အာဆီယံခေါင်းဆောင်တွေနဲ့တွေ့ဆုံဖို့ ကုလအထူးကိုယ်စားလှယ် စီစဉ်နေ

တိုက်ရိုက် ထုတ်လွှင့်ချက်

1. ၁၉ ဧပြီ ၂၀၂၁ပစ်ခတ်သံတွေကြားက ဖားကန့်ပြည်သူတွေ စစ်ကောင်စီကို ဆက်ဆန္ဒပြ

   

   ဓာတ်ပုံ ရင်းမြစ်, cj

   ကချင်ပြည်နယ်၊ ဖားကန့်မြို့နယ်အတွင်း ဧပြီ ၁၈ ရက်နေ့ကတည်းက ဒီကနေ့အထိ အာဏာသိမ်းစစ်ကောင်စီတပ်တွေနဲ့ ကချင်လွတ်မြောက်ရေးတပ်KIA တို့ တိုက်ပွဲပြင်းထန်နေပြီး ဒေသခံပြည်သူတွေအနေနဲ့ လက်နက်ကြီးပစ်ခတ်သံတွေ ဆက်တိုက်ကြားနေရပေမဲ့ ညဆီမီးသပိတ်နဲ့ နေ့ခင်းလှည့်လည်ဆန္ဒပြမှုတွေကတော့ ရပ်တန့်မသွားဘဲ ဆက်လက်ဆန္ဒပြလျက်ရှိပါတယ်။

   

   ဓာတ်ပုံ ရင်းမြစ်, cj

   တာမခန်ကျေးရွာက ညဆီမီးသပိတ်မှာ နွေဦးတော်လှန်ရေးသူရဲကောင်းများအတွက် "တက်ကြွလှမ်းသစ် နှစ်ဆန်း(၁) XYZ" ဆိုတဲ့စာသားကို မီးထွန်းပုံဖော်ခဲ့ကြသလို ဒီကနေ့မနက် လုံးခင်းကျေးရွာအုပ်စု စုပေါင်းသပိတ်ကလည်း မနက် ၈ နာရီထဲက "We Need KIA" စာတမ်းတွေကိုင်ဆောင်ပြီး လှည့်လည်ဆန္ဒပြနေကြပါတယ်။

   အလားတူ ဖားကန့်မြို့ပေါ်ရပ်ကွက်တွေမှာလည်း စစ်ကောင်စီကို ဆန့်ကျင်တဲ့စာသားတွေကိုင်ဆောင်ပြီး ဆိုင်ကယ်သပိတ်နဲ့ ရပ်ကွက်တွင်း လှည့်လည်ဆန္ဒပြမှုတွေ ဆက်ရှိနေပါတယ်။

2. ၁၉ ဧပြီ ၂၀၂၁မြင်းခြံမြို့မှာ မနေ့ညနဲ့ ဒီနေ့မနက်ပစ်ခတ်မှု ဒဏ်ရာရသူ ၃ ဦး ထက်မနည်းရှိနေ

   

   ဓာတ်ပုံ ရင်းမြစ်, CJ

   မြင်းခြံမြို့မှာ စစ်ကောင်စီတပ်တွေက အမှတ် ၆ ရပ်ကွက်မှာရှိတဲ့ လူထု အဟန့်အတား သဲအိတ်တွေကို လာရောက်ဖြိုဖျက်ချိန် မနေ့ ဧပြီလ ၁၈ ရက် ညသန်းခေါင်အထိ ပစ်ခတ်မှုနဲ့ ဒီကနေ့ ဧပြီလ ၁၉ ရက် မနက်ပိုင်း ပစ်ခတ်မှုတွေအတွင်း ဒဏ်ရာရသူ ၃ ဦးထက်မနည်းရှိတယ်လို့ မြို့ခံတွေက ဘီဘီစီကို ပြောပါတယ်။

   စစ်ကောင်စီတပ်တွေက မနေ့ညပိုင်းက အမှတ် ၆ ရပ်ကွက်က သဲအိတ်တွေကို လာဖြိုချိန် အရပ်သား ၁ ဦးဒဏ်ရာရခဲ့ပါတယ်။

   ဒါ့ပြင် ဒီကနေ့ မနက်မှာ ရပ်ကွက်နေလူထုက သဲအိတ်တွေကို ပြန်စီဖို့ လုပ်ချိန် ပစ်ခတ်ခံရလို့ နောက်ထပ် ၂ ဦး ဒဏ်ရာရပြီး ၁ ဦးကိုပဲ ပြန်သယ်နိုင်ခဲ့တာကြောင့် ကျန်ခဲ့တဲ့ ၁ ဦးအခြေအနေ မသိရသေးဘူးလို့ မြို့ခံတွေက ပြောပါတယ်။

   မနေ့ည ပစ်ခတ်မှုတွေဖြစ်ချိန် မြို့ခံ ၂ ဦးထက်မနည်းဖမ်းဆီးခံခဲ့ရတယ်လို့ သတင်းတွေထွက်ပေါ်နေပေမဲ့ ဘီဘီစီက သီးခြားအတည်မပြုနိုင်သေးပါဘူး။

   ဒီနေ့ ၁၀ နာရီလောက်အထိ အမှတ် ၆ ရပ်ကွက်အပြင် မြို့အနှံ့ စစ်ကောင်စီတပ်တွေက ကင်းလှည့်နေပြီး မြို့ခံတွေ လုံခြုံရေးစိုးရိမ်ပြီး ဆိုင်တွေပိတ်၊ အပြင်မထွက်ကြလို့ မြို့ထဲမှာ လူသွားလူလာမရှိသလောက် ရှင်းလင်းနေတယ်လို့ မြို့ခံတွေက ပြောပါတယ်။

   မနေ့ညနေပိုင်းကလည်း မြင်းခြံမြို့ထဲက ကမ္ဘောဇဘဏ်ခွဲမှာ ပေါက်ကွဲမှုဖြစ်ခဲ့ပါသေးတယ်။

   အဲဒီမတိုင်ခင် မနေ့မနက်ပိုင်းကလည်း အမှတ် ၂ နယ်မြေရဲစခန်းနားမှာ စစ်ကောင်စီတပ်တွေက ပစ်ခတ်လို့ လူငယ်တစ်ဦး ကျည်ထိမှန်ခဲ့ပေမဲ့ မန္တလေးဆေးရုံကို ပို့နိုင်ခဲ့လို့ စိုးရိမ်စရာအခြေအနေ မရှိတော့ဘူးလို့ မြို့ခံတွေကနေ တဆင့်သိရပါတယ်။

   စစ်တပ်က အာဏာသိမ်းတဲ့ ဖေဖော်ဝါရီလ ၁ ရက်ကတည်းက ဆိုရင် မြင်းခြံမှာ စစ်ကောင်စီတပ်တွေပစ်ခတ်လို့ သေဆုံးသူ ၂၀ ကျော်အထိ ရှိနေပါတယ်။

