ဖရူဆိုမှာ သတ်ဖြတ်ခံလိုက်ရသူတွေထဲ အသက်မပြည့်သေးသူ ၄ ဦးပါဝင်တယ်လို့ ယူနီဆက်ဖ်ပြော

တိုက်ရိုက် ထုတ်လွှင့်ချက်

1. ၂၆ ဒီဇင်ဘာ ၂၀၂၁ငြိမ်းချမ်းရေးနိုဘယ်ဆုရှင် တောင်အာဖရိက ဘုန်းတော်ကြီးဒက်စ်မွန်တူးတူး ကွယ်လွန်

   

   ဓာတ်ပုံ ရင်းမြစ်, Getty Images

   မြန်မာ့ဒီမိုကရေစီအရေးကို အစဉ်တစိုက်အားပေးထောက်ခံခဲ့တဲ့တောင်အာဖရိက ခရစ်ယာန်ဘုန်းတော်ကြီး ဒက်စ်မွန်တူးတူးဟာ အသက် ၉၀ အရွယ်မှာ ကွယ်လွန်သွားပြီဖြစ်ပါတယ်။

   ဘုန်းတော်ကြီးဟာ တောင်အာဖရိကနိုင်ငံ၊ မြို့တော်ကိပ်တောင်းက ဆေးရုံတစ်ခုမှာ ငြိမ်းချမ်းစွာကွယ်လွန်ခဲ့တယ်လို့ အသင်းတော်ဘက်က မိသားစုကိုယ်စား စာထုတ်ပြန်ခဲ့ပေမဲ့ သေဆုံးရတဲ့အကြောင်းရင်း အသေးစိတ်ကိုတော့ ပြောထားတာမတွေ့ရပါဘူး။

   ဒက်စ်မွန်တူးတူးဟာ တောင်အာဖရိကနိုင်ငံထဲမှာ လူဖြူလူမည်းခွဲခြားတဲ့စနစ်ကို သာသနာ့ဝန်ထမ်းရင်း အကြမ်းမဖက်ဦးဆောင်ဆန့်ကျင်ခဲ့တာကြောင့် ၁၉၈၄ ခုနှစ်မှာ ငြိမ်းချမ်းရေးနိုဘယ်ဆု ရရှိခဲ့သူလည်းဖြစ်ပါတယ်။

   ဒါ့ပြင် သူဟာ နိုင်ငံထဲကလူဖြူလူမည်းခွဲခြားမှုအမှောင်မိုက်ဆုံးနေ့ရက်တွေမှာ နှစ်ဖက်ကျူးလွန်ခဲ့ကြတဲ့လုပ်ရပ်တွေအတွက် သမ္မတနယ်ဆင်မန်ဒဲလားကခန့်အပ်တဲ့ အမှန်တရားနဲ့ရင်ကြားစေ့ရေးကော်မရှင်ဥက္ကဋ္ဌ အဖြစ်လည်း တာဝန်ထမ်းခဲ့သူဖြစ်ပါတယ်။

   ဘုန်းတော်ကြီးတူးတူးဟာ နိုင်ငံတွင်းမှာ လူမည်းတွေ ဖိနှိပ်ခံရမှုကို ထုတ်ဖော်ပြောဆိုခဲ့သူဖြစ်ပေမဲ့ နိုင်ငံရေးအရ ပြောတာမဟုတ်ဘဲ ဘာသာရေးအရပြောဆိုတာလို့ ပြောခဲ့သူလည်းဖြစ်ပါတယ်။

   ၂၀၁၃ ခုနှစ်ကလည်း မြန်မာနိုင်ငံကိုလာရောက်ခဲ့ပြီး ငြိမ်းချမ်းရေး နိုဘယ်ဆုရှင် ဒေါ်အောင်ဆန်းစုကြည်နဲ့လည်းတွေ့ဆုံခဲ့ပါတယ်။

2. ၂၆ ဒီဇင်ဘာ ၂၀၂၁ထားဝယ်မြို့လယ်မှာ ဗုံးပေါက်

   ထားဝယ်မြို့လယ်မှာ ဒီဇင်ဘာလ ၂၆ ရက်နေ့ မနက် ၁၁ နာရီကျော်ခန့်က ဗုံးပေါက်ကွဲခဲ့ကြောင်း ထားဝယ်အခြေစိုက် Dawei Watch သတင်းကရေးပါတယ်။

   စစ်ကောင်စီအာဏာသိမ်းတာကို ဆန့်ကျင်တဲ့ သပိတ်စာတန်းကို စစ်ကောင်စီတပ်ဖွဲ့ဝင်တွေက သွားပြီးဖြုတ်စဥ်မှာ ဗုံးပေါက်ကွဲခဲ့တာလို့ ဒေသခံတစ်ဦးကို ကိုးကားပြီးဆိုပါတယ်။

   အဲ့ဒီစာတန်းမှာ “ သွေးကြွေးဆပ်မည်” လို့ ရေးထားကြောင်း သိရပါတယ်။

   ဗုံးပေါက်ကွဲမှုမှာ အမျိုးသားတစ်ဦးနဲ့ အမျိုးသမီးတစ်ဦးထိခိုက်ဒဏ်ရာရတယ်လို့သိရသလို

   စစ်ကောင်စီတပ်ဖွဲ့ဝင်အချို့ နဲ့ ထိခိုက်မှုရှိတယ်လို့သိရပေမယ့် သီးခြားအတည်ပြုနိုင်ခြင်းမရှိသေးပါဘူး။

   

   ဓာတ်ပုံ ရင်းမြစ်, Dawei Watch

3. ၂၆ ဒီဇင်ဘာ ၂၀၂၁မွန်မှာ တစ်ပတ်အတွင်း NLD ပါတီ ပြည်နယ်ဥက္ကဋ္ဌနဲ့ကိုယ်စားလှယ် ၁ ဦးရဲ့နေအိမ်တွေ ချိပ်ပိတ်ခံရ

   မွန်ပြည်နယ် အမျိုးသားဒီမိုကရေစီအဖွဲ့ချုပ်(NLD)ပါတီ ပြည်နယ်ဥက္ကဋ္ဌ ဒေါက်တာခင်ဆောင်နဲ့ နောက်ထပ်လွှတ်တော် ကိုယ်စားလှယ် ၁ ဦးရဲ့နေအိမ်နဲ့ ပိုင်ဆိုင်မှုတွေကို စစ်ကောင်စီကအခုရက်ပိုင်းအတွင်း ချိပ်ပိတ်ခဲ့တယ်လို့ သိရှိရပါတယ်။

   ဒေါက်တာခင်ဆောင်ဟာ ပြည်နယ်ပါတီဥက္ကဋ္ဌဖြစ်သလို ကျိုက်ထိုမြို့နယ် ပြည်နယ်လွှတ်တော်ကိုယ်စားလှယ်လည်းဖြစ်ပါတယ်။

   ကျိုက်ထိုမြို့၊ မြောက်ပိုင်းရပ်ကွက်၊ ကုန်သည်လမ်းမှာရှိတဲ့ သူ့ရဲ့နေအိမ်နဲ့ဆေးခန်းကို စစ်ကောင်စီတပ်ဖွဲ့တွေက အင်အားဆယ်ချီနဲ့ ဒီဇင်ဘာလ ၂၂ ရက် ညနေပိုင်းမှာ လာရောက်ချိပ်ပိတ်သွားတာဖြစ်တယ်လို့ သိရပါတယ်။

