Doonii waraanaa Raashiyaa bishaan jala deemu rukuteen dhidhimse jette Yukireen

Haguuggii Tamsaasa Kallattii

1. 1 Hagayya 2024Sirni gaggeessaa reeffa Ismaa'il Haaniyaa Iraanitti gaggeeffamaa jira

   

   Madda suuraa, EPA

   Iraan, magaalaa Teeraanitti sirni gaggeessaa reeffa Ismaa'il Haaniyaa gaggeeffamaa jira.

   Lammiileen biyyattii kumaatamaan bahuun sirna kana irratti argamaniiru.

   Ismaa'il Haaniyaa haleellaa qilleensarraan roobii kaleessaa ajjeefame.

   Hogganaa olaanaan Iraan, Ayaatolaa Alii Kaameenii, sirna kadhannaa dursaa jiru. Reeffi Ismaa'il Haaniyaa gara Kaataaritti geeffamuun kan awwalamu taha.

   Miiidyaaleen US qondaalota Iraan wabeeffachuun akka gabaasanitti, Ayatolaa Alii Kameenii Israa'el irratti haleellaan kallattii akka gaggeeffamu ajajaniiru.

   Israa'el ajjeechaa kana ilaalchistee kallattiin yaada hin kennine.

2. 1 Hagayya 2024Ashamaa! Tamsaasa kallattiitti deebineerra

   Odeeffannoo gurguddaa biyya keessaa fi alaa tamsaasa kallattii kana irraan isiniif dhiyeessina.

   Nu hordofaa.

   Oolmaa gaarii!

   

   Madda suuraa, Getty Images

3. 31 Adooleessa 2024Tamsaasni kallattii xumurame!

   Tamsaasni kallattii BBC Afaan Oromoo Roobii galgalaa xumurame.

   Kamisa ganama walitti deebina.

   Nagaan bulaa!

4. 31 Adooleessa 2024'Weerara karaa kamiinu nurratti raawwatuuf gatii jabaan deebii kennina'

   

   Madda suuraa, EPA

   Ministirri Muummee Israa’el Benjaamin Netaaniyaahu Tel Aviiv keessatti rippoortarootatti yeroo dubbatan Israa’el ‘’waan hundaafuu qophaa’uu’’ himan.

   Haa ta’u malee, waa’ee ajjeechaa hogganaa siyaasaa Hamaas hin dubbanne.

   Ibsa televijiniin darbaa ture kanarratti lammiilee isaaniif ergaa dhaaman.

   ‘’Lammiilee Israa’el, guyyootni rakkisoo ta’an fuuldura jiru. Erga haleellaa Beerutitti raawwatamee dhaadannoon kallattii hundaa’an dhagahamaa jira.

   ‘’Haala hundaafuu qophoofneerra. Dhaadannoo kamuu waliin dura dhaabbanna. Weerara karaa kamiinuu nurratti raawwatu Israa’el gatii guddaan [deebii kenniti],’’ jedhan.

   Guyyoota muraasa darban Israa’el michuuwwan Iraan kan ta’an Hamaasiifi Hezbollaarratti tarkaanfii fudhachuu himaniiru.

   Ta’us, ajjeechaa hogganaa siyaasaa Hamaas kan ta’an Ismaa’il Haaniyaarratti homaa hin dubbanne.

   Ajjeechaa qondaala olaanaa Hamaas booda Iraan dhaadachuun ishee ni yaadatama.

5. 31 Adooleessa 2024Siitiin baroota lama keessa yeroo 22 yeroo qisaasuun Paawundii miiliyoona lamaa ol adabame

   

   Madda suuraa, Getty Images

   Maanchister Siitiin baroota dorgommii lamaan darban ta'e jedhee taphni dafee akka hin eegalle ykn akka harkifatu gochuun paawundii miiliyoona lamaa ol adabame.

   Siitiin baroota lamaan kana yeroo 22 taphni akka barfatee eegalu gochuun maallaqaan adabameera.

   Kilabichi himannaawwan irratti ka'an kanaaf sababa gahaa osoo hin dhiyeessiin balleessaasaa amaneera.

   Siitiin bara 2022/23 tapha deebisee eegaluun yeroo irra jirurraa yeroo saddeet barfachuun £390,000 adabameera.

