Ameerikaa fi UKn boba'aa Raashiyaa gara biyya isaanii galurra qoqqobbii kaa'an

Haguuggii Tamsaasa Kallattii

1. 28 Guraandhala 2022Kiyeev sochii sababa waraan dhorkamee ture jalaa baateetti

   Amma yeroon ganama gara sa’a 8 [ 2:00AM] taheera. Jiraattotni Yuukireen amma bakka dhokannaa fi jireenya isaanii keessaa bahanii socho’uu danda’u.

   Uggurri yeroo sochii torban tokkof ture kaafameera.

   Manneetiin kuusaa dhugaatii banamuun, akkasumas tajaajilli geejibaa itti fufuu danda’a. Geejibni baaburaas kan eegalu taha, garuu akka durii baay’inaan miti.

   Torban irra dhukaasa gurguddaan qarqara magaalaa irraa dhagahamaa ture.

   Kiyeev ammallee harka lammiilee Yuukireen jirti.

   Qondaalonni Yuukireen ammoo ammayyu waraanichi xumuratti hin dhiyaanne jedhu.

2. 28 Guraandhala 2022US lammiileen ishee Yuukireenii ''karaa dhunfaa isaanii'' akka bahan himte

   Imbaasiin US Kiyeev jiru lammiileen US ‘’karaa dhuunfaa isaaniin’’ Yuukireenii hatattamaan akka bahan dhaame.

   Imbaasichi haalichi ‘’hin beekamu’’ jedhee ulaa baayeen konkolaataan waan cufameef, akkasumas karaan kaan ammoo riqichi isaanii waan manca’eef karaa nagaa qabu ilaaluun bahu akka qaban hime.

   Gara daangaa Poolaandii fi Moldoovaatti qaxxamuruun rakkisaa tahuu akeekkachiisee, daangaa irratti hanga sa’a 30 fa’a turanii eeggachuu akka qaban hime.

   UNHCR namootni 368,000 tahan Yuukireen irraa gara biyyoota ollaatti baqataniiru jedhe.

   Isaan keessaa gara 150,000 kan tahan gara Poolaanditti imalan. Isteet Dippaartimantiin US ammoo lammiileen US 6,600 Yuukireen keessa jiraatu.

3. 28 Guraandhala 2022Weerarri Yuukireen erga jalqabee miidhaa dinagdee akkamii geessise?

4. 28 Guraandhala 2022Xiyyaarri Raashiyaa daangaa qilleensaa Kanaadaa dhorkaa ta'e cabsee seene

   Xiyyaarri imaltootaa Raashiyaa daangaa qilleensaa Kanaadaa dhorkaa ta'e cabsee seenuun ibsame.

   Raashiyaan Yukireen irratti waraana banuu hordofee Kanaadaa dabalatee biyyoonni Lixaa baayyeen xiyyaaronni Raashiyaa daangaa qilleensaa isaanii akka hin fayyadamne dhorkuun isaanii ni yaadatama.

   Ministeerri Geejjibaa Kanaadaa dhimmicha qorachuun tarkaanfii fudhachuurraa duubatti hin deebinu jedheera.

   Xiyyaarri imaltootaa guddaa Raashiyaa Eroofloote lakkoofsa balalii 111 ta'e Ameerikaa, Maayaamii irraa ka'ee gara Mooskootti balali'aa akka ture fuulli Filaayit Awweer mul'iseera.

   Gamtaan Awurooppaa abbummaan isaanii kan Rashiyaa kan ta'aniifi kan maqaa Raashiyaatiin galmaa'an ykn xiyyaaronni Raashiyaatiin to'ataman daangaa qilleensaa misensa gamtichaa fayyadamuu hin danda'an jedheera.

   Ameerikaanis tarkaanfii wal fakkaatu fudhatti jedhamee eegama.

