ဖရူဆိုမှာ သတ်ဖြတ်ခံလိုက်ရသူတွေထဲ အသက်မပြည့်သေးသူ ၄ ဦးပါဝင်တယ်လို့ ယူနီဆက်ဖ်ပြော

တိုက်ရိုက် ထုတ်လွှင့်ချက်

1. ၁၉ ဒီဇင်ဘာ ၂၀၂၁စစ်ကောင်စီဘက်က အင်အားသုံးတိုက်ခိုက်လာနိုင်တယ်လို့ KNDO ပြော

   

   ဓာတ်ပုံ ရင်းမြစ်, Phyoe Dana

   ကရင်ပြည်နယ်၊ မြဝတီမြို့တောင်ဘက်က ငြိမ်းချမ်းရေးမြို့ လေးကေ့ကော်မှာတပ်ဆွဲထားတဲ့ စစ်ကောင်စီတပ်တွေ အထိနာပြီး ပြန်ဆုတ်သွားပေမယ့် အင်အားအလုံးအရင်းနဲ့ ပြန်လည်တိုက်ခိုက်လာနိုင်တယ်ဆိုပြီး ကရင်အမျိုးသားအစည်းအရုံး-ကေအဲန်ယူရဲ့ လက်နက်ကိုင်တပ်ဖွဲ့တစ်ဖွဲ့ဖြစ်တဲ့ KNDO က ဒီဇင်ဘာလ ၁၈ ရက်မှာ စာထုတ်ပြောဆို လာပါတယ်။

   တိုက်ပွဲအခြေအနေ ပိုကြီးလာနိုင်တာကြောင့် စစ်ကောင်စီကိုဆန့်ကျင်ကြသူတွေအနေနဲ့ KNU/KNLA/KNDO အဖွဲ့တွေကို တတ်နိုင်တဲ့ဘက်ကနေ ထောက်ပံ့ပေးဖို့ကိုလည်း အဲဒီစာမှာ တိုက်တွန်းထားပါတယ်။

   ကေအဲန်ယူ တပ်မဟာ ၆ နယ်မြေထဲမှာရှိတဲ့ လေးကေ့ကော်မြို့သစ်ထဲက ရပ်ကွက်တချို့မှာ စစ်ကောင်စီတပ်တွေက နိုင်ငံရေးသမားတွေ၊ PDF တွေကို ပြီးခဲ့တဲ့တစ်ပတ်မှာဝင်ရောက်ရှာဖွေရာကနေ စစ်ကောင်စီနဲ့ KNU တပ်တွေ တိုက်ပွဲဖြစ်နေတာ သီတင်းတစ်ပတ်ထဲဝင်လာပြီဖြစ်ပါတယ်။

   စစ်ကောင်စီဘက်က မနေ့ ဒီဇင်ဘာလ ၁၈ ရက်ညပိုင်းအထိ လက်နက်ကြီးတွေနဲ့ ပစ်ခတ်တာတွေရှိပေမဲ့ ဒီနေ့ မနက်အစောပိုင်းအထိတော့ လေးကေ့ကော်တခွင်မှာ လက်နက်ကြီးပစ်ခတ်သံမကြားရဘဲ တိတ်ဆိတ်နေတယ်လို့ ဒေသခံတွေက ပြောပါတယ်။

   တစ်ချိန်တည်းမှာပဲ တိုက်ပွဲတွေဖြစ်နေတဲ့ လေးကေကော်နဲ့ မိုင်အနည်းငယ်အကွာက မြဝတီမြို့ပေါ် ၄ ရပ်ကွက်မှာတော့ ဈေးပွဲတော်ကျင်းပနေတဲ့ ဓိဌာန်အောင်ဘုရားကွင်းအနီးနားမှာ မနေ့ညပိုင်းက ဗုံးပေါက်ကွဲမှု တစ်ခုဖြစ်ထားပါတယ်။

2. ၁၉ ဒီဇင်ဘာ ၂၀၂၁ဖားကန့်မှာ ကျောက်စိမ်းကုမ္ပဏီကြီးတွေက တရားဝင်တူးဖော်မှုမရှိလို့ ရေမဆေး ကျောက်ရှာဖွေသူတွေ အခက်ကြုံ

   စစ်အာဏာသိမ်းမှုဖြစ်ပြီးတဲ့နောက်ပိုင်း ကချင်ပြည်နယ်ထဲက ကျောက်စိမ်းဒေသ ဖားကန့်မှာ ကုမ္ပဏီကြီးတွေက စက်ယန္တရားကြီးတွေသုံးပြီး တူးဖော်တာမျိုးမရှိလို့ အဲဒီကုမ္ပဏီတွေက စွန့်ပစ်မြေစာပုံတွေမှာ ရေမဆေးကျောက်ရှာဖွေပြီး အသက်မွေးဝမ်းကျောင်းပြုသူတွေအတွက် အရင်လို အလုပ်မဖြစ် အခက်ကြုံနေတယ်လို့ သိရပါတယ်။

   ''တူးတဲ့သူတွေက လွတ်လွတ်လပ်လပ်လုပ်လို့ရတဲ့နေရာမျိုးရယ်လို့ ပီပီပြင်ပြင်မရှိဘဲနဲ့ အဆင်ပြေတဲ့နေရာလေးတွေမှာ တနိုင်တပိုင်တူးဖော်နေကြတာတွေရှိတယ်။ အဲဒါလေးတွေက ရေမဆေးကျောက်ရှာသူတွေအတွက် အသင့်အတင့်လေးတော့ ရှာဖွေစားနိုင်ကြသေးတာပေါ့။ အရင်လို ပေါပေါများများ ရှာဖွေတာမျိုးတော့ မရှိဘူးပေါ့။'' လို့ ဖားကန့်ဒေသခံတစ်ဦးက ဘီဘီစီကိုပြောပါတယ်။ ]

   ''ပုဂ္ဂလိကပိုင်းကလည်း တရားဝင်တူးဖော်တာမျိုးမရှိသေးဘူး။ ဘာလို့လဲဆိုရင် နေ့ခင်းပိုင်းမှာမလုပ်ဘဲနဲ့ ညပိုင်းရောက်မှ လုပ်တာမျိုးတွေရှိတယ်''လို့ ကုမ္ပဏီကြီးတွေက တရားဝင်တူးဖော်တာမရှိသေးတဲ့အခြေအနေကို သူက ဆက်ပြောပြပါတယ်။

   ဖားကန့်က တချို့ကုမ္ပဏီလုပ်ကွက်တွေထဲမှာ စစ်ကောင်စီတပ်ဖွဲ့ဝင်တွေ ဖြန့်ကြက်ချထားတာမျိုးရှိလို့ အဲဒီက မြေစာပုံအဟောင်းတွေထဲမှာ ဝင်ရောက်ကျောက်ရှာဖို့လုပ်သူတွေအတွက် အခက်အခဲတွေလည်းရှိနေပြန်တယ်လို့ ဒေသခံတွေက ဘီဘီစီကို ပြောပါတယ်။

   ဖားကန့်၊ လုံးခင်း၊ စိုင်းတောင်၊ ဆိပ်မူမှာရှိတဲ့ ကျောက်ဝိုင်းတွေမှာလည်း အရောင်းအဝယ်ရှိတယ်ဆိုပေမဲ့ အရင်လို အလုအယက်ဝယ်မှုတွေ မရှိသလို ကျောက်ဈေးကွက်လည်းအေးနေပါတယ်။

   

   ဓာတ်ပုံ ရင်းမြစ်, Getty Images

3. ၁၈ ဒီဇင်ဘာ ၂၀၂၁NLD လူငယ်လုပ်ငန်းအဖွဲ့ဝင် ကိုဗညားအောင် လေးကေ့ကော်ရှေ့တန်းတစ်နေရာမှာ ကျဆုံး

   အမျိုးသားဒီမိုကရေစီအဖွဲ့ချုပ် NLD ပါတီရဲ့ ရန်ကုန်တိုင်းပါတီ လူငယ်လုပ်ငန်းအဖွဲ့ဝင် ကိုဗညားအောင်ဟာ ဒီကနေ့ ဒီဇင်ဘာ ၁၈ ရက်မှာ လေးကေ့ကော်ဒေသ ရှေ့တန်းတစ်နေရာမှာ ကျဆုံးသွားတယ်လို့ ၎င်းနဲ့ နီးစပ်သူတွေက ဘီဘီစီကိုအတည်ပြုပါတယ်။

   အသက် ၂၆ နှစ်အရွယ် ကိုဗညားအောင်ဟာ NLD ပါတီလူငယ်လုပ်ငန်းအဖွဲ့ဝင်၊ လုံခြုံရေးနဲ့ စည်းကမ်းထိန်းသိမ်းရေးရာမှူးအဖြစ် တာဝန်ယူထားသူလည်း ဖြစ်ပါတယ်။

   ''ကိုဗညားအောင်က ဒီနေ့ ကျဆုံးတာပါ။ စစ်တပ်ရဲ့အကြမ်းဖက်မှုတွေနဲ့ စစ်အာဏာရှင်ကို ခုခံတော်လှန်တဲ့လူငယ်တစ်ဦးဖြစ်ပါတယ်။ စစ်တပ်က အာဏာသိမ်းပြီး မကြာခင်မှာပဲ တိမ်းရှောင်ခဲ့ပြီး ခုလက်ရှိ လေးကေ့ကော်ကို ရောက်ရှိနေတာပါ။ စစ်တပ်ကသာ အာဏာမသိမ်းရင် ကျွန်တော်တို့ ရဲဘော်တွေ၊ ညီအစ်ကိုတွေ ဒီလိုကျဆုံးရမှာမဟုတ်ဘူး။ စစ်တပ်က အကြမ်းဖက်လို့သာ ရရာလက်နက်သုံးပြီး ခုခံတော်လှန်ရင်းကနေ ခုလို ကျဆုံးသွားရတာ ပြောပြလို့မရအောင် ဝမ်းနည်းကြေကွဲရပါတယ်။ အသက် ၂၆ နှစ်ဆိုတာလူငယ်တစ်ယောက်အတွက်တက်လမ်းတွေအနာဂတ်တွေအများကြီးရှိပါတယ်။ ဒီလိုမျိုး အသက်စွန့်သွားရတာမတန်ဘူး။ သူအသက်စွန့်ပြီး တိုက်သွားတဲ့ စစ်အာဏာရှင်လက်အောက် ကလွန်မြောက်ရေး၊ လူ့အခွင့်အရေးနဲ့ ဒီမိုကရေစီထွန်းကားရေးအတွက် ဆက်လက်တိုက်ပွဲဝင်သွားပါမယ်” လို့ ကိုဗညားအောင်ရဲ့ မိတ်ဆွေတစ်ဦးက ဘီဘီစီကိုပြောပါတယ်။

   

   ဓာတ်ပုံ ရင်းမြစ်, Social Media

   ကိုဗညားအောင်ဟာ အာဏာမသိမ်းမီက ဖုန်းပြင်တဲ့အလုပ်တဲ့ အသက်မွေးဝမ်းကျောင်းပြု သူတစ်ဦးလို့လည်း သူက ဆက်ပြောပြပါတယ်။ ကိုဗညားအောင်ကို ရှေ့တန်းတစ်နေရာမှာပဲ မြေချတဲ့ဓာတ်ပုံတွေလည်း လူမှုကွန်ရက်မှာ ထွက်ပေါ်ခဲ့ပါတယ်။ လက်ရှိမှာတော့ လေးကေ့ကော်ဒေသမှာ ၄ ရက်မြောက် အဖြစ် ဒီကနေ့ ဒီဇင်ဘာ ၁၈ ရက် ညနေပိုင်းအထိ စစ်ရေးတင်းမာမှုတွေ ဆက်ရှိနေပြီး ပစ်ခတ်မှုတချို့ရှိခဲ့တယ်လို့ ဒေသတွင်းသတင်းရင်းမြစ်တွေကပြောပါ တယ်။

   လက်ရှိအနေအထားမှာ နှစ်ဖက် တပ်ဖွဲ့များ စစ်ရေးအရ ရင်ဆိုင်အနေအထားရှိနေပြီး လမ်းမကြီးတွေပေါ်မှာ ဖြတ်သန်း သွားလာတာတွေကို ပိတ်ပင်ထားတယ်လို့သိရပါတယ်။

   လက်ရှိမှာစစ်ကောင်စီတပ်စွဲထားတဲ့ အမြှောက်ကုန်းနေရာကို KNLA၊ KNDO၊ ခွဲထွက် DKBA နဲ့ PDF ပူးပေါင်းတပ်ဖွဲ့တွေ က ပိတ်ဆို့ထားသလို လေးကေ့ကော်မြောက်ဘက် က မယ်ထော်သလေးရွာကိုလည်း ပူးပေါင်းအဖွဲ့ကနယ်မြေစိုးမိုးထားလိုက်ပြီလို့ အဲဒီနေရာမှာရောက်ရှိနေတဲ့ သတင်းရင်းမြစ်က ဘီဘီစီကိုပြောပါတယ်။