3. ၁၉ ဧပြီ ၂၀၂၁မိုးမောက်က စစ်တပ်နဲ့ကေအိုင်အေ တိုက်ပွဲတွေကြောင့် ဒေသခံ ၂၀၀ ကျော် စစ်ရှောင်နေရ

   ကချင်ပြည်နယ် ဗန်းမော်ခရိုင်ထဲက မိုးမောက်မြို့နယ်မှာရှိတဲ့ မြို့သစ်၊ ကုန်းလော၊ စီဟတ်ကျေးရွာတွေမှာ စစ်ကောင်စီတပ်တွေက လက်နက်ကြီးတွေနဲ့ပစ်ခတ်နေတာကြောင့် ဒေသခံတွေ ၂၀၀ ကျော်ခန့် နေရပ်စွန့်ခွါပြေးနေကြရပါတယ်။

   စီဟတ်ကျေးရွာမှာရှိတဲ့ ဆက်သွယ်ရေးတာဝါတိုင်က ပစ်ခတ်နေတာကြောင့် အနားတဝိုက်နေထိုင်သူတွေဟာ ဗန်းမော် သိမ်တော်ကြီး ဘုရားကျောင်းဝန်းနဲ့ နီးစပ်ရာ ဆွေမျိုးနေအိမ်တွေမှာ ပုန်းရှောင်နေရတယ်လို့ မြို့ခံတစ်ယောက်က ပြောပါတယ်။

   ဧပြီလ ၁၇ ရက်နေ့တုန်းကလည်း ကချင်လွတ်လပ်ရေးတပ် (KIA)တပ်မဟာ ၅ နယ်မြေ ချီဖွေလမ်းဆုံမှာ တပ်စွဲထားတဲ့ စစ်ကောင်စီတပ်တွေနဲ့ KIA တို့ တိုက်ပွဲတွေ ဖြစ်ပွားခဲ့သလို KIA တပ်မဟာ ၈ ဘက်ကို စစ်သားတွေ တိုးဝင်လှုပ်ရှားလာတဲ့ စစ်ကောင်စီတပ်ဖွဲ့တွေနဲ့ နမ့်စီယို မှာ တိုက်ပွဲဖြစ်ပွားခဲ့တယ်လို့ KIA အာဘော်ဖြစ်တဲ့ လိုင်ဇာ FM သတင်းမှာဖော်ပြထားပါတယ်။

   ဒါ့ပြင် KIA တပ်မဟာ ၅ နယ်မြေ မုန်လွယ်ဘက်ကို စစ်ကောင်စီတပ်တွေက လက်နက်ကြီးနဲ့ ပစ်ခတ်ခဲ့သလို ခမရ ၄၃၈ က အလော့ဘွမ်ဘက်ကို ပစ်ခတ်ခဲ့တယ်လို့ ဆိုပေမဲ့ ဒီပစ်ခတ်မှုတွေနဲ့ပတ်သက်လို့ စစ်ကောင်စီဘက်က တစုံတရာ ထုတ်ပြန်တာမျိုးမရှိသေးပါဘူး။

   ပြီးခဲ့တဲ့ရက်ပိုင်းတုန်းကလည်း မြို့သစ်၊ ကုန်းလော၊ စီဟတ်ကျေးရွာတွေဘက်က တိုက်ပွဲတွေမှာ စစ်ကောင်စီတပ်တွေက ညဘက် လေယာဉ်တွေနဲ့ပါ ပစ်ခတ်လို့ နေအိမ်တွေ ပျက်စီးပြီး အရပ်သား ၅ ဦးထက်မနည်း သေဆုံးခဲ့တယ်လို့ ဒေသခံတွေက ဘီဘီစီကိုပြောထားဖူးပါတယ်။

   တချိန်တည်းမှာ ဖားကန့်မှာရှိတဲ့ အောင်ဘာလေ ကျေးရွာဘက်မှာလည်း စစ်ကောင်စီရဲ့တပ်စခန်းတခုကို KIA က မနေ့ ဧပြီလ ၁၈ ရက် ညနေပိုင်းမှာ တိုက်ခိုက်သိမ်းယူလိုက်တယ်ဆိုတဲ့သတင်းတွေ ထွက်နေပါတယ်။

4. ၁၉ ဧပြီ ၂၀၂၁မအူပင်မြို့မှာ ဆရာဝန် ၄ ဦးအပါအဝင် လူ ၅ ဦး ဖမ်းဆီးထိန်းသိမ်းခံရ

   ဧရာဝတီတိုင်းထဲက မအူပင်မြို့မှာ စစ်ကောင်စီတပ်တွေက အထွေထွေကုဆရာဝန် ၄ ဦးနဲ့ အရပ်သားအမျိုးသမီး ၁ ဦးကို အင်တာနက်ပြတ်တောက်ချိန် ဧပြီလ ၁၉ ရက် အစောပိုင်း မနက် ၁ နာရီကျော်မှာ နေအိမ်တွေထဲ ဝင်ရောက်ဖမ်းဆီးသွားတယ်လို့ မြို့ခံတွေက ဘီဘီစီကိုပြောပါတယ်။

   ဖမ်းဆီးခံရသူတွေဟာ အစိုးရဝန်ထမ်းဆရာဝန်တွေမဟုတ်ဘဲ အပြင်ဆေးခန်းဖွင့်ထားသူတွေဖြစ်ပါတယ်။

   ဒါ့ပြင် မအူပင်မြို့ခံ မကွေးဆေးတက္ကသိုလ် သင်ကြားရေးပိုင်းက CDM အထူးကုဆရာဝန်ကြီးတစ်ယောက်လည်း ဖမ်းဆီးခံလိုက်ရတယ်ဆိုတဲ့သတင်း မြို့ခံတွေကြား ကျယ်ကျယ်ပြန့်ပြန့်ထွက်ပေါ်နေပေမဲ့ ဘီဘီစီက ဒါကို အတည်ပြုဖို့ ကြိုးစားနေပါတယ်။

   လက်ရှိမှာ မနေ့ညက ဖမ်းဆီးခံလိုက်ရတဲ့ ဆရာဝန်တွေထဲက ၂ ဦးဟာ မအူပင်မြို့မရဲစခန်းမှာ ရှိနေပြီး မိသားစုနဲ့ တွေ့ဆုံခွင့်ရနေပေမဲ့ တစ်ညတည်း အဖမ်းခံလိုက်ရတဲ့တခြားလူတွေကို ဘယ်မှာ ဖမ်းဆီးထိန်းသိမ်းထားတယ်ဆို တာ မသိရဘူးလို့ နီးစပ်သူတွေက ပြောပါတယ်။

