Libaanos haleellaa hospitaala Beeruti biraatti raawwatameen hedduun ajjeeffaman jette

Haguuggii Tamsaasa Kallattii

1. 21 Onkololeessa 2024Israa'el xiyyaarri qubachuuf daqiiqaa muraasa dura naanawa buufata xiyyaaraa Beerutiitti haleellaa raawwatte

   Israa’el halkan darbe keessa Beerutii fi guutuu Libaanos keessatti haleellaa qilleensaa dabalataa raawwatteen dameewwan baankii AQAH irratti xiyyeeffatte.

   Dhaabbanni oduu mootummaa Libaanos NNA jedhamu akka gabaaseetti, damee baankii kanaa naannoo Buufata Xiyyaaraa Idil Addunyaa Raafich Haririi Beerut keessatti argamu irratti haleellaan raawwatamu hime.

   Hanga haleellaan sun akka sa'aatii biyyatiitti naannoo sa'aatii 23:45tti buufanni xiyyaaraa haaluma idileen hojjechaa ture. Balaliin Dubaayi irraa ka'es sa'aatii 23:59tti bu'uuf ture daqiiqaa 17 booda qubate.

2. 21 Onkololeessa 2024Tamsaasa kallattii eegalleerra

   Hordoftoota BBC Afaan Oromoo ashamaa bakka jiratan maraa.

   Kunoo tamsaasa keenya Wiixata har'a amma eegalleerra.

   Yoo nu hordoftan odeessaalee gaggabaaboo addunyaa karaa kanaan argattu.

   Bakka nagaa oolaa!

3. 20 Onkololeessa 2024Hezbollaan rokkeettiwwan 160 Israa'elitti dhukaase.

   Humni waraanaa Israa’el rookkeetotni gara 160 ta’an Libaanos irraa Israa'ellitti furguggifamaniiru jedhe.

   Rokkeettiwwaan Dilbata guyyaa Libaanos irraa gara Israa'elitti dhukaafaman hedduu isaanii qoladheera jedhe humni waraanaa kun.

   IDF ibsa X gubbaatti baaseen rokkeettiwwaan kunneen naannawa Galiilaa irratti qeeyyafatamuun rokkeettiwwaan Libaanos irraa qaxxaamuranii daangaa Israa'el keessa galuu adda baasuu ibse.

   Dhimmaa Kana Irratti Hanga yoonaa Gareen Hezbollaa waan ibse hin qabu. Isra'elis rokkeettiwwaan kunneen dhukaafamuu fi qolatamuu irraan kan hafe miidhaan qaqqabuu fi dhiisuu hin eerre.

4. 20 Onkololeessa 2024Haleellaa Beerut booda Suuraalee gamoowwan jijjiganii aaraa jiran agarsiisu

   Suuraawwan Haleellaa Israa’el Beerut irratti raawwatte booda gamoowwan jijjiguun aarri irraa aaru mul'isu heddun ba'aa jira.

   Libaanos bakka Israa'el haleellaa qilleensaa irratti raawwattetti gamoowwaani fi manneen jireenya kan aarri ibiddi irraa ol ka'aa jiru.

5. 20 Onkololeessa 2024Waraanni Israa'el waajjira muummee basaasa Hezbollaah haleeluu ibse

   Waraanni Israa’el waajjira muummee basaasa Hezbollaa magaalaa guddoo Libaanos Beerut keessatti argamu irratti haleellaa raawwachuu isaa ibseera.

   “Gara ganama har’aa humni qilleensaa Israa’el wiirtuu waajjira muummee basaasaa Hezbollaa fi kuusaa meeshaa waraanaa lafa jalaa Beerut keessatti haleellaa rawwadhe” jedha ibsi kun.

   Itti dabaluudhaanis, ''jiraattotaaf dursanii akeekkachiisa kennuu dabalatee'' tarkaanfiiwwan hedduu kan miidhaa namoota nagaa mudachuu danda'u hir'isuuu'' fudhatameera jedha.