4. ၁၈ ဒီဇင်ဘာ ၂၀၂၁အာဏာသိမ်း စစ်ကောင်စီကို အသိအမှတ်ပြုဖို့ ဂျပန်အစိုးရကို ဂျပန်မြန်မာ အသင်းဥက္ကဋ္ဌ တိုက်တွန်း

   ဂျပန် ထိပ်တန်းကုမ္ပဏီတချို့ကို မြန်မာနိုင်ငံမှာ ‌ဒေါ်လာဘီလျံပေါင်းများစွာ ရင်းနှီးမြှုပ်နှံကြဖို့ စည်းရုံးပြောဆိုခဲ့သူ ဂျပန်ကက်ဘိနက် ဝန်ကြီးဟောင်း ဟီဒေးယို ဝါတာနာဘေး က အာဏာသိမ်းစစ်ကောင်စီကို အသိအမှတ်ပြု လက်ခံဖို့ ဂျပန်အစိုးရကို တိုက်တွန်းလိုက်ပါတယ်။

   စစ်ကောင်စီ အကြီးအကဲ ဗိုလ်ချုပ်မှူးကြီး မင်းအောင်လှိုင်ရဲ့ ဒီမိုကရေစီ ကြိုးပမ်းမှုတွေကို မစ္စတာ ဝါတာနာဘေးက ချီးကျူးပြောဆိုရင်း ဗိုလ်ချုပ်မှူးကြီး မင်းအောင်လှိုင်ဟာ အံ့မခန်းစရာ လူသားတစ်ဦး ဖြစ်လာခဲ့ပြီလို့ ဆိုပါတယ်။

   JMA ဂျပန်မြန်မာအသင်းကြီးရဲ့ ဥက္ကဋ္ဌလည်း ဖြစ်သူ မစ္စတာ ဝါတာနာဘေး ဟာ ကမ္ဘာ့နိုင်ငံတွေရဲ့ ဒဏ်ခတ်ပိတ်ဆို့ ခံထားရတဲ့ စစ်တပ် ဦးပိုင်ကုမ္ပဏီနဲ့ ဆက်နွှယ်နေတဲ့ ဒေါ်လာ ၄၂ သန်းတန် ရှော့ပင်းမောလ်ကီးတစ်ခု ဆောက်လုပ်မှုမှာ ရင်းနှီးမြှုပ်နှံဖို့ ကြိုးစားနေတယ်ဆိုတဲ့အကြောင်း ရိုက်တာစ် သတင်းမှာ ဖော်ပြထားပါတယ်။

   အာဏာသိမ်း စစ်ကောင်စီနဲ့ ဆက်ဆံရေး ပြန်လုပ်ဖို့ ဂျပန်အစိုးရကို မစ္စတာ ဝါတာနာဘေးက တိုက်တွန်း ပြောဆိုလိုက်ပေမဲ့ ဂျပန်အစိုးရကတော့ မြန်မာနိုင်ငံမှာ စစ်အာဏာသိမ်းပြီးနောက်ပိုင်း အထောက်အပံ့အကူအညီတွေ ထပ်မပေးတော့ဘဲ စစ်ကောင်စီကို အကြမ်းဖက်မှုတွေ ရပ်ဆိုင်းဖို့ တောင်းဆိုနေတာ ဖြစ်ပါတယ်။

   မစ္စတာ ဝါတာနာဘေးရဲ့ ပြောဆိုချက်နဲ့ ပတ်သက်လို့ သူရော၊ သူဦးဆောင်နေတဲ့ JMA ဂျပန်မြန်မာ အသင်းကြီးရော၊ ဂျပန် နိုင်ငံခြားရေးဝန်ကြီးဌာနကပါ မှတ်ချက်ပေးဖို့ ငြင်းဆိုခဲ့ကြပါတယ်။

   မစ္စတာ ဝါတာနာဘေးရဲ့ ရပ်တည်ချက်ကြောင့် ဂျပန်မြန်မာ အသင်းကြီးမှာ ပါတဲ့ ဂျပန်ကုမ္ပဏီကြီးတချို့အတွက် အနေခက်စေခဲ့ပါတယ်။ အထူးစီးပွားရေးဇုံအပါအဝင် မြန်မာနိုင်ငံမှာ ရင်းနှီးမြှုပ်နှံထားမှုတွေ ရပ်ဆိုင်းပစ်ဖို့ သူတို့ကို ဒီမိုကရေစီ လှုပ်ရှားတောင်းဆိုသူတွေက ဖိအားပေး ပြောဆိုနေတာ ဖြစ်ပါတယ်။

   ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံခဲ့တဲ့ သူ့ရဲ့ မြန်မာပြည် ခရီးစဥ်အကြောင်းကို ပြီးခဲ့တဲ့ ဇွန်လ ၃၀ ရက်နေ့တုန်းက JMA ဂျပန်မြန်မာအသင်း အစည်းအဝေးမှာ ပြန်လည်ရှင်းပြခဲ့စဥ်တုန်းကလည်း မစ္စတာ ဝါတာနာဘေးက မြန်မာနိုင်ငံမှာ စစ်အာဏာသိမ်းတာ တရားဝင်ကြောင်း ပြောသွားခဲ့ပါတယ်။

   အခုနှစ်အတွင်း ဂျပန်မြန်မာအသင်းထဲမှာ ပါတဲ့ ကုမ္ပဏီပေါင်း အနည်းဆုံး ၆ ခုလောက် အသင်းထဲက နုတ်ထွက်သွားခဲ့သလို ဂျပန်မြန်မာအသင်းထဲမှာ ဆက်နေနေတဲ့ ကုမ္ပဏီ တချို့ကလည်း စစ်ကောင်စီနဲ့ ခပ်ခွာခွာ နေခဲ့ကြပါတယ်။ အဲဒီထဲက Kirin ကီရင် ဘီယာကုမ္ပဏီဆိုရင် ပြီးခဲ့တဲ့ ဖေဖော်ဝါရီလက စလို့ စစ်တပ်ပိုင် ကုမ္ပဏီနဲ့ ဖက်စပ်လုပ်ငန်းတွေ ရပ်ဆိုင်းခဲ့ပါတယ်။

   

   ဓာတ်ပုံ ရင်းမြစ်, Reuters

5. ၁၈ ဒီဇင်ဘာ ၂၀၂၁၄ရက်မြောက် အဖြစ် လေးကေ့ကော်မှာ စစ်ရေးတင်းမာနေ, KNLA၊ KNDO၊ ခွဲထွက် DKBA နဲ့ PDF ပူးပေါင်းတပ်ဖွဲ့တွေက မယ်ထော်သလေးရွာကို နယ်မြေစိုးမိုးထားနိုင်

   ကရင်ပြည်နယ် မြဝတီမြို့ တောင်ဘက် ၉ မိုင် အကွာရှိ လေးကေ့ကော်ဒေသမှာ ၄ ရက်မြောက် အဖြစ် ဒီကနေ့ ဒီဇင်ဘာ ၁၈ ရက် ညနေပိုင်းအထိ စစ်ရေးတင်းမာမှုတွေ ဆက်ရှိနေပြီး ပစ်ခတ်မှုတချို့ရှိခဲ့တယ်လို့ ဒေသတွင်းသတင်းရင်းမြစ်တွေကပြောပါ တယ်။ လက်ရှိအနေအထားမှာ နှစ်ဖက် တပ်ဖွဲ့များ စစ်ရေးအရ ရင်ဆိုင်အနေအထားရှိနေပြီး လမ်းမကြီးတွေပေါ်မှာ ဖြတ်သန်း သွားလာတာတွေကို ပိတ်ပင်ထားတယ်လို့သိရပါတယ်။ လက်ရှိမှာစစ်ကောင်စီတပ်စွဲထားတဲ့ အမြှောက်ကုန်းနေရာကို KNLA၊ KNDO၊ ခွဲထွက် DKBA နဲ့ PDF ပူးပေါင်းတပ်ဖွဲ့တွေ က ပိတ်ဆို့ထားသလို လေးကေ့ကော်မြောက်ဘက် က မယ်ထော်သလေးရွာကိုလည်း ပူးပေါင်းအဖွဲ့ကနယ်မြေစိုးမိုးထားလိုက်ပြီလို့ အဲဒီနေရာမှာရောက်ရှိနေတဲ့ သတင်းရင်းမြစ်က ဘီဘီစီကိုပြောပါတယ်။

   '' လေးကေကော်မြောက်ဘက်မယ်ထော်သလေးရွာကို သိမ်းထားနိုင်တယ်။ နောက်ပြီးတော့ နယ်ခြားစောင့်တပ်-BGF နဲ့ စစ်ကောင်စီ ပူးတွဲစစ် ကြောင်း အထိုင်ချထားတဲ့ မေတ္တာလင်းမြိုင်ရွာနေရာကို KNLA နှင့် KNDO ပူးပေါင်းတပ်ဖွဲ့ကပိတ်ဆို့ထားနေဆဲဖြစ်တယ် '' လို့ သတင်းရင်းမြစ်ကလက်ရှိအခြေအနေကိုပြောပြပါတယ်။

   ဒီကနေ့နေ့လယ်ပိုင်းကတော့ အမြှောက်ကုန်းနေရာမှာတပ်စွဲထားတဲ့စစ်ကောင်စီတပ်တွေ နဲ့ ကရင်အမျိုးသားလွတ်မြောက်ရေးတပ်မတော်-KNLA၊ ကရင်အမျိုးသား ကာကွယ်ရေးတပ်ဖွဲ့ - KNDO နဲ့ ပြည်သူ့ကာကွယ်ရေးတပ်ဖွဲ့-PDF ပူးပေါင်းတပ်ဖွဲ့ ကြား ပစ်ခတ်မှုဖြစ်ခဲ့ပြီး စစ်ကောင်စီတပ်ဘက်မှာ သေဆုံးတာနဲ့ ဒဏ်ရာရတာတွေရှိတယ်လို့ ပြောပါတယ်။

   '' အမြှောက်ကုန်း အောက်ဘက်မှာ စစ်တပ်ရေခပ်တဲ့ ရေငုတ်တစ်ခုရှိတယ်။ အဲဒီကို သူတို့ ( စစ်ကောင်စီ) တပ်ဖွဲ့ဝင်တချို့ ရေဆင်းခပ်တာမှာ ဒီဘက် ပူးပေါင်းအဖွဲ့ ပစ်လိုက်တာ ၊ စစ်ကောင်စီတပ်ဘက်က တစ်ယောက်သေတယ် '' လို့ သတင်းရင်းမြစ်က သူရရှိတဲ့ အချက်အလက်ကိုပြောပြပါတယ်။ ဘီဘီစီအနေနဲ့ စစ်ကောင်စီဘက်က သေဆုံး၊ဒဏ်ရာရတာတွေနဲ့ပတ်သက်လို့ သီးခြား အတည်ပြုနိုင်ခြင်းမရှိသေးလို့ ဆက်လက်မေးမြန်းနေဆဲဖြစ်ပါတယ်။

   

   ဓာတ်ပုံ ရင်းမြစ်, KIC

6. ၁၈ ဒီဇင်ဘာ ၂၀၂၁အေအေနဲ့ဆက်စပ်တယ်ဆိုပြီး ဖမ်းဆီးခံထားရတဲ့ လက္ကာကျေးရွာသား ၂၃ ဦးကို အမိန့်ချမယ့်ရက် လေးကြိမ်မြောက်ရွှေ့ဆိုင်း

   ရခိုင်ပြည်နယ် မြောက်ဦးမြို့နယ် ၊ လက္ကာကျေးရွာက ရွာသား ၂၃ ဦးအမှုကို ဒီဇင်ဘာ ၁၇ ရက်နေ့ရုံးချိန်းမှာ အမိန့်ချမဘဲ ဒီဇင်ဘာ ၃၀ ရက်နေ့ကို ထပ်မံရွှေ့ဆိုင်းခံလိုက်ရတယ်လို့ ဖမ်းဆီးခံရသူတွေရဲ့ မိသားစုတွေက ပြောကြားပါတယ်။

   

   အကြမ်းဖက်ဥပဒေတွေနဲ့ အမှုရင်ဆိုင်နေရတဲ့ လက္ကာကျေးရွာသား ၂၃ ဦးတို့အမှုကို စစ်ဆေးမှုပြီးစီးနေပြီဖြစ်ပေမယ့် အပြီးသတ်အမိန့်ချမယ့်ရက်ကို အခုလို အကြမ်ကြိမ်ရွှေ့ဆိုင်းနေတာဖြစ်ပါတယ်။

