Kan argaa jirtan oduu barreeffamaan qofa marsaritii keenya daataa xiqqaan hojjetudha. Fuula isa guutuu suuraaleefi viidiyoowwan qabate banadhaa.
Gara fuula marsariitii guutuutti na geessi
Filannoo daataa qusatu fayyadamu kanarratti hubannoo dabalataaf
Donaald Tiraamp Pirezidantii Ameerikaa 47ffaa ta'un kakuu raawwatan. Haasaa taasisaniinis waan hedduu waadaa seenan, bulchiinsa Baayidan qeeqan.
Israa'eliifi Hamaas waraana Gaazaa xumuruufi lammilee Israa'el ugguramaniifi hidhamtoonni Filisxeem akka hiikaman waliigalteerra ga'uu isaanii araarsitoonni Ameerikaa fi wqaataar ibsaniiru.
Waraana ji'oota 15f ture kan yeroo gareen hidhate Filisxiin Hamaas Onkoloolessa bara 2023 Israa'el haleelu jalqabe keessatti boqonnaa guddaa ta'a.
Waliigaltee dhukaasa dhaabuu Israa'eliifi Hamaas gidduutti maal ta'uu danda'a?
Kaabineen Israa’el har’a walga’uun waliigaltee dhukaasa dhaabuufi namoota butamanii fudhataman gadhiisuu Hamaas waliin Gaazaa keessatti taasifame raggaasisuuf kan jiru yoo ta’u, kunis abdii waraanni ji’oota 15'f ture akka xumuramu uumeera.
Lammiileen Filisxeemifi maatiin namoota Israa’el butamaniii fudhatamanii hedduun waliigaltee kanatti kan gammadan yoo ta’u, waliigalteen kun jalqabaaf Dilbatarraa kaasee torban jahaaf tura jedhamee eegama, ammaaf garuu lolli kun itti fufee jira.
Hamaas Israa'el wajjin dhukaasa dhaabuf walii galus Israa'elif "yoomiyyuu" dhiifama hin godhuuf jedhe.
Hamaas bakka bu'uun marii dhukaasa dhaabuu irratti hirmaachaa kan ture Kaliil al-Hayyaa dhimma waliigaltee dhukaasa dhaabuu irratti ibsa kenneen, gidiraa Israa'el uummata Gaazaa irraan geessef "dhiifama hin goomuf" jedhe.
Dhiiga Gaazatti dhangala'eefi gidiraa dhaqqabe kaasun Hamaas Israa'eliif dhiifama akka hin goone dubbate.
"Yoomiyyuu hin dagannu, yoomiyyuu dhiifama hin goonu," jedhe. Akkasumas Israa'el kaayyoo waraanaa Gaazatti qabatte milkeessuu akka hin dandeenye hime.
Hamaas bakka bu'uun marii yeroo garaa garaatti taa'amurratti kanneen hirmaatan keessaa tokko Kaliil al-Hayyaadha.
Qondaalota gameeyyii Hamaas qubaan lakkaa'aman hafan keessaa tokko Kaalil al-Hayyaadha.
Israa'el duula Gaazatti banteen gaggeessitoota gameeyyii Hamaas harga guddeessa ajjeestetti.
Waliigaltee dhukaasa dhaabuu amma Israa'eliifi Hamaas jidduutti taasifameef kanaaf galata argachu kan qabu Baayiden ykn Tiraamp ta'u kan gaafataman Baayidan, sun qoosaadha? jechuun deebii kennan.
Pirezidant Joo Baayidan akka jedhutti, inniifi gareen pirezidaantii filatamoo Doonaald Tiraamp waliigaltee dhukaasa dhaabuu kana sarara qabsiisuuf yaaliin taasisan keessatti akka ''garee tokko'' ta'anii hojjachuu dubbataniiru.
Haata'u malee, akkuma ibsa gaazexeessitootaa kennan xumuraniin osoo bahaa jiranuu, waliigaltee kanaaf eenyutu galata fudhachuu qaba jedhamee gaafatama Baayidan, isin immoo Tiraamp.
