ဖရူဆိုမှာ သတ်ဖြတ်ခံလိုက်ရသူတွေထဲ အသက်မပြည့်သေးသူ ၄ ဦးပါဝင်တယ်လို့ ယူနီဆက်ဖ်ပြော

အစုလိုက်အပြုံလိုက်သတ်ဖြတ်ခံခဲ့ရသူတွေထဲမှာ အသက် ၁၇ နှစ်အရွယ် လူငယ် ၂ ဦး၊ ဆယ်ကျော်သက် အမျိုးသမီးငယ် ၁ ဦးနဲ့ အသက် ၅ နှစ်၊ ၆ နှစ်အရွယ် ကလေးငယ်တစ်ဦးတို့ပါဝင်တယ်လို့ဆိုပြီး ယူနီဆက်ဖ် ကပြောလာတာပါ။

တိုက်ရိုက် ထုတ်လွှင့်ချက်

၁၃ ဒီဇင်ဘာ ၂၀၂၁အရာတော်မြို့နယ် ကဲဘာရွာ အိမ် ၁၀၀ ကျော်မီးရှို့ခံရ
စစ်ကိုင်းတိုင်း အရာတော်မြို့ အရှေ့တောင်နယ်ထဲက၊ ကဲဘာ‌ကျေးရွာမှာ ဒီဇင်ဘာ(၁၃)ရက်၊ မနက်ပိုင်းက အိမ်ခြေ (၁၀၀)နီးပါး မီးလောင်ပျက်စီးခဲ့တယ်လို့ ဒေသခံတွေက တစ်ဆင့် သိရပါတယ်။
စစ်ကောင်စီတပ်နဲ့ပျူစောထီး ပူးပေါင်းအင်အား(၁၀၀)ကျော်က ဝင်ရောက် မီးရှို့ဖျက်ဆီးခဲ့တာကြောင့် တစ်ရွာလုံးနီးပါး ပျက်စီးဆုံးရှုံးခဲ့ရတာ ဖြစ်တယ်လို့ အရာတော်သတင်းမှန်ပြန်ကြားရေးအဖွဲ့က ပြောပါတယ်။
ဒီဖြစ်စဉ်ကို စစ်ရာဇဝတ်မှုအဖြစ် မှတ်တမ်းယူထားပြီး တိုက်ပွဲဝင်သွားမယ်လို့လည်း အရာတော်မြို့နယ်တော်လှန်ရေးအင်အားစု(ARA)က ထုတ်ပြန်ပါတယ်။
စစ်ကောင်စီတပ်ဖွဲ့တွေက ရွာထဲမှာ သေနတ်တွေ လက်နက်ကြီးတွေနဲ့ ပစ်ဖောက်ပြီး ပတ်မွှေနေသေးလို့ ရွာထဲပြန်ဝင်မီးငြှိမ်းမရဘဲ ရှောင်ပြေးကြရပြီး တောထဲကနေ ရွာဘက်ကို လှမ်းမျှော်ကြည့်နေခဲ့ရတယ်လို့ ရွာခံတွေကပြောပါတယ်။
စစ်ကောင်စီတပ်နဲ့ ပျူစောထီးတပ်ဖွဲ့ တို့ဟာ အခုအခါ ပြန်လည်ဆုတ်ခွာသွားပြီး သလဲဘာရွာအနီး ဆုတောင်းပြည့်မြစည်းခုံဘုရားမှာ တပ်စွဲစခန်းချထားတယ်လို့ သိရပါတယ်။
စစ်ကောင်စီတပ်ဖွဲ့တွေ ပြန်လည်ဆုတ်ခွာသွားမှပဲ ဒေသခံပြည်သူ့ကာကွယ်ရေးတပ်ဖွဲ့တွေနဲ့ ရွာခံလူငယ်တချို့က ဝင်ရောက်ပြီး ဝိုင်းဝန်းမီးငြှိမ်းသတ်ပေးခဲ့လို့ ယနေ့ ညနေ(၃)နာရီခန့်မှာ မီးငြိမ်းသွားပြီလို့ သိရပါတယ်။
ကဲဘာ ကျေးရွာဟာအိမ်ခြေရာဂဏန်း ဝန်းကျင်ရှိတဲ့ကျေးရွာဖြစ်ပြီး မီးလောင်မှုကြောင့်တစ်ရွာလုံးနီးပါး မီးလောင်သွားခဲ့တယ်လို့ သိရပါတယ်။
စစ်ကောင်စီဘက်က တော့ အရာတော်မြို့နယ်ကဲဘာ ကျေးရွာ မီးလောင်မှုနဲ့ပတ်သက်ပြီး သတင်းထုတ်ပြန်တာမရှိသေးပါဘူး။
၁၃ ဒီဇင်ဘာ ၂၀၂၁ဒေသလုပ် ရေမြုပ်မိုင်းတွေသုံးလာတဲ့ ချင်းတွင်းမြစ်ထဲက တိုက်ပွဲ
၁၃ ဒီဇင်ဘာ ၂၀၂၁ထားဝယ် သပိတ်စစ်ကြောင်းဦးဆောင်သူကို ထောင် ၁၁ နှစ် အမိန့်ချ
ထားဝယ်မြို့မှာ စစ်တပ်အာဏာသိမ်းမှုဆန့်ကျင်ရေး သပိတ်စစ်ကြောင်း ဦးဆောင်သူတစ်ဦးဖြစ်တဲ့ ကိုချစ်နိုင်ကို ထားဝယ်အကျဥ်းထောင်ရှိ ထောင်တွင်းတရားရုံးက ဒီဇင်ဘာလအတွင်း အပြီးသတ်အမိန့်နဲ့ ထောင်ဒဏ်၁၁နှစ်အမိန့်ချမှတ်ခဲ့တယ်လို့ သိရကြောင်းထားဝယ်နိုင်ငံရေး အကျဥ်းသားများကွန်ရက်က ဒီကနေ့ ဒီဇင်ဘာလ ၁၃ ရက်နေ့ နေ့စွဲ့နဲ့ သတင်းထုတ်ပြန်ပါတယ်။
ကိုချစ်နိုင် ကို အကြမ်းဖက်မှု၅၂(က)အတွက် ၇နှစ်၊ ၅၀၅(က)အတွက် ၃နှစ် ၊လက်နက်မှု၁၉(စ)အတွက် ၁နှစ် စုစုပေါင်းထောင်ဒဏ်၁၁နှစ် အမိန့်ချမှတ်ခဲ့တာဖြစ်တယ်လို့ ထုတ်ပြန်ချက်ကဆိုပါတယ်။
အသက် ၁၉နှစ်အရွယ် ကိုချစ်နိုင်ဟာ ထားဝယ်တက္ကသိုလ် ပထဝီဝင်ဘာသာ အဝေးသင်ပထမနှစ် တက်ရောက်နေတဲ့ ကျောင်းသားတစ်ဦးဖြစ်ပြီး ပြီးခဲ့တဲ့ ဇူလိုင်လ ၂၀ ရက်နေ့က ထားဝယ်မြို့၊ ဝဲကျွန်းမြို့သစ်ရပ်ကွက်၊ ၇လမ်းမှာ သူ့ကို စစ်ကောင်စီတပ်ဖွဲ့ဝင်တွေက ဖမ်းဆီးခဲ့တာဖြစ်ပါတယ်။
ထားဝယ် အကျဥ်းထောင်မှာ ပြီးခဲတဲ့ အောက်တိုဘာလ ၂၀ ရက်ကနေ နိုဝင်ဘာလ ၂၀ ရက်နေ့အထိ နိုင်ငံရေး အကျဥ်းသား ၁၂ ဦးကို အမိန့်ချမှတ်ခဲ့ပြီး အဲ့ဒီထဲက အချို့ဟာ အကြမ်းဖက်မှု ပုဒ်မ ၄ ခုလောက်အထိ တပ်ပြီး တရားစွဲခံခဲ့ရတာ ဖြစ်ပါတယ်။
အမိန့်ချခံထားရတဲ့သူတွေအချို့ထဲက အမိန့်မချရသေးတဲ့နောက်ဆက်တွဲအမှုတွေကိုလည်း ရှေ့နေမပါဘဲ ဆက်လက်တရားရင်ဆိုင်ရမယ်လို့လည်း သိရပါတယ်။
၁၃ ဒီဇင်ဘာ ၂၀၂၁တာချီလိတ် ဝမ်ပုံရဲစခန်းက ရဲတပ်ကြပ်တစ်ဦး (KDF) နဲ့ ပူးပေါင်း
ရှမ်းပြည်နယ် တာချီလိတ်မြို့ ဝမ်ပုံ ရဲစခန်းက ရဲတပ်ကြပ်ကြီးတစ်ဦးဟာ ဒီကနေ့ ဒီဇင်ဘာလ ၁၃ ရက်နေ့က စစ်အာဏာရှင်ပြုတ်ကျရေးနဲ့ ဖက်ဒရယ်ဒီမိုကရေစီစနစ်ဖော်ဆောင်ရေးအတွက် ကရင်နီဒီမိုကရက်တစ်တပ်ဦး (KDF) နဲ့ လာရောက်ပူပေါင်းခဲ့တယ်လို့ (KDF)က ထုတ်ပြန်ခဲ့ပါတယ်။
ကိုယ်ပိုင်အမှတ် လ - ၁၅၉၂၉၈ ရဲတပ်ကြပ် ဦးနေလင်းအောင်ဟာ တာချီလိတ် ဝမ်ပုံရဲစခန်းမှတစ်ဆင့် (ရှမ်းပြည်နယ်ရဲတပ်ဖွဲ့သို့(တွဲဖက်)၂လ)တာဝန်ကျနေစဥ်မှာ အခုလို လာရောက်ပူးပေါင်းခဲ့တာလို့ ဆိုပါတယ်။
အခုလို ရဲတပ်ကြပ်ကြီးတစ်ဦး (KDF)နဲ့ ပူးပေါင်းတာနဲ့ ပတ်သက်လို့ စစ်ကောင်စီဘက်က သတင်းထုတ်ပြန်တာမရှိသေးပါဘူး။
ပြည်တွင်းမှာ အာဏာသိမ်းမှုဖြစ်စဉ် ဖြစ်ပြီးတဲ့နောက်ပိုင်း အာဏာဖီဆန်ရေးလှုပ်ရှားမှု CDM မှာ နယ်ပယ်အသီးသီးကအစိုးရဝန်ထမ်းတွေနဲ့အတူ စစ်ကောင်စီတပ်သားတွေ၊ ရဲတပ်ဖွဲ့ဝင်တွေလည်းပါဝင်လာခဲ့ပါတယ်။
CDM လှုပ်ရှားမှုမှာ ပါဝင်တဲ့ စစ်သားနဲ့ရဲတပ်ဖွဲ့ဝင် အများစုဟာ တိုင်းရင်းသားလက်နက်ကိုင်ဒေသတွေ အပါအဝင် လွတ်မြောက်နယ်မြေတွေမှာ သွားရောက်ခိုလှုံတာတွေရှိသလို ဒေသကာကွယ်ရေးတပ်တွေ နဲ့ပူးပေါင်းခဲ့တာတွေလည်း ရှိခဲ့ပါတယ်။