   “ဒီဇင်ဘာ ၃၀ ရက်နေ့ကို ထပ်ချိန်းလိုက်တယ်။ ဘာကြောင့်ချိန်းတယ်ဆိုတာလည်း မပြောဘူး။ ဒီလိုမျိုးပဲ အမိန့်မချဘဲ ရုံးချိန်းတွေကိုပဲ ထပ်ရွှေ့နေတာပါ”လို့ မိသားစုဝင်အမျိုးသမီးတစ်ဦးက ပြောပါတယ်။ ပြီးခဲ့တဲ့ ၂၀၁၉ ခုနှစ် ဧပြီလ ၉ ရက်နေ့က တပ်မတော်စစ်ကြောင်း တစ်ခုက လက္ကာကျေးရွာအတွင်းဝင်ရောက်လာခဲ့ပြီး ရွာသား ၂၇ ဦးတို့ကို ဖမ်ဆီးသွားခဲ့ပါတယ်။ စစ်ကြောရေးအတွင်း သုံးဦးသေဆုံးသွားခဲ့ကာ တစ်နှစ်ခန့်အကြာမှာတော့ အသက်မပြည့်သေးတဲ့ ကျောင်းသားနှစ်ဦး ကို ပြန်လွှတ်ပေးခဲ့ပါတယ်။

   ၂၀၂၀ ခုနှစ် ဩဂုတ်လအတွင်းမှာ သူတို့နဲ့ဆက်စပ်တယ်ဆိုပြီး တိန်ညိုစစ်ဘေးရှောင်စခန်းက အမျိုးသမီးတစ်ဦးကို ထပ်မံပြီး ဖမ်းဆီးသွားခဲ့ပါတယ်။ လက်ရှိမှာတာ့ အမှုရင်ဆိုင်နေရသူ ၂၃ ဦးရှိနေပါတယ်။ အဲ့ဒီလူတွေကို စစ်တွေမြို့နယ်တရားရုံးမှာ အကြမ်းဖက်မှုတိုက်ဖျက်ရေးဥပဒေတွေနဲ့ စစ်တပ်ကနေ တရားစွဲဆိုထားပြီး အခုဆိုရင် တရားရင်ဆိုင်နေကြရတာ သုံးနှစ်နီးပါးခန့် ကြာမြင့်လာခဲ့ပြီဖြစ်ပါတယ်။

   

   နိုဝင်ဘာ ၅ ရက်နေ့မှာ အပြီးသတ်အမိန့်ချမယ်လို့ တရားရုံးက ဆုံးဖြတ်ထားခဲ့ပြီး တရားသူကြီးပြောင်းရွှေ့သွားတဲ့အတွက် နိုဝင်ဘာ ၁၉ ရက်နေ့ကိုတစ်ကြိမ်၊ ဒီဇင်ဘာ ၃ ရက်နေ့ကိုတစ်ကြိမ်၊ ဒီဇင်ဘာ ၁၇ ရက်နေ့ကိုတစ်ကြိမ် အခုနောက်ဆုံး ဒီဇင်ဘာ ၃၀ ရက်နေ့ကို လေးကြိမ်မြောက် ရွှေ့ဆိုင်းလိုက်တာလည်းဖြစ်ပါတယ်။

   အခုလို အမိန့်မချဘဲ ရုံးချိန်းတွေကို အကြိမ်ကြိမ်ရွှေ့ဆိုင်းနေတဲ့အတွက် ဖမ်းဆီးခံနေရသူတွေရော မိသားစုတွေဘက်ကပါ နစ်နာမှုတွေကြီးမားနေပြီး သုံးနှစ်တာကာလအတွင်း ရုံးချိန်းတွေမှာ မြောက်ဦးကနေ စစ်တွေမြို့ကိုလာရောက်ခဲ့ကြရတဲ့ မိသားစုတွေမှာလည်း ငွေကြေးအခက်အခဲတွေနဲ့ရင်ဆိုင်နေကြရသလို လက်ရှိမှာလည်း မလေးရှားနိုင်ငံမှာ အလုပ်လုပ်ကိုင်နေကြရတဲ့ ကျေးရွာသားတွေရဲ့ ထောက်ပံ့မှုနဲ့ ရုံးချိန်းတွေကိုလာရောက်နေနိုင်တာဖြစ်ပြီး အဲ့လိုထောက်ပံ့မှုတွေ မရှိလို့ရှိရင် မလာနိုင်တော့ဘူးလို့ ပြောဆိုကြပါတယ်။

7. ၁၈ ဒီဇင်ဘာ ၂၀၂၁သထုံခရိုင် ဒေသတွင်းနေထိုင်သူလူထုလိုက်နာရမယ့် အချက်တွေကို KNU က ထုတ်ပြန်

   

   ဓာတ်ပုံ ရင်းမြစ်, KIC

   ကေအန်ယူသထုံခရိုင် ၊ ဘီးလင်းမြို့နယ်၊ ကြသောင်းဆိပ်ကျေးရွာက နယ်ခြားစောင့်တပ်စခန်း တစ်ခုကို ကရင့်အမျိုးသားလွတ်မြောက်ရေးတပ်မတော် (KNLA) တပ်မဟာ ၁ နဲ့ ဒေသကာကွယ်ရေးတပ်ဖွဲ့ PDF တို့ မနေ့ ဒီဇင်ဘာ ၁၇ ရက် ကသိမ်းပိုက်ခဲ့ပါတယ်။ အဲဒီနောက် ဒီကနေ့ ဒီဇင်ဘာ ၁၈ ရက်မှာတော့ ကေအဲန်ယူ သထုံခရိုင် ဒေသတွင်းနေထိုင်သူလူထုလိုက်နာရမယ့် အချက်တွေကို ကရင်အမျိုးသားအစည်းအရုံး KNU က ထုတ်ပြန်လာပါတယ်။

   အဲဒီ အချက်(၄)ချက်ပါတဲ့ အဲဒီ ကြေညာချက်ထဲမှာ ခရီးသွားလာခွင့်ကို နံနက် ၆ နာရီမှ ညနေ ၆ နာရီအတွင်းသာ သွားလာခွင့်ပြုပြီး ကန့်သတ်ချိန်ကို ကျော်လွန်ခရီးသွားလာတာခွင့်မပြုတဲ့အကြောင်း၊ သထုံခရိုင်-သထုံမြို့နယ်၊ တပ်ရင်း (၂)ထိန်းချုပ်နယ်မြေအတွင်းကားနဲ့ခရီး သွားလာပါက ကားမှန်တွေကို ချပြီးမာင်းနှင်ဖို့၊ မော်တော်ကား၊ ဆိုင်ကယ် စက်တပ်ယာဉ်တွေနဲ့ ခရီးသွားလာရာမှာတာဝန်အရ စစ်ဆေးတာကိုလက်ခံပေးဖို့နဲ့ အရေးပေါ် ကိစ္စရပ်ရှိလာရင် သက်ဆိုင်ရာ တာဝန်ရှိသူတွေကိုဆက်သွယ်အကြောင်းကြားဖို့တို့ဖြစ်ပါတယ်။ အဲဒီအချက်တွေကို လိုက်နာ ဆောင်ရွက်တာ မရှိပါက ဖြစ်လာမယ့် နောက်ဆက်တွဲ ပြဿနာတွေကို တာဝန်ယူမည်မဟုတ်ဘူးလို့ဆိုပါတယ်။

   တခါကေအဲန်ယူ-သထုံခရိုင်၊ ဘီးလင်းမြို့နယ်၊ ကြသောင်းဆိပ် ကျေးနယ်အုပ်စု၊ ကြသောင်းဆိပ်ကျေးရွာရှိ BGF-၁၀၁၃ တပ်စခန်းကို သိမ်းယူပြီး ပြန်လာတဲ့ ကရင့်အမျိုးသား လွတ်မြောက်ရေးတပ်မတော် (KNLA) တပ်ဖွဲ့ဝင်တွေနဲ့ PDF ပူးပေါင်းတပ်ဖွဲ့တွေကို ဒီကနေ့မှာတော့ ဒေသခံတွေက ကြိုဆိုခဲ့ကြတာကို ဒေသတွင်းမီဒီယာတွေမှာဖော်ပြချက်တွေအရသိရပါတယ်။

   KNU ရဲ့ ဒီနေ့ ဒီဇင်ဘာ ၁၈ ရက် မနက် ထုတ်ပြန်ချက်အရ ကြသောင်းဆိပ်စခန်းကို မနေ့ည ကိုးနာရီခွဲခန့်မှာ KNLA ပူးပေါင်းတပ်ဖွဲ့တွေ သိမ်းယူနိုင်ခဲ့ပြီး ည ၁၀ နာရီမှာ စခန်းတွင်းရှိ ပစ္စည်းတွေနဲ့ တဲအိမ်တွေကို ရှင်းလင်းခဲ့တယ်လို့ ဖော်ပြထားပါတယ်။

   

   ဓာတ်ပုံ ရင်းမြစ်, KIC

8. ၁၈ ဒီဇင်ဘာ ၂၀၂၁စစ်ကောင်စီက အာဏာသိမ်းပြီးနောက် ကျောက်စိမ်းနဲ့ ပုလဲတွေ ဒုတိယအကြိမ် ထုတ်ရောင်းနေ

   အာဏာသိမ်းပြီးနောက် စစ်ကောင်စီရဲ့ ဒုတိယအကြိမ်အဖြစ် ပုလဲနဲ့ ကျောက်မျက်ပြပွဲကို နေပြည်တော်မှာ ပြုလုပ်နေပါတယ်။ ဒီကနေ့ ဒီဇင်ဘာ ၁၈ ရက်ကနေ ၂၂ရက်အထိ ကျောက်စိမ်းအတွဲ ၇၈၀ နဲ့ ပုလဲအတွဲ ၃၃၀ ကိုအိတ်ဖွင့်တင်ဒါပုံစံနဲ့ ရောင်းချမယ်လို့ စစ်ကောင်စီလက်အောက် မြန်မာ့ ကျောက်မျက်ရတနာပြပွဲဗဟိုကော်မတီက ကြေညာထားတာတွေ့ရပါတယ်။ အဲဒီပြပွဲကို မနေ့ ဒီဇင်ဘာ ၁၇ ရက်မှာ စတင်တာဖြစ်ပြီး အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်တက်ရောက်တာကို စစ်ကောင်စီထိန်းချုပ်ထားတဲ့ မီဒီယာတွေ မှာဖော်ပြပါတယ်။ စစ်ကောင်စီအာဏာသိမ်းပြီးနောက် ဧပြီလကပြုလုပ်ခဲ့တဲ့ ပထမအကြိမ်ပြပွဲတုန်းက ကျပ်ငွေနဲ့ ရောင်းချခဲ့ပြီး အခုထပ်လုပ်တဲ့ ဒုတိယအကြိမ်ပြပွဲမှာတော့ နိုင်ငံခြားငွေနဲ့ ရောင်းချမှာလို့မြန်မာ့ ကျောက်မျက် ရတနာရောင်းဝယ်ရေးလုပ်ငန်းက ပြောပါတယ်။

   '' ကမ္ဘာမှာ အိုမီခရွန်နဲ့ လူစုလူဝေးတွေကို တားမြစ်နေတယ်။ ဒီမှာကသူတို့က ငွေလိုနေတယ်။ အဓိက နိုင်ငံခြားငွေရဖို့လိုနေတော့ နိုင်ငံခြားငွေနဲ့ရောင်းတာပေါ့။ ကိုဗစ်စည်းကမ်းနဲ့ကျင်းပ မယ်တော့ကြေညာ ထားတာပေါ့။ အရင်အခေါက်ကလည်း သူတို့ပြပွဲရဲ့ တစ်ဝက်ပဲရောင်းတယ်။ အခုလည်း ဘယ်လိုလဲ ဆိုတာကြည့်တာပေါ့'' လို့ ပြည်တွင်းကကျောက်မျက်လုပ်ငန်းရှင်တစ်ဦးကပြောပါတယ်။

   အဲဒီ ၂၀၂၁ ခုနှစ်၊ ပုလဲအတွဲများနှင့် ကျောက်စိမ်းအတွဲများပြပွဲမှာ ပုလဲအတွဲတွေအတွက် အနိမ့်ဆုံးအခြေခံဈေး ဟာ အမေရိကန်ဒေါ်လာ ၁,၀၀၀ နဲ့ ကျောက်စိမ်းအတွဲတွေအတွက် အနိမ့်ဆုံးအခြေခံဈေးကို ယူရို ၅,၀၀၀ အဖြစ် သတ်မှတ်ရောင်းချနေတာလို့ ကျောက်မျက်လုပ်ငန်းရှင်တွေထံကသိရပါတယ်။ အာဏာသိမ်းပြီးနောက် ပထမအကြိမ်အဖြစ် ဧပြီလက ၁၀ ရက်ကြာ ပြုလုပ်ခဲ့တဲ့ ပြပွဲမှာတော့ ပုလဲ ၃၁၇ တွဲ၊ ကျောက်စိမ်း ၂၁၄၈ တွဲ၊ ကျောက်မျက် ၁၉၉ တွဲကို ပြသရောင်းချခဲ့တာပါ။ အဲဒီမှာ ကျောက်စိမ်းအတွဲနဲ့ ကျောက်မျက်အတွဲက ထက်ဝက်ခန့်သာ ရောင်းချနိုင်ခဲ့ပြီး ကျပ်ငွေ ၃၃ ဘီလီယံကျော် ရရှိခဲ့တယ်လို့ သိရပါတယ်။

