြို့ပြပြောက်ကျားအဖွဲ့တစ်ခု ဝင်ရောက်ပစ်ခတ်ခဲ့တကြောင့်စ်ကောင်စီတပ်သားတစ်ဦးသေဆုံးပြီးနောက်တစ်ဦး ဒဏ်ရာရခဲ့တယ်လို့ ဒေသခံတွေက ပြောပါတယ်။

   ဒါ့အပြင် မနေ့ဇွန်လ ၂၉ ရက်မနက်ပိုင်းမှာပဲ ပင်းတယမြို့နယ်ထဲကဖြတ်သန်းသွားလာသူတစ်ဦးကို အဲဒီရဲကင်းစခန်းအတွင်းက ပစ်ခတ်လိုက်တာကြောင့် ဒေသခံအရပ်သားတစ်ဦးထိခိုက်ဒဏ်ရာရခဲ့တယ်လို့လည်း ဒေသခံတွေကဆိုပါတယ်။

   “အဲဒီမြို့အထွက်ဂိတ်က စစ်ဆေးရေးလည်းကြမ်းတယ်။ တခါတစ်လေလည်း ပြည်သူတွေကို မထင်ရင်မထင်သလို ဆဲဆိုတာတွေလုပ်နေတာ။ မနက် ၁၀ နာရီလောက်မှာ တော်လှန်ရေး အဖွဲ့တစ်ခုက ဝင်ရောက်ပစ်ခတ်ခဲ့တာ စစ်သားတစ်ဦး သေပြီး တစ်ဦးဒဏ်ရာရတယ်။ အရပ်သားတစ်ဦးကတော့ အဲဒီမတိုင်ခင် ၉ နာရီခွဲလောက်ကတည်းက အပစ်ခံရတယ်လည်းကြားတယ်။ ရဲကင်းကိုတိုက်နေတုန်း ရဲကင်းထဲကပြန်ပစ်လို့ထိတယ်ဆိုတာမျိုး သတင်းက နှစ်မျိုးကြားရတယ်’’ လို့ ဒေသခံတစ်ဦးက ဘီဘီစီကိုပြောပါတယ်။

   ဆိုလိုတာက အရပ်သား ပစ်ခတ်ခံရလို့ မြို့ပြပြောက်ကျားတပ်တွေက ရဲကင်းကို ၀င်တိုက်တာလား၊ ရဲကင်းကို၀င်တိုက်လို့ ရဲကင်းထဲက ပြန်ပစ်ရာကနေ အရပ်သားပစ်ခတ်ခံရတာလားဆိုတာတော့ ဒေသခံတွေဘက်က အတိအကျမသိရှိဘူး ပြောပါတယ်။

   ဒီပစ်ခတ်မှုအပြီးမှာတော့ ပင်းတယမြို့နယ်အတွင်း စစ်ကောင်စီဘက်က စစ်ဆေးတင်းကျပ်မှုတွေ ပိုပြီးလုပ်ဆောင်နေတယ်လို့လည်း ဒေသခံတွေကပြောပါတယ်။

   ပင်းတယမြို့အထွက်က ရဲကင်းစခန်းနားက ပစ်ခတ်မှုတွေနဲ့ပတ်သက်လို့ စစ်ကောင်စီဘက်က သတင်းထုတ်ပြန်တာမရှိသေးသလို ဘီဘီစီဘက်ကလည်းဆက်သွယ်မေးမြန်းဖို့ကြိုးစားနေပါတယ်။

   တစ်ချိန်တည်းမှာပဲ ပင်းတယ-ရွာငံဖြတ်လမ်း(တောင်ပေါ်ကြီးလမ်း)မှာ စစ်ကောင်စီဘက်ကို ပြောက်ကျားတိုက်ခိုက်တာ‌တွေလုပ်ဖို့ရှိဖို့အတွက် ဇွန်လ ၂၉ ရက်နေ့စပြီး ရက်အကန့်အသတ်မရှိ ပိတ်ပင်ထားပြီး ပြည်သူတွေဖြတ်သန်းသွားလာတာမလုပ်ဖို့၊ စစ်ကောင်စီတပ်ကားတွေနဲ့ ကိုက် ၃၀၀ အကွာကနေ မောင်းနှင်ကြဖို့ ကိုလည်း ပင်းတယမြို့နယ်က ‌ဒေသကာကွယ်ရေးတပ်တစ်ခုဖြစ်တဲ့ ချိုးဖြူပြောက်ကျားတပ်ဖွဲ့က သတိပေးထုတ်ပြန်ထားပါတယ်။

9. ၃၀ ဇွန် ၂၀၂၂လန်ချန်း-မဲခေါင်အစည်းအဝေးကျင်းပမယ့် ပုဂံမှာ လုံခြုံရေးတင်းကြပ်

   မြန်မာ၊ တရုတ်၊ လာအို၊ ထိုင်း၊ ကမ္ဘောဒီးယားနဲ့ ဗီယက်နမ်နိုင်ငံက နိုင်ငံခြားရေးဝန်ကြီးတွေ တက်ရောက်မယ့် လန်ချန်း-မဲခေါင် ပူးပေါင်းဆောင်ရွက်ရေး နိုင်ငံခြားရေးဝန်ကြီးများ အစည်းအဝေး ကျင်းပမယ့် ပုဂံယဉ်ကျေးမှုဒေသမှာ လုံခြုံရေးတွေ တင်းကြပ်နေတယ်လို့ ဒေသခံတွေက ပြောပါတယ်။

   ပုဂံဘုရားတွေရဲ့ ဝန်းကျင်နဲ့ ဘုရားဝင်းတွေထဲမှာပါ စစ်ကောင်စီ လုံခြုံရေးတပ်ဖွဲ့တွေရှိသလို ကင်းလှည့်ပတ်နေတာကိုလည်း တွေ့ရတယ်လို့ ပြောပါတယ်။

