ဖရူဆိုမှာ သတ်ဖြတ်ခံလိုက်ရသူတွေထဲ အသက်မပြည့်သေးသူ ၄ ဦးပါဝင်တယ်လို့ ယူနီဆက်ဖ်ပြော

တိုက်ရိုက် ထုတ်လွှင့်ချက်

1. ၉ ဒီဇင်ဘာ ၂၀၂၁မြန်မာပြည်ခရီးနဲ့ပတ်သက်ပြီးဝေဖန်မှုကို ကမ္ဘောဒီးယားဝန်ကြီးချုပ် ကာကွယ်ပြောဆို

   ကမ္ဘောဒီးယားဝန်ကြီးချုပ်ဟွန်ဆန်ဟာ ဇန်နဝါရီလဆန်းမှာ မြန်မာပြည်ကို သွားဖို့ ပြင်ဆင်နေတဲ့သူ့ခရီးစဉ်ကို ဝေဖန်တဲ့ထိုင်းနိုင်ငံခြားရေးဝန်ကြီးဟောင်းရဲ့မှတ်ချက်ကို ဒီနေ့ ဒီဇင်ဘာလ ၉ ရက်မှာ ပြန်လည်တုံ့ပြန်ပြောဆိုလာပါတယ်။

   မြန်မာ့နိုင်ငံရေးအကျပ်အတည်းအဆုံးသတ်အောင် တိကျတဲ့ခြေလှမ်းတွေ မဖော်ဆောင်ခင် ဝန်ကြီးချုပ်ဟွန်ဆန်က မြန်မာပြည်ခရီးစဉ်သွားဖို့ ပြင်ဆင်နေတာဟာ အာဏာသိမ်းထားတဲ့မြန်မာစစ်တပ်ကို တရားဝင်အသိအမှတ်ပြုရာ ရောက်နိုင်တယ်လို့ ထိုင်းနိုင်ငံခြားရေးဝန်ကြီးဟောင်း Kasit Piromya က အစောပိုင်းတုန်းက ပြောထားတာပါ။

   ဝန်ကြီးချုပ်ဟွန်ဆန်ကတော့ နိုင်ငံခြားရေးဝန်ကြီးဟောင်းအနေနဲ့ ဒီလိုပြောဆိုတာ ကိုယ်ပိုင်အခွင့်အရေးဖြစ်ပေမဲ့ တစ်ဖက်မှာလည်း ဒီခရီးစဉ် စီစဉ်တာဟာ သူ့ရဲ့အခွင့်အရေးဖြစ်တယ်၊ အာဆီယံကို ၉ နိုင်ငံ မဖြစ်အောင်၊ ၁၀ နိုင်ငံအပြည့်ဖြစ်နေအောင် သူကြိုးပမ်းနေတာ အမှားလားလို့ မေးခွန်းပြန်ထုတ်ပါတယ်။

   လာမယ့်နှစ်မှာ အာဆီယံအလှည့်ကျဥက္ကဋ္ဌဖြစ်လာမယ့် ကမ္ဘောဒီးယားဟာ မြန်မာစစ်ခေါင်းဆောင်တွေလည်း အာဆီယံအစည်းအဝေးပွဲတွေမှာ ရှိသင့်တယ်လို့ပြောထားသူဖြစ်ပါတယ်။

   တစ်ချိန်တည်းမှာပဲ စစ်ကောင်စီခန့် နိုင်ငံခြားရေးဝန်ကြီး ဦးဝဏ္ဏမောင်လွင်ဟာ ဝန်ကြီးချုပ် ဟွန်ဆန်နဲ့ ဖနွမ်းပင်မြို့မှာ ဒီတစ်အတွင်း တွေ့ဆုံထားပြီး မြန်မာပြည်ကိုလာဖို့ တရားဝင်ဖိတ်ကြားခဲ့တယ်လို့ သိရပါတယ်။

   တစ်ဖက်မှာလည်း အာဆီယံဟာ မြန်မာ့အရေးဘုံသဘောတူညီချက်တွေကို စစ်ကောင်စီ ဘက်က အကောင်အထည်ဖော်တဲ့နေရာမှာ တိုးတက်မှုမရှိဘူးဆိုပြီး အာဏာသိမ်းစစ်ခေါင်းဆောင်လည်းဖြစ်၊ စစ်ကောင်စီဥက္ကဋ္ဌလည်းဖြစ်တဲ့ ဗိုလ်ချုပ်မှူးကြီးမင်းအောင်လှိုင်ကို ပြီးခဲ့တဲ့ထိပ်သီးဆွေးနွေးပွဲတွေကို မဖိတ်ကြားခဲ့ပါဘူး။

2. ၉ ဒီဇင်ဘာ ၂၀၂၁မြင်းခြံနယ်ထဲက ဆီမီးခုံမှာ စစ်ကောင်စီတပ်ဖွဲ့ဝင် ၃ ဦးသေဆုံးတယ်လို့ ဒေသကာကွယ်ရေးအဖွဲ့တွေပြော, မြင်းခြံနဲ့ငါန်းဇွန်က မိုင်တဲလ် တာဝါတိုင် ၂ ခုကိုလည်း ဖျက်ဆီးခဲ့တယ်လို့ဆို

   မန္တလေးတိုင်း၊ မြင်းခြံမြို့နယ်ထဲက ဆီမီးခုံမြို့အနီးမှာ စစ်ကောင်စီရဲ့ကားတစ်စင်းနဲ့ ဆိုင်ကယ် ၃ စင်းကို မိုင်းခွဲတိုက်ခိုက်ခဲ့တာကြောင့် ရဲ ၃ ဦးသေဆုံးပြီး ဆိုင်ကယ် ၃ စီး ပျက်စီးခဲ့တယ်လို့ ဒေသကာကွယ်ရေးတပ်တွေဘက်က ပြောလာပါတယ်။

   ဒီတိုက်ခိုက်မှုကို မြောင်နဲ့ငါန်းဇွန်က ဒေသကာကွယ်ရေးတပ်ဖွဲ့လေးဖွဲ့ကနံ့သာလှိုင်ရွာနဲ့ ငါန်းနန်းကျေးရွာကြားမှာ မနေ့ ဒီဇင်ဘာလ ၈ ရက်တုန်းက ပြုလုပ်ခဲ့တာလို့ ဆိုပါတယ်။

   အဲဒီတိုက်ခိုက်မှုမလုပ်ခင် ဒီဇင်ဘာလ ၈ ရက်နေ့ မနက်အစောပိုင်းတုန်းကလည်း မြင်းခြံမြို့နယ်ထဲက နံသာလှိုင်ရွာမှာရှိတဲ့ မိုင်တဲလ် တာဝါတိုင်တစ်ခုကို ဖျက်ဆီးခဲ့တယ်လို့ ဒေသကာကွယ်ရေးတပ်တွေက သတင်းထုတ်ပြန်ပါတယ်။

   နံ့သာလှိုင်ရွာထဲမှာရှိတဲ့မိုင်တဲလ်တာဝါတိုင် ဖျက်ဆီးခံရအပြီး စစ်ကောင်စီတပ်ဖွဲ့ဝင်တွေက ရွာကို ဝိုင်းလို့ ဒေသခံတွေ ဘေးလွတ်ရာကို ထွက်ပြေးခဲ့ရတယ်လို့ ဒေသခံတွေဆီက သိရပါတယ်။

   နောက်ပြီး အဲဒီတစ်မနက်ခင်း အစောပိုင်းမှာပဲ မြောင်နဲ့ ငါန်းဇွန်က ဒေသကာကွယ်ရေးတပ်ဖွဲ့ဝင်တချို့က ငါန်းဇွန်မြို့နယ်၊ လက်ပံပင်ရွာက မိုင်တဲလ်တာဝါတိုင်တစ်ခုကို မိုင်းခွဲ ဖျက်ဆီးပြီး ရဲကားကိုလည်း မိုင်းဆွဲလို့ ရဲတချို့ဒဏ်ရာရခဲ့တယ်လို့ ထုတ်ပြန်ချက်က ဆိုပါတယ်။