မြန်မာနိုင်ငံ စစ်တပ်အာဏာသိမ်းပြီးနောက်ပိုင်း ပြီးခဲ့တဲ့ မတ်လကလည်း အမိန့်နာခံဖို့ ငြင်းဆန်ပြီး အိန္ဒိယနိုင်ငံထဲကို ဝင်ရောက်ခိုလှုံသွားတဲ့ ရဲအဖွဲ့ဝင်တွေရှိပြီး ပြန်ပို့ပေးဖို့ မြန်မာအစိုးရ အိန္ဒိယကို ပန်ကြားခဲ့ပါသေးတယ်။
၁၃ ဒီဇင်ဘာ ၂၀၂၁ထောင်ဒဏ် ၂ နှစ်ခွဲကျခံနေရတဲ့ ရခိုင်တက္ကသိုလ်ကျောင်းသားတွေကို တရားလွှတ်တော်က ပြင်ဆင်မှု အမိန့်ချဖို့ရှိ
နိုင်ငံတော် မတည်မငြိမ်ဖြစ်အောင် လှုံဆော်မှု ပုဒ်မ ၅၀၅၊ ဘေးအန္တရာယ်ဆိုင်စီမံခန့်ခွဲမှုဥပဒေတွေနဲ့ ပြစ်ဒဏ် ၂ နှစ်ခွဲချမှတ်ခံထားရတဲ့ ရခိုင်တက္ကသိုလ်ကျောင်းသား လေးဦးတို့ရဲ့ အမှုကို ရခိုင်ပြည်နယ်တရားလွှတ်တော်ကနေ ဒီရက်ပိုင်းအတွင်း အပြီးသတ်အမိန့်ချဖို့ ရှိနေပါတယ်။
အမှုနဲ့ပတ်သက်လို့ ရခိုင်ပြည်နယ်တရားလွှတ်တော်မှာ ဒီဇင်ဘာ ၇ ရက်နေ့က အပြီးသတ်လျှောက်လဲချက် ကြားနာခဲ့ပြီး ၁၆ ရက်နေ့မှာ အပြီးသတ်အမိန့်ချဖို့ ရှိနေတယ်လို့ အမှုလိုက်ပါဆောင်ရွက်ပေးနေတဲ့ တရားလွှတ်တော်ရှေ့နေ ဦးကျော်ညွန့်မောင်က ပြောပါတယ်။
စစ်ဆန့်ကျင်ရေးဆန္ဒပြပွဲကို ဦးဆောင်သူတွေဖြစ်တဲ့ တက္ကသိုလ်ကျောင်းသားလေးဦးတို့ကို စစ်တွေမြို့နယ်တရားရုံးကနေ ဘေးစီမံဥပဒေပုဒ်မ ၂၉ အတွက် ၆ လ၊ ပုဒ်မ ၅၀၅ (ခ) အတွက် ၂ နှစ် စုစုပေါင်း ၂ နှစ်နဲ့ ၆ လ ချမှတ်ခဲ့တာ ဖြစ်ပါတယ်။
အဲ့ဒီကျောင်းသားလေးဦးတို့ ကျခံနေရတဲ့ ပြစ်ဒဏ်တွေများလွန်းနေသလို ဖြစ်စဉ်တစ်ခုတည်းအပေါ်မှာ ပြစ်ဒဏ်နှစ်ခု ချမှတ်ခံထားရတဲ့အတွက် ပြန်လည် စိစစ်ပေးဖို့ဆိုပြီး စစ်တွေခရိုင်တရားရုံးကို အယူခံတက်ခဲ့ရာမှာ အယူခံပယ်ချခံခဲ့ရတဲ့အတွက် တရားလွှတ်တော်ကို ရာဇဝတ်ပြင်ဆင်မှုအဖြစ်နဲ့ တက်ရောက်ထားတာ ဖြစ်တယ်လို့ သိရပါတယ်။
“ပြုလုပ်မှု၊ ပျက်ကွက်မှု တစ်ခုတည်းအပေါ်မှာ ပုဒ်မ နှစ်ခုနဲ့ စွဲထားတယ်။ ပြစ်ဒဏ်နှစ်ရပ် ချထားတာကတော့ ဥပဒေနဲ့မညီဘူးဆိုပြီးတော့ ပြင်ဆင်မှုတက်ထားတာ ဖြစ်ပါတယ်။ နောက်တစ်ခုက အပြစ်ရှိကြောင်း ဝန်ခံထားသလို ကျောင်းသားလေးတွေဖြစ်တဲ့အတွက် လူကြီးတွေက လျှော့ပေါ့ပြီးတော့ စဉ်းစားလိမ့်မယ်လို့ မျှော်လင့်ပါတယ်ခင်ဗျား။”လို့ ဦးကျော်ညွန့်မောင်က ပြောပါတယ်။
အဲ့ဒီကျောင်းသားလေးဦးတို့ဟာ ပြီးခဲ့တဲ့ ၂၀၂၀ ခုနှစ် အောက်တိုဘာလ ၁၉ ရက်နေ့က ရခိုင်ပြည်နယ်အတွင်း စစ်ပွဲတွေရပ်စဲဖို့၊ ဖြတ်တောက်ထားတဲ့ အင်တာနက်လိုင်းတွေကို ပြန်လည်ဖွင့်ပေးဖို့စတဲ့အချက်တွေကို တောင်းဆိုတဲ့ ဆန္ဒပြပွဲတစ်ခုကို စစ်တွေမြို့ပေါ်မှာ ပြုလုပ်ခဲ့ကြပြီး စစ်ဆန့်ကျင်ရေးဆန္ဒပြပွဲကို ဦးဆောင်ခဲ့တဲ့ တက္ကသိုလ်ကျောင်းသားတွေဖြစ်တဲ့ ကိုကျော်နိုင်ဌေး၊ ကိုဦးသန်းနိုင်၊ ကိုကောင်းထွန်းနဲ့ ကိုမြတ်စိုးဝင်းတို့လေးဦးဟာ ရဲတပ်ဖွဲ့က ဖမ်းဆီးခြင်းခံခဲ့ရတာဖြစ်ပါတယ်။
၁၃ ဒီဇင်ဘာ ၂၀၂၁စစ်ကိုင်းတိုင်းထဲမှာ အဖမ်းအဆီးများ ၊ သံဃာနဲ့ သတင်းထောက်အချို့ထပ်အဖမ်းခံရ
အခုရက်ပိုင်းအတွင်း တိုက်ပွဲတွေ နေရာအများအပြားမှာဖြစ်နေတဲ့ စစ်ကိုင်းတိုင်းအတွင်း ဖမ်းဆီးမှုတွေရှိနေပြီးမနေ့ကတော့ သံဃာနဲ့ သတင်းထောက်အချို့လည်း အဖမ်းခံခဲ့ရပါတယ်။
မနေ့က ဒီဇင်ဘာလ ၁၂ရက်နေ့ နေ့လယ်ပိုင်းကဆိုရင် မုံရွာမြို့နယ် အလုံရပ်ကွက် ချမ်းသာကြီး ဘုန်းကြီးကျောင်းထဲကို ဝင်ရောက်ဖမ်းဆီးခဲ့ပြီး သံဃာ ၄ ပါးနဲ့ လူ ၉ ဦး ဖမ်းဆီးခဲ့ရတယ်လို့ ဒေသခံတစ်ဦးကပြောပါတယ်၊
အဲဒီဘုန်းကြီးကျောင်းမှာနေထိုင်တဲ့ မုံရွာဒေသခံသတင်းထောက်တစ်ဦး ဖြစ်တဲ့ ကိုမင်းသိုက်ထွန်းလည်း အဖမ်းခံခဲ့ ရတယ်လို့ သတင်းတွေထွက်လာခဲ့ပေမဲ့ နောက်ပိုင်းမှာ သူကထွက်ပြေးလွတ်မြောက်သွားခဲ့တယ်လို့ သိရပါတယ်။
အလားတူ အဲဒီနေ့ ဒီဇင်ဘာ ၁၂ရက် မနက်လင်းအားကြီး ၁နာရီလောက်က စစ်ကိုင်းတိုင်း၊ ဝက်လက်မြို့နယ် ပင်းဇင်ရွာမှာနေသူ ဒီဗီဘီသတင်းထောက် ကိုအောင်စံလင်းကိုလည်း စစ်ကောင်စီတပ်ဖွဲ့တွေက ကားနှစ်စီးနဲ့ လာရောက်ဖမ်းဆီးခဲ့တယ်လို့ သူ့မိသားစုဝင်တွေက ဘီဘီစီကိုပြောပါတယ်။
ကိုမင်းသိုက်ထွန်း၊ ကိုအောင်စံလင်းတို့ကို မဖမ်းဆီးခင်ကတည်းက အာဏာသိမ်းပြီးနောက်ပိုင်း သတင်းသမား တစ်ရာကျော် ကိုဖမ်းဆီးထိန်းသိမ်းခဲ့ပြီး၊ အဲဒီနောက် ပြန်လည်လွတ်ပေးခဲ့တာတွေကြောင့် လက်ရှိအချိန်ထိ ဖမ်းဆီးခံထားရသူက သတင်းသမားအမျိုးသမီး ၁၀ဦးနဲ့ အမျိုးသား အယောက် ၃၀တို့ ကျန်ရှိနေပါသေးတယ်လို့ သိရပါတယ်။
၁၃ ဒီဇင်ဘာ ၂၀၂၁ပေါင်မြို့နယ်ရဲ့စခန်းက အချုပ်သား ၁၇ ဦးမှာ ကိုဗစ်ပိုးတွေ့
မွန်ပြည်နယ်၊ ပေါင်မြို့နယ်ရဲစခန်းမှာ အချုပ်ကျနေတဲ့အချုပ်သားတွေထဲက ၁၇ ဦးမှာ ကိုဗစ်ပိုးတွေ့ခဲ့တယ်လို့ မြို့ခံလူမှုကူညီရေးအသင်းတွေက ဘီဘီစီကိုပြောပါတယ်။
''အချုပ်သားတွေထဲက တစ်ယောက်က အဖျားတစ်ပတ်လောက်တက်နေတယ်။ အဲဒါနဲ့ သူ ဆေးရုံကြီးကိုရောက်လာတော့ ဆရာဝန်ကြီးက ကိုဗစ်သံသယလို့ ကောက်ချက်ချပြီး အမြန်ပိုးစစ်ကိရိယာနဲ့ စစ်ကြည့်တာ သူ့မှာ ပိုးတွေ့တယ်။ နောက်တော့ အချုပ်အတူ ကျတဲ့ ၃၂ ဦးကို စစ်တာ အဲဒီထဲမှာ ၁၆ ယောက် တွေ့တယ်။ စုစုပေါင်း ၁၇ ဦးပေါ့။'' လို့ ပေါင်မြို့ခံလူမှုကယ်ဆယ်ရေးအဖွဲ့ဝင်တစ်ဦးက ပြောပါတယ်။