Baayiden duubatti deebi'uudhaan, akkas jedha: "Sun qoosaadhaa?" Kanaan, sun xumura ibsa gaazexeessitootaa ture.
Baayiden har'i waareen boodaa baayyee gaarii ta'uu dubbata, yeroo walitti bu'iinsa ji'oota 15tiin booda waliigaltee dhukaasa dhaabuu irra ga'amuu mirkaneessaniitti.
Itti dabalunis, "Yeroo dhiyootti namoonni harka [Hamaas] jiran gara maatii isaaniitti deebi'u," jedha.
Waliigalteen kunis dhukaasa dhaabuu guutuu fi guutuu ta’e, humnoonni Israa’el Gaazaa keessaa bahuu fi namoonni hidhattoota Hamaasiin butaman hunda gadhiifamuu kan of keessatti hammatudha.
Israa’elis gamasheetiin hidhamtoota Filisxeem gadhiifti jechuun dabaluun dubbatan.
Baayiden yeroo waliigaltee dhukaasa dhaabuu marsaa tokkoffaa kanatti Filisxeemoonni gara naannoo jireenyaasaaniitti deebi’uu akka danda’anii fi gargaarsi namoomaa Gaazaa keessatti argamu ni dabala jedhu.
Marii marsaa lammataatiin ammoo Israa’elii fi Hamaas waraanicha dhaabbataan dhaabuudhaaf waa'ee qophii barbaachisaa ta’e ni mari’atu jedha.
Mariiichi kan torban jahaa ol fudhate yoo ta'e dhukaasa dhaabuun itti fufa jedhu.
Waliigaltee waraana dhaabuu Israa'eliifi Hamaas jidduutti taasifame ilaalchisee miidiyaaleef ibsa kan kennan pirezidantiin Ameerikaa Joo Baayidan, Hamaas dadhabuufi Gaazaan Hamaas malee ijaaramuu akka dandeessu dubbatan.
Waraana ji'oota 15'f tureef Hamaasitti quba qabuun, gaggeessitoonni garichaa olaanoon ajjeefamuufi dandeettiin waraanaasaa dadhabee waliigaltee kana fudhachuuf dirqamuus kaasan Baayidan.
Waliigalteen kun dhugoomee arguutti "garaa koorraa gammadeera" jechuun, uummanni Israa'elis ta'ee kan Gaazaa balaa guuddaaf lubbuun namoota nagaa hedduu du'uutti gadduu himan.
Waligalteen dhukaasa dhaabuu Israa'eliifi Hamaas jidduuttu har'a taasifamee Dilbata dhufurraa eegalee hojiirra akka oolu Kaatar ibsite.
Minitiirri Muummee Kaatar Al Taananin ibsa miidiyaaleef galgala kanan kennaniin, qaamoleen lamaan waliigalteerra gahuu mirkaneessuudhaan waliigaltichi gaafa Dilbata dhufaa, Amajjii 19 irraa kaasee hojiirra akka oolus ibsan.
"Kun dhuma waraana Gaazaa ta'a jedheen abdadha," jedhan Al Taaniin Dohaa irraa ibsa miidiyaaleef kennaniin.
Hojiirra oolmaa waliigaltee kana gareen biyyoota sadi: US, Kaataariifi Masirii irra walitti bahe akka to'atus ifa godhan.
Gaazaatti dhukaasi akka dhaabatuuf Israa'eliifi Hamaas waliigalaniiru oduun jedhu gama Kaataarii dhagahamuu hordofee lammiilen Gaazaa karaatti bahuun gammachuu ibsataa jiru.
Bakka buutonni marii Israa'elifi Hamaas har'a waaree booda Ministiira Muummee Kaataar wajjin qofa qofaatti wal-arguun erga mariyatanii boodadha dhukaasa dhaabuf walii galuunsaanii kan dhagahame.
Kana hordofuun lammiileen Gaazaa alaabaa Filisxeem mirmirsaa karaatti bahanii gammachuu ibsataa jiru.
Israa'elifi Hamaas dhukaasa dhaabuuf waliigaluu hordofee Hamaas lammiilee Israa'el butee harkaa qabu gadi dhiisuu akka eegalu Pirezidaantii US ta'uun kan filaman Doonald Tiraamp ibsan.
