အောက်ဆီဂျင်ကိစ္စ နိုင်ငံရေးအရ အမြတ်မထုတ်ဖို့ ဗိုလ်ချုပ်မှူးကြီးမင်းအောင်လှိုင်ပြော

တိုက်ရိုက် ထုတ်လွှင့်ချက်

1. ၄ ဇူလိုင် ၂၀၂၁အင်းစိန် အောင်ဇေယျကြိုးတံတားအနီးရပ်ထားတဲ့စစ်ကားပေါ် ဗုံးပစ်ခံရ, စစ်ကောင်စီတပ်တွေက အနီးနား အိမ်ရာထဲဝင်ပြီး သပိတ်မှာပါဝင်တယ်လို့ ယူဆရခံတဲ့လူငယ်တချို့ကိုလည်း ဖမ်းသွားတယ်လို့ ဒေသခံတွေကပြောပါတယ်။

   

   ဓာတ်ပုံ ရင်းမြစ်, CJ

   ရန်ကုန်မြို့၊ အင်းစိန်မြို့နယ်ထဲက အောင်ဇေယျကြိုးတံတားခြေရင်းမှာ ရပ်ထားတဲ့စစ်ကားတစ်စင်းထဲကို ဒီနေ့ ဇူလိုင်လ ၄ ရက်နေ့လည်တုန်းက ဗုံးပစ်ထည့်မှု ဖြစ်ခဲ့ပေမဲ့ ပေါက်ကွဲမှုတော့မရှိခဲ့ဘူးလို့ အနီးနားရပ်ကွက်မှာနေထိုင်သူတွေ ဆီကနေ သိရပါတယ်။

   လှိုင်မြစ်ပေါ်က အောင်ဇေယျကြိုးတံတားဟာ လှိုင်ယာသာမြို့နယ်နဲ့ အင်းစိန်မြို့နယ်ကို ဆက်ထားတဲ့တံတားဖြစ်ပြီး အင်းစိန်ဘက်ခြမ်းမှာဆို လှိုင်မြစ်လမ်းပေါ်မှာ ရှိပါတယ်။

   ဗုံးပစ်ခံရပြီးတဲ့နောက် စစ်ကောင်စီတပ်တွေဟာ အနီးနားက ကမ်းနားရပ်ကွက်မှာရှိတဲ့ အောင်ဇေယျအိမ်ရာထဲကို စစ်ကားတွေနဲ့ဝင်ရောက်ရှာဖွေခဲ့ကြတယ်လို့ လည်းသိရပါတယ်။

   အဲဒီရှာဖွေမှုမှာ လူငယ် ၂ ဦးထက်မနည်းဖမ်းဆီးခံခဲ့ရတယ်လို့ ဒေသခံတွေက ပြောပါတယ်။

   အိမ်ရာထဲက ဈေးရှေ့မှာ ဖမ်းဆီးထားတဲ့လူငယ်တွေကို ရိုက်နှက်နေခဲ့တယ်ဆိုတဲ့အကြောင်းကို မျက်မြင်တချို့က လူမှုကွန်ယက်မှာ ပြောဆိုနေခဲ့တာကိုလည်း တွေ့ရပါတယ်။

   ဗုံးပစ်ထည့်ခံရတဲ့နေရာမှာ အမှတ် ၁၁ မူလတန်းကျောင်းလည်း ရှိနေတာကြောင့် အဲဒီအနီးနား တံတားခြေရင်းမှာ စစ်ကောင်စီတပ်ဖွဲ့ဝင်တွေ အမြဲလိုလို တွေ့ရတတ်တယ်လို့ အနီးနားမှာနေထိုင်သူတွေက ပြောပါတယ်။ အာဏာသိမ်းမှုဖြစ်ပြီးနောက်ပိုင်း စစ်ကောင်စီတပ်တွေက တံတားအောက် ကမ်းနားဘက်ကို မကြာခဏ လှည့်လေ့ရှိပြီး အိမ်ရာမှာလည်း အကြိမ်ကြိမ် ဝင်ရှာခဲ့ဖူးတာကြောင့် စစ်ကားပေါ် ဗုံးပစ်ထည့်ခံရမှုဖြစ်ပြီးနောက်ပိုင်း ရပ်ကွက်ထဲနဲ့ အိမ်ရာထဲမှာ စစ်ကောင်စီတပ်တွေ ပိုခြေရှုပ်လာမှာကို စိုးရိမ်တယ်လို့ ဒေသခံ တွေက ပြောပါတယ်။

2. ၄ ဇူလိုင် ၂၀၂၁ကိုဗစ် ကူးစက်မှုတွေများလာလို့ မုံရွာညစျေးတန်းကို ပိတ်

   စစ်ကိုင်းတိုင်း မုံရွာမြို့မှာ ကိုဗစ်ကူးစက်သူတွေတိုးလာပြီး သေဆုံးမှုတွေ ရှိလာနေတဲ့ အတွက် မုံရွာမြို့ရုံးကြီးလမ်းက မုံရွာညစျေးတန်းကို ၁၄ ရက်ခန့်ပိတ်ထားဖို့ စစ်ကောင်စီရဲ့ ကျန်းမာရေးနဲ့ အာကစားဝန်ကြီးဌာနက အမိန့်ထုတ်ထားကြောင်း မုံရွာမြို့ခံတစ်ဦးက ဘီဘီစီကိုပြောပါတယ်။

   မြို့ပေါ်စားသောက်ဆိုင်အချို့ကိုလည်း လာမယ့် ဇူလိုင်၅ရက်နေ့က စပြီးဆိုင်ထိုင်စားသောက်ခွင့် ပိတ်ပြီး ပါဆယ်စနစ်နဲ့ရောင်းချရတော့မယ်လို့ စစ်ကောင်စီလက်အောက်က ကျန်းမာရေး ဌာန က အကြောင်းကြားမှုတွေရှိခဲ့တယ်လို့ စားသောက်ဆိုင် ပိုင်ရှင်တွေကတစ်ဆင့်သိရပါတယ်။

   စစ်ကိုင်းတိုင်းအတွင်း ကလေးမြို့က ကိုဗစ်ရောဂါကူးစက်မှုတွေ အဖြစ်များနေပြီး စစ်ကိုင်းတိုင်း ကလေးဝ နဲ့ အခြား မြို့တွေ မှာလည်း ပိုးတွေ့သူများလာနေပါတယ်။

   ကိုဗစ် ဒုတိယလှိုင်းကာလမှာ မုံရွာ ညစျေးတန်းကို ပါဆယ်စနစ် နဲ့ ရောင်းခွင့်ရပေမယ့် အခုအခါမှာတော့ ပါဆယ်စနစ်ပါ စည်ပင်က ပိတ်လိုက်တာဖြစ်ပါတယ်။

   မုံရွာမြို့ပေါ်ကစျေးတွေနဲ့ ပို့ဆောင်ဆက်သွယ်ရေးနဲ့ပတ်သက်လို့လတ်တလော တိကျတဲ့ထုတ်ပြန်မှုတွေ တော့ထွက်မလာသေးကြောင်းလည်းမုံရွာမြို့ခံတွေက ပြောပါတယ်။

   

   ဓာတ်ပုံ ရင်းမြစ်, CJ

3. ၄ ဇူလိုင် ၂၀၂၁ဒီပဲယင်းမှာ ပစ်ခတ်မှုတွေကြောင့် လူ ၂၅ ဦးထက်မနည်းသေဆုံး, ကျေးရွာပေါင်း ၁၁ ရွာကျော်တိမ်းရှောင်နေရ

   ပြီးခဲ့တဲ့ ဇူလိုင်လ ၂ ရက်နေ့ကစပြီး စစ်ကောင်စီတပ်ဖွဲ့ဝင်တွေ ဝင်ရောက်ပစ်ခတ်ခဲ့တာကြောင့်ဒီပဲယင်းမြို့အနောက်ဘက်ခြမ်းကဆပ်ပြာကျင်းကျေးရွာအပြင် ရွာပေါင်း ၁၁ ရွာလောက်တိမ်းရှောင်နေရပြီး သေဆုံးသူ ၂၅ ဦးထိရှိလာပြီလို့ဒေသခံရွာသားတွေက ပြောပါတယ်။

   "၂ရက်နေ့ကစစ်ကောင်စီကတပ်ဖွဲ့ဝင်တွေက ဝင်ရောက်ပစ်ခတ်တာ အဲ့ဒီနေ့မှာပဲပြည်သူ့ကာကွယ်ရေးတပ်ဖွဲ့တွေနဲ့ပစ်ခတ်မှုတွေဖြစ်တာ ပြည်သူ့ကာကွယ်ရေးတပ်ဖွဲ့ဆိုပေမယ့်လည်း လက်နက်အင်အားလူအင်အား အဲလိုအပြည့်စုံရှိတဲ့အဖွဲ့မဟုတ်ပါဘူး။ လက်နက်ကြီးတွေနဲ့ဆိုတော့ ယှဉ်မပစ်နိုင်ဘူး။အဲဒီနေ့မှာ ၁၁ ဦးထိတာ အဲဒီထဲက ဒဏ်ရာရ ၆ ဦးကို လုံခြုံတဲ့စိတ်ချတဲ့နေရာတွေမှာထားခဲ့တာ။ ထားခဲ့တဲ့ ဒဏ်ရာရတဲ့သူတွေကို ၆ ဦးကို ခေါင်းတွေ သေနတ်နဲ့တေ့ပစ်ထားခဲ့တာတွေနောက်နေ့မှာ အလောင်းတွေပြန်တွေ့လို့အဲဒီနားမှာပဲမြုပ်နှံခဲ့ရတယ်။ ဒီနေ့စုစုပေါင်းအရေအတွက် အလောင်းတွေ့တာနဲ့ဆို ၂၅ ဦးရှိသွားပြီ အဲ့ဒီထဲမှာ ပြည်သူကတော့ လေးဦးလောက်ပါတယ်" လို့ဒေသခံရွာသားတစ်ဦးက ဘီဘီစီကိုပြောပါတယ်။

