Israa'el bakka haleellaa Hamaas Onkololeessa 7 yaadataa jirtuutti Beeruuti haleelte

Haguuggii Tamsaasa Kallattii

1. 4 Onkololeessa 2024Haleellaan Israa'el Beerut keessaa nama hogganaa Hezbollaa ta'uuf yaadameerratti kan xiyyeeffatedha- miidiyaa

   

   Madda suuraa, Reuters

   Hogganaa Hezbollaa tibbana ajjeefamee Hasan Nasrallaa bakka bu’uu akka danda’u jedhamee bal’inaan kan yaadamu Haashem Saafi'eddiin, namoota haleellaan Israa’el halkan edaa Beerut keessatti dho’iinsa guddaa uumuun irratti xiyyeeffatame keessaa tokko akka ta’e miidiyaaleen Ameerikaa gabaasan.

   Gaazexaan Niiw Yoorki Taayimsi qondaaltota Israa’el wabeeffachuun akka jedhetti, waraanni odeeffannoo Saafi'edddiin, ilma obboleessa Nasrallaa fi hoggantoonni Hezbollaa biroon magaalaa guddoo Libaanos kutaa kibba Daahi'eh keessatti walga’aa akka jiran agarsiisu akka qaban himu.

   Axihos, qondaala Israa’el tokko wabeeffachuun akka jedhetti, Saafi'eddiin lafa jalaa gadi fageenyaan dahannoo ijaarame keessa akka turee fi haleellaa kanaan ajjeefamuu fi dhiisuusaa ammallee ifa miti.

   Akka gabaasa oduu Libaanositti, haleellaan Israa’el kan torban darbe Nasrallaa ajjeese caalaa baay’ee guddaa akka ta’e Axihos himeera. Haata'u malee taatee kanarratti Hezboollaan hanga ammaatti yaada hin kennine.

   Eenyuutuu Nasrallaa bakka bu'a jedhamee eegamaa? Haasan Nasrallaa eenyutuu bakka bu'aa laata?

2. 4 Onkololeessa 2024Haleellaa Israa’el halkan Beerutitti taasifteen lammileen hedduun du'an

   

   Madda suuraa, Reuters

   Kamisa galgala Israa'el Beerut keessatti haleellaa gaggeessaa jirtu itti fufuun dho'insi gurguddaan dhaga'amaa tureera. Dho'insi gurguddaan buufata xiyyaaraa biyyattii birattis taasifameera. Jimaata barii magaalattiin huurriin aguugamtee mul'ataa turte.

   Ministeerri fayyaa hawaasaa Libaanos sa’aatii 24 darban keessatti haleellaa lafaa fi qilleensaa Israa’el raawwateen namoonni 37 kan ajjeefaman yoo ta’u, namoonni 151 ammoo miidhamuu beeksiseera.

   Haleellaa Israa’el torban lamaaf Hezboollah irratti xiyyeeffattee Libaanos keessatti taasifteen namoonni 2,000 ol ajjeefamuu fi kanneen miliyoona tokkoo ol ta'an qe’ee isaanii irraa buqqa’uu aanga’oonni biyyattii himaniiru.

   Humni waraanaa Israa'el IDF Kamisa galgala xiyyaaronni isaa halkan tokkotti kibba Libaanos fi bakka birootti bakka dawoo Hezboollaa 200 haleeluu fi loltoota Hizboollah gara 15 ajjeesuu hime.

3. 4 Onkololeessa 2024Dho'insi guddaan buufata xiyyaaraa cinaatti dhaga'ame

   

   Madda suuraa, Reuters

   Yeroo Israa'el Beerut keessatti haleellaa gaggeessaa jirtutti sagaleen dho'insa gurguddaa buufata xiyyaaraa biratti dhanga'amaa jira.

   Viidiyoo dho'insa guddaa kana daawwadhaa.

4. 3 Onkololeessa 2024Iraan biyyi Israa'el gargaartu kamiyyuu 'kan irratti xiyyeeffattu' ta'uu ibsite

   

   Madda suuraa, Reuters

   Dhaabbata Biyyoota Gamtoomanitti Ergamni Iraan, biyyi Israa’eliif gargaarsa kennitu kamiyyuu, biysaanii kan “irratti xiyyeeffattuu” akka ta'e akeekkachiisan.

   Ergamichi ibsi baaseen, ''Biyyi kamiyyuu biyya weerartuu kanaaf gargaarsa yoo goodhe, akkasuma yoo waliin hojjetee, irratti tarkaaniifiin seera qabeessa ta'e ni fudhatama,'' jedhe.

