Kan argaa jirtan oduu barreeffamaan qofa marsaritii keenya daataa xiqqaan hojjetudha. Fuula isa guutuu suuraaleefi viidiyoowwan qabate banadhaa.
Gara fuula marsariitii guutuutti na geessi
Filannoo daataa qusatu fayyadamu kanarratti hubannoo dabalataaf
Israa'el halkan darbe Beeruti keessatti bakka Hezboollaan irra rookkeettii dhukaasu haleeluu yoo himu, gareen milishootaa misaa'eloota 150 daangaa Israa'el keessatti dhukaase.
Ashamaa hordoftoonni BBC Afaan Oromoo bakka jiran maratti.
Tamsaasa kallattii kan ittiin odeessaalee ijoo addunyaa isin biraa keenya kan Jimaata har'aa kunoo amma eegalleerra.
Yoo nu hordoftan odeessaalee haaraa argattu.
Olmaa gaarii qabaadhaa.
Yeroo ammaa wayita dursaan garee hidhattoota Hezboollaa, Haasaan Nasraallaah haasaa taasisaa jiranii Humni Waraana Israa'el bakkeewwan garichaa Libaanos irratti haleellaa qilleensaa haaraa raawwachuun dhagahame.
Akkasumas, kaaba Israa'el irraa sagaleen akeekkachiiftuu haleellaa qilleensaa dhagahameera.
Waraanni Israa'el, ''lammiileen gara qe'eesaaniitti deebi'uu akka danda'aniif kaaba Israa'elitti nagaan deebiisaa'' jedhee ture.
Odeessaa kanarratti waan haaraa jala buunee isin biraan geenyaa nu hordofaa.
Dhohinsa meeshaalee quunnamtii Libaanos keessatti mudateen warra miidhaan irra gahe keessaa 90 gara Iraaniitti ergamuu Tehraan ibsiteetti.
Namoonni 90 ol dhohinsa meeshaalee qummantii paageer fi walkie-talkie jedhamuun miidhaman amma Iraan keessatti yaala dabalataa argachaa akka jiran imbaasiin Tehraan Libaanos keessatti argamu ibseera.
Namoota miidhaan kun irra gahe keessaas ambaasaaddarri Iraan, Mojtabaa Amanii kan argaman yoo ta'u, haalli fayyaasaanii ''baayyee gaariidha'' jechuun ibseera Imbaasichi.
Qondaaltonni haalli namoota miidhaan irra gahuudhaan gara sanatti dabarfaman amatti hangam akka hamaa ta'e ilaalchisuun bal'inaan hin ibsine.
Ministirri Mummee Libaanos Dhaabbanni Biyyoota Gamtomanii (UN) 'dubbii barbaacha Israa'el' akka to'atu gaafatan.
Ministirri Mummee Libaanos, erga gabaasaaleen hedduun dhohinsa meeshaalee lubbuu namaa galaafatan torban kana duuba dhaabbanni basaasaa Israa'el - Moosaad, akka jiru dhaga'ameen bood, Dhaabbanni Biyyoota Gamtoomanii Israa’el irratti ''ejjennoo cimaa akka fudhatu'' gaafatan.
Najib Mikatii ibsa kenneen, dubbii barbaacha Israa'el dhaabuun Libaanos qofaa gaarii osoo hin taane ''waliigala namoomaatiif'' akka ta'e dubbatan.
Israa'el ''waraana teeknooloojii'' geggeessaa jirti jechuun himatan.
Dubbiin aanga'aa kanaa kunis walgahii Mana-maree Nageenyaa Dhaabbata Biyyoota Gamtoomanii Jimaata har'aa Libaanos haleellaa meeshaalee dhoo’an kana furuudhaaf gaafattee turte dura kan dubbatan.
Haleellaa raadiyoo qunnamtiifi meeshaalee dhohan kanneen irratti hanga ammaatti kallattiin yaada hin kennine.
Hogganaan olaanaan imaammata alaa Gamtaa Awurooppaa (EU) dhohinsi Libaanos keessatti mudate ''baay'ee yaaddessaa'' ta'uu fi naannicha gara muddama hammaataa ta'etti galchuu danda'a jedhan.