   Bara 2024 keessa ammoo badiiwwan yeroo qisaasuu 14 raawwachuun adabbiin maallaqaa hanga £1.7m ta'uu irratti murameera.

   Adabbiin yeroo qisaasuuf kaahame inni guddaan £200,000.

   Siitiin walitti aansee yeroo arfaffaaf shaampiyoonaa ta'uu tapha mirkaneeffate irratti Weest Haamiin 3-1n osoo dursuu tapha deebisee eegaluuf daqiiqaa lamaafi sekoondii 46 barfate. Kuni qisaasa yeroo isa guddaadha.

   Piriimiyeer Liigiin Ingilizii gara dhumaa bara kanaatti seera faayinaansii cabsuun himannaawwan 135 Siitirratti ka'an ni ilaala.

6. 31 Adooleessa 2024Amma nu gahe, Hezbollaan ajajaa isaa keessaa tokko Israa'eliin ajjeefamu ifatti mirkaneesse

   Hezbollaan reefu ibsa baasen ajajoota waraanaa gameeyyii garichaa keessaa tokko kan ta’an Fu'aad Shuukri haleellaa Israa’el guyyaa kaleessaa Beerut keessatti raawwatteen ajjeefamu mirkanesseera.

   Israa’el erga haleellaa raawwatte booda akka ajjeefte ibsitee turte. Haa ta’u malee, reeffi isaa hin argamne ture.

   Duratti gaazexeessituun BBC Libaanos magaalaa Beerut keessa argamtu maatii Fu’aadif gadda taa’aa jedhamee himamuu gabaaftee turte.

7. 31 Adooleessa 2024Gaazexeessitoonni Al Jaziiraa lama mana jireenyaa ajajaa Hamaas ajjeefame biratti ajjeefaman

   

   Madda suuraa, Reuters

   Dhaabbanni neetwoorkii Teleevizhinii Al Jaziiraa gaazexeessitoonnisaa lama dhiyeenya mana jireenyaa ajajaa Hamaas Iraanitti ajjeefamee kan Gaazaatti argamutti haleellaa Israa'eliin ajjeefamuu gabaase.

   Gaazexeessitootni lameen mana jireenyaa Ismaa'el Haaniyaa kan Lixa Gaazaa naannoo Kaampii baqattootaa Shaati jedhamutti argamanii osoo viidiyoo waraabanii ajjeefaman.

   Hamaas ibsa baaseen haleellaa gaazexeessitootaa kanarratti raawwate ''yakka gara-jabinaa'' jechuun balaaleffate.

   ''Ji'oota sagaliif duguuggaa sanyii ummata keenya Gaazaa jiraaturatti gaggeeffamaa jiru gaazexessitoonni Filisxeem akka hin gabaasne shororkeessuufi callisiisuufi'' jedha ibsichi.

   Israa'el waa'ee ajjeechaa gaazexessitoota kanaa homaa hin dubbanne.

   Akka Rooyitarsi gabaasetti gaazexeessitoonni kun konkolaataa keessa osoo jiranii haleellaa qilleensaan ajjeefaman.

   Dhaabbatni mirga gaazexeessitootaaf falmu 'Committee to Protect Journalists' akka jedhetti, erga waraanni Gaazaa eegalee gaazexeessitoonniifi ogeeyyiin miidiyaatti hidhata qaban 111 magaalaa Gaazaa keessatti ajjeefamaniiru.

8. 31 Adooleessa 2024Ajjeechaan Haaniyaa waa'ee nageenya Iraan maal nutti hima?, Kasraa Hajii, BBC Afaan Pershiyaa

   Iraan akka himtetti, hogganaan siyaasaa Hamaasiifi eegduun isaanii kaaba Teehiraan mana keessummaan keessa boqotutti ajjeefaman.

   Ajjeechaan kuni misaa’ela daangaa Iraaniin ala dhuka’e jedhameen guyyaa Roobii barii keessa sa’aatii saddeetitti raawwatame.

   Haleellaan kuni dhaabbilee nageenyaa Iraan gaaffii keessa galcheera.

   Waggoota darban Israa’el saayintistoota niwkilarii Iraan, Iraan keessatti ajjeesteetti. Ammoo namoota siyaasaa Iraan ajjeestee hin beektu.