Tiraamp miidiyaa hawaasaa kan ofiisaanii, Truth jedhamurratti akkana jechuun barreessan: Baha Giddu Galeessaa keessatti namoota butamanii jiraniif waliigaltee qabna. Yeroo gabaabaa keessatti gadi lakkifamu. Galatoomaa!"
Israa'eliifi Hamaas waliigalteerra gahuuf dhumarratti danqaa ta'ee kan ture, dhimmi ulaa Filadalfiyaa daangaa Masiriitti argamuu galgala kana furmaata argachuusaa maddeen himaniiru.
Ministiirri Muummee Kaataar bakka buutota Israa'eliifi kan Hamaas qofaatti biiroo ofiitti waamuun erga haasofsiisanii booda waraana dhaabuuf walii galaniiru oduun jedhu kan dhagahame.
Israa'elifi Hamaas dhukaasa dhaabuf waliigaluusaanii miidiyaan michuu BBC ta'e CBS News tti himan.
Waliigalteerra gahuunsaanii kan dhagahame, Ministiirr Mummee Kaataar bakka bu'oota Israa'eliifi Hamaas qofa qofaatti waajira ofiitti erga haasofsiisanii boodadha.
Hamaas gamasaan waliigaltee dhukaasa dhaabuu akka fudhate BBCf mirkaneessee ture.
Qondaalli Hamaas tokko BBCtti akka himetti, garichi yaada waliigaltee waraana dhaabuu dhiyaate ni fudhata.
Miidiyaan Israa'el Hareetz akka gabaasetti ammoo, Hamaas waan barbaadu yeroo dhumaaf jaarsolii araaraaf ibseera.
Kaataar ammoo halkan kana bu'aa waliigaltee dhukaasa dhaabuu miidiyaaleef ibsa kenniti jedhamee eegama.
Miidiyaan Israa'el akka gabaasetti, Hamaas waa'ee ulaa Filaadalfiyaa, daangaa Masirii irratti argamuu, ilaalchisee yaada haaraa kaasutu dhagahame.
Mariin dhukaasa dhaabuu ji'ootaaf gaggeeffamaa ture, amma gamni lamaanuu waliigalteerra gahuuf kutannoo waan agarsiisan fakkaata.
Luba Balaay Makonnin herreega Gamtaa Afrikaa keessaa dolaara miliyeena 6 ol baasuuf yaalii godhaniiru jechuun himata yakkaa irratti dhiyaatee tureen yakka raawwachuusaanii himame.
Fana Biroodkaasting Korporeeshin (FBC) akka gabaasetti, manni murtii federaalaa dhaddacha har'a ooleen Luba Balaayifi kanneen isaan waliin himataman balleessaa raawwachuu isaanii murteesse.
Herreega Gamtaa Afrikaa keessaa dolaaraa miliyeena 6 ol baasuf yaalan jedhamuun yakka waliin dhahuun kan himataman Luba Balaay dabalatee namoota shan yoo ta'u, ragaa ittisaa dhiyeeffatanis ragaa abbaan alangaa dhiyeesse ofirraa ittisuu akka hin dandenye hima gabaasi kun.
Manni murtichaa murtoo adabbii kennuuf ALItti gaafa Amajjii 22, 2017tti beellama qabateera.
Lubni Balaay kanaan dura irra deddeebin yakka akka hin hojjanneefi bakka "gowwoomsaa namaatin bakkan itti to'atame dhaqe" jechuun garuu harkisaanii yakkarraa qulqulluu akka ta'e mana murtiitti himaniiru.
Mana lubummaa Bataskaana Ortodoksi Tawaayidoo Itoophiyaatti hojii gaggeessaa ittaanaa kan ta’an luba Balaay, Ebla 24, 2024 murtiitti dhiyaatanii yaada kennaniin, "mooraa Gamtaa Afrikaa kanin dhaqe namootaan gowwoomfamanii’’ jechuun "dhaquurra kan darbe gochiin raawwadhe hin jiru" jechuun mana murtiitti himanii ture.