   စစ်ကောင်စီကို ငွေမပေးရေး ကမ်းပိန်းလှုပ်ရှားမှုတွေ၊ စစ်ကောင်စီနဲ့ ဆက်စပ်တဲ့စီးပွားရေးလုပ်ငန်းတွေကို သပိတ်မှောက်ကြဖို့လှုပ်ရှားမှုတွေဟာလည်း စစ်အာဏာသိမ်းမှုဆန့်ကျင်ရေးမှာ အစိတ်အပိုင်းတစ်ခုအနေနဲ့လုပ်ဆောင်နေကြတာတွေ့ရပါတယ်။ လက်ရှိမှာ စစ်ကောင်စီနဲ့ ဆက်စပ်တဲ့စီးပွားရေးလုပ်ငန်းတွေနဲ့ စစ်ကောင်စီအဖွဲ့ဝင်တွေ၊ စစ်ကောင်စီခန့် ပြည်နယ်ဝန်ကြီးချုပ်တချို့ကို နိုင်ငံတကာက စီးပွားရေးပိတ်ဆို့မှုတွေ ပြုလုပ်ထားပါတယ်။ လက်ရှိ ကျောက်မျက်ပြပွဲကိုတော့ တရုတ်နိုင်ငံသားတချို့ လာရောက်ဝယ်ယူမှုရှိတယ်လို့ သတင်းတွေ ထွက်ပေါ်နေပြီး ဘီဘီစီက အတည်ပြုနိုင်ဖို့ကြိုးစားနေပါတယ်။

   

   ဓာတ်ပုံ ရင်းမြစ်, MOI

9. ၁၈ ဒီဇင်ဘာ ၂၀၂၁နှမ်းခါးရွာ မှာတပ်စွဲထားတဲ့ စစ်ကောင်စီတပ်က ဒေသခံတွေတိမ်းရှောင်နေတဲ့နေရာတွေကို လက်နက်ကြီးတွေပစ်ခတ်နေ

   မကွေးတိုင်းနဲ့ စစ်ကိုင်းတိုင်းကိုဆက်ထာတဲ့ ကလေး- ဂန့်ဂေါလမ်းမကြီးဘေး တစ်လျှောက်က နှမ်းခါးရွာမှာ တပ်စွဲထားတဲ့ စစ်ကောင်စီတပ်တွေဟာ ဒီကနေ့ ဒီဇင်ဘာ ၁၈ ရက်မှာ ဒေသခံတွေထွက်ပြေးတိမ်းရှောင်နေတဲ့ တောတိုက် ( တောတွင်း ) နေရာတွေကိုလက်နက်ကြီးနဲ့ ပစ်ခတ်တာတွေလုပ်နေလို့ ဒေသခံတွေက ဘီဘီစီကိုပြောလာပါတယ်။

   မနေ့က ဒီဇင်ဘာ ၁၇ ရက်မှာ နှမ်းခါးရွာက ဒေသခံအချို့ ဂန့်ဂေါမြို့နယ်အတွင်းမူးယစ်ဆေးဝါးတိုက်ဖျက်ရေး၊ သစ်မှောင်ခိုတားဆီး ရေးလုပ်ဆောင်ဖို့ အစည်းအဝေးပြုလုပ်နေချိန်မှာပဲ စစ်တပ်က ရဟတ်ယာဉ်နဲ့ ပစ်ခတ်တာတွေလုပ်ခဲ့တာလို့ဆိုပါတယ်။

   အဲဒီလို ပစ်ခတ်မှုကြောင့် ဒေသခံတွေထပ်မံတိမ်းရှောင်ထွက်ပြေးကြရသလို ရွာထဲမှာ ပိတ်မိပြီးကျန်ခဲ့တဲ့ ဒေသခံအချို့ ဖမ်းဆီးခံရတာနဲ့ ဒဏ်ရာရတာတွေရှိတယ်လို့ ဆိုပါတယ်။ '' ဒီမနက်မှာတော့ ဟံသာဝတီ နဲ့မြောက်ခရမ်း ရွာဘက် မှာနေတဲ့ စစ်ကောင်စီတပ်တွေကရွာဘက်ကိုလာပြီး နှမ်းခါးရွာက ပြည်သူတွေရဲ့အိမ်တွေက ပစ္စည်းတွေကို သိမ်းတယ်။ ယူတယ်။အဲဒီရွာတွေက ဟံသာဝတီ နဲ့မြောက်ခရမ်း တို့က စစ်ကောင်စီအားကောင်းတဲ့ ရွာတွေလေ။အဲဒီရွာတွေကို သယ်သွားတယ်ပြောတယ်'' လို့ ဒေသခံတစ်ဦးကပြောပြပါတယ်။

   နှမ်းခါးကျေးရွာဟာ အိမ်ထောင်စု ၉၅၀ ဝန်းကျင်ရှိတဲ့ ရွာကြီးဖြစ်ပြီး မနေ့ က ဒီဇင်ဘာ ၁၇ ရက် စစ်ရဟတ်ယာဉ်နဲ့ ပစ်ခတ်မှုကြောင့် ရွာလုံးကျွတ်ပြန်လည်တိမ်းရှောင်နေကြရတယ်လို့ ဆိုပါတယ်။ '' အရင်က မီးရှို့ခံရတုန်းကနေ ရွာကနေ ပြေးနေကြတာလေ။အခုကျ နည်းနည်းငြိမ်ပြီဆိုတော့ စပါးရိတ်ချိန်ဆိုတော့ တောင်သူတွေက ပြန်ဝင်ကြတာလေ။ အဲဒီမှာ အခုက ပြန်လာပစ်တာ။ အဲဒါနဲ့ ပြန်ပြေးနေကြရတာ တစ်ရွာလုံးပဲ '' လို့ ဒေသခံတွေကပြောပါတယ်။

   စစ်ကောင်စီဘက်ကတော့ ဒေသကာကွယ်ရေးတပ်တွေက တိုက်ခိုက်မှုတွေလုပ်ဖို့အစည်းအဝေးလုပ်နေတာကို ကျေးရွာဒေသခံအချို့က အကြောင်းကြားလာလို့ဝင်ရောက်စီးနင်းပစ်ခတ်ခဲ့တယ်လို့ ထုတ်ပြန်ထားပါတယ်။ မကွေးတိုင်း၊ဂန့်ဂေါနယ်ထဲက နှမ်းခါးကျေးရွာဟာ ပြီးခဲ့တဲ့ စက်တင်ဘာလအတွင်းက အကြိမ်ကြိမ်မီးရှို့ခံခဲ့ရတဲ့ ကျေးရွာလည်းဖြစ်ပါတယ်။

   

   ဓာတ်ပုံ ရင်းမြစ်, CJ

10. ၁၈ ဒီဇင်ဘာ ၂၀၂၁ကနီနယ် အိုင်တောင်ရွာအပါအဝင်မြစ်ရိုးတစ်လျှောက်ရွာတွေကို စစ်ကောင်စီကလက်နက်ကြီးနဲ့ ပစ်ခတ်နေ, မြစ်ရိုးတစ်လျှောက်ရွာတွေက ဒေသခံတွေ ထွက်ပြေးတိမ်းရှောင်နေကြရ

    စစ်ကိုင်းတိုင်း ကနီနယ် ၊ အိုင်တောင်ရွာကို စစ်ကောင်စီတပ်တွေ လက်နက်ကြီးတွေပစ်ခတ်လို့ အိမ်မီးလောင်တာတွေရှိခဲ့တယ်လို့ ဒေသခံတွေကပြောပါတယ်။ စစ်ကောင်စီတပ်တွေက အဲဒီရွာထဲကို အဆက်မပြတ်ပစ်ခတ်နေခဲ့ပြီး နေအိမ်ပေါ် လက်နက်ကြီးကျည်ကျလို့ မီးစစွဲရာကနေ နေအိမ်၂လုံးကိုမီးလောင်ခဲ့တယ်လို့ ဆိုပါတယ်။ ဒီဇင်ဘာ ၁၇ရက် မှာ ကနီနယ်တခွင် ရေယာဉ်နဲ့ မြစ်ရိုးတစ်လျှောက်သွားနေတဲ့စစ်ကောင်စီတပ်တွေဟာ ရွှေစာရေးရွာမှာတပ်စွဲထားပြီး အဲဒီကနေ အိုင်တောင်ရွာဘက်ကိုပစ်ခတ်နေခဲ့တာလို့ ဒေသခံတစ်ဦး က ဘီဘီစီကိုပြောပါတယ်။ လက်ရှိမှာ စစ်ကောင်စီတပ်တွေ က ချင်းတွင်းမြစ်ရိုးတစ်လျှောက်ကနီနယ်တခွင်မှာ ရေယာဉ်နဲ့သွားနေသလို ပစ်ခတ်မှုတွေကိုလုပ်နေလို့ မအူ၊အိုင်တောင်၊သရက်တော၊ ချိုင်၊ရွှေစာရေး နဲ့ သပြေတောစတဲ့ ရွာအများစုက ဒေသခံတွေဟာ ရွာထဲမှာမနေရဲကြလို့ ထွက်ပြေး တိမ်းရှောင်နေကြရတယ်လို့ဆိုပါတယ်။

    '' သက်ကြီးရွယ်အိုတွေ၊ကလေးတွေကိုတော့ လွတ်မယ်ထင်တဲ့ရွာတွေဘက်ကို ပို့ထားရတယ်။ဒါပေမယ့် လူငယ်၊လူလတ်တွေကတော့ ရွာနဲ့ မနီးမဝေးက တောတိုက်တွေမှာ နေကြရတယ်။ သူတို့ ( စစ်ကောင်စီ) ပစ်နေတော့လည်း လွတ်ရာနေရာကနေ ကြည့်နေရှောင်နေရတာပေါ့ '' လို့ ဒေသခံတစ်ဦးကပြောပါတယ်။

    အဲဒီဒေသတဝိုက်မှာ စစ်ရဟတ်ယာဉ်တွေလည်း ပျံသန်းနေပြီး မြစ်ရိုးတစ်လျှောက်မှာ ဒေသကာကွယ်ရေးတပ်တွေနဲ့ စစ်ကောင်စီကြား နှစ်ဖက်တိုက်ပွဲတွေလည်းရှိနေတယ်လို့ ဒေသကာကွယ်ရေးတပ် B21 က ပြောပါတယ်။ စစ်ကိုင်းတိုင်း၊ ကနီနယ်ထဲက ချင်းတွင်းမြစ်ရိုးတစ်လျှောက်မှာ ဒီကနေ့ ဒီဇင်ဘာ ၁၈ရက် မှာလည်း ဒေသကာကွယ်ရေးတပ်နဲ့ စစ်ကောင်စီတပ်တွေကြား တိုက်ပွဲတွေ ဆက်ရှိနေပါတယ်။

    

    ဓာတ်ပုံ ရင်းမြစ်, Social Media

11. ၁၈ ဒီဇင်ဘာ ၂၀၂၁မဲဆောက်မြို့ မဲ့တောင်းကလန်း စစ်ဘေးရှောင်စခန်း မှာ လေးကေ့ကော်ဒေသစစ်ရှောင် ၄၀၀၀နီးပါး ခိုလှုံနေရ, မြန်မာဘက်ခြမ်း စစ်ရှောင်နေရသူတွေမှာလည်းအခက်အခဲတွေရှိနေ

    

    ဓာတ်ပုံ ရင်းမြစ်, Mae Sot Media

    ထိုင်းနိုင်ငံ ၊ မဲဆောက်မြို့နယ်ရှိ မဲ့တောင်းကလန်း စစ်ဘေးရှောင်စခန်း မှာ လေးကေ့ကော်ဒေသက ဒေသခံ ၄၀၀၀နီးပါး စစ်ဘေးတိမ်းရှောင်နေရတယ်လို့ အဲဒီကသတင်းရင်းမြစ်တွေကပြောပါတယ်။ စစ်ဘေးရှောင်တွေကို ထိုင်းအာဏာပိုင်တွေက ကိုဗစ်ရောဂါစစ်ဆေးပေးနေပြီး ပိုးတွေ့ရှိသူတွေကို ဆေးဝါးကုသမှုခံယူနိုင်ဖို့ မဲဆောက်ဆေးရုံကြီးကိုပို့ဆောင်ပေးထားတယ်လို့ သိရပါတယ်။ လက်ရှိမှာ မဲဆောက်နဲ့ အနီးတဝိုက် မြို့တွေက လည်းစစ်ရှောင်ပြည်သူတွေထားတဲ့ မဲ့တောင်းကလန်း စာသင်ကျောင်းမှာ လိုအပ်တာတွေသွားရောက်လှူဒါန်းနေကြပါတယ်။