   Hezbollaan haleellaa kana ilaalchisee hanga ammaatti yaada hin kennine.

6. 20 Onkololeessa 2024Israa'el Gaazaa fi Beerut irratti haleellaa haaraa bante itti fufte

   Haleellaa Israa’el kaaba Gaazaa magaalaa Be'it Lahiyaa jedhamtu keessatti raawwatteen yoo xiqqaate namoota 87 ajjeeffamuu aanga’oonni himan.

   Halleellaa boombii dilbata galgala raawwate booda namoonni heddutti lakkaa’aman kan miidhaman yoo ta’u, hedduun isaanii ammallee caccabaa gamoo jalatti ukkamfamanii akka jiran qondaaltonni itti dabaluun ibsan.

   Israa'el miidhaa gahe qorachaa akka jirtu ibsuun, garuu qondaaltonni Hamaas odeeffannoo hin jirre ''arbeessuun'' waan waraanni ishee raawwate waliin wal hin simne qooduu himatte.

   Lolli Libaanos keessattis itti fufee jira. Israa’el naannoo kibba Beerut keessatti haleellaa qilleensaa marsaa biraa kan raawwatte yoo ta’u, jiraattonni naannoo lamaa akka baqatan Israa'el ajjaja kenniteerti.

   Akka waraanni Israa'el jedhutti, humni qilleensaa ishee guyyaa darbe keessa Gaazaa fi Libaanos keessatti bakka dahoo waaraan gara 175 rukute jetti.

7. 19 Onkololeessa 2024Haleellaa Beeruuti keessaa dhaabuuf tarkaanfiin fudhatame- IDF

   Waraanni Israa'el dambalii haleellaa haaraa naannoo kibba magaalaa guddoo Libaanos Beerut irratti raawwatame hordofee ibsa baase.

   Raayyaan Ittisa Israa’el (IDF) akka jedhutti. humni qilleensaa bakka kuusaa meeshaa waraanaa Hezbollaa fi wiirtuu ajaja waajjira muummee basaasaa Daahiyeh keessatti argamu irratti xiyyeeffate.

   "Haleellichaan dura balaa namoota nagaa miidhuu salphisuuf tarkaanfiiwwan hedduun fudhatameera," jechuun itti dabaluudhaan, akeekkachiisa namoonni naannicha keessaa akka baqataniif durse kennuu hime.

   Miidhaa fi du'a haleellaa kanaan qaqqabe ammallee xinxalaa kan jiru yoo ta’u, yoo xiqqaate gamoo abbaa darbii hedduu qabu tokko guutummaatti barbadaa’eera.

8. 19 Onkololeessa 2024Israa'el qarqara Beeruuti haleelte

   Haleellaan qilleensaa qarqara magaalaa guddoo Libaanos Beerut rukute, kunis waraanni Israa’el jiraattonni naannicha keessaa akka bahaniif erga ajajee sa’aatii tokko osoo hin guunne kan raawwatame.

   Suuraaleen akka agarsiisanitti, kibba magaalattii keessatti bakka Hezbollaan deeggartoota cimaa qabu kan ta’e Daahiyeh keessaa aarri samiitti ol ka'aa jira.

   Dhaabbanni Oduu Biyyaalessaa mootummaa Libaanos (NNA) akka gabaasetti, gamoo Haret Hreek keessatti argamu tokko yeroo lama haleelame.

   Israa’el hanga ammaatti haleellaa kana ilaalchisee yaada hin kennine, garuu ammoo sa'aatiin dura dubbi himaan waraanichaa jiraattonni Dahiyeh fi Haret Hreek keessaa akka bahan ajaja dabarsee ture.

   "Fallaa waraana Israa'el kan dhiheenyatti keessatti duula gaggeessuu, kan naannoo dhaabbilee fi dantaa Hezbollaa ta'eetti dhiheenyatti argamtu," jechuun dubbi himaan kun X irratti barreesse.