   “ အာနန္ဒာတို့၊ ဓမ္မရံကြီးတို့စတဲ့ နာမည်ကြီး ဘုရားငါးဆူ ဝင်ပေါက်တွေမှာလည်းတွေ့တယ်။ စစ်ဆေး ၊ မေးမြန်းတာမျိုးတော့ မရှိပါဘူး။ အနီးနားက ဘုရားဖူးတွေ လာတာတော့ရှိတယ်။ တန့်ကြည်တောင် ကိစ္စဖြစ်ပြီးနောက်ပိုင်းမှာ ဘုရားဖူးတွေလည်း သိပ်မလာတော့ဘူး။ “ လို့ လုံခြုံရေးအရ နာမည်မပြောချင်တဲ့ ဒေသခံတစ်ယောက်က ဘီဘီစီကို ပြောပါတယ်။

   လန်ချန်း-မဲခေါင်း နိုင်ငံခြားရေးဝန်ကြီးတွေရဲ့အစည်းအဝေးကို ဇူလိုင် ၂ ရက်ကနေ ၅ ရက်အထိ ကျင်းပမှာဖြစ်ပါတယ်။ အဲ့ဒီအစည်းအဝေးကို တရုတ်နိုင်ငံခြားရေးဝန်ကြီး ဝမ်ယီတက်ရောက်မှာဖြစ်ပါတယ်။

10. ၃၀ ဇွန် ၂၀၂၂ဥကရိထ စခန်းသိမ်းတိုက်ပွဲ -စစ်တပ်က လေယာဥ်ပစ်ကူ ပိုသုံးလာတယ်လို့ဆို

    ကရင်ပြည်နယ်၊ မြဝတီမြို့တောင်ဘက်၊ ဝေါလေဒေသမှာ ကရင်အမျိုးသားကာကွယ်ရေးတပ် (KNLA/KNDO) နဲ့ ပူးပေါင်းတပ်ဖွဲ့ဝင်တွေက စစ်ကောင်စီရဲ့ ဥကရိထ စခန်းကို သိမ်းဖို့ ကြိုးစားတဲ့တိုက်ပွဲဟာ ငါးရက်ကြာ ဆက်လက်ပြင်းထန်နေပြီး စစ်ကောင်စီဘက်က လေယာဥ်နဲ့ဗုံးကြဲတိုက်ခိုက်မှု ပိုသုံးလာတယ်ဆိုပြီး မြေပြင်အခြေအနေသိရှိသူတွေက ဘီဘီစီကို ပြောပါတယ်။

    စစ်ကောင်စီတပ်ဟာ KNLA/KNDO ပူးပေါင်းတပ်ဖွဲ့တွေရဲ့ စခန်းသိမ်းတိုက်ပွဲစတင်တဲ့ဇွန်လ ၂၆ ရက်နေ့ ကတည်းက လေယာဥ်ပစ်ကူသုံး တိုက်ခိုက်နေတာဖြစ်ပါတယ်။

    ‘မနေ့ည ၇ နာရီခွဲလောက်မှာ စစ်တပ်က လေယာဥ်နဲ့ လာပစ်တယ်။ ဥကရိထ ရွာထဲ ပိတ်မိနေတဲ့အရပ်သား ငါးဦးထိသွားတယ်။ အဲဒီထဲမှာ ပါတဲ့ကလေးတစ်ဦး ဆုံးသွားတယ်။ ထိခိုက်သူ တွေထဲမှာ သူ့အမေနဲ့အဖေလည်းပါတယ်။ ဒီမနက်လာပစ်သွားတယ်’ လို့ စခန်းသိမ်းတိုက်ပွဲမှာ ပူပေါင်းပါဝင်နေတဲ့ KNDO အထူးအဖွဲ့ Venom စစ်ကြောင်း ပြန်ကြားရေးဘက်ကပြောပါတယ်။

    စစ်ကောင်စီတပ်ဟာ မနေ့ ဇွန်လ ၂၉ ရက် ညနက်ပိုင်းအထိ လက်နက်ကြီးနဲ့ ပစ်ခတ်တာတွေ ပြုလုပ်ခဲ့တယ်လို့ မြေပြင် သတင်းရင်းမြစ်တွေက ပြောပါတယ်။

    KNLA/KNDO ပူးပေါင်းတပ်ဖွဲ့တွေနဲ့ စစ်ကောင်စီတပ်တို့ တိုက်ပွဲဖြစ်နေတာ အခုဆို ၅ ရက်ထဲ ဝင်လာပြီဖြစ်ပြီး စစ်ကောင်စီဘက်က ဝေါလေဗျူဟာကုန်းကို လက်နက်ခဲယမ်းတွေ ချပေးနေတယ်လို့လည်း သိရပါတယ်။

    ကရင်ပြည်နယ်ထဲမှာ စစ်ကောင်စီတပ်ရဲ့ စစ်စခန်းတချို့ကို ကရင်ပူးပေါင်းတပ်တွေက အစောပိုင်းလတွေမှာ ဝင်ရောက်သိမ်းပိုက်ချိန်တုန်းကတော့ လေယာဥ်သုံး ဗုံးကြဲတိုက်ခိုက်တာရှိခဲ့ပေမဲ့ အခု ဥကရိထ စခန်းသိမ်းတိုက်ပွဲကတော့ လေယာဥ်နဲ့ တိုက်ခိုက်မှုအကြိမ်ရေအများဆုံးဖြစ်တယ်လို့လည်း သိရပါတယ်။

11. ၂၉ ဇွန် ၂၀၂၂ဥကရစ်ထစခန်းသိမ်းတိုက်ပွဲ နောက်ဆက်တွဲအခြေအနေ

12. ၂၉ ဇွန် ၂၀၂၂မြန်မာအိမ်အကူကို နှိပ်စက်သတ်ဖြတ်ခဲ့သူရဲ့ ထောင်နှစ် ၃၀ ပြစ်ဒဏ်ကို စင်္ကာပူ အယူခံခုံရုံး အတည်ပြု