Waayit Haawus Kibxata akka ibsetti aangoonsaanii xumuramaa kan jiran Pirezidanti Joo Baayidan, Kuubaa tarree biyyoota shororkeessitoota tumsanii jalaa baasuuf kan barbaadaniif lammiileesaanii hidhaman gadhiisisuuf.
Ibsi Baayidan kun dhagahamee yeroo xiqqoo booda Kuubaan hidhamtoota 553 akka gadhiistu ibsite.
Kun namoota hiriirri mormii mootummaa waggaa afur dura gagggeeffamerratti hirmaatanis ni hammata jedhamee abdatama.
Ameerikaan duraanuu Kuubaa tarree tumsitoota shororkeessitootaatti kan ramadde yoo ta'u, yeroo ammaa filatamee aangoo qabachuuf sirna raawwatamu eegaa kan jiru Doonaald Tiraamp bara 2021 xumura aangoosaarratti tarkaanfii kana cimse.
Deeggarsa diinagdee fi meeshaalee gara Kuubaa ergaman irraa kute.
Bulchiinsi Pirezidant Joo Baayidan garuu Kuubaan shororkeessitoota deeggarti jedhamtee farrajamuushee odeeffannoon ammatti dhugoomsu hin jiru jechuun akka irraa kaasu ibse.
Yeroo ammaa Kuubaan biyyoota biroo akka Kooriyaa Kaabaa, Siiriyaa fi Iraan waliin tarree biyyoota shororkeessitoota tumsanii jalatti ramadamtee jirti.
Tarkaanfiin Baayidan kun hidhamtoota biyyattii gadhiisisuu qofa osoo hin taane, hariiroo Kuubaa fi US akkaan laafee ture kan haaressuudhas jedhamee abdatama.
Dhimmoota biyyoota lameen walitti hadheessan hedduu irratti mari'achuuf kun daandii saaqa jedhameera.
Baayidan karoora isaa kana wayita Kongiresiif dhiheessu daangeffamni diinagdee bulchiinsi Tiraamp kaa'ee tures akka kaafamu eereera.
Tiraamp wayita aangoo qabatee hojii eegalu murtee Baayidan kana kufaa taasisamoo hojiirra oolcha kan jedhu ifa miti.
Amajjii 20 booda minitira haajaa alaa US ta'uuf kan kaadhimame Maarkoo Ruubiyoo Kuubaan akka qoqqobamtu nama ejjennoo jabaa qabudha.
Maatiin nama kanaa bara 1950oota keessa osoo warraaqsi warra koministii Fidel Kastiroo aangootti hin fidin dura biyyaa ba'an.
Yaalii qorattoonni Amajji 3 pirezidanticha to’achuuf taasisan fashalaa'uu hordofuun, tajaajilli nageenyaa Yoon shiboo sibiilaatiin qe’eesaa dalleessuun, awutoobusiiwwan hedduu fayyadamuunis karaa cufan.
Tajaajilli nageenyaa Yoon mooraa isaa akka kanaan cimsanii eeganis garuu dhumarratti qorattoonniifi poolisoonni seenuun hin oolle.
Qorattoonniifi poolisiin ganama kana dallaa shiboo sibiilaafi mooraa isaa cufan irra aanuuf tooftaa garagaraa fayyadamaniiru. Meeshaalee sibiila ittiin muranii seenan qabatanii mul'ataniiru.
Awutoobisoota dhaabbatan sana irra ol ba'uudhaan bira darbanii, shiboo sibiilaa xaxamee jiru ciranii seenaniiru.
Miseensonni seera baastota paartii biyya bulchaa jiru keessaa qorattooni akka hin seenneef hiriiranii karaa cufanii jiranitti, qorattoonni gariin karaa biraatiin mana jirenyaa pirezidant Yoon seeuu danda'aniiru.
Suuraan daawwadhaa!
Pirezidantiin Kooriyaa Kibbaa Yoon to’atamuun booda, qorattoonni yeroo yeroo mana jireenyaa pirezidantichaa keessaa bahaa jiru.
Ganama har’aarraa kaasee naannoo mana jireenyaa pirezidaantichaatti humni poolisii jabaa bobbaafameera.