3. ၉ ဒီဇင်ဘာ ၂၀၂၁အတိုင်ပင်ခံပုဂ္ဂိုလ်နဲ့ သမ္မတဦးဝင်းမြင့်တို့ ထောင်ဒဏ်ချမှတ်ခံရမှုကို အလွန်စိုးရိမ်ကြောင်း ကုလလုံခြုံရေးကောင်စီပြော

   မြန်မာနိုင်ငံမှာ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်၊ သမ္မတဦးဝင်းမြင့်နဲ့ အခြားလူပုဂ္ဂိုလ်တွေ ထောင်ဒဏ်ချမှတ်ခံရတာကို အလွန်စိုးရိမ်တယ်လို့ ကုလသမဂ္ဂလုံခြုံရေးကောင်စီအဖွဲ့ဝင်တွေက ပြောလာပါတယ်။

   ဖေဖော်ဝါရီလ ၁ ရက် (စစ်တပ်အာဏာသိမ်းမှုဖြစ်ပြီး) ကတည်းက အကြောင်းမဲ့ဖမ်းဆီးထိန်းသိမ်းခံထားရသူတွေ အားလုံးကို ပြန်လွှတ်ပေးဖို့ကိုလည်း လုံခြုံရေးကောင်စီက ထပ်လောင်းတောင်းဆိုပါတယ်။

   မြန်မာပြည်ရဲ့ဒီမိုကရေစီအသွင်ကူးပြောင်းမှုကို ထောက်ခံသလို၊ ဒီမိုကရေစီနည်းကျလုပ်ငန်းစဉ်တွေကို အလေးထားဖို့ လိုအပ်တာ၊ နောက် အကြမ်းဖက်မှုရှောင်ကြဉ်ဖို့၊ မြန်မာပြည်သူတွေရဲ့အကျိုးစီးပွားနဲ့ဆန္ဒကိုကြည့်ပြီး ရင်ကြားစေ့ရေးနဲ့ အပြုသဘောဆောင်တဲ့ဆွေးနွေးမှုလုပ်ကြဖို့၊ လူ့အခွင့်အရေးနဲ့အခြေခံလွတ်လပ်ခွင့်တွေကို အပြည့်အ၀ လေးစားလိုက်နာပြီး ဥပဒေစိုးမိုးရေးထိန်းသိမ်းဖို့ လုံခြုံရေးကောင်စီအဖွဲ့ဝင်တွေက အလေးထားပြောဆိုပါတယ်။

   ကုလသမဂ္ဂလုံခြုံရေးကောင်စီဟာ ဖမ်းဆီးခံတွေ ပြန်လွှတ်ပေးဖို့၊ ဒီမိုကရေစီလမ်းကြောင်းပေါ်ပြန်လျှောက်ဖို့၊ အကြမ်းဖက်မှုရှောင်ဖို့ တောင်းဆိုနေတာ မြန်မာနိုင်ငံအတွင်းမှာ အာဏာသိမ်းမှု စတင်ကတည်းက ဖြစ်ပါတယ်။

   ဒါပေမဲ့ မြန်မာစစ်တပ်အပေါ် တိကျခိုင်မာတဲ့အရေးယူလုပ်ဆောင်ချက်မျိုး လုံခြုံရေးကောင်စီဘက်က မဖော်ဆောင်နိုင်သေးတဲ့အပေါ် မြန်မာ့အရေးတက်ကြွ လှုပ်ရှားသူတွေက ထောက်ပြပြောဆိုနေကြဆဲဖြစ်ပါတယ်။

4. ၉ ဒီဇင်ဘာ ၂၀၂၁စစ်ကောင်စီက NLD အစိုးရ လျှပ်စစ်ဝန်ကြီးနဲ့ ဒုဝန်ကြီးတွေကို အဂတိမှုနဲ့အမှုဖွင့်

   NLD အစိုးရ လျှပ်စစ်နဲ့စွမ်းအင်ဝန်ကြီး ဦးဝင်းခိုင်၊ ဒုတိယဝန်ကြီးတွေဖြစ်တဲ့ ဒေါက်တာထွန်းနိုင်နဲ့ ဦးခင်မောင်ဝင်းတို့ကို အဂတိလိုက်စားမှုတိုက်ဖျက်ရေး ဥပဒေနဲ့ အမှုဖွင့်လိုက်တယ်လို့ စစ်ကောင်စီဘက်က ဒီဇင်ဘာလ ၉ ရက်မှာ ထုတ်ပြန်လာပါတယ်။

   လျှပ်စစ်ဝန်ကြီး ဦးဝင်းခိုင်နဲ့ ဒုဝန်ကြီး ဒေါက်တာထွန်းနိုင်တို့ဟာ အထက်ရဲရွာရေအားလျှပ်စစ် စီမံကိန်းက ရေသွယ်ဥမင်ဖောက်လုပ်တဲ့လုပ်ငန်းမှာ သတ်မှတ်ကာလအတွင်း လုပ်ငန်းမပြီးတဲ့အခါ လုပ်ခွင့်ရကုမ္ပဏီကို လုပ်ငန်းကာလ တိုးပေးခဲ့တာ၊ ဒီလိုတိုးပေးခဲ့လို့ ရေအားလျှပ်စစ်ထုတ်လုပ်မှုကီလိုဝပ်နာရီ သန်း ၂ ထောင်နီးပါး မထုတ်လုပ်နိုင်ရာရောက်တဲ့အတွက် နိုင်ငံ့ဘဏ္ဍာ ကျပ်ငွေ ၃၀ ဘီလျံနီးပါး ထိခိုက်နစ်နာခဲ့တယ်ဆိုတာကို အဂတိလိုက်စားမှုတိုက်ဖျက်ရေးကော်မရှင်ကတွေ့ရှိခဲ့တယ်လို့ ဆိုပါတယ်။

   နောက် ဝန်ကြီးနဲ့ဒုဝန်ကြီးတို့ဟာ ထားဝယ်ဒေသမှာ လျှပ်စစ်ဓာတ်အားထုတ်လုပ်ဖို့ တနင်္သာရီတိုင်းအစိုးရအဖွဲ့က စီမံတဲ့ GGS ကုမ္ပဏီအတွက် ဓာတ်ငွေ့ဖိုး ငွေကျပ် ၆ ဘီလီယံကျော်ခန့်ကို ပြည်ထောင်စုအစိုးရအဖွဲ့ ခွင့်ပြုချက်မယူဘဲ လျှပ်စစ်ဓာတ်အားထုတ်လုပ်ရေးလုပ်ငန်းဌာန ဘတ်ဂျတ်ကနေ စိုက်ထုတ်ပေးချေဖို့ ခွင့်ပြုတယ်လို့လည်းဆိုပါတယ်။

   အဲဒီငွေတွေကို ဒုတိယဝန်ကြီး ဦးခင်မောင်ဝင်းက နိုင်ငံတော်ဘဏ္ဍာမှာ ဘတ်ဂျက်ငွေတင်ပြတောင်းခံပေးချေခဲ့ပေမယ့် ကြွေးကျန်ကိစ္စကို ၀န်ကြီးဌာန EC ကော်မတီကို မတင်ပြခဲ့တာဟာ နိုင်ငံတော်ငွေကြေး ထိခိုက်နစ်နာဆုံးရှုံးစေမှုမှာ အားပေးကူညီရာရောက်တယ်လို့ အဂတိလိုက်စားမှု တိုက်ဖျက်ရေးစစ်ဆေးမှုအရ သိရှိခဲ့ရတယ်လို့ပြောပါတယ်။

   ဒါကြောင့် ဝန်ကြီး ဦးဝင်းခိုင်နဲ့ ဒုဝန်ကြီး ဒေါက်တာထွန်းနိုင်ကို အဂတိလိုက်စားမှုတိုက်ဖျက်ရေးဥပဒေပုဒ်မ ၅၅၊ ဒုဝန်ကြီး ဦးခင်မောင်ဝင်းကို ပုဒ်မ ၅၅/၆၃ တို့နဲ့ နေပြည်တော် ဘုရားကုန်းမြို့မရဲစခန်းမှာ အဂတိလိုက်စားမှုတိုက်ဖျက်ရေးကော်မရှင်က အမှုဖွင့်လိုက်တာလို့ ဆိုပါတယ်။