    '' အဓိကလိုအပ်နေတာ စောင်တို့၊ အနွေးထည်တို့လိုအပ်နေတယ်။ရေရှည်စားလို့ရတဲ့အစားအစာတွေလိုအပ်တယ်။ရိက္ခာခြောက်တွေလိုအပ်တယ်။ အရေးပေါ်သုံးဆေးဝါးတွေလိုတယ်။ထိုင်းရောက်မြန်မာတွေက တော်တော်ကိုလှူနေပါတယ်။ ဒါပေမယ့် စစ်ရှောင်ကများတော့လိုအပ်တာတော့ရှိနေတုန်းပဲ '' လို့ ကိုယ်တိုင်သွားရောက်လှူဒါန်းခဲ့သူတစ်ဦးကပြောပြပါတယ်။

    ကရင်ပြည်နယ် လေးကေ့ကော်ဒေသမှာ လေးရက်ဆက်တိုက်ဖြစ်ပွားခဲ့တဲ့ တိုက်ပွဲကြောင့် ထိုင်းဘက်မှာ တိမ်းရှောင်ရသူတွေရှိသလို မြန်မာပြည်ဘက်ခြမ်းတောတွင်းနေရာတွေမှာစစ်ဘေးရှောင်နေရသူ တစ်ထောင်နီးပါး ကျန်ရစ်နေတယ်လို့ ဒေသခံအချို့ကပြောပါတယ်။ တခါ လေးကေ့ကော်မြို့တွင်းပိတ်မိနေသူတွေလည်းရှိနေသေးတယ်လို့ဆိုပါတယ်။ လက်ရှိမှာ စစ်ဘေးရှောင်တွေအနေနဲ့ အရေးပေါ် စားနပ်ရိက္ခာ၊ အမိုးအကာ၊စောင်နဲ့အနွေး ထည်တွေလိုအပ်နေတယ်လို့သိရပါတယ်။

    '' ဟိုဘက်ကမ်းရောက်တဲ့သူတွေ( မဲဆောက်ဘက်တိမ်းရှောင်သူတွေ) ရဲ့အခြေအနေက တော်သေးတယ်။ဒီဘက်မှာကြတော့ အလှူရှင်လည်း မရောက်နိုင် တော်တော်ကို အခက်အခဲဖြစ်နေကြတယ်။လိုအပ်တာတွေလည်းအများကြီးပဲ '' လို့ မြန်မာဘက်ခြမ်းကစစ်ရှောင်တွေကိုကူညီပေးနေသူတချို့ကပြောပါတယ်။

    မြဝတီ - ဝေါလေ သွားကားလမ်းပေါ်ရှိ မဲ့ထော်သလေးရွာအဝင် အနီးနေရာမှာ စစ်ကောင်စီ အဖွဲ့က တားဆီး စစ်ဆေးမှုတွေ ဆောင်ရွက်နေသလို မနေ့က ဒီဇင်ဘာ ၁၇ ရက် ညနေပိုင်းအထိ စစ်ကောင်စီဘက်ကပစ်ခတ်တိုက်ခိုက်မှုတွေလုပ်နေဆဲလို့ဒေသခံတွေကပြောပါတယ်။

12. ၁၈ ဒီဇင်ဘာ ၂၀၂၁ကြသောင်းဆိပ် BGF စခန်းကို KNLA နဲ့ PDF ပူးပေါင်းတပ်ဖွဲ့ တိုက်ခိုက်သိမ်းပိုက်, BGF ဘက်မှ ၄ ဦးဒဏ်ရာရပြီး KNLA ပူးပေါင်းတပ်ဖွဲ့မှ တစ်ဦးကျဆုံးတယ်လို့ KNU ထုတ်ပြန်

    ကေအန်ယူသထုံခရိုင် ၊ ဘီးလင်းမြို့နယ်၊ ကြသောင်းဆိပ်ကျေးရွာက နယ်ခြားစောင့်တပ်စခန်း တစ်ခုကို ကရင့်အမျိုးသားလွတ်မြောက်ရေးတပ်မတော် (KNLA) တပ်မဟာ ၁ နဲ့ ဒေသကာကွယ်ရေးတပ်ဖွဲ့ PDF တို့ မနေ့ ဒီဇင်ဘာ ၁၇ ရက်မနက်ပိုင်းကနေ ည ကိုးနာရီကျော်အထိ ထိုးစစ်ဆင်တိုက်ခိုက်ခဲ့တဲ့နောက် BGF စခန်းကို တိုက်ခိုက်သိမ်းပိုက်နိုင်ခဲ့တယ်လို့ ကရင်အမျိုးသားအစည်းအရုံး KNU က ထုတ်ပြန်လာပါတယ်။

    KNU ရဲ့ ဒီနေ့ ဒီဇင်ဘာ ၁၈ ရက် မနက် ထုတ်ပြန်ချက်အရ ကြသောင်းဆိပ်စခန်းကို မနေ့ည ကိုးနာရီခွဲခန့်မှာ KNLA ပူးပေါင်းတပ်ဖွဲ့တွေ သိမ်းယူနိုင်ခဲ့ပြီး ည ၁၀ နာရီမှာ စခန်းတွင်းရှိ ပစ္စည်းတွေနဲ့ တဲအိမ်တွေကို ရှင်းလင်းခဲ့တယ်လို့ ဖော်ပြထားပါတယ်။

    ကြသောင်းဆိပ်စခန်းကို ကတိုင်ဒိ BGF စခန်းက လက်နက်ကြီးတွေနဲ့ ကူပစ်ပေးတာကြောင့် ကျေးရွာထဲက လူနေအိမ်တွေ ပျက်စီးမှုရှိခဲ့တယ်လို့လည်းဆိုပါတယ်။

    အခု စခန်းသိမ်းတိုက်ပွဲမှာ BGF ဘက်က စခန်းမှူးအပါအဝင် လေးဦး ထိခိုက်ဒဏ်ရာရပြီး KNLA ပူးပေါင်းတပ်ဖွဲ့ဘက်က တစ်ဦးသေ၊ ၃ ဦးဒဏ်ရာရရှိတယ်လို့ KNU ထုတ်ပြန်ချက်ကဆိုပါတယ်။

    

    ဓာတ်ပုံ ရင်းမြစ်, KNU

    အဲဒီ ကျဆုံးတပ်ဖွဲ့ဝင်ဟာ KNLAဗိုလ်သင်တန်းကျောင်းဆင်း အသက် ၁၈ နှစ်အရွယ် လူငယ်တစ်ဦးလို့ သတင်းတွေထွက်ပေါ်နေပေမယ့် KNU ထုတ်ပြန်ချက်မှာတော့ ရှင်းရှင်းလင်းလင်း ဖော်ပြထားတာမရှိသေးပါဘူး။

    ကြသောင်းဆိပ် BGF တွေဟာ မူးယစ်ဆေးတွေကိုလည်း ကိုယ်တိုင်လည်းသုံးစွဲသလို ဒေသခံလူငယ်တွေကိုလည်း ရောင်းချတာ၊ စခန်းကို ဘုန်းကြီးကျောင်းဘေး တပ်စွဲထားပြီး တပ်ဖွဲ့ဝင်တွေကကျေးရွာထဲ အရက်သောက်စား မူးယစ်ရမ်းကားတာတွေ ပြုလုပ်တယ်လို့လည်း ထုတ်ပြန်ချက်မှာပါရှိပါတယ်။

    အဲဒီစခန်းမှာ ၁၉၉၃ ကစလို့စစ်ကောင်စီတပ်တွေ နေရာယူတပ်စွဲထားရာကနောက်ပိုင်းမှာ BGF တွေကို စေလွှတ်စခန်းချခဲ့တာဖြစ်တယ်လို့ ဆိုပါတယ်။

    လက်ရှိမှာစစ်ကောင်စီတပ်တွေလေးကေ့ကော်ဒေသထဲအဓမ္မ ဝင်ရောက်ပြီး တိမ်းရှောင်ရောက်ရှိနေသူတွေကို ရှာဖွေဖမ်းဆီးရာကနေ အစပြုလို့ ကေအန်ယူနဲ့ စစ်ကောင်စီတပ်တွေ ဒီဇင်ဘာ ၁၄ ရက်ကစလို့ တိုက်ပွဲတွေဖြစ်ပွားနေပြီး စစ်ကောင်စီတပ်ဖွဲ့ဝင် အနည်းဆုံးလေးဦး သေဆုံးထားကာ ရှစ်ဦး (စစ်ကောင်စီတပ်ဖွဲ့ဝင် ၆ ဦး၊ BGF ၂ ဦး) ကိုအရှင်ဖမ်းမိထားတယ်လို့ KNU ကထုတ်ပြန်ထားပါတယ်။

    အဲဒီတိုက်ပွဲကြောင့် လေးကေ့ကော်အနီးတဝိုက်နဲ့ ထိုင်းဘက်ခြမ်းကိုထွက်ပြေးတိမ်းရှောင်ရတဲ့ ဒေသခံ လေးထောင်ကျော်ရှိလာပြီဖြစ်တယ်လို့ ဆိုပါတယ်။

    မြေပြင်မှာ စစ်ရှောင်တွေကို ကူညီပေးနေသူတွေနဲ့အဖွဲ့အစည်းတွေရဲ့ပြောကြားချက်အရတော့ စစ်ရှောင်ဦးရေဟာ သောင်းဂဏန်းနားထိ ရှိလာပြီလို့ ဆိုပါတယ်။

13. ၁၇ ဒီဇင်ဘာ ၂၀၂၁မနောကွင်းအနီး ဖြစ်ပွားတဲ့ ပစ်ခတ်မှုမှာ တစ်ဦးဒဏ်ရရ၊ စစ်ဆေးရုံကိုတင်ပို့ထားတယ်လို့ဆို

    ကချင်ပြည်နယ်၊ မြစ်ကြီးနားမြို့ပေါ် စီတာပူ ရပ်ကွက်က မနောကွင်းမှာ ဒီဇင်ဘာ ၁၆ ရက်နေ့ည ပိုင်းက ပစ်ခတ်မှု ဖြစ်ပွားခဲ့ပြီး ပစ်ခတ်မှုကြောင့် ဒဏ်ရာရသူတစ်ဦးကို စစ်ဆေးရုံကိုပို့ဆောင်ထားတယ်လို့ ဒေသခံတွေက ပြောပါတယ်။

    ဒီဇင်ဘာ၁၆ ရက်နေ့ ည ၉ နာရီခွဲလောက် က မြစ်ကြီးနားမြို့ စီတာပူ ရပ်ကွက် မနောကွင်း အရှေ့ဘက်ကနေစလို့ နောင်ရာ ရပ်ကွက်အထိ သေနတ်ပစ်ခတ်မှုတွေ ဖြစ်ပွားခဲ့ပြီး မနောကွင်း အနီး ဖြတ်သန်းမောင်းနှင်တဲ့ ယာဉ်ကိုစစ်ကောင်စီတပ်ဖွဲ့ဘက်က ရပ်တန့်ဖို့ ပြောရာကနေ မရပ်ခဲ့တာကြောင့် ခုလို ပစ်ခတ်မှုတွေဖြစ်ပွားတာလို့ ဒေသခံတွေက ပြောပါတယ်။ မနေ့ညက အဲဒီပစ်ခတ်မှုကြောင့် အနီးပတ်ဝန်ကျင်မှာ ကျည်ခွံတွေ ကျရောက်ခဲ့တယ်လို့လည်း မျက်မြင်ဒေသခံတစ်ဦးက ခုလို ပြောပြပါတယ်။

    “ည ၉ နာရီခွဲအချိန်လောက်မှာ ကားတစ်စီးကို ရပ်ဆိုပြီးတားတာကို မရပ်လို့ လိုက်ပစ်တာလို့သိရတယ်။ ကျွန်မတို့က ရပ်ကွက်၁ ပါ။ အိမ်ဘေးကို ကျည်ဆံကျတာတွေတော့ဖြစ်တယ်။ အစက ကျွန်မတို့က ဗြောက်လို့ ထင်တာ ။ လုံး၀ ဆက်တိုက် စက်သေနတ်လိုပဲ ဆက်တိုက်ကိုမှပစ်တာဟုတ်တယ် ဒီမနောကွင်းလမ်းကြားဘက်ကိုရောက်တယ် အိမ်ဘေးကိုလဲ ကျတာတွေရှိတယ်” လို့မနေ့က ဖြစ်စဉ်နဲ့ပတ်သက်လို့ ဒေသခံတစ်ဦးက ပြောပါတယ်။

    သေနတ်အချက်ရေ ဆယ်ချက်ကျော်လောက် ကြားရတဲ့ အဲဒီ ပစ်ခတ်သံတွေကြောင့် တိုက်ပွဲဖြစ်ပွားတယ်လို့တောင် ဒေသခံတွေက စိုးရိမ်စိတ်တွေ စိုးရိမ်ခဲ့ကြရပြီး အဲဒီ ပစ်ခတ်မှုကြောင့် ထိခိုက်ဒဏ်ရာရတဲ့ သူတစ်ယောက်ရှိတယ်လို့သိရပါတယ်။ ပစ်ခတ်မှုဖြစ်ပွားခဲ့တဲ့ မနေ့ညပိုင်းမှာ မနောကွင်းအနီးမှာ လုံခြုံရေး ကင်းစောင့်နေတဲ့ စစ်ကောင်စီတွေ တပ်တွေ တပ်စွဲထားတာရှိနေပြီး မနေ့က ပစ်ခတ်မှုကြောင့်အနီးတဝိုက်က နေအိမ်တချို့လည်း ကျည် ထိမှန်မှု တွေရှိခဲ့တယ်လို့ သိရပါတယ်။

