Azərbaycan və Ermənistan arasında döyüşlər 27 sentyabrda başlayıb və 10 noyabrda dayandırılıb. 10 noyabr bəyannaməsinə əsasən, Ermənistan noyabrın 20-də Ağdam rayonunu, noyabrın 25-də Kəlbəcər rayonunu geri qaytarıb. 1 dekabrda Laçın rayonu Azərbaycana qaytarılıb.
Şəklin mənbəyi, Brifinq
Azərbaycan Müdafiə Nazirliyinin mətbuat katibi, polkovnik-leytenant Anar Eyvazov bildirib ki, hazırda Ağdərə, Xocavənd və Qubadlı istiqamətində döyüşlər davam edir.
O bildirib ki, Azərbaycan humanitar atəşkəs rejiminə riayət etsə də, qarşı tərəf bunu etmir.
Erməni tərəfi hazırki döyüşlər barədə hələ ki açıqlama verməyib.
Azərbaycanın Baş Prokurorluğu bildirib ki, sentyabrın 27-dən bu günədək Ermənistan silahlı qüvvələri tərəfindən Azərbaycanın 91 nəfər dinc sakini öldürülüb, 404 dinc sakin yaralanıb.
2465 yaşayış evi, 97 çoxmənzilli yaşayış binası, 455 mülki obyekt yararsız vəziyyətə düşüb, qurum bildirib.
Şəklin mənbəyi, Azərtac
Prezidentin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib ki, Tərtər, Ağdam, Goranboy, Ağcabədi rayonları ağır artilleriya və digər atıcı silahlardan atəşə tutulub.
O qeyd edib ki, bu, Cenevrədə ATƏT-in Minsk Qrupunun həmsədrlərinin vasitəçiliyi ilə keçirilmiş görüşdən sonra baş verib.
“Bu gün səhər saat 06.00 radələrindən saat 12 radələrinə qədər bu rayonlar üzrə 6 qəsəbə və 26 kənd olmaqla 32 yaşayış məntəqəsinə Ermənistan silahlı qüvvələri tərəfindən 300-dən artıq mərmi atılmışdır,”- cənab Hacıyev deyib.
Hikmət Hacıyev bildirib ki, Cenevrə görüşlərinin keçildiyi gün Tərtər, Ağdam, Goranboy, Ağcabədi və Daşkəsən rayonlarına 200-dən artıq mərmi atılıb.
“Təəssüflə qeyd etməliyik ki, Tərtər şəhəri II Dünya müharibəsindən sonra Avropanın ən çox bombalar və raketlərin atıldığı şəhərlərindən biridir. 27 sentybardan bu günə qədər Tərtər rayonuna 15.000-dən artıq mərmi və raketlər atılmışdır,”- o bildirib.
Azərbaycan Prezidentinin köməkçisi deyib ki, muzdlular barədə propaqandası uğursuzluqla üzləşən Ermənistan ağ fosfor mövzusunda yeni dezinformasiyalar uydurur.
Onun sözlərinə görə, Ermənistan ağ fosforlu mərmilərdən istifadə edərək onun məsuliyyətini Azərbaycanın üzərinə atmağa çalışır.
“8 oktyabrda Ermənistan silahlı qüvvələri tərəfindən Füzuli rayonunun Arayapılı kəndinə atılmış mərminin fosfor olduğu müəyyən edilmiş və ANAMA tərəfindən zərərsizləşdirilmişdir. ANAMA tərəfindən bu fakt sənədləşdirilmişdir,” – o deyib.
Hikmət Hacıyevin sözlərinə görə, 2016-cı ilin aprel döyüşlərində də Ermənistan tərəfindən Tərtər rayonunun Əskipara kəndinə ağ fosfor mərmisi atıb. Və hərbi attaşelər və ATƏT-in nümayəndəsinin iştirakı ilə əkin sahəsinə düşmüş həmin mərmi yerində zərərsizləşdirilib.