    မြန်မာအိမ်အကူ အမျိုးသမီးငယ်ကို နှိပ်စက် သတ်ဖြတ်မှုကြောင့် ထောင် အနှစ် ၃၀ ချခံထားရတဲ့ စင်္ကာပူအမျိုးသမီးဟာ ပြစ်ဒဏ်လျှော့ပေါ့ သက်ညှာပေးဖို့ စင်္ကာပူနိုင်ငံ အယူခံ ရုံးတော်ထံ လျှောက်ထားခဲ့ပေမယ့် ရုံးတော်က ပယ်ချ လိုက်ပြီ ဖြစ်ပါတယ်။

    တရားရုံးချုပ် တရားသူကြီး ဆီကီအွန်းရဲ့ ထောင်ဒဏ် အနှစ် ၃၀ ပြစ်ဒဏ်ကို တရားသူကြီး ၃ ဦး ကြားနာတဲ့ အယူခံ ခုံရုံးက အတည်ပြု ပေးလိုက်တာ ဖြစ်ပါတယ်။

    ပြစ်ဒဏ်ချခံထားရသူ အသက် ၄၂ နှစ်အရွယ် ဂိုသ်ယာသီရိ မူရူဂါယန် ဆိုသူ အမျိုးသမီးက သစိတ်ကျန်းမာရေး ဆိုင်ရာ ပြဿနာတွေ ရှိခဲ့တဲ့ အတွက် ပြုမူ ကျုးလွန် ခဲ့ရတာဆိုတဲ့ အခြေခံ အကြောင်းနဲ့ ထောင်ဒဏ်ကို ၁၂ နှစ်ကနေ ၁၅ နှစ် အထိ လျှော့ချနိုင်ဖို့ လျှောက်ထားခဲ့တာ ဖြစ်ပါတယ်။

    မြန်မာနိုင်ငံသူ အသက် ၂၄ နှစ်အရွယ် Piang Ngaih Donကို အသက် သေဆုံးရတဲ့ အထိ နှိပ်စက်ညှင်းပမ်းခဲ့တဲ့ အတွက် အပြစ်ရှိကြောင်း ဂိုသ်ယာသီရိက ဝန်ခံထားပါတယ်။

    မြန်မာအလုပ်သမား အမျိုးသမီးငယ်ဟာ ဦးနှောက်ထိခိုက်ဒဏ်ရာ၊ လည်ပင်းကို အပြင်းအထန် ရိုက်နှက် ခံထားရတဲ့ ဒဏ်ရာတွေနဲ့ ၂၀၁၆ ဇူလိုင်လမှာ သေဆုံး ခဲ့ရတာ ဖြစ်ပါတယ်။

    အစာအငတ်ထားတာမျိုး၊ ညဘက် ပြတင်းတံခါးနဲ့ တွဲချိတ် ချည်နှောင်တာမျိုး၊ ရိုက်နှက် နှိပ်စက်တာမျိုးတွေ ခံစားခဲ့ရပါတယ်။

    အဲဒီလို အိမ်တွင်း ပိတ်လှောင်ပြီး ၁၄ လ လုံးလုံး နှိပ်စက် ခံထားရတဲ့ အတွက် ကွယ်လွန်ချိန်မှာ ကိုယ်အလေးချိန်ဟာ ပေါင် ၅၀ ကျော်ကျော်လေးသာ ရှိပါတော့တယ်။

    ကျူးလွန်ခဲ့တာတွေဟာ ပြင်းထန် ရက်စက်လွန်းလှပြီး အများပြည်သူကလည်း တခဲနက် ဆန့်ကျင်ရှုတ်ချခဲ့တဲ့ အခု မှုခင်းမှာ တရားရုံးက သက်ညှာမှု ပေးဖို့ဆိုတာ မဖြစ်နိုင်ဘူးလို့ အယူခံ တရားသူကြီးတွေက ဆုံးဖြတ်ခဲ့ပါတယ်။

13. ၂၉ ဇွန် ၂၀၂၂တရားမဝင် ဝင်ရောက်သူ လူပေါင်း ၁၆၀ ကျော်ကို ထိုင်းကပြန်လွှဲပေး

    ထိုင်းနိုင်ငံထဲ တရားမဝင် ဝင်ရောက်မှုကြောင့် ထိုင်းအာဏာပိုင်တွေရဲ့ ဖမ်းဆီးတာ ခံထားတဲ့ မြန်မာနိုင်ငံသားတွေထဲက ၁၆၆ ယောက်ကို ရနောင်းကနေ တဆင့် မြန်မာဘက်ကို ပြန်ပို့လိုက်တယ်လို့ ထိုင်းဘက်က လာတဲ့ သတင်းတွေက ဆိုပါတယ်။

    ထိုင်း ပင်လယ်ပြင် လုံခြုံရေးတပ် အမှတ် ၃ ဌာနချုပ်ကနေ ထုတ်ပြန်တဲ့ သတင်းတွေကို ထိုင်းမီဒီယာတွေက ကိုးကား ဖော်ပြနေတာ ဖြစ်ပါတယ်။

    မြန်မာဘက်ကို အခုလို လူပေါင်း ၁၆၀ ကျော် ပြန်လွှဲပေးစဉ် ဆိပ်ကမ်းမှာ ရနောင်းအုပ်ချုပ်ရေးမှူး ဆုမ်ကစ် ဆီဆာနက်ရော၊ မြန်မာသံရုံး အလုပ်သမားရေးရာ တာဝန်ခံပါ ရှိနေခဲ့တယ်လို့ ဆိုပါတယ်။