   Kanaafuu "Biyyoonni waldhabdee sirna Israa'elii fi Iraan gidduutti uumame keessa seenuurraa akka of qusatanii fi waldhabdee irraa akka of fageessan gorsina."

   Ergamni kun itti dabaluudhaan, karaan qunnamtii Waashingitanii fi Iraan gidduu jiru karaa Imbaasii Siwiizarlaand Teehiraan jiru qofa ta’uu ibse.

   Oduu gara biraatiin ammoo daandiiwwan qilleessaa idil-addunyaa karaa Baga Jidduugalaatiin balalii'uu dhaabaa jiru.

   Daandiin Qilleensa Biritish hanga dhuba baatii kanaatti balaliinsa Teel Aviiv'tti taasisuu adda kutuu beeksiise.

   Akkasumas daandiin qilleensa Jarman, Luuftaanzaanis hanga Onkololeessa 26tti gara Teehraan, hanga Onkololeessa 31tti Teel Aviiv fi hanga dhuma Sadaasaatti gara Beeruutiitti balalii'u dhaabu beeksiiseera.

   Daandiin qilleensaa Dach-KLM ammoo hanga dhuma bara 2024tti gara Teel Aviiviitti balalii'u dhaabeera.

   Daandiin qilleensaa Indiyaa, Kaataay Paasfik, Deeltaa, Yunaayitid, EasyJet, Ryaanar fi Wiiz Air hundi gara Israa'elitti balalii'uu dhaabaniiru.

   Daandii qilleensaa Baha Jidduugalaa Libaanos qofaatuu hanga ammaatti Buufa Daandii Qilleensa Beeruti irraa tajaajila kennaa jira.

5. 3 Onkololeessa 2024US Israa'eel tumsuuf kutannoo qabdi- Isteet Depaartimant

   

   Madda suuraa, Getty Images

   Dubbi himaan Ministeera Dhimma Alaa Ameerikaa, Maatiyoo Miilaar US, ''Israa'el cinaa dhaabachuuf kutannoo qabdi'' jechuun, michuushee ''haala nageenyaa hin taanee'' irraa akka of ittistuus akka raggaasiftu dubbatan.

   Israa’el haleellaa misaa’elaa Kibxata darbe Iraaniin irratti raawwatameef haaloo ba’uuf eeddoowwan oomisha boba’aa Iraan haleellaa fudhattii isa jedhamee haasa'ameerratti deebii kennuu didan.

   Milaar itti dabaluudhaan, US waldhabdee kanaaf furmaata argachuu akka barbaaddu, garuu ammoo dandeettiin Hezbollaa yoo dadhabu arguu barbaaddi jedhan.

   Lammiilee Ameerikaa Libaanos keessaa baasuu ilaalchisee, Ministeerri Dhimma Alaa daandiiwwan qilleensaa Ameerikaa waliin hojjechaa akka jiru, akkasumas balalii mataasaa gara Tarkiyaatti kireeffachaa akka jiru dubbata.

6. 3 Onkololeessa 2024Michoonnishee kan jalaa unkutaa'an Iran, Israa'el waliin lola guutuutti seentii?

7. 3 Onkololeessa 2024Baqattoonni 45 ol qarqara Jibutiitti galaanatti darbatamanii du'an Itoophiyaanota ta'uun mirkanaa'e

8. 3 Onkololeessa 2024Qabxii ijoo ja'a lola Baha Giddu-galeessaa baruu qabdan:

   • Haleellaa halkan Israa'el Beerut keessatti gaggeessiteen namoonni sagal ajjeefamanii, 14 madaa'aniiru, akka ministeerri fayyaa Libaanos jedhetti. Haleellaan kun ammoo erga walitti bu'insi kun jalqabee hadhuura magaalaa guddoo Libaanos, Beerut keessatti yeroo raawwatamu isa jalqabaati.

   • Israa'el "waajira basaasa muummee Hezboollaa" akka haleelte himuun, haleen itti fufuu waan danda'uuf namoonni kibba Libaanos keessa jiraatan akka mana isaanii gadhiisaniif itti himuu ibsiteetti.

   • Samii Beerutirra sagaleen diroonii dhaabbataan uursaa akka oole gabaasaan BBC Naafiseeh Koonvaard dubbateera.
   • Pirezidant Joo Baayidan yaada Israa'el har'a Iraaniin haleeluuf karoora qabdi jedhu waakkachuun, carraa Israa'el buufata boba'aa Iraan haleeltu jiraa gaaffii jedhurratti garuu "mariyachaa jirra" jedhan. Dubbiin Pirezidant Baayidan kun ammoo gatiin zayita boba'aa %5n akka dabalu taasiseera.