“Hal-hazırda meşə yanğını formasında ekoloji terror törətmək və Azərbaycan silahlı qüvvələrinə qarşı istifadə etmək üçün Ermənistan silahlı qüvvələri tərəfindən Xocavənd istiqamətinə böyük həcmdə fosforun gətirildiyi barədə məlumatlar vardır,”- cənab Hacıyev deyib.
Azərbaycan Xarici İşlər Nazirliyi bildirib ki, Ermənistan silahlı qüvvələri Azərbaycan rayonlarında yaşayış sahələrini hədəf alır.
Qurum bu barədə Twitter-də yazıb.
"TƏCİLİ! Ermənistan silahlı qüvvələri Azərbaycanın Tərtər və Ağcabədi rayonlarında yaşayış sahələrini hədəf alır. Və bu, ATƏT-in Minsk qrupunun həmsədrlərinin Cenevrədəki görüşdən sonra humanitar atəşkəsə hörmət etməklə bağlı müraciətindən sonradır!"- qurum bildirib.
Bu məqalədə X məzmunu mövcuddur. Nə isə yüklənməmişdən əvvəl icazənizi istəyirik, çünki onlar kukilərdən və digər texnologiyalardan istifadə edə bilərlər. Qəbul etməzdən əvvəl X kuki siyasəti və gizlilik siyasəti barədə oxumaq istəyə bilərsiniz. Bu məzmunu görmək üçün "qəbul edin və davam edin".
Paylaşımın sonu X
Şəklin mənbəyi, Getty Images
Böyük Britaniya Dağlıq Qarabağ münaqişəsindən zərərçəkənləri qida və dərmanla təmin edəcək.
Böyük Britaniyanın bir milyon funt sterlinq yardım paketi çərçivəsində münaqişədən zərərçəkənlərə sarğı dəstləri və bint daxil olmaqla, ən çox ehtiyac duyulan tibbi ləvazimatlar veriləcək.
Böyük Britaniya bunu Beynəlxalq Qızıl Xaç Komitəsinin (BQXK) müraciətinə cavab olaraq edib və bildirib ki, bu yeni məbləğdir və BQXK-ya ayrılmış əsas maliyyə dəstəyinə əlavədir.
“Döyüşlərdə xəsarət alanlar, o cümlədən atəşə tutulan uşaqlar BQXK-nin dəstəyi ilə tibb müəssisələrində və ya təcili yardım xilasedicilərində həyatlarını xilas edəcək müalicə alacaqlar,”- Britaniyanın Xarici, Birlik və İnkişaf Ofisinin məlumatda deyilir.
Məlumata görə, yardım döyüş zonalarına yaxın yerləşən həssas sakinlərə yorğan, qida bağlamaları və zəruri gigiyena məhsulları ilə təmin ediləcək.
Bundan başqa yardım paketi çərçivəsində su anbarları və tualetlər tikilərək və ya şəraitləri yaxşılaşdırılaraq insanların sıx yerləşdirildiyi sığınacaqların keyfiyyətini artırmağa kömək edəcək, regionun sərt qış fəsli yaxınlaşdıqca sığınacaqların isti olması üçün lazımi şəkildə təchiz olunma təmin ediləcəkdir,"- məlumatda deyilir.
Britaniydanın Xarici İşlər naziri Dominic Raab tərəfləri ATƏT-in Minsk qrupu ilə əlaqə qurmağa və region xalqlarının ən çox ehtiyac duyduğu sülh, danışıqlar və siyasi həll yollarını axtarmağa çağırmağa davam etdiklərini deyib.
BQXK-nin Avrasiya üzrə Regional Direktoru Martin Schuepp Böyük Britaniyaya regiondakı işə verdiyi töhfəyə görə "çox minnətdar" olduğunu deyib.
Britaniyanın Xarici, Birlik və İnkişaf Ofisi bildrib ki, Böyük Britaniya Kanada ilə birlikdə dəfələrlə hər iki tərəfi ATƏT-in Minsk qrupunun vasitəsilə münaqişənin sülh yolu ilə, siyasi yolla həllinə çalışmağa çağırıb və Minsk Qrupunun fəaliyyətinə tam dəstəyini bildirib.
