ကပေါင်းကျနဲ့လိပ်ခြံရွာမှာ သေနတ်ထိမှန်သေဆုံးထားတဲ့အလောင်းတွေဟာ ဒေသခံရွာသားတွေဖြစ်ကြောင်းမိသားစုဝင်တွေပြော

တိုက်ရိုက် ထုတ်လွှင့်ချက်

1. ၂၄ သြဂုတ် ၂၀၂၁လွိုင်ကော်မြို့အတွင်း ညမထွက်ရအမိန့်ထုတ်

   ကယားပြည်နယ်၊ လွိုင်ကော်မြို့မှာ စစ်ကောင်စီအုပ်ချုပ်ရေးအဖွဲ့က ဩဂုတ်လ ၂၄ရက်နေ့မှစပြီး ည(၈)နာရီနောက်ပိုင်း ည မထွက်ရ အမိန့်ထုတ်ပြန်ခဲ့တယ် လွိုင်ကော်ဒေသခံတစ်ဦးက ဘီဘီစီကို ပြောပါတယ်။

   ညမထွက်ရအမိန့်ကို ရပ်ကွက်နဲ့ မြို့တွင်းမှာ ကားနဲ့ လှည့်လည်ပြီး ကြေညာသွားတယ်လို့ သိရပါတယ်။

   ဘာကြောင့် ညမထွက်ရ အမိန့်ထုတ်တယ်ဆိုတာနဲ့ပတ်သက်လို့ စစ်ကောင်စီဘက်ကိုမေးလို့ မရသေးပါဘူး။

   လွိုင်ကော်မြို့အနီးမှာလည်း တိုက်ပွဲတွေ သြဂုတ်လ ၂၄ ရက်နေ့ ကကဖြစ်ပွားခဲ့တာရှိပြီး ညပိုင်းမှာပစ်ခတ်မှုတွေလည်း မကြာခဏ ဖြစ်နေကြောင်းလည်း ဒေသခံတွေကပြောပါတယ်။

   စစ်ကောင်စီဘက်က အရင်က ညမထွက်ရအမိန့်ထုတ်ပြန်ခြင်းမရှိခဲ့ပေမယ့်လည်း လွိုင်ကော်မြို့တွင်း ညအချိန်မှာ တွေ့ရှိတဲ့သူတွေကို သေနတ်ဖောက်ပြီး လိုက်လံပစ်တာတွေရှိခဲ့ပြီး ဒဏ်ရာရရှိသူတွေလည်း ရှိခဲ့တယ်လို့ သိရပါတယ်။

   သြဂုတ်လ ၂၄ ရက်နေ့မနက်ပိုင်းက လွိုင်ကော်မြို့နယ် ကုန်းဆွတ်နဲ့ ကျောက်ကြီးကျေးရွာများကြားမှာ တိုက်ပွဲဖြစ်ပွားခဲ့ပြီး အခုရက်ပိုင်း လွိုင်ကော်မြို့နယ် အရှေ့ဘက်ခြမ်းကျေးရွာတွေကို စစ်ကြောင်း ၃ ကြောင်းနဲ့ ထိုးစစ်ဆင်နေတယ်လို့လည်း ဒေသခံ လက်နက်ကိုင် အဖွဲ့တွေက ပြောပါတယ်။

2. ၂၄ သြဂုတ် ၂၀၂၁လှိုင်သာယာ တပ်မတော် အထည်ချုပ်စက်ရုံ တိုက်ခိုက်ခံရ

   သြဂုတ်လ ၂၃ ရက်နေ့ ည ၁၀ နာရီခန့်က လှိုင်သာယာ အမှတ် (၇)ရပ်ကွက်၊ ညောင်တုန်းလမ်းမကြီး၊ မီးခွက်ဈေး(၅)ထိပ်မှတ်တိုင်နှင့် စနေမမှတ်တိုင်ကြားရှိ တပ်မတော်အထည်ချုပ်စက်ရုံထဲမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေကို အဝေးထိန်းဗုံးနဲ့ တိုက်ခိုက်ခံခဲ့ရတယ်လို့ စနေမ မှတ်တိုင်အနီး နေထိုင်သူတစ်ဦးက ဘီဘီစီကိုပြောပါတယ်။

   တပ်မတော်အထည်ချုပ်စက်ရုံထဲက စစ်ကောင်စီတပ်ဖွဲ့ဝင်တွေ တပ်စွဲထားတဲ့နေရာအနီးကနေပြီးတော့ သြဂုတ်လ ၂၃ ရက် ည က ပိုင်းကျယ်လောင်သောပေါက်ကွဲသံကြီးကြားရကြောင်း အဲ့ဒီနောက်သေနတ်သံ အချက် ၂၀ ခန့်ကြားခဲ့ရတယ်လို့လည်းသူတို့ကပြောပါတယ်။

   ဒီတိုက်ခိုက်မှုကို လှိုင်သာယာမြို့ပြပြောက်ကျား အဖွဲ့က သူတို့ရဲ့တိုက်ခိုက်မှုဖြစ်ပြီး သြဂုတ်လ ၂၃ ရက် နေ့က သမိုင်းမြို့သစ်အနီးမှာ စစ်ကောင်စီဘက်က ပစ်ခတ်မှုတွေအတွက်လက်တုံ့ပြန်တာဖြစ်တယ်လို့လည်းထုတ်ပြန်ပါတယ်။

   ဒီတိုက်ခိုက်မှုကြောင့် စစ်ကောင်စီဘက်က ထိခိုက်ဒဏ်ရာရရှိသူတွေရှိတယ်လို့ လှိုင်သာယာမြို့ပြပြောက်ကျားဘက်က ထုတ်ပြန်ပေမယ့် စစ်ကောင်စီဘက်က သတင်းတစ်စုံတစ်ရာ ထုတ်ပြန်တာမျိုးမရှိသေးပါဘူး။

   ဒီကနေ့ သြဂုတ်လ ၂၄ ရက်နေ့မှာတော့ လှိုင်သာယာမြို့နယ်အတွင်းမှာ ဆိုင်ကယ်တွေကားတွေကို ရှာဖွေစစ်ဆေးတာတွေရှိနေတယ်လို့ ဒေသခံတွေက ပြောပါတယ်။

3. ၂၄ သြဂုတ် ၂၀၂၁အာဆီယံ အထူးကိုယ်စားလှယ်ကို NUG တွေ့ဆုံဖို့ အဆင်သင့်ရှိလို့ပြော

   မြန်မာနိုင်ငံဆိုင်ရာ အာဆီယံအထူးကိုယ်စားလှယ် ဘရူနိုင်းနိုင်ငံ၊ ဒုတိယနိုင်ငံခြားရေးဝန်ကြီး Erywan Yosuf နဲ့ NUG တရားဝင်ဆွေးနွေးနိုင်ခြင်းမရှိသေးပေမယ့် တွေ့ဆုံဖို့ အဆင်သင့်ရှိတယ်လို့ NUG အစိုးရနိုင်ငံခြားရေး ဒုဝန်ကြီး ဦးမိုးဇော်ဦးက ပြောပါတယ်။

   အာဆီယံအထူးကိုယ်စားလှယ် ဘရူနိုင်းနိုင်ငံ၊ကိုယ်စားလှယ်ဟာ အာဆီယံရဲ့ ဘုံသဘောတူညီချက် ၅ ခုအရ မြန်မာ့အရေးမှာ သက်ဆိုင်တဲ့သူတွေအားလုံးကို ထိတွေ့ပြောဆိုဖို့ဆိုတဲ့ အချက်လည်း ပါရှိပြီး အဲ့ဒီအချက်ကို စောင့်ကြည့်နေတယ်လို့လည်းသူကပြောပါတယ်။

   ကုလသမဂ္ဂအပါအဝင် နိုင်ငံတကာက အာဆီယံရဲ့ နည်းလမ်းနဲ့ မြန်မာ့အရေးမှာ ဖြေရှင်းဖို့ကို ထောက်ခံအားပေးတာတွေရှိပေမဲ့ အာဆီယံဟာ ထိထိရောက်ရောက် လုပ်ဆောင်နိုင်မယ်လို့ မမျှော်လင့်ကြောင်းလည်း သူကပြောပါတယ်။

   အာဆီယံအထူးကိုယ်စားလှယ်Erywan Yusof ဟာ နေပြည်တော်ကို ဇွန်လ တုန်းက လာရောက်ခဲ့ဖူးပြီး အာဏာသိမ်းထားပြီးတဲ့နောက် မြန်မာပြည်ကိုအစောဆုံး လာတဲ့ သံအဖွဲ့မှာ ပါခဲ့ပါတယ်။

   အာဆီယံအထူးကိုယ်စားလှယ်ဟာ ဒီရက်ပိုင်းမြန်မာနိုင်ငံ ကိုလာရောက်ဖို့ရှိပြီးတော့ သူရဲ့တွေ့ရှိချက်တွေကို မကြာခင်ကျင်းပမယ့် အာဆီယံနိုင်ငံခြားရေး ဝန်ကြီးများအစည်းအဝေး မှာတင်ပြဖို့ရှိပါတယ်။

4. ၂၄ သြဂုတ် ၂၀၂၁ရခိုင်မှာကိုဗစ်ကူးစက်မှုလျော့ကျလာလို့ ကျောင်းတွေအသင့်ပြင်ထားဖို့ ညွှန်ကြား

   ကိုဗစ် ကပ်ရောဂါကြောင့် ယာယီပိတ်ထားတဲ့ ရခိုင်ပြည်နယ်အတွင်းက အခြေခံပညာကျောင်းတွေကိုပြန်ဖွင့်တဲ့အခါ အဆင်သင့်ဖြစ်အောင် ပြင်ဆင်ထားကြဖို့ရခိုင်ပြည်နယ်ပညာရေးဌာနကနေ ဩဂုတ်လ ၂၄ ရက်မှာ ကျောင်းတွေအားလုံးကို ညွှန်ကြားထားတယ်လို့ သိရပါတယ်။

   အခုနှစ်အတွင်း တစ်နိုင်ငံလုံးအတိုင်းအတာနဲ့ ပြန်လည်ဖြစ်ပွားလာခဲ့တဲ့ ကိုဗစ် ၁၉ တတိယလှိုင်းကပ်ရောဂါကူးစက်မှု မြင့်မားလာနေတဲ့အချိန် ရောဂါထိန်းချုပ်နိုင်‌ရေးအတွက် ကျောင်းတွေကိုပြီးခဲ့တဲ့ ဇူလိုင်လ (၉) ရက်ကစတင်ပြီး ယာယီပိတ်ထားခဲ့တာဖြစ်ပါတယ်။

