ချင်းပြည်နယ်ကို စားနပ်ရိက္ခာ အထောက်အပံ့ပေးဖို့ အခက်အခဲတွေရှိနေတယ်လို့ ကုလ ထုတ်ပြန်
ချင်းပြည်နယ်အတွင်းပဋိပက္ခတွေကြောင့် စားနပ်ရိက္ခာများ ဖြတ်တောက်ခံထားရတဲ့ မိသားစုတွေကို ကုလသမဂ္ဂက လူသားချင်းစာနာမှုဆိုင်ရာ အထောက်အပံ့ကယ်ဆယ်ရေးပစ္စည်းများပေးပို့ရေးမှာ အခက်အခဲတွေရှိနေကြောင်း မြန်မာနိုင်ငံဆိုင်ရာ ကုလသမဂ္ဂက ဒီကနေ့ အောက်တိုဘာလ ၁၈ ရက်နေ့စွဲနဲ့ သတင်းထုတ်ပြန်ထားပါတယ်။
သြဂုတ်လအတွင်း ယူနီဆက်ဟာ မင်းတပ်မြို့ရှိ စစ်ရှောင်စခန်း ၁၀ ခုက နေရပ်စွန့်ခွာသူများထံကို ဖေဖော်ဝါရီလနောက်ပိုင်း ပထမဦးဆုံးအကြိမ်အဖြစ် အရေးပေါ်လူသားချင်းစာနာထောက်ထားရေး အကူအညီများ ပေးပို့နိုင်ခဲ့ပေမယ့်လည်း ချင်းပြည်နယ်ရှိနောက်ထပ်စစ်ဘေးရှောင်စခန်းများထံ အကူအညီများပေးနိုင်ရေးနဲ့ ဆက်လက်ဖြစ်ပေါနေတဲ့ အခက်အခဲတွေကြောင့် မရောက်ရှိနိုင်ခဲ့ကြောင်းလည်း ကုလသမဂ္ဂက ပြောပါတယ်၊
ပြီးခဲ့တဲ့ရက်ပိုင်းက ဘီဘီစီက မင်းတပ်မြို့ခံတစ်ဦးကိုဆက်သွယ်မေးမြန်းခဲ့ရာမှ ာမင်းတပ်မြို့ကစစ်ရှောင်တွေ စက်တင်ဘာလကစပြီး ဆန်ပြတ်လို့ ပြောင်းဖူးစားနေရကာ အာဟာရချို့တဲ့ပြီး သေဆုံးမှုတွေရှိနေကြောင်း မင်းတပ်မြို့စစ်ဘေးရှောင်စီမံခန့်ခွဲမူကော်မတီက ကိုလောရင်က ဘီဘီစီကို ပြောခဲ့ပါတယ်။
မင်းတပ်မြို့မှာ ပြီးခဲ့တဲ့ စက်တင်ဘာလလလယ် အောက်တိုဘာလကုန်လောက်က စပြီးတော့ ဆန်ပြတ်လာတာဖြစ်ပြီး ငွေရှိရင်တောင်ဝယ်မရဖြစ်နိုင်ကြောင်းလည်း သူကပြောခဲ့ပါတယ်။
လွန်ခဲ့တဲ့ တစ်ပတ်က ဆန်မရှိလို့ ပြောင်းဖူးစားနေတဲ့ စစ်ရှောင်မိသားစုတစ်စုက ကလေးငယ်တစ်ဦး ရောဂါမသိရဘဲ သေဆုံးသွားခဲ့ပြီး အသက်ကြီးပိုင်းအချို့လည်း အာဟာရ ပြတ်လို့ သေဆုံးမှုတွေရှိတယ်လို့ သူကပြောပါတယ်။
မင်းတပ်မြို့နယ်ထဲကကျေးရွာတွေမှာ စစ်ဘေးရှောင်နေကြတဲ့ ဒုက္ခသည် တစ်သောင်းခွဲကျော်ရှိပြီးတော့ စစ်ရှောင်တွေဟာ မင်းတပ်ကို ဝင်လာတဲ့ ရိက္ခာလမ်းကြောင်းတွေ ပိတ်ဆို့ခံရလို့ စားနပ်ရိက္ခာအခက်အခဲ ဖြစ်နေတာလို့ ပြောပါတယ်။
မင်းတပ်မြို့နယ်အတွင်းက တောင်ယာထဲမှာ မြို့ပေါ်က တိုက်ပွဲရှောင်ထွက်ပြေးလာသူ တစ်သောင်းကျော်နဲ့ ကျေးရွာနေဒေသခံ နှစ်သောင်းခွဲခန့်ဟာ စစ်ဘေးရှောင်နေရပြီး အင်တာနက်လိုင်းများပြတ်တောက်နေတာကလည်း တစ်လခန့်ရှိပြီဖြစ်တယ်လို့ သူတို့ကပြောပါတယ်။
မင်းတပ်ကို ကုလသမဂ္ဂကလာရောက်ပြီးစားနပ်ရိက္ခာဝေခဲ့တုန်းကလည်း မြို့ပေါ်မှာရှိတဲ့ စစ်ရှောင်စခန်းတွေပဲ အထောက်အပံ့ရခဲ့ပြီး ကျေးရွာက စစ်ရှောင်တွေအများစု မရခဲဘူးလို့ မင်းတပ်မြို့စစ်ဘေးရှောင်စီမံခန့်ခွဲမူကော်မတီက ကိုလောရင်က ပြောပါတယ်။