   ဖမ်းဆီးခံလိုက်ရတဲ့မြို့ခံဆရာဝန်တွေထဲက အများစုဟာ ဂရုဏာလူမှုကူညီရေးအသင်းရဲ့ ပရဟိတဆေးခန်းမှာ ဆေးခန်းထိုင်ပေးသူတွေဖြစ်လို့ သူတို့အခုလို ဖမ်းဆီးထိန်းသိမ်းခံရတာဟာ အသင်းအမှုဆောင်တချို့ ဖမ်းဆီးခံခဲ့ရတာနဲ့ ဆက်စပ်နေမလားဆိုတာ မြို့ခံတွေက မေးခွန်းထုတ်နေကြပါတယ်။

   စစ်တပ်က အာဏာသိမ်းပြီးတဲ့နောက် စစ်ကောင်စီတပ်တွေရဲ့အင်အားသုံးဖြိုခွင်းမှုတွေကို တုံ့ပြန်ဖို့ ရဲနဲ့စစ်သားတွေ၊ သူတို့မိသားစုဝင်တွေရဲ့သာရေး၊နာရေးကို ကူညီပေးတော့မှာမဟုတ်ဘူးလို့ ဂရုဏာကူညီရေးအသင်း အပါအ၀င် မအူပင်အခြေစိုက် ပရဟိတအဖွဲ့ ၁၄ ဖွဲ့က စာထုတ်ပြန်ခဲ့ပါတယ်။

   အဲဒီနောက်မှာ စစ်ကောင်စီဘက်က မအူပင်မြို့လယ်ကျောင်းမှာဖွင့်ထားတဲ့ ဂရုဏာလူမှုကူညီရေးအသင်းမှာ ထဲထဲဝင်ဝင်လုပ်နေသူတွေကို ဖမ်းဆီးတာ၊ ပုဒ်မ ၅၀၅ က နဲ့အမှုဖွင့်တာတွေပြုလုပ်နေပြီး မြို့ခံပရဟိတအသင်းတွေမှာ ဦးဆောင်ပါဝင်နေသူ၊ ဆက်နွှယ်ယ်သူ ၄ ဦးထက်မနည်းလည်း ဖမ်းဆီးခံထားရပါတယ်။

   

   ဓာတ်ပုံ ရင်းမြစ်, cj

5. ၁၉ ဧပြီ ၂၀၂၁"ငါတို့နိုင်မှာ" - မြန်မာအတွက်ရေးတဲ့ အိဒ်လစ်မြို့ နံရံပေါ်ကစာ

6. ၁၈ ဧပြီ ၂၀၂၁ဂျကာတာ ထိပ်သီးဆွေးနွေးပွဲနဲ့ NUG

7. ၁၈ ဧပြီ ၂၀၂၁အာဏာသိမ်း စစ်ကောင်စီ ဆန့်ကျင်ရေးလန်ဒန်မှာ ဆန္ဒပြ

   လန်ဒန်မြို့မှာ ဒီကနေ့ ဧပြီလ ၁၈ ရက်နေ့က အာဏာသိမ်း စစ်ကောင်စီ ဆန့်ကျင်ရေး ဆန္ဒပြပွဲတစ်ခု ပြုလုပ်ခဲ့ပြီး လူ ၆၀၀ခန့် အသံတိတ် ချီတက်ဆန္ဒပြခဲ့ကြတယ်လို့သိရပါတယ်။

   ဆန္ဒပြပွဲကို လန်ဒန်ရောက် မြန်မာတွေအပြင် ဒေသခံတွေလည်းပါဝင်ကြတာကိုတွေ့ရပါတယ်။

   

   ဓာတ်ပုံ ရင်းမြစ်, CJ

   

   ဓာတ်ပုံ ရင်းမြစ်, CJ

   

   ဓာတ်ပုံ ရင်းမြစ်, CJ

   

   ဓာတ်ပုံ ရင်းမြစ်, CJ

8. ၁၈ ဧပြီ ၂၀၂၁မြဝတီနယ်စပ်က စားသောက်ကုန်အချို့ တင်သွင်းခွင့်ပိတ်၊မှောင်ခိုစျေးကွက်ပြန်ဖြစ်လာနိုင်လို့ ကုန်သည်တွေပြော

   

   အချိုရည် မျိုးစုံ၊ကော်ဖီမစ်၊တီးမစ်နဲ့ နို့ဆီနို့စိမ်း စတဲ့ စားသောက်ကုန်လေးမျိုးကို မေလ ၁ ရက်နေ့မှ စပြီး တင်သွင်းခွင့်ပိတ်မယ်လို့ စစ်ကောင်စီရဲ့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက မြဝတီ ကုန်သွယ်ရေးဇုန် ကို အကြောင်းကြားစာပို့ထားကြောင်း မြဝတီကုန်သွယ်ရေးဇုန်ဥက္ကဋ္ဌ ဒေါ်သင်းသင်းမြတ်က ဘီဘီစီကိုပြောပါတယ်။

   ဒီစားသောက်ကုန်လေးမျိုးကို မြဝတီနယ်စပ်ကနေ တင်သွင်းခွင့်ယာယီပိတ်မှာဖြစ်ပြီးတော့ ပင်လယ်ရေကြောင်းကပဲ တင်သွင်းခွင့်ပြုမယ်လို့ ကြေငြာစာဖော်ပြထားပါတယ်။

   ပင်လယ်ရေကြောင်းက တင်ပို့မှုဟာ ယခုရက်ပိုင်းတင်ပို့ဖို့ အခက်အခဲရှိနေပြီး အများစုဟာ နယ်စပ်ကနေ ဝင်နေတာကြောင့် စျေးနှုန်းတွေတက်လာနိုင်သလို မှောင်ခိုတင်သွင်းမှုတွေဖြစ်လာနိုင်တယ်လို့ လည်းသူကပြောပါတယ်။

   မြန်မာနိုင်ငံ အတွင်းကို ထိုင်းနိုင်ငံထုတ် စားသောက်ကုန်တွေတင်ပိုမှုဟာ မြဝတီနယ်စပ်ကနေ တင်ပို့တာအများဆုံးဖြစ်ပြီး ၇၀ ရာခိုင်နှုန်းခန့်မြဝတီကနေ တင်ပို့နေတယ်လို့လည်း ကုန်သည်တွေကပြောပါတယ်။

9. ၁၈ ဧပြီ ၂၀၂၁ဂျပန် သတင်းထောက်တစ်ဦးကို စစ်ကောင်စီတပ်ဖွဲ့ဝင်တွေ အိမ်မှာဝင်ဖမ်း

   

   ဓာတ်ပုံ ရင်းမြစ်, CJ

   ရန်ကုန်မြို့ ပုဇွန်တောင်ရပ်ကွက် ရေကျော်လမ်းမကြီးပေါ်ရှိ တိုက်အမှတ် ၄၉ လေးလွှာမှာနေထိုင်တဲ့ ဂျပန်လူမျိုး သတင်းထောက်တစ်ဦးကို ပြီးခဲ့တဲ့နာရီပိုင်းက စစ်ကောင်စီတပ်ဖွဲ့ဝင်တွေ နေအိမ်မှာဝင်ဖမ်းသွားတယ်လို့ မျက်မြင်တွေ့သူ တစ်ဦးကပြောပါတယ်။