Bu məqalədə X məzmunu mövcuddur. Nə isə yüklənməmişdən əvvəl icazənizi istəyirik, çünki onlar kukilərdən və digər texnologiyalardan istifadə edə bilərlər. Qəbul etməzdən əvvəl X kuki siyasəti və gizlilik siyasəti barədə oxumaq istəyə bilərsiniz. Bu məzmunu görmək üçün "qəbul edin və davam edin".
Paylaşımın sonu X
Tanınmamış “DQR-in xilasetmə xidməti” Şuşanın yenidən atəşə tutulması barədə məlumat verir.
Məlumatda deyilir ki, səhər saatlarında "Azərbaycan hərbçiləri Xankəndini, günorta saatlarında – Xocavənd və Ağdərə şəhərlərini, indi isə Şuşanı atəşə tutublar."
Azərbaycan Müdafiə Nazirliyi səhər saatlarında Şuşanın və digər ərazilərin atəşə tutulması məlumatını təkzib etmişdi.
Azərbaycan Müdafiə Nazirliyi bildirir ki, qarşı tərəf Azərbaycanın yaşayış məntəqələrini atəşə tutur.
"Tərtər şəhəri, rayonun Şıxarx qəsəbəsi, Əskipara kəndi, eləcə də Ağcabədi rayonunun Qiyaməddinli kəndi düşmən tərəfindən artilleriya atəşinə tutulur,"- qurumun məlumatında deyilir.
Şəklin mənbəyi, BBC (Arxiv)
Rusiya Qarabağda hərbi vasitələrlə müdaxilə etmək istəməz, çünki onun üçün Azərbaycan və Türkiyə ilə münasibətlər vacibdir, rusiyalı hərbi ekspert hesab edir.
“Mən Rusiyanın iştirakını istisna edirəm. Azərbaycan, Rusiyanın onunla və Türkiyə ilə müharibəyə başlaması üçün çox önəmlidir” - İnterfaks agentliyinə ehtiyatda olan general-mayor, Rusiya Müdafiə Nazirliyi Beynəlxalq-Müqvilə İdarəsinin sabiq rəisi Yevgeni Bujinski deyib.
Ermənistan Baş naziri bir gün əvvəl Rusiya prezidentinə yardım üçün təcili məsləhətləşmələr başlamaq xahişi ilə rəsmən müraciət edib. Rusiya XİN-i bu gün cavab verib ki, Rusiya, Ermənistan ərazisinə hücum və ya hücum təhlükəsi olan təqdirdə, yardım göstərər.
Rusiya hələ ki həm Ermənistan, həm Azərbaycanla xoş münasibətləri qorumaq istəyir və bitərəfliyi gözləməyə çalışır.
Prezident İlham Əliyev bu gün bildirib ki, bu, bizimlə Ermənistan arasında olan döyüşdür və hər kəs ondan uzaqda durmalıdır.
Şəklin mənbəyi, President.az
Azərbaycan Prezidenti İlham Əliyev deyib ki, Azərbaycan kasetli raketlərdən istifadə etmir.
Ölkə başçısı bildirib ki, “Amnesty International” və “Human Rights Watch” təşkilatları Azərbaycana gəlmək üçün müraciət etməyiblər və məsələləri Ermənistan tərəfindən işıqlandırırlar.
O, həmçinin qeyd edib ki, bu qurumlar hökumətin dəvətindən sonra ölkəyə gəliblər.
İlham Əliyev oktyabrın 28-də Almaniyanın ARD televiziya kanalına müsahibə verib.
“… qoyun, gəlsinlər Gəncəyə, Tərtərə getsinlər demişik. Ermənilərin hücum etdiyi insanlarla görüşsünlər. Yenə də ballistik mərminin buraxılışı peykdən görünür. Heç kim deyə bilməz ki, biz Dağlıq Qarabağda və ya Ermənistanda mülki şəxslərin yaşadığı istənilən yerə ballistik raket atmışıq,”- İlham Əliyev jurnalistin təşkilatların Azərbaycana gəlmək üçün müraciət etdiklərini deməklərilə bağlı sualına cavabında deyib.