   ကိုဗစ်ဖြစ်ပွားမှုကျဆင်းလာနေတဲ့အတွက် ရခိုင်ပြည်နယ်အတွင်းကကျောင်းတွေကို ပြန်လည်ဖွင့်လှစ်ခဲ့လို့ရှိရင် ကလေးတွေကိုပညာသင်ကြားပေးနိုင်ရေးအတွက် အဆင်သင့်ပြင်ဆင်ထားဖို့ ကိုဗစ် ၁၉ ထိန်းချုပ်‌ရေးကော်မတီရဲ့ လမ်းညွန်ချက်အရ စာထုတ်ထားတာဖြစ်တယ်လို့ ရခိုင်ပြည်နယ်ပညာရေးမှူးရုံး ဒုတိယညွှန်ကြား‌ ရေးမှူး ဒေါက်တာထွန်းထွန်းသိန်းက ပြောပါတယ်။

   လက်ရှိမှာတော့ ကိုဗစ်ကပ်ရောဂါကြောင့် နိုင်ငံတဝန်းကျောင်းတွေကို ဩဂုတ်လ ၃၁ ရက်နေ့အထိပိတ်ထားပါတယ်။

   လတ်တလောမှာတော့ ရခိုင်ပြည်နယ်အတွင်း ကိုဗစ် ၁၉ ရောဂါကူးစက်ခံရမှု သိသိသာသာလျော့နည်းသွားပြီဖြစ်ပေမယ့် ရခိုင်တောင်ပိုင်း ဂွမြို့နယ်အတွင်းမှာတော့ မြင့်မားနေဆဲ ဖြစ်တာကြောင့် အဲ့ဒီမြို့နယ်ကို Stay at home လူတွေအပြင်မထွက်ရကာလအဖြစ် သတ်မှတ်ဖို့ အတွက် ရခိုင်ပြည်နယ်အစိုးရအဖွဲ့ မနေ့ကအစည်းအဝေးမှာ ဆုံးဖြတ်ခဲ့ကြတာဖြစ်ပါတယ်။

   ဂွမြို့နယ်အတွင်း ဩဂုတ်လ ၂၃ ရက် မနေ့ကစာရင်းအရ ရောဂါကူးစက်ခံရ သူအသစ် (၁၃) ဦးတွေ့ရှိခဲ့ပြီး တတိယလှိုင်းကာလအတွင်း ပိုးတွေ့လူနာပေါင်း (၆၅၇) ဦး၊ သေဆုံးသူပေါင်း( ၁၆) ဦးရှိကာ လက်ရှိဆေးကုသမှုခံယူနေရသူပေါင်း (၆၂) ဦးထိရှိနေသေးတယ်လို့ ရခိုင်ပြည်နယ် ပြည်သူ့ကျန်းမာရေးဌာနရဲ့ စာရင်းဇယားတွေအရ သိရပါတယ်။

   ရခိုင်တစ်ပြည်နယ်လုံးမှာတော့ ကိုဗစ်တတိယလှိုင်းအတွင်း ပိုးတွေ့လူနာအရေအတွက် (၃၈၃၀) ဦး သေဆုံးသူ (၃၆၇) ဦးထိရှိခဲ့ကာ ယခင်လတွေအတွင်းတစ်နေ့ကို လူဦးရေ (၁၂၀) ဝန်းကျင်အထိစစ်ဆေးတွေ့ရှိခဲ့ရာကနေ မနေ့ကစာရင်းမှာတော့ (၃၀) အောက်ထိ ပိုးတွေ့ရှိမှုပမာဏ သိသိသာသာကျဆင်းလာခဲ့ပြီလည်းဖြစ်ပါတယ်။

5. ၂၄ သြဂုတ် ၂၀၂၁ပုသိမ်မြို့လယ်က စစ်ကောင်စီတပ်စွဲရာနေရာမှာ ဗုံးပေါက်

   ဧရာဝတီတိုင်း၊ပုသိမ်မြို့လယ်က စစ်ကောင်စီတပ် ယာယီတပ်စွဲထားတဲ့နေရာမှာ သြဂုတ်လ ၂၄ ရက်နေ့ မနက် ၇ နာရီခွဲ ဝန်းကျင်က ဗုံးပေါက်ကွဲခဲ့တယ်လို့ ပုသိမ်ဒေသခံတွေက ပြောပါတယ်။

   ပေါက်ကွဲတဲ့နေရာဟာ ပုသိမ်မြို့ အမှတ် ၄ ရပ်ကွက် ရွှေစေတီလမ်းရှိ မြန်မာ့စီးပွားရေးဘဏ် (တိုင်းရုံး)နဲ့ တိုင်း ဆောက်လုပ်ရေးရုံးကြား က စစ်ကောင်စီတပ် ယာယီတပ်စွဲထားတဲ့ နေရာအနီးမှာ ဗုံးပေါက်ကွဲခဲ့တာဖြစ်တယ်လို့လည်း သူတို့က ပြောပါတယ်။

   ပေါက်ကွဲမှုအပြီး စစ်သားတွေ ရဲတွေရောက်လာပြီး လမ်းတွေကို ပိတ်ဆို့ စစ်ဆေး ကြတယ်လို့ မျက်မြင်တွေ့ရှိသူ တစ်ဦး ကပြောပါတယ်။

   ဗုံးကွဲပြီးနောက် အနည်းငယ် ဒဏ်ရာရရှိတယ်လို့ ယူဆရတဲ့ စစ်သား ၅ ဦးခန့် ကိုအဝေးက မြင်ရကြောင်း လည်းသူတို့က ပြောပါတယ်။

   ပုသိမ် မြို့ပြ ပြောက်ကျား တော်လှန်ရေးတပ်ဖွဲ့က ဒီတိုက်ခိုက်မှုဟာ ၎င်းတို့၏ ဖောက်ခွဲတိုက်ခိုက်မှု ဖြစ်ပြီး စစ်ကောင်စီရဲ့ တပ်သား ၄ ဦး ဒဏ် ရာများ ရရှိခဲ့ကြောင်း သတင်းထုတ်ပြန်ခဲ့ပေ့မဲ့လည်း စစ်ကောင်စီဘက်ကသတင်းထုတ်ပြန်တာ မရှိသေးပါဘူး။

   ပုသိမ် မြို့ပြပြောက်ကျား တော်လှန်ရေးတပ်ဖွဲ့ဟာ ပြီးခဲ့တဲ့ ဇူလိုင်လအတွင်းက ပုသိမ်တစ်ဖက်ကမ်း သင်္ဘောကျင်းရဲစခန်းနဲ့ ရဲတပ်ဖွဲ့မှူးရုံးတို့ကို ဗုံးနဲ့ပစ်ကာတိုက်ခိုက်ခဲ့တယ်လို့သတင်းထုတ်ပြန်ခဲ့ပါတယ်။

6. ၂၄ သြဂုတ် ၂၀၂၁ဖားကန့်မှာ အင်တာနက် ဖြတ်တောက်ခံထားရတာ (၄) ရက်ရှိပြီ, အွန်လိုင်းငွေလွှဲစနစ်တွေပါ ရပ်ထားရတဲ့အပြင် ဖုန်းဘေလ်ပါ ဖြည့်မရဖြစ်နေ

   ဖားကန့်မြို့နယ်မှာအင်တာနက်မရတာကြောင့် အွန်လိုင်းငွေလွှဲစနစ်တွေဖြစ်တဲ့ Wave Money နဲ့ K pay အသုံးပြုမှုရပ်ထားရသလို ဖုန်းဘေလ်ပါ ထည့်မရဖြစ်နေတယ်လို့ ဒေသခံတွေက ဘီဘီစီကို ပြောပါတယ်။

   ဒါ့အပြင် ဖားကန့်မြို့နယ်၊ လုံးခင်းဘက်က တချို့နေရာတွေမှာ လျှပ်စစ်မီးပါပြတ် တောက်နေတာ (၂)ရက်ခန့် ရှိပါပြီ။

   ဒါကြောင့် ဒေသခံတချို့ကတော့ ကုန်ခြောက်တွေဝယ်ယူစုဆောင်းနေတယ်လို့ ဆိုပါတယ်။

   “အခုဆို အင်တာနက်လည်းမရဘူး၊ ဖုန်းဘေလ်လည်းဖြည့်လို့မရဘူး။ အရင်တုန်းက သုံးခဲ့တဲ့ ဆော့စ်ဝဲလ်နဲ့ ဆိုင်ကနေသွားပြီးဖြည့်နေတယ်။ စီးပွားရေးလုပ်တဲ့သူတွေလည်း အင်တာနက်မရတော့အဆင်မပြေဘူးပေါ့။ တချို့တွေက လိုင်းနဲ့ပဲ ကျောက်လုပ်ကြတာလေ၊ ဗီဒီယိုခေါ်ပြီး၊ မက်ဆင်ဂျာကနေပို့ အဲ့လိုစီးပွားရေးလုပ်တဲ့ သူတွေလည်း အင်တာနက်ကို အားကိုးရတာ။ အင်တာနက်ကိုပဲအားကိုးနေရတော့ အခုလိုအင်တာနက်မရ တာက ခက်ခဲမှုတခုပဲဗျ”လို့ ဒေသခံလူငယ်တဦးက သူကြုံတွေ့နေရတဲ့အခြေအနေကို ပြောပါတယ်။

   မိုဘိုင်းလ်အင်တာနက်သာမက ဖုန်းလိုင်းတွေလည်း ဆက်သွယ်ရခက်ခဲနေတာပါ။ ဒီလိုဖြစ်နေတာကြောင့် ဖားကန့်ဒေသအတွင်း တိုက်ပွဲတွေဖြစ်လာနိုင်မလားလို့ စိုးရိမ်နေရကြောင်း ဖားကန်ပြည်သူတွေက ဘီဘီစီကို ပြောပါတယ်။