   အဲ့ဒီ သတင်းထောက်ကို လက်နှစ်ဖက်မြှောက်ခိုင်းပြီး စစ်ကောင်စီတပ်ဖွဲ့ဝင်တွေက ကားပေါ်တင်ခေါ်သွားတာတွေ့ရတယ်လို့လည်း သူကပြောပါတယ်။

   အဖမ်းခံရတဲ့သတင်းထောက်ဟာ ရန်ကုန်မြို့ မြေနီကုန်း ဖေဖော်ဝါရီလ ၂၆ ရက်နေ့ စစ်ကောင်စီအာဏာသိမ်းမှုကို ဆန့်ကျင်ဆန္ဒပြပွဲမှာ သတင်းယူစဥ် အဖမ်းခံခဲ့ရပြီးပြန်လွတ်လာခဲ့တဲ့ မစ္စတာ ယူကီခီတဇုမိဖြစ်ပြီးတော့ ၂၀၀၁ ခုနှစ်ကနေ ၂၀၁၂ ခုနှစ်အထိ နစ်ကေး သတင်းဌာနမှာ အလုပ်လုပ်ကိုင်ခဲ့ပြီး ရန်ကုန်မှာ နေထိုင်နေသူ အလွတ်သတင်းထောက်တစ်ဦးဖြစ်တယ်လို့ ဂျပန်သတင်းဌာနတွေက နေတစ်ဆင့် သိရပါတယ်။

10. ၁၈ ဧပြီ ၂၀၂၁မြင်းခြံ ကမ္ဘောဇဘဏ် ပေါက်ကွဲမှုဖြစ်

    

    ဓာတ်ပုံ ရင်းမြစ်, CJ

    

    ဓာတ်ပုံ ရင်းမြစ်, CJ

    မြင်းခြံမြို့ ကမ္ဘောဇဘဏ်မှာ ဒီကနေ့ ဧပြီလ ၁၈ ရက်နေ့ ညနေပိုင်းက ပေါက်ကွဲမှုဖြစ်ပွားခဲ့တယ်လို့ ဒေသခံတစ်ဦးက ဘီဘီစီကိုပြောပါတယ်။

    ဘီဘီစီကို ပေးပို့လာတဲ့ဒေသခံတွေရဲ့ ဓာတ်ပုံနဲ့ သတင်းအချက်အလက်တွေအရ ဗုံးလို့ယူဆရပြီး ပျက်စီးတဲ့ ပမာဏများတာကိုလည်း တွေ့ရပါတယ်။

    စစ်ကောင်စီရဲ့ မြန်မာ့ရုပ်သံကတော့ လက်လုပ်မိုင်းနဲ့လာရောက်ပစ်ခတ်တာဖြစ်တယ်လို့ ည ၈ နာရီသတင်းမှာ ထုတ်ပြန်ခဲ့ပါတယ်။

    ဒီနေ့ မနက်ပိုင်းကလည်း မြင်းခြံမြို့ စည်ပင်သာယာဈေးတောင်ဘက်မှာ စစ်ကောင်စီတပ်တွေက ပစ်ခတ်လို့ အရပ်သား ၂ ဦး ဒဏ်ရာရသွားပြီး သူတို့ထဲက ဦးခေါင်း ထိတဲ့တစ်ယောက်ဟာ စိုးရိမ်ရတယ်လို့ မြို့ခံတွေက ဘီဘီစီကို ပြောပါတယ်။

    ကမ္ဘောဇဘဏ်ဟာ အချို့မြို့နယ်တွေမှာ ဖွင့်ပေမဲ့ ဘဏ်ခွဲတွေအားလုံးမဖွင့်နိုင်သေးဘဲ သတ်မှတ်ထားတဲ့လုပ်ငန်းခွင်တွေကို ဧပြီလ ၂၉ ရက် နောက်ဆုံးထားပြီး အလုပ်ပြန်ဝင်ရမယ့်အချက်တွေကို သူ့ရဲ့ဘဏ်ဝန်တမ်းတွေကို ပြီးခဲ့တဲ့ရက်ပိုင်းက ပေးပို့ခဲ့ပါတယ်။

11. ၁၈ ဧပြီ ၂၀၂၁ထားဝယ် သပိတ်စစ်ကြောင်း ပစ်ခတ်ဖြိုခွင်းခံရ

    

    ဓာတ်ပုံ ရင်းမြစ်, Dawei Watch

    

    ဓာတ်ပုံ ရင်းမြစ်, Dawei Watch

    အာဏာသိမ်းစစ်ကောင်စီကို ဆန့်ကျင်ဆန္ဒပြတဲ့ ထားဝယ်ဆန္ဒပြစစ်ကြောင်းဟာ ဧပြီလ ၁၈ ရက် နေ့လယ်ပိုင်းမှာ ဖြိုခွဲခံခဲ့ရတယ်လို့ ထားဝယ်ဒေသခံတွေက တစ်ဆင့်သိရပါတယ်။

    သပိတ်စစ်ကြောင်းကို လူစုမခွဲမီ စစ်ကောင်စီတပ်တွေရောက်လာခဲ့ကြတဲ့အတွက် ဆန္ဒပြသူများက လူစုခွဲပြီး ထွက်ပြေးခဲ့ကြတယ်လို့လည်း သူတို့ကပြောပါတယ်။

    ဆန္ဒပြသူတွေကို လိုက်လံဖမ်းဆီးရာမှာ ဆန္ဒပြသူ အချို့ အဖမ်းခံရကြောင်း သိရပြီးအဲ့ဒီနောက်သေနတ်ပစ်ခတ်သံများကြားရတယ်လို့လည်းဒေသခံတွေကပြောပါတယ်။

    ဖမ်းဆီးခံရမှု နဲ့ထိခိုက်ဒဏ်ရာရသူတွေ အခြေအနေတွေနဲ့ ပတ်သက်လို့တော့ အတည်ပြုလို့မရသေးပါဘူး။

    သတင်းနှင့်ဓာတ်ပုံ

    Dawei Watch

12. ၁၈ ဧပြီ ၂၀၂၁ကနီမြို့နယ်ထဲမှာ စစ်ကောင်စီတပ်တွေက ပစ်ခတ်မှုတွေရှိနေ

    

    ဓာတ်ပုံ ရင်းမြစ်, CJ

    မုံရွာ ယာကြီး ကလေးဝ လမ်းပေါ်က ကနီမြို့နယ် လာပို့ ကျေးရွာတစ်ဝိုက်မှာ အာဏာသိမ်းစစ်ကောင်စီ တပ်တွေနဲ့ ဒေသခံတွေကြား ဒီကနေ့ ဧပြီလ ၁၈ ရက်နေ့မှာ ထိတွေ့မှုတွေရှိပြီး ပစ်ခတ်မှုတွေရှိနေတယ်လို့ ဒေသခံတစ်ဦးက ဘီဘီစီကိုပြောပါတယ်။