   Waggoota sadan dura garuu hogganaan duraanii tika Iraan, Alii Yuneesi, Israa’el daangaa cabsitee haleellaa raawwattun aangawoonni hunduu lubbuu isaaniif yaadda’uu qabu jedhanii turan.

9. 31 Adooleessa 2024Kataariifi US waa'ee Gaazaatti dhukaasa dhaabuu mari'achuu itti fufna jedhan

   

   Madda suuraa, Reuters

   Ministirri Dhimma Alaa US fi Ministirri Muummee Kataar Sheek Mohaammad bin Anduliraahimaan Al Taani waa’ee Gaazaatti dhukaasa dhaabuurratti mari’achuu akka itti fufan dubbataniiru.

   Hogganaan siyaasaa Hamaas ajjeefaman, Ismaa’il Haaniyaa, marii kanarra qooda fudhataa turan.

   Qondaalli kunis du’ani ‘’faayidaa namoota hundaaf jecha’’ mariin akka itti fufu dippilomatiin US ibsaniiru.

   Hamaas fi Israa’el gidduu jaarsummaan qooda kan fudhataa turte Kataar immoo ajjeechaan Ismaa’il Haaniyaa mariirratti danqaa uumuu mala jetteetti.

   ‘‘Osoo qaami marii keessa qooda fudhatu tokko isa kaaniin ajjeesuu akkamiin mariin milkaa’a?’’ jechuun Ministirri Muummee Kataar barreeffama X gubbaa ka’aniin gaafataniiru.

   Faallaan immoo dubbii himaan mootummaa Israa’el marii dhukaasa dhaabuu keessa akka hirmaatan beeksisani.

10. 31 Adooleessa 2024Ajajaan waraanaa Hezboollaa gameessi ajjeefameera - Maddeen, Naafiseh Konaavaard, Beerutirraa

    

    Madda suuraa, Mootummaa US

    Ajajoota gameeyyii Hezboollaa keessaa tokko kan ta’e Fuwaad Shuukri akka ajjeefame maatiitti himamuu maddeen itti himuu gaazexeessituun BBC odeeffatte.

    Akka gaazexeessituun BBC jettetti, Hezbollaah waa’ee ajjeechaa qondaala kanaa ibsa baasuuf jedha.

    Qondaalli kuni kaleessa galgala Israa’eliin Libaanos magaalaa Beerutitti haleellaan irratti raawwatame.

    Haa ta’u malee, lubbuun jiraachuufi dhabuun isaa hin baramne ture.

    Hezbollaanis reeffa qondaala isaatii argachuu hin dandeenye ture.

    Amma waan argatan fakkaata. Israa’el guyyaa kaleessaa Shukrii ajjeefamuu beeksistee turte.

11. 31 Adooleessa 2024Dii Mariyaan kalaba ijoollummaasaatti deebi'u fedhus doorsifamuu hime

    

    Madda suuraa, Getty Images

    Taphataan intarnaashinaalaa lammii Arjentiinaa Aniheel Dii Mariyaa kubbaa miilaa idil-addunyaa dhaabuu erga beeksisee booda kilaba ijoollummaasaatti deebi'ee soorama bahuu yaadus, doorsifni ajjeechaa isaaf maatiisaarra gahuun yaada akka jijjiiru isa dirqisiisuu hime.

    De Mariyaan Riyaal Maadriid, Beenfikaa, PSG, Maanchistar Yunaayitidiifi Yuuveentusiif taphateera.

    Milkaahinni isaa kubbaa miilaa kan eegalu garuu kilaba ijoollummaasaa Arjentiinaa keessatti argamu Rozaariyoo Senteraal jedhamuudha.

    Arjentiinaa waliin Kooppaa Ameerikaa erga injifatee booda tapha internaashinaalaa akka dhaabu beeksiseera.

    Dhaadannoo irra gahaa jiru kana gabaasuuf sodaatee dhoksaa akka ture hime.

    ''Daldala obboleettiikoorratti dhaadatan, saanduqa keessa mataa booyyee rasaasni keessa bahe kaahanii ergan, barreeffamni keessa jiru yoon achi deebi'e (Rozaariyoo), kan itti aanu mataa mucaakee dubaraa Piyaa ta'a jedha'' jechuun Dimaariyaan Dhaabbata Televizhinii Rozaariyoo keessa jiru tokkotti dubbateera.