   ဒါ့ပြင် အဲဒီတစ်နေ့တည်းမှာပဲ ပေါင်မြို့၊ ပေါင်းရပ်ကွက်မှာရှိတဲ့ NLD ပါတီပြည်နယ်လွှတ်တော်ကိုယ်စားလှယ် ဦးဇော်ဇော်ထူးနေအိမ်ကိုလည်း စစ်ကောင်စီဘက်က လာရောက်ချိပ်ပိတ်သွားခဲ့တာပါ။

   သူတို့ နှစ်ဦးစလုံးဟာ စစ်တပ်က အာဏာသိမ်းမှုဖြစ်ပြီးနောက် ပုဒ်မ ၅၀၅(က)စာရင်းမှာပါဝင် သူတွေဖြစ်လို့ တိမ်းရှောင်နေကြချိန်မှာ အကြမ်းဖက်အဖွဲ့အစည်းနဲ့ ဆက်စပ်နေတယ်ဆိုတဲ့ စွပ်စွဲချက်နဲ့ စစ်ကောင်စီဘက်က အခုလို လာရောက်ချိပ်ပိတ်သွားတာလို့ သိရပါတယ်။

   စစ်ကောင်စီဟာ ပြီးခဲ့တဲ့လပိုင်းတွေကစလို့ NLD ပါတီဝင်တွေ၊ လွှတ်တော်ကိုယ်စားလှယ်တွေရဲ့နေအိမ်တွေနဲ့ ပိုင်ဆိုင်မှုတွေကို ချိပ်ပိတ်တာတွေ ခပ်စိပ်စိပ်ပြုလုပ်လာတာကိုတွေ့ရပါတယ်။

   

   ဓာတ်ပုံ ရင်းမြစ်, CJ

4. ၂၆ ဒီဇင်ဘာ ၂၀၂၁မန္တလေးမှာ စစ်ကောင်စီတပ်ဖွဲ့ဝင်တစ်ဦးပိုင်ဆိုင်တဲ့ကား ဗုံးပစ်ခံရပြီး ပေါက်ကွဲမှုဖြစ်

   မန္တလေးမြို့၊ အောင်မြေသာစံမြို့နယ်ထဲက လမ်း ၈၀နဲ့ ၈၁ လမ်းကြား၊ ၁၇ လမ်းနဲ့ ၁၈ လမ်းကြားမှာ ရပ်ထားတဲ့ကားတစ်စင်းဟာ ဒီနေ့ ဒီဇင်ဘာလ ၂၆ ရက် မနက်ပိုင်းမှာ ဗုံးပစ်ခံရပြီး ပေါက်ကွဲမှုဖြစ်ခဲ့တယ်လို့ ဒေသခံတွေဆီကေန သိရပါတယ်။

   အဲဒီကားကို စစ်ကောင်စီ ဆေးတပ်က တပ်ကြပ်ကြီးတစ်ဦး ပိုင်ဆိုင်တယ်လို့ ကနဦး သိရှိရပြီး ပေါက်ကွဲမှုကြောင့် အနီးနားက အမျိုးသမီးတစ်ဦး ဒဏ်ရာရခဲ့သလို အဆောက်အအုံမှာရှိတဲ့ မှန်တချို့ ပျက်စီးခဲ့တယ်လို့လည်း သိရပါတယ်။

   ပေါက်ကွဲမှုဖြစ်တဲ့ကားဟာ အဖြူရောင် အိမ်စီးကားအမျိုးအစားဖြစ်ပြီး ရပ်နားချိန်မှာ ဗုံးပစ်ခံခဲ့ရတာလို့လည်း သိရပါတယ်။

   

   ဓာတ်ပုံ ရင်းမြစ်, CJ

5. ၂၆ ဒီဇင်ဘာ ၂၀၂၁ခရစ္စမတ်နေ့က လေးကေ့ကော်

6. ၂၆ ဒီဇင်ဘာ ၂၀၂၁တိုက်ပွဲတွင်းသတင်းရယူနေတဲ့ သတင်းသမားကဗျာဆရာအေစိုင်းကေ လက်နက်ကြီးထိမှန်သေဆုံး

   ဒီဇင်ဘာ ၂၅ ရက်က လေးကေ့ကော်ဒေသတွင်း၊ထီးမယ်ဝါးခီးတိုက်ပွဲ မှာ စစ်ကောင်စီရဲ့ပစ်ခတ်မှုကြောင့် တိုက်ပွဲတွင်း သတင်းယူနေတဲ့ ဖက်ဒရယ်ဂျာနယ်ရဲ့ အယ်ဒီတာတစ်ဦးဖြစ်တဲ့ သတင်းစာဆရာ၊ ကဗျာဆရာအေစိုင်းကေဟာ လက်နက်ကြီးထိမှန်သေဆုံးခဲ့ပါတယ်။

   ဒီကနေ့မှာတော့ ကဗျာဆရာအေစိုင်းကေ ရဲ့ မြေချဈာပနကို ဒီကနေ့တောတွင်းတစ်နေရာမှာ ပြုလုပ်ခဲ့ပါတယ်။ မနေ့က စစ်ကောင်စီရဲ့ ပစ်ခတ်မှုတွေကြား သူ့အနားကိုလက်နက်ကြီးကျခဲ့ရာက ဦးခေါင်းကိုထိမှန်သေဆုံးခဲ့တာဖြစ်ပါတယ်။

   '' မနေ့ကတုန်းက ကျသွားတာပါ။ သူတို့ ( စစ်ကောင်စီ) က လက်နက်ကြီးတွေစပစ်တာ။မေတ္တာလင်းမြိုင်နဲ့ မယ်ဝါးခီကို ဆက်တိုက် တစ်နာရီလောက်ပစ်တာ။ အဲဒီမှာ ကျွန်တော်တို့ နေရာနားကို လက်နက်ကြီးကျတာပေါ့။ သူခေါင်းကိုထိသွားတာပါ ’’ လို့ အဲဒီမှာ ရောက်နေသူတစ်ဦးက ပြောပြပါတယ်။

   တိုက်ပွဲဖြစ်ပွားမှု ၁၁ရက်မြောက်နေ့ဖြစ်တဲ့ မနေ့က မနက်အစောပိုင်း ၉နာရီကျော်မှာပဲ စစ်ကောင်စီဘက်က အဲဒီဒေသမှာ လက်နက်ကြီးတွေ နဲ့ ဆက်တိုက်ပစ်ခတ်ခဲ့တဲ့ အပြင် မြေပြင်ထိုးစစ်မှာလည်း အင်အားတိုး လုပ်ဆောင်ခဲ့တာပါ။

   နောက်နေ့လယ်ပိုင်း နဲ့ ညနေပိုင်းမှာလည်း စစ်ကောင်စီက လေယာဉ်သုံး ပစ်ခတ်တာတွေလုပ်ခဲ့တယ်လို့ အဲဒီမှာ ရှိနေတဲ့ သတင်းရင်းမြစ်က ဘီဘီစီကိုပြောပါတယ်။ မနေ့ စစ်ကောင်စီရဲ့ အဲဒီလိုပစ်ခတ်မှုတွေနဲ့ လေကြောင်းတိုက်ခိုက်မှုတွေကြောင့် အဲဒီတိုက်ပွဲအတွင်း ပြည်သူ့ကာကွယ်ရေးတပ် PDF တပ်ဖွဲ့ဝင် အချို့ကျဆုံးခဲ့ သလို ဒေသခံအရပ်သားတွေထိခိုက် ဒဏ်ရာရသေဆုံးတာလည်းရှိခဲ့တယ်လို့ တိုက်ပွဲတွင်းသတင်းရယူနေသူအချို့ကပြောပါတယ်။