5. 28 Guraandhala 2022Belaaruus loltoota bobbaasuuf qopha'aa jirti-gabaasa

   Belaarus Raashiyaa gargaaruuf loltoota ishee Yukireenitti erguu qophaa'aa akka jirtu gabaasni mul'iseera. Belaarus kana gochuun loltoota Raashiyaaf humna ta'uu malti jedhamaa jira.

   The Washington Post, madda maqaan adda hin ba'iin tokko eeruun akka gabaasetti, Belaarus waraana bobbaasuu har'a jalqabuuf qophaa'aa jirti.

   BBCn wanta kana qulqulleffachuuf gara Waayit Hawusiifi Pentaagonitti iimeelii barreesseera.

   Kun osoo kanaan jiruu,the Kyiv Independentammoo maddeen hedduu eeruun loltoonni eeggatoo Belaaruus Yukireenitti bobba'uu malu jedheera.

   Michuu yeroo dheeraa Raashiyaa kan taate Belaarus, karaa kaabaan Yukireen waliin wal daangessiti.

6. 28 Guraandhala 2022Hireen Yuukireen gara fuula duraa maal ta'aa?

7. 28 Guraandhala 2022Akeekkachiisni nuukilaraa NATOn sodaate hin oolle

8. 28 Guraandhala 2022Yukireeniif akkamiin bari'e? Tamsaasa kallattii jalqabneerra.

   Akkam jirtu hordoftoota keenyaa?

   Kaleessa Pirezidant Putiin waraana isaanii damee nuukilaraa ija hin libsatiinaa jechuun dammaqanii of eeggannoon qophaa'uu akka qaban ajajaniiru.

   Yukireen maal keessa bulte? Har'a ammoo maaltu ta'a?

   Waan ta'u kallattiin isin biraa gahuu eegalleerra.

   Nu hordofaa

9. 27 Guraandhala 2022Waraanni Yukireen magaalaa Kaarkiiviin deebisee to'ate

   Waraanni Yukireen magaalaa biyyattii keessatti lamaffaa taate Kaarkiiv deebisee to'achu bulchaan magaalattii beeksisan.

   Oleh Siniyeehubov bareeffama Teelegram irratti baasanii, ''Kaarkiiv guutummaa guutuutti to'anneerra,'' jedhan.

   Itti dabalunis, ''humnootiin hidhatan, poolisiifi raayyaan ittisaa waliin ta'uudhaan hojjataa kan jiran yoo ta'u, magaalattii guutummaa guutuutti diinarraa qulliqullaa'aa jirti,'' jedhan.

   Loltoonni Raashiyaa guyyaa tokkotti magaaloota Yukireen gurguddoo lama qabachuu danda'anii turan.

   Viidiyoowwan miidiyaalee hawaasaa irratti tamsa'an loltoota Raashiyaafi Yukireen jidduutti waraanni daandiirratti akka ture mulisan.

   Haalli lafarra jiruu= kan jijjiramu yoo ta'u, qaamni kam magaalaa kam akka to'ate mirkanneeffachuun rakkisaadha.

   Haata'u malee, namoonni ijaan argan akka jedhanitti Kaarikiiv Yukireen harka galuufi walitti bu'iinsii= daandiirraa akkuma itti fufetti jiraachuu BBCtti himaniiru.

10. 27 Guraandhala 2022Pirezidant Putiin humni Nuukilara Raashiyaa qophaa’ee akka eeggatuuf ajajan

    Pirezidantiin Raashiyaa Vilaadmiir Putiin humni Nuukilara waraanaa biyyattii ‘haala adda ta’een qophaa’ee akka eeggatuuf' ajajan.

    Ajaji of eeggannoo olaanaatiin qophaa’ee akka eeggatuuf kenname kun humna misaa’elii Raashiyaa nuukilara baatuufidha.

    Pirezidant Putiin ministira ittisaa biyya isaanii Sergee Shuuyiguun dabalatee aanga’oota waraanaa olaanootti akka dubbatanitti, biyyoonni Lixaa Raashiyaa irratti “tarkaanfii sirrii hin taane fudhataniiru, qoqqobbii seeraan alaas” kaa’aniiru.