    လက်ရှိမှာ ကချင်လွတ်မြောက်ရေးတပ် ကေအိုင်အေနဲ့ စစ်ကောင်စီတပ်တွေကြား မကြာခဏ ဆိုသလို ထိတွေ့တိုက်ပွဲတွေ ဖြစ်ပွားနေတာရှိသလို မြစ်ကြီးနား၊ ဖားကန့် အပါအဝင် ကချင်ပြည်နယ်ထဲက ဒေသတချို့မှာ စစ်အာဏာသိမ်းမှုဆန့်ကျင့်ရေးဆန္ဒပြပွဲတွေလည်း ဆက်ရှိနေပါတယ်။

14. ၁၇ ဒီဇင်ဘာ ၂၀၂၁ဒေါ်အောင်ဆန်းစုကြည်နဲ့ ဒေါက်တာမျိုးအောင်တို့ ထောင်ဝတ်စုံနဲ့ ကြားနာမှုတက်ရောက်ရ, ထောင်အာဏာပိုင်တွေက အဲဒီဝတ်စုံတွေကို ယူဆောင်လာခဲ့တယ်လို့ဆို

    စစ်အာဏာသိမ်းပြီးကတည်းက ဖမ်းဆီးထိန်းသိမ်းခံထားရပြီး ပုဒ်မများစွာနဲ့ တရားစွဲဆို ခံထားရတဲ့ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည် စွဲဆိုခံထားရတဲ့ အမှုတွေထဲက အဂတိလိုက်စားမှုတိုက်ဖျက်ရေးနဲ့စွပ်စွဲခံထားရတဲ့ အမှုတွေအတွက်ကြားနာမှုကိုဒီနေ့ ဒီဇင်ဘာ ၁၇ ရက်က နေပြည်တော်အထူးတရားရုံးမှာ ပြုလုပ်ခဲ့ပါတယ်။ဒီနေ့တရားခွင်မှာ ဒေါ်အောင်ဆန်းစုကြည်နဲ့ ဒေါက်တာမျိုးအောင်တို့ဟာ ထောင်ဝတ်စုံတွေကိုဝတ်ဆင်ထားကြရတယ်လို့ တရားရုံးနဲ့နီးစပ်တဲ့အသိုင်းအဝိုင်း ကပြောပါတယ်။

    ဒေါ်အောင်ဆန်းစုကြည်ဟာ အဖြူရောင်အင်္ကျီ နဲ့ အညိုရောင်လုံချည်ကို ဝတ်ဆင်ထားရပြီး ဒေါက်တာမျိုးအောင်ဟာလည်း အင်္ကျိအဖြူရောင် ၊ လုံချည်အပြာရောင်တို့ကိုဝတ်ဆင်ထားရတယ်လို့ ဆိုပါတယ်။ အဲဒီဝတ်စုံတွေကိုထောင်အာဏာပိုင်တွေက ပေးပို့လို့ ဝတ်ဆင်ရတာလို့ သိရပါတယ်။ အဲဒီဝတ်စုံတွေကို ဝတ်ခိုင်းတဲ့ အပေါ် ဒေါ်အောင်ဆန်းစုကြည်က မှတ်ချက်ပြုတာမရှိဘဲ ရဲရဲဝင့်ဝင့်နဲ့တည်တည်ငြိမ်ငြိမ်ပဲရှိနေတယ်လို့ သိရပါတယ်။

    ဒီကနေ့ စစ်ဆေးရဖို့ရှိတဲ့ အဂတိအမှု (၅) မှုမှာ ရန်ကုန် တက္ကသိုလ် ရိပ်သာလမ်း က ဒေါ်ခင်ကြည်ဖောင်ဒေးရှင်းမြေနေရာငှားရမ်းတာနဲ့ပတ်သက်တဲ့ အမှု ၁ခုကိုသာ စစ်ဆေးခဲ့ပြီး တရားလိုပြသက်သေနှစ်ဦး ဖြစ်တဲ့ ရန်ကုန်တိုင်းဝန်ကြီးချုပ်ဟောင်း ဦးဖြိုးမင်းသိန်း နဲ့ ရန်ကုန်တိုင်းအစိုးရအဖွဲ့ဝန်ကြီးဟောင်း ဒါ်နီလာကျော် တို့ သက်သေထွက်ဆိုခဲ့ပါတယ်။

    အဲဒီလိုထွက်ဆိုရာမှာ အဲဒီမြေနေရာအတွက် တစ်လ ကျပ်၁၅သိန်းနဲ့ငှားရမ်းခဲ့တဲ့ကိစ္စမှာ သူတို့ပါဝင်ဆောင်ရွက်ပေးခဲ့တဲ့အပိုင်းတွေကိုထွက်ဆိုခဲ့တယ်လို့သိရပါတယ်။ ဒီကနေ့ ကြားနာမှုအရ အဲဒီမြေနေရာကို မြို့ရွာနဲ့ အိုးအိမ်ဖွံ့ဖြိုးမှုဦးစီးဌာနရဲ့ဌားရမ်းခပေါက်ဈေးသတ်မှတ်ချက်အတိုင်း ဌားရမ်းခဲ့တာကို စစ်ဆေးပေါ်ပေါက်ခဲ့တယ်လို့သိရပါတယ်။ အဲဒီအမှုကို ဒီနေ့အထူးတရားရုံးတရားခွင်မှာ မန္တလေးတိုင်းတရားရုံးချုပ် တရားသူကြီးဦးမြင့်စန်းက စစ်ဆေးတာဖြစ်ပြီး ကျန်တဲ့အမှုတွေကို ဇန်နဝါရီ ၇ရက်ကို ပြန်လည်ချိန်းဆိုထားတယ်လို့သိရပါတယ်။

    

    ဓာတ်ပုံ ရင်းမြစ်, Getty Images

15. ၁၇ ဒီဇင်ဘာ ၂၀၂၁Samsung နဲ့ LG အပါအဝင်တောင်ကိုရီးယား ကုမ္ပဏီအချို့ ဟာ စစ်ကောင်စီတာဝန်ရှိသူတွေနဲ့ တွေ့ဆုံခဲ့တယ်လို့ Financial Time သတင်းကဖော်ပြ

    Samsung နဲ့ LG အပါအဝင်တောင်ကိုရီးယား ကုမ္ပဏီအချို့ ဟာ စစ်ကောင်စီတာဝန်ရှိသူတွေနဲ့ တွေ့ဆုံခဲ့တယ်လို့ Financial Time သတင်းကဖော်ပြ မြန်မာနိုင်ငံဆိုင်ရာတောင်ကိုရီးယားနိုင်ငံသံရုံးရဲ့ စီစဉ်ပေးမှုနဲ့ Samsung နဲ့ LG အပါအဝင် တောင်ကိုရီးယား ကုမ္ပဏီအချို့ဟာ ပြီးခဲ့တဲ့လက မြန်မာစစ်ကောင်စီတာဝန်ရှိသူတွေနဲ့ တွေ့ဆုံပြီး အဆင့်မြင့်အစည်းအဝေးတခု ပြုလုပ်ခဲ့တယ်လို့ Financial Time သတင်းဌာနကသူတို့ရရှိတဲ့ စာရွက်စာတမ်းတွေကို ကိုးကားပြီး သတင်းဖော်ပြလာပါတယ်။ လူ့အခွင့်အရေးရှေ့နေတစ်ဦးဖြစ်ခဲ့တဲ့ တောင်ကိုရီးယားသမ္မတ မွန်ဂျေအင်း ဦးဆောင်တဲ့ အစိုးရအဖွဲ့က မြန်မာနိုင်ငံက စစ်အာဏာသိမ်းမှုကိုကန့်ကွက်နေပေမယ့် တောင်ကိုရီးယားစီးပွားရေးလုပ်ငန်းစုအချို့ က အဲဒီအစည်းအဝေးကိုတက်ရောက်ခဲ့တာလို့ ဆိုပါတယ်။ အဲဒီကိုရီးယား - မြန်မာ စီးပွားရေးပူးပေါင်းဆောင်ရွက်မှုဆွေးနွေးပွဲကို ရင်းနှီးမြှုပ်နှံမှုနဲ့ ကုမ္ပဏီများ ညွှန်ကြားမှုဦးစီးဌာန(DICA) ၊ ကုန်သည်စက်မှုအသင်းချုပ်(UMFCCI) ၊ ပုဂ္ဂလိကကဏ္ဍကိုယ်စားပြု စည်းရုံးရေးအဖွဲ့နဲ့ ကိုရီးယားစီးပွားရေးလုပ်ငန်းရှင်တွေ တက်ရောက်ခဲ့ကြတယ်လို့ဖော်ပြပါတယ်။

    

    ဓာတ်ပုံ ရင်းမြစ်, Chung Sung-Jun/Getty Images

    Financial Time က ရရှိတဲ့ အထောက်အထားတွေမှာ အဲဒီဆွေးနွေးပွဲကို Samsung ၊ LG နဲ့ ကိုရီးယားထိပ်သီး စတီးထုတ်လုပ်သူ POSCO ကုမ္ပဏီတွေက အမှုဆောင်အရာရှိတွေ တက်ရောက်ခဲ့ တာကို တွေ့ရှိခဲ့ရတယ်လို့ဖော်ပြပါတယ်။ တွေ့ဆုံပွဲကို ကိုရီးယား Lotte Group ရဲ့ လုပ်ငန်းခွဲဖြစ်တဲ့ ရန်ကုန်မြို့က Lotte ဟိုတယ်မှာ ပြုလုပ်ခဲ့ကြပြီး POSCO International ကတော့သူတို့ လုပ်ငန်းတွေရဲ့ အခက်အခဲတွေကို ဆွေးနွေးဖို့ အစည်းအဝေးမှာ ပါဝင်ခဲ့တယ်လို့ အတည်ပြုတဲ့အကြောင်းနဲ့ အာဏာသိမ်းပြီးတည်းက မြန်မာနိုင်ငံမှာ စီးပွားရေး သဘောတူညီချက် အသစ် ထပ်မံလက်မှတ်ရေးထိုးဆောင်ရွက်မရှိဘူးလို့ ပြောကြားတဲ့အကြောင်း Financial Time သတင်းဌာနက ရေးသားထားပါတယ်။ LG ကုမ္ပဏီကတော့ အစည်းအဝေးမှာ ပါဝင်တာနဲ့ ပတ်သက်ပြီး အတည်မပြုနိုင်သေးကြောင်း ပြောကြားခဲ့ပြီး ရန်ကုန်မြို့ကိုရီးယားသံရုံးက တုံ့ပြန်ဖြေကြားတာမရှိခဲ့ဘူးလို့ Financial Time က ပြောပါတယ်။ဒါ့အပြင် Samsung ကတော့ မှတ်ချက်ပေးဖို့ ငြင်းဆန်ခဲ့တယ်လို့ Financial Time သတင်းကဆိုပါတယ်။ ကိုရီးယား နိုင်ငံခြားရေး ဝန်ကြီးဌာနရဲ့ ပြောရေးဆိုခွင့်ရှိသူကတော့ မြန်မာနိုင်ငံ ရဲ့ ငြိမ်းချမ်းရေး၊ တည်ငြိမ်ရေးနဲ့ ဒီမိုကရေစီ ပြန်လည်ထူထောင်ရေးအတွက် အာဆီယံရဲ့ကြိုးပမ်းအားထုတ်မှုတွေမှာ ကိုရီးယားနိုင်ငံအနေနဲ့ တက်ကြွစွာ ထောက်ခံအားပေးနေတယ်လို့ Financial Time ကိုတုံ့ပြန်ခဲ့ပါတယ်။ မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေး အထူးကိုယ်စားလှယ်ဟောင်း မစ္စ ရန်ဟီးလီ ကတော့ အစည်းအဝေးတက်ရောက်ခဲ့တဲ့ ကိုရီးယားကုန်သည်အသင်းက ကိုယ်စားလှယ်ရဲ့လုပ်ရပ်ဟာ ရှက်ဖို့ကောင်းပြီး တရားမဝင်တဲ့ အာဏာသိမ်းစစ်ကောင်စီကို တရားဝင်မှုရှိအောင်လုပ်ပေးနေတဲ့အဓိပ္ပာယ် သက်ရောက်တယ်လို့ ပြစ်တင်တဲ့အကြောင်း Financial Time ကဖော်ပြပါတယ်။