   

   ဓာတ်ပုံ ရင်းမြစ်, PVTV

   

   ဓာတ်ပုံ ရင်းမြစ်, PVTV

7. ၂၆ ဒီဇင်ဘာ ၂၀၂၁မဟာမိတ်တွေနဲ့ ညှိနှိုင်းရေးဆွဲထားတဲ့ဗျူဟာမြောက်အစီအစဉ်ကို အဆင့်လိုက်အကောင်အထည်ဖော်နေတယ်လို့ NUG ကာကွယ်ရေးဝန်ကြီးပြော

   

   ဓာတ်ပုံ ရင်းမြစ်, MPA

   လက်ရှိ ပြည်သူ့ ခုခံ တွန်းလှန်စစ်ဟာ အစီအစဉ်ရှိရှိ ဆင်နွှဲနေတာလို့ဆိုပြီး အမျိုးသားညီညွတ်ရေးအစိုးရ(NUG)ရဲ့ ကာကွယ်ရေးဝန်ကြီး ဦးရည်မွန်က ကြေညာချက်တစ်စောင်ထုတ်ပြန်ပြောဆိုလိုက်ပါတယ်။

   မဟာမိတ်တွေနဲ့ညှိနှိုင်းရေးဆွဲထားတဲ့ ဗျူဟာမြောက်အစီအစဉ်ကို အဆင့်လိုက် စနစ်တကျ အကောင်အထည်ဖော်နေပြီး၊ ပြည်သူ့ တော်လှန်ရေးရဲ့ အမိန့်ပေးစနစ်ယန္တရား (Chain of Command) ဟာ NUG ကာကွယ်ရေးဌာနနဲ့ မဟာမိတ်တွေ ပူးပေါင်းဖော်ဆောင်ထားတာဖြစ်တယ်လို့ဆိုပါတယ်။

   ဒေသတိုင်း၊တပ်ဖွဲ့တိုင်းဆီကို အဲဒီ Chain of Command ရောက်ရှိဖို့ မနားမနေကြိုးစားနေတယ်လို့ NUG ကာကွယ်ရေး ဝန်ကြီးကပြောပါတယ်။

   ကရင်ပြည်နယ် မြဝတီမြို့တောင်ဘက် လေးကေ့ကော်ဒေသတွင်း ဖြစ်ပွားနေတဲ့ စစ်ကောင်စီနဲ့ ကရင်အမျိုးသားလွတ်မြောက်ရေးတပ်မတော် KNLAနဲ့ PDF ပူးပေါင်း တပ်ဖွဲ့တွေနဲ့ကြား တိုက်ပွဲတွေမှာ PDF လူငယ်တွေ အကျအဆုံးရှိတဲ့သတင်းတွေ လူမှုကွန်ရက်တွေပေါ်ပျံ့နှံ့လာပြီးနောက် NUG အနေနဲ့ PDF အဖွဲ့တွေနဲ့ ပတ်သက်ပြီး ဘာတွေ လုပ်ဆောင်ထားလဲ၊ ဘယ်လို ထောက်ပံ့မှုတွေ ရှိလည်းဆိုတဲ့မေးခွန်းတွေလည်း ထွက်လာခဲ့ပါတယ်။

   အဲဒီမေးခွန်းတွေနဲ့ပတ်သက်ပြီး ပြောဆိုမှုများလာချိန် ဦးရည်မွန်က အဲဒီလိုထုတ်ပြန်ပြောကြားလာတာပါ။

   PDF ရဲ့ဘော်တွေ ထိခိုက်ကျဆုံးတဲ့ သတင်းတွေကြားတိုင်း NUG အပေါ် အားမလို အားမရ ဖြစ်ကြတာ၊ ဝေဖန်ကြတာကို အလေးထား နားလည်ပြီး တပြိုင်တည်းမှာပဲ စစ်ရေးနဲ့ ဆိုင်တဲ့ ဗျူဟာမြောက် စီမံချက်တွေကိုတော့ အများကိုအသိပေး ရှင်းပြတာမျိုး မလုပ်နိုင်တာကို နားလည်ပေးပါလို့ ဦးရည်မွန်က ပန်ကြားပါတယ်။

   လူအင်အား၊ ရန်ပုံငွေအင်အား၊ လက်နက်အင်အား ဆိုတာတွေဟာ လျှို့ဝှက် စောင့်စည်းရမယ့် အချက်အလက်တွေ ဖြစ်ပြီး၊ NUG ကာကွယ်ရေး ဌာန အနေနဲ့ ကိုယ့်မှာရှိတဲ့ ရင်းမြစ်တွေကို အကျိုးရှိဆုံး၊ အထိရောက်ဆုံး ဖြစ်ဖို့ စီမံခန့်ခွဲ သုံးစွဲနေတယ်လို့ ဆိုပါတယ်။

   အခုဆိုရင် အမြဲတမ်း PDF တပ်ရင်းတွေ ရာနဲ့ချီ ဖွဲ့ထားပြီး ဖြစ်သလို၊ လက်နက်တပ်ဆင်တာကိုလည်း တနိုင်ငံလုံး အနေနဲ့ မျှမျှတတ ဖြစ်အောင် လုပ်ဆောင်နေတယ်လို့ NUG ကာကွယ်ရေး ဝန်ကြီး ဦးရည်မွန်က ထုတ်ပြန်ချက်ထဲ ပြောထားပါတယ်။

8. ၂၆ ဒီဇင်ဘာ ၂၀၂၁ဖရူဆိုတိုက်ခိုက်မှုမှာပျောက်ဆုံးနေတဲ့ Save the Children ဝန်ထမ်း ၂ ဦးအတွက် အလွန်အမင်းစိုးရိမ်ကြောင်း UNICEF မြန်မာ ပြော

   ကယား(ကရင်နီ)ပြည်နယ်ထဲက ဖရူဆိုမြို့နယ်မှာ ဒီဇင်ဘာလ ဒီဇင်ဘာလ ၂၄ ရက်တုန်းက အရပ်သားတွေ သတ်ဖြတ်ခံရတဲ့ဖြစ်စဉ်မှာ ကလေးသူငယ်စောင့်ရှောက်ရေးဆိုင်ရာအဖွဲ့(Save the Children)က ဝန်ထမ်း ၂ ဦး ပျောက်ဆုံးနေတဲ့အပေါ် အလွန်အမင်းစိုးရိမ်တယ်လို့ ကုလသမဂ္ဂကလေးများရန်ပုံငွေအဖွဲ့(UNICEF) မြန်မာရုံးက ထုတ်ပြန်ပြောဆိုလာပါတယ်။

   အဲဒီဝန်ထမ်းနှစ်ယောက်ရဲ့ဘေးကင်းလုံခြုံမှုအတွက်လည်း စိုးရိမ်သလို ဖရူဆိုဖြစ်စဉ်ကို ကျူးလွန်တဲ့သူတွေဟာလည်း တာဝန်ခံမှုရှိစေရမယ်လို့ ထုတ်ပြန်ချက်ကဆိုပါတယ်။

   Save the Children ကတော့ ဖရူဆိုမြို့နယ်ထဲ အရပ်သားတွေ သတ်ဖြတ်ခံရတဲ့ဖြစ်စဉ်မှာ အဖွဲ့ရဲ့ ဝန်ထမ်းတွေစီးနင်းတဲ့ယာဉ်လည်း မီးရှို့ဖျက်ဆီးခံရပြီး ဝန်ထမ်းနှစ်ဦးပျောက်ဆုံးနေတယ်လို့ အစောပိုင်းမှာ သတင်းထုတ်ပြန်ထားပါတယ်။