7. ၂၄ သြဂုတ် ၂၀၂၁မြိတ်၊ တနင်္သာရီနဲ့ ကျွန်းစုတို့မှာ ကိုဗစ်အဖြစ်များပြီး မြိတ်မြို့မှာသေဆုံးမှုအများဆုံးဖြစ်, ထားဝယ်မှာလည်း ကိုဗစ်နဲ့သေသူများတယ်လို့ နာကူအသင်းပြော

   မြိတ်ခရိုင်အတွင်းက မြို့နယ် (၄)မြို့နယ်အနက် မြိတ်၊ တနင်္သာရီနဲ့ ကျွန်းစုမြို့နယ်တို့မှာ ကိုဗစ်အဖြစ်များနေပြီး အထူးသဖြင့် မြိတ်မြို့နယ်မှာ ကိုဗစ်ကြောင့်သေဆုံးမှုများနေတယ်လို့ လူမှုကူညီရေး အသင်းတွေက ပြောပါတယ်။

   မြိတ်မြို့အတွင်း ဒီဩဂုတ်လဆန်းကစပြီး ပိုးတွေ့နှုန်းတက်လာကာ သေဆုံးနှုန်းပါ လိုက်တက်နေတာပါ။

   အခုဩဂုတ်နောက်ဆုံးအပတ်မှာဆိုရင် တရက်ကို (၁၀)‌ ယောက်ကျော် သေဆုံးနေပြီး သေဆုံးမှု မြင့်တက်နေပါတယ်။

   “ဆေးရုံမှာသေတာနဲ့ ရပ်ကွက်တွေထဲသေတာကို တဝက် တဝက်စီပဲ၊ ဆေးရုံမယ် လေးငါး‌ယောက်သေရင် ရပ်ကွက်တွေကလည်း လေးငါးယောက်သေနေတယ်။ ဒီရက်ပိုင်း ပိုးတွေ့နှုန်းက ကျလာသလိုရှိပေမယ့် သေနှုန်းကတော့ မကျသေးဘူး။ ရပ်ကွက်တွေထဲက အောက်ဆီဂျင်အခက်အခဲကြောင့် ဖြစ်တာများတယ်။ စေတနာ့ဝန်ထမ်းတွေလည်းမအားရဘူး၊ နေ့မအားညမအားလုပ်နေရတယ်။ သူတို့အားနဲ့အဓိက လုပ်နေရတယ်၊ နိုင်နိုင်နင်းနင်းတော့ရှိနေသေးတယ်”လို့ မိသားစုညီညွတ်ရေးအသင်းဥက္ကဋ္ဌက ဦးထွန်းဦးက ဘီဘီစီကို ပြောပါတယ်။

   ထားဝယ်အခြေအနေကိုဆက်ရရင်တော့ ဒီရက်ပိုင်းအတွင်း ကိုဗစ်ကြောင့် သေဆုံးနှုန်းလျော့လာပေမယ့် ဒီနေ့စဉ်သေဆုံးမှုထဲ ရပ်ကွက်တွေကနေသေဆုံးတာပိုများလာတယ်လို့ နာရေးကူညီမှု အသင်းတွေကဆိုပါတယ်။

   “ဇူလိုင်လကစပြီး တဖြည်းဖြည်း တရက်ကို (၂၅)လောင်းလောက် သေတဲ့အထိသင်္ဂြိုဟ်ရတာတွေရှိတယ်၊ ဒါပေမယ့် ဒီဩဂုတ်နောက်ဆုံးအပတ်တော့ သေနှုန်းလျော့တယ်ပြောရမယ်၊ တရက်ကို (၁၅)လောင်း ဝန်းကျင်ပဲရှိတယ်၊ ဒီနေ့ဆို (၉)လောင်းပဲရှိတယ်သင်္ဂြိုဟ်နေတာ။ ဒါပေမယ့် ဆေးရုံတွေကနေ ကိုဗစ်နဲ့ သေဆုံးသူနည်းပေမယ့် ရပ်ကွက်တွေဘက်ကနေ သေဆုံးတာပိုများလာတယ်။ ဆေးရုံက (၂)လောင်း လောက်ပဲရှိပေမယ့် ရပ်ကွက်ဘက်က (၆)လောင်း လောက်ရှိနေတာမျိုးပေါ့။ ကြက်စားပြင်၊ ဝဲကြောဘက်၊ အခြေခံလူတန်းစားများတဲ့ရပ်ကွက်တွေကနေသေဆုံးတာဒီရက်ပိုင်းများနေတယ်”လို့ နာရေးကူညီမှုအသင်း (ထားဝယ်) အတွင်းရေးမှူး ဦးအောင်နိုင်ဦးက ထားဝယ်ကိုဗစ်အခြေအနေကို ရှင်းပြပါတယ်။

   ကျန်းမာရေးဝန်ကြီးဌာနရဲ့တိုင်းနဲ့ပြည်နယ်အလိုက် ကိုဗစ်တွေ့ရှိမှု ဩဂုတ် (၂၂)ရက် အတွက် ထုတ်ပြန်ချက်အရတော့ ထားဝယ်မှာ ကိုဗစ်ကြောင့် သေဆုံးသူ (၃)ဦးနဲ့ မြိတ်မှာ သေဆုံးသူ (၂)ဦးသာရှိတယ်လို့ ဖော်ပြထားပါတယ်။

8. ၂၄ သြဂုတ် ၂၀၂၁မြန်မာ့ဒီမိုကရေစီအရေးမှာ အင်ဒိုပစိဖိတ်ဒေသနိုင်ငံတွေ ပူးပေါင်းပါဝင်ကြဖို့ အမေရိကန် ဒုသမ္မတ တိုက်တွန်း

   မြန်မာနိုင်ငံမှာ အာဏာသိမ်းစစ်ကောင်စီရဲ့ အကြမ်းဖက် နှိပ်ကွပ်နေမှုတွေကို အမေရိကန် ဒုတိယသမ္မတ ကာမလာ ဟယ်ရစ်စ် က ဒီကနေ့မှာ ရှုတ်ချပြောဆိုလိုက်ပြီး မြန်မာနိုင်ငံမှာ ဒီမိုကရေစီ ပြန်တည်ဆောက်နိုင်ရေး ကြိုးပမ်းမှုတွေမှာ အမေရိကန်အစိုးရနဲ့အတူ ပူးပေါင်းဆောင်ရွက်ကြဖို့ အင်ဒို ပစိဖိတ်ဒေသ အဖွဲ့ဝင်နိုင်ငံတွေကို တိုက်တွန်းလိုက်ပါတယ်။

   စင်္ကာပူမှာ မိန့်ခွန်းပြောကြားစဉ် ကာမလာ ဟဲရစ်စ်က မြန်မာနိုင်ငံမှာ စစ်တပ်က အာဏာသိမ်းခဲ့တာနဲ့ ပတ်သက်လို့ အမေရိကန်အစိုးရအနေနဲ့ အကြီးအကျယ် စိုးရိမ်နေဆဲပဲ လို့ ပြောသွားပါတယ်။

   "အကြမ်းဖက် နှိပ်ကွပ်နေမှုတွေကို ကျွန်မတို့ ရှုတ်ချပါတယ်၊ မြန်မာနိုင်ငံကို ဒီမိုကရေစီလမ်းကြောင်းပေါ် ပြန်ရောက်အောင် ကြိုးပမ်းနေကြသူတွေကို ကျွန်မတို့ ဆက်ထောက်ခံအားပေးသွားမှာပါ၊ အင်ဒို ပစိဖိတ်ဒေသ အဖွဲ့ဝင်နိုင်ငံတွေအနေနဲ့ ဒီကြိုးပမ်းဆောင်ရွက်မှုမှာ ကျွန်မတို့နဲ့အတူ ပူးပေါင်းပါဝင်ကြဖို့ မျှော်လင့်ပါတယ်" လို့ အမေရိကန် ဒုတိယသမ္မတ ကာမလာ ဟဲရစ်စ်က ပြောသွားပါတယ်။

   ကာမလာ ဟဲရစ်စ် ဟာ သူရဲ့ အရှေ့တောင်အာရှခရီးစဉ်အတွင်း ဒီကနေ့နှောင်းပိုင်းမှာ ဗီယက်နမ်နိုင်ငံကို သွားရောက်ဖို့ ရှိပါတယ်။

   ဒေါ်အောင်ဆန်းစုကြည် ဦးဆောင်တဲ့ ရွေးကောက်ခံ အစိုးရကို ဖြုတ်ချပြီး ဖေဖော်ဝါရီလ ၁ ရက်နေ့က စစ်တပ်က အာဏာသိမ်းခဲ့မှုအပေါ် အပြင်းထန်ဆုံး ထုတ်ဖော် ရှုတ်ချခဲ့သူတွေထဲမှာ အမေရိကန်သမ္မတ ဂျိုးဘိုင်ဒန် ရဲ့အစိုးရအဖွဲ့က ထိပ်ဆုံးက ပါဝင်ပါတယ်။

   မြန်မာ့အရေးကို ကြားဝင်ညှိနှိုင်းပေးဖို့ အာဆီယံ အဖွဲ့ဝင်နိုင်ငံတွေက ကြိုးပမ်းနေပေမယ့် လောလောဆယ် အောင်မြင်မှု မရသေးပါဘူး။ ဒီအတောအတွင်းမှာ အမေရိကန်၊ ဥရောပသမဂ္ဂ၊ ယူကေနဲ့ ကနေဒါတို့လို အနောက်အုပ်စု အင်အားကြီးနိုင်ငံတွေက အာဏာသိမ်း စစ်ကောင်စီကို စီးပွားရေး ဒဏ်ခတ်ပိတ်ဆို့မှုတွေ လုပ်ရင်း ဖိအားပေးဖို့ ကြိုးစားနေကြပါတယ်။ အနောက်အုပ်စုရဲ့ ဖယ်ကြဉ် ခံထားရတဲ့ မြန်မာ စစ်တပ်ဟာ ပြည်ပနိုင်ငံတွေထဲမှာ တရုတ်နဲ့ ရုရှားမှာပဲ ဖက်တွယ် ခြေကုပ်ယူထားတဲ့ပုံ တွေ့ရပါတယ်။