9. 19 Onkololeessa 2024Duuti Sinwaar dhukaasa dhaabuuf 'kallattii haaraa kenna- Boorel

   Dippilomaatii olaanaa Gamtaa Awurooppaa Joseef Boorel ajjeechaan humnoota Israa’eliin hogganaa Hamaas Yaahyaa Sinwaar irratti raawwatame carraa Baha Giddugaleessaa keessatti dhukaasa dhaabuu galmaan ga’uu dabaluu danda’a jedhu.

   Walgahii ministeerota ittisaa G7 Neeppaal keessaa irratti gaazexeessitoota waliin kan dubbatan Booreel, erga Sinwaar ajjeefamee booda ''ilaalchi haaraan banaadha'' jedhu. Kanas ammoo dhukaasa dhaabuurra gahuu fi booji'amtoonni hafan akka gadhiifaman mirkaneessuuf itti fayyadamuu qabama jedhan.

   Itti dabaluudhaanis Unifil, humni naga eegdoota UN Libaanos keessaa fi kan walitti bu'iinsa dhiheenya Libaanos keessatti mudateen rakkoo keessa gale, cimfamuufi ergamnisaas ''xinxalamu'' qabaata jedhan.

10. 19 Onkololeessa 2024Dirooniin gara qe'ee MM'tti erga furguggifamee booda Israa'el akkamitti deebii kennuu dandeessi

    Hezbollaan ajjeechaa Israa’el hogganaa Hamaas Yaahiyaa Sinwaar irratti raawwatteef deebii kennuudhaaf waldhabdee Israa’el waliin qabuun haleellaa marsaa haaraa fi hammaataa ta’e akka eegalu dhaadatee ture.

    Dirooniin mana jireenyaa dhuunfaa Ministira Mummee Israa'el Beeniyaamin Netaaniyaahuu irratti xiyyeeffachuun dhaadannaa kanaan kan walsimu fakkaata.

    Hezbollaan haleellaa kanaaf itti gaafatamummaa fudhachuu isaa hanga ammaatti hin mirkaneessine, garuu haleellaa kanaaf maddi biraa jiraachuu kan danda'u waanjiru hin fakkaatu.

    Yeroo haleellaan sun raawwatamuutti Netaaniyaahuun mana keessa hin turre, miidhaan qaqabuuf gabaafames hin jiru. Garuu baay'een akkaataa innii fi mootummaansaa taatee kana itti hiikuuf filatan irratti hundaa'a.

    Yoo fedhan yaalii ajjeechaa fashalaa'edha jechuun ibsuun qubasaanii gara Iraan kan hunda caalaa Heziboollaa deeggaruudhaan barbaachisaa taatetti akeekuu danda'u.

    Sun ammoo haleellaa guddaa misaa’ela balistikii Teehiraan baatii darbe Israa’el irratti raawwatteef deebii Israa’el kennite irratti bu’aa cimaa qabaachuu danda’a.

11. 19 Onkololeessa 2024Tajaajilli wallaansa Israa'el namni tokko meeshaa qara qabuun ajjeeffame jedhe

    Dhaabbanni Tajaajila Wallaansa Israa'el Maageen Adoom (MDA), namni umuriinsaa waggaa 50 tokko osoo konkolaataa keessa jiruu meeshaa qara qabuun waraaname ajjeeffame.

    MDAn akka jedhutti, kaaba Haayifaa, Eiin Haamifraatz keessatti sagaleen akeekkachiiftuu ykn saayiranii diimaa dhageessifamuu hordofuun, namni biraa ''haala giddu galeessaa'' keessatti argamu tokkoos wal'aansaaf gara hospitaala dhiyoo jirutti ergameera.

    Akkuma kanaan dura gabaasne, MDAn akkasumas namni umuriinsaa waggaa 29 ta'e tokko meeshaa qara qabuun miidhaa jiduugaleess kan irra gahe yoo ta'u, namni gara biraa ammoo erga rookkeettiin Libaanos irraa furguggifame mana Hayfaatti argamu tokkoo rukutee booda, miidhaan salphaan akka irra gahe dubbate.