Jurnalist cənab Əliyevə Azərbaycanın BMT-nin kasetli silahları haqqında konvensiyasını imzalamadığını sual edib.
İlham Əliyev Ermənistanın da bu konvensiyanı imzaqlamadığını bildirib.
“Bizim hansısa konvensiyanı imzalamağımız və ya imzalamamağımız faktı bizim o silahdan istifadə etməyimiz və ya etməməyimiz anlamına gəlmir. Bizim kifayət qədər silah-sursatımız var… biz əraziləri bombalarla azad etmirik, biz əraziləri, kəndləri, şəhərləri bir-birinin ardınca işğaldan azad edən və Azərbaycan bayrağını ucaldan döyüşçülərimizlə azad edirik,”- prezident deyib.
İlham Əliyev deyib ki, müharibənin nə qədər davam edəcəyi Ermənistandan asılıdır.
“Biz bu gün dayanmağa hazırıq. Yeri gəlmişkən, bizim üç dəfə atəşkəsə razı olmağımız faktı hərbi toqquşmaları dayandırmaq və bu məsələni danışıqlar masasında, siyasi yolla həll etmək iradəmizi nümayiş etdirir. Lakin Ermənistan üç dəfə atəşkəsi kobud şəkildə pozmuşdur,”- o deyib.
Jurnalist yeddi rayonun hamısını azad etmək və sonra danışıqlar apararaq Dağlıq Qarabağın muxtariyyət zonası ilə bağlı bir razılığa gəlmək məqsəd deyilmi deyə sual verib.
İlham Əliyev deyib ki, bunu Azərbaycan da təklif edib, amma qarşı tərəf bunu rədd edib.
“Yeddi rayon bizə qaytarılmalıdır. Ermənilər heç vaxt bu rayonlarda yaşamayıblar. Üstəgəl, Dağlıq Qarabağdan qovulmuş azərbaycanlılar, - müharibədən əvvəl Dağlıq Qarabağda Azərbaycan əsilli 40 min insan var idi, - oraya qayıtmalıdır və plan belə icra olunmalıdır,”-prezident deyib.
İlham Əliyev deyib ki Azərbaycanın heç bir təsiri olmadan muxtar rayon müzakirələrin bir hissəsi olub, lakin bununla bağlı yekun razılığa gəlinməyib.
“Biz dəfələrlə eşitmişik ki, reallıqlar var və siz onları nəzərə almalısınız. Yaxşı. Biz dəyişdik reallıqları. İndi onlar bunları nəzərə almalıdır və bu, 27 il ərzində bizim onlara təklif etdiklərimiz ola bilsin, artıq öz qüvvəsini itirib. Ona görə indi biz müzakirələr aparmalıyıq və yeri gəlmişkən, Ermənistan hazır olduğu təqdirdə biz danışıqların yeni mərhələsinə başlamağa hazırıq,” – cənab Əliyev deyib.
İlham Əliyev Qarabağın niyə Azərbaycan üçün önəmli olmasından danışıb.
“Bu, bizim torpaqdır, beynəlxalq səviyyədə tanınan bizim ərazimizdir. Bu, resurslar məsələsi deyil. Əsas resurslar burada, Bakıdadır. Bu, ədalət məsələsidir, bu, milli qürur məsələsidir və bu, beynəlxalq hüquq məsələsidir,”- o deyib.
İlham Əliyev etnik təmizləmə iddialarını təkzib edib.
“Biz etnik təmizləməyə məruz qalmışıq. Onlar Dağlıq Qarabağı və 7 ətraf rayonu işğal edəndə, bu 7 rayonda, o cümlədən Dağlıq Qarabağın bir hissəsi olan Şuşada 750 min azərbaycanlı etnik təmizləməyə məruz qaldı. Etnik təmizləməyə məruz qalan biz olmuşuq. Biz ermənilərə qarşı etnik təmizləmə aparmamışıq və bunu indi də etməyi planlaşdırmırıq. Çünki mən demişəm ki, biz birlikdə yaşamalıyıq. Bu, asan olmayacaq. Lakin biz öyrənməliyik,”- o deyib.