   Skip X post

   X ၏အကြောင်းအရာများကို ပြခွင့်ပြုမှာလား။

   ယခုဆောင်းပါးတွင် X မှ အကြာင်းအရာများပါဝင်ပါသည်။ ယင်းဆိုက်မှ ကွတ်ကီးနှင့်အခြားနည်းပညာများသုံးနိုင်သဖြင့် စာမျက်နှာကို မဖွင့်ခင် သင့်ခွင့်ပြုချက်ကိုတောင်းခံပါသည်။ သင်မဆုံးဖြတ်ခင် X ကွတ်ကီးမူဝါဒ နှင့် ကိုယ်ရေးအချက်အလက်လုံခြုံမှု မူဝါဒ တို့ကို ဖတ်ရှုနိုင်ပါသည်။ သဘောတူလျင် 'လက်ခံပြီးဆက်သွားပါမည်' ဆိုသည်ကို ရွေးချယ်ပေးပါ။

   သဘောတူပြီးရှေ့ဆက်ကြည့်ရန်

   သတိပေးချက်- ပြင်ပဝက်ဆိုက်များတွင်ပါဝင်သောအကြောင်းအရာများအတွက် ဘီဘီစီကတာဝန်မယူပါ။

   End of X post

   ဒီဖြစ်စဉ်ကို စစ်တပ်က ပြုလုပ်တယ်လို့ သတင်းတွေအရ ကြားသိထားရကြောင်းနဲ့ အရပ်သားတွေ သတ်ဖြတ်ခံရမှုကို ပြစ်တင်ရှုတ်ချကြောင်း Save the Children ထုတ်ပြန်ပါတယ်။

   ဒီဖြစ်စဉ်ကို စစ်ကောင်စီသတင်းပြန်ကြားရေးဘက်က ထုတ်ပြန်ရာမှာ ဖရူဆိုမှာ လုံခြုံရေးအတွက် ယာဉ် ၇ စီးကို စစ်ဆေးစဉ်မှာ မရပ်တန့်ဘဲ လက်နက်ငယ်တွေနဲ့ စပစ်ပြီးထွက်ပြေးလို့ ပြန်ပစ်ခတ်ဖမ်းဆီးခဲ့တဲ့ ဖြစ်စဉ်ဖြစ်ခဲ့တယ်လို့ ထုတ်ပြန်ထားပါတယ်။

   မြေပြင်အခြေအနေသိရှိသူ ဒေသခံတချို့ကတော့ ဖရူဆိုမြို့နယ်ထဲမှာ မနေ့ ဒီဇင်ဘာ ၂၄ ရက် မွန်းလွဲ ၁နာရီကနေ ညနေ ၅နာရီအထိ ကရင်နီတပ်မတော်၊ ကရင်နီအမျိုးသားတိုးတက်ရေးတပ် KA, KNDF ပူးပေါင်းတပ်ဖွဲ့တွေနဲ့ စစ်ကောင်စီတပ်တွေအကြား တိုက်ပွဲဖြစ်ပွားခဲ့လို့ အဲဒီနားက ဒေသခံတွေက စစ်ဘေးရှောင်ထွက်ပြေးခဲ့ပြီး စစ်ရှောင်တချို့ မီးရှို့သတ်ဖြတ်ခံရတာတွေ ရှိခဲ့တယ်လို့ ပြောပါတယ်။

9. ၂၅ ဒီဇင်ဘာ ၂၀၂၁ဖရူဆို တိုက်ခိုက်မှုမှာ ဝန်ထမ်းနှစ်ဦးပျောက်ဆုံးနေတယ်လို့ Save the Children ပြော

   ကယားပြည်နယ် ဖရူဆိုမြို့နယ်မှာ မနေ့က အရပ်သားတွေ သတ်ဖြတ်ခံရတဲ့ ဖြစ်စဥ်မှာ Save the Children -Myanmar ရဲ့ ဝန်ထမ်းစီးနင်းတဲ့ယာဥ်လည်း မီးရှို့ဖျက်ဆီးခံရပြီး ဝန်ထမ်းနှစ်ဦးပျောက်ဆုံးနေတယ်လို့ အဲဒီအဖွဲ့က ပြောပါတယ်။

   ဒီဖြစ်စဥ်ကို စစ်တပ်က ပြုလုပ်တယ်လို့ သတင်းတွေအရ ကြားသိထားရကြောင်းနဲ့ အရပ်သားတွေ သတ်ဖြတ်ခံရမှုကို ပြစ်တင်ရှုတ်ချကြောင်း Save the Children ထုတ်ပြန်ပါတယ်။

   ဒီဖြစ်စဥ်ကို စစ်ကောင်စီ သတင်းပြန်ကြားရေးဘက်က ထုတ်ပြန်ရာမှာ ဖရူဆိုမှာ လုံခြုံရေးအတွက် ယာဥ် ၇ စီးကို စစ်ဆေးစဥ်မှာ မရပ်တန့်ဘဲ လက်နက်ငယ်တွေနဲ့ စပစ်ပြီးထွက်ပြေးလို့ ပြန်ပစ်ခတ်ဖမ်းဆီးခဲ့တဲ့ ဖြစ်စဥ်ဖြစ်ခဲ့တယ်လို့ ထုတ်ပြန်ထားပါတယ်။

   အဲဒီယာဥ်တွေပေါ်ကနေ KNPP နဲ့ PDF အဖွဲ့ဝင်တွေက ပစ်ခတ်တယ်လို့ ဆိုပြီး အဲဒီပစ်ခတ်သူတချို့ ကို လက်နက်ခဲယမ်းတွေနဲ့အတူ အသေဖမ်းဆီးရမိတယ်လို့လည်း ဆိုပါတယ်။

   ဒါ့အပြင် အဲဒီပစ်ခတ်မှုကြောင့် အဲဒီအဖွဲ့တွေအတွက် စားသောက်ကုန်တွေတင်ထားတဲ့ ယာဥ် ၇ စီးလည်း မီးလောင်ပျက်စီးခဲ့တယ်လို့ ထုတ်ပြန်ထားပြီး သေဆုံးသူ၊ အသေဖမ်းဆီးရမိတယ်ဆိုသူ အရေအတွက်ကို အတိအကျ မဖော်ပြထားပါဘူး။

   မြေပြင်အခြေအနေသိရှိသူ ဒေသခံတချို့က ဖရူဆိုမြို့နယ်ထဲမှာ မနေ့ ဒီဇင်ဘာ ၂၄ ရက် မွန်းလွဲ ၁နာရီကနေ ညနေ ၅နာရီအထိ ကရင်နီတပ်မတော်၊ ကရင်နီအမျိုးသားတိုးတက်ရေးတပ် KA, KNDF ပူးပေါင်းတပ်ဖွဲ့တွေနဲ့ စစ်ကောင်စီတပ်တွေအကြား တိုက်ပွဲဖြစ်ပွားခဲ့လို့ အဲဒီနားက ဒေသခံတွေက စစ်ဘေးရှောင်ထွက်ပြေးခဲ့ပြီး စစ်ရှောင်တချို့ မီးရှို့သတ်ဖြတ်ခံရတာတွေ ရှိခဲ့တယ်လို့ ပြောပါတယ်။