   အာဏာသိမ်းမှုကို ဆန့်ကျင်တဲ့ လမ်းမပေါ်ထွက် ဆန္ဒပြမှုတွေကို စစ်တပ်က အလွန်အမင်း အင်အားသုံး နှိမ်နင်းခဲ့မှုတွေအတွင်း အရပ်သား ၁၀၀၀ ကျော် သေဆုံးခဲ့ပြီး အတိုက်အခံ ၇၀၀၀ ကျော် ဖမ်းဆီး ထိန်းသိမ်းခံခဲ့ရတယ်လို့ နိုင်ငံရေး အကျဉ်းသားများ ကူညီစောင့်ရှောက်ရေးအသင်း AAPP ရဲ့ ကိန်းဂဏန်းအချက်အလက်တွေအရ သိရပါတယ်။

9. ၂၄ သြဂုတ် ၂၀၂၁မိုးကုတ်မြေပြိုမှု သေဆုံးသူ ၈ ဦး ရုပ်အလောင်းတွေ့၊ ပျောက်ဆုံးသူတွေကို ဆက်ရှာနေ

   မိုးကုတ်မြို့မှာ သြဂုတ်လ ၂၄ ရက်နေ့ မြေပြိုမှုကြောင့် သေဆုံးသူ ရုပ်အလောင်း ၈ လောင်း ရှာဖွေတွေရှိခဲ့ပြီးဖြစ်တယ်လို့ မြေပြိုမှုမှာ အကူအညီပေးနေတဲ့ လောကဟိတ လူမှုကူညီရေးအသင်းက ဘီဘီစီကို ပြောပါတယ်။

   သြဂုတ်လ ၂၄ ရက်နေ့ မိုးကုတ် အောင်သစ်လွင်ရပ်ကွက်မှာ မနက် ၆ နာရီ ၃၀မိနစ်က မြေပြိုတဲ့ဖြစ်စဉ်ကြောင့် သေဆုံးခဲ့သူ ၃ ဦးကို မနက် ၇ နာရီကျော်မှာ ရှာဖွေတွေ့ရှိခဲ့ပြီး လောကဟိတ လူမှုကူညီရေးအသင်းယာဉ်နဲ့ မိုးကုတ်မြို့နယ်ပြည်သူ့ဆေးရုံကို ပို့ဆောင်ပေးခဲ့ပြီး ရှာဖွေကယ်ဆယ်ရေးလုပ်ငန်းများ ဆက်လက်ဆောင်ရွက်လျက်ရှိတယ်လို့လည်း မြန်မာနိုင်ငံ မီးသတ်တပ်ဖွဲ့က သတင်းထုတ်ပြန်ခဲ့ပါတယ်။

   မနက်ပိုင်းက သေဆုံးသူ အမျိုးသမီး ၃ ဦးအလောင်းရှာဖွေတွေရှိခဲ့ပြီးနောက် နောက်ထပ်သေဆုံးသူ ရုပ်အလောင်း ၅ အလောင်းကို ထပ်မံ ရှာဖွေတွေ့ရှိခဲ့ကြောင်း နောက်ထပ်ရှာဖွေတွေ့ရှိသူ ၅ ဦးတို့မှာ အမျိုးသား ၃ ဦး အမျိုးသမီး တစ်ဦးနဲ့ ကလေးငယ်တစ်ဦးတို့ဖြစ်တယ်လို့လည်း လောကဟိတ လူမှုကူညီရေးအသင်းကပြောပါတယ်။

   ပျောက်ဆုံးနေသူ ၁၁ ဦး ရှိပြီး ရုပ်အလောင်း ၈ လောင်း ရှာဖွေတွေရှိခဲ့ပြီးဖြကြောင်းနဲ့ ရှာဖွေကယ်ဆယ်ရေးလုပ်ငန်းတွေဆက်လုပ်နေတယ်လို့ လည်း မိုးကုတ်မြို့ခံတွေက ပြောပါတယ်။

   လက်ရှိ မြေပြိုမှုဖြစ်စဉ်နေရာဟာ မြေပျော့နေရာဖြစ်တယ်လို့ ဒေသခံတချို့က ပြောပါတယ်။ မိုးကုတ်မြို့မှာ နှစ်စဉ် ဩဂုတ်လရောက်ပြီး မိုးများရင် မြေပြိုမှုဖြစ်စဉ်တချို့ ဖြစ်ပေါ်လေ့ရှိတယ်လို့ ဆိုပါတယ်။ ပြီးခဲ့တဲ့ ရက်ပိုင်းက မိုးရွာသွန်းတာ ရေကြီးမြေပြိုတာ၊ ကျောက်တွင်း ပြိုကျတာတွေကြောင့် လူသေဆုံးမှုတွေ ရှိခဲ့ပါတယ်။

10. ၂၄ သြဂုတ် ၂၀၂၁PDF တွေကို လက်နက်ချဖို့ရပ်ကွက်တွေထဲမှာလိုက်လံဆော်သြနေ, သတင်းပေးသူကို ဆုငွေချီးမြှင့်မယ်လို့ ကြေညာတာတွေလည်းရှိလာ

    ဒေသကာကွယ်ရေးတပ်တွေကို လက်နက်ချဖို့အတွက် စစ်ကောင်စီဘက်က ရပ်ကွက်တွေအတွင်းမှာ ကားနဲ့ လှည့်လှည်ကြေညာတာတွေ၊ သတင်းပေးသူတွေကို ဆုငွေချီးမြှင့်မယ်ဆိုတဲ့ကြော်ငြာစာရွက်တွေ ကပ်လာတာ ရှိနေတယ်လို့ ဒေသခံတွေက ပြောပါတယ်။

    " ရေဦးမြို့နယ်မှာတော့ မြို့နယ်စည်ပင်ရုံးရှေ့မှာကပ်သွားတာ။ လာကပ်တာတော့ မနက် ၉နာရီလောက်က စစ်ကား၊ ရဲကား ၃စီးနဲ့ လာကပ်သွားတာပါ။ စည်ပင်ရုံးက သူတို့ကပ်တာ မဟုတ်ဘူးလို့ငြင်းထားတယ်။ ဆိုင်းဘုတ်က ရုံးအပြင်က ကြော်ငြာဆိုင်းဘုတ်မှာ လာ ကပ်တာ။ အခုစည်ပင်က အဲ့ဒီဘုတ်ပါသိမ်းသွားပြီ။ သူတို့လည်းကြောက်လို့ အမှိုက်တောင်ထွက်မပစ်ရဲကြတော့ဘူး" လို့ဒေသခံတစ်ဦးက ဘီဘီစီကိုပြောပါတယ်။

    ဒီကြေငြာစာရွက်ထဲမှာတော့ NLD ပါတီအနေနဲ့၂ဝ၂ဝ ရွေးကောက်ပွဲမှာ မဲမသမာမှုများ ရှိကြောင်း၊ PDF အဖွဲ့တွေအနေနဲ့ တိုင်းပြည်အေးချမ်းမှုမရှိအောင် လုပ်ဆောင်နေတဲ့ လုပ်ရပ်တွေကိုရပ်ဖို့နဲ့ လက်နက်ချဖို့ စတာတွေအပြင် PDF တွေအကြောင်း သတင်းပေးပို့ ရင် ဆုငွေချီးမြှင့်မယ်ဆိုတဲ့အချက်တွေ ပါဝင်တယ်လို့ ရေဦးဒေသခံတွေက ပြောပါတယ်။

    ဒီကြော်ငြာစာရွက်တွေကို ရေဦးမြို့နယ်စည်ပင်ရုံးအပြင် လမ်းဘေးဓာတ်တိုင်တွေမှာပါ ကပ်ထားကြောင်း တခြားတိုင်းဒေသကြီးတချို့ကမြို့နယ်တွေမှာလည်း စာရွက်တွေ ကပ်ပြီး အခုလိုကြေညာတဲ့ဖြစ်စဉ်ရှိကြောင်းလည်း ရွှေဘိုမြို့နယ်ထဲက ဝက်လက်ဒေသခံ တစ်ဦးက ပြောပါတယ်။

    ဒါ့အပြင်ရန်ကုန်တိုင်းဒေသကြီးအတွင်းမှာလည်း ဒီကြေညာချက်မှာ ပါဝင်တဲ့အချက် အလက်တချို့ကိုစစ်ကောင်စီတပ်ဖွဲ့ဝင်တွေက ကားနဲ့လှည့်လည်ပြီး အသံချဲ့စက်နဲ့ ကြေညာတာရှိတယ်လို့လည်း ရပ်ကွက်နေပြည်သူ တချို့ရဲ့ပြောပြချက်အရသိရပါတယ်။

11. ၂၄ သြဂုတ် ၂၀၂၁ကချင်ပြည်နယ်ဝန်ကြီးချုပ် ဒေါက်တာခက်အောင်ဟာ အဂတိကျူးလွန်တာတွေမရှိဘူးလို့ မိသားစုဘက်က တုံ့ပြန်ပြော

    မနေ့ဩဂုတ် (၂၃)ရက်တုန်းက ကချင်ပြည်နယ်၊ မြစ်ကြီးနားမြို့မရဲစခန်းမှာ အဂတိလိုက်စာမှုတိုက်ဖျက်ရေး ဥပဒေပုဒ်မ (၅၅)နဲ့ ပြည်နယ်ဝန်ကြီးချုပ် ဒေါက်တာခက်အောင်ကို တရားစွဲဆိုလိုက်တယ်လို့ စစ်ကောင်စီ ထိန်းချုပ်ထားတဲ့ သတင်းစာမှာ ဖော်ပြထားပါတယ်။ဝန်ကြီးချုပ်အပါအဝင် ဝန်ကြီး (၇)ဦးနဲ့ စည်ပင်ကညွှန်မှူး တဦးကိုပါ အမှုတွဲပြီး အဂတိဥပဒေနဲ့ စစ်ကောင်စီ ဘက်က ထပ်တိုးတရားစွဲလိုက်တာဖြစ်ပါတယ်။ဒါကြောင့် ကချင်ပြည်နယ်ဝန်ကြီးချုပ် ဒေါက်တာခက်အောင်ဟာ အဂတိကျူးလွန်တာတွေ မလုပ်ဘူးလို့ မိသားစုဘက်က တုံ့ပြန်ပြောကြားလိုက်ပါတယ်။