5. ၉ ဒီဇင်ဘာ ၂၀၂၁ထန်တလန်မြို့ တိုက်ပွဲမှာ CDF တပ်ဖွဲ့ဝင် ၃ ဦး ကျဆုံး

   ချင်းပြည်နယ်၊ ထန်တလန်မြို့မှာ မနေ့ ဒီဇင်ဘာလ ၈ ရက်မှာဖြစ်ပွားတဲ့ စစ်ကောင်စီတပ် တွေနဲ့ ချင်းကာကွယ်ရေးတပ်(CDF)တို့ကြားက တိုက်ပွဲမှာ CDF ဘက်က တပ်ဖွဲ့ဝင် ၃ ဦး ကျဆုံးခဲ့တယ်လို့ ဒေသတွင်းမီဒီယာတွေက ဖော်ပြနေကြပါတယ်။

   ဒါ့အပြင် မနေ့ညပိုင်းမှာဖြစ်တဲ့ အဲဒီတိုက်ပွဲမှာ နောက်ထပ် CDF တပ်ဖွဲ့ဝင် ၄ ဦးလည်း ဒဏ်ရာရခဲ့တယ်လို့ သိရပါတယ်။

   စစ်ကောင်စီဘက်က ထန်တလန်မြို့တွင်းက နေအိမ်တွေကို ထပ်မံမီးရှို့ဖို့ ကြိုးစားခဲ့တာကြောင့် CDF ထန်တလန်က တားဆီးရာကနေ တိုက်ပွဲဖြစ်တာလို့ ဒေသခံတွေရဲ့ပြောဆိုချက်ကို ကိုးကားပြီး ဒေသတွင်းသတင်းတွေမှာဖော်ပြပါတယ်။

   ဒေသခံတွေရဲ့အခုလိုပြောဆိုမှုနဲ့ပတ်သက်ပြီး မှတ်ချက်တစုံတရာရဖို့ ဘီဘီစီက စစ်ကောင်စီဘက်ကို ဆက်သွယ် မေးမြန်းဖို့ ကြိုးစားနေပါတယ်။

   ထန်တလန်မြို့မှာ စစ်ကောင်စီနဲ့ ဒေသခံကာကွယ်ရေးတပ်တွေကြားက တိုက်ပွဲတွေကြောင့် စက်တင်ဘာလကတည်းကဆိုရင် ရာနဲ့ချီတဲ့နေအိမ်တွေ မီးရှို့တာခံခဲ့ရပြီး မြို့ခံတွေလည်း ဘေးလွတ်ရာ ထွက်ပြေးတိမ်းရှောင်နေရပါတယ်။

6. ၉ ဒီဇင်ဘာ ၂၀၂၁မြန်မာစစ်တပ်အနေနဲ့ အရပ်သားတွေကို ကာကွယ်ရမယ့်တာဝန်ရှိတယ်လို့ ကုလထပ်သတိပေး

   နိုင်ငံတကာဥပဒေအရ မြန်မာစစ်တပ်အနေနဲ့ အရပ်သားတွေ ဘေးကင်းလုံခြုံမှုကို ကာကွယ်ပေးရမယ့် တာဝန်တွေရှိတယ်ဆိုတာကို သတိပေးလိုတဲ့အကြောင်း ကုလသမဂ္ဂဘက်က ပြောဆိုလာပါတယ်။

   ဒေသကာကွယ်ရေးတပ်ဖွဲ့တွေရဲ့တိုက်ခိုက်မှုကို လက်တုံ့ပြန်တဲ့အနေနဲ့ စစ်တပ်က စစ်ကိုင်းတိုင်း၊ ဆားလင်းကြီးမြို့နယ်ထဲက ဒုန်းတောရွာမှာ လူ ၁၁ ဦးကို သေနတ်နဲ့ပစ်၊ မီးရှို့ခဲ့တယ်ဆိုတဲ့ သတင်းဖော်ပြချက်တွေထွက်ပေါ်လာတဲ့အပေါ် ကုလသမဂ္ဂအထွေထွေအတွင်းရေးမှူးချုပ်ရဲ့ပြောခွင့်ရသူက အခုလိုပြောလာတာဖြစ်ပါတယ်။

   ယုံကြည်ရတဲ့သတင်းတွေအရ အဲဒီလူ ၁၁ ဦးမှာ ကလေး ၅ ဦးလည်း ပါဝင်တယ်လို့ အထွေထွေ အတွင်းရေးမှူးချုပ်ရဲ့ပြောခွင့်ရသူက ပြောပါတယ်။

   အခုလိုအကြမ်းဖက်မှုကို ပြင်းပြင်းထန်ထန်ရှုတ်ချပြီးစက်ဆုပ်ရွံရှာဖွယ်ကောင်းတဲ့ ဒီလုပ်ရပ်ကို ကျူးလွန်တဲ့သူတွေကိုလည်း လုပ်ရပ်အတွက် တာဝန်ခံမှုရှိစေရမယ်လို့ ပြောပါတယ်။

   မြန်မာစစ်တပ်နဲ့လုံခြုံရေးတပ်ဖွဲ့တွေရဲ့အကြမ်းဖက်မှုတွေအတွက် ကုလသမဂ္ဂက အပြင်းထန်ဆုံးစကားလုံးနဲ့ ထပ်မံရှုတ်ချသလို ဒီလိုအကြမ်းဖက်မှုဟာ လက်မခံနိုင်စရာ ဖြစ်တာကြောင့် တိကျပြတ်သားတဲ့နိုင်ငံတကာတုံ့ပြန်မှုတစ်ခုပေါ်လာဖို့လည်း တောင်းဆို တယ်လို့ ဆိုပါတယ်။

   စစ်အာဏာသိမ်းပြီးကတည်းက ဒီဇင်ဘာလ ၈ ရက်နေ့အထိဆိုရင် လုံခြုံရေးတပ်ဖွဲ့ဝင်က သေစေလောက်အထိ အင်အားသုံးတာကြောင့် သေဆုံးတဲ့လက်နက်မဲ့အရပ်သား ၁၈၀၀ ကျော်အထိရှိလာတာကိုလည်း အတွင်းရေးမှူးချုပ်ရဲ့ပြောခွင့်ရသူက ထောက်ပြထားပါတယ်။

7. ၉ ဒီဇင်ဘာ ၂၀၂၁ထိုင်းမှာ မြန်မာရွှေ့ပြောင်းတွေလိုက်ပါလာတဲ့ကားတိမ်းမှောက်လို့ ၃ ဦးသေဆုံး

   ထိုင်းနိုင်ငံ၊ အယုဒ္ဓယပြည်နယ်ထဲက မဟာရတ်မြို့နယ်ထဲမှာ မြန်မာရွှေ့ပြောင်းလုပ်သားတွေကို တင်ဆောင်လာတဲ့ ပစ်ကပ် ကားတစ်စင်း ဒီဇင်ဘာလ ၈ ရက် မနက်ပိုင်းမှာ တိမ်းမှောက်မှုဖြစ်ခဲ့တာကြောင့် အခင်းဖြစ်တဲ့နေရာမှာပဲ ၃ ဦး သေဆုံးတယ်လို့ ထိုင်းကလာတဲ့သတင်းတွေအရ သိရပါတယ်။

   ကားတိမ်းမှောက်မှုဟာ ဘန်ကောက်မြို့တော်နဲ့ ၃၅ ကီလိုမီတာအကွာက ဖိုင်ခွယ်မီးပွိုင့်မှာဖြစ်ခဲ့တာဖြစ်ပြီး ယာဉ်ပေါ်ပါလာတဲ့နောက်ထပ် အလုပ်သမား ၁၈ ဦးလည်း ထိခိုက်ဒဏ်ရာရခဲ့တယ်လို့ သိရပါတယ်။

   ဒေသန္တရကယ်ဆယ်ရေးအဖွဲ့တွေက ဒဏ်ရာရတဲ့သူတွေကို ဒေသတွင်း ဆေးရုံ ၃ ခုကို ခွဲပြီး ပို့ဆောင်ထားတယ်လို့လည်း သိရပါတယ်။