    Dii Mariyaan ji'ootni qe'ee ijoollummaasaatti dabarse sodaan kan guutan ture jedhe.

    Hawwiin kilaba ijoollummaasaatti deebi'uuf qabate milkaahuu dhabuutti gaddaa akka turanis dubbate.

    Sababni dhaadannoon irra gahuufi akka deebi'u hin barbaadamneef garuu hin ibsamne.

12. 31 Adooleessa 2024Hamaas sirna awwaalchaa Haaniyaa ifoomse

    Sirni awwaalchaa qondaala Hamaas Iraanitti ajjeefamee bor magaalaa Iraan Tehraan keessatti gaggeeffama.

    Sirni awwaalchaa Ismaa'il Haaniyaaa ''idilee fi Ifa tahe'' bor Tehraanitti gaggeeffama jedhe.

    Sana booda reeffi isaa bakka duraan jiraachaa ture Kaataar magaalaa Dohaatti geeffama.

    Sirni awwaalcha isaa xumuraa ammoo Hagayya 2 bakka awwaalchaa Luusaayilitti gaggeeffama.

13. 31 Adooleessa 2024Ismaa'il Haaniyaa eenyu bakka bu'uu danda'a?

    

    Madda suuraa, Reuters

    Qondaala olaanaa Hamaas Ismaa'il Haaniyaa eenyu bakka bu'a kan jedhu dubbii wal xaxaa fi waan salphaatti murtaa'u miti.

    Kun mankaraareessitoonni Iraaniin akka malee deeggaran hogganaa Hamaas akka tahaniif karaa saaqaaf.

    Isaan keessaa tokko Hogganaa garee kanaa Gaazaa keessa jiruu Yaayyaa Sinwaaridha.

    Yaayyaa Sinwaar qondaala olaanaa Hamaas haleellaa Israa'el irratti Onkoloolessa 7 bara 2023 raawwate qindeessedha jedhama.

    Akkasumas qondaalonni biroo lama tahan Ismaa'il Haaniyaa bakka bu'uu danda'an jiru.

    Hagas mara mankaraaressummaan kan hin beekamne Kaalid Meshaal namoota hoggansa kanaaf kaadhimamuu malan keessaati.

    Kana dura Haaniyee dura Hamaasiin gaggeessaa ture. Garuu Iraan waliin hagas mara hariiroo gaarii hin qabu.

    Kaadhimamaa biraa tahuu kan malu ammoo Zaaher Jabareen yoo tahu, lammiilee Filisxeem Israa'el keessatti hidhamanii jiran hordofuu irratti hojjechaa ture.

    Marii dhukaasa dhaabuu ammaa keessatti hidhamtoota wal jijjiiruu irra gahuuf shoora olaanaa bahata jedhamee abdatama.

    Kan hafan sadan ammoo itti aantota Haaniyaa tahuun warra hojjechaa turanidha.

14. 31 Adooleessa 2024Haleellaa qilleensaa Israa'el Beerut keessatti raawwatteen balaa qaqqabe

    Israa'el magaalaa guddoo Libaanos Beerut keessatti haleellaa qilleensaa raawwatteen ajajoota waraanaa Hezbollaa olaanoo keessaa tokko ajjeefamuun gabaafameera.

    Haleellaa Komaader Fu'aad Shuukir ittiin ajjeefame kana booda bakka ajjeechaan kun itti raawwaterraa viidiyoon gaazexeessaa BBCn waraabame akka agarsiisutti gamoon mana jireenyaa tokko barbadaa'eera.

    Aarri jijjigaa gamoo kanaa keessaa bahus ni mul'ata.

    Qaamoleen tajaajila yeroo balaa bakka balaan qaqqabetti dhaqqabuun namni hedduunis baraarameera.

    Ministirri Muummee Libaanos Najiib Mikaatii ''weerara Israa'el'' balaaleffataniiru. Israa'el ajajaa waraanaa kanarratti xiyyeeffachuu ibsite.