    “အခုလိုဖြစ်တယ်ဆိုတာကို အန်တီတို့ ဘာမှမသိဘူး၊ သူများပြောလို့တော့သိရတယ်။ ဘယ်လိုမှလည်း အန်တီတို့အနေနဲ့ပြောလို့တော့ မတတ်တော့ဘူး။ တတိုင်းတပြည်လုံးအနေအထားနဲ့ဆိုတော့ ဘယ်လို ပြောလို့ ပြောရမှန်းမသိတော့တဲ့ အဆင့်မျိုးဖြစ်နေတာ။ တာဝန်ထမ်းဆောင်တဲ့ အချိန်မှာလည်း အဂတိတွေ ဘာတွေလည်းမရှိအောင်အတတ်နိုင်ဆုံးကြိုးစားခဲ့တယ်။ အဲ့တော့ အဂတိလုပ်တာတွေမရှိဘူးလို့ မိသားစုကတော့ခံယူထားတယ်။”လို့ ဒေါက်တာခက်အောင်ရဲ့ ဇနီးဖြစ်သူ ဒေါက်တာဂျေကော့ဘူက ဘီဘီစီကိုပြောပါတယ်။

    လက်ရှိမှာ ဒေါက်တာခက်အောင်ကို မတ်၊ ဧပြီလတွေတုန်းက တရားရုံးချိန်းတိုင်း မိသားစုနဲ့ တွေ့ခွင့်ရခဲ့ပေမယ့် နောက်ပိုင်းအကျဉ်းထောင်ထဲရောက်ပြီးနောက်အခုချိန်ထိ မိသားစုနဲ့ တွေ့ခွင့် မရသေးပါဘူး။ ဒါပေမယ့် ကျန်းမာရေးကောင်းတယ်လို့တော့ ထောင်ဝင်စာပို့ရင်း သိရတယ်လို့ ဇနီးဖြစ်သူက ဆက်ပြောပါသေးတယ်။

    အရပ်သားအစိုးရလက်ထက်က ကချင်ပြည်နယ်ဝန်ကြီးချုပ် ဒေါက်တာခက်အောင်နဲ့တာဝန်ရှိသူတွေဟာ တင်ဒါခေါ်ယူတာမရှိဘဲ ဆောင်ရွက်တာတွေကြောင့် နိုင်ငံတော်ရဲ့ငွေကြေးပစ္စည်းတွေနစ်နာတယ်၊ သလင်းကျောက်ရောင်းရာမှာ လည်း သတ္တုတွင်းဦးစီးဌာနရဲ့ သတ်မှတ်ချက်ထက် လျော့နည်းပြီး ရောင်းချတာတွေ၊ ပြည်နယ်အထွေထွေ ပိုလျှံရန်ပုံငွေတွေကို ဘဏ္ဍာရေးစည်းမျဉ်း စည်းကမ်းနဲ့မကိုက်ညီဘဲ သုံးစွဲတာကြောင့် နိုင်ငံတော်ဘဏ္ဍာငွေ သန်းရာနဲ့ချီ ဆုံးရှုံးတယ်လို့ စွပ်စွဲထားပါတယ်။

12. ၂၄ သြဂုတ် ၂၀၂၁ရန်ကုန်မြို့တွင်းရှိမြို့နယ်တွေမှာ ညစဥ်ဆက်တိုက် စစ်ဆေးဖမ်းဆီးမှုတွေပြုလုပ်နေ

    ရန်ကုန်မြို့၊ စမ်းချောင်းမြို့နယ်အတွင်းမှာရှိတဲ့ရပ်ကွက်တွေမှာ ညစဥ်လိုလို နေအိမ်တွေထဲ ၀င်ရောက်စစ်ဆေးဖမ်းဆီးတာတွေရှိနေတယ်လို့ ရပ်ကွက်နေပြည်သူတွေက​ဆိုပါတယ်။

    ဒီလိုစစ်ဆေးမှုတွေလုပ်ရာမှာတော့ဧည့်စာရင်းစစ်တယ်ဆိုတဲ့ပြောဆိုချက်နဲ့ ၀င်ရောက်တာဖြစ်ပြီး နေအိမ်တွေအတွင်းလူရှာတာအပြင်အိမ်သုံးပစ္စည်းတချို့ကိုပါ ဖွင့်ဖောက်ရှာဖွေတာတွေပြုလုပ်တယ်လို့ အစစ်အဆေးခံရတဲ့ အိမ်တွေကပြောဆိုကြပါတယ်။

    "ကျွန်တော်တို့အိမ်ထဲကို၀င်ရှာတာဆိုရင်၊ ဧည့်စာရင်းရှိလား၊ သန်းခေါင်စာရင်းရှိလားမေးတယ်။ မရှိဘူးမတိုင်ထားဘူးဆိုတော့၊ အိမ်ထဲက အိတ်အမည်းတွေဖွင့်ရှာတယ်။ ကျွန်တော်တို့လမ်းဆိုရင်၊ နိုင်ငံရေးလုပ်တဲ့သူတွေနဲ့အလှမ်းဝေးပါတယ်။ အဓိကက စမ်းချောင်းထဲမှာ၊ PDFသင်တန်းဆင်း တွေရှိတယ်ဆိုပြီးညတိုင်း၀င်ရှာနေတာ၊ ညတိုင်းလဲလူငယ်တွေအဖမ်းခံရတယ်။ လူငယ်တွေ စုနေတယ်ဆိုတာနဲ့တင်ဖမ်းတဲ့ပုံစံဖြစ်နေတယ်။ တချို့လည်းနောက်တနေ့မနက်ပြန်လွတ်တယ်။တချို့လည်းမလွတ်ဘူး"လို့စမ်းချောင်းမြို့နယ်အတွင်းနေထိုင်သူတစ်ဦးက ဘီဘီစီကိုပြောပါတယ်။

    ဒီလိုရပ်ကွက်တွေအတွင်းစစ်ဆေးမှုတွေလုပ်တဲ့နေရာမှာစစ်ကောင်စီအင်အားအများအပြားသုံး တာကိုတွေ့ရပြီး နေအိမ်တချို့ကို အိမ်တံခါးတွေဖျက်ပြီး ၀င်ရောက်စစ်ဆေးတာ တွေပြုလုပ်တယ်လို့စမ်းချောင်းမြို့နယ်အတွင်းနေထိုင်သူတွေကပြောပါတယ်။အခုလိုစစ်ဆေးဖမ်းဆီးမှုတွေဟာဆိုရင် စမ်းချောင်းမြို့နယ်၊ လှိုင်မြို့နယ်၊ သာကေတမြို့နယ်နဲ့ လှိုင်သာယာမြို့နယ်တွေမှာအများဆုံးပြုလုပ် နေတာဖြစ်ပြီး ရန်ကုန်တိုင်းဒေသကြီးအတွင်းက မြို့နယ်တော်တော်များများမှာ ခပ်စိပ်စိပ်ပြုလုပ်လာတာဖြစ်တယ်လို့ရပ်ကွက်အတွင်းနေထိုင်သူတွေကပြောဆိုကြပါတယ်။

    ဒါ့အပြင်မြို့နယ်ရပ်ကွက်တွေအတွင်း ဖြစ်ပေါ်နေတဲ့ ပေါက်ကွဲမှု၊ ပစ်ခတ်မှုဖြစ်ဥ်တွေအပြီးမှာလည်း ရပ်ကွက်တွေအတွင်း အင်အားသုံး စစ်ဆေးမှုတွေ၊ ဖမ်းဆီးတာတွေရှိနေပြီး လူငယ်တွေကို ပစ်မှတ်ထားနေတာဖြစ်လို့ စစ်အာရှင်ဆန့်ကျင်ရေးမှာမပါ၀င်ပေမယ့်လည်းစုပေါင်းနေထိုင်တဲ့ လူငယ်တချို့ဟာ နေအိမ်တွေကတိမ်းရှောင်နေထိုင်နေရတယ်လို့ စမ်းချောင်းမြို့နယ်အတွင်းနေထိုင်တဲ့လူငယ်တချို့ကပြောပါတယ်။

    ပြီးခဲ့တဲ့ သြဂုတ်လ ၂၃ရက်နေ့မှာလည်း ရန်ကုန်မြို့ကသမိုင်းမြို့သစ်၊ ရွှေဝါထွန်းလမ်းထဲမှာ စစ်ကောင်စီတပ်ဖွဲ့တွေက ၀င်ရောက်ရှာဖွေဖမ်းဆီးမှုတွေလုပ်ရင်း အပြန်ပစ်ခတ်မှုဖြစ်ပွားကာလူငယ်တချို့ဖမ်းဆီးခံခဲ့ရတယိလို့ ရပ်ကွက်အတွင်းနေထိုင်သူတွေရဲ့ပြောပြချက်အရသိရပါတယ်။

13. ၂၄ သြဂုတ် ၂၀၂၁ကချင်ပြည်နယ်ဝန်ကြီးချုပ် ဒေါက်တာခက်‌အောင်အပါအဝင် (၈)ဦးကို အဂတိလိုက်စားမှုတိုက်ဖျက်ရေး ဥပဒေနဲ့အမှုဖွင့်

    ကချင်ပြည်နယ်ဝန်ကြီးချုပ် ဒေါက်တာခက်အောင်၊ ပြည်နယ်ဝန်ကြီးတွေဖြစ်တဲ့ ဘဏ္ဍာ၊ အခွန်၊ စီမံကိန်းနှင့် စီးပွားရေးဝန်ကြီး ဦးဝေလင်း၊ လမ်းပန်း ဆက်သွယ် ရေး၊ လျှပ်စစ်နှင့် စက်မှုလက်မှုဝန်ကြီး ဦးဝင်းညွန့်၊ သယံဇာတနှင့် သဘာဝပတ်ဝန်း ကျင်ထိန်းသိမ်း‌ရေးဝန်ကြီး ဦးလဆိုင်း (ခ) ဦးဒါရှီလဆိုင်း၊ စည်ပင်သာယာ ရေးဝန်ကြီး ဦးနော်လီ (ခ) ဇခေါင်ခမ်းရယ်၊ လူဝင်မှုကြီးကြပ်ရေးနှင့် လူ့စွမ်းအား အရင်းအမြစ် ဝန်ကြီး ဦးဇော်ဝင်း၊ စည်ပင်သာယာရေးနှင့် လူမှုရေးဝန်ကြီး ဦးနေဝင်းတို့ကို အဂတိလိုက်စားမှု တိုက်ဖျက်ရေးဥပဒေ ပုဒ်မ (၅၅)နဲ့ စစ်ကောင်စီဘက်က တရားစွဲလိုက်တာပါ။