လက်ရှိမှာ ပိုးတွေ့တဲ့အချုပ်သားတွေကို ပေါင်ဆေးရုံထဲမှာဖွင့်ထားတဲ့ ကိုဗစ်လူနာ သီးခြားစောင့်ကြည့်ဆောင်မှာ ကုသမှုပေးနေတယ်လို့ သိရပါတယ်။
ပထမဆုံးပိုးတွေ့သူအမျိုးသားကတော့ ဆေးရုံရောက်လာချိန်ကတည်းက အောက်စီဂျင် ကျနေတာကြောင့် လက်ရှိအချိန်အထိ အောက်စီဂျင်ပေးထားရပေမဲ့ စိုးရိမ်စရာမရှိဘူးလို့ သိရသလို ကျန်ပိုးတွေ့အမျိုးသားတွေကတော့ ကျန်းမာရေးကောင်းမွန်တယ်လို့လည်း သိရပါတယ်။
ပေါင်အချုပ်ခန်းကနေ ပထမဆုံးပိုးတွေ့တဲ့အမျိုးသားဟာ ကာကွယ်ဆေးမထိုးရသေးတဲ့သူလို့ သိရသလို ဘယ်ကနေ အခုလိုပိုးကူးစက်တယ်ဆိုတာကို ဒေသန္တရကျန်းမာရေးအဖွဲ့တွေက လေ့လာနေပြီလို့လည်း သိရပါတယ်။
၁၃ ဒီဇင်ဘာ ၂၀၂၁မြန်မာလူထုအတွက် အသက်ကယ်ဆယ်ရေးအကူအညီတွေကို စစ်တပ်က ပိတ်ဆို့နေတယ်လို့ HRW ပြောလာ
မြန်မာနိုင်ငံမှာ အာဏာသိမ်းထားတဲ့စစ်တပ်ဟာ လူထုအတွက် အသက်ကယ်ဆယ်ရေးအကူအညီတွေကို ပိတ်ဆို့နေတာကြာင့် အကူအညီပေးရေးအဖွဲ့အစည်းတွေနဲ့ အလှူရှင်တွေအနေနဲ့ ဒေသတွင်းနဲ့ နယ်စပ်ဖြတ်ကျော်တဲ့အကူအညီလမ်းကြောင်းတွေ ဖော်ဆောင်ဖို့ လူ့အခွင့်အရေးစောင့်ကြည့်ရေးအဖွဲ့ HRW က တိုက်တွန်းပြောဆိုလာပါတယ်။
အကူအညီလိုအပ်နေတဲ့ ပြည်တွင်းက စစ်ရှောင်တွေဆီ လူသားချင်းစာနာမှုအကူအညီတွေ ရောက်ရှိအောင် ကုလသမဂ္ဂ၊ အာဆီယံနဲ့ မြန်မာ့အရေးအလေးထားတဲ့အစိုးရတွေဟာ စစ်ကောင်စီကို ဖိအားပေးသင့်တယ်လို့လည်း ဆိုပါတယ်။
ပြီးခဲ့တဲ့လတွေအတွင်း စစ်ကောင်စီနဲ့ သူ့ရဲ့လုံခြုံရေးတပ်ဖွဲ့တွေဟာ လူသားချင်းစာနာမှုအကူအညီပေးရေးလုပ်သားတွေအပေါ် ခရီးသွားလာမှုဆိုင်ရာကန့်သတ်ချက်အသစ်တွေ ချမှတ်တာ၊ လမ်းတွေပိတ်၊ အကူအညီပေးရေးယာဉ်တန်းတွေကို ပိတ်ဆို့တာ၊ စစ်ဘက်ဆိုင်ရာမဟုတ်တဲ့ထောက်ပံ့ရေးပစ္စည်းတွေကို ဖျက်ဆီးတာ၊ အကူအညီပေးရေးလုပ်သားတွေကို တိုက်ခိုက်တာနဲ့ ဖုန်းလိုင်းတွေ ဖြတ်တောက်ပစ်တာတွေကိုလည်း HRW က ထောက်ပြပြောဆိုပါတယ်။
''အာဏာသိမ်းမှုဖြစ်ပြီးကတည်းက ပဋိပက္ခဒဏ်ခံနေရတဲ့လူတွေဆီ အသက်ကယ်အကူအညီတွေမရောက်အောင် စစ်ဗိုလ်ချုပ်တွေဘက်က ငြင်းဆိုနေမှုကိုကြည့်ရင် လူထုကို ဒဏ်ခတ်မှုလုပ်နေသလိုမျိုးပဲ'' လို့ HRW ရဲ့ အာရှသုတေသီက ပြောပါတယ်။
ကရင်ပြည်နယ်၊ မြိုင်ကြီးငူရွာက ရွှေ့ပြောင်းနေထိုင်နေရသူ ၄၅၀၀ ကို တစ်လစာ အစားအသောက်အကူအညီပေးဖို့ပြင်တဲ့ ကမ္ဘာစားနပ်ရိက္ခာအစီအစဉ် (WFP)ရဲ့ တင်ပြချက်ကို စစ်ကောင်စီဘက်က ငြင်းခဲ့ပြီး စစ်ကောင်စီအရာရှိတွေဟာ အဲဒီစခန်းမှာ အစားအစာဝေတာကို သူတို့ လွှဲပြောင်းတာဝန်ယူမယ်ဆိုပြီး အကြံပြုခဲ့တဲ့ဖြစ်စဉ်ရှိခဲ့တယ်ဆိုတာကို ကုလသမဂ္ဂအဖွဲ့တွေရဲ့ မေလ အစည်းအဝေးမှတ်တမ်းတွေအရသိရတယ်ဆိုပြီး HRW က ဖော်ပြပါတယ်။
အကူအညီပေးရေးလုပ်ဆောင်ချက်တွေမှာ စစ်ကောင်စီရဲ့ကြားဝင်စွက်ဖက်မှုဟာ ကုလအထွေထွေညီလာခံ၊ လူ့အခွင့်အရေးကောင်စီ၊ လုံခြုံရေးကောင်စီ၊ ဥရောပလွှတ်တော်နဲ့ အလှူရှင်အစိုးရတွေက တောင်းဆိုနေတဲ့ လိုအပ်နေသူတွေဆီ အကူအညီတွေ အဟန့်အတားမရှိရောက်ရှိရေးတောင်းဆိုချက်တွေကို လျစ်လျူရှုရာရောက်နေတယ်လို့လည်း HRW က ထောက်ပြပြောဆိုထားပါတယ်။
ဒါ့ပြင် မြန်မာအိမ်နီးချင်း အိန္ဒိယ၊ ထိုင်းနဲ့ တရုတ်နိုင်ငံတို့အနေနဲ့ မြန်မာပြည်တွင်းက နေရပ်ရွှေ့ပြောင်းနေရသူတွေဆီ နယ်စပ်ဖြတ်ကျော်တဲ့အရေးပေါ်အကူအညီတွေရရှိလာအောင် ကြားဝင်ကူညီဖို့တာ၊ ဒုက္ခသည်တွေအားလုံးဆီအကူအညီရောက်အောက် ကာကွယ်ထောက်ပံ့ပေးတာတွေလုပ်ဖို့ HRW ကအကြံပြုထားပါတယ်။
၁၃ ဒီဇင်ဘာ ၂၀၂၁ကိုးကန့်ဒေသမှာ MNDAA နဲ့ စစ်ကောင်စီတပ်တို့ နေရာအနှံ့တိုက်ပွဲဖြစ်
ရှမ်းပြည်နယ်မြောက်ပိုင်း၊ ကိုးကန့်ဒေသမှာ စစ်ကောင်စီတပ်တွေနဲ့ ကိုးကန့်တပ် MNDAA တို့ ဒီဇင်ဘာလ ၁၀ ရက်မှာ နေရာအနှံ့ နာရီနဲ့ချီတဲ့တိုက်ပွဲတွေဖြစ်ခဲ့ပြီး စစ်ကောင်စီဘက်က ရာနဲ့ချီတဲ့လက်နက်ကြီးကျည်တွေနဲ့ ပစ်ခတ်မှုလုပ်ခဲ့တယ်လို့ ဒေသတွင်းသတင်းတွေမှာဖော်ပြလာပါတယ်။
ဒီဇင်ဘာလ ၁၀ ရက် မနက် ၇ နာရီမှာ ပန်ရင်လပမှာဖြစ်တဲ့တိုက်ပွဲဟာ ညနေ ၂ နာရီကျော်မှ ရပ်ခဲ့ပြီး စစ်ကောင်စီဘက်က မန်ဖာနဲ့ ကိုးကန့်ဒေသမှာရှိတဲ့လက်နက်ကြီးစခန်းကနေ MNDAA ဘက်ကို နက်လက်ကြီးကျည်စုစုပေါင်း ၆၀ ကျော်နဲ့ပစ်ခတ်ခဲ့တယ်လို့ သတင်းက ဆိုပါတယ်။
တခါ အဲဒီတစ်မနက်ခင်းတည်းမှာပဲ စစ်ကောင်စီရဲ့ တပ်မ ၉၉ လက်အောက်ခံ တပ်ရင်း ၃၁၅ နဲ့ ၁၁၃ တို့ကို လူအင်နား ၂၀၀ နီးပါးနဲ့ MNDAA ရဲ့ မန်ရန်တပ်စခန်းကို ထိုးစစ်ဆင်တိုက်ခိုက်လာတဲ့အပြင် လက်နက်ကြီးနဲ့ပစ်ခတ်လို့ အပြန်အလှန်တိုက်ပွဲဖြစ်ခဲ့တယ်လို့ လည်းဆိုပါတယ်။
အဲဒီတိုက်ပွဲမှာ စစ်ကောင်စီဘက်က အထိနာပြီး ဆုတ်ခွါသွားခဲ့ပေမဲ့ ကိုးကန့် MNDAA ဘက်က ၁ ဦးကျဆုံးပြီး ၄ ဦးဒဏ်ရာရခဲ့တယ်လို့လည်း သိရပါတယ်။
နောက် အဲဒီနေ့ နေ့လည်မှာပဲ စစ်ကောင်စီဘက်က ကိုးကန့် MNDAA ရဲ့ ချင်ချိုင့်ထန် တပ်စခန်းကို ၃ ကြိမ်တိတိထိုးစစ်ဆင်လာလို့ တိုက်ပွဲဖြစ်ခဲ့ပြီး အဲဒီတိုက်ပွဲမှာ စစ်ကောင်စီဘက်က အကျအဆုံးမသိရပေမဲ့ ကိုးကန့်တပ်ဘက်ကတော့ ၂ ဦး ဒဏ်ရာရခဲ့တယ်လို့လည်း သိရပါတယ်။
ကိုးကန့်ဒေသမှာ စစ်ကောင်စီနဲ့ ကိုးကန့်တပ်တို့ တိုက်ပွဲဖြစ်နေတာ လနဲ့ချီကြာမြင့်လာပြီဖြစ်ပေမဲ့ အဲဒီက တိုက်ပွဲအခြေအနေနဲ့ပတ်သက်လို့ စစ်ကောင်စီဘက်က တစုံတရာ မထုတ်ပြန်သေးပါဘူး။