    စစ်ကောင်စီ တပ်ဘက်က လက်နက်ကြီးတွေနဲ့လည်းပစ်ခတ်မှုတွေရှိသလို စစ်ကောင်စီတပ်ဘက်က လည်းထိခိုက်ဒဏ်ရာရမှုတွေရှိတယ်လို့လည်း သူတို့ကပြောပါတယ်။

    ဒီဒေသက လူတွေဟာ ဒေသက အမဲလိုက် တူးမီးသေနတ်တွေနဲ့ ခုခံနေကြတာဖြစ်တာကြောင့် စစ်ကောင်စီဘက်က လက်နက် လူသူအင်အား အသာနဲ့တိုက်နေတာဖြစ်တယ်လို့လည်း သူတို့ကပြောပါတယ်။

    ဒီကနေ့ ထိခိုက်သေဆုံး ဒဏ်ရာရသူ အရေအတွက်ကို မသိရသေးဘူးလို့ သူတို့ကပြောပါတယ်။

    ပြီးခဲတဲ့ ဧပြီလ ၁၅ ရက်နေ့က မုံရွာကနေ ကနီကိုသွားတဲ့ အရပ်သား ကား တစ်စီးက ဒေသခံတွေက ကားတားတာကို ရပ်မပေးလို့ လည်ရှည်ဇရပ်က အဖွဲ့က လိုက်ကြရာမှာ၊ ကားထဲက လူက သေနတ်နဲ့ ပြန်ပစ်ပြီး ကားကို စွန့်ကာ တောထဲ ဝင်ပြေးသွားပြီးနောက် ရွာသားတွေကလည်း ကျန်ခဲ့တဲ့ ကားကို မီးရှို့လိုက် ကြရာကနေ စစ်ကောင်စီတပ်တွေနဲ့ ဒေသခံတွေ ပစ်ခတ်မှုတွေဖြစ်ခဲ့ကြတာဖြစ်ပါတယ်။

    မနေ့က ဒေသခံ ၂ ဦးသေဆုံးခဲ့ပြီး ပြီးခဲ့တဲ့ရက်ပိုင်းကတော့ ၆ ဦးသေဆုံးခဲ့တယ်လို့ ဒေသခံတွေက ပြောပါတယ်။

    ပြောက်ကျားပဲသွားတော့မယ်"ဆိုတဲ့ကနီ နယ်သားတွေ

13. ၁၈ ဧပြီ ၂၀၂၁ကျွန်းတောလမ်း ကားမီးလောင်တာကို ရဲတွေလာစစ်

    

    ဓာတ်ပုံ ရင်းမြစ်, CJ

    

    ဓာတ်ပုံ ရင်းမြစ်, CJ

    ရန်ကုန်မြို့ စမ်းချောင်း ကျွန်းတောလမ်းနဲ့ မဟာမြိုင်လမ်းထောင့်မှာ ရပ်ထားတဲ့ ကားတစ်စီး ဒီနေ့ ဧပြီလ ၁၈ ရက် နေ့လယ် ၃ နာရီကျော်လောက်က ရပ်ထားစဥ်မှာ မီးလောင်ကျွမ်းမှုဖြစ်ပွားခဲ့ပြီးနောက် ပေါက်ကွဲသံတွေကြားခဲ့ရတယ်လို့ ကျွန်းတောလမ်းမှာနေထိုင် မျက်မြင်တွေ့ရှိသူ တစ်ဦးက ဘီဘီစီကိုပြောပါတယ်။

    ပေါက်ကွဲသံတွေဟာ ကားတာယာနဲ့ ဆီတိုင်ကီတွေက ပေါက်ကွဲတာလို့ယူဆရပြီးတော့ မီးလောင်ပေါက်ကွဲ မှုဖြစ်ပြီးနောက် မီးသတ်တပ်ဖွဲ့က လာရောက်ငြိမ်းသတ်ခဲ့တယ်လို့သိရပါတယ်။

    ကားဟာ လင်ခရုဇာ အမျိုးစားလို့ သိရပြီး ကားမီးငြိမ်းသတ်ပြီးချိန်မှာ ကားပေါ်က ကျန်တဲ့ ပစ္စည်းတွေကို အဆိုတော် ယုန်လေးနေထိုင်တဲ့ တိုက်ခန်းဘက် ကို ရဲတပ်ဖွဲ့ဝင်တွေက သယ်ယူပေးနေတာကို တွေ့ရတယ်လို့လည်းသူကပြောပါတယ်။

    ဒီကားဟာ အဆိုတော် ယုန်လေးရဲ့ ကားလို့ စမ်းချောင်းရပ်ကွက်ကလူတွေက ပြောပေမဲ့ ဘီဘီစီ အနေနဲ့ သီးခြားအတည်ပြုနိုင်ခြင်း မရှိသေးပါဘူး။

    ရဲတပ်ဖွဲ့က ကားမီးလောင်မှုဖြစ်တဲ့နေရာကို ရောက်လာပြီး အနီးအနား ပတ်ဝန်းကျင်ကို စစ်ဆေးမှုတွေလုပ်တာတွေ့ရတယ်လို့လည်း ကျွန်းတောလမ်းမှာနေထိုင်သူတစ်ဦးကပြောပါတယ်။

14. ၁၈ ဧပြီ ၂၀၂၁တပ်ငြိမ်းချမ်းရေးအဖွဲ့ဘက်က KIO ဘက်ကို တွေ့ဆုံဖို့ ကမ်းလှမ်းခဲ့

    တပ်မတော်ရဲ့ဗဟိုပိုင်းက ငြိမ်းချမ်းရေးဆွေးနွေးပွဲမှာပါဝင်တဲ့ ဗိုလ်ချုပ်ကြီးခင်ဇော်ဦးတို့ဘက်က သူတို့နဲ့တွေ့ဆုံဖို့ ကချင်လွတ်လပ်ရေးအဖွဲ့ KIO/KIA ဘက်ကို ငြိမ်းချမ်းရေးအကျိုးတော်ဆောင်အဖွဲ့(PCG) ကနေတဆင့် စာပေးပို့ ကမ်းလှမ်းခဲ့တာမျိုးရှိတယ်လို့ PCG အဖွဲ့ပြောခွင့်ရသူ လမိုင်ဂွန်ဂျာက ဘီဘီစီကိုပြောပါတယ်။

    ဒါပေမဲ့ လက်ရှိမှာ KIO နဲ့တပ်ကြား တိုက်ပွဲတွေပြန်ဖြစ်နေတာ၊ ဘယ်သူက အစိုးရအဖြစ်ရပ်တည်နေလဲဆိုတာ ကွဲကွဲပြားပြားမရှိတဲ့အခြေအနေတွေကြောင့် လက်တလောတွေ့ဆုံဖို့ အဆင်မပြေသေးဘူးဆိုတာကိုပဲ ပြန်အကြောင်းပြန်ခဲ့တယ်လို့ သူက ပြောပါတယ်။