    Pirezidaantichi ajaja kana kan dabarsan biyyoonni miseensa NATO Raashiyaa irratti “ibsawwan dubbii kakaasan” baasaa jirti jechuun erga Mooskoon himatteen booda.

    Putiin biyyi isaanii meeshaa waraanaa nukilaraa fayyadamuu akka dandeessu cinaa qabanii himaa kan turan yoo ta’u, torban haasaa taasisaniin ammoo “eenyullee nu dhaabsisuudhaaf yaallaan deebiin kennamu seenaa keessatti argamee kan hin beekne ta’a,” jechuun akeekkachiisanii turan.

    Ajaji of eeggannoon akka qophaa’aniif humna nuukilaraa raayyaa biyya isaaniitiif pirezidaantichi amma dabarsan kun wanti dirqamaa ta’e tokko yoo dhalateef atattamaan tarkaanfii fudhachuudhaaf kan dandeessisudha jedhameera.

    Raashiyaan biyyoota addunyaa kanarra jiran keessaa nuukilara guddaa kan qabdu yoo ta’u, biyyoonni miseensa NATO ta’an ammoo walitti humna nuukilara Raashiyaa balleessuu danda’u qabu.

    Kaayyoon ajaja Putiin amma loltoota isaaniitiif dabarsan kun biyyoonni miseensa NATO ta’an deeggarsa Yukireeniif kennan akka dhaabaniif soda uumuuf, akkasumas Raashiyaan humna qabdu hanga eessaatti fayyadamuu akka dandeessu agarsiisuuf akka ta’e xiinxaltoonni ibsaa jiru.

11. 27 Guraandhala 2022Kilabni Cheelsii kan qabeenya lammii Raashiyaa ta'e qormaata keessa gale

12. 27 Guraandhala 2022Amma nu gahe, Yuukireen loltoota Raashiyaa 4300 ajjeesuun xiyyaarota 27 haleeluu himte

    Yuukireen waraana guyyoota sadii keessatti loltoota Raashiyaa 4,300 tahan ajjeesuu himte. Mootummaan Raashiyaa lakkoofsa loltoota jalaa du'anii hin ibsine. BBC'n dhugummaa lakkoofsa kanaa adda baasuu dadhabus humni ittisaa Yuukireen lakkoofsa kanaa gadii ibsee jira. Haleellaa Yukireen waraana Raashiyaa irratti raawwate: Loltoota Raashiyaa du'an: 4,300 Xiyyaarota waraanaa 27 Helikoopteroota 26 Taankii 146 Konkolaattota waraanaa sibiila uffatan 706 Kanoonii 49 Sirna ittisa qilleensa irraa Buk 1 Dirooniii lamaafi doonii waraanaa lama jalaa barbadeessuu himte. Dabalataan misaa'ela dhukaasuuf kan oolan Giraad jedhaman afur fi namoota taankii oofan 60 irratti tarkaanfii fudhachuu himte.

13. 27 Guraandhala 2022Lammiileen alaa Yuukireen deeggaruun akka Raashiyaa lolaniif waamichi godhame

    Pirezidaantiin Yuukireen lammiilee alaa ‘’yakkamtoota waraanaa Raashiyaa’’ akka lolaniif lammiilee alaaf waamicha godhan.

    Pirezidaanti Zeleniskiin miidiyaa hawwaasaa isaa irratti namni kamiyyuu ‘’nu cina dhaabatee’’ akka Raashiyaa loluuf waamichan godha jedhan.

    Pirezidaantiin Yuukireen lammiilee addunyaa hunda, michoota Yuukireen, nagaa fi dimokiraasii deeggaran akka isaan waliin waraanicha irratti hirmaataniif waamicha taasisan.

    ‘’Namni human ittisaa Yuukireenitti makamuu barbaadu kamuu, Awurooppaa fi guutuu addunyaa irraa dhufee nu waliin yakkamtoota waraanaa Raashiyaa loluu danda’a.’’