   အသက်သေဆုံးသွားတဲ့မြန်မာလုပ်သား ၃ ဦးကတော့ အသက်ဆုံးရှုံးတဲ့လျော်ကြေးရပိုင်ခွင့်ရှိတယ်။ ထိခိုက်ဒဏ်ရာရတဲ့အလုပ်သမားတွေကတော့ ပကတိအကောင်းအဖြစ်အောင် လုပ်ငန်းခွင်ထိခိုက်အနာတရဖြစ်မှုကြောင့် နစ်နာဆုံးရှုံးမှုဖြစ်တဲ့ခံစားခွင့်၊ လမ်းစည်းကမ်း ယာဉ်စည်းကမ်းအရလည်း ပြန်လည်သုံးသပ်ရမှာဖြစ်တယ်။ ဒီကားက ယာဉ်စည်းကမ်းလမ်းစည်းကမ်းနဲ့ညီသလား၊ ဖောက်ဖျက်နေသလား ကြည့်ရမှာပေါ့။ ထိုင်းဥပဒေတွေအတိုင်း ခံစားခွင့်ရဖို့ ထိုင်းနိုင်ငံဆိုင်ရာအလုပ်သမားသံအရာရှိရုံးမှာ တာဝန်ရှိတာပေါ့'' မြန်မာပြည်သားများအရေးပူးတွဲလှုပ်ရှားမှုကော်မတီ( JACBA)ဥက္ကဋ္ဌ ဦးမိုးကြိုးက ပြောပါတယ်။

   ဒီယာဉ်တိမ်းမှောက်မှုဖြစ်စဉ်ကို ထိုင်းအာဏာပိုင်တွေက စုံစမ်းဆဲဖြစ်ပါတယ်။

8. ၉ ဒီဇင်ဘာ ၂၀၂၁တန့်ဆည်မှာ စစ်ကောင်စီတပ်တွေ သတ်ဖြတ်၊ ဖျက်ဆီးမှုတွေ လုပ်ခဲ့တယ်လို့ ဒေသခံတွေပြော

9. ၈ ဒီဇင်ဘာ ၂၀၂၁မန္တလေးက လူငယ်တွေကို စစ်ကောင်စီ ကားနဲ့တိုက်ကာ ပစ်ခတ်ဖမ်းဆီး

10. ၈ ဒီဇင်ဘာ ၂၀၂၁ဒုံးတောရွာဖြစ်စဉ် နောက်ဆက်တွဲ

11. ၈ ဒီဇင်ဘာ ၂၀၂၁အာဆီယံနိုင်ငံတွေဆီ မကြာခင် လာရောက်မယ့် အမေရိကန် နိုင်ငံခြားရေးဝန်ကြီး မြန်မာ့အရေးဆွေးနွေးမယ်

    အာဆီယံ ဒေသတွင်း နိုင်ငံတွေဆီ သီတင်းပတ်မကြာခင်မှာ လာရောက်မယ့် အမေရိကန် နိုင်ငံခြားရေး ဝန်ကြီး အန်တိုနီ ဘလင်ကင်ရဲ့ ခရီးစဥ်မှာ ဒေသတွင်း အရေးကိစ္စတွေနဲ့အတူ မြန်မာ့အရေးဆွေးနွေးမယ်လို့အမေရိကန် နိုင်ငံခြားရေး ဝန်ကြီးဌာနက ပြောပါတယ်။

    အမေရိကန် နိုင်ငံခြားရေးဝန်ကြီးဟာ အင်ဒိုနီးရှား၊ မလေးရှားနဲ့ ထိုင်းနိုင်ငံတို့ဆီကို ဒီဇင်ဘာလ ၁၃ ရက်ကနေ ၁၆ ရက်နေ့မှာ လာရောက်မှာ ဖြစ်ပါတယ်။

    အဲဒီခရီးစဥ်မတိုင်ခင်မှာ အာဆီယံအဖွဲ့ဝင်နိုင်ငံတွေဟာ အမေရိကန် နိုင်ငံခြားရေးဝန်ကြီး တက်ရောက်မယ့် ယူကေနိုင်ငံမှာ ကျင်းပမယ့် ကမ္ဘာ့ စက်မှုအင်အားကြီး ခုနစ်နိုင်ငံဆွေးနွေးပွဲကို သြစတြေးလျ၊ အိန္ဒိယ၊ တောင်ကိုရီးယားတို့ နဲ့အတူ လေ့လာသူနိုင်ငံတွေ အဖြစ် တက်ရောက်ကြမှာ ဖြစ်ပါတယ်။

    ဒီဆွေးနွေးပွဲကို ယူကေနိုင်ငံ လစ်ဗာပူးမှာ ဒီဇင်ဘာ ၁၀ ရက်ကနေ ၁၂ ရက်မှာ ပြုလုပ်မှာ ဖြစ်ပါတယ်။

    အဲဒီဆွေးနွေးပွဲမှာတော့ ယူကရိန်းနယ်စပ်မှာ ရုရှားတပ်ဖွဲ့တွေ ချထားတဲ့အရေး ကိစ္စ၊ ကိုဗစ်ကာကွယ်ဆေးနဲ့ အခြေခံအဆောက်အဦအရေးကိစ္စ၊ အင်ဒို-ပစိဖိတ်ဒေသတွင်းဖွံ့ဖြိုးရေးတို့ကို ဆွေးနွေးမှာ ဖြစ်ပါတယ်။

    • G7 ထိပ်သီးအစည်းအဝေးဆိုတာ ဘာလဲ၊ G7 ဟာ သြဇာ အာဏာ ရှိသလား

12. ၈ ဒီဇင်ဘာ ၂၀၂၁

    လုံးဝအုပ်ချုပ်ခွင့်မရစေရ သပိတ်

    ရန်ကုန်မှာ စစ်အာဏာသိမ်းဆန့်ကျင်ဆန္ဒပြပွဲတွေကို စစ်ကောင်စီဘက်က ပစ်ခတ်ဖြိုခွဲမှုတွေ ဆက်တိုက်ရှိနေပေမယ့်လည်း အဲဒီကြားထဲကနေ လူငယ်တွေဦးဆောင်တဲ့ စစ်အာဏာသိမ်းဆန့်ကျင်ဆန္ဒပြပွဲတွေ ဆက်ရှိနေပါတယ်။

    ဒီနေ့ ဒီဇင်ဘာ ၈ ရက်နေ့မနက်ကလည်း ရန်ကုန်မြို့တစ်နေရာမှာ ပြုလုပ်ခဲ့တဲ့ 'လုံးဝအုပ်ချုပ်ခွင့်မရစေရ သပိတ်' ကိုပြုလုပ်ခဲ့တဲ့ မြင်ကွင်းတွေဖြစ်ပါတယ်။

    ဓာတ်ပုံ-CJ

13. ၈ ဒီဇင်ဘာ ၂၀၂၁NUG ကို တရားဝင် အစိုးရအဖြစ် အသိအမှတ်ပြုဖို့ ဂျပန်ကိုတောင်းဆိုထား, ဂျပန် ပါတီစုံ ပါလီမန် အမတ်တွေနဲ့ NUG အစည်းအဝေးလုပ်မယ်

    NUG ဟာ သူတို့ကို မြန်မာနိုင်ငံရဲ့ တရားဝင် အစိုးရ အဖွဲ့အစည်း အဖြစ် အသိအမှတ်ပြုဖို့ ဂျပန်အစိုးရထံ စာရေးသားပေးပို့ ထားကြောင်း ဂျပန် ပြည်တွင်း သတင်းဌာနတွေက ပြောနေပါတယ်။

    ဂျပန်ဝန်ကြီးချုပ် ဖူမီယို ကီရှီဒါနဲ့ နိုင်ငံခြားရေး ဝန်ကြီး ယိုရှီမာဆာ ဟာယာရှီတို့ထံကို လိပ်မူပြီး NUG က ပြီးခဲ့တဲ့လ (နိုဝင်ဘာ) တုန်းက စာတစ်စောင် ရေးသား ပေးပို့ထားတာ ဖြစ်တယ်လို့ ဆိုပါတယ်။