   လက်ရှိမှာ ဒေသခံရွာသားတွေအနေနဲ့အလောင်းတွေ လိုက်လံရှာဖွေနေတုန်းဖြစ်ပြီး အလောင်းလိုက်ရှာရင်း လက်နက်ကြီးတွေရဲ့ကျည်ဆံခွံတွေကိုတွေ့တယ်လို့ဒေသခံရွာသားတွေက ဘီဘီစီကိုသတင်းပေးပို့လာပါတယ်။

   ဒီပဲယင်းအနီးတဝိုက်က ရွာတွေနားမှာ ပြီးခဲ့တဲ့မေလကတည်းကပစ်ခတ်မှုတွေဖြစ်ခဲ့တာကြောင့် ရွာသားတွေအနေနဲ့ အဲ့ဒီက တည်းက နေထိုင်ရာကျေးရွာတွေကနေရွေ့ပြောင်းနေထိုင်ခဲ့ကြရတာပါ။

   အခုဆိုရင် ထပ်မံထွက်ပြေးတိမ်းရှောင်ရတဲ့ ရွာတွေလည်း တိုးလာတာကြောင့် လူပေါင်း ၇ဝဝဝ လောက် စစ်ဘေးရှောင်ဖြစ်နေပြီး စားနပ်ရိက္ခာနဲ့ဆေးဝါးအခက်ခဲတွေဖြစ်နေရတယ်လို့ ဒေသခံတွေကပြောပါတယ်။

   ဇူလိုင် ၂ ရက်နေ့ကစပြီးဖြစ်ခဲ့တဲ့ စစ်ကောင်စီနဲ့ ဒီပဲယင်းပြည်သူ့ကာကွယ်ရေးတပ်ဖွဲ့တွေကြားအပြန်လှန်ပစ်ခတ်မှုတွေကြောင့် ဒဏ်ရာရရှိသူ ၁ဝ ဦးနဲ့ သေဆုံးသူ ၁၈ ဦးအထိရှိပြီလို့ ဒီပဲယင်းပြည်သူ့ကာကွယ်ရေးတပ်ဖွဲ့က ဇူလိုင် ၃ ရက်နေ့မှာထုတ်ပြန်ထားပါတယ်။

   ဒီပစ်ခတ်တိုက်ခိုက်မှုဖြစ်စဉ်နဲ့ပတ်သတ်ပြီး စစ်ကောင်စီဘက်ကိုလည်းဘီဘီစီကဆက်သွယ်မေးမြန်းဖို့ကြိုးစားနေပါတယ်။

   

   ဓာတ်ပုံ ရင်းမြစ်, CJ

4. ၄ ဇူလိုင် ၂၀၂၁ကျောင်းကုန်းမြို့မှာ ကိုဗစ်သံသယ ရဲကနေတဆင့် ရဲမေတွေအပါအ၀င် လူ ၁၁ ဦးအထိ ကူးစက်

   

   ဓာတ်ပုံ ရင်းမြစ်, CJ

   ဧရာဝတီတိုင်းဒေသကြီး၊ ကျောင်းကုန်းမြို့မှာ ကိုဗစ်-၁၉ သံသယလက္ခဏာရှိတဲ့ မြို့နယ်ရဲတပ်ဖွဲ့၀င်တစ်ဦးနဲ့ထိတွေ့ဆက်စပ်သူတွေကို ပိုးစစ်ရာမှာ ရဲသားနဲ့ရဲမေတွေအများစုပါ၀င်တဲ့ လူ ၁၁ ဦးအထိပိုးတွေ့ခဲ့ပါတယ်။

   အဲဒီအရာရှိနဲ့ ထိတွေ့ဆက်စပ်သူ ၈၀ ကျော်ကို မနေ့ ဇူလိုင် ၃ ရက်မှာ ဆေးစစ်ခဲ့ရာမှာ ၁၁ ဦးမှာ ပိုးတွေ့ခဲ့တာလို့ မြို့နယ်ကျန်းမာရေးအရာရှိ ဒေါက်တာအေးနိုင်က လူမှုကွန်ယက်ကနေတဆင့် ထုတ်ပြောလာတာပါ။

   အခုတော့ ပိုးတွေ့တဲ့ အဲဒီရဲမိသားစု ၁၁ ဦးကို လှည်းဆိပ် ရဲ၀န်ထမ်းအိမ်ရာသစ်မှာထားပြီး ကျန်းမာရေးစောင့်ရှောက်မှုပေးနေတယ်လို့ သိရပါတယ်။

   မနေ့က ပိုးတွေ့သူတွေထဲ သူတို့အပြင် အမှတ် ၁ နဲ့ ၂ ရပ်ကွက်တို့ထဲကနေ ပိုးတွေ့လူနာ ၆ တွေ့ခဲ့တာကြောင့် ကျောင်းကုန်းမှာ တနေ့တည်း ပိုးတွေ့သူ ၁၇ ဦးအထိ ရှိခဲ့ပါတယ်။

   ပိုးတွေ့သူတွေဟာ မြို့ပေါ်ရပ်ကွက်တွေက အများဆုံးဖြစ်တယ်လို့ အတည်ပြု လူနာတွေကို အကူအညီပေးရာမှာပါဝင်တဲ့မြို့ခံပရဟိတလူငယ်တွေက ပြောပါတယ်။

   ''အနံ့ပျောက်တယ်ဆိုပြီး စစ်ကြည့်လို့သာ ပိုးတွေ့တယ်လို့အတည်ပြုနိုင်တာ။ အခုက ကူးစက်တာ မြို့ပေါ်ရပ်ကွက်တွေက လူငယ်တွေ၊ လူလတ်ပိုင်းတွေ အများစုလည်းဖြစ်တော့ လာမယ့်ရက်တွေဆို ထိန်းချုပ်နိုင်ပါ့မလားတောင်မသိတော့ဘူး။ လူတိုင်းကတော့ နှာခေါင်းစည်းတွေ ဘာတွေ ပြန်တပ်လာကြပြီ။ ရောဂါကို ကြောက်တဲ့ပုံတော့ ပြနေကြတယ်''လို့ ကျောင်းကုန်းလူငယ်ပရဟိတသမားတစ်ဦးက ပြောပါတယ်။

   အခုဆို ကျောင်းကုန်းမြို့နယ်ထဲ ကိုဗစ်နိုင်တင်းကပ်ရောဂါ တတိယလှိုင်းမှာ ပိုးတွေ့အတည်ပြုလူနာ ၆၇ ဦးအထိရှိလာတယ်လို့ သိရပါတယ်။

   တချိန်တည်းမှာပဲ ပိုးတွေ့လူနာ ရာချီရှိနေတဲ့ ပုသိမ်၊ မြောင်းမြနဲ့ သာပေါင်းမြို့နယ်တွေမှာ လိုအပ်မှနေအိမ်ပြင်ပ ထွက်ခွင့်ပေးမယ့်(Stay at Home) အစီအစဉ်ကို ကျန်းမာရေးဌာနက စတင်သတ်မှတ်လိုက်လိုက်ပြီဖြစ် ပါတယ်။

5. ၄ ဇူလိုင် ၂၀၂၁မြင်းခြံမှာ အမှတ်၁၉ ရပ်ကွက်အုပ်ချုပ်ရေးမှူး ပစ်ခတ်ခံရ၊ အမှတ်၈ ရပ်ကွက်မှာလည်းပစ်ခတ်မှုအချို့ရှိ

   မြင်းခြံမြို့မှာ ဒီကနေ့ ဇူလိုင် ၄ ရက် မနက် ၈နာရီကျော်က အမှတ် ၁၉ ရပ်ကွက် အုပ်ချုပ်ရေးမှူးကို နေအိမ်မှာ ရှိနေစဉ် သေနတ်နဲ့ပစ်ခတ်ခံခဲ့ရတယ်လို့ မြင်းခြံမြို့ခံတွေထံကသိရပါတယ်။

   ‘ ‘ ရုံးမှာမဟုတ်ဘူး။ သူ့အိမ်မှာပဲ ။ ထောက်ခံစာလုပ်ချင်လို့ဆိုပြောဝင်ပြီး ပစ်သွားတာလို့ကြားရတယ်။ ပစ်ခံရပေမယ့် မသေဘူးလို့တော့ကြားတယ်။ အိမ်နဲ့ကနည်းနည်းလှမ်းတဲ့အပြင် အခုက စစ်တပ်က ရောက်လာပြီး စစ်တာဆေးတာတွေလုပ်နေလို့ သွားလည်းမကြည့်ရဲဘူး။’’လို့ မြို့ခံတစ်ဦးက ဘီဘီစီကို ပြောပါတယ်။

   အုပ်ချုပ်ရေးမှူး ပစ်ခတ်ခံရမှုနဲ့ပတ်သက်ပြီး မြင်းခြံမြို့က ZERO ပြောက်ကျားတပ်ဖွဲ့လို့ အမည်ခံထားတဲ့ အဖွဲ့က သူတို့လက်ချက်ဖြစ်တယ်လို့ လူမှုကွန်ရက်စာမျက်နှာကတဆင့် ထုတ်ဖော်ပြောဆိုထားတာ ကိုလည်း တွေ့ရပါတယ်။

   နေ့ခင်း ၁၁ နာရီဝန်းကျင်မှာတော့ မြင်းခြံမြို့ပေါ်က အမှတ် ၈ ရပ်ကွက်အတွင်းမှာ စစ်ကောင်စီဘက်က အသုံးပြုနေတဲ့ အိမ်စီးကားတစ်စီးကိုလည်း လူတစ်စုက သေနတ်နဲ့ဆက်တိုက်ပစ်ခတ်မှုတွေလုပ်သွားသေး တယ်လို့လည်း မြို့ခံတွေကပြောပါတယ်။