   မီးရှို့သတ်ဖြတ်ခံရသူအရေအတွက်က ၃၀ ကျော်အထိရှိနိုင်တယ်လို့ ခန့်မှန်းပြောဆိုထားပြီး မီးလောင်ကျွမ်းမှုကြောင့် သေဆုံးသူအရေအတွက်ကို သီးခြားအတည်မပြုနိုင်သေးဘဲ ဘီဘီစီက ဆက်လက်စုံစမ်းနေပါတယ်။

10. ၂၅ ဒီဇင်ဘာ ၂၀၂၁

11. ၂၅ ဒီဇင်ဘာ ၂၀၂၁ပုပ်ရဟန်းမင်းကြီး ခရစ္စမတ် သတင်းစကားမှာ မြန်မာအကြောင်း ထည့်သွင်းပြောကြား

    

    ဓာတ်ပုံ ရင်းမြစ်, Getty Images

    ပုပ်ရဟန်းမင်းကြီး ဖရန့်စစ်က ခရစ္စမတ် အထိမ်းအမှတ် သတင်းစကား ပြောကြားရာမှာ လူအချင်းချင်းနဲ့ နိုင်ငံတကာ ဆက်ဆံရေးတွေမှာ ဆန့်ကျင်ကွဲပြားမှုတွေ တိုးလာနေပြီး ဆွေးနွေးပြောဆိုမှုတွေကသာ ပဋိပက္ခတွေကို ဖြေရှင်းနိုင်မယ်လို့ ပြောဆိုပါတယ်။

    သူ့ရဲ့ သတင်းစကားပြောကြားချက်မှာ လူတစ်ဦးချင်းနဲ့ ကမ္ဘာ့ခေါင်းဆောင်တွေကို တင်းမာနေကြမယ့်အစား အချင်းချင်း စကားပြောဆိုကြဖို့ ပါရှိပါတယ်။

    ပြီးခဲ့တဲ့ သီတင်းပတ်က အသက် ၈၅ နှစ် ပြည့်ခဲ့တဲ့ ပုပ် ဖရန့်စစ်က ပဋိပက္ခတွေ၊ တင်းမာမှုတွေနဲ့ အကျပ်အတည်းတွေ ရင်ဆိုင်နေရတဲ့ မြန်မာနိုင်ငံအပါအဝင် ဆီးရီးယား၊ အာဖဂန်နစ္စတန်၊ ယူကရိန်း၊ တောင်ဆူဒန်နဲ့ တခြားနေရာတွေရဲ့ အကြောင်းကိုလည်း ထည့်သွင်းပြောကြားခဲ့ပါတယ်။

    ကိုဗစ်ကပ်ရောဂါတားဆီးရေး အကန့်အသတ်တွေကြောင့် သတင်းစကားပြောကြားမှုကို ခန်းမပြင်ပ ပြောဆိုမှုအဖြစ် ပြုလုပ်ခဲ့ပြီး သူ့ပြောကြားချက်ထဲမှာ "dialogue""ဆွေးနွေးပြောဆိုမှု" ဆိုတဲ့ စကားလုံးကို သူပြောကြားခဲ့တဲ့ စာနှစ်မျက်နှာကျော်မှာ ၁၁ ကြိမ် ထည့်သွင်းသုံးနှုန်းပြောဆိုခဲ့ပါတယ်။

    ကိုဗစ်ကပ်ရောဂါကူးစက်မှု ရိုက်ခတ်မှုတွေကြောင့်လည်း နိုင်ငံတကာအဆင့် ပဋိပက္ခ ဖြေရှင်းရေးတွေကို ဟန့်တားနှောင့်ယှက်နေတယ်လို့လည်း ပြောကြားခဲ့ပါတယ်။

    ဗာတီကန်စီးတီး စိန့်ပီတာရင်ပြင်မှာ ပြုလုပ်တဲ့ သတင်းစကားပြောဆိုမှုကို ကိုဗစ်အကန့်အသတ်တွေကြားက ထောင်ချီတဲ့ ကက်သလစ်ဘာသာဝင် တွေတက်ရောက်ခဲ့ကြပါတယ်။

    

    ဓာတ်ပုံ ရင်းမြစ်, Getty Images

12. ၂၅ ဒီဇင်ဘာ ၂၀၂၁မင်းပြား - တလင်းမှာစုထားတဲ့ ကောက်လှိုင်းစည်းထောင်ချီ မီးရှို့ခံရ

13. ၂၅ ဒီဇင်ဘာ ၂၀၂၁နယ်ခြားစောင့်တပ်ဖွဲ့ဝင် ၄ ဦးကို စစ်ကောင်စီတပ်တွေသတ်ဖြတ်မှု ကန့်ကွက်ရှုတ်ချကြောင်း ကလလတ ထုတ်ပြန်

    ကရင်နီပြည်လူမျိုးပေါင်းစုံပြည်သူ့လွတ်မြောက်ရေးတပ်ဦး (ကလလတ) ရဲ့ တပ်ဖွဲ့ဝင် လေးဦးကို စစ်ကောင်စီတပ်တွေက ဖမ်းဆီးပြီး ကြိုးတုပ်ကာ ရက်ရက်စက် စက်သတ်ဖြတ်ခဲ့တဲ့အပေါ် ပြင်းပြင်းထန်ထန် ကန့်ကွက်ရှုတ်ချကြောင်း ဒီကနေ့ ဒီဇင်ဘာ ၂၅ ရက်နေ့စွဲနဲ့ ကလလတရဲ့ ဗဟိုကော်မတီက ထုတ်ပြန်လာပါတယ်။

    မနေ့ ဒီဇင်ဘာ ၂၄ ရက်မှာ ဖရူဆိုမြို့နယ်၊ မူဆိုကျေးရွာအနီး ဒေသခံရွာသား ၃၅ ဦးကို စစ်တပ်က ဖမ်းဆီးထားလို့ ပြည်သူတွေက နယ်ခြားစောင့်တပ်ဖြစ်တဲ့ ၎င်းတို့အဖွဲ့ထံ အကူအညီတောင်းခံခဲ့တယ်လို့ ထုတ်ပြန်ချက်က ဖော်ပြထားပါတယ်။အဲဒါကြောင့် နယ်ခြားစောင့်တပ်ရဲဘော် ၄ ဦးက ညှိနှိုင်းပေးဖို့ သွားရောက်စဉ် တပ်ဖွဲ့ဝင် ၄ ဦးလုံးကို စစ်တပ်က ဖမ်းဆီးပြီး လက်ပြန်ကြိုးတုပ်ကာ ဦးခေါင်းကို ပစ်ခတ် သတ်ဖြတ်ခဲ့တယ်လို့ ဆိုပါတယ်။

    ဒါ့အပြင် ဖမ်းဆီးခံထားရတဲ့ ကလေးနဲ့အမျိုးသမီးတွေအပါအဝင် ရွာသား ၃၅ ဦးကိုလည်း စစ်တပ်က ကားပေါ်ဓာတ်ဆီလောင်းပြီး မီးရှို့သတ်ဖြတ်ခဲ့တယ်လို့ ကလလတ ထုတ်ပြန်ချက်က ဆိုပါတယ်။

    ကလလတ ဟာ ၁၉၉၄ ခုနှစ်မှာ အပစ်အခတ်ရပ်စွဲရေး သဘောတူညီချက်အရ ငြိမ်းချမ်းရေးရယူထားပြီး နယ်စပ်ဒေသတည်ငြိမ်ရေးနဲ့လူထုလုံခြုံရေးအတွက် နယ်ခြားစောင့်တပ်အဖြစ် လက်ခံဖွဲ့စည်းခဲ့တယ်လို့ဆိုပါတယ်။