Joseef Boreel ibsa baasaniin, dhohinsa kana booda kaleessa ministeera dhimma alaa Libaanos Abdallaah Boo'u Haabibif bilbiluudhaan haala jiru irratti ibsi naaf kennameera jedhan.
"Haleellaan raawwatame kan qiyyaafannoo qaban fakkaatullee, namoota nagaarrattis garaagarummaa malee miidhaa aarsaa guddaa geessiseera. Kanneen miidhaman keessaa daa'imman hedduudha," jedhan.
Itti dabaluudhaanis, haleellaan marsaa booda kanaa ''nageenyaa fi tasgabbii Libaanos balaadhaaf saaxiluu danda'a, akkasumas balaa naannichatti hammachuu dabaluu danda'a,'' jechuun ibsan.
Gara waldhabdee daangaa Israa'elii fi Libaanos jidduu jiruutti yoo deebinu, amma waa'ee halkan darbee ilaalchiisuun odeeffannoo haaraa arganne muraasni kunooti.
Waraanni Israa’el haleellaa kibba Libaanos irratti raawwateen bufatawwan Hezbollaa torba haleeleera jedheera.
Eddoowwan irratti xiyyeeffataman keessaa jaha gamoo waraanaa yoo ta'an, inni dhumaa tokko immoo mana kuusaa meeshaa waraanaa akka ta'e himame.
Waraanni Israa'el gamoowwaniifi bakkeewwan kuusaa garagaraa haleeluu ibsa baasen beeksiseera.
Kunis kan dhufe erga Israa’el Kamisa har'a haleellaa misaa’elaa farra taankiitiin garee Hezbollaa Libaanos irraa dhukaafameen yoo xiqqaate lammiileen Israa’el saddeet madaa’uu isaanii erga himte boodadha.
Namoota miidhaan irra gahe keessaayis lamaan isaanii haala miidhaa giddu galeessaa ta'e keessa kan jiran yoo ta’u, kanneen hafan ammoo miidhama salphaan irra gahuu gaazexaan Times of Israel qondaaltota hospitaalichaa wabeeffachuun gabaaseera.
Waraabbiin kallattiin samii Beerut sa’aatii lama keessatti mul’ate akka agarsiisutti, yeroo meeshaaleen qunnamtii guyyaa Roobii magaalattii guutuu keessatti yoo dho’an mul'ata.
Wayita sanatti raadiyoon qunnamtii kumaatamaan lakkaa'aman biyyattii bakkeewwan garaa garaa keessatti dhohan.
Biyyattii keessatti dhohinsi bakkeewwan gara biroo keessattis mul'ateera. Wayita sirni awwaalchaa raawwatamaa jiru dabalatee, taateewwan kunneen miidiyaa hawaasaarratti qoodamaniiru.
Guyyaa tokko dura qofa raadiyoon qunnamtii miseensonni garee hidhataa Hezboollaa itti fayyadaman kumaatamaan lakkaa'aman biyyattii keessatti dho'aniiru.
Dhohinsa raadiyoowwan qunnamtii (walkie-talkie) kanaatiinis namoonni 25 kan du’an yoo ta’u, yoo xiqqaate 450 kan ta'an ammoo madaa’aniiru. Dhohinsa meeshaa qunnamtii guyyaa Kibxataa mudateetiin ammoo namoonni 12 du'anii, 2,000 ol ammoo madaa'aniiru.
Waraabbii vidiyoo kanneen hunda garuu BBC'n adda hin mirkanneeffanne.
Yaa’ichi wixinee Israa’el lafa Filisxeem humnaan qabatte keessaa ji’oota 12 keessatti akka baatu gaafatu raggaasise.
Ambaasaaddari Filisxeem filannoo kun qabsoo bilisummaa fi haqaa keenyaaf qabxii murteessaadha‘‘ jedhe.
Ambasaaddarri Israa’el ammoo "shoroorkeessummaa dippilomaasiiti‘‘ jedhanii ibsan.
Wixinee kun murtoo seeraa hojiirra akka oluu dirqisiisu hin qabu.
Dhimma kana biyyoonni 124 yoo deeggaran, Israa’el dabalatee biyyoonni 14 mormaniiru, biyyoonni 43 ammoo sagalee kennuurraa of qusatan.