   

   ဓာတ်ပုံ ရင်းမြစ်, မြင်းခြံသူမြင်းခြံသားများဂရု

6. ၄ ဇူလိုင် ၂၀၂၁ကိုဗစ်ဒဏ်ခံနေရတဲ့ ကလေးမြို့မှာ မနေ့ညပိုင်းက ပစ်ခတ်မှုတွေကြောင့် အမျိုးသားတစ်ဦး နှလုံးခုန်ရပ်သေဆုံး

   

   ဓာတ်ပုံ ရင်းမြစ်, CJ

   စစ်ကိုင်းတိုင်း၊ ကလေးမြို့ ၊တောင်ဇလပ်ရပ်ကွက်အနီးမှာ မနေ့ကဇူလိုင်လ ၄ ရက်ညပိုင်းကဖြစ်ခဲ့တဲ့ ပစ်ခတ်သံနဲ့ပေါက်ကွဲ သံတွေကြောင့် အနီးနားကရပ်ကွက်မှာနေထိုင်တဲ့ အသက် ၆၉ နှစ်အရွယ် ဦးဂင်ဒိုလျန်ဆိုသူအမျိုးသားတစ်ဦး နှလုံးခုန်ရပ်ပြီးသေဆုံးခဲ့တယ်လို့မိသားစုဝင်တွေက ပြောပါတယ်။

   "မနေ့ညက ခါတိုင်းလိုပဲ ဝတ်ပြုဆုတောင်းနေတာ ။ သေနတ်သံကြားတော့ အိမ်ထဲမှာမီးတွေပိတ်ပြီး နောက်တစ်ခေါက်ဆုတောင်းကြမယ်လုပ်နေတုန်း နောက်ဖေးခဏသွားမယ်ဆိုပြီး ထွက်သွားတာ။ အဲဒီမှာဗုံးသံ ၃ချက်လောက်ကြားတော့အဖေကြာနေပါလားဆိုပြီး အိမ်နောက်ဖေးသွားကြည့်တော့ အိမ်သာရှေ့မှာပဲ မှောက်ခုံသေနေတာတွေ့တာ။ အိမ်နောက်ဖေးမှာပဲ စစ်သားတွေရှိတယ်။ နီးနီးနားနား လည်းရှိတယ်။ ရောဂါအခံက ဆီးချိုပဲသွေးတိုးပဲရှိတယ်။ နှလုံးရောဂါတော့မရှိဘူး။ မနေ့ညကတော့ အဲ့လိုဖြစ်သွားတယ်။ အရင်တုန်းက ကြားရတဲ့သေနတ်သံက တစ်ချက်ချက်ပဲ။ မနေ့ညကတော့ဆက်တိုက်ပစ်တယ် ။ ဗုံးသံတွေဆိုလည်း နေရာအနှံ့ဆက်တိုက်ကြားရတယ် ။ညကိုးနာရီလောက်စပစ်တာ တော်တော်ကြာတယ်"လို့ သေဆုံးသူရဲ့ မိသားစုဝင်တစ်ဦးက ဘီဘီစီကိုပြောပါတယ်။

   သေဆုံးသူဦးဂင်ဒိုလျန်ရဲ့နာရေးကို ဒီကနေ့ဇူလိုင် ၄ရက်နေ့မှာ ပြုလုပ်မှာဖြစ်တယ်လို့လည်း မိသားစုဝင်တွေက ပြောပါတယ်။

   မနေ့ညပိုင်းက ကိုးနာရီလောက်ကစတင်ပြီး ကလေးမြို့နေရာအနှံ့မှာကြားခဲ့ရတဲ့ ပစ်ခတ်သံတွေဟာ ၁၁ နာရီလောက်မှာ တစ်ကြိမ်ပြန်ငြိမ်သက်သွားခဲ့ပေမဲ့ ည၁၂ နာရီကျော်နဲ့ ည၂နာရီထိုးကာနီးမှ ပြန်ကြားရပြီးနောက်မှ အသံတွေငြိမ်သက်သွားတယ်လို့ဒေသခံတွေက ပြောပါတယ်။

   ပြီးခဲ့တဲ့လပိုင်းကလည်း ကလေးမြို့တွင်းပစ်ခတ်သံတွေကြောင့် ကလေးမီးဖွားပြီးကာစမိခင်တစ်ဦးထိတ်လန့်သေဆုံးခဲ့တဲ့ဖြစ်ရပ်လည်းရှိခဲ့တယ်လို့ဒေသခံမီဒီယာတွေရဲ့ဖော်ပြချက်အရသိရပါတယ်။

   မနေ့ညပိုင်းက ပစ်ခတ်မှုတွေနဲ့ပတ်သတ်ပြီး စစ်ကောင်စီဘက်ကသတင်းထုတ်ပြန်တာမရှိသေးသလို ဒေသခံပြည်သူ့ကာကွယ်ရေးတပ်ဖွဲ့တွေကလည်းသတင်းထုတ်ပြန်တာမရှိသေးပါဘူး။

   လက်ရှိမှာ ကလေးမြို့ဟာ စစ်အုပ်ချုပ်ရေးအဖြစ်သတ်မှတ်ခံထားရတဲ့မြို့ဖြစ်ပြီး ကိုဗစ်ရောဂါဖြစ်ပွား ကူးစက်သေဆုံးမှုတွေများပြားနေတာကြောင့် Stay at Home အဖြစ်ကြေငြာခံထားရတဲ့မြို့လည်းဖြစ် ပါတယ်။

7. ၄ ဇူလိုင် ၂၀၂၁ပုသိမ်မြို့မှာ Stay at Home မကြေညာခင် မနေ့ကကိုဗစ်ကြောင့် လူနာ ၂ ဦး ထပ်မံသေဆုံး

   

   ဓာတ်ပုံ ရင်းမြစ်, CJ

   ဧရာဝတီတိုင်းဒေသကြီး၊ ပုသိမ်မှာ ကိုဗစ်နိုင်တင်းရောဂါ ကူးစက်မှုကြောင့် မနေ့က ဇူလိုင် ၃ ရက်မှာ ပိုးတွေ့ အတည်ပြုလူနာ ၂ ဦး ထပ်မံသေဆုံးခဲ့တယ်လို့ သိရပါတယ်။

   ပုသိမ်မြို့မှာ ကိုဗစ်တတိယလှိုင်းကူးစက်မှုတွေ ဖြစ်နေတာကြောင့် ပုသိမ်မြို့နယ်ကို ဒီနေ့ ဇူလိုင်လ ၄ ရက် မနက် ၄ နာရီကစလို့ လိုအပ်မှနေအိမ်အတွင်းကနေအပြင်ထွက်ဖို့ Stay at Home အစီအစဉ်အကျုံးဝင်ပြီလို့ ကျန်းမာရေးဌာနက ကြေညာပါတယ်။

   ပိုးတွေ့တည်ပြုလူနာ ၄၀၀ ကျော်လာတဲ့ ပုသိမ်မြို့မှာ အတည်ပြုလူနာတွေကိုလက်ခံဖို့ ပြင်ဆင်ထားတဲ့ ရေကြည်ဦးတိုင်းရင်းဆေးရုံနဲ့ ပုသိမ်ဆေးရုံကြီးမှာ လူနာတွေပြည့်နေပြီဖြစ်လို့ သာသနာ့ဗိမ္မာန်မှာ လူနာတွေ စထားနေရပြီလို့လည်းသိရပါတယ်။

   ပုသိမ်မှာ ကိုဗစ်ပိုးကူးစက်မှုအသစ်တွေဟာ ပြီးခဲ့တဲ့ ဇွန်လ ၂၅ ရက်နောက်ပိုင်း ခပ်စိပ်စိပ်တွေ့လာရာကနေ ပိုးတွေ့အတည်ပြုလူနာတွေနဲ့ ထိစပ်သူတွေကို စစ်ဆေးရာမှာ ခုရက်ပိုင်းအတွင်း ပိုးတွေ့လူနာ တနေ့ကို ၁၀၀ နီးပါးရှိလာဖြစ်ပါတယ်။

   ဒါပေမဲ့ မနေ့ ဇူလိုင် ၃ ရက်တုန်းကတော့ သံသယလူနာ ၁၁၃ ဦးကို စစ်ဆေးရာမှာ ပိုးတွေ့သူ ၂၅ ဦးပဲရှိခဲ့တယ်လို့ သိရပါတယ်။

   ပိုးတွေ့အတည်ပြုလူနာတွေထဲ အမှတ် ၂ အထက်တန်းကျောင်းနဲ့ အမက ၁၉ လိုကျောင်းတွေက ကျောင်းသား၊ ကျောင်းသူတချို့လည်း ပါနေပေမဲ့ လက်ရှိအချိန်အထိတော့ ကျောင်းတွေကို လုံးဝမပိတ်ထားသေးပဲ ရက်ပိုင်းပိတ်တာမျိုးပဲ ရှိနေသေးတယ်လို့ သိရပါတယ်။

   စစ်အာဏာသိမ်းမှုနောက်ပိုင်း ဖေဖော်ဝါရီလကစလို့ ကိုဗစ်တတိယလှိုင်းမစခင်အထိ ပုသိမ်မှာ ကိုဗစ်အတည်ပြုလူနာ တစ်ဦးစ၊ နှစ်ဦးစ တွေ့ခဲ့တာကြောင့် စစ်တပ်ဘက်က ကိုးသိန်းစာသင်ကျောင်းမှာ ကိုဗစ်စင်တာဖွင့်ပြီး ကုသခဲ့တာမျိုးရှိပါတယ်။