    ကလလတ နဲ့ နယ်ခြားစောင့်တပ်ဟာ အပစ်အခတ်ရပ်စဲရေးနဲ့ငြိမ်းချမ်းရေးကို ထိန်းသိမ်းခဲ့ပေမယ့် ခုလို စစ်တပ်က မိမိတို့ ပြည်သူလူထုအပေါ် ဥပဒေမဲ့ အကြမ်းဖက်ရာဇဝတ်မှုကျူးလွန်တဲ့အတွက် ပြင်းပြင်းထန်ထန်ကန့် ကွက်ရှုတ်ချတယ်လို့ ဆိုပါတယ်။မနေ့က အဲဒီ ဖြစ်စဉ်နဲ့ပတ်သက်လို့ စစ်ကောင်စီဘက်ကတော့ တစ်စုံတစ်ရာထုတ်ပြန်ပြောကြားတာမရှိသေးပါဘူး။

    

    ဓာတ်ပုံ ရင်းမြစ်, KNDF

14. ၂၅ ဒီဇင်ဘာ ၂၀၂၁မြန်မာစစ်ရှောင်တွေအတွက် စားနပ်ရိက္ခာနဲ့ဆေးဝါးတွေ ပြင်ဆင်ထားဖို့ ထိုင်းဝန်ကြီးချုပ် ပရာယွတ်ချန်အိုချာ ညွှန်ကြားထား

    မြန်မာစစ်တပ်နဲ့ကရင်တိုင်းရင်းသားလက်နက်ကိုင်တပ်ဖွဲ့တွေကြား ဖြစ်ပွားနေတဲ့ တိုက်ပွဲတွေကြောင့် သောင်ရင်းမြစ်ကိုဖြတ်ပြီး ထိုင်းနိုင်ငံ၊ မဲဆောက်ခရိုင်အတွင်း ထွက်ပြေး တိမ်းရှောင်လာရတဲ့ မြန်မာစစ်ရှောင်အားလုံးကို လူသားချင်းစာနာထောက်ထားမှုပြသတဲ့အနေနဲ့ လိုအပ်တဲ့ အကူအညီတွေပေးသွားမယ်လို့ထိုင်းဝန်ကြီးချုပ် ပရာယွတ်ချန်အိုချာကပြောပါတယ်။

    စစ်ရှောင်တွေအတွက်လိုအပ်တဲ့ စားနပ်ရိက္ခာနဲ့ ဆေးဝါးတွေကို ပြင်ဆင်ထားဖို့ သက်ဆိုင်ရာ အာဏာပိုင်တွေကို ထိုင်းဝန်ကြီးချုပ်က သောကြာနေ့မှာ ညွှန်ကြားခဲ့တယ်လို့ ဘန်ကောက်ပို့စ်သတင်းက ဖော်ပြထားပါတယ်။ ထိုင်းနိုင်ငံဘက်ခြမ်းကို ထွက်ပြေးတိမ်းရှောင်လာသူဟာ စုစုပေါင်း သောင်းနဲ့ချီ ရှိနေပြီဖြစ်ပေမယ့်လို့ အခြေအနေတွေ တည်ငြိမ်သွားတဲ့အခါ မြန်မာဘက်ကို ပြန်ကြဖို့ လိုအပ်တာကြောင့် သူတို့အတွက် ဒုက္ခသည်စခန်းအသစ် စတင်တည်ဆောက်ဖို့တော့ မရှိဘူးလို့လည်း ထိုင်းဝန်ကြီးချုပ်က ဆိုပါတယ်။

    

    ဓာတ်ပုံ ရင်းမြစ်, Social Media

15. ၂၅ ဒီဇင်ဘာ ၂၀၂၁ဒေါ်အောင်ဆန်းစုကြည်နဲ့တွေ့ဆုံခွင့်ပေးဖို့ အိန္ဒိယ နိုင်ငံခြားရေးအတွင်းဝန် တောင်းဆိုမှု စစ်ကောင်စီ ငြင်းပယ်

    အိန္ဒိယ နိုင်ငံခြားရေးအတွင်းဝန် မစ္စတာ Harsh Vardhan Shringla ရဲ့နှစ်ရက်တာ မြန်မာခရီးစဉ်အတွင်း NLD ပါတီခေါင်းဆောင်၊ နိုဘယ်ငြိမ်းချမ်းရေးဆုရှင် ဒေါ်အောင်ဆန်းစုကြည်နဲ့တွေ့ဆုံခွင့်ပေးဖို့ မြန်မာအာဏာသိမ်း စစ်ခေါင်းဆောင်ကို တောင်းဆိုခဲ့ပေမယ့် ငြင်းပယ်ခံခဲ့ရတယ်လို့ The Times of India သတင်းက ဖော်ပြလာပါတယ်။

    ဒေါ်အောင်ဆန်းစုကြည်နဲ့ တွေ့ဆုံခွင့်ကို ငြင်းပယ်ခံခဲ့ရပြီး အဲဒီအစားပါတီ တာဝန်ရှိသူတစ်ဦးနဲ့ တွေ့ဆုံခွင့်ရခဲ့တယ်လို့ဖော်ပြထားပြီး ဘယ်သူဆိုတာတော့ မပါရှိပါဘူး။

    နိုင်ငံခြားရေးအတွင်းဝန်ဟာ မြန်မာကို ဒီဇင်ဘာ ၂၂ နဲ့၂၃ ရက် နှစ်ရက်တာ လာရောက်ခဲ့စဉ် စစ်ကောင်စီ ဥက္ကဋ္ဌ၊ မြန်မာနိုင်ငံအခြေစိုက် သံအမတ်ကြီးတွေနဲ့ ကုလကိုယ်စားလှယ်တွေနဲ့လည်း တွေ့ဆုံခဲ့တယ်လို့ အိန္ဒိယသံရုံးက ထုတ်ပြန်ထားပါတယ်။ဒါ့အပြင် NLD ပါတီအပါအဝင် နိုင်ငံရေးပါတီတွေနဲ့လည်းတွေ့ ဆုံဆွေးနွေးခဲ့တယ်လို့ဆိုထားပါတယ်။

    အဲဒီလိုတွေ့ဆုံမှုရာမှာ သက်ဆိုင်သူတွေအားလုံးကို မြန်မာနိုင်ငံမှာ ဒီမိုကရေစီ လမ်းကြောင်း ဆောလျင်စွာပြန်သွားရေး၊ ထိန်းသိမ်းခံရသူတွေနဲ့ နိုင်ငံရေး အကျဉ်းသားတွေကိုပြန်လွှတ်ပေးရေး၊ တွေ့ဆုံဆွေးနွေးအဖြေရှာရေးနဲ့ အကြမ်းဖက်မှုအားလုံး အဆုံးသတ်ရေးတို့ကို အလေးပေးပြောကြားခဲ့တယ်လို့ ဆိုပါတယ်။

    

    ဓာတ်ပုံ ရင်းမြစ်, Ministry of External affairs, Government of India

16. ၂၅ ဒီဇင်ဘာ ၂၀၂၁မြန်မာဘက်က ပစ်ခတ်တဲ့ လက်နက်ကြီးကျည် ထိုင်းဘက်ကို ကျ

    မြန်မာဘက်က ပစ်ခတ်လိုက်တဲ့ လက်နက်ကြီးကျည်ဟာ ဒီနေ့ ဒီဇင်ဘာ ၂၅ ရက်မနက် ဆယ်နာရီခန့်မှာ ထိုင်းနိုင်ငံ၊ မဲဆောက်မြို့၊ မော်လီချိုင်းကျေးရွာကို ကျရောက်ခဲ့တယ်လို့ ဒေသတွင်း သတင်းမီဒီယာတစ်ခုဖြစ်တဲ့ ကရင်အမျိုးသားမီဒီယာက ဖော်ပြလာပါတယ်။