15. 31 Adooleessa 2024Ameerikaan waayee ajjeechaa hogganaa Hamaas 'quba hin qabu' jette

    

    Madda suuraa, Getty Images

    Ministirri Haajaa Alaa US Antonii Biliinken ajjeechaa hogganaa siyaasaa Hamaas Ismaa'el Haniyee quba akka hin qabne ibsan.

    ''Wanti kun waan irraa quba qabnu, keessaas qooda qabnu miti'' jedhan.

    Biliinken ta'iin har'aa kun maal fidee akka dhufu tilmaamuu akka hin feene dubbatan. Ammoo barbaachisummaa dhukaasa dhaabuun akka milkaahu qabu cimsanii dubbatan.

    Daawwannaaf Singapoor kan jiran Biliinken, wanti kamuu barbaachisummaa waliigaltee dhukaasa dhaabuu kan dursu akka hin jirre himan.

    Waliigalteen dhukaasa dhaabuu ammoo lammiileen Hamaasin butamanii turan akka gadhiifaman gargaara jedhan.

    Dabaluunis Filisxeemonni, daa'imman, dubartoonnii fi dhiironni Gaazaa keessatti dhukaasa Hamaas raawwatu gidduutti guyyaa guyyaan dararaa argaa jiru'' jedhan.

16. 31 Adooleessa 2024'Nama jaarsummaa taa'u ajjeesaa, akkamiin waliigaltee dhukaasa dhaabuu milkaa'a?' Kaataar

    

    Madda suuraa, Reuters

    'Kaataar waraanni Israa'elii fi Gaazaa gidduu akka dhaabbatuuf jaarsummaa taa'aa turte.

    Qondaalli Israa'el ajjeeste Ismaa'il Haaniyaa kana dura Tarkii fi Kaataar jiraachaa turaniiru.

    Biyyoonni lameenuu warreen akkka waliigaltee dhukaasa dhaabuurra gahamuuf dhiibbaa gochaa turanidha.

    Ajjeechaa Israa'el raawwatte kana ammoo cimsanii balaaleffataniiru. Gama Hamaasiin ammoo waliigaltee dhukaasa dhaabuurra akka gahamuuf shoora olaanaa taphataa kan ture Ismaa'il Haaniyaati.

    Kaataar Haaniyaan ajjeefamuun marii dhukaasa dhaabuu jalqabe gufachiisa, isatu shoora olaanaa bahataa ture jette.

    "Ajjeechaa siyaasaa gaggeesuu ittifufuu fi lammilee nagaa Gaazaa keessaa haleeluun dhaabbachuu dhabuun gaaffii akka kaasnu nu taasiseera. Yeroo qaamni tokko isa qaama biraa irraa jaarsummaaf taa'u ajjeesuu akkamiin mariin nagaa milkaa'uu danda'a?'' jette Kaataar.

    Israa'el ammayyuu haleellicha gaggeessuu ishee ifatti hin ibsine.

17. 31 Adooleessa 2024Viidiyoo Haaniyaan ajjeefamuu isaa sa'aatii muraasa dura agarsiisu

    Hoggaanaan Hamaas Ismaa'el Haaniyaa Iraanitti ajjeefame.

    Ajjeechaan qondaala olaanaa Hamaas kun Baha Giddugaleessaatti waraanaa hammeessa jedhamee sodaatamaa jira.

    Viidiyoon kun Ismaa'el Haaniyaa ajjeeffamuu sa'aatii muraasa dura kan agarsiisudha.

    Daawwadhaa!

18. 31 Adooleessa 2024Ismaa’el Haaniyaarratti amma maaf qiyyaafatame?

    

    Madda suuraa, EPA

    Haleellaa Hamaas Onkoloolessa 7, 2023 Israa’elitti raawwate hordofee maatiin Haaniyaarratti Israa’el qiyyaafattetti.

    Ilmaan dhiiraa Haaniyaa fi ijoolleen-ijoolleesaatii haleellaa Israa’eliin ajjeefaman.

    Haaniyaan akka qondaaloota Hamaas biroo dhokatee jiraataa hin turre.

    Israa’elitu ajjeese jedhamee yaadama, garuu Israa’el Haaniyaa Kataaritti ajjeesuun gamaa siyaasaatiin hin danda’amneef.