12. 19 Onkololeessa 2024Tiraamp abbaa seeraa filannoon dura galmee himannaasaa iftoomsan ''hamtuu'' jedhan

    Doonaald Tiraamp himannaa shira filannoo Abukaatoo Addaa Jaak Ismiiz isarratti dhiyaaterratti ragaa fuula 1,800 ol qabu gadhiisuunsheetti haadha seeraa tokkoon ''nama hunda caalaa hamtuu'' jechuun waaman.

    Kaadhimamaa paartii Rippabilikaan Waayit Haawus kun akka jedhanitti, haatii murtii mana murtii aanaa Ameerikaa, Taanyaa Chutkaan ragaa haaraa kana hanga filannoo ji'a dhufuutiin boodaatti akka tursiiftuuf gaaffii dhiyeessan diduunshee ''filannoo gidduu seenuu'' akka ta'e dubbatan.

    Xiinxaltoonni seeraas galmeen dhimmicharratti dhiyaate abbootiin alangaa tarkaanfii qorannoo dhaabuunsaanii seera keessoo qajeelcha haqaatiifilannoo guyyoota 60 dhufan keessatti gaggeeffamurratti dhiibbaa qabaachuu danda’u irratti falmii gaggeessanii ture.

    Haata'u malee haatii murtii, Chutkan, murtiishee keessatti galmeewwan kanneen kan dhoksiitu yoo ta'ee, sun mataansaa akka gidduu seenummaa filannootti fudhatamuu danda'a jechuun falmaniiru.

    "Manni murtichaa odeeffannoo ummanni karaa biraatiin argachuuf mirga qabu sababii bu'aa siyaasaaiif iftoomuunsaa fiduu danda'utiif qofa yoo dhorke, dhorkaan sun mataansaa filannoo gidduu seenuu ta'uu danda'a. Yookan ammoo fakkaachuu danda'a," jechuun barreessite.

    Bara darbe dubartii Teeksaas tokko dhimma Tiraamp kana kaasuudhaan haadha murtii Chutkan irratti ishee ajjeessuudhaaf doorsisuun himatamtee turte.

    Galmee uldaataan abbaa fuula 1,889 Jimaata darbe gadhiifame kunis, kutaalee seenaa jireenyaa ittaanaa pirezidaantii duraanii Maayik Peensii fi ibsa idilee inni bu’aa filannoo bara 2020 akka hin haqamneef kennan dabalatee, baay’eesaa odeeffannoodhuma duraan ummanni beekuu irra deebiiin kan iftoome.

    Odeeffannoo haaraan yaada Mr Ismiiz ji'a darbe dhiyeessan keessaa qofaadha.

    Jimaata darbe nama miidiyaa warra Raayiit-wiing kan ta'e Daan Boonginoo waliin podkaastii irratti kan dhiyaatan Tiraamp, haadha murtii Chutkaan arrabsuun gorsituu addaa ''saree dhukkubsattuu'' jechuun waamuunsaanii ni yaadatama.

    Himannaan Tiraamp kunis jeequmsa Amajjii 6, 2021 Kaappitoolii Ameerikaa irratti kan xiyyeeffatuu fi Tiraamp seeraan ala bu'aa filannoo ittiin baatii sadiin dura Joo Baayideniin injifatanii okkoraan galagalchuufshira xaxan jechuun himatame.

    Gaaffii fi deebii sanarrattis Tiraamp namoota Kaapitoolii weeraruun himatamiin hidhamaman, lammiilee Ameerikaa Jaappaan kanneen Waraana Addunyaa Lammaffaa keessatti hidhamanii turte waliin wal fakkeessan.

13. 19 Onkololeessa 2024Rookeetiiwwan 50 caalan Libaanos irraa kaaba Israa'elitti dhukaafamuu humni waraanaa Israa'el ibse

    Akka humni waraanaa Israa'el jedhutti rookeetiiwwan 55 ta'an Libaanos irraa gara magaalota kaaba Israa'el kanneen akka Hayifaa fi kaanitti dhukaafamaniiru.