Jurnalist Dağlıq Qarabağda kilsəyə zərbə endirilməsinin necə baş verdiyini soruşub.
Prezident Əliyev deyib ki, bu, ehtimal ki, “Azərbaycan artilleriyasının səhvi olub və ya, ikinci variant o ola bilər ki, ermənilər bizi günahlandırmaq üçün bunu özləri ediblər”.
Daha sonra jurnalist Azərbaycan prezidentinə deyib ki, iddia edilir ki, o bu müharibəyə həm də xalqı ətrafında birləşdirmək, demokratiya və insan haqları ilə bağlı ölkədəki problemlərdən diqqəti yayındırmaq üçün başlayıb.
İlham Əliyev bunu “tamamilə yanlış qiymətləndirmə” adlandırıb.
Oktyabrın 1-də sülh çağırışına görə bir azərbaycanlının həbsilə bağlı suala isə prezident bu barədə məlumatının olmadığını deyib.
O, Azərbaycanda müxalifət üzvlərinin siyasi səbəblərdən dolayı həbs edilmədiyini deyib.
İlham Əliyev münaqişəyə hər hansı üçüncü ölkənin cəlb olunmasını istəmədiyini deyib.
“Bu, bizimlə Ermənistan arasında olan döyüşdür və hər kəs ondan uzaqda durmalıdır. Türk əsgərlər burada ola bilər, bəli. Ötən il biz 10 birgə hərbi təlim keçirmişik. Lakin bizim başqa ölkələrlə də çoxlu təlimlərimiz olur. Biz NATO-nun Sülh Naminə Tərəfdaşlıq Proqramının bir hissəsiyik. Burada qəribə heç nə yoxdur. Siz onları Bakıda görmüsünüz, onları döyüşdə görməmisiniz,” – o deyib.
Prezident Türkiyəyə məxsus F-16-larla bağlı bir daha danışıb və onların Azərbaycana təlimlə bağlı gəldiyini deyib.
Bu müharibəni hansı beynəlxalq güc dayandıra bilər sualına isə İlham Əliyevin cavabı “müharibəni Ermənistan dayandırmalıdır” olub.
“Ermənistan dayansın, öz məğlubiyyətini qəbul etsin, bizim qələbəmizi qəbul etsin və sonra ərazilərin bir hissəsini boşaltmaq barədə öhdəlik götürsün. Biz istənilən halda onları azad edəcəyik,”- o deyib.
Azərbaycan prezidenti deyib ki, düşünmür ki, Rusiya, Fransa və ABŞ münaqişədə həqiqətən də maraqlı deyillər.
Azərbaycan Prezidentinin köməkçisi Hikmət Hacıyev bildirib ki, "Ermənistan silahlı qüvvələri tərəfindən Şuşa meşələrində qəsdən yanğın törədilir."
"Ermənistanın məqsədi ekoloji terror vasitəsilə Azərbaycan silahlı qüvvələrinin istifadə etdiyi pilotsuz uçuş vasitələrinin görüntüləri üçün maneələrin yaradılmasıdır."
O həmçinin deyib ki, "Ermənistanın Şuşa meşələrində yanğının törədilməsi üçün qadağan olunmuş ağ fosfordan istifadə etməsi istisna deyil."
Bundan əvvəl Azərbaycan və Ermənistan bir-birini Qarabağa fosfor tərkibli silahlar gətirməkdə ittiham ediblər.
Şəklin mənbəyi, Getty Images
Rusiya Ermənistan ərazisinə bilavasitə təhlükə yaranarsa, ona ehtiyac olan yardımı göstərməyə hazır olduğunu təsdiqləyib. Bu barədə Rusiya Xarici İşlər Nazirliyinin saytında şənbə günü yayımlanan açıqlamada deyilir.