    ဆက်ပြီး ပြည်နယ်စည်ပင် သာယာရေးအဖွဲ့ ညွှန်ကြားရေးမှူး ဦးစိုးနိုင်ကို အဂတိလိုက်စားမှု တိုက်ဖျက်ရေးဥပဒေပုဒ်မ (၅၆)နဲ့ တရားစွဲထားပါသေးတယ်။

    ဝန်ကြီးချုပ်အပါအဝင် (၈)ဦးကို ကချင်ပြည်နယ်၊ မြစ်ကြီးနားမြို့ရဲစခန်းမှာ စစ်ကောင်စီဘက်ကဩဂုတ် (၂၃)ရက်နေ့က တိုင်ချက်ဖွင့်ခဲ့တာပါ။

    အရပ်သားအစိုးရလက်ထက်က ကချင်ပြည်နယ်ဝန်ကြီးချုပ်နဲ့တာဝန်ရှိသူတွေဟာ တင်ဒါခေါ်ယူတာမရှိဘဲ ဆောင်ရွက်တာတွေကြောင့် နိုင်ငံတော်ရဲ့ငွေကြေး ပစ္စည်းတွေနစ်နာတာ၊ သလင်းကျောက်ရောင်းရာမှာလည်း သတ္တုတွင်းဦးစီးဌာနရဲ့ သတ်မှတ်ချက်ထက် လျော့နည်းပြီး ရောင်းချတာတွေ၊ ပြည်နယ်အထွေထွေ ပိုလျှံရန်ပုံငွေတွေကို ဘဏ္ဍာရေးစည်းမျဉ်း စည်းကမ်းနဲ့ မကိုက်ညီဘဲ သုံးစွဲတာကြောင့် နိုင်ငံတော်ဘဏ္ဍာငွေ သန်းရာနဲ့ချီ ဆုံးရှုံးတယ်လို့ စွပ်စွဲထားပါတယ်။

    ဒီဩဂုတ်လထဲမှာ ရန်ကုန်တိုင်းဝန်ကြီးချုပ် ဦးဖြိုးမင်းသိန်းကလွဲလို့ ကျန်တိုင်းနဲ့ ပြည်နယ်အသီးသီးက ဝန်ကြီးချုပ်နဲ့ သက်ဆိုင်ရာဝန်ကြီးတွေကို အဂတိပုဒ်မတွေနဲ့ စစ်ကောင်စီဘက်က တရားစွဲဆိုလာတာကို သိသိသာသာတွေ့လာရပါတယ်။

    ဇွန်လဆန်းပိုင်းကစပြီး အစောဆုံးအဖြစ် နိုင်ငံတော်အတိုင်ပင်ခံ ဒေါ်‌အောင်ဆန်း စုကြည်အပါအဝင် နေပြည်တော်မြို့တော်ဝန် ဒေါက်တာမျိုးအောင်၊ ဒုမြို့တော်ဝန် ဦးရဲမင်းဦးတို့ကို အဂတိအမှုနဲ့ တရားစွဲပြီးနောက်ပိုင်း ဆက်တိုက်ဆိုသလို ဒီဥပဒေနဲ့ တရားစွဲလာခဲ့တာပါ။

    အထူးသဖြင့် နေပြည်တော်ဒုမြို့တော်ဝန် ဦးရဲမင်းဦးတစ်ဦးတည်းကို ဒီအဂတိလိုက်စားမှုဥပဒေနဲ့ သုံးကြိမ်တိတိ တရားစွဲဆိုထားပြီးဖြစ်ပါတယ်။

    ဒီလို ပုဒ်မတခုတည်းနဲ့ အကြိမ်ကြိမ်တရားစွဲတာကြောင့် စွပ်စွဲခံရသူတွေမှာ နစ်နာမှုရှိနေပြီး အမှုတွေကို စုပေါင်းပြီးတရားရင်ဆိုင်ခွင့်ရ‌အောင်လျှောက်လဲဖို့ အခွင့်အရေးရှိတယ်လို့ ဥပဒေအသိုင်းအဝိုင်းက ‌ထောက်ပြထားပါတယ်။

14. ၂၄ သြဂုတ် ၂၀၂၁မိုးကုတ်မှာ ဒီမနက် မြေထပ်ပြို၊ လူသေဆုံးမှုရှိ, ပျောက်ဆုံးသူတွေကိုလည်း ဆက်လက်ရှာဖွေနေ

    မန္တလေးတိုင်း မိုးကုတ်မြို့ အနောက်ပိုင်းမှာ မြေပြိုမှု ဖြစ်ပွားလို့ လူသေဆုံးမှု တွေရှိခဲ့တယ်လို့ မိုးကုတ်မြို့ လူမှုကူညီကယ်ဆယ်ရေးအသင်းက ပြောပါတယ်။

    "(မနက်)၆ နာရီခွဲ ဖုန်းဝင်တယ်။ လောလောဆယ် သုံးလောင်းတော့ ရှာတွေ့ထားတယ်။ မြေပြိုတယ်။ အိမ် ခုနစ်အိမ်လောက်ပါသွားတယ်။ မိသားစုဝင်တွေ ၁၁ယောက်ရှိတယ်လို့ ပြောတယ်။ လက်ရှိထိရှာဖွေဆဲ အခြေအနေပါ"လို့ မြန်မာနိုင်ငံ လူမှုကယ်ဆယ်ရေးအဖွဲ့ (မိုးကုတ်မြို့ ) က တာဝန်ရှိသူတစ်ဦးက ပြောပါတယ်။

    ဩဂုတ်(၂၄) ရက် မနက်ပိုင်းက မိုးကုတ်မြို့ အနောက်ပိုင်း အောင်သစ်လွင် ရပ်ကွက်မှာ မြေပြိုမှု ဖြစ်ပွားခဲ့လို့ လူ ၁၀ ဦးထက်မနည်း ပိတ်မိနေ တာဖြစ်ပါတယ်။ မိုးကုတ်မြို့မှာ ဩဂုတ်လအတွင်း နေ့စဉ်နီးပါး မိုးရွာသွန်းမှုများခဲ့ပါတယ်။

    လက်ရှိ မြေပြိုမှုဖြစ်စဉ်နေရာဟာ မြေပျော့နေရာဖြစ်တယ်လို့ ဒေသခံတချို့က ပြောပါတယ်။ မိုးကုတ်မြို့မှာ နှစ်စဉ် ဩဂုတ်လရောက်ပြီး မိုးများရင် မြေပြိုမှုဖြစ်စဉ်တချို့ ဖြစ်ပေါ်လေ့ရှိတယ်လို့ ဆိုပါတယ်။ ပြီးခဲ့တဲ့ ရက်ပိုင်းက မိုးရွာသွန်းတာ ရေကြီးမြေပြိုတာ၊ ကျောက်တွင်း ပြိုကျတာတွေကြောင့် လူသေဆုံးမှုတွေ ရှိခဲ့ပါတယ်။

15. ၂၃ သြဂုတ် ၂၀၂၁မင်္ဂလာဒုံ ပြည်သူ့လွှတ်တော်ကိုယ်စားလှယ် ဒေါ်ခင်မြတ်သူနဲ့ NLD ပါတီဝင် ၃၀ နီးပါးအဖမ်းခံရ

    မင်္ဂလာဒုံမြို့နယ် NLD ပြည်သူ့လွှတ်တော်ကိုယ်စားလှယ် ဒေါ်ခင်မြတ်သူဟာဩဂုတ်လ ၂၁ ရက်နေ့ စနေနေ့ ညနေပိုင်းက ဖမ်းဆီးခံရတယ်လို့ ဗဟန်းမြို့နယ်ပြည်သူ့ လွှတ်တော်ကိုယ်စားလှယ် ဦးထွန်းမြင့်က ဘီဘီစီကို အတည်ပြုပြောပါတယ်။

    ဩဂုတ်လ ၂၁ရက်နေ့ နေ့လယ် ၃နာရီလောက်မှာ NLD ပါတီဝင် ကိုအေးမင်းစိုးနဲ့ ကိုဇော်လင်းတို့ အရင်ဆုံးအဖမ်းခံရတယ်လို့ သတင်းရပြီး၊ အဲ့ဒီသတင်းရဲ့ နောက်ဆက်တွဲမှာပဲ ဒေါ်ခင်မြတ်သူနဲ့ သူ့ခင်ပွန်း ကိုထိန်ဝင်း‌တို့နေထိုင်နေတဲ့ တိုက်ကြီးမြို့က အိမ်ရှေ့ကို ထောက်လှမ်းရေးတွေ ဆိုင်ကယ်နဲ့ ရောက်လာကြောင်း သူ့ခင်ပွန်းနဲ့ သူတို့ကားနဲ့ ရှောင်တိမ်းဖို့ ကြိုးစားရင်းလမ်းမှာ ပိတ်အဖမ်းခံရတယ်လို့ သိ‌ရကြောင်း ဦးထွန်းမြင့်က ပြောပါတယ်။

    ဒေါ်ခင်မြတ်သူ အဖမ်းခံရပြီးနောက် ဆက်စပ်ပြီးတော့ တိုက်ကြီးက မိသားစု ၃စုနဲ့ ပေါက်ကုန်းရပ်ကွက် NLD အတွင်းရေးမှူးလည်း ထပ်အဖမ်းခံရကြောင်း။ NLD ရုံးချုပ်ရှေ့မှာ အထိမ်းအမှတ် ပစ္စည်းတွေရောင်းနေတဲ့ မဥမ္မာ၊ တောင်ဒဂုံက ကိုညီညီမင်းနဲ့ညီမ ၂ယောက် အပါအဝင် စုစုပေါင်း အယောက် ၃၀လောက် အဖမ်းခံရတယ်လို့ သိရပြီး ဘယ်ကိစ္စ ဘာအတွက်ကြောင့် ဖမ်းထားတယ် ဘယ်မှာဖမ်းဆီးထားတယ်ဆိုတာ မသိရဘူးလို့ သူကပြောပါတယ်။

    အခုလို ဖမ်းဆီးမှုတွေနဲ့ပတ်သက်ပြီး စစ်ကောင်စီဘက်က သတင်းထုတ်ပြန်ခြင်းမရှိသေးပါဘူး။

    ဒေါ်ခင်မြတ်သူက NLD မြောက်ပိုင်းခရိုင် အတွင်းရေးမှူးဖြစ်သလို ၂၀၂၀ရွေးကောက်ပွဲမှာ အနိုင်ရတဲ့ ပြည်သူ့လွှတ်တော်ကိုယ်စားလှယ်လည်းဖြစ်ပါတယ်။