၁၃ ဒီဇင်ဘာ ၂၀၂၁ကနီမှာ ရေမြုပ်မိုင်းနဲ့တိုက်ခိုက်ခံရတဲ့စစ်ကောင်စီရေယာဉ် နစ်မြုပ်နေပြီလို့ ဒေသကာကွယ်ရေးအဖွဲ့ပြော
စစ်ကိုင်းတိုင်း၊ ကနီမြို့နယ်ထဲမှာ မနေ့ ဒီဇင်ဘာလ ၁၂ ရက်တုန်းက ရေမြုပ်မိုင်းခွဲ တိုက်ခိုက်ခံခဲ့ရတဲ့စစ်ကောင်စီရေယာဉ်ဟာ ဒီနေ့မှာ မဲဒင်ရွာ ကျွန်းခုံအနီးမှာ နစ်မြုပ်နေပြီလို့ ကနီဒေသကာကွယ်ရေးတပ် KLG PDF က လူမှုကွန်ယက်ကနေ သတင်းထုတ်ပြန်လာပါတယ်။
အဲဒီတိုက်ခိုက်မှုကို ဒေသတွင်း ညီနောင်မဟာမိတ်တပ်ဖွဲ့တွေနဲ့ ပူးပေါင်းလုပ်ဆောင်ခဲ့တာလို့လည်းဆိုပါတယ်။
ဒ့ါအပြင် မနေ့ ဒီဇင်ဘာလ ၁၂ ရက် နေ့လည်တုန်းကလည်း မင်းကင်းကနေ ဆယ်ရွာချောင်ဘက်ကို စစ်ကူဆင်းလာတဲ့ စစ်ကောင်စီတပ်ဖွဲ့ဝင်အုပ်စုကို ဒေသတွင်းမဟာမိတ်ပြည်သူ့တပ်ဖွဲ့တွေက နေရာ ၄ ခုကနေ မိုင်းခွဲတိုက်ခိုက်ခဲ့တာကြောင့် စစ်ကောင်စီဘက်က ဆယ်ချီ ကျဆုံးတယ်လို့လည်း ကနီ PDF က သတင်းထုတ်ပြန်ထားပါတယ်။
တစ်ချိန်တည်းမှာပဲ စစ်ကောင်စီတပ်ဖွဲ့ဝင် ၂၀၀ ကျော်နီးပါးပါတဲ့ ရေယာဉ်အုပ်စုဟာ ချင်းတင်းမြစ်ကြောင်းအတိုင်း ဆင်းသွားတာကြောင့် မြစ်ကမ်းနားတစ်လျှောက်က ကျေးရွာတွေကို မွှေနှောက်ပစ်ခတ်တာရှိနိုင်လို့ အထူးဂရုပြုနေထိုင်ကြဖို့ ပြည်သူတွေကို ဒေသကာကွယ်ရေးတပ်ဘက်က နှိုးဆော်ထားပါတယ်။
စစ်ကောင်စီဘက်ကတော့ ကနီနဲ့ မင်းကင်းနယ်က ဒေသကာကွယ်ရေးတပ်တွေနဲ့ဖြစ်တဲ့တိုက်ပွဲတွေနဲ့ပတ်သက်ပြီး တစ်စုံတရာထုတ်ပြန်တာမျိုး မရှိသေးပါဘူး။
၁၃ ဒီဇင်ဘာ ၂၀၂၁ဒေါ်အောင်ဆန်းစုကြည်အမှုအတွက် ဒေါက်တာဇော်မြင့်မောင် သက်သေထွက်ဆိုဖို့ ထောင်အာဏာပိုင်တွေခွင့်မပြုသေး
မန္တလေးတိုင်းဝန်ကြီးချုပ် ဒေါက်တာဇော်မြင့်မောင်ဟာ ဒေါ်အောင်ဆန်းစုကြည် စွပ်စွဲခံနေရတဲ့ သဘာဝဘေးစီမံဥပဒေပုဒ်မအမှုအတွက် နေပြည်တော်အထူးတရားရုံးမှာ သက်သေအဖြစ်လာရောက်ထွက်ဆိုဖို့ရှိခဲ့ပေမဲ့ ထောင်အာဏာပိုင်တွေက သူ့ကို ခရီးသွားလာခွင့်မပြုလို့ ဒီနေ့ ဒီဇင်ဘာလ ၁၃ ရက်မနက်ရုံးချိန်းမှာ သက်သေဖြစ်မထွက်ဆိုနိုင်ခဲ့ဘူးလို့ သိရပါတယ်။
မန္တလေးက အိုးဘိုထောင်မှာ ဖမ်းဆီးထိန်းသိမ်းခံရ၊ ထောင်ဒဏ်ချမှတ်ခံနေရပြီး စွပ်စွဲခံထားရတဲ့အမှုတွေကိုရင်ဆိုင်နေရတဲ့ဒေါက်တာဇော်မြင့်မောင်ကို ဒေါ်အောင်ဆန်းစုကြည်က သူ့ရဲ့အမှုအတွက် သက်သေထွက်ဆိုဖို့ တရားရုံးကို တင်ပြခဲ့တာ ပြီးခဲ့တဲ့သီတင်းပတ်တွေကတည်းက ဖြစ်ပါတယ်။
ဒီနေ့ရုံးချိန်းမှာတော့ ဒီလိုသက်သေထွက်ဆိုဖို့ တရားရုံးဆင့်ခေါ်စာကို ဒေါက်တာဇော်မြင့်မောင်က သိရှိကြောင်း လက်မှတ်ထိုးထားတယ်ဆိုတာကိုတရားသူကြီးက ပြသခဲ့ပေမဲ့ သက်ဆိုင်ရာအကျဉ်းထောင်ရဲ့ထောင်ဆရာဝန်ဆေးစာအရ ထောင်အာဏာပိုင်တွေက ခရီးသွားခွင့်မပေးတာကြောင့် မလာရောက်နိုင်ကြောင်းပြောခဲ့တယ်လို့ တရားရုံးနဲ့နီးစပ်တဲ့သတင်းရင်းမြစ်တွေက ဘီဘီစီကိုပြောပါတယ်။
ဒီအခြေအနေကြောင့် လူကိုယ်တိုင် လာရောက်သက်သေထွက်ဆိုတာအစား သက်ဆိုင်ရာတရားရုံးကနေပဲ အမှုအတွက် ဒေါက်တာဇော်မြင့်မောင်ကို သက်သေအဖြစ်မေးမြန်းတာ ဒါမှမဟုတ် ဗီဒီယိုကနေတဆင့်မေးမြန်းတာမျိုးလို တခြားရွေးချယ်စရာလုပ်မလားဆိုပြီး တရားသူကြီးက ဒေါ်အောင်ဆန်းစုကြည်ရဲ့ရှေ့နေအဖွဲ့ကို မေးမြန်းခဲ့တယ်လို့သိရပါတယ်။
ရှေ့နေအဖွဲ့ကတော့ သက်သေကို သက်ဆိုင်ရာတရားရုံးမှာစစ်မေးပြီး သက်သေထွက်ချက်ယူတာနဲ့ ဗီဒီယိုကွန်ဖရန့်စ်ဇင်းကနေ မေးမြန်းတာတွေဟာ မတူဘူးဆိုတာကို အမှုသည်ကို ရှင်းပြဖို့လိုတာ၊ အမှုသည်ဆီကနေ လမ်းညွှန်ချက်ယူတာမျိုးရှိသေးတယ်ဆိုပြီး တရားရုံးကို ပြန်လည်တင်ပြခဲ့တယ်လို့လည်း သိရပါတယ်။
တရားသူကြီးကတော့ အဲဒီအတွက် ဒီဇင်ဘာလ ၂၀ ရက်နေ့ကို ရုံးချိန်း ရွှေ့ခဲ့တယ်လို့ သိရသလို ဒီနေ့မှာ ဒေါ်အောင်ဆန်းစုကြည်ရဲ့ရှေ့နေအဖွဲ့ဟာ ကြားနာမှုမတိုင်ခင် အမှုသည်နဲ့လူချင်းတွေ့ဆုံခွင့်ရရှိခဲ့တယ်လို့လည်း တရားရုံးနဲ့ နီးစပ်တဲ့သတင်းရင်းမြစ်တွေက ပြောထားပါတယ်။
ဒီကနေ့ စစ်ဆေးတဲ့သဘာဝဘေးစီမံအမှုဟာ ဒေါ်အောင်ဆန်းစုကြည် ကို အရပ်သားတစ်ဦးဖြစ်တဲ့ လယ်ဝေးမြို့နယ်က ဦးညီညီ (ခ) ဦးထွန်းမြင့်အောင် က တရားလိုပြုလုပ်ကာ တရားစွဲဆိုခဲ့တဲ့အမှုဖြစ်ပါတယ်။
၂၀၂၀ရွေးကောက်ပွဲကာလမှာရွှေကြာပင်ရပ်ကွက်အတွင်း ဒေါ်အောင်ဆန်းစုကြည်သွားလာခဲ့မှုဟာ ကိုဗစ်စည်းကမ်းကိုဖောက်ဖျက်တယ်ဆိုတဲ့စွပ်စွဲချက်နဲ့ စွဲဆိုခံထားရတာဖြစ်ပါတယ်။
၁၃ ဒီဇင်ဘာ ၂၀၂၁မြန်မာမှာ အခွင့်အရေးချိုးဖောက်မှုတွေ မထင်ထားတဲ့နှုန်းနဲ့မြင့်တက်နေတယ်လို့ ကုလပြော
မြန်မာပြည်တွင်းက အခွင့်အရေးချိုးဖောက်ခံရမှုတွေဟာ မထင်မှတ်ထားလောက်တဲ့နှုန်းနဲ့မြင့်တက်နေတယ်ဆိုပြီး ကုလသမဂ္ဂလူ့အခွင့်အရေးဆိုင်ရာမဟာမင်းကြီးရုံး(OHCHR)က ပြောလာပါတယ်။
''ပြီးခဲ့တဲ့သီတင်းတစ်ပတ်အတွင်းမှာတင် လုံခြုံရေးတပ်ဖွဲ့ဝင်တွေက ကလေး ၅ ဦးအပါအဝင် လူ ၁၁ ယောက်ကို သတ်ဖြတ်မီးရှို့ခဲ့တာ၊ ငြိမ်းချမ်းစွာဆန္ဒပြခွင့်ဆိုတဲ့ အခြေခံအခွင့်အရေးကို ကျင့်သုံးနေတဲ့ ဆန္ဒပြသူတွေကို ကားနဲ့ဝင်တိုက်တာတွေ လုပ်ခဲ့တယ်'' လို့ OHCHR ရုံးပြောခွင့်ရသူက ဂျီနီဗာမြို့မှာပြုလုပ်တဲ့သတင်းစာရှင်းလင်းပွဲမှာပြောလာတာပါ။