Poolisiin kanaan dura qondaalota 1,000 ta’an bobbaasuu ibseera.
Daawwadhaa!
Aanga’oonni Kooriyaa Kibbaa, seera waraanaan bulchuu labsuuf yaaluu hordofee fincilaan kan himatame Pirezidant Yoon Suk Ye’ol to’annoo jala oolchan.
Yoon amma Waajira Qorannoo Malaammaltummaa (CIO)tti argama. “Qorannoo seera-qabeessa hin taanedha jedhus dhangala’uu dhiigaa hin barbaachifne hambisuudhaaf qoratamuudhaaf waliigaleera,” jedhe.
Seera baastonni Paartii biyya bulchuu, Paartiin Humna Ummataa [People Power Party (PPP)] to’atamuun prezidaantichaa “seeraan ala” jechuun labseera.
Miseensonni PPP namoota ganama har'aa mana jireenyaa Yoon ala walitti qabamanii akka qorattoonni pirezidanticha hin to’anne gochaa turan keessaati.
Hogganaa PPP kan ta'an Kiween Se’oong-dong akkaataa haalli kun itti raawwate ''nama gaddisiisa” jechuun paarlaamaatti himaniiru.
"Kabajni biyya keenyaa miidhameera" jedhan.
Oduu karaa tamsaasa kallattiin isiniif dhiyeessinu jalqabneerra.
Pirezidantiin Kooriyaa Kibbaa diddaafi mormii diraamaa ta'een booda to'atamuu, abidda Ameerikaa Los Anajalas, marii araaraa Israa'el fi Hamaas gidduutti gaggeeffamaa jiruufi kaan kallattiin isiniif dhiyeessina.
Dhiyaadhaa!
Maanguddoon kun hojjataa ittisa balaa ibiddaa turan. Gaafa ibiddi naannoosaanii qaqabeetti lubbuu namoota hedduu baraaruuf gahee olaanaa bahan.
Viidiyoo kana doowwadhaa.
Misnitiirri Dhimma Alaa US Antoonii Biliinkan galgala kana ibsa miidiyaalef kennaniin, waliigalteen waraana Gaazaa dhaabuu guyyoota dhufan keessatti akka mallattaa'u akeekan.
Waliigalteen waraana dhaabuu gara xumuraa gahe kun waraanni erga dhaabatee booda Gaazaatti maaltu ta'uu akka qabaatu karoorsufis karra akka banu ibsan.
Kunis akkaataa itti Gaazaan buluu qabduufi dhaabbataan waraanni Israa'el Gaazaa keessaa bahu kan ilaallatuudha.
US, Kaataariifi Masiriin gaafa Jimaata darbe karoora dhumaati kan jedhame dhiyeessuu isaanii Biliinkan dabaluun ibsan.
"Amma kubbaan harka Hamaas keessa jira," kan jedhan Biliinkan waliigaltichi mallattaa'ee hojiirra ooluuf qophiidha jedhan.
Gadaan Baayidan osoo hin guyyoota muraasa keessatti "waliigaltichi ni mallattaa'a jedheen yaada" jedhan Biliinkan.
Walii galtee waraana Gaazaa dhaabuu Kaataaritti irratti mariiyatamaa jiru irratti kaabinneen Israa'el sagalee kennuuf akka ta'e dubbii himaan mootummaa Israa'el himan.
Dubbii himaa mootummaa Israa'el kan ta'an Deevid Meensar akka jedhanitti, murteen kamiyyuu akka irratti mariiyatamuuf kaabineedhaaf dhiyaata.
Kanas waliigaltee dhukaasa dhaabuu Sadaasa 2023 Israa'eliifi Hamaas gidduutti torban lamaaf gaggeeffamee ture akka fakkeenyatti kaasuun kaabineen sagalee itti kennee akka raggaasise himan.
"Kuni ammayyuu hin xumuramne, kana yaadachuun baay'ee gaariidha.Gara waliigalteetti dhiyaataa jirra, garuu ammayyuu hin xumuramne," jedhan.