   ဒါပေမဲ့ အဲဒီစာသင်ကျောင်းကို ကျောင်းဖွင့်မယ်လို့ ပြင်တဲ့အခါ စင်တာလည်း ပြောင်းခဲ့ရပြီးတဲ့နောက်ပိုင်း တပ်ဘက်က ကိုဗစ်ကုသရေးမှာ တဖြည်းဖြည်းနောက်ဆုတ်သွားသလို အခုလို တတိယလှိုင်းဖြစ်ချိန်မှာ တိုင်းကျန်းမာရေးကစေတနာ့ဝန်ထမ်းအင်အားတွေကို စုပြီး ရောဂါထိန်းချုပ်ကုသရေးလုပ်နေရတယ်လို့ သိရပါတယ်။

8. ၃ ဇူလိုင် ၂၀၂၁မကွေးဝန်ကြီးချုပ်ဒေါက်တာအောင်မိုးညိုအမှု အလုပ်နဲ့ထောင် ၂နှစ်ပြစ်ဒဏ်အယူခံပြန်တက်ဖို့ရှိ၊ အဂတိမှုနဲ့ပါ ထပ်တိုးစွဲထား

9. ၃ ဇူလိုင် ၂၀၂၁မြန်မာ အိုင်စီဂျေအမှု အရင် ရှေ့နေအဖွဲ့ကို ဆက်ငှားထား

   မြန်မာ-ဂမ်ဘီယာအိုင်စီဂျေအမှုကိုဆက်လက်ရင်ဆိုင်ဖို့အတွက်အရင်ရှေ့နေအဖွဲ့ကို ဆက်ပြီး ငှားရမ်းထားတယ်လို့ မီဒီယာတွေရဲ့ မေးမြန်းမှုကို ဒီကနေ့ စစ်ကောင်စီ ပြန်ကြားရေးက ဖြေကြားပါတယ်။

   အရင် ရှေ့နေအဖွဲ့က ဒေါက်တာ ခရစ်တိုဖာစတိတ်ကာက ဦးဆောင်ပြီး အမှုကို ရင်ဆိုင်သွားမယ်လို့ ဆိုပါတယ်။

   ဒေါက်တာ ခရစ်တိုဖာစတိတ်ကာဟာ အင်္ဂလန်အခြေစိုက် 39 Essex Chambers ဥပဒေအကျိုးဆောင်အဖွဲ့က ဖြစ်ပါတယ်။

   • ICJ နိုင်ငံတကာတရားရုံးမှာ မြန်မာဘက်က လျှောက်လဲတဲ့ နိုင်ငံတကာဥပဒေအကျိုးဆောင်ရှေ့နေများ

   ရှေ့နေခကို ထုတ်ဖော်ပြောလေ့မရှိလို့ ထုတ်မပြောဘူးလို့ဆိုပြီး ရှေ့နေခပေးရမယ့် ကိစ္စတွေကို မြန်မာဘက်က တာဝန်ကျေအောင် ဆောင်ရွက်ထားပြီးပြီလို့လည်း စစ်ကောင်စီက ဆိုပါတယ်။

   အိုင်စီဂျေ ခေါ် နိုင်ငံတကာတရားရုံးမှာ ရိုဟင်ဂျာ လူမျိုးတုံးသတ်ဖြတ်မှုအတွက် တရားရင်ဆိုင်ရေးအတွက် ဦးဆောင်ကော်မတီတစ်ရပ်ကို စစ်ကောင်စီက မေလမှာ ပြင်ဆင် ဖွဲ့စည်းထားပါတယ်။

   NLD အစိုးရလက်ထက်မှာနိုင်ငံခြားရေးဝန်ကြီးလည်းဖြစ်တဲ့ဒေါ်အောင်ဆန်းစုကြည်ကိုယ်တိုင် အမှုကို ဦးဆောင် ဖြေရှင်းခဲ့ပါတယ်။

   • ဂမ်ဘီယာရဲ့ စွပ်စွဲချက်ကို ဒေါ်အောင်ဆန်းစုကြည် ဘယ်လိုချေပသွားလဲ

   စစ်ကောင်စီ လက်ထက်မှာ တရားရင်ဆိုင်မယ့် ကော်မတီကို ဥက္ကဋ္ဌအဖြစ် စစ်ကောင်စီနိုင်ငံခြားရေးဝန်ကြီး ဦးဝဏ္ဏမောင်လွင်နဲ့ ဒုတိယဥက္ကဋ္ဌတွေအဖြစ် ဦးကိုကိုလှိုင်၊ ရှေ့နေချုပ် ဒေါက်တာသီတာဦး တို့ပါဝင်ပြီး အဖွဲ့ဝင် ၈ ဦးနဲ့ ဖွဲ့စည်းထားပါတယ်။

   မြန်မာနိုင်ငံအနေနဲ့ ဇူလိုင် ၂၃ ရက်နောက်ဆုံးထားပြီး ဂမ်ဘီယာနိုင်ငံဘက်က တင်သွင်းထားတဲ့ အဆိုလွှာကို ခုခံတုံ့ပြန်တဲ့ ချေလွှာကို တင်သွင်းရမှာဖြစ်ပါတယ်။

   အိုင်စီဂျေလုပ်ငန်းစဥ်

   ဂမ်ဘီယာက စွပ်စွဲထားတဲ့ လူမျိုးတုံးသတ်ဖြတ်မှု အမှုကြီးတစ်ခုလုံး မပြီးခင် ၂၀၂၀ ပြည့်နှစ် ဇန်နဝါရီ ၂၃ မှာ ရိုဟင်ဂျာတွေကို လူမျိုးတုံးသတ်ဖြတ်မှုတွေကနေ အကာအကွယ်ပေးဖို့ အပါအဝင် မြန်မာက လိုက်နာဆောင်ရွက်ရမယ့်ကြားဖြတ်အစီအမံ အချက်လေးချက်ကို အိုင်စီဂျေက ချမှတ်ခဲ့ပါတယ်။

   အဲဒီနောက် လေးလအကြာမှာ မြန်မာဘက်က အစီရင်ခံစာတင်သွင်းရမှာ ဖြစ်ပြီး အမှုကြီးအတွက် အပြီးသတ် အမိန့်မချမချင်း ခြောက်လတိုင်းတခါ မြန်မာဘက်က ဆက်အစီရင်ခံစာတင်ရမှာ ဖြစ်ပါတယ်။

   ဒါ့အပြင် မြန်မာနဲ့ ဂမ်ဘီယာတို့ အပြန်အလှန် အဆိုလွှာတွေ တင်သွင်းရမှာ ဖြစ်ပြီး ကြားနာမှုတွေလည်း ရှိလာမှာပါ။

   

10. ၃ ဇူလိုင် ၂၀၂၁ဧရာဝတီတိုင်းက ပုသိမ်၊ မြောင်းမြနဲ့ သာပေါင်း သုံးမြို့နယ်ကို Stay at home သတ်မှတ်

    ကိုဗစ်ကူးစက်မှုမြင့်တက်လာလို့ ဧရာဝတီတိုင်းက မြို့နယ်သုံးခုဖြစ်တဲ့ပုသိမ်၊ မြောင်းမြနဲ့ သာပေါင်းမြို့နယ်တို့ကို Stay at home မြို့နယ်တွေအဖြစ်သတ်မှတ်ပြီး အဲဒီအမိန့် မနက်ဖြန် မနက်၄နာရီက စတင်အသက်ဝင်မယ်လို့ ကျန်းမာရေးနဲ့ အားကစားဝန်ကြီးဌာနက ကြေညာပါတယ်။

    ဒီကြေညာမှုကြောင့် Stay at home သတ်မှတ်ထားတဲ့မြို့နယ်နဲ့ဒေသတွေချင်းပြည်နယ်၊ ရှမ်းပြည်နယ်၊ စစ်ကိုင်းတိုင်း၊ မန္တလေးတိုင်း၊ ပဲခူးတိုင်းနဲ့ဧရာဝတီတိုင်းတို့မှာ စုစုပေါင်း၂၆ခု အထိရှိလာပြီ ဖြစ်ပါတယ်။

    ကိုဗစ်ကူးစက်သူအသစ်တွေ့ရှိမှုအနေနဲ့လည်း တစ်နေ့တည်း တစ်ထောင်ကျော်တွေ့ရှိတာ ဒီကနေ့အပါအဝင် ခြောက်ရက်ဆက်တိုက်ရှိလာပြီဖြစ်ပြီးဒီကနေ့ ကိုဗစ်ကူးစက်သူအသစ် ၁၈၇၇ဦးနဲ့ သေဆုံးသူ ၂၀ ဦး ရှိတယ်လို့ကျန်းမာရေးနဲ့အားကစားဝန်ကြီးဌာနက ထုတ်ပြန်ထားပါတယ်။

    အခုချိန်ထိ မြန်မာနိုင်ငံမှာ စုစုပေါင်း ကူးစက်သူ ၁၆၃,၀၈၇ ဦး ရှိပြီး သေဆုံးသူ ၃,၃၈၄ ဦး ရှိပြီ ဖြစ်ပါတယ်။

    မနေ့က ကူးစက်သူအသစ် ၁၈၆၃ ဦး ရှိခဲ့ပါတယ်။

    ကိုဗစ် တတိယလှိုင်းမှာ တစ်နေ့တည်း ကူးစက်သူ အသစ် ၂၀၇၀ ဦးတွေ့ရှိမှု ဇူလိုင် ၁ ရက်နေ့မှာ ဖြစ်ခဲ့ပြီး တတိယလှိုင်းအတွင်း တစ်နေ့တည်း အများဆုံး တွေ့ရှိမှု ဖြစ်ပါတယ်။

    

    ဓာတ်ပုံ ရင်းမြစ်, Getty Images

11. ၃ ဇူလိုင် ၂၀၂၁PPST အစည်းအဝေး- ခေါင်းဆောင်နုတ်ထွက်ခွင့်အပါအဝင်မပြီးပြတ်တဲ့ကိစ္စတွေ ရက်တိုးဆွေးနွေးမယ်