    လက်နက်ကြီးကျည် ကျရောက်မှုကြောင့် အိမ်တစ်အိမ်ပျက်စီးခဲ့ပြီး လူတော့ ထိခိုက်ဒဏ်ရာရတာ မရှိဘူးလို့ အဲဒီကျေးရွာ ရွာလူကြီးက ပြောကြားတယ်လို့သတင်းက ဖော်ပြထားပါတယ်။

    ဒီဖြစ်စဉ်နဲ့ပတ်သက်လို့ထိုင်းအာဏာပိုင်တွေဘက်ကတော့ တစ်စုံတစ်ရာ ထုတ်ပြန်လာတာမရှိသေးပါဘူး။

    ဒီမတိုင်ခင် ပြီးခဲ့တဲ့ရက်တွေအတွင်းလေးကေ့ကော်မှာ တိုက်ပွဲတွေကြောင့် ထိုင်းဘက်ထွက်ပြေးတိမ်းရှောင်ရသူ မြန်မာစစ်ဘေးရှောင်တွေ ထောင်ချီရှိခဲ့ပါတယ်။

    အဲဒီရက်ပိုင်းတုန်းကလည်း ထိုင်းဘက်က ကြံစိုက်ခင်းတစ်ခုထဲ မြန်မာဘက်ကပစ်တဲ့လက်နက်ကြီးကျည်ကျရောက်ခဲ့လို့ စိုက်ခင်းမီးလောင်တာရှိခဲ့တဲ့နောက် မြန်မာဘက်က ပစ်ခတ်မှုတွေနဲ့ပတ်သက်လို့ ထိုင်းအာဏာပိုင်တွေက ကန့်ကွက်စာပေးပို့ခဲ့ပြီး နောက်ထပ်ပစ်ခတ်မှုတွေရှိရင် လက်တုံ့ပြန်ဖို့အသင့်လို့ ပြောကြားထားသလို ထိုင်းတော်ဝင်တပ်မတော်က တပ်ဖွဲ့တွေကိုလည်း နယ်စပ်မှာ ချထားခဲ့ပါတယ်။

    အဲဒီနောက် ဒီဇင်ဘာ ၂၃ ရက် ညပိုင်းမှာ စစ်ကောင်စီတပ်တွေက လေးကေ့ကော်မြို့သစ်ကို လေကြောင်းပစ်ခတ်မှုတွေ ပြုလုပ်ခဲ့ပြန်တာကြောင့်ထိုင်းဘက်ခြမ်းကို မြန်မာစစ်ရှောင်တွေ ညတွင်းချင်းထွက်ပြေးတိမ်းရှောင်ခဲ့ရပြီး ယခုအခါ ထိုင်းဘက်ခြမ်းကို စစ်ရှောင်ရောက်ရှိသူအရေအတွက်သောင်းဂဏန်းကျော်လာပြီလို့ စစ်ရှောင်အရေးကူညီပေးနေသူတွေ ကပြောကြားထားပါတယ်။

    

    ဓာတ်ပုံ ရင်းမြစ်, ချာဝလစ်

17. ၂၅ ဒီဇင်ဘာ ၂၀၂၁ဖရူဆိုမှာ စစ်ရှောင်ရသူတွေ သတ်ဖြတ်ခံရတယ် လို့ ဒေသခံတွေပြော

    ကယားပြည်နယ်(ကရင်နီပြည်နယ်) ဖရူဆိုမြို့နယ်ထဲမှာ မနေ့ ဒီဇင်ဘာ ၂၄ ရက်မွန်းလွဲ ၁နာရီကနေ ညနေ ၅နာရီအထိ ကရင်နီတပ်မတော်၊ ကရင်နီအမျိုးသားတိုးတက်ရေးတပ် KA, KNDF ပူးပေါင်းတပ်ဖွဲ့တွေနဲ့ စစ်ကောင်စီတပ်တွေအကြား တိုက်ပွဲဖြစ်ပွားခဲ့လို့ အဲဒီနားက ဒေသခံတွေက စစ်ဘေးရှောင်ထွက်ပြေးခဲ့ကြတယ်လို့ မြေပြင်သိရှိသူဒေသခံတွေက ဘီဘီစီကိုပြောကြပါတယ်။

    စစ်ရှောင်သူတွေက ဖရူဆိုမြို့နယ်၊ မူဆိုကျေးရွာနားအရောက်မှာတော့ စစ်ကောင်စီတပ်တွေနဲ့ ထိပ်တိုက်တွေ့၊ ဖမ်းဆီးခံရပြီးနောက် သတ်ဖြတ်မီးရှို့ခံထားရတာကို ဒီကနေ့ ဒီဇင်ဘာ ၂၅ ရက် မနက်မှာ အတည်ပြုသိရှိကြရတယ်လို့ ဖြစ်စဉ်ကိုသိရှိခဲ့သူ နဲ့ မြေပြင်အခြေအနေသိရှိသူတွေက ပြောပြကြပါတယ်။

    "အဝေးကနေ လှမ်းမြင်ရတယ်။ တိုက်ပွဲကလည်းတစ်ဘက် ၊ မီးရှို့နေတာကိုတော့ မြင်ရတယ်။ အဲဒါကလည်းမြင်နေရပေမယ့် အခုလိုလုပ်လိုက်လိမ့်မယ်လို့တောင်မထင်မိဘူး" လို့ မြေပြင်သိရှိသူတစ်ဦးက ဘီဘီစီကို ပြောပါတယ်။ အခုလိုစစ်ရှောင်သူတွေကို စတင်ဖမ်းဆီးချိန်မှာပဲ ပြည်နယ်အတွင်းရှိတဲ့ နယ်ခြားစောင့်တပ် (ကလလတ) အဖွဲ့ဝင် ၄ ဦးက သွားရောက်ညှိနှိုင်းပေမယ့်လည်း သွားရောက်ညှိနှိုင်းသူ ၄ ဦးလုံးပါ သတ်ခံခဲ့ရပြီးနောက် အခုလို စစ်ရှောင်သူတွေကိုပါ သတ်ဖြတ်တာ၊ မီးရှို့တာတွေဆက်ဖြစ်ခဲ့တာလို့ ဘီဘီစီက ဆက်သွယ်မေးမြန်းရသူထံကသိရပါတယ်။

    မီးရှို့သတ်ဖြတ်ခံရသူအရေအတွက်က ၃၀ ကျော်အထိရှိနိုင်တယ်လို့ ခန့်မှန်းပြောဆိုထားပြီး မီးလောင်ကျွမ်းမှုကြောင့် သေဆုံးသူအရေအတွက်ကို သီးခြားအတည်မပြုနိုင်သေးဘဲ ဘီဘီစီက ဆက်လက်စုံစမ်းနေပါတယ်။

    မနေ့က ညနေပိုင်းတစ်ပိုင်းလုံး ဖရူဆိုက နယ်မြေခံတပ်နဲ့ တပ်မ ၆၆ တို့ကဒေသခံရွာတွေကို လိုက်လံမွှေနှောက်တာမျိုးတွေ လုပ်ခဲ့တာကြောင့် ဒေသခံကာကွယ်ရေးတပ်တွေနဲ့ ထိပ်တိုက်တွေ့တိုက်ပွဲဖြစ်ခဲ့တယ်လို့လည်း အဲဒီဘက်ကဒေသခံတွေက ပြောပါတယ်။