    အခု ပြန်လွှဲ ပေးလိုက်တဲ့ အမျိုးသား ၁၁၇ ယောက်နဲ့ အမျိုးသမီး ၄၉ ယောက်တို့ဟာ ထိုင်းဘက်ခြမ်းမှာ ဥပဒေကြောင်း အတိုင်း စိစစ် လုပ်ဆောင်ရမယ့် အရာတွေ အားလုံး ပြီးမြောက်ခဲ့းတဲ့ သူတွေ ဖြစ်ကြပြီး၊ မြန်မာနိုင်ငံကို ပြန်သွားရေး အစီအစဉ်ထဲ သဘောတူ ပါဝင်ကြသူတွေလည်း ဖြစ်တယ်လို့ ထိုင်းအာဏာပိုင်တွေက ဆိုပါတယ်။

    ရနောင်းကနေ ကော့သောင်းဘက်ဆီ ရေယာဉ် ၁၀ စင်း သုံးပြီး လူ ၁၆၀ ကျော်ကို ပြန်ပို့ ပေးခဲ့တာ ဖြစ်ပါတယ်။ ထိုင်းနိုင်ငံတောင်ဘက် တလွှား အကျဉ်းထောင်တွေထဲမှာ အကြောင်းအမျိုးမျိုးနဲ့ အကျဉ်းကျခံနေရတဲ့ မြန်မာနိုင်ငံသားတွေ လွတ်ရက်စေ့ပေမယ့် မြန်မာဘက်က ခေါ်ယူတဲ့ အရေအတွက် နည်းတာကြောင့် ထောင်တွေထဲ ဆက်ပြီး နေနေကြရသူပေါင်းအယောက် လေးထောင်ကျော် ရှိနေတယ်လို့ ပြီးခဲ့တဲ့ ရက်ပိုင်းကပဲ ထိုင်းနိုင်ငံထဲ မြန်မာအလုပ်သမားအရေး လှုပ်ရှား ဆောင်ရွက်ကြသူတွေက ဘီဘီစီကို ပြောထားပါတယ်။

14. ၂၉ ဇွန် ၂၀၂၂မြန်မာအရေးနဲ့ ပတ်သက်ပြီး အရပ်ဘက်အဖွဲ့ ၇၀၀ နီးပါး ဩစတြေးလျနိုင်ငံခြားရေး ဝန်ကြီးကို ဝိုင်းဝန်းတောင်းဆို

    မြန်မာအရေးနဲ့ ပတ်သက်ပြီး တာဝန်ယူ ဆောင်ရွက်တာတွေ ပြုလုပ်ဖို့ ဩစတြေးလျ နိုင်ငံခြားရေး ဝန်ကြီး မစ္စ ပဲန်နီဝေါင်းကို ဩစတြေးလျနိုင်ငံ အခြေစိုက် အဖွဲ့အစည်းတွေ အပါအဝင် ကမ္ဘာတလွှားက အဖွဲ့ပေါင်း ၇၀၀ နီးပါး စုပေါင်းပြီး စာရေးသား ပေးပို့ တောင်းဆို လိုက်ပါတယ်။

    ဩစတြေးလျ အထက်လွှတ်တော် အမတ် အဖြစ်ကနေ နိုင်ငံခြားရေး ဝန်ကြီး နေရာကို လောလောလတ်လတ်မှာပဲ ရောက်လာတဲ့ မစ္စဝေါင်းထံကို မြန်မာ့အရေး မျက်မှောက် အခြေအနေတွေကို ဖော်ပြထားတဲ့ ၃ မျက်နှာပါ စာတစ်စောင်ကို အရပ်ဘက် အဖွဲ့အစည်း ၆၈၈ ဖွဲ့က စုပေါင်း လက်မှတ်ထိုးပြီး ပေးပို့တာ ဖြစ်ပါတယ်။

    အာဏာသိမ်း စစ်ကောင်စီဟာ မြန်မာနိုင်ငံရဲ့ ဒီမိုကရေစီနည်းကျ လွတ်လပ်မှုအပေါ် ရန်မူ ခြိမ်းခြောက်နေတဲ့ တရားမဝင် အဖွဲ့အစည်းဖြစ်ကြောင်း သတ်မှတ် ရှုတ်ချ ပြောဆိုဖို့ရာ မစ္စဝေါင်းကို တိုက်တွန်းထားပါတယ်။

    ဒါ့အပြင်၊ ဩစတြေးလျ ဗဟို အစိုးရရဲ့ နိုင်ငံခြားရေး တာဝန် ရှိသူတစ်ဦး အနေနဲ့ မြန်မာ့အရေးနဲ့ ပတ်သက်ပြီး မစ္စဝေါင်း ပြုမူ ဆောင်ရွက်သင့်တဲ့ အချက် ၁၅ ချက် ဆိုပြီးတော့လည်း စာထဲမှာ အကြံပြု တောင်းဆို ထားပါတယ်။

    အဲဒီအချက်တွေထဲမှာ မြန်မာ စစ်တပ်နဲ့ကြား သံတမန် ဆက်ဆံရေး အလုံးစုံ ဖြတ်တောက်ဖို့နဲ့ ပိုပြီး ပြင်းထန် တင်းကြပ်တဲ့ ပိတ်ဆို့ အရေးယူမှုတွေ တိုးမြှင့် ချမှတ်ဖို့ စတဲ့ တောင်းဆိုချက်တွေ ပါဝင်ပါတယ်။

    မြန်မာ အာဏာသိမ်းစစ်တပ် အပေါ် ဖိအားပေး ရှုတ်ချတာတွေ အာဆီယံ အဖွဲ့က ပြုလုပ် လာရေးအတွက်လည်း ဩစတြေးလျ အစိုးရဘက်က မိတ်ဖက် အာဆီယံအဖွဲ့ကို တောင်းဆိုမှုတွေ ပြုလုပ်ပါ ဆိုပြီးတော့လည်း အရပ်ဘက်အဖွဲ့တွေက မစ္စဝေါင်းကို ပြောထားပါတယ်။

15. ၂၉ ဇွန် ၂၀၂၂စစ်ရဲ့သက်ရောက်မှု ကလေးသူငယ်တွေအပေါ် အများဆုံး ကျရောက်နေ, မြန်မာကလေးငယ်တွေကို အကာအကွယ်ပြုပေးရေး နိုင်ငံတကာမိသားစုကို ကုလပန်ကြား