“Ermənistan Respublikasının Baş naziri N.V.Paşinyanın Rusiya Federasiyasının Prezidenti V.V.Putinə, Rusiya Federasiyasının Ermənistan Respublikasının təhlükəsizliyini təmin etmək üçün göstərə biləcəyi yardım növü və miqdarını müəyyənləşdirmək məqsədiylə məsləhətləşmələrə başlamaq xahişi ilə müraciətinə dair, Rusiya Federasiyası ilə Ermənistan Respublikası arasında 29 Avqust 1997-ci il tarixli Dostluq, Əməkdaşlıq və Qarşılıqlı Yardım Müqaviləsindən irəli gələnlər də daxil olmaqla, Rusiya Federasiyasının Ermənistan Respublikası qarşısında müttəfiqlik öhdəliklərinə sadiq qaldığını təsdiqləyirik.
Bu Müqavilənin bir sıra maddələri silahlı hücum təhlükəsi və ya bir-birinin ərazisinə qarşı təcavüz aktı halında konkret hərəkətləri nəzərdə tutur.
Hərbi toqquşmalar birbaşa Ermənistan ərazisinə keçirilsə, Rusiya, müqaviləyə uyğun olaraq, Yerevana lazım olan bütün yardımı göstərəcəkdir,” - Rusiya Xarici İşlər Nazirliyinin 31 oktyabrda yaydığı rəsmi açıqlamasında deyilir.
Bu bəyanatdan əvvəl Rusiya prezidentinə müraciət edən Ermənistanın Baş naziri Nikol Paşinyan Ermənistana yardıma dair konsultasiya başlamağı xahiş edib.
Rusiya XİN-in bəyanatında həmçinin atəşkəsə, gərginliyin azaldılmasına və “substantiv danışıqlara” qayıtmaq çağırışı əks olunub.
Şəklin mənbəyi, Azərbaycan MN
Azərbaycan Müdafiə Nazirliyi Qarabağ döyüşlərində fosfor silahlarının istifadəsi iddialarını rədd edib.
Bundan əvvəl Ermənistan Ombudsmanı Arman Tatoyan Azərbaycanı Qarabağda fosfor tərkibli silahlardan istifadə etməkdə günahlandırıb və deyib ki, bu silahlar yaşayış məntəqələri yaxınlığındakı meşələrdə istifadə olunur."
Azərbaycan MN bildirib ki, işğal altında olan Xocavənd istiqamətində yerləşən Ermənistan silahlı qüvvələrinin bölmələrinin xeyli sayda fosfor tərkibli yükün gətirildiyi barədə kəşfiyyat məlumatı daxil olub.
"Ehtimal olunur ki, fosfor tərkibli döyüş sursatının qeyd olunan ərazilərə gətirilməsində düşmənin məqsədi ilk növbədə onun Azərbaycan Ordusunun bölmələrinə qarşı tətbiq edilməsidir. Digər tərəfdən isə həmin sursatın guya bölmələrimiz tərəfindən əraziyə səpələndiyi barədə dezinformasiya yaymaqdır,"- qurumun məlumatında deyilir.
Nazirlik bildirib ki, oktyabrın 30-da Ermənistan tərəfinin Azərbaycan Ordusunun ağ fosfor tərkibli silah tətbiq etməsi barədə yaydığı məlumat həqiqətə uğrun deyil.
"Azərbaycan Ordusunun silahlanmasında qadağan olunmuş heç bir döyüş sursatı yoxdur,"-qurumun məlumatında deyilir.
Tanınmamış "DQR Müdafiə Ordusu” bildirib ki, 31 oktyabra keçən gecə Qarabağ münaqişə bölgəsində üç - şimal-şərq, cənub və cənub-qərb – istiqamətlərində “müdafiə döyüşləri aparıb“.
Səhər "cəbhənin bütün istiqamətlərində operativ-taktiki vəziyyətin dəyişmədiyi" qeyd olunur.