    ဖြစ်စဉ်နဲ့ပတ်သက်ပြီး ဘီဘီစီဘက်က မြေပြင်သိရှိသူတွေကို မေးမြန်းထားချက်အပေါ် အခြေခံ ဖော်ပြထားခြင်းဖြစ်ကာ၊ ထပ်မံသိရှိရတဲ့သတင်းအချက်အလက်တွေကို ဆက်လက်ဖော်ပြ ပေးမှာဖြစ်သလို၊ မီးရှို့ခံရမှုနဲ့ သတ်ဖြတ်ခံရမှုတွေနဲ့ ပတ်သက်ပြီး စစ်ကောင်စီဘက်ကလည်း လက်ရှိအချိန်ထိတော့ ထုတ်ပြန်ပြောကြားတာမျိုး မရှိသေးပါဘူး။

18. ၂၅ ဒီဇင်ဘာ ၂၀၂၁ခရစ္စမတ်ကို ပျော်ပျော်ရွှင်ရွှင်ဆင်နွဲရမယ့်အစား အာဏာသိမ်းမှုအကျိုးဆက် သေကြေပျက်စီးဆုံးရှုံးမှုတွေနဲ့သာ ရင်ဆိုင်နေရတယ်လို့ ဗြိတိန်သံအမတ်ကြီးပြော, ကျူးလွန်မှုအတွက် တာဝန်ရှိသူတွေကိုအရေးယူနိုင်ရေး ယူကေအစိုးရက ဆက်လက်လုပ်ဆောင်သွားမယ်။

    မြန်မာနိုင်ငံက ပြည်သူတွေဟာ ခရစ္စမတ်ကာလကို ပျော်ရွှင်စွာဆင်နွှဲရမယ့်အစား စစ်တပ်အာဏာသိမ်းမှုရဲ့အကျိုးဆက်ဖြစ်တဲ့ သေကြေပျက်စီးဆုံးရှုံးမှုတွေနဲ့သာရင်ဆိုင်နေရကြရတယ်လို့ မြန်မာနိုင်ငံဆိုင်ရာ ဗြိတိန်သံအမတ်ကြီး မစ္စတာ Pete Vowies က ပြောပါတယ်။

    ဒီနေ့ ခရစ္စမတ်နေ့မှာ သံအမတ်ကြီးရဲ့ သတင်းစကားကို ဗြိတိန်သံရုံးစာမျက်နှာက ထုတ်ပြန်လာတာဖြစ်ပါတယ်။ ဘာသာရေးအဆောက်အဦတွေကို မီးရှို့ဖျက်ဆီးတာနဲ့ အသင်းတော်ခေါင်းဆောင်တွေ အပေါ် ပစ်မှတ်ထားခြင်းတွေလို လတ်တလောအကြမ်းဖက်မှုတွေဟာ သာသာရေးယုံကြည်ချက်ဖြစ်တဲ့အခြေခံလူ့အခွင့်အရေးကို ပြောင်ပြောင်းတင်းတင်း ချိုးဖောက်တာလည်း ဖြစ်တယ်လို့ သံအမတ်ကြီးက ဆိုပါတယ်။

    ခွဲခြားဆက်ဆံမှု၊အလွဲသုံးစားခံရမှုတွေနဲ့ရင်ဆိုင်နေရတဲ့ ပြည်သူအားလုံးနဲ့အတူ ယူကေအစိုးရ ဆက်လက်ရပ်တည်သွားမှာဖြစ်ပြီး ကျူးလွန်မှုအတွက် တာဝန်ရှိသူတွေကို အရေးယူဆောင်ရွက်နိုင်ဖို့ ဆက်လက်လုပ်ဆောင်သွားမယ်လို့ဆိုပါတယ်။

    

    ဓာတ်ပုံ ရင်းမြစ်, UK in Mynamar

19. ၂၄ ဒီဇင်ဘာ ၂၀၂၁လေးကေ့ကော် လေကြောင်းက တိုက်ခိုက်ခံရမှုအပေါ် KNU ရဲ့ အမြင်

20. ၂၄ ဒီဇင်ဘာ ၂၀၂၁ဒေါက်တာအောင်မိုးညိုကို အဂတိမှုတွေ အတွက် ၃၀ ရက်နေ့ အမိန့်ချမယ်

    မကွေးတိုင်း ဝန်ကြီးချုပ် ဒေါက်တာအောင်မိုးညိုကို အဂတိလိုက်စားမှု တိုက်ဖျက်ရေး ဆိုင်ရာ ပုဒ်မ ၅၅ နဲ့ စွဲဆိုထားတဲ့ အမှု တွေအတွက် ဒီဇင်ဘာလ ၂၃ ရက်နေ့က နှစ်ဖက်ရှေ့နေတွေက အပြီးသတ် လျှောက်လဲချက်တွေ ပေးခဲ့ပြီး ဒီဇင်ဘာ ၃၀ ရက်နေ့မှာ စီရင်ချက် ချမယ်လို့ မကွေးထောင်တွင်း အထူး တရားရုံးက ရက်ချိန်း ပေးလိုက်ကြောင်း ရှေ့နေကြီး ဦးမြင့်အောင်က ပြောပါတယ်။

    အဂတိလိုက်စားမှု စွဲချက်တွေနဲ့ ဒေါက်တာ အောင်မိုးညို တစ်ဦးတည်းရော တိုင်းဝန်ကြီးတွေနဲ့ပါ ပူးတွဲ စွဲဆိုခံထားရတဲ့ အမှုပေါင်း ၆ မှု ရှိပါတယ်။

    အဂတိလိုက်စားမှု တိုက်ဖျက်ရေး ကော်မရှင်က စွဲဆိုထားတဲ့ အဲဒီအမှုတွေ တွေထဲမှာ ဒေါက်တာ အောင်မိုးညို တစ်ယောက်တည်းကို စွဲဆိုထားတဲ့ အမှုက ၃ မှု ဖြစ်ပြီး ကျန်တဲ့ အမှုတွေကိုတော့ မကွေးတိုင်းဝန်ကြီး တွေဖြစ်ကြတဲ့ ဒေါက်တာ ခင်မောင်အေး၊ ဦးတင်နွယ်ဦး၊ တိုင်းလွှတ်တော် ဥက္ကဋ္ဌ ဦးတာတို့နဲ့ ဒေါက်တာ အောင်မိုးညိုကို ပူးတွဲ စွဲဆိုထား ဖြစ်ပါတယ်။

    လာမယ့် ၃၀ ရက်နေ့မှာ အဲဒီ လူတွေ အားလုံးကို အမိန့်ချမှတ်မှာ ဖြစ်ပါတယ်။

    ဒီအမှုတွေ အတွက် အပြစ်ရှိတယ်လို့ တရားရုံးက ဆုံးဖြတ်ရင် တစ်မှုကို အမြင့်ဆုံး ထောင်ဒဏ် ၁၅ နှစ် အထိ ချမှတ်ခံရနိုင်ပါတယ်။

    ဒေါက်တာ အောင်မိုးညိုဟာ နိုင်ငံတော် အစိုးရကို အထင်အမြင်လွဲပြီး အကြည်ညိုပျက်အောင် သွေးထိုးလှုံ့ဆော်မှုဆိုတဲ့ ပုဒ်မ ၅၀၅ (ခ) အရ အပြစ်ရှိတယ် ဆိုပြီး အလုပ်ကြမ်းနဲ့ ထောင်ဒဏ် ၂ နှစ် ချမှတ်ခံထားရပါတယ်။