    မြန်မာနိုင်ငံထဲ လက်ရှိ ပေါ်ပေါက်နေတဲ့ အခြေအနေတွေဟာ ကလေးသူငယ်တွေ အပေါ် ပြင်းပြင်းထန်ထန် သက်ရောက် ရိုက်ခတ်နေပြီး၊ အခု မျိုးဆက်သစ် မြန်မာ ကလေးငယ်တွေကို အကာအကွယ်ပြုပေးရေး အတွက် နိုင်ငံတကာ အသိုင်းအဝိုင်း အနေအနေနဲ့ အလျင်အမြန် တုန့်ပြန် လုပ်ဆောင်ကြပါလို့ ကုလသမဂ္ဂရဲ့ ကလေးသူငယ် အခွင့်အရေး ဆိုင်ရာ ကော်မတီက သတိပေး ပြောကြားပါတယ်။

    မြန်မာနိုင်ငံထဲ ကလေးသူငယ်ဦးရေ ၇.၈ သန်း ဟာ ကျောင်းမတက်ရပဲ ပညာရေး ဆက်လက် ပျက်ကွက် နေရပြီး၊ ကလေး နှစ်သိန်းခွဲဟာ ဆိုရင် လက်နက်ကိုင် ပဋိပက္ခတွေကြောင့် အိုးအိမ်တွေကနေ စွန့်ခွာ ထွက်ပြေး နေကြရတယ်လို့ ဇွန်လ ၂၉ ရက် ထုတ်ပြန်တဲ့ ကုလ ကော်မတီရဲ့ ကြေညာချက်ထဲ ဖော်ပြထားပါတယ်။

    အဲဒီ ကိန်းဂဏန်း အချက်အလက်တွေဟာ မြန်မာနိုင်ငံရဲ့ လူ့အခွင့်အရေး ဆိုင်ရာ ကုလသမဂ္ဂ အထူးကိုယ်စားလှယ်ရဲ့ တွေ့ရှိချက်တွေကို ကိုးကားထားတာ ဖြစ်ပါတယ်။ ဒါ့အပြင် လက်ရှိ ပေါ်ပေါက်နေတဲ့ လက်နက်ကိုင် ပဋိပက္ခတွေထဲမှာ ကလေးသူငယ်တွေဟာ ဖမ်းဆီးခေါ်ဆောင်သွား ခံရတာတွေ၊ စစ်သားအဖြစ် စုဆောင်းခံရတာတွေ ရှိနေတယ်လို့ ဆိုထားပါတယ်။

    “နယ်မြေစိုးမိုးရေး အတွက် စစ်တပ်က ဆက်လက် ပြုမူနေတဲ့ ထိုးစစ်တွေရဲ့ ဒဏ်ကို ကလေးသူငယ်တွေဟာ အဆိုးဆုံး ဆက်လက် ခံစား တွေ့ကြုံနေရပါတယ်။ ၂၀၂၁ ဖေဖေါ်ဝါရီ စစ်အာဏာသိမ်းပြီး နောက်ပိုင်း လက်နက်ကိုင် အဖွဲ့တွေရဲ့လက်ချက်ကြောင့် အသက်ဆုံးရှုံးရ၊ ကိုယ်လက် အင်္ဂါ ထိခိုက် ဆုံးရှုံးသွားရတဲ့ ကလေးသူငယ် ဦးရေဟာ အနည်းဆုံး ၃၈၂ ယောက် ရှိနေပါတယ်။

    ဒါ့အပြင် စစ်အာဏာသိမ်းမှု ဆန့်ကျင်ရေး လှုပ်ရှာမှုတွေထဲ ပါဝင်တယ် ဆိုတဲ့ သံသယနဲ့ ဥပဒေမဲ့ ဖမ်းဆီးခံရတဲ့ အရွယ်မရောက်သေးတဲ့ ကလေးသူငယ်ပေါင်းလည်း အယောက် ၁၄၀၀ ကျော် ရှိပြီး၊ မေလ အကုန်အထိ ရရှိထားတဲ့ အချက်အလက်တွေအရ အဲဒီထဲက အနည်းဆုံး ကလေးသူငယ် ၂၇၄ ယောက်ဟာ နိုင်ငံရေး အကျဉ်းသားတွေ အဖြစ် စစ်တပ်လက်ထဲ ရောက်နေကြရတယ်လို့ ကုလကော်မတီရဲ့ ထုတ်ပြန်ချက်ထဲ ဖော်ပြထားပါတယ်။

16. ၂၉ ဇွန် ၂၀၂၂ဥကရိထ စခန်းသိမ်းတိုက်ပွဲ - လက်နက်မှန်တဲ့အရပ်သားအချို့ ထိုင်းဘက်ခြမ်းမှာ ဆေးကုနေရ

    ကရင်ပြည်နယ်၊ မြဝတီမြို့တောင်ပိုင်း၊ ဝေါလေဒေသမှာ KNLA/KNDO ကရင်ပူးပေါင်းတပ်ဖွဲ့တွေက စစ်ကောင်စီရဲ့ ဥကရိထစခန်းကို သိမ်းတဲ့တိုက်ပွဲအတွင်း လက်နက်ကြီးထိမှန်တဲ့အရပ်သားတစ်ချို့ဟာ အိမ်နီးချင်း ထိုင်းနိုင်ငံထဲမှာ သွားရောက်ဆေးကုသ‌နေရပါတယ်။

    စစ်ကောင်စီဘက်က စခန်းသိမ်းပိုက်နိုင်ရေး တိုက်ခိုက်နေတဲ့ KNLA/KNDO ကရင်ပူးပေါင်းတပ်ဖွဲ့ ‌တွေရှိတယ်လို့ ယူဆတဲ့နေရာတွေကို လက်နက်ကြီးတွေနဲ့ ပစ်ခတ်ရာမှာ အရပ်ဘက်နေရာတွေကိုလည်း ထိမှန်တာကြောင့် အခုလိုဒဏ်ရာရရသူ‌တွေရှိလာတာပါ။