    Baayyeensaanii sirna ittisa qilleensarraa Israa'el- Iron Dome jedhamuun qilleensarratti akka rukutamanis ibseera waraanni Israa'el.

    Dameen fayyaa Israa'el haleellaa rookeetii kanaa namni waggaa 29 miidhamuu ibse.

    Rookeetii magaalaa Hayifaatti mana namaa rukuteen nama biraarra miidhaa salphaan ga'uus ibseera.

    Hezboollaan ammoo rookeetii gurguddaa fi akkaan ammayyaawaa ta'e kan ''large salvo'' jedhaniin baayyinaan gara Israa'el dhukaasuu ibse.

    Xiyyeeffannaansaas buufata waraanaa Israa'el ta'uu ibse.

14. 19 Onkololeessa 2024Waraanni Israa'el Kibba Libaanositti ajajaa itti aanaa waraanaa Hezboollaa ajjeesuu hime

    Humni waraanaa Israa'el akka jedhutti haleellaa humni qilleensaa isaa kibba Libaanos naannawa Bint Jbeil jedhamutti raawwateen ajajaa itti aanaan humna waraanaa Hezboollaa ajjeefameera.

    Naasir Abe al-Aziiz Rashiid ''lammiilee Israa'el shororkeessaa ture'' jechuun himata Humni waraanaa Israa'el.

    Hezboollaan dhimma kanarratti amma yoonaatti yaada hin kennine.

15. 19 Onkololeessa 2024Dirooniin gare mana Ministira Mummee Israa'eliitti dhukaafame-dubbii himaa

    Guyyaa Samabta har'aa dirooniin gara mana Minisira Mummee Israa’el Beeniyaamin Netaaniyaahuu kan kaaba Israa’el magaalaa Qeesariyaa keessatti argamutti dhukafamuu dubbi himaan isaanii himan.

    Netaaniyaahuun gamoo sana keessa kan hin turre yoo ta'u, namni haleellaa kanaan lubbuun darbes akka hin jirre dubbi himaan kun dabalataan himan.

    Waraanni Israa’el jalqaba Sambata ganama dirooniin sadii gara magaalaa qarqara galaanaatti dhukaafamuu ibsee ture. Isaan keessaayis tokko gamoo kan rukute yoo ta'u, lamaan hafan ammoo akka rukutamuun fasheeleeffaman dabalee ibsee ture.

16. 19 Onkololeessa 2024Waraanni Israa'el halkan darbe Libaanos irraa misaa'eloonni 20 itti dhukaafamu hime

    Raayyaan Ittisa Israa’el (IDF) Jimaata halkan Libaanos irraa gara Israa’elitti misaa’eloonni 20 qaxxaamuruusaanii ibse.

    Gariin isaanii kan rukutamuun kuffiifaman yoo ta'u, kaan immoo bakka banaa ta'etti kufaniiru jedhe IDF dabalata.

    Odeeffannoo gara biraatiin ammoo, IDFn naannawa lixaa fi Galiilaa Olaa keessattis ''xiyyaarri diinaa'' mul'ateera jedhe. Gadi fageenyis amma xinxalamaa jiras jedha.

    Akkasumas sa’aatii darbe keessatti waraanni Israa’el diroonii lama kanneen Libaanos irraa gara israa'elitti qaxxaamuraa turan kuffiisuuufi diroonii inni sadaffaan ammoo caasaa Qeesariyaa keessa jiru rukutee akka ture dubbata. Kanaanis namni miidhaan irra qaqabe omtu hin jiru jedhe.

    Gama biraatiin ammoo Hezboollaan barreeffama toora Telegram irratti baaseen, Saafed, Maalkiyaa fi Aviiviim dabalatee,halakan darbe kaassaa kaaba Israa’el bakka hedduurratti rookkeettii dhukaasera jedha.