Miseensa dhaabbaticha guutuu kan hin taane Filisxeem sagalee kennuu hin dandeessu.
Murtoon kun yaada Manni Murtii olaanaa Dhaabbata Biyyoota Gamtoomanii Israa’el seera idil-addunyaa cabsuun Weest Baank, Baha Jerusaalem fi Gaazaa seeran ala qabachuu ibsu kan bu’uureffatedha.
Murtooon yaa’ii waliigalaa Dhaabbatichaa kun wabii seera dhabus, biyyoonni miseensa dhaabbaticha 193 ejjannoo qaban akeeka.
Waldaa hojjettootaa Ameerikaa keessatti dhiibbaa guddaa qaban keessaa tokko kan ta’e waldaan Obbolummaa Idil addunya (International Brotherhood of Teamsters) bara 1996 booda yeroo jalqabaaf deeggarsa kaadhimamtoota pirezidaantii Ameerikaaf kennuu dide.
Gamtaan kun miseensota gara miliyoona 1.3 guutuu US fi Kanaadaa keessaa kan qabu yoo ta’u, kaadhimamtuu paartii Dimookiraatotaa Kamalaa Haarisiif akkasumallee kaadhimamaa paartii Rippabilikaan Doonaaldi Tiraampiif deeggarsa hin taasisne
Qorannoon miseensota isaa sadarkaa olaanaa irratti gaggeeffame tokko akka ibsuttu kaadhimamtootni lammanuu ''deeggarsaa tokkollee'' akka hin arganne himameera.
Haa ta'u malee qorannoon dhiheenya kana ba’e lama waldaaleen hojjattoota hangi tokko Tiraampiin deeggarsa hanga tokkoo qabaachuu agarsiisa.
Tarkaanfiin kun ammo duula filannoo Harris guyyoota 50 hin guunne keessatti tattaaffii taasisaa jirtuu yaaddodha.
Waldichi hawaasa kumaatamaan lakkaa’aman kanneen kutaalee dirree waraanaa murteessoo Penniseylevaniyaa, Michigan fi Wiskoonsiin keessa jiraatan, hojjetan akka sagalee kennan sochoosuuf dandeettii qaba ture.
Waldaan hojjattootaa senaataroota Ameerikaa fi namoota dhiibbaa uumaan heddu of keessa qabu kana irraa ragaa funaanameen sagalee filannoo miseensota sadarkaa olaanaa irratti kanna 59.6% Tiraampi yoo deeggaran kennan, Haaris deeggaruuf sagalee kennan ammoo 34% qofa.
Gamtichis ibsa baaseen ''qorannoon miseensotaa bal'aan akka agarsiisutti itti aantuu pirezidaantii Haaris caalaa, miseensonni harka caaluu Pirezidaanti Tiraampii gara waayit Haawusitti akka deebi’an deggarsa agarsiisu’’ jedhe
Ta’us garuu akka baay’inaa miseensotaa fi waldaa filannoo Ameerikaa darban keessatti dhiibbaa qabutti deegggarsi waldichii kaadhimamtoota lamaanifuu agarsiisaa jiru xiqqaa ta’uutu eerame.
Guyyoota lamaaf dhohinsi lubbuu namaa galaafate guutuu biyyattii keessatti mudateen booda waahillan keenya BBC Arabic Libaanos keessatti namoota dubbisanii turan.
"Wanti nuti argine bakka hundatti miira ajjeechaa ture," jetti dubartiin tokko.
"Dargaggoonni harkiisaanii, mudhiinsaanii fi ijja isaanii irratti miidhaan ga'ee daandii irra deemaa turan homaa arguu hin danda'an ture."
"Namoonni wal maddii imaluu hanga sodaatanitti naasuun liqimseera... Dhugaa yoo dubbanne haalli kun baayyee sodaachisaadha."
Namni kibba Libaanos jiraatu tokko akka jedhaniitti, "yaaddoo fi sodaa keenya dhoksuu hin dandeenye, keessumaa daa'imman, dubartootaa fi maanguddootaaf yaaddoofne" jedha.
Dubartiin biraa tokkos "Haalli burjaajii, miira namaatti hin tollee fi yaaddoon Libaanos hunda keessatti mul'ataa jira," jetti.