    ၄ ရက်ထဲ ဝင်လာပြီဖြစ်တဲ့အဲဒီစခန်းသိမ်းတိုက်ပွဲကြောင့် ဒေသခံအရပ်သား ၈၀၀ ကျော်ဟာ ဝေါလေဒေသတောင်ပိုင်းက ထိုင်းနိုင်ံ၊ ဖုတ်ဖရာ့မြို့နယ်ထဲကို စစ်ရှောင်နေရပါတယ်။

    ထိုင်းဘက်ခြမ်းကတော့ စစ်ရှောင်တွေကို ကြိုဆိုတာမျိုးမဟုတ်ပေမဲ့ ရောက်လာသူတွေကို ထိုင်းစစ်တပ်က လူသားချင်းစာနာတဲ့အနေနဲ့ ဒဏ်ရာရတဲ့သူတွေကို ဖုတ်ဖရာ့ဆေးရုံကို ပို့ပြီး ဆေးကုသမှုပေးတယ်လို့ သိရပါတယ်။

    တစ်ချိန်တည်းမှာပဲ ဥကရိထစခန်းသိမ်းတိုက်ပွဲပြင်းထန်နေပြီး မနေ့ညပိုင်းတုန်းကဆိုရင် စစ်ကောင်စီဘက်က လေယာဥ်သုံးတိုက်ခိုက်တာမျိုးအထိလုပ်ခဲ့ပါတယ်။

    ဒါ့ပြင် စစ်ကောင်စီတပ်ဟာ ဝေါလေ စစ်ဗျူဟာကုန်းကို လက်နက်ခဲယမ်းတွေ ချပေးခဲ့ပြီးတဲ့နောက် စစ်ကောင်စီဘက်က လက်နက်ကြီးတွေနဲ့ အဆက်မပြတ်ပစ်ခဲ့သလို ဒီနေ့ မနက်ပိုင်းအထိတိုက်ပွဲပြင်းထန်နေဆဲဖြစ်ပါတယ်။

    တစ်ဖက်မှာလည်း တိုက်ပွဲကြောင့် စစ်ကောင်စီဘက်က အကျအဆုံးဆယ်ချီရှိနေချိန်မှာပဲ KNLA/KNDO ပူးပေါင်းတပ်ဖွဲ့တွေဘက်ကလည်း ကျဆုံးသူ ၁၅ ဦးနီးပါးရှိနေတယ်လို့ ဒေသတွင်းသတင်းတွေမှာဖော်ပြပါတယ်။

17. ၂၉ ဇွန် ၂၀၂၂အပစ်ရပ်တိုင်းရင်းသားလက်နက်ကိုင် ၇ ဖွဲ့ အာဆီယံအထူးသံနဲ့တွေ့ဆုံဖို့ရှိ

    တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးစာချုပ် (NCA) မှာ လက်မှတ်ထိုးထားတဲ့ တိုင်းရင်းသား လက်နက်ကိုင် ၁၀ ဖွဲ့ ထဲက ၇ ဖွဲ့ဟာ မြန်မာပြည်ကို အလုပ်သဘောခရီးရောက်နေတဲ့ အာဆီယံအထူးသံနဲ့ လာမယ့် ရက်ပိုင်းအတွင်းတွေ့တွေ့ဆုံဖို့ ရှိနေတယ်လို့ သိရပါတယ်။

    အဲဒီလက်နက်ကိုင်အဖွဲ့တွေဟာ အာဆီယံ အထူးသံနဲ့ တစ်ဖွဲ့ချင်းတွေ့မှာမဟုတ်ဘဲ အပစ်ရပ် ၁၀ ဖွဲ့နဲ့ ဖွဲ့စည်းထားတဲ့ ငြိမ်းချမ်းရေး လုပ်ငန်းစဥ် ဦးဆောင်မှုအဖွဲ့ (PPST)အနေနဲ့တွေ့ဆုံမှာလို့ PPST ပြောရေးဆိုခွင့်ရှိသူက ဘီဘီစီကို အတည်ပြုပါတယ်။

    အဲဒီ ၇ ဖွဲ့ဟာ စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ဖိတ်ခေါ်တဲ့ ငြိမ်းချမ်းရေးဆွေးနွေးပွဲကို တက်ရောက်တဲ့အဖွဲ့တွေဖြစ်ပါတယ်။

    ''တွေ့ဖို့ ဖိတ်တာကတော့ တစ်ဖွဲ့ချင်းစီကို ဖိတ်တာပါ။ ဒါပေမဲ့ လောလောဆယ်မှာPPST ၁၀ ဖွဲ့က ၇ ဖွဲ့ + ၃ ဖွဲ့ပုံစံဖြစ်နေတော့ PPST အနေနဲ့ စုပေါင်းတွေ့ဆုံမှုအဖြစ် အာဆီယံအထူးသံတမန်ကို တွေ့ကြမယ်လို့ သဘောတူထားကြတယ်။ အကြမ်းဖျင်းတော့ လာမယ့် ဇူလိုင်လ ၁ ရက်နေ့မှာ တွေ့နိုင်မယ်လို့ သိရှိထားရတယ်'' လို့ PPST ပြောခွင့်ရသူတစ်ဦးဖြစ်တဲ့ နန်းယဥ်ယဥ်စိုးက ပြောပါတယ်။

    မြန်မာ့အရေး အာဆီယံဘုံသဘောတူညီချက်တွေနဲ့ အာဆီယံအထူးသံခန့်အပ်မှုကို ကြိုဆိုကြောင်းနဲ့ အထူးသံနဲ့ လက်တွဲလုပ်ဆောင်မယ့်အကြောင်း PPST က အစောပိုင်းကတည်းက ကြေညာချက်တွေ ထုတ်ပြန်ထားပါတယ်။