16. ၂၃ သြဂုတ် ၂၀၂၁မင်းတပ်မြို့အနီး ကျေးရွာတွေကို ဝင်ရောက်ရှာဖွေ ၊နေအိမ် အချို့ဖျက်ဆီးခံရ

    စစ်ကောင်စီတပ်တွေဟာ သြဂုတ်လ ၂၃ ရက်နေ့က မင်းတပ်မြို့အနီးကျေးရွာတွေကို ဝင်ရောက်ရှာဖွေတာ နေအိမ်တွေကို ရိုက်ချိုးဖျက်ဆီးတာ တွေရှိနေတယ်လို့ မင်းတပ်မြို့က ဒေသခံတွေက ပြောပါတယ်။

    နေအိမ်တွေ ရိုက်ချိုးဖျက်ဆီးခံရတာကတေ့ မင်းတပ်မြို့အနီးက ဝမ္မသူးရွာ ခွီးရိန်ရွာတို့ဖြစ်ပြီးတော့ အခုအခါ စစ်ကောင်စီတပ်တွေဟာမင်းတပ်မြို့အနီး ခွီးရိန်ရွာမှာ တပ်စွဲထားတယ်လို့လည်း သူတို့ကပြောပါတယ် ။

    ပြီးခဲ့တဲ့ရက်ပိုင်းက မင်းတပ်နဲ့ မတူပီကြားမှာ စစ်ကောင်စီတပ်တွေနဲ့ ဒေသကာကွယ်ရေးတပ်တွေ တိုက်ပွဲတွေပြင်းထန်ခဲ့ပြီး စစ်ကောင်စိထိန်းချုပ်ထားတဲ့ ၁၆ မိုင်စခန်းကို ပြန်လည်သိမ်းပိုက်နိုင်ခဲ့တယ်လို့ CDF မင်းတပ်က ပြောပါတယ်။

    စစ်ကောင်စီတပ်ဖွဲ့ဝင်တွေဟာ ဝမ္မသူးရွာလူနေအိမ်တွေကို သြဂုတ်လ ၂၃ ရက်ညနေပိုင်းက ဝင်ရောက်ဖျက်ဆီးခဲ့တယ် စားသောက်ကုန်တွေကို ဖျက်ဆီးတယ် ယူဆောင်သွားတာတွေလည်း ရှိတယ်လို့ ဒေသခံတွေကပြောပါတယ်။

    စစ်ကောင်စီဘက်ကို ဒီသတင်းနဲ့ပတ်သက်လို့ ဆက်သွယ်အတည်ပြုနိုင်ခြင်းမရှိသေးပေမဲ့ ပြီးခဲ့တဲ့ ဇွန်လက ဒီးမောဆိုမြို့နယ်အတွင်း ကျေးရွာအချို့မှာ နေအိမ်ဖောက်ထွင်းခံရတယ်ဆိုတာနဲ့ ပတ်သက်လို့ လက်နက်ခဲယမ်းတွေ ဖောက်ခွဲရေးပစ္စည်းတွေ အကြမ်းဖက်လုပ်ရပ်များနဲ့ သက်ဆိုင်တဲ့ ပစ္စည်းများကို သိမ်းဆည်းတာပဲရှိကြောင်း ပျက်စီးစာရင်းတွေကောက်ယူရာမှာလည်း သက်ဆိုင်ရာမြို့နယ် ကျေးရွာတာဝန်ရှိသူတွေပါကြောင်းနဲ့ Facebook စာမျက်နှာမှာရေးသားထားတဲ့ အိမ်ဖောက်ထွင်းပြီး ပစ္စည်းတွေငွေတွေ ယူတာမရှိကြောင်း မည်သည့်ဖြစ်စဥ်ရှိရှိ သက်သေနဲ့တကွ တိုင်ကြားနိုင်ပါတယ်လို့ စစ်ကောင်စီဘက်က ဘီဘီစီကို ဇွန်လ ၂၁ ရက်နေ့မှာ ပြန်လည်ဖြေကြားခဲ့ပါတယ်။

17. ၂၃ သြဂုတ် ၂၀၂၁ယင်းမာပင် တန်ပိုဂိတ် မီးရှိုခံရ

    မုံရွာမြို့တစ်ဖက်ကမ်း ယင်းမာပင်မြို့နယ် မုံရွာ-ယာကြီး-ကလေးဝကားလမ်း မိုင်တိုင်အမှတ် ၅ မိုင် ၃ ဖာလုံ နေရာက ဘန့်ဘွေးကျေးရွာမှာ ရှိတဲ့ ဘန့်ဘွေး တန်ပိုယာဥ်ဖြတ်သန်းခ ကောတ်ခံရေးဂိတ်စခန်းကို ဒီမနက် အစောပိုင်းက မိုင်းခွဲခံရပြီး ဂိတ်က အဆောက်အအုံအချို့ မီးလောင်ပျက်စီးကာ လူ ၁ ဦး ဒဏ်ရာရခဲ့တယ်လို့ စစ်ကောင်စီက သတင်းထုတ်ပြန်ခဲ့ပါတယ်။

    ဒီတိုက်ခိုက်မှုကို PDF အဖွဲ့ဝင် တစ်ရာခန့်က မျက်နှာဖုံးတွေစွပ်ပြီးလာရောက်တိုက်ခိုက်ခဲ့တာ ဖြစ်တယ်လို့ ဒီကနေ့ည မြန်မာရုပ်သံသတင်းမှာ ထုတ်လွှင့်သွားခဲ့ပါတယ်။

    သြဂုတ်လ ၂၃ ရက်နေ့မနက် တစ်နာရီဝန်းကျင်မှာ PDF အဖွဲ့တွေ ဒီဂိတ်ကို ရောက်လာခဲ့တာဖြစ်ပြီးတော့ မုံရွာကုမ္ပဏီက ဆောင်ရွှက်နေတဲ့ အဲ့ဒီဂိတ်မှာရှိတဲ့ အဆောက်အအုံ ၂ လုံးကို မိုင်းခွဲပြီး မီးရှို့ခဲ့တယ်လို့လည်း ပြောပါတယ်။

    ဒါ့အပြင် ဝန်ထမ်းတွေနေထိုင်တဲ့ အဆောက်အအုံ ၄ လုံးနဲ့ ကား ၂ စီးကို ဓာတ်ဆီလောင်းမီးရှို့ကာ မနက် ၂ နာရီခွဲမှာ ပြန်လည်ထွက်ခွာသွားတယ်လို့လည်း ပြောပါတယ်။

    လူ တစ်ဦး အပြင်းအထန် ဒဏ်ရာရရှိခဲ့တယ်လို့ သတင်းမှာပြောပြီး ဒဏ်ရာရသူဟာအဲ့ဒီ ဂိတ်ရဲ့ တာဝန်ခံမန်နေဂျာတစ်ဦးဖြစ်ကြောင်း ဒဏ်ရာပြင်းထန်တဲ့အတွက် မုံရွာပြည်သူ့ဆေးရုံ အရေးပေါ်လူနာဌာနမှာ ဆေးကုသခံနေရတယ်လို့ ဒေသခံတွေက တစ်ဆင့်သိရပါတယ်။

    အဲ့ဒီ တန်ပိုယာဥ်ကောတ်ခံရေးဂိတ်ဟာ မုံရွာအုပ်စုကုမ္မဏီက BOT စနစ်နဲ့ တည်ဆောက်လုပ်ကိုင်နေတဲ့ ဂိတ်တစ်ခုဖြစ်တယ်လို့ သိရပါတယ်။

18. ၂၃ သြဂုတ် ၂၀၂၁ကာကွယ်ဆေး ၆ သန်းကျော်ထိုးပြီးပြီလို့ စစ်ကောင်စီပြော

    မြန်မာနိုင်ငံမှာ ကိုဗစ်ကာကွယ်ဆေး ၆ သန်းကျော်ကို ထိုးပေးခဲ့ပြီးဖြစ်တယ်လို့ စစ်ကောင်စီဥက္ကဋ္ဌက ဒီက‌နေ့ သြဂုတ်လ ၂၃ ရက်နေ့နိုင်ငံတော်စီမံအုပ်ချုပ်ရေးကောင်စီအစည်းအဝေးမှာ ပြောသွားပါတယ်။

    လက်ရှိမှာ မြန်မာနိုင်ငံမှာ ကာကွယ်ဆေးလုံးရေ ၈ သန်းရထားပြီး ဒုတိယအကြိမ် ထိုးပေးဖို့ အတွက် ၂ သန်းကျန်တယ်လို့လည်း သူကပြောသွားပါတယ်။

    ကိုဗစ်ကာကွယ်ဆေးထိုးလုပ်ငန်းတွေ ကို နောက်ဆေးတွေ‌ရောက်ရှိချိန်မှာလည်း ဆက်ထိုးပေးသွားမှာဖြစ်တယ်လို့ လည်း သူကပြောပါတယ်။

    လက်ရှိစစ်ကောင်စီအနေနဲ့ မြန်မာတစ်နိုင်ငံလုံး လူဦးရေ ၅၀ ရာခိုင်နူန်းကို ထိုးဖို့ ရည်မှန်းပြီးလုပ်ဆောင်နေတာဖြစ်ပါတယ်။

    မြန်မာနိုင်ငံမှာ ကိုဗစ်ကာကွယ်ဆေးထိုးပြီးသူ ၄ သန်းခွဲနီးပါးအထိရှိလာပြီဖြစ်တယ်လို့ စစ်ကောင်စီလက်အောက်က ကျန်းမာရေးဝန်ကြီးဌာနက သြဂုတ်လ ၂၂ ရက်မှာ သတင်းထုတ်ပြန်ခဲ့ပါတယ်။

    အဲဒီအရေအတွက်ထဲမှာ အကြိမ်ပြည့်ကာကွယ်ဆေးထိုးပြီးသူ တစ်သန်းရှစ်သောင်းနီးပါး ပါဝင်ပြီး ကာကွယ်ဆေးတစ်ကြိမ်ထိုးပြီးသူက နှစ်သန်းခြောက်သောင်းကျော်ပါဝင်တယ်လို့ ဆိုပါတယ်။