    Israa’el biyya Iraan keessatti ajjeesuun garuu Israa’el iddoon hin geenye akka hin jirre, eenyuyyuu haleellamurraa bilisa akka hin taane dhaamsa akeeku qaba.

    Haaniyaan marii dhukaasa dhaabuu fi namoota butaman gadhiisisuurratti hirmaataa ture.

19. 31 Adooleessa 2024Qondaalli olaanaa Hamaas Israa'el Iraan keessatti ajjeeste Ismaa'il Haaniyaa eenyu?

    

    Madda suuraa, Reuters

    Ismaa'el maqaa masoo Abu al-Abiid jedhamuun beekama. Innis gaggeessaa siyaasaa olaanaa Hamaas keessaa tokkodha.

    Mana hidhaa Israa'el daangaa Israa'elii fi Libaanositti argamu bakka namni hin jiraanne keessatti haala rakkisaa keessatti dabarseera.

    Erga mana hidhaatii bahee Gaazaatti deebi'uun biiroo gaggeessaa amantaa Hamaas kan ta'e Sheek Ahimad Yaasinitti gaggeessaa ta'ee muudame.

    Gaggeessummaafi dandeettinsaa cimaa deemnan Ministeera Muummee ta'ee filatamuurra gahe.

    Walitti bu'iinsa torbee tokkoof Hamaasiif Faataa gidduutti gaggeeffameen al-Qasiim Birgeedirraa namoonni heddu du'anii booda bakka bu'oota paartii Pirezedant Mohaammad Abbaas- paartii Faataa- Gaazadhaa waan ari'eef, Mohaammad Abbaas ammoo aangoo Ministeerra Muummerraa Ismaa'el Haaniyaa hari'an.

    Yeroo ariyatamu sana reefu waggaa tokkoof Ministeera Muummee ta'ee tajaajila ture. Boodarra ammoo Faataa wajjin araara buusuf yaalii garaa garaa gochaa ture.

    Bara 2017'tti gaggeessaa biiroo siyaasaa Hamaas ta'ee kan muudame yoo ta'u, waggaa itti aanu ammoo Ameerikaan shororkeessaa addunyaa jechuun galmeessite.

20. 31 Adooleessa 2024Ismaa'il Haniyaa marii dhukaasa dhaabuuf taasifamu keessatti nama murteessaa ture- amma maaltu ta'a?

    Waa'een haleellaa lubbuu Ismaa'il Haniyaa galfaatee akkuma bal'innisaa ibsamaa deemuun miidhaan siyaasaa inni qabus xiyyeeffannaa argateera.

    Marii dhukaasa dhaabuu, takka bu'aa takka ka'u, kan hawaasa idiladdunyaa hedduun arguu fedhanirratti miidhaa guddaa akka qabu beekamaadha.

    Ismaa'il Haniyaa waan guyyuu Gaazaa keessatti ta'aa jiru hin hoogganu, kun ga'ee ajajaa waraanaa Hamaas- Yahyaa Sinwaar.

    Garuu akka qondaala Hamaas biyya alaa keessa jiraatuutti marii dhukaasa dhaabuu jaarsummaa Qataar, US fi Masriin gaggeeffamaa turerratti nama maqaansaa jalqabarratti eeramuudha.

    Dhiheenya kana qondaaltonni Ameerikaa mariin dhukaasa dhaabuu yeroo dhihootti ni milkaa'a yaada jedhu kennanii turan.

    Garuu mariin dhuma torbee darbee Roomitti gaggeeffame bu'aa tokkollee hin buusne.

    Amma ammoo wayita qondaalli Hamaas marii kanaaf murteessaa ta'e ajjeefamuun dhagahamu waa'een Gaazaa keessatti dhukaasi dhaabbachuu abdii nama kutachiisa.

    Kun yoo oppireeshinii Israa'el ta'e maaliif akkas gochuun barbaachise? gaaffii jedhu kaasisa.

    Israa'el nama Hamaas waliin hidhata qabu hunda ajjeestee maal buufachuuf deemti?

    Pirezidantiin Tarkii yaada kana qooddatu. Beenjaamin Neetaniyaahuu ''nageenya buusuuf fedha akka hin qabne,'' agarsiisa jechuun himatan.