    အခုတစ်ကြိမ်ဟာ PPST နဲ့ အာဆီယံအထူးသံတို့ ပထမဆုံးတွေ့ဆုံမှု ဖြစ်လာမှာဖြစ်ပြီး အရပ်သားတွေကို အကာအကွယ်‌ပေး၊ စာနာမှုအကူအညီကိစ္စရပ်တွေ၊ ‌မြန်မာ့အရေးမှာ နိုင်ငံတကာရဲ့ အခန်းကဏ္ဍဘယ်လို ပါဝင်မလဲ စတဲ့ အချက်တွေကို ဆွေးနွေးသွားဖို့ရှိတယ်လို့ PPST က ပြောပါတယ်။

    အပစ်ရပ်လက်မှတ်ထိုးထားတဲ့ ၁၀ ဖွဲ့ထဲက ၇ ဖွဲ့ ဖြစ်တဲ့ ကရင်ငြိမ်းချမ်းရေးကောင်စီ(KNLA/PC)၊ ပအို့ဝ်အမျိုးသားလွတ်မြောက်ရေးအဖွဲ့ချုပ်(PNLO)၊ ရခိုင်ပြည်လွတ်မြောက်ရေးပါတီ(ALP) ၊ ရှမ်းပြည်ပြန်လည်ထူထောင်ရေးကောင်စီ (RCSS)၊ ကရင်အမျိုးသားဒီမိုကရေစီအကျိုးပြုတပ်(DKBA)၊ မွန်ပြည်သစ်ပါတီ(NMSP) နဲ့ လားဟူဒီမိုကရက်တစ်အစည်းအရုံး(LDU)တို့ အာဆီယံအထူးသံနဲ့တွေ့ဆုံမှာဖြစ်ပါတယ်။

    အာဆီယံအထူးသံနဲ့တွေ့ဆုံဖို့ရှိတဲ့ကိစ္စနဲ့ပတ်သက်ပြီး အပစ်ရပ်အဖွဲ့တွေထဲမှာ ပါဝင်ပေမဲ့ စစ်ကောင်စီငြိမ်းချမ်းရေးဆွေးနွေးပွဲကို မတက်ရောက်တဲ့ ကရင်အမျိုးသားအစည်းအရုံး(KNU)၊ ချင်းအမျိုးသားတပ်ဦး(CNF)နဲ့ ကျောင်းသားတပ်(ABSDF)တို့ရဲ့ သဘောထားကိုတော့ မသိရှိရသေးပါဘူး။

    အာဆီယံအထူးသံရဲ့ ပထမဆုံးမြန်မာပြည်ခရီးစဥ်တုန်းကလည်း အပစ်ရပ်လက်မှတ်ထိုးအဖွဲ့တွေနဲ့ တွေ့ဆုံဖို့ ရှိခဲ့ပေမဲ့ ခရီးစဥ်မတိုင်ခင်မှာပဲ တွေ့ဆုံမှုအစီအစဥ် ပျက်သွားတယ်လို့ စစ်ကောင်စီဘက်က PPST ကို အကြောင်းပြန်ခဲ့ပါတယ်။

18. ၂၉ ဇွန် ၂၀၂၂ပူတာအိုက ရဝမ်လူငယ်အသင်းဥက္ကဋ္ဌ ထောင် ၁၀ နှစ်ချမှတ်ခံရ

    ကချင်ပြည်နယ်၊ ပူတာအိုမြို့က ရဝမ်လူငယ်များအသင်း ဥက္ကဋ္ဌ ဦးဖုန်ရော့ဖီနန်ဟာ မနေ့ ဇွန်လ ၂၈ ရက်တုန်းက ထောင်ဒဏ် ၁၀ နှစ်ချမှတ်ခံလိုက်ရတယ်လို့ သိရပါတယ်။

    ဦးဖုန်ရော့ဖီနန်ဟာ အာဏာဖီဆန်ရေးအကြမ်းမဖက်လှုပ်ရှားမှု (CDM)မှာ ပါဝင်သူတွေနဲ့ ပြည်သူ့ကာကွယ်ရေးတပ်ဖွဲ့ (PDF) အဖွဲ့ဝင်တွေကို ထောက်ပံ့တယ်လို့ဆိုကာ အခုလို ထောင်ဒဏ်ချမှတ်ခံလိုက်ရတာလို့ ပူတာအို အကျဥ်းထောင် အရာရှိတစ်ဦးကို ကိုးကားပြီး ပူတာအိုသတင်းမှာ‌ဖော်ပြပါတယ်။

    ဦးဖီနန်ဟာ ခေါင်လန်ဖူးဒေသမှာ သတ္ထုတူးဖော်တာတွေရပ်စေချင်တဲ့ဒေသခံလူထုရဲ့အသံကို သမ္မတ ဦးဝင်းမြင့်လက်ထက်မှာ ပြည်ထောင်စုအဆင့်အထိ တင်ပြတဲ့နေရာမှာ ဦးဆောင်ခဲ့သူဖြစ်ပါတယ်။

    ခေါင်လံဖူးသတ္ထုတူး‌ဖော်ရေးအစီအစဥ်ရပ်သွားတာကြောင့် နစ်နာသူတွေက ဦးဖီနန်အပေါ် ထောင်ချောက်ဆင်ဖမ်းဆီးတာဖြစ်နိုင်တယ်လို့ သူနဲ့ ရင်းနှီးသူတွေက မှတ်ချက်ပေးပါတယ်။

    စစ်အာဏာသိမ်းမှုကို ဆန့်ကျင်ရင်း ပူတာအိုမှာ ပထမဆုံးဖမ်းဆီးခံရတဲ့ လူငယ် ၅ ဦးထဲမှာ သူလည်း ပါဝင်ပါတယ်။ အဲဒီနောက် ၂၀၂၀ ဖေဖော်ဝါရီလဆန်းပိုင်းမှာ ဒုတိယတစ်ကြိမ်ဖမ်းဆီးခံရပြီး အခုလို ထောင်ဒဏ်ချမှတ်ခံလိုက်ရတာဖြစ်ပါတယ်။