    ရခိုင်ပြည်နယ်မှာ နောက်တစ်ကြိမ်ထိုးဖို့ ကာကွယ်ဆေးတွေရောက်လာခြင်းမရှိသေးလို့ နောက်တစ်ကြိမ်ထိုးဖို့ ဆေးထိုးမယ့်ရက်တွေနောက်ဆုတ်သွားနိုင်တယ်လို့ ပြည်နယ်ကောင်စီပြောခွင့်ရ ပြည်နယ်ဥပဒေချုပ် ဦးလှသိန်းက ပြောပါတယ်။

    ရခိုင်အတွက် ကိုဗစ်ကာကွယ်ဆေးတွေမရောက်လို့ ဆေးထိုးမယ့်ရက်တွေ နောက်ဆုတ်နိုင်တယ်လို့ပြော

19. ၂၃ သြဂုတ် ၂၀၂၁မန္တလေးစျေးကွက် ပဲ အဝယ်လိုက်

    ပြည်တွင်းငွေဈေးအပြောင်းအလဲတွေကြောင့် အိန္ဒိယပို့ကုန် ပဲအမျိုးစားတွေ ဈေးတက်ပြီး ဒီရက်ပိုင်းမှာ အရောင်းအဝယ် အားကောင်းတယ်လို့ မန္တလေးမြို့ ပဲ၊ နှမ်းကုန်စည်ဒိုင်က ပြောပါတယ်။

    "ပဲဈေးကွက်က ပဲဈေးအတက်ကြမ်းတာ၊ ပြည်တွင်းစားတဲ့ ကုလားပဲ အုပ်စုတွေ၊ အိန္ဒိယပို့ပေးရတဲ့ ပဲစင်းငုံ၊ မတ်ပဲတွေ အရောင်းဝယ်တက်တယ်။ ဈေးလည်းတစ်ပတ်အတွင်းကို တစ်အိတ် ၅၀၀၀ တက်သွားတယ်"လို့ ပွဲစားကုန်သည် စက်ပိုင်များ မဟာကထိန်တော်အသင်းမှ တာဝန်ရှိသူတစ်ဦးက ပြောပါတယ်။

    မန္တလေးကနေ အိန္ဒိယဘက်ကို သင်္ဘောလိုင်းနဲ့ တင်ပို့ပေးရတဲ့ ပဲစင်းငုံ၊ မတ်ပဲတွေဟာ တစ်ရက်ကို တန် ၄၀၀၊ တန် ၅၀၀ထိ အရောင်းဝယ်ဖြစ်ပြီး ပဲစင်းငုံဈေးတွေဟာ ဩဂုတ်လလယ်မှာ သုံးတင်းဝင် တစ်အိတ်ကို ကျပ် ၁၂၀၀၀၀ ရှိရာက တစ်ပတ်အတွင်း ကျပ် ၅၀၀၀ ဈေးမြင့်တက်ခဲ့တယ်လို့လည်းပြောပါတယ်။

    ပြည်တွင်းစားသုံးတဲ့ ကုလားပဲ အုပ်စု၊ ပဲကြီးအုပ်စုတွေ ဈေးတက်လာခဲ့ပြီး ဒီပဲအုပ်စုတွေဟာ ပြီးခဲ့တဲ့ ဇူလိုင်လက စပြီး တဖြည်းဖြည်း ဈေးမြင့်တက်လာသလို အရောင်းအဝယ်လည်း မြင့်တက်ခဲ့တယ်လို့သိရပါတယ်။

    မန္တလေးကနေ တရုတ်နယ်စပ်ဘက်ကို ပို့ရတဲ့ ပဲ၊ နှမ်းအမျိုးစားတွေကတော့ ဇူလိုင်လဆန်း တရုတ်နယ်စပ် ဝင်၊ထွက်ခွင့် ကန့်သတ်ကတည်းက ကုန်စည်စီးဆင်းတာတွေ ရပ်နေခဲ့ပါတယ်။

    ဩဂုတ်လကုန်ခါနီးထိ တရုတ်ဝယ်လက် ပဲအမျိုးစားတွေဟာ နယ်စပ်ဘက် ကုန်စည်တင်ပို့မှု လုံးဝမရှိလို့ ပြည်တွင်းမှာ တရုတ်ဝယ်လက် ပဲအမျိုးစားတွေ ဈေးကျခဲ့ပါတယ်။

    လက်ရှိ မန္တလေး ပဲ၊ နှမ်းရောင်းဝယ်မှုမှာ ပဲကုန်အသစ် အဝင်မရှိလို့ လှောင်လက်ဈေးကွက် ဖြစ်နေတယ်လို့ ကုန်သည်တွေက ဆိုပါတယ်။

20. ၂၃ သြဂုတ် ၂၀၂၁မြန်မာနဲ့ စစ်ရေးပူးပေါင်းမှုတွေ တိုးလုပ်သွားမယ်လို့ ရုရှား ဒုကာကွယ်ရေးဝန်ကြီးပြော

    မြန်မာနိုင်ငံနဲ့ စစ်ရေး၊ စစ်ဘက်နည်းပညာရေး ပူးပေါင်းဆောင်ရွက်မှုတွေ တိုးလုပ်သွားဖို့ ရုရှားအစိုးရက အသင့်ရှိတယ်လို့ ရုရှား ဒုတိယကာကွယ်ရေး ဝန်ကြီး အလက်ဇန်းဒါး ဖိုမင်က တပ်မတော် ကြည်း၊ ရေ၊ လေ ညှိနှိုင်း ကွပ်ကဲရေးမှူး ဗိုလ်ချုပ်ကြီး မောင်မောင်အေးနဲ့ ဒီကနေ့ တနင်္လာနေ့မှာ တွေ့ဆုံစဉ် ထုတ်ဖော် ပြောကြားလိုက်ပါတယ်။

    "မြန်မာနိုင်ငံဟာ အာရှပစိဖိတ်နဲ့ အရှေ့တောင်အာရှဒေသမှာ ရုရှားရဲ့ ဗျူဟာပိုင်း ယုံကြည်စိတ်ချရတဲ့ မိတ်ဖက်နိုင်ငံ ဖြစ်ပါတယ်၊ စိတ်မကောင်းစရာ ပြောရရင် မြန်မာနိုင်ငံတွင်းမှာ နိုင်ငံရေးအခြေအနေက အတော်လေး ဆိုးနေပါတယ်၊ ဒါပေမဲ့ နိုင်ငံတည်ငြိမ်အေးချမ်းအောင် မြန်မာခေါင်းဆောင်ပိုင်းက အတတ်နိုင်ဆုံး ကြိုးစားဆောင်ရွက်နေတယ် ဆိုတာကို ကျွန်တော်တို့ သိပါတယ်၊ စစ်ရေးနဲ့ စစ်ဘက် နည်းပညာပိုင်းဆိုင်ရာ အပါအဝင် ရုရှား မြန်မာ နှစ်နိုင်ငံ ဆက်ဆံရေး ပိုခိုင်မာ တိုးတက်လာအောင် လုပ်သွားမယ်"လို့ ရုရှား ဒုတိယကာကွယ်ရေး ဝန်ကြီး အလက်ဇန်းဒါး ဖိုမင်က ပြောပါတယ်။

    "ဒီအစည်းအဝေးကို ခါတိုင်းလိုပဲ ချစ်ကြည်ရင်းနှီးစွာ ကျင်းပခဲ့ပြီး ရုရှားမြန်မာ နှစ်နိုင်ငံ ကာကွယ်ရေးဝန်ကြီးဌာနတွေအကြား ဘက်စုံ ပူးပေါင်းဆောင်ရွက်မှုတွေကို ဖြည်းဖြည်းချင်း တည်ဆောက်ဖို့ နှစ်ဘက်စလုံးက အခိုင်အမာ သန္နိဋာန်ချထားတယ်ဆိုတဲ့ အချက်ကို ထပ်မံ ဆွေးနွေး အတည်ပြုခဲ့ကြတယ်" လို့ အစည်းအဝေးအပြီး ရုရှားကာကွယ်ရေး ဝန်ကြီးဌာနရဲ့ သတင်းထုတ်ပြန်ချက်မှာ ဖော်ပြထားပါတယ်။

    ဗိုလ်ချုပ်ကြီး မောင်မောင်အေးနဲ့ အဖွဲ့ဟာ ရုရှားထုတ် လက်နက်မျိုးစုံ ပြသတဲ့ Army 2021 ပြပွဲ နဲ့ International Army Games ပြိုင်ပွဲအတွက် ရုရှားနိုင်ငံ မော်စကိုမြို့မှာ ရောက်ရှိနေကြတာပါ။

    ပြီးခဲ့တဲ့ ဇွန်လတုန်းကလည်း အာဏာသိမ်း စစ်ကောင်စီ အကြီးအကဲ ဗိုလ်ချုပ်မှူးကြီး မင်းအောင်လှိုင် ဟာ ဒုတိယ ပြည်ပခရီးစဉ်အဖြစ် ရုရှားနိုင်ငံကို သီတင်းတစ်ပတ်ကြာ သွားရောက်ခဲ့ပါတယ်။ နိုင်ငံတော်အဆင့် ခရီးစဉ်အနေနဲ့ သွားခဲ့ပေမဲ့ ရုရှားသမ္မတ ပူတင်နဲ့တော့ တွေ့ခွင့်မရခဲ့ပါဘူး။

    သူ့ရဲ့ရုရှားခရီးစဉ်အတွင်း ဗိုလ်ချုပ်မှူးကြီး မင်းအောင်လှိုင်ဟာ စစ်လက်နက်နဲ့ စစ်သုံးယာဉ်တွေ ထုတ်လုပ် တင်ပို့ ရောင်းချတဲ့ Rosoboronexport ကုမ္ပဏီ ကို သွားရောက်ခဲ့ပြီး စစ်ဘက်နည်းပညာဆိုင်ရာ ပူးပေါင်း ဆောင်ရွက်နိုင်မယ့် ကိစ္စရပ်တွေအတွက် အဲဒီက တာဝန်ရှိသူတွေနဲ့ တွေ့ဆုံခဲ့တယ်လို့ စစ်တပ်ရဲ့ သတင်းမှန်ပြန်ကြားရေး ဝက်ဘ်ဆိုက်မှာဖော်ပြခဲ့ပါတယ်။