Azərbaycan Müdafiə Nazirliyi bildirib ki, Azərbaycan Ordusunun Şuşanı atəşə tutması xəbəri qarşı tərəfin "növbəti yalanıdır.”
Tanınmamış “DQR müdafiə ordusunun” məlumatına görə, şənbə günü səhər Şuşa şəhəri atəşə məruz qalıb və mülki əhali arasında yaralananlar var.
"Ermənistan KİV-nin guya Azərbaycan Ordusunun bölmələrinin Şuşanı atəşə tutması barədə yaydığı xəbər qarşı tərəfin növbəti yalanıdır və vəziyyətin gərginləşdirilməsi məqsədi daşıyır," -Azərbaycan Müdafiə Nazirliyinin məlumatında deyilir.
Azərbaycan MN bildirir ki, Azərbaycan Ordusunun bölmələri yalnız "qarşı tərəfin atəş nöqtələrinə cavab zərbələri endirir".
Bundan başqa Azərbaycan MN bildirib ki, Ermənistan Müdafiə Nazirliyinə istinadən yayılmış Azərbaycan Ordusunun Qafan şəhəri yaxınlığındakı David Bek kəndi istiqamətində döyüş əməliyyatları aparması barədə məlumat həqiqətə uyğun deyil.
"Azərbaycan Ordusunun bölmələri göstərilən istiqamətdən Qubadlı ərazisini artilleriya atəşinə tutan düşmənin atəş nöqtələrinə cavab atəşi açıb,"- nazirlik qeyd edib.
Şəklin mənbəyi, Azərbaycan MN
Şəklin mənbəyi, Getty Images
Ermənistanın baş naziri Nikol Paşinyan Rusiya prezidentinə müraciət edib və Ermənistana yardıma dair konsultasiya başlamağı xahiş edib.
Məktubda Paşinyan Dağlıq Qarabağda “Azərbaycan-Türkiyə təcavüzü ilə bağlı” yaranmış vəziyyəti təsvir edib, baş nazirin mətbuat xidməti xəbər verir.
Paşinyan “Rusiya ilə Ermənistan arasında dostluq, əməkdaşlıq və qarşılıqlı yardım haqqında” 1997-ci il müqaviləsinə əsasən, Ermənistana yardım göstərmək üçün təcili konsultasiyalar başlamağı xahiş edib.
Məktubda Paşinyan "Dağlıq Qarabağda yaranmış vəziyyət haqqında ətraflı məlumat verir, Yaxın Şərqdən xarici silahlı terroristlərin Dağlıq Qarabağa qarşı döyüşlərdə iştirak etdiyini" bildirir.
Artıq döyüş əməliyyatların Ermənistan sərhədinə yaxınlaşması və Ermənistan Respublikası ərazisinə qəsd faktlarını nəzərə alaraq, Ermənistan baş naziri Rusiya Federasiyası prezidentindən xahiş edir ki, sözügedən 29 avqust 1997-ci il Müqavilənin 2-ci maddəsinə əsasən, Ermənistanın təhlükəsizliyini təmin etmək üçün Rusiya Federasiyasının Ermənistan Respublikasına göstərilə biləcək yardımın növü və həcmini müəyyən etmək məqsədilə təcili konsultasiyalara başlamağı xahiş edir.
Azərbaycan rəsmiləri Türkiyə Ordusunun münaqişədə iştirak etmədiyini və əcnəbi döyüşçülərin Azərbaycan tərəfində deyil, əksinə Ermənistan tərəfində döyüşdüyünü bildirir.
Azərbaycan Müdafiə Nazirliyi bildirib ki, Azərbaycan Ordusunun Xankəndini atəşə tutması xəbəri yalandır.
Tanınmamış “DQR Fövqəladə Hallar Xidməti” bu səhər Xankəndi şəhərinin raket atəşinə tutulduğunu bildirib.
Məlumata görə, bu dəfə atəş hədəfi şəhər bazarı seçilib. Bazarda tikililərə böyük zərər vurulduğu, yaxınlıqda bir yaşayış binasının dağıldığı xəbər verilir.