ဒါ့အပြင် လူ့ရှင်သန်ခွင့်၊ လွတ်လပ်မှုနဲ့ လုံခြုံရေးတို့အပြင် ညှင်းပန်းနှိပ်စက်မခံရခွင့်၊ မျှတတဲ့တရားစီရင်ကြားနာမှုနဲ့ လွတ်လပ်စွာထုတ်ဖော်ပြောဆိုမှုအပိုင်းတွေမှာလည်း နေ့စဉ် ကြီးမားတဲ့ချိုးဖောက်မှုတွေရှိနေတဲ့သတင်းတွေ ပေါ်ထွက်လာနေတယ်လို့လည်း သူက ပြောပါတယ်။
မြန်မာနိုင်ငံမှာ စစ်အာဏာသိမ်းပြီးကတည်းက ဗိုလ်ချုပ်မှူးကြီး မင်းအောင်လှိုင်ရဲ့တပ်ဖွဲ့တွေဟာ မြန်မာပြည်သူတွေကို အကာအကွယ်ပေးရမယ်ဆိုတဲ့ နိုင်ငံတကာဥပဒေအောက်က တာဝန်တွေကို လေးစားလိုက်နာဖို့ အကြိမ်ကြိမ်ပျက်ကွက်ခဲ့တယ်လို့ ပြောခွင့်ရသူကပြောပါတယ်။
ဒီ့နောက်ဆက်တွဲအနေနဲ့ လူပေါင်း ၁၃၀၀ ရာကျော် အသက်ဆုံးပါးခဲ့ရပြီး နောက်ထပ် လူ ၁ သောင်း ၆ ရာကျော်လည်း ထိန်းသိမ်းခံထားရတယ်လို့ သူက ဆိုပါတယ်။
ဒီလိုဆိုးရွားတဲ့ချိုးဖောက်မှုတွေကြောင့် မြန်မာစစ်တပ်ကို တာဝန်ယူမှု တာဝန်ခံမှုရှိလာအောင်နဲ့ မြန်မာနိုင်ငံကို ဒီမိုကရေစီလမ်းကြောင်းပေါ်ပြန်ရောက်အောင် နိုင်ငံတကာအနေနဲ့ ခိုင်မာစည်းလုံးတဲ့ တုံ့ပြန်မှုရှိဖို့ လိုတာပြီဆိုတာကို ပြသနေတယ်လို့ သူက ထောက်ပြပြောဆိုထားပါတယ်။
၁၃ ဒီဇင်ဘာ ၂၀၂၁ဒေါ်အောင်ဆန်းစုကြည် ရင်ဆိုင်နေရတဲ့ အမှုတွေထဲက သဘာဝဘေးစီမံအမှုကိုဒီကနေ့ စစ်ဆေးဖို့ရှိ
နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည် ရင်ဆိုင်နေရတဲ့ အမှုတွေထဲက သဘာဝဘေးအန္တရာယ်ဆိုင်ရာစီမံခန့်ခွဲမှုဥပဒေပုဒ်မ ၂၅ နဲ့ အမှုအတွက် ဒီကနေ့ ဒီဇင်ဘာ ၁၃ရက်မှာ ခံပြသက်သေ ( စွပ်စွဲခံရသူဘက်က တင်သွင်းတဲ့သက်သေ) အဖြစ် မန္တလေးတိုင်းဝန်ကြီးချုပ်ဒေါက်တာဇော်မြင့်မောင်ကို ဆင့်ခေါ်ထားတာနဲ့ပတ်သက်ပြီး စစ်ဆေးဖို့ရှိတယ်လို့ တရားရုံးနဲ့နီးစပ်တဲ့အသိုင်းအဝိုင်းကသိရပါတယ်။
ပြီးခဲ့တဲ့ အပတ်တွေကတည်းက ဒေါက်တာဇော်မြင့်မောင် ခံပြသက်သေ အဖြစ်လာရောက်ထွက်ဆိုဖို့ စွပ်စွဲခံရသူ ဒေါ်အောင်ဆန်းစုကြည်ဘက်က တင်ပြခဲ့ပေမယ့် ဒေါက်တာဇော်မြင့်မောင်ကို ကျန်းမာရေးစစ်ဆေးတဲ့ ဆရာဝန် က ဒေါက်တာဇော်မြင့်မောင်ဟာ ကျန်းမာရေးအရ ခရီးသွားဖို့ မသင့်သေးဘူးဆိုတဲ့ မှတ်ချက်ကြောင့် နေပြည်တော်ကို သွားရောက်ခွင့်မရခဲ့တာဖြစ်ပါတယ်။ အဲဒီနောက်မှာတော့ တရားရုံးက ဒေါက်တာဇော်မြင့်မောင်ကို ဆင့်ခေါ်စာအသစ်ထပ်မံပေးပို့ပြီး ဒီကနေ့ကြားနာမှုမှာ ဆက်လက်စစ်ဆေးဖို့ရှိနေတာဖြစ်ပါတယ်။
ဒီကနေ့ စစ်ဆေးမယ့်သဘာဝဘေးစီမံအမှုဟာ ဒေါ်အောင်ဆန်းစုကြည် ကို အရပ်သားတစ်ဦးဖြစ်တဲ့ လယ်ဝေးမြို့နယ်က ဦးညီညီ (ခ) ဦးထွန်းမြင့်အောင် က တရားလိုပြုလုပ်ကာ တရားစွဲဆိုခဲ့တဲ့အမှုဖြစ်ပါတယ်။ ၂၀၂၀ရွေးကောက်ပွဲကာလမှာရွှေကြာပင်ရပ်ကွက်အတွင်း ဒေါ်အောင်ဆန်းစုကြည်သွားလာခဲ့မှုဟာ ကိုဗစ်စည်းကမ်းကိုဖောက်ဖျက်တယ်ဆိုတဲ့စွပ်စွဲချက်နဲ့ စွဲဆိုခံထားရတာဖြစ်ပါတယ်။
လက်ရှိမှာ နိုင်ငံတော်အတိုင်ပင်ခံပုဂ္ဂိုလ်ဟာ အမှု ၁၁မှု နဲ့တရားစွဲဆိုခံထားရတဲ့အထဲ ၂ မှု ကို အမိန့် ချမှတ်ခံထားရပါတယ်။ အာဏာသိမ်းမှုဖြစ်ပြီးနောက် ဖမ်းဆီးခံရပြီး ထောင်တွင်းတရားရုံးမှာ အမှုတွေကို ရင်ဆိုင်နေရတဲ့ မန္တလေးတိုင်းဝန်ကြီးချုပ် ဒေါက်တာဇော်မြင့်မောင်ဟာလည်း သူစွပ်စွဲခံရတဲ့အမှုတွေထဲက ၂ မှုအတွက် ဒီဇင်ဘာလ ၈ ရက်မှာ ထောင်ဒဏ် ၄ နှစ်ချမှတ်ခံထားရတာပါ။
၁၂ ဒီဇင်ဘာ ၂၀၂၁မင်းတပ်က ခရစ်ယာန်ဓမ္မဆရာ တစ်ဦး အဖမ်းခံရ
ချင်းပြည်နယ်၊ မင်းတပ်မြို့ ဆောက်လုပ်ရေးလမ်းခွဲအနီး စစ်ဆေးရေးဂိတ် လုပ်ပဲရွာက ခရစ်ယာန်ဓမ္မဆရာ တစ်ဦးကို CDFနဲ့ ပတ်သက်တယ်လို့စွပ်စွဲကာ ယနေ့ ဒီဇင်ဘာ ၁၂ ရက် ညနေ ၅ နာရီလောက်က စစ်ကောင်စီတပ်တွေက ဖမ်းဆီးခေါ်ဆောင်သွားတယ်လို့ဒေသခံတွေက တစ်ဆင့် သိရပါတယ်။
သူ့ကို ဒေသအခြေစိုက် အမှတ် ၂၇၄ တပ်ရင်းထဲကို ခေါ်သွားကြောင်းနဲ့ အခုအထိ အဆက်အသွယ်မရသေးကြောင်းသူတို့က ပြောပါတယ်။
ဒါ့အပြင် ဒီကနေ့မနက်က မင်းတပ်မှာ စစ်ကောင်စီဘက်က ပစ်လို့ ဒေသခံတစ်ဦးသေနတ်ကျည်ထိပြီး အမျိုးသမီးတစ်ဦး သေဆုံးခဲ့တယ်၊အလောင်းကို ချက်ခြင်းမီးသင်္ဂြိုဟ်ခိုင်းခဲတယ်ဆိုတဲ့ သတင်းတွေလည်း ဒေသခံတွေကြားမှာ ပြောဆိုနေကြပါတယ်။
စစ်ကောင်စီဘက်ကတော့ မင်းတပ်မြို့တိုက်ပွဲတွေ အခြေအနေနဲ့ လူသေဆုံးမှုသတင်းတွေနဲ့ ပတ်သက်ပြီး သတင်းထုတ်ပြန်တာမျိုး မရှိသေးပါဘူး။
ဒါ့အပြင် မင်းတပ် CDF၊ ကျောက်ထု PDFပူးပေါင်းအဖွဲ့ အင်အား၂၀ခန့်က စစ်ကောင်စီတပ်တွေကို ရွှေအောင်သာကျေးရွာနဲ့ ကြည်းကျေးရွာကြားမှာ ပြောက်ကျားစနစ်နဲ့ ဒီကနေ့ တိုက်ခိုက်ခဲ့ကြတယ်လို့ မင်းတပ်ဒေသခံတွေက ပြောပါတယ်၊
နယ်မြေရှင်လင်းရေးဆောင် ရွက်နေဆဲဖြစ်တယ်လို့ ဒေသခံလက်နက်ကိုင်တွေက ပြောပြီးသေဆုံးသူမရှိကြောင်း စစ်ကောင်စီဘက်က သေဆုံးမှုတွေကိုတော့ မသိရသေးဘူးလို့ လည်းသူတို့က ပြောပါတယ်။
၁၂ ဒီဇင်ဘာ ၂၀၂၁အမျိုးသမီးတွေကို ဖိနှိပ်ဖို့ မြန်မာစစ်တပ်က ဘယ်လို နှိပ်စက်သလဲ
၁၂ ဒီဇင်ဘာ ၂၀၂၁စစ်ရေးတင်းမာမှုဖြစ်ပြီး ပေါက်တောမြို့နယ်က ဆံတော်ရှင် ဘုရားပွဲတော်ရက် နောက်ဆုတ်