    NCA အပစ်ရပ်စာချုပ် လက်မှတ်ထိုးထားတဲ့ တိုင်းရင်းသားလက်နက်ကိုင် ၁၀ ဖွဲ့ ပါဝင်ဖွဲ့စည်းထားတဲ့ ငြိမ်းချမ်းရေး ဦးဆောင်အဖွဲ့ PPST ရဲ့ အစည်းအဝေးကို ဇူလိုင် ၁ ရက်နေ့နဲ့၂ ရက်မှာ ကျင်းပခဲ့ရာမှာ ၂ ရက်ကျင်းပဖို့ လျာထားပေမယ့် မပြီးပြတ်ဘဲ ခေတ္တရပ်နားထားရပါတယ်။

    ဒီအစည်းအဝေးမှာ နုတ်ထွက်ခွင့်တင်ထားတဲ့ PPST ခေါင်းဆောင်ကိစ္စ၊ လက်ရှိနိုင်ငံရေးအခြေအနေနဲ ရှေ့ဆက်မယ့် လုပ်ငန်းစဉ်တွေကို ဆွေးနွေးဖို့ လျာထားခဲ့တာပါ။

    ဒါပေမဲ့ အစည်းအဝေးအတွင်းမှာ ခေါင်းဆောင်နုတ်ထွက်ခွင့်နဲ့ ပတ်သက်ပြီး ဆွေးနွေးမှုတွေ မပြီးပြတ်ခဲ့ကြောင်းနဲ့ အစည်းအဝေးကို ဆက်ကျင်းပဖို့ရှိကြောင်း PPST ရဲ့ ပြောခွင့်ရသူတစ်ဦးဖြစ်တဲ့ စောတော်နီးက ဘီဘီစီကို ပြောပါတယ်။

    PPST အဖွဲ့ရဲ့ ယာယီခေါင်းဆောင်အဖြစ်တာဝန်ယူထားတဲ့ RCSS/SSA ရှမ်းပြည်တပ်မတော်တောင်ပိုင်းရဲ့ခေါင်း ဆောင် ဗိုလ်ချုပ်ကြီးယွက်ဆစ်ဟာ အဖွဲ့ခေါင်းဆောင်အဖြစ်ကနေ နုတ်ထွက်ခွင့်ကို ဇွန်လ ၂၉ ရက်က တင်ပြခဲ့တာပါ။

    NCA စာချုပ် လက်မှတ်ရေးထိုးထားတဲ့ တိုင်းရင်းသားလက်နက်ကိုင်အဖွဲ့တွေက အစိုးရနဲ့ နိုင်ငံရေး ညှိနှိုင်းမူ့ တွေလုပ်ဖို့ PPST အဖွဲ့ကို ၂၀၁၆ ခုနှစ်ကစတင်ဖွဲ့ခဲ့တာ ဖြစ်ပါတယ်။

    စတင်ဖွဲ့စည်းစဥ်က PPST ရဲ့ အဖွဲ့ခေါင်းဆောင် နေရာကို တာဝန်ယူထားတဲ့ ကရင်အမျိုးသားအစည်းအရုံး KNU ဥက္ကဋ္ဌ ဗိုလ်ချုပ်ကြီး မူတူးစေးဖိုး ၂၀၁၉ ခုနှစ်မှာ နုတ်ထွက်ခဲ့တဲ့အတွက် ဒုတိယခေါင်းဆောင်ဖြစ်တဲ့ ဗိုလ်ချုပ်ကြီးယွက်ဆစ်က ယာယီအဖွဲ့ခေါင်းဆောင်တာဝန်ကို ယူထားခဲ့တာပါ။

    ဒါပေမဲ့လည်း ဗိုလ်ချုပ်ကြီးယွက်ဆစ်အနေနဲ့ သူတို့အဖွဲ့ထဲမှာလည်း အလုပ်တွေများလာတဲ့အတွက် PPST ခေါင်းဆောင်နေရာကနေ နုတ်ထွက်ဖို့ တင်ပြထားတဲ့ကိစ္စကို ၂ ရက်တာကျင်းပခဲ့တဲ့ အစည်းအဝေးမှာ ဆွေး နွေးခဲ့ပေမဲ့ အဖြေမထွက်ဘဲ အစည်းအဝေးကို ရပ်နားလိုက်ရတာပါ။

    အစည်းအဝေးမှာ ဗိုလ်ချုပ်ကြီးယွက်ဆစ်ကို ဒုတိယအကြိမ်ညီလာခံ မကျင်းပမီ အချိန်ထိ ဆက်လက် တာဝန် ထမ်းဆောင်ဖို့ ဆွေးနွေးတဲ့အဖွဲ့တွေ ရှိသလို့ ခေါင်းဆောင်နောက်တယောက်ထပ်ရွေးဖို့ လိုလားသူတွေ ရှိနေတဲ့အတွက်လည်း အစည်းအဝေးမှာ အဖြေမထွက်ခဲ့တာပါ။

    မပြီးပြတ်သေးတဲ့ အစည်းအဝေးကို ဇူလိုင်လ ၆ ရက် အင်္ဂါနေ့ မှာ ပြန်ကျင်းပဖို့ လျာထားပြီး အဲဒီအစည်းအဝေးမှာတော့ အဖွဲ့ရဲ့ယာယီခေါင်းဆောင်တစ်ဦးကို ထပ်ခံတာဝန်ပေးလာနိုင်တယ်လို့ လေ့လာသူတွေက သုံးသပ်ပြောဆိုနေတာလည်း ရှိပါတယ်။

    PPST ဦးဆောင် တာဝန်ကို KNU သို့မဟုတ် မွန်ပြည်သစ်ပါတီက ခေါင်းဆောင်တစ်ဦးထဲက တယောက်ယောက် တာဝန်ယူလာနိုင်တယ်လို့လည်း လေ့လာသူတွေက ခန့်မှန်းပြောဆိုနေကြပါတယ်။

    ဇူလိုင် ၁ ရက် အစည်းအဝေး အဖွင့်မှာ ဗိုလ်ချုပ်ကြီး ယွက်စစ်က အပစ်ရပ် NCA စာချုပ်ဟာနိုင်ငံရေးပြဿနာကို ငြိမ်းချမ်းတဲ့နည်းနဲ့ ဆွေးနွေးဖို့ ဖန်တီးပေးသလို ဖက်ဒရယ်ပြည်ထောင်စုအတွက်လည်း အာမခံထားတာကို သတိချပ်ဖို့ လိုတယ်လို့ ထည့်သွင်း ပြောကြားခဲ့ပါတယ်။

    

    ဓာတ်ပုံ ရင်းမြစ်, NCA-S EAO

12. ၃ ဇူလိုင် ၂၀၂၁မြင်းခြံမှာ NLD အမာခံဆိုပြီး ပျူစောထီးစာရင်းမှာပါသူ ၂ ဦး သတ်ဖြတ်ခံရ

    

    ဓာတ်ပုံ ရင်းမြစ်, social media

    မန္တလေးတိုင်း၊ မြင်းခြံမြို့မှာ NLD အမာခံဆိုပြီး ပျူစောထီးစာရင်းမှာ ပါတဲ့ အမျိုးသားတစ်ဦးနဲ့အမျိုးသမီးတစ်ဦးတို့ မနေ့ ဇူလိုင် ၂ ရက်ညပိုင်းက သတ်ဖြတ်ခံခဲ့ရတယ်လို့ မြို့ခံတွေဆီက သိရပါတယ်။

    အသတ်ခံခဲ့ရသူတွေဟာ မြင်းခြံမြို့က သင်္ချာဆရာ ဦးမိုးဟိန်းနဲ့ ဇနီးဖြစ်သူတို့ ဖြစ်ပြီး နေအိမ်မှာ သတ်ဖြတ်ခံခဲ့ရတာလို့ သိရပါတယ်။

    ''သူတို့နေတဲ့အရပ်က အမှတ် ၂၀ ရပ်ကွက်။ ချောင်းဒေါင်းအရပ်လို့လည်း ခေါ်ပါတယ်။ အရင်တုန်းကတော့ ရွာပေါ့။ အခုတော့ မြို့နယ်နိမိတ်ထဲပါသွားတာပေါ့။ ဝန်းခြံမဟုတ်ဘဲ ဈေးတိုက်တန်းလိုနေရာမျိုးမှာ တိုက်ခန်းလေး ငှားနေကြတာဆိုတော့ ဝင်ရ၊ ထွက်ရလွယ်တယ်။ သူတို့(ပျူစောထီး) ကြေညာထားတာ ရှိတယ်လေ။ သူတို့(သတ်ဖြတ်ခံရသူ)နှစ်ယောက်လည်း ပါတယ်။ ဒီလိုတိုက်ခန်းနဲ့ ပေါ့ပေါ့ပါးပါးနေတတ်ကြသူတွေဆိုတော့ သူတို့ဘက်က ပြောင်ကြေညာပြီးမှ လုပ်တာပါ။ ပြောင်လာကြတာပဲ'' လို့ မြို့ခံ NLD ပါတီဝင်တစ်ဦးက ပြောပါတယ်။

    ဦးမိုးဟိန်းဟာ မြင်းခြံ NLD ပါတီဝင်အလုပ်အမှုဆောင်ဟောင်းဖြစ်ပြီး ဇနီးဖြစ်သူကတော့ ပါတီပြန်ကြားရေးတာဝန်ယူထားသူဖြစ်တယ်လို့ သိရပါတယ်။