İlkin məlumatlara görə, əhali arasında zərər çəkən yoxdur.
"Ermənistan KİV-nin səhər saatlarından başlayaraq guya Azərbaycan Ordusunun bölmələrinin Xankəndini raket atəşinə tutması və nəticədə mülki əhaliyə maddi zərər vurulması barədə yaydığı xəbər yalandır və vəziyyətin gərginləşdirilməsinə yönəlib," - Azərbaycan Müdafiə Nazirliyi bildirib.
Nazirlik bildirib ki, Azərbaycan Ordusunun bölmələri "yalnız düşmənin atəş nöqtələrinə zərbələr endirir".
Azərbaycan Müdafiə Nazirliyi bildirib ki, Ermənistan silahlı qüvvələri Ağcabədi rayonunun Qiyaməddinli kəndini atəşə tutub.
"Dağıntı və xəsarət alanlar yoxdur,"- qurumun məlumatında deyilir.
Azərbaycan Müdafiə Nazirliyi bildirib ki, Azərbaycan Ordusunun silahlanmasında beynəlxalq hüquqla qadağan olunmuş heç bir silah və sursat yoxdur.
“Azərbaycan Ordusu tərəfindən guya fosfor tərkibli sursatların tətbiq olunması ilə bağlı Ermənistanın iddialarının heç bir əsası yoxdur,” – qurum bildirib.
Nazirlik bildirib ki, “bu kimi əsassız xəbərlər yaymaqla Ermənistan dinc azərbaycanlı əhaliyə qarşı törətdikləri hərbi cinayətləri gizlətmək məqsədini güdür”.
Şəklin mənbəyi, Azərbaycan MN
Azərbaycan Müdafiə Nazirliyi cəbhədə oktyabrın 31-nə olan son vəziyyəti açıqlayıb.
Məlumata görə, oktyabrın 30-u gün ərzində və 31-nə keçən gecə Ermənistan silahlı qüvvələrinin bölmələri cəbhənin müxtəlif istiqamətlərində Azərbaycan Ordusu bölmələrinin yerləşdiyi mövqeləri və yaşayış məntəqələrini müxtəlif silahlardan, o cümlədən artilleriya və raketlərdən atəşə tutub.
Nazirlik bildirir ki, döyüş əməliyyatları əsasən cəbhənin Ağdərə, Xocavənd və Qubadlı istiqamətlərində davam edib.
"Cəbhənin müxtəlif istiqamətlərində Ermənistan silahlı qüvvələrinə qarşı görülən cavab tədbirləri nəticəsində düşmənin şəxsi heyəti arasında ölən və yaralananlar var," -deyə qurum bildirib.
Azərbaycan MN qeyd edib ki, oktyabrın 30-u gün ərzində və gecə saatlarında cəbhənin müxtəlif istiqamətlərində qarşı tərəfin xeyli sayda canlı qüvvəsi, 2 ədəd T-72 tankı, 3 ədəd PDM, 2 ədəd “Smerç” və 2 ədəd BM-21 “Qrad” yaylım atəşli reaktiv sistemləri, 12 ədəd müxtəlif tipli topu, 1 ədəd “Osa” ZRK, 1 ədəd radioelektron mübarizə stansiyası, 2 ədəd avtomobil texnikası məhv edilib və sıradan çıxarılıb.
"Hazırda qoşunlarımız əməliyyat şəraitinə nəzarət edir," -qurum bildirib.
Şəklin mənbəyi, Azərbaycan MN
Azərbaycan Müdafiə Nazirliyi bildirib ki, Tərtər, Ağdam və Ağcabədi rayonlarının ərazisi artilleriya atəşinə tutulub
"Oktyabrın 31-də saat 06.00-dan etibarən Ermənistan silahlı qüvvələri Tərtər, Ağdam və Ağcabədi rayonlarının ərazisini artilleriya atəşinə tutub," - qurumun məlumatında deyilir.