ရခိုင်ပြည်နယ် ပေါက်တောမြို့နယ်က ဆံတော်ရှင် ရှေးဟောင်းသမိုင်းဝင် ဘုရားပွဲတော်ကို ယခင်သတ်မှတ်ရက်ထက် တစ်ရက်နောက်ဆုတ်ပြီးတော့ ကျင်းပပေးသွားမယ်လို့ ဘုရားဂေါပကအဖွဲ့ ဥက္ကဋ္ဌ ဦးမောင်ကျော်သိန်းက ပြောပါတယ်။
ယခင်က ဘုရားပွဲတော်ကို နှစ်စဉ်ကျင်းပနေတဲ့ရက်ဖြစ်တဲ့ နတ်တော်လဆန်း ၁၁ ရက် (ဒီဇင်ဘာ ၁၃) ရက်မှာ ကျင်းပပြုလုပ်သွားဖို့ ဆုံးဖြတ်ထားခဲ့ပေမယ့် စစ်ကောင်စီတပ်တွေ လာရောက်နေရာယူထားတဲ့အတွက် အဆင်မပြေမှုတွေ ဖြစ်ပွားခဲ့တာကြောင့် ပွဲကျင်းပမယ့်ရက်ကို နောက်ဆုတ်လိုက်ရတယ်လို့ ဂေါပကပြောပါတယ်။
လတ်တလောမှာတော့ အဲ့ဒီဆံတော်ရှင်ဘုရားရှိတဲ့ တောင်တန်းတစ်လျှောက်မှာ စစ်ကောင်စီတပ်တွေက နေရာယူထားတဲ့ အတွက် ရက္ခိုင့်တပ်တော်အေအေနဲ့ စစ်ကောင်စီတို့အကြား စစ်ရေးတင်းမာမှုတွေဖြစ်ပွားနေကြတာဖြစ်ပါတယ်။
ပွဲတော်ကာလကို ရောက်လာတဲ့အချိန်မှာ စစ်ကောင်စီတပ်တွေက အခုလိုဘုရားတောင်အနီးဝန်းကျင်မှာ နေရာယူထားတဲ့ အတွက် ဒေသခံတွေဘက်ကရော ဘုရားဖူးခရီးသည်တွေဘက်ကပါ မလိုလားကြပါဘူး။
ပုံမှန်အခြေအနေဆိုလို့ရှိရင် ဒီဇင်ဘာ ၁၃ ရက်နေ့မှာ ပွဲတော်ကာလ စတင်တော့မှာဖြစ်ပေမယ့် ပွဲတော်ကျင်းပဖို့မကျင်းပဖို့နဲ့ အခြားကိစ္စရပ်တွေကို တာဝန်ရှိတဲ့သူတွေ အစည်းအဝေးတွေ အကြိမ်ကြိမ်လုပ်ပြီး ဆွေးနွေးနေခဲ့ကြရတာကြောင့် တစ်ရက်နောက်ဆုတ်ပေးလိုက်ရပြီး ဒီဇင်ဘာ ၁၄ ရက်နေ့မှာတော့ ပွဲတော်ကိုကျင်းပပေးသွားမှာဖြစ်တယ်လို့ သိရပါတယ်။
အဲ့ဒီမှာလမ်းပြုပြင်ဖို့ရောက်ရှိနေတဲ့ တပ်ဖွဲ့တွေနဲ့ ပတ်သက်လို့ ရခိုင်ပြည်နယ် လုံခြုံရေးနဲ့ နယ်စပ်ရေးရာဝန်ကြီး ဗိုလ်မှူးကြီးကျော်သူရကို ဆက်သွယ်မေးမြန်းခဲ့ပေမယ့် အဆက်အသွယ်မရရှိခဲ့ပါဘူး။
ဘုရားအနီးဝန်းကျင်မှာ စစ်ကောင်စီဘက်က နေရာယူထားတာကြောင့် နှစ်ဖက်တင်းမာမှုတွေရှိနေတဲ့အတွက် ဘုရားဖူးခရီးသည်တွေအနေနဲ့ စစ်ရေးသတိရှိကြဖို့နဲ့ ဆင်ခြင်သုံးသပ်ပြီးတော့ သွားလာကြဖို့ ဒီဇင်ဘာ ၁၀ ရက်နေ့မှာ အေအေဘက်က ကြေညာချက်တစ်စောင်ထုတ်ပြန်လိုက်ပါတယ်။
ဘုးရာတောင်ပေါ်တက်လမ်းတစ်လျှောက် ပျက်စီးနေတဲ့အတွက် စစ်ကောင်စီအနေနဲ့ လမ်းလာလုပ်တာဖြစ်ပြီး လမ်းပြီးစီးသွားလို့ရှိရင်တော့ ပြန်မယ်လို့ စစ်ကောင်စီဘက်က တာဝန်ရှိသူတွေအနေနဲ့ ပြောဆိုတာတွေလည်းရှိနေပါတယ်။
စစ်ရေးတင်းမာမှုကို ရခိုင် ဆံတော်ရှင်ကျွန်းက ဒေသခံတွေ စိုးရိမ်၊ ဈေးသည်တချို့အိမ်ပြန်
၁၂ ဒီဇင်ဘာ ၂၀၂၁မုံရွာ ယာကြီးလမ်းပေါ်မှာ စစ်ကောင်စီယာဥ်တန်း မိုင်းဆွဲတိုက်ခိုက်ခံရ
မုံရွာ ယာကြီး ကလေးဝလမ်းပေါ်မှာ စစ်ကောင်စီယာဥ်တန်းကို ဒေသကာကွယ်ရေးတပ်တွေက ဒီကနေ့မနက်ပိုင်းမှာ မိုင်းဆွဲတိုက်ခိုက်ခဲ့တယ်လို့ ဒေသကာကွယ်ရေးတပ်တွေက ဒီဇင်ဘာလ ၁၂ ရက်နေ့စွဲနဲ့ ထုတ်ပြန်ပါတယ်။
စစ်ကောင်စီတပ်တွေ မိုင်းဆွဲတိုက်ခိုက်ခံရတဲ့နေရာကတော့ မင်းကင်းကနေဆယ်ရွာချောင်ဘက်ကို စစ်ကူဆင်းလာစဉ်မှာ မိုင်းဆွဲခံရတာဖြစ်ပြီးတော့ ဆယ်ဂဏန်းပမာဏ အကျအဆုံးထိခိုက်မှုတွေရှိတယ်လို့ သူတို့ကပြောပါတယ်။
အခုမိုင်းဆွဲတိုက်ခိုက်ခံရတဲ့ နေရာဟာ ယာကြီးနဲ့လာပို့ကြား ကားလမ်းပေါ်က မိုင်တိုင် ၆၀ ဝန်းကျင်အနီးဖြစ်တယ်လို့လည်း ဒေသသတင်းတွေက ဆိုပါတယ်။
စစ်ကောင်စီဘက်ကတော့ ဒီတိုက်ခိုက်မှုနဲ့ပတ်သက်ပြီး သတင်းထုတ်ပြန်တာမရှိသေးပါဘူး။
တိုက်ပွဲဖြစ်ပြီးတဲ့နောက်မှာ စစ်ကောင်စီတပ်အချို့ဟာ ကနီမြို့နယ် လာပို့ရွာမှာ တပ်စွဲနေတယ်လို့လည်း ဒေသခံတွေက ပြောပါတယ်။
ကလေး၀ မင်းကင်း ကနီ ယင်းမာပင်မြို့နယ်တွေကို ဖြတ်ပြီးဖောက်လုပ်ထားတဲ့ မုံရွာယာကြီးကလေးဝလမ်းဟာ ပြီးခဲ့တဲ့ မေလဝန်းကျင်က စတင်ခဲတဲ့ တိုက်ပွဲတွေအပြီး ပျူစောထီး ပီဒီအက်ဖ် စစ်တပ်တို့ သုံးပွင့်ဆိုင်တိုက်ပွဲတွေကြောင့် အဲ့ဒီလမ်းအစား မဟာမြိုင် တန့်ဆည် ရေဦးလမ်းကိုသာ ဒေသခံတွေ သွားလာရေးအတွက် အသုံးပြုနေကြတယ်လို့ သိရပါတယ်။
၁၂ ဒီဇင်ဘာ ၂၀၂၁လောင်းလုံး ရေဖြူကျေးရွာအုပ်စုအတွင်းမှာ စစ်ကောင်စီတပ်တွေတပ်စွဲထား, ရွာတွင်းက အမျိုးသမီးငယ်တွေကို ကာယိန္ဒြေပျက်ပြားအောင်လုပ်ဆောင်မှုတွေရှိနေတယ် လို့ သပိတ်ကော်မတီက ထုတ်ပြန်
တနင်္သာရီတိုင်း ၊ ထားဝယ်ခရိုင်၊ လောင်းလုံးမြို့နယ်အတွင်း အောက်ရေဖြူကျေးရွာအုပ်စုထဲမှာ တပ်စွဲထားတဲ့ စစ်ကောင်စီတပ်သားတွေဟာ ကျေးရွာအုပ်စုအတွင်းက အမျိုးသမီးငယ်တွေရှိတဲ့ နေအိမ်တွေကို ဝင်ရောက်စစ်ဆေးတာတွေလုပ်သလို ကာယိန္ဒြေပျက်ပြားအောင်လုပ်ဆောင်မှု တွေရှိနေတယ်လို့ အောက်ရေဖြူကျေးရွာသပိတ်ကော်မတီက ထုတ်ပြန်လာပါတယ်။
စစ်ကောင်စီတပ်တွေဟာ အောက်ရေဖြူကျေးရွာအုပ်စုထဲက ကဒက်ငယ်ထိန်ရွာမှာရှိတဲ့ ဂေါ့အင်းစာသင်ကျောင်းမှာ တပ်စွဲထားတာဖြစ်ပြီး ပြီးခဲ့တဲ့ဒီဇင်ဘာ ၁၁ ရက်နေ့ညပိုင်းကစလို့ ကျေးရွာအတွင်း အရက်မူးပြီးပစ်ခတ်မှုတွေလုပ်ခဲ့သလို ရွာထဲကနေအိမ်တွေကို ဝင်ရောက်စစ်ဆေးတာတွေ၊ လူငယ်တချို့ကို ဖမ်းဆီးတာတွေအပြင် အမျိုးသမီးငယ်တွေကို ထိပါးနှောင့်ယှက်မှုတွေလုပ်လာတယ်လို့သပိတ်ကော်မတီကတာဝန်ရှိသူက ပြောပါတယ်။