    ပျူစောထီးဆိုတဲ့အဖွဲ့က မြင်းခြံမြို့ထဲက အများပိုင်အဆောက်အအုံတွေ၊ စာသင်ကျောင်းတွေ၊ ဆေးရုံတွေ၊ အစိုးရဝန်ထမ်းတွေနဲ့ ပြည်သူတွေကို ထိခိုက်မှုဖြစ်စေတာ တစုံတစ်ခုဆောင်ရွက်မယ်ဆိုရင် NLD ပါတီဝင်တွေနဲ့ ထောက်ပံ့ပေးနေတဲ့လူပုဂ္ဂိုလ်တွေ၊ မိသားစုတွေ၊ နေအိမ်တွေကို ထိထိရောက်ရောက်ပြန် တုံ့ပြန်မယ်ဆိုပြီး NLD ပါတီနဲ့ဆက်စပ်တဲ့ မြင်းခြံဒေသခံ အယောက် ၄၀ နီးပါးရဲ့နာမည်တွေ၊ နေရပ်လိပ်စာတွေကို ဇွန်လ ၂၆ ရက်တုန်းက စာထုတ်ခဲ့ပါတယ်။

    အဲဒီလိုစာထုတ်ပြီးနောက်မှာ ဦးမိုးဟိန်းတို့ ဇနီးမောင်နှံ လုပ်ကြံခံခဲ့ရတာဖြစ်ပါတယ်။

    မြင်းခြံမြို့နယ် NLD ခေါင်းဆောင်ပိုင်းကတော့ ဦးမိုးဟိန်းဟာ စာပြဆရာတစ်ယောက်ဖြစ်တာကြောင့် လူချစ်လူခင်ပေါသလို ပါတီအလုပ်အမှုဆောင်အဖြစ်ကနေ ထွက်ထားတာ ၂၀၁၆ ခုနှစ်ကတည်းက ဖြစ်တယ်လို့ ပြောပါတယ်။

    မြင်းခြံမြို့က NLD ပါတီရုံး အပိတ်ခံရပြီးနောက်မှာ ပျူစောထီးရဲ့စာရင်းထွက် လာတာဖြစ်သလို စာရင်းထဲက လူ ၂ ဦးထက်မနည်းဟာ မြို့နယ်အဆင့် ပါတီခေါင်းဆောင်ဟောင်းတွေဖြစ်ပေမဲ့ စာရင်းထဲမှာတော့ တာဝန်ထမ်းဆောင်ဆဲလို့ဖော်ပြထားလို့ နောက်ဆုံးအချက်အလက်မဟုတ်တာကို မြို့ခံတချို့က ထောက်ပြပါတယ်။

    မြို့နယ်အဆင့်ပါတီခေါင်းဆောင်တစ်ဦးကလည်း ရုံးကို ဝင်ရှာမခံရခင် ပါတီဝင်တွေရဲ့စာရင်းအဟောင်းတွေကို ရှင်းလင်းပြီးဖြစ်လို့ ဒီလိုစာရင်းအဟောင်းတွေ ဘယ်နေရာကနေ ကျိုးပေါက်ပြီး ပျူစောထီးဘက်က ရသွားလဲဆိုတာ မေးခွန်းထုတ်ထားပါတယ်။

13. ၃ ဇူလိုင် ၂၀၂၁ဒီပဲယင်း အပြန်အလှန်ပစ်ခတ်မှု အရပ်သားအပါအဝင် ဒေသPDFဘက်က ၁၀ ဦးကျော် သေဆုံး

    ဒီပဲယင်းမြို့နယ် ၊ အနောက်ဘက်ခြမ်းက ဆပ်ပြာကျင်းကျေးရွာကို စစ်ကောင်စီတပ်ဖွဲ့တွေ မနေ့က မနက် ၆နာရီဝန်းကျင်လောက်က ရောက်ရှိလာပြီးနောက် ပစ်ခတ်မှုတွေဖြစ်ခဲ့ရာက နှစ်ဖက်အထိအခိုက်အကျအဆုံးရှိခဲ့တယ်လို့ ဒီပဲယင်း PDFအဖွဲ့က ဒီကနေ့ ထုတ်ပြန်ပါတယ်။

    PDF ဘက်က ထိခိုက်ဒဏ်ရာရရှိသူ ၁၀ ဦးဝန်းကျင်နဲ့ သေဆုံးသူ ၉ ဦးရှိခဲ့တယ်လို့ ဒေသ PDFဘက်က ကနဦး ထုတ်ပြန်ပါတယ်။

    ဒေသခံပြည်သူတချို့ကို ဘီဘီစီက ညနေ ၄နာရီခွဲဝန်းကျင်မှာ ဆက်သွယ်မေးမြန်းချက်တွေအရတော့ သေဆုံးသူ ၁၇ ဦးရဲ့ ရုပ်အလောင်းတွေကို ကောက်ယူပြီးဖြစ်တယ်လို့ ပြောပါတယ်။

    "အခု ဒီနေ့မှ စစ်တပ်က နေရာရွှေ့သွားတော့မှ အနီးအနားကရွာတွေက သေတဲ့သူတွေကို ထွက်ကောက်ရတာ။ အခုထိ ကောက်နေတုန်းပဲ။ အခုကောက်ထားတဲ့အလောင်းတွေထဲမှာ ရိုးရိုးအရပ်သား ပါသလား ဘာလားတော့ သေချာမသိရသေးဘူး။ တပ်ကရွာတွေထဲ လက်နက်ကြီးတွေနဲ့ပါ ပစ်တာ ရှိလို့ ရိုးရိုးအရပ်သားတွေလည်းထိတာရှိတယ်။ အခုက နှောထဲဘက် တပ်က တစ်ဖွဲ့ခွဲပြီး ဝင်နေတယ်။ စစ်တာ ပစ်တာတွေရှိတယ်ပြောတယ်။ ဆပ်ပြာကျင်းဘက်က ရွာတွေဘက်က တချို့ကတော့ပြေးနေတော့ ဆက်သွယ်လို့မရတာလည်းရှိတယ်"လို့ ဒီပဲယင်းဒေသခံတစ်ဦးက ဘီဘီစီကိုပြောပါတယ်။

    စစ်ကောင်စီတပ်ဘက်မှာလည်း ဒဏ်ရာရသူ ၇ ဦးနဲ့ သေဆုံးသူ ၄ ဦး လောက် ရှိတယ်လို့ ဒီပဲယင်း PDF က ထုတ်ပြန်ထားပေမယ့် စစ်ကောင်စီဘက်က တစ်စုံတစ်ရာထုတ်ပြန်တာမျိုး မရှိသေးပါဘူး။

    မနေ့က ပစ်ခတ်မှုအတွင်း စစ်ကောင်စီတပ်တွေဘက်က ကား ၄ စီး၊အင်အား ၁၅၀ ခန့် ဝင်ရောက်လာတဲ့အတွက် ဆပ်ပြာကျင်းကျေးရွာ၊ဘုတ်ရွာ၊ အုန်းဒင်၊ ကျွန်းတောကြီး၊ ကျွန်းတောလေး၊ အင်ပင်နဲ့ အနီးနားက ကျေးရွာသားတွေ ထွက်ပြေးတိမ်းရှောင်ခဲ့ကြရတယ်လို့ သိရပါတယ်။

    ဒါ့အပြင် ကျီစုရွာအနီးက လမ်းသွားလမ်းလာ ၂ ဦးကိုလည်း စစ်ကောင်စီတပ်တွေက ပစ်ခတ်ခဲ့အတွက် ကျည်ထိမှန်ပြီး ဆေးကုသနေရတယ်လို့ သိရပါတယ်။

    "မြို့ပေါ်မှာလည်း ပစ်တာခတ်တာလုပ်တယ်။ နေ့လယ်လောက်ကလည်း ကျွန်မတို့နားက အိမ်က ကောင်လေးတယောက် အပြင်သွားတာ ဆိုင်ကယ် မရပ်ပေးလို့ဆိုပြီး ပစ်ဖမ်းတယ်။ ကျည်ထိမထိတော့ သေချာမသိရပေမယ့် ဖမ်းထားတယ်"လို့ ဒီပဲယင်းမြို့ပေါ်နေထိုင်သူတစ်ဦးက ဘီဘီစီကိုပြောပါတယ်။

    

    ဓာတ်ပုံ ရင်းမြစ်, CJ

14. ၃ ဇူလိုင် ၂၀၂၁တာမွေက မိုင်တဲလ်အရောင်းဆိုင်မှာ ဗုံးပေါက်

    

    ဓာတ်ပုံ ရင်းမြစ်, screen grab

    ရန်ကုန်မြို့၊ တာမွေမြို့နယ်ထဲမှာရှိတဲ့ ၁၅၅ လမ်းနဲ့ ၁၅၆ လမ်းကြား၊ ကျိုက္ကဆံ လမ်းမပေါ်မှာက မိုင်တဲလ်(Mytel)အရောင်းဆိုင်မှာ ဒီနေ့ ဇူလိုင်လ ၃ ရက်မှာ ပေါက်ကွဲမှုတစ်ခုဖြစ်ခဲ့တယ်လို့ အနီးနားမှာနေထိုင်သူတွေက ပြောပါတယ်။

    ''နေ့လယ် ၂ နာရီကျော်ကျော်လောက်မှာ ပေါက်ကွဲမှုဖြစ်တယ်။ အထဲမှာဆိုတော့ အသံက အကျယ်ကြီး မကြားခဲ့ရဘူး။ ပေါက်ကွဲမှုအပြီး ဆိုင်ထဲမှာ ထိခိုက်ဒဏ်ရာရသူရှိမလားဆိုပြီး ဝင်ရှာတော့ မီးခိုးတွေ အူနေတာပဲ ရှိတော့တယ်။ အထဲမှာတော့ အပျက်အစီးဖြစ်သွားတယ်။ နောက်ထပ်ဗုံးပေါက်ကွဲမှာ စိုးပြီး ကျွန်တော်တို့လည်း ဆိုင်ထဲကနေ ပြန်ထွက်လာခဲ့တယ်'' လို့ ပေါက်ကွဲမှုဖြစ်တဲ့သတင်းကြားလို့ အခင်းဖြစ်တဲ့နေရာကို ကူညီဖို့ သွားခဲ့တဲ့ ပရဟိတအဖွဲ့ဝင်တစ်ဦးက ပြောပါတယ်။