    အဲဒီစာထဲမှာ ဂျပန်နိုင်ငံထဲ NUG ရဲ့ ကိုယ်စာလှယ်ရုံး ဖွင့်လှစ်ထားရှိမယ် ဆိုတဲ့ အကြောင်းအရာလည်း ပါဝင်နေတယ်လို့ အဲဒီ အကြောင်းချင်းရာ ကိစ္စနဲ့ သတင်းရင်းမြစ်တွေကို ကိုးကားပြီး ဂျပန်မီဒီယာတွေက ရေးပါတယ်။

    ဂျပန် နိုင်ငံခြားရေး ဌာနဘက်ကတော့ NUG ထံကနေ အဲဒီလို စာမျိုး လက်ခံရရှိထားလာ ဆိုတဲ့ အချက်ကို အတည်မပြုပါဘူး။

    လက်ရှိ ဂျပန် အစိုးရရဲ့ ရပ်တည်ချက်ကို ကြည့်ရင် အာဏာသိမ်း စစ်ကောင်စီကို မြန်မာရဲ့ တရားဝင် အစိုးရ အဖြစ် အသိအမှတ်ပြုတယ်လို့ မပြောပေမယ့်၊ စစ်ကောင်စီ အပေါ် အနောက်အုပ်စု နိုင်ငံတွေ ပြုလုပ်နေတဲ့ စီးပွားရေး ဆိုင်ရာ အရေးယူ ပိတ်ဆို့မှုတွေထဲလည်း မပါဝင်ပဲ ခပ်ကင်းကင်း နေတာ တွေ့ရတယ်လို့ အကဲခတ်တွေက ထောက်ပြကြပါတယ်။

    ဂျပန် ပါလီမန် အမတ်တွေထဲမှာတော့ မြန်မာ့ဒီမိုကရေစီ အရေး အားပေးကူညီနေကြသူတွေ ပါတီပေါင်းစုံမှာ ရှိနေပါတယ်။

    အဲဒီ ပါတီစုံက ဂျပန်အမတ်တွေနဲ့ NUG ယာယီ သမ္မတ ဒူဝါလရှီးလ အပါအဝင် တခြား တာဝန်ရှိသူတွေ ဒီဇင်ဘာ ၉ ရက်၊ ကြာသပတေးနေ့ကျရင် အွန်လိုင်းကနေ တဆင့် တွေ့ဆုံ ဆွေးနွေးကြဖို့ စီစဥ်ထားတယ်လို့ နားလည်ရပါတယ်။

14. ၈ ဒီဇင်ဘာ ၂၀၂၁မန္တလေးမြို့တော်ဝန် ဒေါက်တာရဲလွင်နဲ့ အစိုးရအဖွဲ့ဝန်ကြီးဟောင်းတချို့ကိုလည်း အမိန့်ချမှတ်, ဒေါက်တာဇော်မြင့်မောင်မှာ နောက်ထပ် ဆက်လက်ရင်ဆိုင်ရမယ့်အမှု ၇ မှု ကျန်ရှိနေ

    ဒီနေ့ အိုးဘို ထောင်တွင်း အထူးတရားရုံးမှာ မန္တလေးတိုင်းအစိုးရအဖွဲ့ ဝန်ကြီးတွေဖြစ်ခဲ့တဲ့ ဒေါက်တာ ရဲလွင်ကို ပုဒ်မ ၅၀၅(ခ) နဲ့ ထောင် နှစ်နှစ် အမိန့်ချလိုက်သလို လယ်ဆည်ဝန်ကြီးဟောင်း ဒေါက်တာစိုးသန်းနဲ့ လျှပ်စစ်ဝန်ကြီးဟောင်း ဦးဇာနည်အောင်ကိုလည်း သဘာဝဘေးအန္တရာယ်ဆိုင်ရာ အမှု ၂ မှုအတွက် ချုပ်ရက်ခံစားခွင့်နဲ့ ထောင် နှစ်နှစ်စီ၊ NLD တိုင်းအတွင်းရေးမှူး ဦးတင်ကိုကိုကို သဘာဝဘေးအန္တရာယ်ဆိုင်ရာ အမှု ၂ မှုအတွက် ချုပ်ရက်ခံစားခွင့်နဲ့ နှစ်နှစ် တို့နဲ့ အမိန့်ချမှတ်ခဲ့တာဖြစ်ပါတယ်။

    " ဦးဇာနည်အောင်ကပြောပါတယ်။ မြန်မာနိုင်ငံရဲ့ တရားစီရင်ရေးဟာ ဒီနေ့အမိန့်ချမှတ်လိုက်တဲ့ အမိန့်ဟာ တရားစီရင်ရေးက ဘယ်လိုတွေဖြစ်နေလဲဆိုတာ မီးမောင်းထိုးပြလိုက်သလိုပါပဲတဲ့။ တရားသူကြီး ကိုယ်တိုင်လည်း သမိုင်းမှတ်တမ်းမှာ ပါဝင်သွားပြီဆိုတာ သိဖို့လိုပါတယ်"လို့ အမိန့်ချမှတ်ခြင်းအပေါ် ဦးဇာနည်အောင်ရဲ့ ပြောစကားကို တာဝန်ယူ အမှုလိုက်ပေးရတဲ့ ရှေ့နေက ပြောပါတယ်။

    ဒေါက်တာရဲလွင်ဟာ စစ်တပ်က အာဏာသိမ်းတဲ့ ဖေဖော်ဝါရီလ (၁)ရက် နံနက်ပိုင်းမှာဖမ်းဆီးခံခဲ့ရပြီး နေ့ချင်းပြန်လည်လွတ်မြောက်လာကာ ဖေဖော်ဝါရီလ (၅)ရက်နေ့မှာ တာဝန်ကနေ နုတ်ထွက်ခဲ့ပါတယ်။ အဲဒီနောက် သူ့ရဲ့ လူမှုကွန်ရက်စာမျက်နှာမှာ" ပြည်သူနှင့်အတူပါ " စာသားနဲ့အတူ CDM ကို ထောက်ခံကြောင်း လက်သုံးချောင်းထောင်ကာ ပရိုဖိုင်းပုံကို ဖေဖော်ဝါရီလ (၈)ရက်နေ့တွင် ပြောင်းလဲခဲ့ပါတယ်။ အဲဒီနေ့ ညပိုင်းမှာပဲ စစ်တပ်က ဒေါက်တာရဲလွင်ကို နေအိမ်မှာ ပြန်လည် ဖမ်းဆီးခဲ့ပြီး အဲဒီနောက် ပုဒ်မ ၅၀၅ (ခ)နဲ့ အမှုဖွင့်တရားစွဲဆိုခဲ့တာဖြစ်ပါတယ်။

    မန္တလေးတိုင်း ဝန်ကြီးချုပ် ဒေါက်တာဇော်မြင့်မောင်ကိုလည်း စွဲဆွဲထားတဲ့ အမှုထဲက ၃ မှုကို ဒီနေ့ ဒီဇင်ဘာ ၈ ရက်မှာ အိုးဘိုထောင်တွင်း အထူးတရားရုံးက အမိန့်ချမှတ်ခဲ့ပါတယ်။

    ပုဒ်မ ၅၀၅(ခ)အမှုကို နှစ်နှစ်၊ သဘာဝဘေးအန္တရာယ်ဆိုင်ရာ အမှု ၂ ခုအတွက် နှစ်နှစ် စုစုပေါင်း လေးနှစ်ဖြစ်ပါတယ်။

    "တရားသူကြီးမင်းတို့ အမိန့်ချတာက ဒီနေ့က သမိုင်းဝင်တဲ့နေ့ဖြစ်သွားပြီလို့ပဲ ကျွန်တော်ပြောချင်တယ် လို့ ဆရာဇော်က ပြောသွားတယ်။ ဘာလို့ဆို သဘာဝဘေး ပုဒ်မကို ဖတ်ကြည့်ပေါ်ပါတယ်။ ဆရာတို့က ကာထိန်းကုအဖွဲ့ဝင်တွေဖြစ်တဲ့ အတွက်ကြောင့်မို့လို့ တရားစွဲဆိုခွင့် မရှိစေရလို့ ပါထားတယ်"လို့ ရှေ့နေအဖွဲ့တွေက ဒေါက်တာဇော်မြင့်မောင်ရဲ့မှတ်ချက်ကို ပြန်လည် ပြောပါတယ်။ ဒီနေ့ တရားရုံးက ချမှတ်လိုက်တဲ့ အမိန့်မှာ သဘာဝဘေးအန္တရာယ်ဆိုင်ရာ အမှုအတွက် ချုပ်ရက် ထုတ်နုတ်ခံစားခွင့် ရှိပေမယ့် အများပြည်သူ တည်ငြိမ်အေးချမ်းမှု ပျက်ပြားအောင် လှုံ့ဆော်မှု ပုဒ်မ ၅၀၅(ခ)ကို ချုပ်ရက်ခံစားခွင့်မရှိစေဘဲ ကျခံရမှာဖြစ်ပါတယ်။