    Namni Yuukireen gargaaree loluu barbaadu seeraan gara biyyattiitti galuun eeyyamamaaf jedhan.

14. 27 Guraandhala 2022Federeeshiniin Juudoo Putiniin pirezidaantummaa fi ambasadarummaa federeeshinichaa irraa dhorke

15. 27 Guraandhala 2022Namoonnii 200,000 tahan Yukreen irraa gara biyyoota sadiitti baqatan

    Qondaaloti Isloovaak akka jedhanitti Sanbata sa'atii 24 keessatti namoonni 10,000 tahan karaa Yukreen waliin daangaa qooddataniin biyyattii seenaniiru.

    Kunis lakkoofsa namoota baqatan isa idileerra dachaa kudhan caala.

    Namoonni 43,000 tahan erga Raashiyaan haleellaa jalqabdee guyyaa sadii keessatti Yukreen irraa gara Roomaaniyaa galaniiru. Namoonni 150,000 tahan immoo Poolaanditti godaanan.

    Biyyoota Yukreen daangessan afur -Haangaarii, Moodovaa, Belaaruusiifi Raashiyaattis namoonni ce'aa jiru.

16. 27 Guraandhala 2022Biyyoonni hedduun xiyyaarri Raashiyaa qilleensa isaanii akka hin galle dhorkan

17. 27 Guraandhala 2022Yukreen misaayila Kiyiivitti aggaamame kuffise jette

    Dubbii himaan ministeera haajaa alaa Yukreen Oleg Nikooleenkoo humni qilleensaa isaanii misaayel magaala guddoo biyyattii Kiyiivitti qiyyaafatee ture, xiyyaaraan daangaa Belaaruus, biyya Raashiyaa deeggartu irraa dhahee kuffisuu himan.

18. 27 Guraandhala 2022Faransaay qoqqobbi Raashiyaa irratti dabarsiteen doonii ishee fudhatte

19. 27 Guraandhala 2022Magaalaan kibba Yukreen 'Nova Kakhovka' Raashiyaan to'atamte

    Magaalaan kibba Yukreenitti argamtu humnoota Raashiyaan qabamuu miidiyaan Yukreen gabaase.

    Loltootni Raashiyaa yeroo ammaa 'Nova Kakhovka' qabataniiru. Magaalaan kuni xiqqoo taatus iddoo tarsimawaa laga 'Dnieper River' jedhamuufi lafa Kireemiyaa bishaaniin marfamtetti fulla'utti argamti

    Kantiibaan magaalatti 'Volodymyr Kovalenko' lolatootni Raashiyaa hojii raawwachiiftuu magaalattii qabatanii, alaabaa Yukreen hunda gamoowwanirraa buqqaasaniiru jedhaniiru jedhame.

    Akka xiinxaltoonni jedhanitti Raashiyaan gama kibbarraa haleeluun kan milkoofte yoo tahu, iddoowwan biroo kanneen akka Kheersan,Maayikoolaayiv fi Meeliitoopool qabachuuf sodaachisaa jiru.

20. 27 Guraandhala 2022'Loltootni Raashiyaa magaalaa Yuukireen Karkiiv seenan' Qondaala Yuukireen

    Qondaalonni mootummaa Yuukireen loltootni Raashiyaa magaalaa guddoo lammaffaa biyyattii Karkiiv galuu himan.

    Bulchaan naannoo Karkiiv Oleg Sinegubooy, konkolaattotni waraanaa sasalphaan ‘’cabsanii magaalittii seenaniiru’’ jedhan.

    Ibsa isaaniin dura viidiyoon bahe konkolaatotni waraanaa Raashiyaa daandii magaalaa Kaaba Baha Yuukireen taate Karkiv keessa osoo deemanii mul’ateera.

    ‘’Dahoo keessan gadhiistanii hin bahiinaa. Humni waraanaa Yuukireen diina balleessaa jira. Lammiilee nagaan akka daandiitti hin bane,’’ jedhe bulchaan naannichaa.