    အနီးနားမှာရှိသူတွေရဲ့ပြန်ပြောပုံအရဆိုရင် လူနှစ်ယောက်က မွေးနေ့ဆုတောင်းလုပ်မယ်ဆိုပြီး ရုံးထဲက လူတွေကို ထွက်ခိုင်းခဲ့ပြီးနောက်မှာ ပေါက်ကွဲခဲ့တာလို့လည်း သူက ပြောပါတယ်။

    လက်ရှိမှာ စစ်ကောင်စီတပ်တွေက ကျိုက္ကဆံလမ်းမပေါ်မှာ အင်အား ၂၀ လောက်နဲ့ လုံခြုံရေးယူနေပေမဲ့ ကားတွေကို စစ်ဆေးဟန့်တားတာမျိုးတော့ မရှိဘူးလို့ သိရပါတယ်။

    ပြီးခဲ့တဲ့ရက်ပိုင်းကလည်း တာမွေ၊ မေတ္တာညွန့်ရပ်ကွက်ထဲက မြန်မာ့စီးပွားရေးဘဏ်မှာ လုံခြုံရေးယူနေတဲ့ ရဲတစ်ဦး ပစ်ခတ်ခံခဲ့ရလို့ ပစ်ခတ်သူနောက်ကို လိုက်ရင်း စစ်ကောင်စီတပ်တွေက ရပ်ကွက်ထဲ သေနတ် ၅ ချက်ထက်မနည်း ပစ်ဖောက်ခဲ့ပါတယ်။

    တချိန်တည်းမှာပဲ ဒီနေ့ ဇူလိုင်လ ၃ ရက်ဟာ အာဏာသိမ်းစစ်ခေါင်းဆောင်ရဲ့မွေးနေ့ဆိုပြီး နေရာ တော်တော်များများမှာ ဆန့်ကျင်ဆန္ဒပြတာတွေရှိနေပါတယ်။

15. ၃ ဇူလိုင် ၂၀၂၁အင်းစိန် စီအိုင်ဒီ သင်တန်းကျောင်းက ရဲတပ်ဖွဲ့ဝင် တွေ ကိုဗစ်ကူးစက်ခံရမှု စစ်ကောင်စီအတည်ပြု

    အင်းစိန် စီအိုင်ဒီ သင်တန်းကျောင်းမှာ ရဲတပ်ဖွဲ့ဝင် ၁၀၀ ကျော် ကိုဗစ် ကူးစက်ခံထားရတဲ့ သတင်း ဟုတ်မှန်ကြောင်း စစ်ကောင်စီရဲ့ သတင်းထုတ်ပြန်ရေးအဖွဲ့က အတည်ပြုပါတယ်။

    ဒီနေ့ ဇူလိုင် ၃ ရက်မှာ သတင်းထုတ်ပြန်ရေးအဖွဲ့က သတင်းမီဒီယာတချို့ရဲ့ ဒီအကြောင်းမေးမြန်းချက်ကို ဟုတ်မှန်ကြောင်း ပြန်လည်ဖြေကြားခဲ့တာဖြစ်ပါတယ်။

    ကူးစက်ခံထားရတဲ့ဒီသင်တန်းသားတွေကို ဘယ်လိုဆက်လက် ကုသပေးနေသလဲ၊ အသွားအလာကန့်သတ်မှုတွေထားရှိထားသလားဆိုတော့ မသိရသေးပါဘူး။

    လက်ရှိမှာ မြန်မာနိုင်ငံရဲ့ ကိုဗစ်တတိယလှိုင်းမှာ ကူးစက်ဖြစ်ပွားမှုတွေ ပြန်လည်မြင့်တက်နေတာဖြစ်ပြီး stay at home သတ်မှတ်ထားတဲ့ မြို့နယ်ပေါင်းကလည်း တစ်နိုင်ငံလုံးမှာ ၂၃ မြို့နယ်ရှိလာပြီဖြစ်ပါတယ်။ လူနာတွေ့ရှိနှုန်းဟာ ဒီတတိယလှိုင်းမှာ နှစ်ထောင်အထက်ကို ဇူလိုင် ၁ ရက်နေ့မှာ အမြင့်ဆုံးကို ရောက်ရှိခဲ့ပြီး မနေ့ ဇူလိုင် ၂ ရက်ည ထုတ်ပြန်ချက်အရ ကိုဗစ်လူနာသစ် ၁၈၆၃ ဦး ရှိခဲ့ပါတယ်။

    

    ဓာတ်ပုံ ရင်းမြစ်, Getty Images

16. ၃ ဇူလိုင် ၂၀၂၁ရန်ကုန်က စစ်အာဏာသိမ်းဆန့်ကျင်ဆန္ဒပြပွဲမြင်ကွင်းများ

17. ၃ ဇူလိုင် ၂၀၂၁မန္တလေးက သပိတ်စစ်ကြောင်း ဖြိုခွင်းခံရပြီးနှစ်ဦး ဖမ်းဆီးခံရ

    မန္တလေးမြို့မှာ စစ်အာဏာသိမ်း ဆန့်ကျင်ရေး ဆန္ဒပြသပိတ်ကို ဒီနေ့ (ဇူလလိုင် ၃ ရက်မှာ နာရေးပုံစံပါတဲ့ သရုပ်ဖော်ပြကွက်ပုံစံမျိုးစုံနဲ့ ပြုလုပ်ကြပါတယ်။

    စစ်အာဏာသိမ်းပြီးနောက် ငါးလကျော်ကြာတဲ့အထိ မန္တလေးက လူထုသပိတ်တွေကို နေ့စဉ်မပျက် ပြုလုပ်နေကြတာလည်း ဖြစ်ပါတယ်။ ဒီမနက်ပိုင်း ဆန္ဒပြသပိတ်မှာ မန္တလေး တကသ သပိတ်စစ်ကြောင်းက ဖြိုခွင်းခံရပြီးနှစ်ဦး ဖမ်းဆီးခံရပါတယ်။

    ချမ်းမြသာစည်၊ အောင်မြေသာစံ ပညာရေးကျောင်းပေါင်းစုံ၊ မန္တလာ တကသ၊ မဟာမိတ် တပ်ပေါင်းစုသပိတ်တွေကတော့ အောင်မြင်စွာ လူစုခွဲ ဆန္ဒပြနိုင်ခဲ့တယ်လို့ ဆန္ဒပြပါဝင်သူ လူငယ်တွေက ပြောပါတယ်။

    

    ဓာတ်ပုံ ရင်းမြစ်, CJ

18. ၃ ဇူလိုင် ၂၀၂၁ကလေးမြို့က ကိုဗစ်တတိယလှိုင်းမှာ သေဆုံးသူ ၃၀၀ ကျော်ရှိပြီ

    

    ဓာတ်ပုံ ရင်းမြစ်, Khonumthung

    စစ်ကိုင်းတိုင်းဒေသကြီး၊ ကလေးမြို့မှာ သန္ဓေပြောင်း ကိုဗစ်နိုင်တင်းရောဂါပိုး ကူးစက်မှုတွေ စတင်တဲ့ မေလကုန်ပိုင်းကနေစလို့ ဇူလိုင်လ ၁ ရက်အထိ သေဆုံးသူ ၃၀၀ နီးပါးအထိရှိလာတယ်လို့သိရပါတယ်။

    လက်ရှိ ကလေးမြို့မှာ ကိုဗစ်ကြောင့်သေဆုံးသူ တရက်ကို (၂၀) ဦးခန့်ရှိနေတာကြောင့် သေဆုံးသူ ရာချီလာတာလို့ မြို့ခံလူမှုကူညီရေးအသင်းအသင်းတွေက ပြောပါတယ်။

    ကိုဗစ်ကူးစက်မှုတွေဟာ မေလကုန်ပိုင်းကစတင်ပြီး ဇွန်လဆန်းပိုင်းအရောက်မှာ ကူးစက်နှုန်းများလာသလို လူသေဆုံးမှုတွေလည်း မြင့်တက်လာတာဖြစ်ပါတယ်။

    ကလေးမြို့မှာ covid ကြောင့်သေဆုံးသူတွေအနေနဲ့ ဆေးရုံနဲ့ ရောဂါစောင့်ကြည့်စင်တာတွေမှာစစ်ဆေးအတည်ပြုပြီးသေဆုံးသူတွေရှိနေသလို အိမ်မှာဆေးကုသရင်း ကိုဗစ်လက္ခဏာနဲ့သေဆုံးသူတွေလည်းရှိနေတာဖြစ်ပါတယ်။

    လက်ရှိမှာတော့ ကလေးမြို့မှာ ကိုဗစ်ကြောင့် အောက်ဆီဂျင်ရှူနေရသူ(၃၀၀၀)ဝန်းကျင်ခန့်ရှိနေပြီး တရက်ကို အောက်ဆီဂျင်ဗူးကြီးအလုံး ၅၀၀ နဲ့ ၆၀၀ ကြား မျှဝေပေးနေရတယ်လို့ အောက်ဆီဂျင်မျှဝေပေးနေရတဲ့ ကလေးမြို့စေတနာ့ဝန်ထမ်းအသင်းဥက္ကဋ္ဌကပြောပါတယ်။