    လက်ရှိမှာ KIO ဘက်က မြို့ပေါ်အထိ စစ်မျက်နှာပြင်ဖွင့်ဖို့ အစီအစဉ်မရှိဘူးလို့ ပြောထားတဲ့အကြောင်း အကျိုးဆောင်အဖွဲ့က သိရှိထားပေမဲ့ အလောဘွမ်တပ်စခန်းမှာ တိုက်ပွဲပြင်းထန်နေတာ၊ တပ်ဘက်ကလည်း အင်အားဖြည့်တင်းတာတွေရှိနေတဲ့အပြင် လိုင်ဇာ၊ မိုင်ဂျာယန်အထိ ထိုးစစ်ဆင်လာနိုင်တဲ့အလားအလာကို KIO ဘက်က မြင်ထားတာကြောင့် တပ်လှန့်တဲ့အနေနဲ့ မြို့ပေါ်အထိ တာဝေးလက်နက်ကြီးတွေနဲ့ ပြန်ပစ်ခတ်တာတွေ့နေရတယ်လို့ လမိုင်ဂွန်ဂျာက ပြောပါတယ်။

    မနေ့ ဧပြီလ ၁၇ ရက်တုန်းကတော့ မြစ်ကြီးနားမြို့ မော်ဖောင်းကျေးရွာအနီးက မြောက်ပိုင်းတိုင်းစစ်ဌာနချုပ် လေတပ်စခန်း လက်နက်ကြီးနဲ့အပစ်ခံခဲ့ရတယ်လို့ မြစ်ကြီးနားအခြေစိုက်သတင်းတွေမှာဖော်ပြပါတယ်။

    ၂၀၁၁ ခုနှစ်ကလို့ ၂၀၁၈ ခုနှစ်အထိ တိုက်ပွဲတွေ ဆက်တိုက်ဖြစ်လာတဲ့ ကချင်ပြည်နယ်မှာ အဲဒီနောက်ပိုင်း ၂၀၂၀ အထိ တိုက်ပွဲတွေ မရှိသလောက်ဖြစ်ရာကနေ စစ်တပ်က အာဏာသိမ်းမှုစတဲ့ ၂၀၂၁ ခုနှစ် ဖေဖော်ဝါရီလ နောက်ပိုင်းက စလို့ တိုက်ပွဲတွေ တကြော့ပြန်ဖြစ်လာတာပါ။

    အရင်က ဧရာဝတီမြစ်အရှေ့ဘက်ခြမ်း လိုင်ဇာမှာ တိုက်ပွဲဖြစ်ပြီဆိုရင် အနောက်ဘက်ခြမ်းမှာ တိုက်ပွဲဖြစ်တာမျိုး မတွေ့ရပေမဲ့ အခုတော့ အရှေ့ခြမ်း၊ အနောက်ခြမ်းသာမက အရပ်လေးမျက်နှာ ပတ်ဝန်းကျင်မှာ တိုက်ပွဲတွေဖြစ်နေတာ၊ တပ်ဘက်ကလည်း အင်အားဖြည့်တင်းလာတာတွေကြောင့် ကချင်ပြည်နယ်ထဲ တိုက်ပွဲ ပြင်းထန်လာနိုင်တယ်လို့ သုံးသပ်မှုတွေရှိနေပါတယ်။

15. ၁၈ ဧပြီ ၂၀၂၁ပုဂ္ဂလိကဘဏ်ကမ္ဘောဇက ဝန်ထမ်းတွေကို လုပ်ငန်းခွင်ပြန်ဝင်ဖို့ စာပို့

    

    မြန်မာနိုင်ငံထဲက ပုဂ္ဂလိကဘဏ်လုပ်ငန်းတစ်ခုဖြစ်တဲ့ကမ္ဘောဇက သူ့ရဲ့ဝန်ထမ်းထောင်ချီကို လုပ်ငန်းခွင်ထဲပြန်ဝင်ဖို့ စာပို့လာတယ်လို့ ကမ္ဘောဇဘဏ်ဝန်ထမ်းတစ်ချို့က ဘီဘီစီကို အတည်ပြုပါတယ်။

    ဖုန်းစာတိုပို့စနစ်ကနေ ပို့လာတဲ့ အဲဒီစာထဲမှာ ဝန်ထမ်းက လုပ်ငန်းခွင်ပြန်ဝင်မယ်ဆိုတဲ့တာကို သက်ဆိုင်ရာ ဘဏ် မန်နေဂျာထံ ဧပြီလ ၂၀ ရက်မှာစာရင်းပေးရမယ့်အကြောင်း၊ အလုပ်လုပ်ရမယ့်အချိန်ဇယားနဲ့လုပ်ငန်းခွင်နေရာကို ဧပြီလ ၂၆ ရက်မှာ သိရှိထားပြီးဖြစ်ရမယ့်အကြောင်းနဲ့ သတ်မှတ်ထားတဲ့လုပ်ငန်းခွင်မှာ ဧပြီလ ၂၉ ရက် နောက်ဆုံးထားပြီး အလုပ်ပြန်ဝင်ရမယ့်အချက်တွေ ပါဝင်ပါတယ်။

    ဧပြီလ ၂၉ ရက်မှာ လုပ်ငန်းခွင်ထဲရှိမနေတဲ့ ဝန်ထမ်းတွေကို လုပ်ငန်းခွင်ပြန်မဝင်လိုတဲ့သူတွေ အဖြစ်သတ်မှတ် မှာဖြစ်လို့ ဒီအတောအတွင်း ကိုယ်တိုင်နုတ်ထွက်ခွင့် တင်နိုင်တယ်လို့လည်း ပို့စာမှာ ပါဝင်ပါတယ်။

    ဒီလိုလုပ်ငန်းခွင်ပြန်ဝင်ခိုင်းတာဟာ ဗဟိုဘဏ်ရဲ့ညွှန်ကြားချက်ကြောင့်လို့ဆိုပါတယ်။

    အဲဒီညွှန်ကြားချက်ကတော့ ဘဏ်တွေ၊ ငွေရေးကြေးရေးကုမ္ပဏီတွေနဲ့ မိုဘိုင်းငွေကြေးဝန်ဆောင်လုပ်ငန်းတွေဟာ နိုင်တွင်းဖြစ်နေတဲ့အခြေအနေအရပ်ရပ်ကြောင့် လုပ်ငန်းခွင်နဲ့ကင်းကွာနေတဲ့ ဝန်ထမ်းအချို့ကို အလုပ်ပြန်ဆင်းစေဖို့၊ လုပ်ငန်းခွင်ထဲပြန်မဝင်သူတွေကို အရေးယူဖို့၊ အဲဒီဝန်ထမ်းတွေရဲ့အချက်အလက်တွေကို တခြား ငွေကြေးအဖွဲ့အစည်းတွေကို ဖြန့်ဝေအသိပေးသွားဖို့ ဆိုတဲ့ ဗဟိုဘဏ်က မတ်လမှာ ထုတ်ခဲ့တဲ့ညွှန်ကြားချက်ကို ရည်ညွှန်းပြောဆိုတာဖြစ်ပါတယ်။