16. ၁၇ ဒီဇင်ဘာ ၂၀၂၁လေးကေ့ကော်တိုက်ပွဲတွေအတွင်း ထိုင်းဘက်ကို လက်နက်ကြီးကျည် ကျရောက်မှု ထိုင်းက ကန့်ကွက်အကြောင်းကြားစာပေးပို့ထား, ထိုင်းဘက်က ပြန်လည်ပစ်ခတ်မှုမရှိသေး

    ကရင်ပြည်နယ်၊ KNU တပ်မဟာ ၆ နယ်မြေအတွင်းရှိ လေးကေ့ကော်မြို့သစ်မှာ စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ် KNU/KNLA တို့ တိုက်ပွဲတွေ ဒီဇင်ဘာ ၁၄ ရက်ကစလို့ ဒီနေ့အထိ လေးရက်ဆက်တိုက်ဖြစ်ပွားနေပါတယ်။

    တိုက်ပွဲအတွင်း မနေ့ ဒီဇင်ဘာ ၁၆ ရက်နေ့က စစ်ကောင်စီက ပစ်ခတ်တဲ့လက်နက်ကြီးကျည်တချို့ ထိုင်းနိုင်ငံဘက်ခြမ်းကိုကျရောက်ခဲ့တာကြောင့် မြန်မာဘက်က စစ်ရှောင်တချို့ ထိခိုက်ဒဏ်ရာရရှိခဲ့တယ်လို့ ထိုင်းအခြေစိုက် မီဒီယာတချို့က ဓာတ်ပုံနဲ့တကွ ဖော်ပြထားပါတယ်။

    ခုလို ထိုင်းဘက်ခြမ်းကို လက်နက်ကြီးကျည်တချို့ကျရောက်မှုတွေရှိခဲ့တာကြောင့် ထိုင်းအာဏာပိုင်တွေက မြန်မာဘက်ခြမ်းကို နှစ်နိုင်ငံနယ်စပ်ကော်မတီကတစ်ဆင့် ကန့်ကွက်အကြောင်းကြားစာပေးပို့ထားပြီး အခြေအနေတွေကိုအနီးကပ်စောင့်ကြည့်နေတယ်လို့ ဘီဘီစီထိုင်းသတင်းဌာနကတဆင့် သိရပါတယ်။။

    မနေ့က လေးကေကော်မြို့သစ်အနီး ထိုင်းနိုင်ငံပိုင်နက်အတွင်းက ကြံစိုက်ခင်းအတွင်း မော်တာကျည်တွေကျရောက်ခဲ့ပြီး မီးလောင်မှုဖြစ်ပွားခဲ့တဲ့နောက် ထိုင်းတော်ဝင်တပ်မတော်မှ တပ်ဖွဲ့ဝင်တွေကို နယ်စပ်မှာ တပ်ဖြန့်ချထားလိုက်တယ်လို့လည်း ဘီဘီစီထိုင်းသတင်းဌာနကတဆင့်သိရပါတယ်။

    ဒီဖြစ်စဉ်အပေါ် ထိုင်းစစ်တပ်က မြန်မာစစ်ကောင်စီဘက်ကို ကန့်ကွက်စာ ပေးပို့ခဲ့ပြီး နိုင်ငံရဲ့ အချုပ်အခြာအာဏာကိုထိပါးလာရင် လက်တုံ့ပြန်ဖို့ အသင့်ရှိတယ်လို့လည်း ဆိုပါတယ်။

    

    ဓာတ်ပုံ ရင်းမြစ်, Mae Sot Media

    ဒီနေ့ ဒီဇင်ဘာ ၁၇ ရက်မနက်ပိုင်းမှာ ထိုင်းစစ်တပ်က မြန်မာစစ်ကောင်စီတပ်တွေကို ပြန်လည်ပစ်ခတ်မှုတွေရှိတယ်လို့ သတင်းတွေထွက်ပေါ်လာပေမယ့် ဒီမနက် ထိုင်းဘက်ခြမ်းကနေ အဲဒီလို ပစ်ခတ်မှုတွေမရှိကြောင်းလည်း ၎င်းတို့ရဲ့ မဲဆောက်သတင်းထောက်ကတစ်ဆင့် သိရှိရပါတယ်။

    မနေ့က ထိုင်းဘက်ခြမ်းကို လက်နက်ကြီးကျည်တချို့ ကျရောက်ခဲ့တာကြောင့် ထိုင်းဘက်ခြမ်းကနေရာတချို့မှာ မီးခိုးလုံးတွေ ထွက်နေတာ၊ ထွက်ပြေးတိမ်းရှောင်လာရတဲ့သက်ကြီး အမျိုးသားတစ်ဦး ကျည်ထိမှန်လို့ ဒဏ်ရာရတာကိုထိုင်းဘက်က ပြုစုကုသပေးနေတဲ့ပုံတွေကိုလည်း ထိုင်းနိုင်ငံအခြေစိုက်မီဒီယာတချို့က ထုတ်ပြန်ထားပါတယ်။

    လက်ရှိမှာ တိုက်ပွဲတွေကြောင့်ဘေးလွတ်ရာတိမ်းရှောင်နေရသူ စစ်ရှောင် လေးထောင်ကျော်ရှိတယ်လို့ ကရင်အမျိုးသားအစည်းအရုံး KNU က ထုတ်ပြန်ထားပါတယ်။ အဲဒီထဲက ၂၀၀၀ ကျော်ဟာ ထိုင်းနိုင်ငံဘက်ခြမ်းမှာ ခိုလှုံနေရပြီး ဒီဒုက္ခသည်တွေကို ယခုအခါ စာသင်ကျောင်းမှာ နေရာချထားတယ်လို့ ထိုင်းအခြေစိုက်မဲဆောက်မီဒီယာက ဖော်ပြထားပါတယ်။

    လေးကေ့ကော်မှာတော့ တိုက်ပွဲတွေဟာ ဒီနေ့ ဒီဇင်ဘာ ၁၇ ရက်မနက်ထိ ဖြစ်ပွားနေပြီး စစ်ကောင်စီတပ်ဖွဲ့ဝင် ၆ ဦးနဲ့ နယ်ခြားစောင့်တပ်ဖွဲ့ဝင် ၂ ဦး စုစုပေါင်း ၈ဦးကိုလက်နက်ခဲယမ်းတချို့နဲ့ဖမ်းဆီးထားကြောင်း၊ ရှေ့ရက်က တိုက်ပွဲတချို့အတွင်း စစ်ကောင်စီတပ်ဖွဲ့ဝင် လေးဦးသေဆုံးပြီးလေးဦးဒဏ်ရာရတယ်လို့ KNU ဘက်က ထုတ်ပြန်ထားပါတယ်။

17. ၁၇ ဒီဇင်ဘာ ၂၀၂၁ဖမ်းမိထားတဲ့စစ်ကောင်စီတပ်ဖွဲ့ဝင်တွေကို KNU က ကောင်းမွန်စွာလက်ခံထား

    ဒီဇင်ဘာလ ၁၆ ရက်က ဖြစ်ပွားခဲ့တဲ့ လေးကေ့ကော်ဒေသ တိုက်ပွဲ အတွင်း အရှင်ဖမ်းဆီးရမိထားတဲ့ စစ်ကောင်စီလက်အောက်ခြေမြန်တပ်ရင်း ၂၇၅ က တပ်ဖွဲ့ ဝင် ၆ ဦးနဲ့ နယ်ခြားစောင့်တပ် -BGF တပ်ဖွဲ့ဝင် ၂ ဦးတို့ကို ကောင်းမွန်စွာထားရှိထားတယ်လို့ ကေအဲန်ယူ-ကရင်အမျိုးသားအစည်းအရုံးက ပြောတဲ့အကြောင်း ဒေသတွင်းမီဒီယာတစ်ခုဖြစ်တဲ့ ကေအိုင်စီက ဓါတ်ပုံတွေနဲ့တကွ ဖော်ပြလာပါတယ်။

    မနေ့က ပဟိကလော်၊ မဲ့ထော်သလေး နဲ့ မေတ္တာလင်းမြိုင်ကျေးရွာတွေမှာ ဖြစ်ပွားတဲ့တိုက်ပွဲအတွင်းသေဆုံးသွားတဲ့ စစ်ကောင်စီတပ်ဖွဲ့ဝင်တွေရဲ့ အလောင်းတွေကို ကောက်ယူဖို့လာတဲ့ စစ်ကောင်စီတပ်က တပ်ကြပ်အဆင့်ရှိသူအပါအဝင် ၈ ဦးကို ကရင်အမျိုးသား လွတ်မြောက်ရေး တပ်မတော်(KNLA) က အရှင်ဖမ်းမိခဲ့တာလို့ဆိုပါတယ်။

    ဖမ်းမိထားတဲ့စစ်ကောင်စီတပ်ဖွဲ့ဝင်တွေရဲ့ကိုယ်ရေးအချက်အလက်တွေကို စစ်ဆေးမှတ်တမ်းယူထားပြီး ကေအဲန်ယူ ဗဟိုဌာနချုပ်နဲ့ စစ်ဘက်ဆိုင်ရာ ဌာန တာဝန်ရှိသူတွေထံကို ဆက်လက်သတင်းပို့သွားမယ်လို့ ကေအဲန်ယူက ပြောကြောင်း ကေအဲန်ယူကပြောကြောင်း ကေအိုင်စီသတင်းကဖော်ပြပါတယ်။

    လက်ရှိမှာ လေးကေ့ကော်တိုက်ပွဲကြောင့် ထောင်နဲ့ချီတဲ့ဒေသခံပြည်သူတွေဟာ တောတွင်းနေရာတွေမှာတိမ်းရှောင်နေရသလို၊ ထိုင်းနိုင်ငံဘက်ခြမ်းကို ကူးကာ စစ်ရှောင်နေရတဲ့ပြည်သူကလည်း ၂၀၀၀ကျော်ရှိတယ်လို့ စစ်ရှောင်တွေကို ကူညီပေးနေသူတွေကပြောပါတယ်။ ထိုင်းဘက်ခြမ်းရောက် ဒေသခံတွေကို ထိုင်းအာဏာပိုင်တွေက စာသင်ကျောင်းမှာထားရှိပြီး လိုအပ်တာတွေကူညီပေးနေတယ်လို့ သိရပါတယ်။ ဒီနေ့ ဒီဇင်ဘာလ ၁၇ ရက်မှာလည်း မနက် ၉နာရီကျော်ကစပြီး တိုက်ပွဲတွေဆက်လက်ဖြစ်ပွားနေပြီး လေးကေ့ကော်မြို့သစ် ရပ်ကွက်နေ ပြည်သူ ၁၀၀၀ ခန့်ဟာ မြို့တွင်းမှ ပိတ်မိနေတယ်လို့ ဆိုပါတယ်။

    

    ဓာတ်ပုံ ရင်းမြစ်, KIC ၊ Kahsawwah

    

    ဓာတ်ပုံ ရင်းမြစ်, KIC ၊ Kahsawwah

    

    ဓာတ်ပုံ ရင်းမြစ်, KIC ၊ Kahsawwah

18. ၁၇ ဒီဇင်ဘာ ၂၀၂၁လေးကေကော် မှာ လေးရက်မြောက်အဖြစ် ပစ်ခတ်မှုတွေဆက်ဖြစ်

    နှစ်ဖက်ထိတွေ့မှုတွေရှိနေတဲ့ ကရင်ပြည်နယ်၊လေးကေကော်ဒေသမှာ ဒီကနေ့ ဒီဇင်ဘာ ၁၇ ရက် မနက်ပိုင်း ၉နာရီဝန်းကျင်ကစပြီး လက်နက်ကြီးတွေနဲ့ ပစ်ခတ်သံတွေကြားနေရတယ်လို့ အဲဒီမှာ ရောက်နေသူ တချို့ ကပြောပါတယ်။ စစ်ကောင်စီ က အမြှောက်ကုန်းနဲ့ ကျောက်လုံးကြီးဘက်တွေကနေ မယ်ထော်သလေးဘက်ကို ပစ်ခတ်နေတယ်လို့ ဒေသခံအချို့ကပြောပါတယ်။

    ဒီဇင်ဘာ ၁၃ရက်ကစပြီး အာဏာသိမ်းစစ်ကောင်စီရဲ့တပ်တွေ လေးကေ့ကော်မြို့ထဲကို အတင်းအဓမ္မဝင်ရောက်ခဲ့လို့ ထိပ်တိုက်တွေ့မှုတွေဖြစ်ပွားခဲ့ရတယ်လို့ ကရင်အမျိုးသား အစည်းအရုံး ကေအဲန်ယူက မနေ့က ဒီဇင်ဘာ ၁၆ ရက်ညပိုင်းကထုတ်ပြန်ပါတယ်။

    ပစ်ခတ်တိုက်ခိုက်မှု ၂ ကြိမ်အတွင်း အာဏာသိမ်း စစ်ကောင်စီရဲ့တပ်ဘက်မှ ဗိုလ်ကြီး ၁ ယောက် တပ်ကြပ်ကြီး ၁ ယောက် နဲ့တပ်ကြပ် ၁ ယောက် အပါအဝင် စုစုပေါင်း ၄ ယောက် သေဆုံးပြီး ဒုဗိုလ်မှူးကြီး ၁ ယောက် ဗိုလ်ကြီး ၁ ယောက် နဲ့ တပ်သား ၂ ယောက် စုစုပေါင်း ၄ ယောက် ထိခိုက်ဒဏ်ရာ ရရှိခဲ့ကြတယ်လို့ ကေအဲန်ယူက ထုတ်ပြန်ချက်မှာပါရှိပါတယ်။