17. 19 Onkololeessa 2024Hoogganaa olaanaan Iraan ''Hamaas yoomuu ni jiraata'' jedhan

    Dhimma ajjeechaa hoogganaa Hamaas Yaaihyaa Sinwaar irratti yaada kan kennan Hoogganaa Olaanaan Iraan Ayaatullaa Alii Kameenii, inni ajjeefamus jiraachuun Hamaas ittuma fufa jedhan.

    Haleellaa Onkoloolessa 7, 2023 kibba Israa'elitti raawwate qindeessuu fi hoogganuun maqaansaa kan ka'u Yaahyaa Sinwaar kibba Gaazaa magaalaa Raafaa keessatti gamoo tokko keessatti loltoota Israa'eliin ajjeefame.

    ''Isa dhabuun sochii diddaa irratti dhiibbaa guddaa qaba, kun shakkii hin qabu. Haata'u malee addi waraanaa isaa sababa inni du'eef falmachuurraa duubatti hin jenne. Qabsaa'onni falmachuu itti fufaniiru,'' jedhan Kaameeniin ibsa kennaniin.

    Gareen Israa'eliin falman kanneen deeggarsa Iraaniin socho'an- Axis of Resistance maqaa jedhuun qabsaa'u.

    Gareen kun Hamaas, Hezboollaa Libaanos keessa maandheffate, akkasumas gareewwan hidhatanii Baha Giddugaleessa keessa socho'anii fi Israa'eliin lolan of keessatti hammata.

    ''Inni [Sinwar] mallattoo diddaa ture. Fuulduratti ba'ee lolaa ture. Diina cunqursaa fi humnaan deemu dura dhaabbachuun beekama,'' jechuun waa'ee Sinwaar dubbatan Kaameeniin.

18. 19 Onkololeessa 2024Haroo Caamootti bidiruu dhidhimuun namoonni 13 dhabaman- Poolisii

    Naannoo Kibba Itoophiyaa keesatti kan argamu Haroo Caamoo irratti bidiruun dhidhimuun hanga ammaa namoonni 13 achi buuteensaanii akka hin baramne poolisiin ibse.

    Kamisa darbe ALI gaafa guyyaa Onkololeessa 7, 2017 waaree booda sa'aatii 10 irratti bidiruun kun muuzii fi namoota 16 feetee osoo haroo kanarra yabaltuu garagalte.

    Qajeelcha Poolisii Godina Gaamoo Gofaatti hoogganaan quunnamtii hawaa Komaandar Rattaa Takluu ammallee namoonni 13 hin argamne jedhan.

    Bidiruun meeshaalee fi namoota feete kun gama Godina Kooreetiin bakka Arafaacoo jedhamurraa ka'uun gara magaalaa Arbaa Minc imalaa turte jedhan qondaalli poolisii kun.

    Bidiruu sanarraa kaapteenii dabalatee namoonni 16 akkasumas muuziinis fe'amee akka ture kan ibsan Komaandar Rattaa Takluu, wayita balaan kun mudatutti namoonni lama jaarkaanii qabatanii turan fayyadamuun bishaanirra bololi'uun daakanii lubbuusaanii baafachuu danda'aniiru jedhan.

    Namni tokko ammoo haroo sana daakuudhaan gara qarqaraatti ba'uun yeroo hojiin barbaachaa raawwatamutti lubbuunsaa baraarameera jedhan.

    Bidiruun kun kan garagalte Kamisa ta'us eeruun kan poolisii ga'e garuu Jimaata ta'uu ibsan Komaandar Rattaa Takluu.

    Sababi balaa kanaa bidiruttiirratti humnaa ol fe'uu akka ta'ee fi namoonni bidiruu kanarra turan hojjettoota humnaa guyyaadhaan galii argataniin jiraatan ta'uu ibsan.

    Balaa mudate hordofee hojiin lubbuu baraaruu itti fufus garuu ammallee namoonni 13 dhabaman du'uu fi jiraachuunsaanii hin baramne.

    Poolisiin uummata waliin ta'uun barbaacha namoota 13 itti fufee akka jiru ibsan Komaandar Rattaan.