    လက်ရှိမှာ ကမ္ဘောဇဘဏ်ဝန်ထမ်းတွေအပါအ၀င် တခြားပုဂ္ဂလိကဘဏ်တွေက ဝန်ထမ်းတွေဟာ အစိုးရဝန်ထမ်းတွေ နည်းတူ လုပ်ငန်းခွင်မဝင်ဘဲ အာဏာဖီဆန်အကြမ်းမဖက်လှုပ်ရှားမှု (CDM) မှာ ပါဝင်နေကြပါတယ်။

    ကမ္ဘောဇဘဏ်လုပ်ငန်းဟာ မြန်မာနိုင်ငံတဝန်း ဘဏ်ခွဲပေါင်း ၅၀၀ အထိရှိပေမဲ့ လုပ်ငန်းခွင်မဝင်ကြတဲ့ ဝန်ထမ်းတွေကြောင့် လက်ရှိမှာ ဘဏ်ခွဲတွေနဲ့ ဘဏ်ဝန်ဆောင်မှုတွေကို အကန့်အသတ်နဲ့လည်ပတ်နေရပါတယ်။

16. ၁၈ ဧပြီ ၂၀၂၁မြင်းခြံမြို့မှာ ဒီနေ့မနက်ပိုင်းတုန်းက အရပ်သား ၂ ဦး အပစ်ခံရ

    မြင်းခြံမြို့က စည်ပင်သာယာဈေးတောင်ဘက်မှာ စစ်ကောင်စီတပ်တွေက ပစ်ခတ်လို့ အရပ်သား ၂ ဦး ဒဏ်ရာရသွားပြီး သူတို့ထဲက ဦးခေါင်း ထိတဲ့တစ်ယောက်ဟာ စိုးရိမ်ရတယ်လို့ မြို့ခံတွေက ဘီဘီစီကို ပြောပါတယ်။

    အပစ်ခံရအမျိုးသားသူတွေဟာ ဈေးတောင်ဘက် ဆန်ဆိုင်တစ်ဆိုင်ကဖြစ်ပြီး စစ်ကောင်စီတပ်တွေလာတယ်ဆိုလို့ ဆိုင်ပိတ်ဖို့လုပ်ချိန် အပစ်ခံခဲ့ရတာလို့လည်း မြို့ခံတွေက ပြောပါတယ်။

    မြင်းခြံမြို့မှာ ခရိုင်ရဲစခန်းအပြင် အမှတ် ၁ နဲ့ ၂ မြို့မရဲစခန်းတို့ ရှိပြီး ပစ်ခတ်မှုဟာ အမှတ် ၂ ရဲစခန်းအနားမှာဖြစ်ခဲ့တာပါ။

    လက်ရှိမှာ စစ်ကောင်စီတပ်တွေက လူထုက အဟန့်အတားလုပ်ထားတဲ့ အမှတ် ၆ ရပ်ကွက်ထဲအပြင် ဗိုလ်ချုပ်လမ်းမကြီးပဲခြားတဲ့ အမှတ် ၈ ရပ်ကွက်ထဲမှာပါ ပစ်ခတ်တာတွေလုပ်နေတယ်လို့သိရပါတယ်။

    မြို့ခံတွေအပြောအရ ပြီးခဲ့တဲ့ရက်ပိုင်း လူ ၃ ဦးသေဆုံးခဲ့တဲ့ နေ့ရော၊ ညပါ ပစ်ခတ်မှုတွေ ပြုလုပ်ခဲ့တဲ့ရေတပ်တပ်ဖွဲ့ဝင်တွေ မြို့ထဲမှာ မတွေ့တော့ဘဲ မနေ့ ဧပြီလ ၁၇ ရက်ကစလို့ လက်မောင်းတစ်ဆိပ်အသစ်နဲ့ စစ်ကောင်စီတပ်ဖွဲ့ဝင် အသစ်တွေကို မြင်နေရတယ်လို့ သိရပါတယ်။

    

    ဓာတ်ပုံ ရင်းမြစ်, CJ

17. ၁၈ ဧပြီ ၂၀၂၁NUG ကို ထောက်ခံကြိုဆိုတယ်လို့ KNU တပ်မဟာ ၅ ပြော

    

    အမျိုးသားညီညွတ်ရေးအစိုးရ(NUG) ဖွဲ့စည်းတဲ့အပေါ် ထောက်ခံကြိုဆိုတယ်လို့ စစ်ကောင်စီနဲ့ တိုက်ပွဲတွေဖြစ်နေတဲ့ ကရင်အမျိုးသားအစည်းအရုံး (KNU) တပ်မဟာ ၅ နယ်မြေပြောခွင့်ရသူ ပဒိုမန်းမန်းက ဘီဘီစီကို ပြောပါတယ်။

    ပြည်နယ်ပေါင်းစုပြည်ထောင်စုကို ဖော်ဆောင်မယ့် ဖက်ဒရယ်ပြည်ထောင်စုကြီးကို ဦးတည်နိုင်ဖို့ မျှော်လင့်ချက်ထားပြီး ထောက်ခံတာလို့ သူကပြောပါတယ်။

    ဒါ့ပြင် တချိန်ချိန်မှာ ဖက်ဒရယ်ဖွဲ့စည်းပုံအခြေခံဥပဒေအသစ်ပေါ်လာတဲ့အခါ လက်ရှိတိုင်းရင်းသားလက်နက်ကိုင် တော်လှန်ရေးတပ်ဖွဲ့တွေဟာ ဖက်ဒရယ်တပ်မတော်ဖြစ်လာမှာဖြစ်လို့ NUG အစိုးရအောက်က ကာကွယ်ရေးဌာနအနေနဲ့ လက်ရှိ ထိတွေ့တိုက်ပွဲတွေဖြစ်နေတဲ့ တိုင်းရင်းသားလက်နက်ကိုင်အဖွဲ့တွေကို ထိထိရောက်ရောက်အကူအညီပေးဖို့ပဲလိုမယ်လို့ သူက ပြောပါတယ်။

    ဖက်ဒရယ်တပ်ဖွဲ့စည်းပေါ်ပေါက်ဖို့အရေး KNU ဘယ်က ဘယ်လိုကူညီသွားမလဲဆိုတဲ့ ဘီဘီစီရဲ့မေးမြန်းမှုကို ပဒိုမန်းမန်းက ပြန်လည်ဖြေကြားခဲ့တာပါ။

    KNU တပ်မဟာ ၅ ဟာ တိုင်းရင်းသားလက်နက်ကိုင်တပ်ဖွဲ့တွေထဲမှာ NUG အစိုးရကို ထောက်ခံတဲ့အကြောင်း ပထမဆုံး တိတိလင်းလင်းထုတ်ပြောတဲ့အဖွဲ့လို့ ဘီဘီစီက နားလည်ထားရပါတယ်။