   • Kun osoo kanaan jiruu, Dhaabbanni Fayyaa Addunyaa (WHO) sa'aatii 24 darban keessatti hojjetoonni fayyaa 28 Libaanos keessatti ajjeefamuu gabaase-hagganaan dhaabbatichaa Dr. Tediroos Adihaanom ammoo sababa balaliin dhorkameen meeshaalee gargaarsaa qaqqabsiisuun hin danda'amne jechuun akeekkachiisan.

   • Daandiin qilleensaa Dubaay jiru Emireetis ammoo "jeequmsa naannoo sana keessa jiru eeruun" balaliiwwan Iraan, Iraaq, akkasumas Yordaanosirraa gara Beerutitti taasisu yoo xiqqaate hanaga Onkoloolessa 8tti haquu beeksiseera.

   

   Madda suuraa, EPA

9. 3 Onkololeessa 2024Erga Joo Baayidan dhimma Israa'el-Iraan irratti dubbataniin booda gatiin boba'aa %5 dabale

   Rakkoon Baha Giddu-galeessaa keessatti mudate dinagdeerratti, keessumaa zayita boba'aa ilaalchisuun dhiibbaa fiduu danda'a.

   Erga Pirezidant Joo Baayidan haleellaa Iraan Kibxata irratti raawwatte haaloo ba'uuf Israa'el bakkeewwan zayita boba'aa Teehiraan ni haleeltii gaaffii jedhuuf "irratti mariyachaa jirra" jedhaniin booda gatiin boba'aa %5n dabale.

   Iraan addunyaarratti zayita boba'aa omishuudhaan sadarkaa torbaffaarra jirti. Omishashee kana keessaa walakkaa kan ta'u biyya alaatti kan ergitu yoo ta'u, irra caalaan isaa Chaayinaatti ergiti.

   

   Madda suuraa, Reuters

10. 3 Onkololeessa 2024Baayiden yaada Israa’el ammuma Iraan haleeluuf jirti jedhu kuffisan

    

    Madda suuraa, EPA/Shutterstock

    Pirezidantiin US Joo Baayidan yaada Israa’el haleellaanhar'a Iraan irratti banuuf jirti jedhu kuffiisan.

    Haleellaa Iraan Kibxata Israa'el irratti raawwatteef Israa'el deebii akka kennituuf US ni hayyamti yoo ta'eef Waayit Hawusitti rippoortarootaan kan gaafataman Joo Baayidan akkas jedhan: "Jalqabumayyu, nuti Israa'eliif hin hayyamnu, nuti Israa'el ni gorsina. Kanaaf, har'a wanti ta'uuf deemu hin jiru."

    Haleellaa Eegdota Warraqsaa Iraan haaleellaa misaa'elaa guddaa Israa'el irratti raawwachuu hordofee, MM Beenjaamin Netaaniyaahuu Iraan "gogongora guddaa hojjette" jechuun gochashee kanaaf gatii baasi jedhaniiru.

    Baayidan Israa’el bakkeewwan zayita boba’aa Iraan haleeluu danda’uusheerratti ‘dubbachaa jira’ jedhan.

    Baayidan rippoortaroota Waayit Hawusitti Israa’el amma Iraan haleeluun ishee waan ooludhaa jedhanii gaafataniif “har’a wanti ta’u hin jiru” jedhan.

    US Israa’el akka Iraan haleeltuuf ni hayyamtii jedhanii gaafataniif, “nuti Israa’eliif hin hayyamnu, nuti Israa’eliin ni gorsina,” jedhan.

    Israa’el haaloo ba’uuf bakkeewwan zayita boba’aa Iraan haleeti jedhurratti ammoo Baayidan “isarratti dhubbachaa jirra. Sun waan xiqqaadha… waan fedhes ta’u,” jedhan.

    Iraan Kibxata galgala balastik misaa’el 200 Israa’elitti dhukaasuun ishee ni yaadtama.

11. 3 Onkololeessa 2024Saatii 24 darban keessatti hojjetoonni fayyaa 28 ajjeefamaniiru- WHO

    

    Madda suuraa, Reuters

    Sa'aatii 24 darban keessa hojjetoonni fayyaa 28 Libaanos keessatti ajjeefamuu Dhaabbanni Fayyaa Addunyaa (WHO) hime.

    Daarektarri WHO Tediroos Adihaanom Gabreyesuus ibsa gaazexeessitootaaf kennanirratti akka dubbatanitti, hojjetoonni fayyaa baayyeen "sababa haleellaa gaggeeffamaa jiruutiin bakka hojjetanii baqatanii waan jiraniif gabaasaa hin jiran" jedhan.