19. ၂၉ ဇွန် ၂၀၂၂အာဆီယံအထူးသံရဲ့ မြန်မာခရီးစဥ်စပြီ

    မြန်မာ့အရေးဆိုင်ရာ အာဆီယံအထူးသံတမန် ကမ္ဘောဒီးယားနိုင်ငံခြားရေးဝန်ကြီး ပရက်ဆော့ခွန်းဟာ မြန်မာပြည်ကို လာမယ့် ၅ ရက်ကြာ ခရီးစဥ်ကို ဒီနေ့ ဇွန်လ ၂၉ ရက်မှာ စတင်ပြီလို့ ကမ္ဘောဒီးယားနိုင်ငံခြားရေးဝန်ကြီးဌာနကပြောပါတယ်။

    ဒါဟာ အထူးသံရဲ့ ဒုတိယအကြိမ်မြောက် မြန်မာပြည်ခရီးစဥ်ဖြစ်ပါတယ်။

    အခုခရီးစဥ်မှာတော့ မြန်မာ့အရေး အာဆီယံဘုံသဘောတူညီချက် ၅ ရပ် အကောင်အထည်ဖော်မှု အခြေအနေ၊ မြန်မာအတွက် လူသားချင်းစာနာမှုအကူအညီပေးရေးဆိုင်ရာအစည်းအဝေးနောက်ဆက်တွဲ ကိစ္စတွေကို အဓိက ထား လုပ်ဆောင်မယ်လို့ အထူးသံက သူ့ခရီးစဥ် မတိုင်ခင်မှာပြောထားပါတယ်။

    မြန်မာ့အရေးကို ဖြေရှင်းရာမှာ သက်ဆိုင်ရာ ပါဝင်ပတ်သက်သူတွေအားလုံးနဲ့တွေ့ဆုံခွင့်ရရေးဟာ အထူးသံရဲ့တာဝန်တွေထဲက တစ်ရပ်ဖြစ်ပေမဲ့ အခုတစ်ကြိမ်ခရီးစဥ်မှာလည်း အထူးသံဟာ စစ်ကောင်စီကထောင်ဒဏ်ချမှတ်ထားတဲ့ ဒေါ်ဆောင်ဆန်းစုကြည်နဲ့တွေ့ဆုံခွင့်ရမှာ မဟုတ်ပါဘူး။

    စစ်ကောင်စီဘက်ကတော့ ဥပဒေအရ တရားစွဲဆိုခံရတာတဲ့သူတွေ၊တရားရင်ဆိုင်နေကြတဲ့သူတွေ၊ ပြစ်ဒဏ်ချမှတ်ခံထားရသူတွေနဲ့ပတ်သက်လို့ တွေ့နိုင်ဖို့အတွက် ကန့်သတ်ချက်တွေရှိနေမယ်ဆိုပြီး ပြောထားပါတယ်။

20. ၂၉ ဇွန် ၂၀၂၂မင်းတပ်မြို့နယ်ထဲ တိုက်ပွဲဖြစ်၊ ဖလမ်းမြို့ရဲစခန်းမှာလည်း ပစ်ခတ်မှုဖြစ်

    ချင်းပြည်နယ်၊ မင်းတပ်မြို့နယ်ထဲက ပလုမ်တွီရွာအနီးမှာ စစ်ကောင်စီတပ်နဲ့ ဒေသကာကွယ်ရေးတပ်ဖွဲ့တွေ ဒီနေ့ ဇွန်လ ၂၉ ရက် မနက်ပိုင်းကစလို့ တိုက်ပွဲဖြစ်နေတယ်ဆိုပြီး ချင်းကာကွယ်ရေးတပ်ဖွဲ့-မင်းတပ်(CDF-Mindat)က သတင်းထုတ်ပြန်လာပါတယ်။

    မကွေးတိုင်း၊ ထီးလင်းမြို့နယ်ကနေ မင်းတပ်ဘက်ကို တက်လာတဲ့ စစ်ကောင်စီတပ်နဲ့ ပလုမ်တွီရွာမှာ ကင်းစောင့်နေတဲ့ CDF-Mindat တပ်ဖွဲ့ဝင်တို့ ထိတွေ့တိုက်ပွဲဖြစ်ခဲ့တာလို့ သိရပါတယ်။

    ဒါ့ပြင် မင်းတပ်မြို့ပေါ်မှာအခြေစိုက်တဲ့ အမှတ် ၂၇၄ တပ်ကလည်း မြို့နယ်ထဲက မဒပ်ကျေးရွာဘက်ကို လက်နက်ကြီးနဲ့ ပစ်ခတ်နေတာကြောင့် အရပ်သားတစ်ဦး ဒဏ်ရာရထားတယ်လို့လည်း CDF-Mindat ဘက်က ပြောပါတယ်။

    နောက်ပြီး မနေ့ ဇွန်လ ၂၈ ရက် ညပိုင်းတုန်းကလည်း ဖလမ်းမြို့ပေါ်က မြို့မရဲစခန်းကို အမည်မသိလက်နက်ကိုင်အဖွဲ့က နာရီဝက်ကြာ ဝင်ရောက်ပစ်ခတ်မှုဖြစ်ခဲ့တယ်လို့ မြို့ခံတွေက ပြောပါတယ်။

    ပစ်ခတ်မှုမှာ ထိခိုက်ဒဏ်ရာ ရတဲ့သတင်းမကြားရပေမဲ့ ရဲစခန်းအနီးနားက လူနေအိမ်အချို့နဲ့ ရဲစခန်းခြံစည်းရိုးနံရံတွေမှာတော့ ကျည်ရာတွေတွေ့ရတယ်ဆိုပြီး ဒေသခံတွေက ပြောပါတယ်။