    တဖက်မှာလည်း ရောဂါပိုးတွေ့သူရော၊ သေဆုံးသူပါ နေ့စဉ်များနေတာကြောင့် သယ်ယူပို့ဆောင်ရေးကူညီဆောင်ရွက်ပေးနေရတဲ့ လူမှုကူညီရေးအသင်းအဖွဲ့တွေအတွက် တစ်ကိုယ်ရည်သုံးရောဂါပိုးကာကွယ်ရေးဝတ်စုံ (PPE)နဲ့ နှာခေါင်းစည်း (mask) တွေလိုအပ်နေသလို အောက်ဆီဂျင်အလှူရှင်တွေလည်း လိုအပ်နေတယ်လို့သိရပါတယ်။

    ကလေးမြို့မှာ ကိုဗစ်ထိန်းချုပ်ကုသရေးနဲ့ပတ်သက်လို့ ပြီးခဲ့တဲ့ မေ လ ၂၄ ရက် ကစတင်ပြီး ကူညီဆောင်ရွက်ပေးနေကြတဲ့ စေတနာ့ဝန်ထမ်း ၈ ဦး၊ ကျန်းမာရေးဝန်ထမ်း ၁၅ ဦးနဲ့ ကြက်ခြေနီဝန်ထမ်း ၂ ဦးလည်း covid ကူးစက်ခံထားရတယ်လို့ စေတနာ့ဝန်ထမ်းဆရာမတဦးကပြောပါတယ်။

    အိမ်တွေမှာဆေးကုသနေတဲ့သူတွေအနေနဲ့လည်း လက်ရှိမှာဆေးဆိုင်အများစုပိတ်ထားတဲ့အတွက် လိုသလိုဆေးဝယ်လို့မရတဲ့ အခက်အခဲတွေ၊ အောက်ဆီဂျင်ဗူးမဝယ်နိုင်တဲ့အခက်အခဲတွေလည်း ရှိနေတဲ့အတွက် ရေရှည်အတွက် စိုးရိမ်ရတဲ့အခြေအနေရှိနေတယ်လို့မြို့ခံတဦးကဆိုပါတယ်။

    လက်ရှိဖြစ်ပွားနေတဲ့ သန္ဓေပြောင်း covid ဟာကူးစက်မြန်တာကြောင့် Covid ကြောင့် သေဆုံးသူတွေကိုသင်္ဂြိုဟ်တဲ့နေရာမှာ အိမ်မှာကုရင်းသေဆုံးသွားသူတွေရဲ့မိသားစုဝင်တွေအနေနဲ့ ကူညီဆောင်ရွက်ပေးသူတွေ လုံခြုံမှုရှိစေဖို့ ရောဂါကိုဖုံးကွယ်မထားဘဲ ကြိုတင်အသိပေးဖို့လိုအပ်တယ်လို့လဲ သင်္ဂြိုဟ်စက်တာဝန်ခံက တိုက်တွန်းပြောဆိုထားပါတယ်၊

19. ၃ ဇူလိုင် ၂၀၂၁ကျိုက်မရောမြို့က အချုပ်သားနဲ့ရဲ ၂ ဦးမှာ ကိုဗစ်ပိုးတွေ့

    

    ဓာတ်ပုံ ရင်းမြစ်, CJ

    မွန်ပြည်နယ်၊ ကျိုက်မရောမြို့က အချုပ်သား ၁ ဦးနဲ့ ရဲ ၂ ဦးမှာ ဇူလိုင်လ ၂ ရက်နေ့တုန်းက ကိုဗစ်နိုင်တင်းရောဂါပိုးကူးစက်ခံထားရတယ်ဆိုတာတွေ့ထားပါတယ်။

    ''အချုပ်သားက ရုံးထုတ်ဖို့ရှိတယ်ဆိုတော့ သူ့ကို အရင်ဆေးစစ်ကြည့်တာ။ အဲဒီမှာ သူ့မှာ ပိုးတွေ့သွားတာ။ ပြီးတော့ သူ့ကို စောင့်ကြည့်တဲ့ ရဲ ၂ ယောက်ကို စစ်ကြည့်တာလည်း တွေ့တယ်။ အခုတော့ သူတို့ ကျိုက်မရောဆေးရုံမှာ ကုသမှုခံနေပြီ'' လို့ သူတို့ကို ဆေးရုံပို့ပေးခဲ့တဲ့အကူအညီပေးရေးအဖွဲ့က ပြောပါတယ်။

    လက်ရှိမှာ ကိုဗစ်တတိယလှိုင်းကြောင့် ကျိုက်မရောမြို့မှာ အတည်ပြုလူနာ ၁၀ ဦးအထိရှိလာပြီဖြစ်ပြီး အဲဒီထဲက ၇ ဦးဟာ မော်လမြိုင်ဆေးရုံမှာ ကုသမှုခံယူနေပါတယ်။

    ပိုးတွေ့ရဲ ၂ ဦးနဲ့ ဆက်စပ်တဲ့မိသားစုဝင်တွေကိုတော့ နေအိမ်မှာပဲ အသွားအလာကန့်သတ်ပြီး ရောဂါပိုး ကူးစက်ခံထားရမှု ရှိ၊မရှိ စောင့်ကြည့်နေပြီလို့ သိရပါတယ်။

    ကျိုက်မရောမြို့မှာ ပြီးခဲ့တဲ့ရက်ပိုင်းတုန်းကလည်း အထက်တန်းပြ ကျောင်းဆရာမတစ်ဦးမှာ ကိုဗစ်ပိုးတွေ့လို့ အဲဒီဆရာမတဲ့ ထိတွေ့တဲ့ ဆရာနဲ့ကျောင်းသူကျောင်းသား ၇၀ နီးပါးဟာ မြို့အားကစားရုံမှာ သံသယလူနာအနေနဲ့ အသွားအလာကန့်သတ်စောင့်ကြည့်မှုခံနေရပါတယ်။

20. ၃ ဇူလိုင် ၂၀၂၁လှိုင်သာယာမြို့နယ် ရွှေလင်ပန်း ၂၆ ရပ်ကွက် အုပ်ချုပ်ရေးမှူးရုံး ဗုံးကွဲ, သတင်းပေးလို့စွပ်စွဲခံရသူတစ်ဦးကိုလည်း ဓားထိုးမှုဖြစ်ပွား

    လှိုင်သာယာမြို့နယ် ရွှေလင်ပန်း ၂၆ ရပ်ကွက်မှာ ဒီနေ့ဇူလိုင် ၃ ရက်နေ့မနက်ပိုင်း ၉ နာရီဝန်းကျင်ခန့်က ရပ်ကွက်ရုံးဗုံးပေါက်ကွဲခဲ့တယ်လို့ အနီးနားနေထိုင်သူတွေက ပြောပါတယ်။

    ဒါ့အပြင် ဒီမနက်မှာပဲ လှိုင်သာယာမြို့နယ်တွင်း ဗုံးပေါက်ကွဲမှုအပြင် ဓားထိုးမှုတစ်ခုလည်း တချိန်တည်းဖြစ်ခဲ့တယ်လို့ အနီးနားနေထိုင်သူတွေက ပြောပါတယ်။

    ဗုံးပေါက်ကွဲမှုဖြစ်စဉ်ဟာ ရွှေလင်ပန်း ၂၆ရပ်ကွက် အုပ်ချုပ်ရေးမှူးရုံးမှာဖြစ်ခဲ့တာဖြစ်ပြီး စစ်ကောင်စီသတင်းပေးလို့ စွပ်စွဲခံရသူ ဓားထိုးခံရတာကတော့ ၂၃ ရပ်ကွက်မှာလို့ သိရပါတယ်။

    " ရွှေလင်ပန်း ၂၆ရပ်ကွက်ရုံးမှာတော့ ဗုံးကိုဆိုင်ကယ်နဲ့ရုံးထဲပစ်ထည့်သွားတာ ။ အုံးကနဲတချက်ကြားလိုက်တယ် ။ မီးခိုးလုံးတွေပါတက်လာတာ ။ ပစ်တဲ့သူကလည်းဆိုင်ကယ်နဲ့ပြေးတော့မမိလိုက်ဘူး ။လူထိခိုက်တာကြီးကြီးမားမားတော့မရှိပါဘူး ။ ရုံးအဖွဲ့ကတစ်ယောက်ပဲနည်းနည်းရှပ်ထိသွားတယ်။ အဲ့ဒါကိုစစ်နေတုန်းပဲမကြာဘူး ၂၃ ရပ်ကွက်ထဲက ဒလန်ကိုဓားနဲ့ဝင်ထိုးတာ ။ ဒလန်ရဲ့တပည့်တွေကလည်းပြန်ထိုးတယ်။ တစ်ယောက်သေတယ်ပဲကြားသေးတယ် ။ ဘယ်သူတွေလဲမသိရသေးဘူး" လို့ရွှေလင်ပန်းရပ်ကွက်ထဲနေထိုင်သူတစ်ဦးက ဘီဘီစီကိုပြောပါတယ်။

    လက်ရှိမှာ ပေါက်ကွဲမှု ဖြစ်စဉ်ကြောင့် ရွှေလင်ပန်းရပ်ကွက်ထဲက လမ်းတချို့ကိုပိတ်ဆို့စစ်ဆေးမှုတွေလုပ်နေတယ်လို့လည်းသိရပါတယ် ။ ဒါ့ပြင် ဒီနေ့ဇူလိုင် ၃ရက်နေ့မနက်ပိုင်းမှာ ရန်ကုန်မြို့ကမာရွတ် လှည်းတန်းအပါဝင်နေရာတော်တော်များများမှာ စစ်ကောင်စီတပ်ဖွဲ့ဝင်တွေလုံခြုံရေးအပြည့်ယူထားပြီး စစ်ဆေးမှုတွေလုပ်နေတယ်လို့ အနီးနားနေထိုင်သူတွေက ဘီဘီစီကိုပြောပါတယ်။

    

    ဓာတ်ပုံ ရင်းမြစ်, HTY Information

    

    ဓာတ်ပုံ ရင်းမြစ်, HTY Information