    မန္တလေးတိုင်း ဝန်ကြီးချုပ် ဒေါက်တာဇော်မြင့်မောင်က အဂတိအမှု ၅ မှု၊ ရွေးကောက်ပွဲနဲ့ စွဲထားတာ ၂မှုကို ဆက်လက် တရားရင်ဆိုင်ရမှာဖြစ်ပါတယ်။ နောက်ဆက်တွဲအမှုအတွက် လိုပြသက်သေတွေသာ စစ်ဆေးနေတဲ့အခြေနေထိရှိနေပြီး လက်ရှိအချိန်ထိ မိသားစုနဲ့ တရားဝင်တွေ့ဆုံခွင့် မရသေးဘူးလို့ ရှေ့နေအသိုင်းအဝိုင်းက ပြောပါတယ်။

15. ၈ ဒီဇင်ဘာ ၂၀၂၁ကိုဗစ်ကာကွယ်ဆေးတွေ အိုမီခရွန်ကို ကာကွယ်နိုင်ခြေရှိတယ်လို့ WHO ပြော

16. ၈ ဒီဇင်ဘာ ၂၀၂၁မြန်မာစစ်တပ်နဲ့ ဆက်စပ်သမျှ စီးပွားရေးဆိုရင် ဖေ့စ်ဘုတ်ပေါ်က ဖယ်ရှား

    ဖေ့စ်ဘုတ်နဲ့ အင်စတာဂရမ်တို့ရဲ့ မိခင်ကုမ္ပဏီ မက်တာ ‘Meta’ က သူတို့ပိုင် ဆိုရှယ်မီဒီယာ ပလက်ဖောင်းတွေ ပေါ်ကနေ မြန်မာ အာဏာသိမ်းစစ်တပ်ရဲ့ ထိန်းချုပ်မှု အောက်မှာ ရှိနေတဲ့ စီးပွားရေး လုပ်ငန်းတွေကို ကိုယ်စားပြုနေတဲ့ ပေ့ဂျ်စာမျက်နှာတွေ၊ ဂရုပ် အုပ်စုတွေ၊ အကောင့်တွေကို ဖယ်ရှားပါတယ်။

    အဓိပ္ပာယ်ကတော့ အာဏာသိမ်း စစ်တပ်ရဲ့ စီးပွားရေး အဖြစ် သိထားသမျှ လုပ်ငန်းတွေကို ဖေ့စ်ဘုတ် အပါအဝင် Meta ကုမ္ပဏီက ပိုင်တဲ့ ဆိုရှယ်မီဒီယာ ပလက်ဖောင်းတွေပေါ်မှာ ရှိခွင့် မပေးတော့တာ ဖြစ်ပါတယ်။

    ရိုဟင်ဂျာ ဒုက္ခသည်တွေကို ကိုယ်စားပြုပြီး အမေရိကန်နဲ့ ယူကေရောက် အဖွဲ့တွေက ဖေ့စ်ဘုတ်ကို အမုန်းတရား ဖြန့်ချီခွင့် ပေးခဲ့မှုကြောင့် ဒေါ်လာ ဘီလီယံ ၁၅၀ ရလိုကြောင်း တရားစွဲ လျှောက်ထားမှု ပေါ်ပေါက်လာအပြီး ရက်ပိုင်းမှာပဲ ဖေ့စ်ဘုတ် Meta ဘက်က အခုလို ဆောင်ရွက်လာတာ ဖြစ်ပါတယ်။

    Meta ရဲ့ အာရှပစိဖိတ် မူဝါဒပိုင်း ဆိုင်ရာအကြီးအကဲ ရာဖာအယ် ဖရင်ကယ်ကတော့ ခုလို အရေးယူ ဆောင်ရွက်တာဟာ ရိုဟင်ဂျာအရေး လျော်ကြေးငွေတောင်းတဲ့ အမှုကိစ္စနဲ့ မသက်ဆိုင်ဘူးလို့ ဆိုပါတယ်။

    အာဏာသိမ်း မြန်မာစစ်တပ် အပေါ် “ဖေ့စ်ဘုတ် မက်တာ” ဘက်က ပစ်မှတ်ထား ပိတ်ဆို့ အရေးယူမှုတွေကို တိုးချဲ့ ဆောင်ရွက်တဲ့ အနေတဲ့ စစ်တပ်ပိုင် စီးပွားရေးတွေ၊ စစ်တပ်နဲ့ ပတ်သက် ဆက်စပ်နေတဲ့ လုပ်ငန်းတွေ အပေါ်မှာပါ အခုလို ပြုလုပ်ရတာ ဖြစ်တယ်လို့ မစ္စတာ ဖရင်ကယ်က ဆိုပါတယ်။

    အဲဒီလို ဆောင်ရွက်နိုင်ဖို့ရာ ဘယ်စီးပွားရေး လုပ်ငန်းတွေက မြန်မာစစ်တပ်နဲ့ ပတ်သက် ဆက်စပ်နေတယ် ဆိုတာကို ဖော်ပြနေတဲ့ သက်သေအထောက်အထားတွေ၊ စာရွက်စာတမ်းတွေကို နိုင်ငံတကာ အသိုင်းအဝိုင်းနဲ့ အစိုးရမဟုတ်တဲ့ အဖွဲ့အစည်းတွေ ထံကနေ ရရှိထားတယ်လို့လည်း မစ္စတာ ဖရင်ကယ်က ထုတ်ဖော် ပြောပါတယ်။

    လူ့အခွင့်အရေး ချိုးဖောက်မှုတွေ ဆိုးဆိုးရွားရွား ကျူးလွန်နေတဲ့ မြန်မာစစ်တပ်ထံကို ဘဏ္ဍာငွေကြေးတွေ မစီးဝင်နိုင်ဖို့ ဆိုတဲ့ ရည်ရွယ်ချက်နဲ့ တပ်ပိုင် စီးပွားရေးတွေနဲ့ တပ်နဲ့ ပတ်သက် ဆက်စပ်မှု ရှိနေတဲ့ ဒေသတွင်းနဲ့ နိုင်ငံတကာ ကုမ္ပဏီတွေ အကြောင်း ဖော်ထုတ် နေတဲ့ Justice for Myanmar အဖွဲ့က Meta ဘက်က အခုလို ဆောင်ရွက်လာတဲ့ အပေါ် ကြိုဆိုကြောင်း ထုတ်ပြန်ပါတယ်။

    ဖေဖေါ်ဝါရီ ၁ ရက်၊ မြန်မာ စစ်တပ်က တကျော့ပြန် အာဏာသိမ်းလိုက်တဲ့နောက် ဖေ့စ်ဘုတ်ဟာ သူတို့ရဲ့ ပလက်ဖောင်း ပေါ်မှာ စစ်တပ်ပိုင် စီးပွားရေးတွေ ကြော်ငြာတာကို ပိတ်ပင်နေတာကနေ အခုလို အကောင့်တွေ၊ စာမျက်နှာတွေ၊ ဂရုပ်အုပ်စုတွေ တည်ရှိခွင့် မပေးတော့တဲ့ အထိ တိုးချဲ့ အရေးယူ လာတဲ့ အပေါ် ကြိုဆိုတယ်လို့ Justice for Myanmar အဖွဲ့က ဆိုပါတယ်။

    မြန်မာစစ်တပ်က ရှယ်ယာ အများစု ဖြစ်စေ၊ အနည်းစု ဖြစ်စ ပါဝင်နေသမျှ စီးပွားရေး လုပ်ငန်းနဲ့ သက်ဆိုင်တာတွေကို ဖယ်ရှား သွားမှာ ဖြစ်တယ်လို့ Meta ကုမ္ပဏီက ကြေညာထားပါတယ်။