'' ဂေါ့အင်းစာသင်ကျောင်းမှာတပ်စွဲထားတာ တစ်လလောက်ရှိပါပြီ။ အဲဒီညက စစ်တပ် ကဒက်ငယ်ထိန်ရွာထဲဝင်ပြီး ဆိုင်ကယ်ပြင်ဆိုင်က လူငယ်တချိုု့ကိုဖမ်းဆီးရိုက်နှက်တယ်။ ရွာထဲက အမျိုးသမီးငယ်တစ်ဦးနေအိမ်ကိုဝင်ပြီးဖုန်းယူစစ်တဲ့အခါ နိုင်ငံရေးနဲ့ပတ်သက်တာတွေ့တယ်ဆိုပြီးဆံပင်တွေညှပ်သွားတယ်။ ကျွန်တော်တို့ပြန်ကြားသိရတာ အဲ့ဒီအမျိုးသမီးတစ်ယောက်တည်းမဟုတ်ဘဲအဲ့ဒီညက အမျိုးသမီးလေးယောက်လောက်ကို ဆံပင်တွေညှပ်ခဲ့တယ်။ အမျိုးသမီးတွေကို ထိကပါးရိကပါးလုပ်တာတွေလည်းရှိတယ် '' လို့အောက်ရေဖြူကျေးရွာသပိတ်ကော်မတီက တာဝန်ရှိသူက ဘီဘီစီကိုပြောပါတယ်။
အောက်ရေဖြူကျေးရွာအုပ်စုအတွင်းမှာတပ်စွဲထားတဲ့ စစ်ကောင်စီတပ်တွေအနေနဲ့အခုလိုလုပ်ဆောင်မှုတွေအပြင် ကျေးရွာအုပ်စုတွေအတွင်းမှာ ဆိုင်ကယ်နဲ့ဖြတ်သန်းသွားလာတာတွေကိုလည်းတားဆီးစစ်ဆေးပြီး ဆိုင်ကယ်လိုင်စင် စစ်တာကိုအကြောင်းပြုပြီး ဆိုင်ကယ်တွေကို သိမ်းယူတာ၊ တစ်စီးကို ငွေကျပ်တစ်သိန်းနဲ့လာရွေးခိုင်းတာတွေလည်းရှိတယ်လို့ ဒေသခံသပိတ်ကော်မတီက ပြောပါတယ်။
ပြီးခဲ့တဲ့ ဒီဇင်ဘာ ၉ရက်မှာလည်း လောင်းလုံးနယ်ထဲက ကညုံကျွန်းကျေးရွာအနီးမှာ စစ်ကောင်စီတပ်တွေက ရွာအနီးလက်နက်တွေရှာတွေ့ပြီးတဲ့နောက် ကျေးရွာအတွင်းက အသက်မပြည့်သေးတဲ့မိန်းကလေးငယ် ၈ဦးအပါအဝင်ရွာသား ၁၁ ဦးကို ဖမ်းဆီးသွားပြီး လက်နက်တွေနဲ့အတူမိတယ်လို့ ထုတ်ပြန်လာတဲ့အပေါ်ကိုလည်း သပိတ်ကော်မတီတွေက ကန့်ကွက်ထားပါတယ်။
စစ်အာဏာရှင်ဆန့်ကျင်ရေးသပိတ်စစ်ကြောင်းတွေအားကောင်းတဲ့ လောင်းလုံးနယ်ထဲမှာတော့ စစ်ကောင်စီဘက်က သပိတ်မှာ ဦးဆောင်ပါဝင်သူတွေကို ဆက်တိုက်စစ်ဆေးဖမ်းဆီးတာတွေလုပ်နေသလို ကျေးရွာအုပ်စုတွေအတွင်းမှာလည်း ပစ်ခတ်ခြောက်လှန့်မှုတွေ ၊ သပိတ်စစ်ကြောင်းမှာပါဝင်သူတွေလို့ယူဆသူတွေကို ဖမ်းဆီးမှုတွေလည်း ဆက်လုပ်နေတယ်လို့ဒေသခံတွေကပြောဆိုထားပါတယ်။ လောင်းလုံးနယ်ထဲမှာ အခုလို ဒေသခံတွေကိုဖမ်းဆီးနေတာ၊အမျိုးသမီးငယ်တွေကို စစ်ကောင်စီတပ်ဖွဲ့ဝင်တွေဘက်က ထိပါးနှောက်ယှက်နေတာတွေရှိတယ်ဆိုတာနဲ့ပတ်သက်ပြီး စစ်ကောင်စီဘက်ကို ဘီဘီစီကဆက်သွယ်မေးမြန်းဖို့ကြိုးစားနေပါတယ်။
၁၂ ဒီဇင်ဘာ ၂၀၂၁မန္တလေးမှာ သေနတ်ပစ်ခံရလို့ တစ်ရက်တည်း ၃ ဦးသေဆုံး
မန္တလေးမြို့မှာ ဒီဇင်ဘာလ ၁၂ ရက်နေ့ မနက်ပိုင်းအတွင်း သေနတ်ပစ်ခံရလို့သေဆုံးသူအနည်းဆုံးသုံးဦးထိ ရှိခဲ့တယ်လို့သိရပါတယ်။
ဒီကနေ့ မနက်၇နာရီကျော်က ချမ်းမြသာစည်မြို့နယ်၆၂x၁၀၇လမ်းအနီးမှာ ပုဂ္ဂလိကသူနာပြုတစ်ဦးနဲ့ သူ့အမျိုးသားတို့ ယာဉ်မောင်းလာစဉ်မရပ်ပေးလို့ဆိုကာ ပစ်ခတ်ခံရလို့ သေနတ်မှန်သေဆုံးခဲ့တယ်လို့ ဒေသခံတွေက ပြောပါတယ်။
အလားတူ ပြည်ကြီးတံခွန်မြို့နယ်မှာလည်း ကြက်ခြေနီတပ်ခွဲမှူးကနေ စစ်ကောင်စီခန့်အုပ်ချုပ်ရေးမှူးဖြစ်လာသူတစ်ဦး သေနတ်ပစ်ခံရလို့ သေဆုံးခဲ့တဲ့အကြောင်း ဒေသခံတစ်ဦးက ပြောပါတယ်။
ဘီဘီစီအနေနဲ့ ပစ်ခတ်ခံရမှုနဲ့ ပတ်သက်လို့ ဘယ်အဖွဲ့က ပစ်တယ်ဆိုတာကို သီးခြားအတည်ပြူနိုင်တာ မရှိသေးပါဘူး။
ပစ်ခတ်ပေါက်ကွဲမှုတွေ နေ့စဉ်ရှိနေတဲ့ မန္တလေးမှာ အာဏာသိမ်းပြီးနောက်ပိုင်း မန္တလေးမြို့ရဲ့အရှေ့ခြမ်းနဲ့ တောင်ဘက်ပိုင်းတွေမှာ လုယက်မှုတွေ ဓားခုတ်မှုတွေဖြစ်ပေါ်နေတာ လချီကြာပြီလို့ လူမှုကူညီရေးအသင်းတွေက ပြောပါတယ်။
ချမ်းမြသာစည်မြို့နယ်အရှေ့ခြမ်းနဲ့ ပြည်ကြီးတံခွန်မြို့နယ် စက်မှုဘက်ခြမ်း မင်းကြီးရန်နောင်လမ်ဘက်ခြမ်းတွေမှာ မနက်အစောပိုင်းနဲ့ ညပိုင်း၇နာရီကျော်တွေမှာ အဖြစ်များတယ်လို့ဆိုပါတယ်။
ပြင်းထန်တဲ့ ထိခိုက်ဒဏ်ရာရတာတွေရှိသလို လူသေဆုံးမှုအထိ လုယက်တာတွေ ရှိခဲ့တယ်လို့ လူနာတွေကို ဆေးရုံကြီးပို့ဆောင်ပေးရတဲ့ လူမှုကူညီရေးအသင်းတာဝန်ရှိသူတစ်ဦးကပြောပါတယ်။
လုယက်မှုတွေက နေ့တိုင်းနီးပါးဖြစ်နေတယ် ဓားခုတ်မှုတွေ အဖြစ်များတယ်လို့လည်း သူတို့ကပြောပါတယ်။
မနေ့ည ဒီဇင်ဘာ၁၁ရက်နေ့ညပိုင်းမှာလည်း မန္တလေးဘူတာကြီးအနီးဆိုင်ကယ်မောင်းလာတဲ့အမျိုးသားနှစ်ဦးကို မရပ်ပေးလို့ဆိုကာ ပစ်ခေတ်ဖမ်းဆီးခံရပြီး နှစ်ဦးလုံးသေဆုံးဖွယ်ရှိတယ်လို့ဖြစ်စဉ်နဲ့နီးစပ်ရာ ဒေသခံတွေကပြောပါတယ်။
၁၂ ဒီဇင်ဘာ ၂၀၂၁မန္တလေး-မူဆယ်လမ်းမှာ ကုန်စည်စစ်ဆေးရေးနေရာတွေ တိုးမယ်လို့ စစ်ကောင်စီပြော
မြန်မာ-တရုတ် နယ်စပ်ကုန်သွယ်ရေး ကုန်စည်ကူးသန်းမှုမှာ ယာဉ်ကြောမပိတ်အောင် မန္တလေး-မူဆယ်လမ်းကြောင်းမှာ စစ်ဆေးရေးနေရာတွေ တိုးဖွင့်ဖို့ မန္တလေးတိုင်း စစ်ကောင်စီဘက်က ပြင်ဆင်နေပါတယ်။
မန္တလေး ၁၆ မိုင် စစ်ဆေးရေးဂိတ်အပါအဝင်၊ မြစ်ငယ်တိုးဂိတ်၊ မန္တလေး-ထုံးဖိုလမ်းနဲ့ ၆၂ လမ်းဆုံ၊ အုန်းကြောအဝင် မန္တလေး-လားရှိုးလမ်းနဲ့ထုံးဖိုလမ်းဆုံ၊ ရတနာလင်းလမ်းဆုံတွေမှာ စစ်ဆေးရာနေရာ(check point)ထပ်မံဖွဲ့စည်းပြီး ပို့ကုန်ယာဉ်တွေကို ထိန်းချုပ်စေလွှတ်ခြင်းများ ဆောင်ရွက်မယ်လို့ ဆိုပါတယ်။
အဲဒီလိုတိုးဖွင့်ဖို့ လည်ပတ်မှုဆိုင်ရာစံအသစ်တစ်ခုကိုရေးဆွဲဖို့လည်းရှိနေတယ်ဆိုပြီး နိုင်ငံပိုင်သတင်းမှာဖော်ပြလာတာဖြစ်ပါတယ်။
တရုတ်နယ်စပ်ဂိတ်တွေ ပြန်လည်ဖွင့်လှစ်ပေမဲ့ မူဆယ်-ချင်းရွှေဟော်မှာ ပို့ကုန်ယာဉ်တွေ ရှိနေသေးတာကြောင့် မန္တလေး ၁၆ မိုင်စစ်ဆေးရေးဂိတ်ကနေ ပို့ကုန်ယာဉ်တွေကို ယာယီဖြတ်သန်းသွားလာခွင့်မပြုသေးဘူးလို့လည်း သတင်းက ဆိုပါတယ်။