Raadiyoowwan qunnamtii Libaanoos keessatti guyyoota lamaan darbaniif dhohuunsaanii uummata yaaddessuutu dhagahame.
Israa'elis kallattiin waraanaa haaraa eegalamuu himte.
Taatee yeroo itti dhohiinsii mudatee viidiyoo kana dowwadhaa!
Kaleessa guutuu Libaanos keessatti raadiyoon qunnamtii (walkie-talkies) dhibbaan lakkaa'aman yeroo dhoo'an, xiyyeeffannaan gara meeshaalee mataasaaniittiifi akkamitti akka dhoohaniitti garagale.
Dhaabbanni Jaappaan kanaan dura meeshaalee kanneen oomishaa tures waggaa 10niin dura oomisha moodeela sana irratti dhaabbeera jedha.
Icom IC-V82 akka raadiyoo harkaan qabamuutti kan ibsu yoo ta'u, bara 2004 hanga 2014tti gara Baha Giddugaleessaatti kan ergame yoo ta'u, ergasii hin ergamne. Oomishni baatiriiwwan kanaas dhaabbateera jedhe dhaabbatichi.
Dhaabbatichi dabaluudhaan haleellaa kaleessaatiin kan dhoohan kallattiin IC-V82n ta'uu, ykn kan karaa raabsaa ergamuu isaanii mirkaneessuun hin danda'amu.
Haata'u malee moodeelonni kun kan Icom irraa illee ta'uu dhiisuu danda'u jedhe.
Kanaan dura hoji gaggeessaan gurgurtaa dhaabbata Ameerikaa Icom jalatti argamu AP'tti akka himetti, meeshaaleen Libaanos keessatti dhoohan oomishicha kuffisuuf akka, itti dabaluunis, oomisha fakkeeffamanii hojjataman sobaa toora interneetii irratti haala salphaa ta'een argachuun akka danda'u ibseera.
Gidaan jiraattuun Libaanos keessa tokko wahillan keenya BBC Newsday'tti akka himeetti, "namni hundi rifaaatuu keessa jira'' jette.
"Laaptooppii keenya, bilbila keenya cina turuu akka dandeenyu hin beeknu. Yeroo kanatti wanti hundi balaa fakkaata waan ta’eef, namni maal akka godhuu qabu beeku hin jiru," jetti.
Haleellaa kun akkuma mudateen booda namoonni tokko tokko ''dhiiga arjoomuuf ariifatanii yoo fiigan'', kaan ammoo ''jireenya isaanii idilee itti fufaniiru'' jetti. Haata'u malee itti dabaluudhaan "sodaa guddaa keessa akka jirtu" dubbatti.
"Libaanos keessatti waraanni bal’aa ta’e akka hin kaaneef nan sodaadha, ummata kootiif nan sodaadha, magaalaa kootiif nan sodaadha, biyya kootiif nan sodaadha," jetti.
"Sababni isaas waan kana caalutu nuuf mala, akkasumas waraana Hezbollaa, Israa'el, Iraan fi nama hunda gidduutti gaggeeffamuuf garii kaffalaa jirra. Garuu kan kanarra fooyyee'utuu nuuf mala."
Israa’el halkan darbe keessa buufataalee Hezboollaa kibba Libaanos keessatti argaman haleeluu beeksiifte.
Erga haleellaa Onkoloolessa 7 raawwatameen booda humnoota Israa’elii fi Hezboollaa gidduutti daangaa Israa’elii fi Libaanos qaxxaamuruun guyyaa guyyaan jechuun haala danda'amuun rookkeettii fi misaa’elaa walitti dhukaasaa jiru.
Humni Waraanaa Israa'el (IDF) ibsa ganama kana kenneen, humni qilleensaa isaa halkan edaa buufataalee Hezbollaa kibba Libaanos hedduu haleelleera jedha.
Qiyyeeffannaan kunis gamoo waraanaa fi mana kuusaa meeshaa waraanaa kan hammate ta'uu hime.
Akka midiyaaleen Israa'el jedhaniitti, guyyaa Roobiitti rookkeettiiwwan 40 ol ta'aniituu Libaanos irraa gara Israa'eliitti dhukaafame.