17. ၈ ဒီဇင်ဘာ ၂၀၂၁မန္တလေးတိုင်းဝန်ကြီးချုပ်ဒေါက်တာဇော်မြင့်မောင် ထောင် ၄ နှစ်ချမှတ်ခံရ

    အာဏာသိမ်းမှုဖြစ်ပြီးနောက် ဖမ်းဆီးခံရပြီး ထောင်တွင်းတရားရုံးမှာ အမှုတွေကို ရင်ဆိုင်နေရတဲ့ မန္တလေးတိုင်းဝန်ကြီးချုပ် ဒေါက်တာဇော်မြင့်မောင်ဟာ သူစွပ်စွဲခံရတဲ့အမှုတွေထဲက ၂ မှုအတွက် ဒီနေ့ ဒီဇင်ဘာလ ၈ ရက်မှာ ထောင်ဒဏ် ၄ နှစ်ချမှတ်ခံလိုက်ရတယ်လို့ သိရှိရပါတယ်။

    ဒေါက်တာဇော်မြင့်မောင်ကို ဘဘာဝဘေးစီမံဥပေဒပါ ပုဒ်မ ၂၅/၃၀(က)အမှုအတွက် အိုးဘိုထောင်ထဲက အထူးတရားရုံးကနေ ထောင် ၂ နှစ်ချမှတ်လိုက်တာဖြစ်ပြီး ချုပ်ရက်တွေကို ခံစားခွင့်ပြုတယ်လို့လည်း သိရှိရပါတယ်။

    တခါ ရာဇသတ်ကြီး ပုဒ်မ ၅၀၅(ခ)အမှုအတွက် ဒေါက်တာဇော်မြင့်မောင်ကို အမြင့်ဆုံး ပြစ်ဒဏ် ထောင် ၂ နှစ်ချမှတ်တယ်ဆိုတာကိုလည်း သိရှိရပါတယ်။

    ပုဒ်မ ၅၀၅ (ခ)အမှုအတွက် အမြင့်ဆုံးပြစ်ဒဏ်အဖြစ် ထောင်ဒဏ် ၂ နှစ်ချမှတ်ခံရပေမဲ့ ချုပ်ရက်တွေကို ခံစားခွင့်မပေးထားသလို သဘာဝဘေးအမှု ထောင်ဒဏ် ၂ နှစ်ပြည့်မှ ရေတွက်မယ်လို့လည်းသိရပါတယ်။

    သဘာဝဘေးစီမံပုဒ်မအမှုဟာ ကိုဗစ်ကပ်ဘေးကာလအတွင်း ပညာပေးစီမံချက်ကို ကျုံးဘေးမှာပြုလုပ်ခဲ့တာအတွက် လူစုလူဝေးဖြစ်စေတယ်ဆိုတဲ့အချက်နဲ့ စွပ်စွဲခံရတဲ့အမှုဖြစ်ပါတယ်။

    နောက် ပုဒ်မ ၅၀၅(ခ)အမှုကတော့ အာဏာသိမ်းပြီးနောက် NLD ဗဟိုအလုပ်အမှုဆောင်အဖွဲ့က ထုတ်ပြန်တဲ့ကြေညာချက် ၂ စောင်ကို အကြောင်းပြုပြီး ပါတီဒုဥက္ကဋ္ဌဖြစ်တဲ့ ဒေါက်တာ ဇော်မြင့်မောင်လည်း စွပ်စွဲခံရတာဖြစ်ပါတယ်။

    အဲဒီကြေညာချက် ၂ စောင်ကို အကြောင်းပြုပြီး နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်၊ သမ္မတဦးဝင်းမြင့်၊ နေပြည်တော်မြို့တော်ဝန်ဒေါက်တာမျိုးအောင်တို့ကိုလည်း နေပြည်တော် အထူးတရားရုံးကနေ ထောင်ဒဏ် ၂ နှစ်စီ ချမှတ်ထားပါတယ်။

    လက်ရှိမှာ ဒေါက်တာဇော်မြင့်မောင်ဟာ အမိန့်ချပြီးတဲ့အမှု ၂ ခုအပြင် အဂတိမှုနဲ့စွပ်စွဲခံထားရတဲ့အမှု ၅ မှု၊ ရွေးကောက်ပွဲဆိုင်ရာအမှု ၂ ခုတို့ကိုလည်း တရားရင်ဆိုင်နေရပါတယ်။

18. ၈ ဒီဇင်ဘာ ၂၀၂၁ဒီဇင်ဘာ ၆ ရက်တိုက်ပွဲတွေအတွင်း စစ်ကောင်စီတပ်ဖွဲ့ဝင် ၆ ဦးသေဆုံးတယ်လို့ ကေအဲန်ယူပြော

    ပြီးခဲ့တဲ့ ဒီဇင်ဘာလ ၆ ရက်နေ့မှာ ကေအဲန်ယူ-ကရင်အမျိုးသားအစည်းအရုံးရဲ့တပ်မဟာ ၅ နယ်မြေအတွင်း စစ်ကောင်စီတပ်တွေနဲ့ ဖြစ်တဲ့တိုက်ပွဲတွေကြောင့် စစ်ကောင်စီဘက်က ၆ ဦးသေဆုံးတယ်လို့ ကေအဲန်ယူဘက်က သတင်းထုတ်ပြန်လာပါတယ်။

    တိုက်ပွဲတွေဟာ စစ်ကောင်စီတပ်ဖွဲ့တွေနဲ့ ကရင်အမျိုးသားလွတ်မြောက်ရေးတပ်(KNLA)တို့ကြားဖြစ်ခဲ့တာဖြစ်ပြီး ပြည်သူ့ကာကွယ်ရေး PDF တွေလည်း ပူးပေါင်းပါဝင်ခဲ့တယ်လို့ဆိုပါတယ်။

    ဒီဇင်ဘာလ ၆ ရက်မှာ မထောကျေးရွာကို ထွက်လာတဲ့ စစ်ကောင်စီရဲ့ ခမရ-၄၀၇ စစ်ကြောင်းကို KNLA က မိုင်းဆွဲတိုက်ခိုက်တာ၊ နောက် KNLA နဲ့ PDF တို့ ပူးပေါင်းတိုက်တာကြောင့် စစ်ကောင်စီဘက်က ၅ ဦးသေဆုံး၊ ၆ ဦးဒဏ်ရာရသွားပြီး KNLA ဘက်က ၃ ဦးဒဏ်ရာရခဲ့တယ်လို့လည်း ဆိုပါတယ်။

    ဒါ့အပြင် အဲဒီနေ့တစ်နေ့တည်းမှာပဲ ဖလပ်ခိုဒေသမှာ လုံခြုံရေးယူနေတဲ့ KNLA နဲ့ စစ်ကောင်စီတပ်ဖွဲ့ဝင်တွေကြား ၂ ကြိမ်တိုက်ပွဲဖြစ်ခဲ့ပြီး အဲဒီတိုက်ပွဲမှာ စစ်ကောင်စီဘက်က ထိခိုက်ကျဆုံးမှု အတိအကျကို မသိရပေမဲ့ နယ်မြေရှင်းလင်းချိန်မှာ စစ်ကောင်စီတပ်ရဲ့ အလောင်းတစ်လောင်ကို ကျန်နေခဲ့တာကိုတွေ့ခဲ့ရတယ်လို့လည်း ထုတ်ပြန်ချက်က ဆိုပါတယ်။

    ကေအဲန်ယူ ထိန်းချုပ်နယ်မြေထဲ ဒီဇင်ဘာလ ၆ ရက်တိုက်ပွဲတွေနဲ့ပတ်သက်ပြီး စစ်ကောင်စီဘက်က တစုံတရာ သတင်းမထုတ်ပြန်သေးပါဘူး။

19. ၈ ဒီဇင်ဘာ ၂၀၂၁မန္တလေးမှာ ဆိုင်ကယ်စီးလာတဲ့လူငယ်တချို့ကို စစ်ကောင်စီက ကားနဲ့ဝင်တိုက်ပြီး ပစ်ခတ်ဖမ်းဆီး, တစ်ဦး ဖမ်းဆီးခံရ၊