    Sababa biyyattii keessatti balaliin daangeffameenis meeshaalee wallaansaa gara Libaanos geessuuf karoorri qabame hin milkoofne jedhan.

12. 3 Onkololeessa 2024Aara Beerut keessaa bahaa jiru daawwadhaa!

    Haleellaa qilleensaa Israa’el guyyaa Beerut keessatti raawwataa oolteen samiin magaalattii aaraan haguugameera.

    Viidiyoon Roohitars waraabe kana daawwadhaa.

13. 3 Onkololeessa 2024Israa'el waajira basaasaa mummee Hezboollaa haleeluu himte

    Israa'el waajira basaasaa Hezboollaa irratti qiyyaafachuun haleeluu himte.

    Ibsa Humni Ittisaa Israa'el baaseen, ''meeshaalee shororkeessummaa rawwachuuf oolan,'', wirtuu ajajaa fi ''maloota odeeffannoo basaasaa,'' haleeluu hime.

    IDF dabaluunis waajirri mummee kuni ''sochiiwwan basaasaa Hezboollaa'' qindeessuufi odeeffannoo basaasa walitti qabuuf oola jedheera.

14. 3 Onkololeessa 2024Iraan biyyooti G7 'ni baabsu' jechuun himatte

    Ministeerri Hajaa Alaa Iraan biyyoota G7 haleellaa misaayelaa Iraan Israa'el irratti raawwattee qeequu isaaniif 'ni baabsu, gaafatamas hin fudhatan,'' jette.

    Dubbiihimaan ministeerichaa Isamaa'el Baagahaa'ii, ''biyyoota G7 keesumaa Ameerikaan ammoo nagaafi tasgabbiin Lixa Eeshiyaa keessatti Israa'el hidhachiisuufi deeggaruun gaafatamoo dha,'' jedhan.

    Gaafa Roobii hogganooti G7 - Kanaadaa, Firaans, Jarmanii, Xaaliyaan, Jaappaa, UK fi US ibsa waloo kennanin haleellaa Teeraan balaaleffachuun ''yaaddoo jabaa'' qabaachuu ibsan.

    Kana malees Iraan ambaasaaddaroota Jarmanii fi Ostiriyaa haleellaa Iraan raawwatte balaaleffachuu isaaniif gaaffii waamteettiinii.

15. 3 Onkololeessa 2024Haleellaa Israa'eliin hamma yoonaa Libaanositti namooti 2000tti siqan ajjeefamaniiru - ministeera fayya

    Ministeerri Fayyaa Libaanos Firaas Abaayid Israa'el Onkololeessa 08 bara 2023 irraa qabee Israa'el daa'imman 127 du'uu beeksise.

    Kanaan qondaaloti LIbaanos namoonni ajjeefaman 1,873 jedhanii turan.

    Ibsa Jimaata darbe baasaniin Abiyaad namoonni 9,384 miidhamaniiru jedhaniiru.

16. 3 Onkololeessa 2024Dureessi addunyaa Iloon Mask mana murtiitti waamameera, ni dhiyaata laata?

    

    Madda suuraa, Reuters

    Manni Murtii Federaalaa biiliyenarichi Iloon Mask Kamisa har'aa mana murtiitti akka dhiyaatu ajajeera.

    Miidiyaa hawaasaa duraan Tiwiitari jedhamu yeroo ammaa maqaa Iloon baaseen X jedhamuun beekamu ilaalchiseeti manni murtii kan isa waame.

    Biiliyanarichi yeroo Tiwiitariin bara 2022tti bite dogoggora tokko tokko raawwateera jedhamuun abbootii alangaarraa gaaffii isaaf dhiyaatu akka deebisuuf kan waamame.

    Yeroo ammaa addunyaa faayinaansii kan gaafachaa jiru waan tokko. Mask tole jedhee dhaddacha duratti dhiyaataa kan jedhudha.

    Baatii darbe Komishinii Nageenyaa Loosa Anjeles keessatti mana murtiitti isa waamnaan ''hi'iikoo'' jedhee hafeera.

    Miidiyaa hawaasaa kana bituudhaaf maallaqa aksiyoonaa kuufachaa ture jedhamuun qorannoon biiliyanara kanarratti banameera.

    Mask kanaan dura Tiwiitara turee kanin bite dogoggoraani malee beekaa mitii jedhera.

    Waajirri gabaa aksiyoonaa Ameerikaa to'atu biiliyenarichi Kamisa dhaddachatti yoo hin dhiyaanne ni adabamaa jedhe.