    လက်ရှိမှာ တခြားတိုင်းရင်းသားလက်နက်ကိုင်တော်လှန်ရေးအဖွဲ့တွေရော၊ တိုင်းရင်းသားပါတီတွေရော သွားနေတဲ့လမ်းကြောင်းဟာ ဖက်ဒရယ် ပြည်ထောင်စုတည်ဆောက်ဖို့ ဆိုတဲ့တူညီတဲ့လမ်းကြောင်းရှိနေပေမဲ့ သူတို့မှာရှိတဲ့အကန့်အသတ်တွေ၊ ရပ်တည်နေရတဲ့အခြေအနေတွေအပေါ် အများကြီးမူတည်နေလို့ NUG ကို ပွင့်ပွင့်လင်းလင်းထောက်ခံပြောဆိုတာမျိုးမရှိသေးတာလို့ ထင်မြင်ယူဆတဲ့အကြောင်း ပဒိုမန်းမန်းက ဆက်ပြောပါတယ်။

    ဒါ့ကြောင့် အမျိုးသားညီညွတ်ရေးအစိုးရ တဖြစ်လဲ ကြားကာလအစိုးရ(NUG)ရော၊ အစိုးရကို ဖွဲ့စည်းပေးခဲ့တဲ့ ပြည်ထောင်စုလွှတ်တော်ကိုယ်စားပြုကော်မတီ(CRPH)ကပါ ချမှတ်ထားတဲ့ ဖက်ဒရယ်ပဋိညာဉ်နဲ့အတူ တိုင်းရင်းသားတန်းတူညီမျှရေး၊ ကိုယ်ပိုင်ပြဌာန်းခွင့်နဲ့ကိုယ်ပိုင်အုပ်ချုပ်ခွင့်ရှိတဲ့ဖက်ဒရယ်ဖွဲ့စည်းပုံပေါ်ပေါက်လာဖို့ ဦးတည်ဆောင်ရွက်သွားမယ်ဆိုရင် ကျန်တဲ့တိုင်းရင်းသားတော်လှန်ရေးလက်နက်ကိုင်တွေ၊ တိုင်းရင်းသားပါတီတွေဟာ ဒီအပေါ် ငြင်းပယ်စရာအကြောင်းရှိမှာ မဟုတ်ဘူးလို့ သူက မှတ်ချက်ပေးသွားပါတယ်။

18. ၁၈ ဧပြီ ၂၀၂၁တောင်ဒဂုံထဲက ၁၈ ရပ်ကွက် အုပ်ချုပ်ရေးမှူးရုံး မီးလောင်

    

    ဓာတ်ပုံ ရင်းမြစ်, cj

    ရန်ကုန်တိုင်း၊ တောင်ဒဂုံမြို့နယ်ထဲက ၁၈ ရပ်ကွက် အုပ်ချုပ်ရေးမှူးရုံးမှာ ဒီနေ့ ဧပြီလ ၁၈ ရက်မနက်အစောပိုင်း ၂ နာရီခွဲကျော်ကျော်မှာ မီးလောင်ခဲ့တယ်လို့ ရပ်ကွက်နေပြည်သူတွေက အတည်ပြုပါတယ်။

    ဘယ်လိုစလောင်တယ်ဆိုတာမသိပေမဲ့ ရပ်ကွက်ရုံးဘက်က မီးခိုးလုံးတွေ တက်လာတယ်လို့ ရပ်ကွက်နေသူတွေ အချင်းချင်း လှမ်းပြောကြရာကနေ သိခဲ့ကြတာလို့ အနီးနားနေထိုင်သူတစ်ဦးက ပြောပါတယ်။

    ရပ်ကွက်ရုံးနဲ့ မနီးမဝေးမှာ မီးသတ်ရှိပေမဲ့ အဲဒီက မီးသတ်ကား ထွက်တာမတွေ့ဘဲ ည ၂ နာရီ ၅၀ မိနစ်လောက်မှ စည်ပင်လမ်းဘက်ကနေ မီးသတ်ကားတစ်စင်း တိုးတိုးတိတ်တိတ်ဝင်လာပြီး မီးငြိမ်းသတ်သွားတယ်လို့ ရပ်ကွက်နေသူတွေက ပြောပါတယ်။

    မီးလောင်ချိန်မှာ သင်္ကြန်ရက်ရုံးပိတ်ထားချိန်ဖြစ်လို့ ထိခိုက်ဒဏ်ရာရသူရှိတယ်ဆိုတာတော့ မကြားရဘူးလို့ ရပ်ကွက်နေသူတွေက ပြောပါတယ်။

    အဲဒီရုံးမှာ ပြီးခဲ့တဲ့ သီတင်း ၂ ပတ်လောက်က အရင်ရပ်ကွက်အုပ်ချုပ်ရေးမှူးကပဲ စစ်ကောင်စီတပ်ဖွဲ့ဝင်တွေ လုံခြုံရေးနဲ့ ရုံးလာထိုင်တာမျိုးရှိခဲ့ပြီး ဧည့်စာရင်းတိုင်ဖို့ နာရီပိုင်းဖွင့်ခဲ့တာမျိုးရှိတယ်လို့ သိရပါတယ်။

    ရပ်ကွက်ရုံးနဲ့ ကပ်လျက်မှာ အမှတ် ၂ အထက်တန်းကျောင်းဝန်းရှိပြီး အဲဒီကျောင်းအပိုင် လမ်းတစ်ဖက်ခြမ်းက ဝန်းထဲမှာ ကမ်းရိုးတန်းဒေသတိုင်းစစ်ဌာနချုပ် လက်မောင်းတံဆိပ်နဲ့ စစ်ကောင်စီတပ်တွေ တပ်စွဲနေတာ ၁ လနီးပါးလောက်ရှိနေပြီလို့လည်း ရပ်ကွက်နေသူတွေက ပြောထားပါတယ်။

    တောင်ဒဂုံဟာ မတ်လလယ်ကစလို့ စစ်အုပ်ချုပ်ရေး ကြေညာခံထားရတဲ့ ရန်ကုန်တိုင်း မြို့နယ် ၆ ခုထဲမှာ ပါဝင်ပါတယ်။

19. ၁၇ ဧပြီ ၂၀၂၁"ပြောက်ကျားပဲသွားတော့မယ်"ဆိုတဲ့ ကနီ နယ်သားတွေ

20. ၁၇ ဧပြီ ၂၀၂၁မုံရွာ-ယာကြီး-ကလေးဝလမ်းပိုင်းက တိုက်ပွဲအကြောင်း ဒေသခံတစ်ဦးပြောပြချက်

    ဧပြီလ ၁၅ ရက်နေ့ က မုံရွာ-ယာကြီး-ကလေးဝလမ်းပိုင်းက တိုက်ပွဲအကြောင်း ဒေသခံတစ်ဦး ပြောပြချက်