ဖရူဆိုမှာ သတ်ဖြတ်ခံလိုက်ရသူတွေထဲ အသက်မပြည့်သေးသူ ၄ ဦးပါဝင်တယ်လို့ ယူနီဆက်ဖ်ပြော

တိုက်ရိုက် ထုတ်လွှင့်ချက်

၁၃ ဒီဇင်ဘာ ၂၀၂၁အရာတော်မြို့နယ် ကဲဘာရွာ အိမ် ၁၀၀ ကျော်မီးရှို့ခံရ

၁၃ ဒီဇင်ဘာ ၂၀၂၁ဒေသလုပ် ရေမြုပ်မိုင်းတွေသုံးလာတဲ့ ချင်းတွင်းမြစ်ထဲက တိုက်ပွဲ

၁၃ ဒီဇင်ဘာ ၂၀၂၁ထားဝယ် သပိတ်စစ်ကြောင်းဦးဆောင်သူကို ထောင် ၁၁ နှစ် အမိန့်ချ

၁၃ ဒီဇင်ဘာ ၂၀၂၁တာချီလိတ် ဝမ်ပုံရဲစခန်းက ရဲတပ်ကြပ်တစ်ဦး (KDF) နဲ့ ပူးပေါင်း

၁၃ ဒီဇင်ဘာ ၂၀၂၁စစ်ကိုင်းတိုင်းထဲမှာ အဖမ်းအဆီးများ ၊ သံဃာနဲ့ သတင်းထောက်အချို့ထပ်အဖမ်းခံရ

၁၃ ဒီဇင်ဘာ ၂၀၂၁ပေါင်မြို့နယ်ရဲ့စခန်းက အချုပ်သား ၁၇ ဦးမှာ ကိုဗစ်ပိုးတွေ့

၁၃ ဒီဇင်ဘာ ၂၀၂၁မြန်မာလူထုအတွက် အသက်ကယ်ဆယ်ရေးအကူအညီတွေကို စစ်တပ်က ပိတ်ဆို့နေတယ်လို့ HRW ပြောလာ

၁၃ ဒီဇင်ဘာ ၂၀၂၁ကိုးကန့်ဒေသမှာ MNDAA နဲ့ စစ်ကောင်စီတပ်တို့ နေရာအနှံ့တိုက်ပွဲဖြစ်

၁၃ ဒီဇင်ဘာ ၂၀၂၁မြန်မာမှာ အခွင့်အရေးချိုးဖောက်မှုတွေ မထင်ထားတဲ့နှုန်းနဲ့မြင့်တက်နေတယ်လို့ ကုလပြော

၁၃ ဒီဇင်ဘာ ၂၀၂၁ဒေါ်အောင်ဆန်းစုကြည် ရင်ဆိုင်နေရတဲ့ အမှုတွေထဲက သဘာဝဘေးစီမံအမှုကိုဒီကနေ့ စစ်ဆေးဖို့ရှိ

၁၂ ဒီဇင်ဘာ ၂၀၂၁မင်းတပ်က ခရစ်ယာန်ဓမ္မဆရာ တစ်ဦး အဖမ်းခံရ

၁၂ ဒီဇင်ဘာ ၂၀၂၁အမျိုးသမီးတွေကို ဖိနှိပ်ဖို့ မြန်မာစစ်တပ်က ဘယ်လို နှိပ်စက်သလဲ

၁၂ ဒီဇင်ဘာ ၂၀၂၁စစ်ရေးတင်းမာမှုဖြစ်ပြီး ပေါက်တောမြို့နယ်က ဆံတော်ရှင် ဘုရားပွဲတော်ရက် နောက်ဆုတ်

၁၂ ဒီဇင်ဘာ ၂၀၂၁မုံရွာ ယာကြီးလမ်းပေါ်မှာ စစ်ကောင်စီယာဥ်တန်း မိုင်းဆွဲတိုက်ခိုက်ခံရ

၁၂ ဒီဇင်ဘာ ၂၀၂၁မန္တလေးမှာ သေနတ်ပစ်ခံရလို့ တစ်ရက်တည်း ၃ ဦးသေဆုံး

၁၂ ဒီဇင်ဘာ ၂၀၂၁မန္တလေး-မူဆယ်လမ်းမှာ ကုန်စည်စစ်ဆေးရေးနေရာတွေ တိုးမယ်လို့ စစ်ကောင်စီပြော