Kaabineewwan Beeniyaamin Netaaniyaahuu keessaa lama mootummaan waliigaltee kana ni fudhata taanan aangoo akka gadi lakkisaniifi waliigalticha akka hin fudhanne akeekkachiisanii turan.
Ogeessi baqaqsanii hodhuu sammuu Los Anjalas kan manneen daandii isaa irra jiran balaa ibidda bosona irraa baraaruuf gara torban tokkoof qabsaa'e, taatee akkanaa kanaaf qophaa'uuf waggoota 15 akka itti fudhate BBC'tti hime.
Jiraataan magaalaa Maalibu, Dr Chestar Giriffits, kan umuriin ganna 62, ajaja Paalisaades irraa akka baqataniif kenname diduudhaan, ollaa fi ilmasaa wajjiin ta'uun hanga tajaajilli balaa tasaa isaan bira gahuutti balaa ibiddaa ofiirraa ittisuu danda'an.
''Gaafa tokko ibiddi akka dhufuu danda'u yeroo hunda beekna turre. Yoom akka dhufu garuu hin beeknu turre,'' jechuun ture Dr Giriifitis Sagantaa BBC's Today'tti kan himan.
"Balaa fi mancaatii hamaa akkanaa ta'a jennee gonkumaa hin hubanne ture." Griffiths torban darbe gara ollaasaa Maaliibuutti deebi'ee ibidda kana ittisuu eegaluun sa'aatii muraasa dura ture baqaqsanii hodhuu sammuu raawwatee xumuruu kan dubbate yoo ta'u, ilmisaa Chestar Jr fi ollaansaa Kolbart waliin ta'uun ibiddicha dhaamsaa akka turan kaasan.
"Manneen akkuma baalaatti gadi kufaa turan," jedhan. Galanni Waaqayyoof haa ta'u, innii fi ollaan isaa Kilaayitaan Kolbartii yoo ibiddi akkasii mudate jechuun karoora duraan qopheessanii fi bishaan abiddaatti fayyadamuu danda'an.
Ujummoo afur haayidireetii waliin walqabsiisuudhaan, Dr Griffits, ilmi isaa fi ollaansaanii Obbo Kolbarti baaxii manaa dhiyoo jiru irratti dhaabuun bishaan abiddatti biifan. Akkasumas balfa fayyadamuun ibidda lafarratti dhaamsan.
"Gara sa'aatii 12tiif ibiddi gubaa nutti bu'aa ture," jedhu Dr Griffits. Sababii baay'ina balaa ibidda bosona naannoo Los Anjalas keessatti mudateen "baay'inaan bal'aa" tureef, namoonni ibidda dhaamsa kan jara sadan kanneen bira qaqaban guyyoota muraasa dhumaa rakkina torban tokkoof ture keessatti ture.
"(Kutaan ibiddaa) manneen hundi baraaramuu akka hin dandeenye itti dhaga'ame ture," jedhu Dr Griffits." Tajaajilli ibiddaa maaliif nu gargaaruuf akka baay'ee ko'omatanii ture "guutummaatti akka hubatan" kan himan yoo ta'u, itti dabaluudhaan, "Kanaafidha dursanii leenji'uun, meeshaalee keessan qabaachuu fi dhuguma deeggarsa hawaasa keessanii qabaachuun baay'ee barbaachisaa kan ta'e," jedhan.
Gareen balaa ibiddaa Los Anjalas ammallee balaa ibiddaa gurguddaa lamaa fi xixiqqoo lama waliin wal'aansoo wal qabaa jiru.
Ibiddi Paalisaades kan Saantaa Monikaa fi Maalibuu gidduutti gama lixa magaalattiin gubachaa jiru lafa eekkara 23,000 ol barbadeessuun, seenaa Kaalifoorniyaa keessatti balaa ibiddaa kanneen hamaa keessaa tokko ta'eera.
Balaa ibidda bosonaa kanaan yoo xiqqaate namoonni 24 kan du’an yoo ta’u, naannoo ibiddaa Eaaton fi Paalisaades keessatti ammoo namoonni 23 bakka buteensaanii dhabameera. Namoonni 90,000 ol ta'an ammoo ammalleen ajaja baqannaa jala jiru.