    လေးကေကော် မယ်ထော်လေးဒေသမှာ မနေ့ ကဒီဇင်ဘာ ၁၆ရက်အထိ တိုက်ပွဲတွေ ဆက်လက်ဖြစ်ပွားခဲ့ပြီး စစ်ကောင်စီဘက်က သေဆုံးမှု ၊ထိခိုက်ဒဏ်ရာရရှိမှုနဲ့ ပျောက်ဆုံးမှု တချို့ရှိနေတယ်လို့ စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကပြောပါတယ်။ ပြင်းထန်ဒဏ်ရာရတဲ့အထဲ စိုးရိမ်ရအနေအထားလည်းရှိနေပြီး ဒီဇင်ဘာ ၁၄ရက် အပစ်ခံရမှုမှာ စစ်ကောင်စီဘက်က ထိခိုက်ဒဏ်ရာရသူရှိတယ်လို့ ဆိုပါတယ်။ သေဆုံးမှု ၁ယောက်ရှိခဲ့တယ်လို့ပြောပြီး ထိခိုက်ဒဏ်ရာရရှိသူတွေနဲ့ပတ်သက်လို့ စစ်ကောင်စီဘက်က တိတိကျကျပြောဆိုတာမရှိပါဘူး။

    '' ကျွန်တော်တို့ဆီမှာ မယ်ထော်သလေးနားမှာ ပျောက်နေတဲ့သူတွေရှိနေသေးတယ်။ သူတို့ရဲ့ အင်အားကလည်းသိပ်မများဘူးလေ။တိုက်ခိုက်ခံရတဲ့လုံခြုံရေးစခန်းနဲ့တော့ အဆက်အသွယ်ရတယ်။စစ်သည် ၂ဦးလောက်ပျောက်နေတယ်ဆိုတာတော့ လောလောဆယ် အခြေအနေမှာသိရတယ်။ တပ်ဘက်ကနေ လက်နက်ကြီးနဲ့ပစ်တာ ရှိကောင်းရှိနိုင်ပါတယ်။အဲဒီမှာရှိနေတဲ့လုံခြုံရေးတပ်ဖွဲ့ကတော့ နဂိုကတည်းကရှိနေတဲ့လုံခြုံရေးတပ်ဖွဲ့ဖြစ်တယ်။အဲဒီဟာမှာတော့ သာလွန်တဲ့အင်အားနဲ့ ဆောင်ရွက်တာမျိုးတော့ရှိမှာပေါ့။လေးကေ့ကော်ထဲမှာ လုံခြုံရေးအရ စိစစ်မှုတွေကတော့ ဆက်လက်ဆောင်ရွက်နေဆဲပဲ'' လို့ စစ်ကောင်စီပြောခွင့်ရကဆိုပါတယ်။

    KNU ရဲ့ ထုတ်ပြန်ချက်မှာတော့ ဒီဇင်ဘာ ၁၄ရက်က စတင်တဲ့ ပစ်ခတ်တိုက်ခိုက်မှုတွေကြောင့် စစ်ကောင်စီ တပ်ဖွဲ့ဝင်တွေ ထိခိုက်သေဆုံးမှုတွေရှိခဲ့သလို ကရင်အမျိုးသားတပ်မတော် KNLA က ဝိုင်းထား ပိတ်ဆို့ခဲ့သဖြင့် စစ်ကောင်စီ တပ်တွေဟာ သူတို့တပ်တွေ ပြန်လည်ထွက်ခွာဖို့ခွင့်တောင်းခဲ့လို့ လေးကေကော်မြို့တာဝန်ရှိသူတွေနဲ့ ကရင်အမျိုးသားလွတ်မြောက်ရေးတပ်မတော်တို့ညှိနှိုင်းပြီး စစ်ကောင်စီတပ်တွေကို ပြန်လည်ထွက်ခွာခွင့်ပေးခဲ့ပေမယ့် ပြန်လည်ထွက်ခွာခြင်းမရှိတာကြောင့် ပစ်ခတ်တိုက်ခိုက်မှုတွေထပ်မံဖြစ်ပွားခဲ့ရတယ်လို့ ဖော်ပြထားပါတယ်။ ဒီဇင်ဘာလ ၁၆ ရက် မှာလည်း တိုက်ပွဲတွေဆက်ရှိခဲ့ပြီး စစ်ကောင်စီတပ်ဘက်က ထိခိုက်ကျဆုံးမှု စာရင်းကို ကရင်အမျိုးသားလွတ်မြောက်ရေးတပ်မတော် KNLA ကအတည်ပြုဆဲရှိနေတယ်လို့ထုတ်ပြန်ပါတယ်။

    

    ဓာတ်ပုံ ရင်းမြစ်, MPA

19. ၁၇ ဒီဇင်ဘာ ၂၀၂၁ဂန္ထဝင်အနုပညာရှင် စည်သူဗိုလ်ကလေးတင့်အောင်ကွယ်လွန်

    ရုပ်ရှင်ဂီတနဲ့စာပေ ဂန္ထဝင်အနုပညာရှင် စည်သူဗိုလ်ကလေးတင့်အောင် ဟာ မနေ့က ဒီဇင်ဘာ ၁၆ ရက် ညပိုင်း က ရန်ကုန် ၊ ရွှေဂုံတိုင်က SSC ဆေးရုံမှာ လူကြီးရောဂါနဲ့ ကွယ်လွန်သွားတယ်လို့ မြန်မာနိုင်ငံရုပ်ရှင်အစည်းအရုံး တာဝန်ရှိသူတစ်ဦးက အတည်ပြုပါတယ်။ ဗိုလ်ကလေးတင့်အောင်ဟာ ကွယ်လွန်ချိန် အသက် ၁၀၀ ထဲ ရောက်ရှိနေပြီးဖြစ်ပြီး လာမယ့် ၂၀၂၂ ခုနှစ်၊ ဇွန်လမှာ အသက် ၁၀၀ ပြည့်မှာဖြစ်ပါတယ်။ ဗိုလ်ကလေးတင့်အောင်ကို ဧရာဝတီတိုင်းဒေသကြီး၊ ဖျာပုံခရိုင်၊ ဘိုကလေးမြို့ မှာမွေးဖွားခဲ့ပြီး မြန်မာနိုင်ငံလွတ်လပ်ရေးကြိုးပမ်းမှုသမိုင်းမှာ အဓိကကျတဲ့ ဗမာ့လွတ်လပ် ရေးတပ်မတော်မှာပါဝင်ခဲ့သူ တစ်ဦး ဖြစ်ပါတယ်။

    မြန်မာ့ ရုပ်ရှင်တစ်သက်တာထူးချွန်ဆုရ ရုပ်ရှင်ဒါရိုက်တာ၊ ဂီတစာဆို၊ ဇာတ်ညွှန်းရေးဆရာတစ်ဦး ဖြစ်ပြီး အမျိုးသား စာပေဆုရ စာရေးဆရာတစ်ဦးလည်း ဖြစ်ပါတယ်။ စည်သူဘွဲ့ ချီးမြှင့်ခြင်းခံရသူတစ်ဦးဖြစ်သလို ၂၀၁၈ ခုနှစ်မှာပထမဆုံးအကြိမ်ပေးတဲ့ တသက်တာရုပ်ရှင်ထူးချွန်ဆု ရရှိသူ ဗိုလ်ကလေးတင့်အောင်ကို နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ကိုယ်တိုင် ဆုချီးမြှင့်ပေးအပ်ခဲ့ပါတယ်။

    ဗိုလ်ကလေးတင့်အောင်ဟာ ၁၉၅၀ ပြည့်နှစ် မှာ 'အပြုံးလက်ဆောင်' ပြဇာတ်နဲ့ ပြဇာတ်ဒါရိုက်တာ စတင်ဖြစ်လာခဲ့ပြီး သူစီစဉ်တင်ဆက်ခဲ့တဲ့ပြဇာတ်တွေထဲ ငယ်ကျွမ်းဆွေ ပြဇာတ်ဟာ ထင်ရှားပြီး ခေတ်အဆက်ဆက်ပြန် လည်ကပြရတဲ့ပြဇာတ်လည်းဖြစ်ပါတယ်။ဒါ့အပြင် သူရေးသားခဲ့တဲ့ ထင်ရှားတဲ့ တေးသီချင်းအချို့ဟာ ဒီကနေ့ အထိ ပြန်လည်သီဆိုနေရတဲ့ အနုပညာလက်ရာတွေ ဖြစ်ပါတယ်။ အဲဒီသီချင်းတွေထဲမှာ သက်ဆိုင်သူသို့ ၊ နှစ်သစ်ချစ်ဦး၊ သံယောဇဉ်၊ မွန်တို့ဌာနေ၊ မျက်ဝန်းလဲ့ပြာပြာ၊ ဇရာ၊ ဂျင်မလေးဂျမ်း၊ မွှေးလွန်းသည့်ပန်း စတဲ့တေးသီချင်းတွေဟာ ဗိုလ်ကလေးတင့်အောင်ရဲ့ထင်ရှားတဲ့တေးသီချင်းတွေဖြစ်ကြပါတယ်။

    

    ဓာတ်ပုံ ရင်းမြစ်, နိုင်ငံတော်အတိုင်ပင်ခံရုံးဖေ့ဘွတ်

20. ၁၆ ဒီဇင်ဘာ ၂၀၂၁မကွေးတိုင်း ဝန်ကြီးချုပ်ကို အမှု ထပ်တိုး တရားစွဲ

    မကွေးတိုင်း ဝန်ကြီးချုပ် ဒေါက်တာ အောင်မိုးညို နောက်ထပ် အမှု တစ်မှု ထပ်တိုး တရားစွဲခံရ ပါတယ်။

    ခရိုင်ရွေးကောက်ပွဲ ကော်မရှင်က တာဝန်ရှိသူ တစ်ယောက်က တရားလို လုပ်ပြီး ရွေးကောက်ပွဲမှာ မလျော်သြဇာသုံးမှု ဆိုင်ရာ ရာဇသတ်ကြီး ပုဒ်မ ၁၇၁ (စ ) အရ မကွေးမြို့နယ် တရားရုံးမှာ ဦးတိုက် လျှောက်ထားတာ ကို တရားရုံးက လက်ခံခဲ့တယ်လို့ ဒေါက်တာ အောင်မိုးညိုရဲ့ ဥပဒေ အကျိုးဆောင် ရှေ့နေ ဦးမြင့်အောင်က ဘီဘီစီကို ပြောပါတယ်။

    အဂတိလိုက်စားမှု ၆ မှုနဲ့ စွဲချက်တင်ခံထားရတဲ့ ဒေါက်တာအောင်မိုးညို ကိုယ်တိုင် သူ့အမှုတွေ အတွက် ဒီတပတ်အတွင်း ကြားနာစစ်ဆေးမှုမှာ အပြစ်မရှိကြောင်း ထွက်ဆိုခဲ့ပြီးဖြစ်တယ်လို့လည်း သူက ဆိုပါတယ်။

    မကွေးတိုင်းဝန်ကြီးချုပ် ဒေါက်တာအောင်မိုးညိုကို အဂတိလိုက်စားမှု တိုက်ဖျက်ရေး ဆိုင်ရာ ပုဒ်မ ၅၅ နဲ့ စွဲဆိုထားတဲ့ အမှု ၆ မှု စလုံးအတွက် စွဲချက်တင်တဲ့အမိန့်ကို ပြီးခဲ့တဲ့ ဒီဇင်ဘာလ ၁၀ ရက်နေ့က ချမှတ်ခဲ့ပါတယ်။

    အဂတိအမှု အားလုံးကို အဂတိလိုက်စားမှု တိုက်ဖျက်ရေး ကော်မရှင်က စွဲဆိုထားတာဖြစ်ပြီး အဲဒီအမှုတွေထဲမှာ ဒေါက်တာ အောင်မိုးညို တစ်ယောက်တည်းကို စွဲဆိုထားတဲ့ အမှုက ၃ မှု ဖြစ်ပါတယ်။

    မကွေးတိုင်းဝန်ကြီးချုပ်ဒေါက်တာအောင်မိုးညိုကို စွဲဆိုထားခဲ့တဲ့ ပုဒ်မ ၅၀၅ (ခ)အမှုအတွက် မကွေးထောင်အထူးတရားရုံး က အလုပ်ကြမ်းနဲ့ထောင် ၂နှစ် ပြီးခဲ့တဲ့ ဇူလိုင်လ ပြစ်ဒဏ်ချမှတ်ခဲ့ပါသေးတယ်။

    

    ဓာတ်ပုံ ရင်းမြစ်, CJ