19. 19 Onkololeessa 2024Israa'el haleellaa haaraa Gaazaatti raawwatteen yoo xinnaate namoota 33 ajjeefte- aanga'oota Hamaas

    Israa'el haleellaa qilleensaa kaampii baqattoota kaaba Gaazaa irratti raawwatteen dubartoota 22 dabalatee namoota 33 ajjeessuu aanga'oonni Hamaas himan.

    Gabaasa haleellaa Jaabaaliyaa kanarratti Israa'el, kan humnoonni ishee torban hedduudhaaf kaampii ummanni hedduun keessa jiraatu kana goolaa turan, kanarratti ammatti yaada omaatu hin kenniine.

    Ajjeechaan hogganaa Hamaas Yaahiyaa Sinwaar torban kana keessa raawwatame waraanni kun akka xumuramu qaamoolee muraasa biratti abdii kan uume ta’us, ittaanaan hogganaa garee kanaa garuu Hamaas ammalleen cimee itti fufa jedhan.

    Pirezidaantiin Yunaayitid Isteetis Joo Baayiden Libaanos bakka Israa’el hidhattoota Hezbollaatiin itti lolaa jirtutti “dhukaasa dhaabuuf hojjechuuf” carraan akka jiru himanii, garuu “Gaazaatti caalaatti cimaa ta’a” jedhan.

    Baayiidan dubbii kana kan dubbatan magaalaa guddoo Jarmanii Barliin, bakka hoggantoota Jarmanii, Faransaayii fi Ingiliziitiin itti wal arganitti ture.

    Akka ibsi waajjira miidiyaa mootummaa Gaazaa kan Hamaasiin geggeeffamu irraa baheetti, haleellaan qilleensaa Jimaata kaleessaa raawwatameen, manneen maatii sadii kaampii keessa jiran rukutamuun namoota 85 ol kan madaa’e yoo ta’u, kaan ammoo baayyee miidhamaniiru.

    Itti dabaluudhaanis namoonni ammalleen jijjigaa gamoo jalatti awwaalaman waan ta'uuf lakkoofsi namoota du'anii 50 gahuu akka danda'u ibse.

    Gabaasni kunis addatti mada walabaa irraa hin mirkanoofne. Maddeen naannichaa akka ibsaniitti, kibbi Gaazaa adda foo'ameera, tajaajilli bilbilaafi intarneetti naannicha keessatti addaan citeera.

20. 19 Onkololeessa 2024Taateewwan ijoo shan erga hoogganaan Hamaas ajjeeffamun dhagahameen booda

    • Ministira Dhimma Alaa Ameerikaa Antoonii Bilinkanii fi gitasaanii Jarma, Anaalenaa Baa'erkook ibsa waloo baasaniin, Yaahiyaa Sinwaar, nama haleellaa Onkoloolessa 7 Israa’el irratti raawwatame qindeessee, kan Gaazaatti dhukaasa dhaabuu galmaan ga’uuf gufuu ijoo turee ibseera.
    • Mimistirri Mummee Biriteen Kiir Istaarmar jecha Pirezidaantii Ameerikaa Joo Baayiden deebisaanii kaauudhaan, gamni hundinuu yeroo kana akka gaariitti fayyadamuu qabu jedhan.
    • akkasumas Hamaas mataansaa, hanga loltoonni Israa’el Gaazaa keessa jiranitti lola itti fufuuf kutannoo qabaachuu ibse.
    • Namoonni siyaasaa Israa’el Beeniyaamin Netaaniyaahuu irraa kaasee hanga gadiitti, kaayyoonsaanii ganaa akka galma hin geenye akka amanan ifatti ibsan.
    • Gaazaa keessatti mataasaa, miidhaan lammiilee Filisxeem irratti gahu akkuma itti fufeetti jira. Waraanni Israa’el haleellaa isaa kaabaa Gaazaa keessaa cimsuudhaaf kutaa waraana biraa gara nanatti erguumirkaneessee ture.