    မန္တလေးမြို့မှာ ဒီနေ့ ဒီဇင်ဘာလ ၈ ရက် မနက် ၅ နာရီကျော်က လူငယ် ၃ ဦး ဆိုင်ကယ်စီးလာတာကို စစ်ကောင်စီဘက်က ကားနဲ့ဝင်တိုက် ပစ်ခတ်လို့ တစ်ဦးဖမ်းဆီးခံရတယ်လို့ ဒီဖြစ်စဉ်ကို နီးနီးစပ်စပ်သိတဲ့ဒေသခံလူငယ်က ပြောပါတယ်။

    "ဆိုင်ကယ်ကို သုံးယောက်စီးလာတာ။ အဲဒါကို နောက်ကလိုက်ပြီး ကားနဲ့တိုက်၊ သေနတ်နဲ့ပစ်ဖမ်းတာ။ ရှေ့နှစ်ယောက်က ထွက်ပြေးတယ်။ တယောက်က မပြေးနိုင်ဘူး။ ဒဏ်ရာလည်းရ၊ ဆိုင်ကယ်လည်းပိသွားလို့ကျန်ခဲ့တာ"လို့ ပစ်ခတ် ဖမ်းဆီးခံခဲ့ရသူလူငယ်တွေရဲ့သူငယ်ချင်းကပြန်ပြောပြပါတယ်။

    လူငယ်တွေပစ်ခတ်ဖမ်းဆီးခံရတဲ့နေရာဟာ ၆၃x ၃၅လမ်းကြားမှာဖြစ်တာကြောင့် အဲ့ဒီဝန်းကျင်မှာ ဒီမနက်ပြုလုပ်မယ့် အရုဏ်သပိတ်ကိုလည်း ရုပ်သိမ်းလိုက်တယ်လို့ သပိတ်မှာပါဝင်သူတစ်ဦးကဆိုပါတယ်။

    သပိတ်ပြုလုပ်တာနဲ့ပတ်သက်ပြီး မနေ့ည ဒီဇင်ဘာလ ၇ ၆နာရီက ပြုလုပ်ခဲ့တဲ့ စိန်ပန်းညသပိတ်ကို အကြောင်းပြုကာ စစ်ကောင်စီက ဒေသခံ အမျိုးသမီး ၄ ဦးအပါဝင် ၁၃ ဦးကို ဖမ်းဆီးခေါ်ဆောင်သွားတယ်လို့ သိရပါတယ်။

    ဒီဇင်ဘာ ၇ရက်ည ၁၀နာရီခွဲလောက်မှာ အချုပ်ကား နှစ်စီး၊ အိမ်စီးကား ၆စီးနဲ့ ညသပိတ်ဓာတ်ပုံထဲက လူတွေအပါအဝင် ဒေသခံတချို့ကိုပါ ဖမ်းဆီးခေါ်ဆောင်သွားတာဖြစ်ပါတယ်။

    "လမ်းသွားလမ်းလာ ဓာတ်ပုံထဲပါသွားသူက နှစ်ယောက်ရှိတယ်။ ကျန်တဲ့သူတွေကို အိမ်တွေ ဧည့်စာရင်းစစ်မယ် ဆိုပြီး တက်ခေါ်သွားတာပဲ။ ဘာမှမလုပ် ဘာမှမဖြစ်ဘူးဆိုပြီး အကုန်ခေါ်သွားတာ"လို့ စိန်ပန်းဒေသခံတစ်ဦးက ပြောပါတယ်။

    စိန်ပန်းညသပိတ်ကို မဟာအောင်မြေမြို့နယ် သံနောက်ဖက် ၉၁ x၄၂ လမ်းဝန်းကျင်မှာ ပြုလုပ်တာဖြစ်ပြီး ည ၈နာရီမှသာ သပိတ်ဓာတ်ပုံတွေ တင်ခဲ့တာဖြစ်ပါတယ်။

    သပိတ်ပြုလုပ်ခဲ့တဲ့ နေရာအနီးဝန်းကျင်ကို နာရီပိုင်းအတွင်း ရဲနဲ့အရပ်ဝတ်တွေ ရောက်လာပြီးမှ စစ်ကားတွေ ရောက်လာပါတယ်။

    နေအိမ်တွေဝင်ရောက် စစ်ဆေးကာ လူတချို့ကို ဆဲဆို ရိုက်နှက် လက်ထိတ်ခတ်ဖမ်းဆီးပြီး အမှတ် ၇ နယ်မြေရဲစခန်းကို ခေါ်ဆောင်သွားပါတယ်။

    ဖမ်းဆီးခံရသူတွေကို ဒီဇင်ဘာ ၈ရက် နေ့ခင်း အချိန်ထိ ပြန်လည်လွှတ်ပေးတာ မရှိသေးဘူးလို့ ဒေသခံတွေထံက သိရပါတယ်။

20. ၈ ဒီဇင်ဘာ ၂၀၂၁အာဆီယံအထူးသံနဲ့ပူးပေါင်းဆောင်ရွက်မှုလုပ်ဖို့ စစ်ကောင်စီကို စင်ကာပူ တောင်းဆိုလာပြန်

    စစ်ကောင်စီအနေနဲ့ အာဆီယံအထူးသံတမန်ရဲ့မြန်မာပြည်တွင်းခရီးစဉ်ပေါ်ပေါက်ရေးအပြင် ပြည်တွင်းက ပါဝင်သင့်ပါဝင်ထိုက်သူတွေအားလုံးနဲ့တွေ့ဆုံနိုင်ရေး ပူးပေါင်းဆောင်ရွက်ဖို့ စင်ကာပူနိုင်ငံက တောင်းဆိုလာပါတယ်။

    ဒါ့အပြင် မြန်မာပြည်တွင်းမှာ လတ်တလောဖြစ်ပေါ်နေတဲ့အခြေအနေတွေကိုလည်း အထူးစိုးရိမ်လျက်ရှိနေတယ်ဆိုတဲ့အကြောင်း စင်ကာပူနိုင်ငံခြားရေးဝန်ကြီးဌာနက ဒီဇင်ဘာလ ၇ ရက်မှာ ပြောပါတယ်။

    မြန်မာ့အရေးဖြေရှင်းမှုတစ်စိတ်တစ်ပိုင်းအနေနဲ့ အာဆီယံခေါင်းဆောင်တွေကြားရရှိထားတဲ့ ဘုံသဘောတူညီချက် ၅ ရပ်မှာ သိသာတဲ့တိုးတက်မှုမရှိတာကိုလည်း စိတ်ပျက်မိတဲ့အကြောင်း စင်ကာပူဘက်က ပြောပါတယ်။

    အဲဒီဘုံသဘောတူညီချက်တွေထဲမှာ အာဆီယံအထူးသံခန့်အပ်တာ၊ မြန်မာကို လူသားချင်းစာနာမှုအကူအညီပေးတာ စတဲ့အချက်တွေပါဝင်ပြီး အာဆီယံဘက်က မြန်မာကို အကူအညီပေးတာတွေ စတင်ပြီဖြစ်ပေမဲ့ အာဆီယံအထူးသံရဲ့မြန်မာပြည်တွင်းခရီးစဉ်မပေါ်ပေါက်နိုင်သေးတာ လနဲ့ချီကြာမြင့်နေပြီဖြစ်ပါတယ်။

    အကြမ်းဖက်မှုလျော့ချဖို့၊ သက်ဆိုင်ရာပါဝင်သင့်ပါဝင်ထိုက်သူတွေကြား အပြုသဘောဆောင်တဲ့ဆေးနွေးမှုစဖို့အပြင် ဘုံသဘောတူညီချက်တွေကို မြန်မြန်ဆန်ဆန်ပြည့်ပြည့်၀၀ အကောင်အထည်ဖော်နိုင်ဖို့ အာဆီယံအထူးသံရဲ့ခရီးစဉ်အတွက် ပူးပေါင်းပါဝင်ဖို့ စစ်ကောင်စီကို စင်ကာပူဘက်က တောင်းဆိုထားပါတယ်။