    Waajirichi akka jedhutti Iloon Mask dhaddachatti dhiyaatee gaaffii dhiyaatuuf deebii kenna jedhamee abukaatoowwan qarshiin kumaatamaan ramadameef otoo eeganii otoo hin argamiin hafeera.

    Abukaatonnisaas sa'atii sadii dura bilbilanii hojiif gara baha biyyattii imaleera jedhanii jedheera.

17. 3 Onkololeessa 2024'Miirri nageenyaa kamiyyuu badaa jira': Haleellaan Israa'el giddugala Beerut irratti raawwatte namoota sagal ajjeese

    

    Madda suuraa, Ruters

    Beerut keessatti ammallee dho’insi dhaga’amaa jira. Gaazexeessaan BBC Beerut jiru magaalattii naannoo Daahiyyee keessatti dhohinsa guddaa dhaga’aa akka jiru dubbata.

    Akka Rooyitarsi jedhetti, dho’insawwan gurguddoo sadii dhaga’amaniiru.Daandiin qilleensaa Emireetis ammoo balalii gara Iraan, Iraaq, akkasumas Yordaanositti taasisu guyyoota sadiif haqeera.

    Daandiin qilleensaa Dubaay kun akka jedhetti, balalii Dubaayirraa gara Iraan, Iraaq fi Yordaanositti taasisu sababa “jeequmsa naannicha keessaatiif” guyyoota sadiif haqeera.

18. 3 Onkololeessa 2024Siidaan urunguu morkii taphaaf dhokfame barbaacha waggaa 30 booda argame

    Taphni miya dhokfame akeektuu kennamuun barbaadanii argachuu waggaa 31 booda xumurameera.

    Siidaan warqee xiqqoo urunguu akka addunyaatti yeroo dheeraaf barbaadamaa turte Firaansitti argamte.

    ''Siidaan xiqqoo urunguu kitaabarraa kaka'umsa godhachuun hojjetamtee turte tapha ''treasure hunt'' jedhamu kanaaf dhoksame Kamisa argamuun booda taphichi furmaata ragachuun beeksifameera.

    ''Kana booda siidaan xiqqoon asiitti ykn achitti dhokfameera jedhanii barbaaduun bu'aa hin qabu,'' jedhameera.

    Ergaan kuni nama fakkii urunguu kanaa yeroo jalqabaaf kitaaba Chouette d’Or (golden owl) bara 1993tti fakkishee kaaseen maxxanfame.

    Waa'ee iddoo siidaan urunguu kanaa argamee odeeffannoo dabalataa kenname hin jiru.

    Siidaa warqee xiqqoo kana argachuuf namoonni kumaatamaan lakkaa'aman barbaacha irratti hirmaataniiru.

    Iddootti dhoksame argachuuf hibboowwan taphichaa wal-xaxaa tahan baayyee hiikuuf barbaaduun dirqama ture.

    

    Madda suuraa, Michel Becker

19. 3 Onkololeessa 2024Amma nu gahe, Israa'el qondaaloota olaanoo Hamaas sadii Gaazaatti ajjeesuu ibsiti

    Raayyaan Ittisa Israa’el (IDF) ji’a sadii dura, hoggantoota olaanoo Hamaas sadii Gaazaa keessatti ajjeesuu isaa amma beeksise.

    Qondaaltoota ajjeeffamunsaanii ibsame keessaayis, Rawhi Mushtaahaa, kan waraana Israa'eliin itti gaafatamaa mootummaa Hamaas ta’uun ibse, Saameeh al-Siraaj fi Saami Oudeh, itti gaafatamummaa nageenya Hamaas kan hammate ta'u.

    Waraanni Israa'el akka jedhutti, qondaaltoonni kunneenis Kaaba Gaazaa keessatti bakka dhoksaa lafa jalaa keessa dhokatanii kan turan yoo ta'u, haleellaa qilleensaatiin ajjeefamaniiru jedhe.

    Israa'el Hamaas waa'ee du'a qondaaltoota kanneenii akka ''hamilee hin dhabne fi gochaawwan shororkeessummaa isaa itti fufuuf'' jecha hin beeksifne jedhe.

20. 3 Onkololeessa 2024Haleellaa Israa'el kaleessa galgalaa booda giddugala Beerut keessatti mul'ata

    Akkuma gabaasaa turre, haleellaan qilleensaa Israa'el kaleessa galgala gamoo mana jireenyaa giddugala Beerut keessatti argamu rukute.

    Gareen BBC Beerut jiru bakka balaan kun itti dhaqqabe dhaqee waraabbii viidiyoo kana erganiiru: