Iraan ji'oota keessa yuraaniyeemii gabbisuu dandeessi - UN

Haguuggii Tamsaasa Kallattii

1. 24 Waxabajjii 2025Ministirri faayinaansii Israa'el: 'Tehraan ni raafamti' jedhan

   Battaluma Israa'el Iraan irraa misaa'ela itti dhukaafamuu arguu dubbattetti, ministirri maallaqaa biyyattii kan warra dudhaa duriitti cichanii (far-right) ibsa gabaabaa miidiyaa hawaasaarratti maxxansaniiru

   "Tehraan ni raafamti," jechuun michuu ijoo Ministira Mummee Beenjamin Netaaniyaahuu kan ta'an, Bezaalel Smotrich toora X isaaniirratti barreessan.

   Akka yaadachiisaatti ministirri ittisaa Israa'el waraanni ''Iraan waliigaltee dhukaasa dhaabuu waan cabsiteef waraannii isaanii tarkaanfii deebii cimaa akka kennu ajajeera'' yoo jedhan, Iraan ammoo haleellaa jedhame hin raawwanne jetteetti.

2. 24 Waxabajjii 2025Amma nu gahe, Israa'el Iraan waliigaltee cabsite jechuun 'humnaan deebii kennuuf' dhaadatte, Tehraan garuu wakkatteetti

   Ministirri Raayyaa Ittisaa Israa'el, Israa'el Kaatz ibsa amma kennaniin, Raayyaan Ittisaa Israa'el "Iraan dhukaasa dhaabuu cabsiteef haleellaa cimaa Teehiraan irratti akka raawwatamuuf ajaja kennusaanii" dubbatan.

   Iraan garuu haleellaa misaa'elaa ittiin himatamte kana hin raawwanne jechuun waakkatteetti.

   Ministirri dhimma alaa Iraan duraan yoo Israa'el haleellaa raawwatu dhaabde qofaa biyyisaanis haleellaa akka dhaabdu dubbatanii ture.

   Haala kanarratti waan haaraa mudatu ykn ibsa gama lachuu irraa dhufu kamiyyuu hordofnee isiniif dhiyeessina waan ta'ef nu hordofuu hin dagatiinaa.

3. 24 Waxabajjii 2025Amma nu gahe, Waraanni Israa'el misaa'eloonni Iraan irraa itti dhukaafamuu ibse

   Waraanni Israa'el misaa'eliin Iraan irraa itti dhukaafamuu adda baaseera jechuusaa amma dhageenyeerra.

   Kun kan dhagahame erga Tiraamp dhukaasa dhaabuun Israa'elii fi Iraan jidduutti eegaluusaa beeksiisanii sa'aatii muraasaan boodadha.

   Waraanni Israa'el sirnoonni ittisa qilleensaa ''balaa kana to'achuuf socho'aa akka jiran'' ibsuun, namoonni hanga beeksisni biraa labsamutti bakka dahoo keessa seenanii akka turan gaafateera.

   Bal'inni misaa'ela furguggifamuu gabaafame kanaa ammallee ifa miti. Iraanis haleellaa kanarratti amma ammaatti wanti jette hin jiru.

   Kun kan ta'e erga Israa'el dhukaasa dhaabuurratti waliigaleera jetteen boodadha.

   Ministirri dhimma alaa Iraan kanaan dura Israa'eel yoo haleellaa raawwataa jirtu dhaabde qofaa haleellaa akka dhaaban dubbatanii ture.

4. 24 Waxabajjii 2025Israa'el erga 'yaaddoo nukilaraafi misaa'elaa Iraan dhabamsiistee' dhukaasa dhaabuuf waliigalte

   Odeeffannoo dabalataa dhufaa jiru.

   Mootummaan Israa'el erga "kaayyoo Iraan irratti haleellaa banuu galmaan ga'atee" yaada dhukaasa dhaabuu dhyaatetti akka waliigalu ibse.

   Ibsi bahe kun Israa'el "wantota Iraan jireenyasheetiif yaaddoo ta'an lamaan" meeshaa waraanaa nukilaraatii hanga misaa'eliitti dhabamsiisteetti jedha.

   Itti dabaluun, Israa'el "hoggansa waraanaa Iraanirra miidhaa jabaa geessisteetti, akkasumas buufatawwan waraanaa mootummaa Iraan irratti xiyyeeffachuun barbadeessiteetti," jedha ibsi kun.

   Humnoonni Israa'el, guyyaa dhumaa kana keessa, "galma mootummaa garaa Tehraan keessatti akka malee rukutanii, milishaa mootummaan Iraanin deeggaramu fi "saayintistii nukilaraa olaanaa biraa dhabamsiisaniiru" jedha.

   Itti dabaluun, “Israa’el Pirezidaanti Tiraamp fi Ameerikaan deeggarsa ittisarratti taasisaniifi balaa nukilaraa Iraan dhabamsiisuu keessatti hirmaannaa isaaniif galateeffatteetti” jedha ibsichi.

5. 24 Waxabajjii 2025Kibba Israa'elitti namoonni afur ajjeefamanii, 55 madaa'aniiru -Tajaajila ambulaansii

   Tajaajilli ambulaansii Israa'el Mageen Daavid Adoom(MDA) jedhamu miidhaa haleellaa Iraan raawwatte ilaalchisuun waan mudate ibseera.

   Akka MDA jedhetti, namoonni afur du'uufi 22 ammoo madaa'uun isaanii mirkanaa'era.

   Warra madaa'an keessaa ammoo namoonni lama miidhaa giddu-galeessa ta'e kan irra gahe yoo ta'u, 20 kan ta'an garuu miidhaa xiqqaatu mudate

6. 24 Waxabajjii 2025Miidiyaan mootummaa Iraan dhukaasa dhaabuu jalqabu dura 'misaa'eliin marsaa dhumaa' dhukaafame jedhe

   Miidiyaan mootummaa Iraan SNN akka gabaasetti, Iraan osoo waliigalteen dhukaasa dhaabuu hin jalqabamiin dura "misaa'ela marsaa dhumaa" gara Israa'elitti dhukaaste.

   Akkuma ibsinetti, Israa'el ganama sa'aatiiwwan muraasa dura haleellaawwan misaa'elaa walirraa hin cinne yoo xiqqaate namoota afur ajjeese mudachuu ibsiteetti.

   TVn mootummaa Iraanis haleelaa Iraan walirraa hin cinneen booda Israa'el waliigaltee dhukaasa dhaabuu "akka fudhattuuf dirqamni irra kaa'amuu" gabaaseera.

7. 24 Waxabajjii 2025Iraan-Israa'el gidduutti dhukaasa dhaabuun amma hojiirra ooleera - Tiraamp

   Pirezidant Doonaald Tiraamp ergaa miidiyaa hawaasaa Truth Social irratti akkas jedhe: "Dhukaasa dhaabuun amma hojiirra ooleera. Maaloo hin cabsiinaa!"

   TVn mootummaa Iraan Iraa'el waliigaltee dhukaasaa dhaabu kana "akka fudhattuuf dirqamatu irra kaa'ame" jedhee ture.

8. 24 Waxabajjii 2025Israa'el waliigaltee dhukaasa dhaabuu US dhiyeessite akka fudhattu mirkaneessite

   Mootummaan Israa'el yaada dhukaasa dhaabuu Doonaald Tiraamp dhiyeesse akka fudhatu hime.

   Ibsa baaseen "Israa'el waliigalteen kun cabee jennaan humnaan deebii kenniti," jedhe.

   Ibsa kennamuuf jirurraa odeeffannoo dabalataa isiniin geenya.

9. 24 Waxabajjii 2025Dhukaasa dhaabuu booda dhibbaa Ameerikaaf fidee dhufu

   Akkuma Pirezidaant Tiraamp jedhe, Israa'el dhukaasa dhaabuurratti waliigaltee ni fudhattimoo ni dhiisti kan jedhu eegaa jirra.

   Akka miidiyaa mootummaa Iraan jedhanitti, Iraan ammoo waan fudhatte fakkaatti.

   Garuu waliigaltee dhukaasa dhaabuun booda rakkoon Tiraamp: Iraan akka meeshaa waraanaa nukilaraa bira hin geenye gochuudha.

   Waayit Hawus sagantaan nukilaraa Iraan guutummaan guututti barbadaa'eera jedhee amana.

   Haata'u malee, hanga Iraan taajjabdoonni akka seenanii mirkaneessan hayyamtuutti namni beekuu danda'u hin jiru.

   Wantoonni beekuu hin dandeenye biroonis jiru. Iraan haleella Ameerikaa dursitee meeshaaleefi maashina ittiin nukilara ittiin gabbistu dursitee gara bakka hin beekamnee geessiteetti yoo ta'e eenyuti beekaa?

   Buufataaleen nukilaraa dhoksaa ta'an haleellaa kanaan hin manca'iin jiruu?

   Ameerikaanonni amma waliigaltee dippilomaatii Iraan sagantaa nukilaraa akka duuba hin deebinetti dhabamsiisteeti guutummaatti mirkaneeffatan barbaadu.

10. 24 Waxabajjii 2025Tiraamp dhukaasa dhaabuurratti waliigalan, Iraan ammoo Israa'el dhaabnaan haleellaa nan dhaaba jette

    Pirezidantiin US Doonaald Tiraamp Iraan fi Israa'el gidduutti "guutummaan guutuutti dhukaasa dhaabuun" sa'aatiiwwan dhufan keessatti hojiirra oola jedhan.

    Iraan ammoo yoo Israa'el kan dhaabdu ta'e isheenis haleellaa akka dhaabdu himteetti. Israa'el garuu hanga ammaatti yaada hin kennine.

    Yaadni dhukaasa dhaabuu dhiyaate jalqabuun yeroo muraasa dura, Israa'el Iraan misaa'elii akka haaraatti gara biyyasheetti dhukaasuun namoota sadii jalaa ajjeesuu himteetti.

    Iraan keessatti ammoo, miidiyaaleen mootummaa haleellaa milkaa'aa Iraan buufata humna waraanaa US Qaataar fi Iraaq keessa jirurratti raawwachuu hordofee Israa'el dhukaasa dhaabuu "akka fudhattu dirqamni irra kaa'ame" jechuun gabaasaa jiru.

    Akka yeroo Traamp ka'anitti amma sa'aatiin dhukaasa dhaabuu jalqabeera.

    Tiraamp miidiyaa hawaasaa isaanii Turth Social irratti akka sa'aatii Ameerikaatti halkan keessa ture "tilmaamaan sa'a 6 booda" Iraan fi Israa'el gidduutti dhukaasni akka dhaabbatu kan beeksisan.

    "Israa'el fi Iraan gidduutti ammarraa kaasee sa'aatii 6 booda guutummaan guutuutti DHUKAASA DHAABUUF waliigalameera."

11. 24 Waxabajjii 2025Nagaa bultanii?

    Tamsaasni kallattii BBC Afaan Oromoo eegaleera.

    Walitti bu'iinsa Israa'el fi Iraan akkasumas kaan ijoo dubbii addunyaa ta'e jala jalaan isin biraan geenya.

    Isiniis asiin nu hordofaa: Facebook, Chaanaalii WhatsApp fi YouTube.

    Lafa nagaa oolaa!

12. 24 Waxabajjii 2025Amma nu gahe, Tiraamp deebii Iraan kennite'baay'ee dadhabaa' jedhe, 'dursanii beeksisuu' isaaniif galateeffate

    Tiraamp miidiyaa hawaasaasaa isaarratti maxxansuun deebii haleellaa Iraan kenniteen ''baay'ee laafaa'' ta'uu dubbate. "Dursanii nu beeksisuusaaniiru" jechuun ammoo galateeffate.

    "Iraan Dhaabbilee Nukilaaraa isaanii balleessuu keenyaaf deebii baay'ee laafaa ta'een ifatti deebii kennitee jirti, kanas nuti eegnee turre, haala baay'ee bu'a qabeessa ta'een dhura dhaabbanneera," jedhe pirezidantiin Ameerikaa 'Truth Social' irratti.

    Iraan misaa'eloota 14 dhukaafte kan jedhan yoo ta'u, isaan keessaa 13 ''kuffisaniiru'', kan biraa ammoo gara ''kallattii yaaddeessaa hin taanetti" akka qajeelfame dubbate.

    Lammiileen Ameerikaa kamiyyuu miidhaan irra hin geenye, "miidhaan omaa qaqqabe jechuun hin danda'amu" jedhe. Lammiin Qaataar tokkollee hin ajjeefamne, ykn kan madaa'es hin jiru jedhe Tiraamp.

    "Hunda caalaa ammoo 'sirna' isaanii keessaa hunda fixataniiru, kana booda JIBBI akka hin jirre abdii guddaan qaba. Iraan dursitee akeekkachiisa waan nuuf kenniteef galateeffachuu nbarbaada," jedhe.

    "Tarii Iraan amma gara nageenyaa fi waldanda'uu naannichaatti ce'uu dandeessi, Israelis akkasuma akka gootuuf dhimmeen jajjabeessa," jedhe.

    Akkasumas itti dabaluudhan, ''Addunyaan baga gammadde, yeroon amma kan nagaati'' jedhe Tiraamp.

    Tiraamp ergaa lammaffaa fi sadaffaa walduraa duubaan fuula miidiyaa hawaasaa isaarratti maxxanseen , Amiirii QaaTaar "Naannichaaf nageenya buusuu keessatti waan hojjete hundaaf" galateeffataniiru.

    Barreeffama isaa duraatiin ammoo, haleellaa Iraan kanaan lammiileen Ameerikaa tokkollee akka hin miidhamne kan dubbate yoo ta'u, amma ammoo lammiileen Qaataar tokkollee akka hin ajjeefamne ykn kan madaa'an akka hin jirre dabaluun ibse.

    "ADDUNYAA BAGA GAMMADDEE, YEROON NAGAA GAHE!", jechuun pirezidaantiin Ameerikaa barreeffama isaa sadaffaan ergaa dabarseera.

13. 23 Waxabajjii 2025MM Libaanos yeroo Qaataar naannoo qilleensaashee cuftetti garasitti balali'aa turan

    Yeroo Qaataar naannoo qilleensaashee cuftetti Ministirri Mummee Libaanos Naawaaf Salaam gara biyyattiitti imalaa akka turan gorsaan Libaanos BBC'f mirkaneesse. Sababa haleellaa misaa'elaa Iraan buufata Ameerikaa Qaataar irratti raawwatteen Dohaan daangaa qilleensaashee kan cufte.

    Qondaalli maqaan isaanii akka hin dhahamne gaafachuun BBCtti dubbate kun, Salaam amma Baahireen keessa jiru jedhan.

    Yeroo ammaa gabaasaa jirru kanatti, Qaataar haleellaa Iraan Buufata Xiyyaaraa Al Udeid irratti raawwachuun dura yeroodhaaf naannoo qilleensaa ishee cuftee jirti.

14. 23 Waxabajjii 2025Tiraamp deebii kennuuf dhiibbaan guddaa keessa jira

    Akkuma gabaasaaleen Qaataar irraa dhaga'ameen Pirezidaant Tiraamp, sekiteeriyaatiin ittisaa isaafi dura taa’aan hoggantoota waloo Sichuweeshin Ruumii galanii maal gochuu akka qabanirratti mariyachaa jiru.

    Guyyaa 10 dura erga Israa'el Iraan irratti haleellaa bantee kaasee Manni-maree Nageenyaa Biyyaalessaa guyyaa guyyaan walga'ii gaggeessaa jira.

    Yaaddoon irratti xiyyeeffatan ammoo buufata humna qilleensaa Ameerikaa naannoo Baha Giddu-galeessaa keessatti hunda caalaa guddaa ta'e buufata humna qilleensaa Al Udeid akka ta'edha.

    Guyyoota muraasa dura, suuraawwan saatelaayitiirraa argaman akka agarsiisanitti, xiyyaaronni kudhanii ol ta'an oddoo qubatanii jiraniirraa kaafamaniiru.

    Kun ammoo haleellaa buufatawwan nukilaraa Iraan irratti dhum-torbee darbe kana gaggeeffame dursee of eeggannoo barbaachisu gochuu akka ta'e ifadha.

    Caamsaa keessa, Doonaald Tiraamp akka qaama daawwannaa isaa naannichatti taasisanii keessaa tokkootti buufata kana daawwatee ture.

    Haasaa yeroo daawwate kanatti taasiseen, qondaalota waraanaa achi turanitti akkas jechuun dubbatee ture: "Akka pirezidaantummaa kootti waanan dursa kennuuf walitti bu'insa dhaabsisuudha, malee jalqabsiisuu miti. Haata'u malee, barbaachisaa taanaan Ameerikaafi michoota keenya waan itti dhufu irraa ittisuuf humna Ameerikaa fayyadamuurraa duubatti hin deebiyu."

    Haleellaa dhum-torbee darbeen booda, tarkaanfii haaloo ba'uu Iraan fudhattu kamiyyu "humna kana caaluun deebii argata" jedhe pirezidaantichi.

    Hanga ammaa lubbuun darbe kan hin jirre fakkaatullee, deebii kennuudhaaf Tiraamp dhiibbaa guddaa keessa jira.

15. 23 Waxabajjii 2025Waa'ee buufata humna qilleensaa US Qaataar keessa jiruu kan beekuu qabdan

    Buufanni humna qilleensaa US kan bakka Al Udeid jedhamu magaalaa guddoo Qaataar, Dohaatti dhiyoo jiru, oppereeshinii qilleensaa Baha Giddu-galeessaaf buufata muummee Wiirtuu Ajajaa US ta'uun kan tajaajiludha.

    Buufata kana keessa loltoota Ameerikaa 8,000tti siqanitu jira.

    Humnoonni Ingiliziis buufata kana keessa naanna'u, yeroo tokko tokko bakki kun Buufata Xiyyaaraa Abu Nakhla jedhamuun waama.

    Buufanni kun yeroo ammaa oppereeshinii US Iraaq keessatti gaggeessituuf akka buufata muummeefi loojistikii ta'uun kan tajaajilu yoo ta'u, buufata humna qilleensaa naannoo Galoo Galaanaa keessatti isa hunda caalaa guddaadha.

    Qaataar bara 2000 ture Maaerikaan akka buufata Al Udeid argattuuf kan kenniteef.

    Akka dhaabbani intelijensii Grey Daayinaamiks jedhamu Landan maadheffate jedhutti, bara 2001 irraa kaastee Ameerikaan akka manaajera buufata kanaa taateen booda, Dohaa fi Waashingiteen Mudde bara 2002 ture humni waraanaa US dhaabbbata Al Udeid kana keessa akka jiru ifatti waliigaluun kan ifoomsan.

    Bara 2024 keessa, US loltootashee Qaataar keessa waggoota 10 biroo tursiifachuuf waliiglateerra gahuu CNN gabaasee ture.

16. 23 Waxabajjii 2025Iraan haleellaa US iddoowwan nikulaaraa ishee irratti raawwatteef deebii akkamii kennuu dandeessi?

    Waraanni Israa'elii fi Iraan torban lammaffaa isaa qabatee jiruun, dhaabbata Foordoo kan dallaa cimaa qabu dabalatee, gidduu seentummaan tibbana Ameerikaa haleellaa gurguddaa iddoowwan nikulaaraa Iraan ijoo ta'an irratti raawwatte, Tehraan tasgabbii dhabsiiseera.

    Pirezidaant Doonaald Tiraamp haleellaa Nataanz fi Isfaahaan irratti raawwatameen alatti, boombii cimaa lafa gadi fagoo uree seenuu (Massive Ordnance Penetrator (MOP)) kan 13,600kg ta'u fayyadamuun iddoo nikulaaraa Iraan lafa jalaa Foordoo baay'ee cimaa ta'e haleelluuf hayyamaniiru.

    Innis iddoowwan kunneen ''guutumaa guutuutti barbadaa'uu'' labsuudhaan, Teehiraan haaloo yoo kan baatu ta'e ammoo ''humna baayyee guddaa'' akka ta'u akeekkachiiseera.

    Hogganaan Olaanaa Iraan Ayaatolaah Alii Khameeniin kanaan dura Ameerikaan yoo hirmaatte ''miidhaa hin suphamne'' akka ta'u dubbatanii kan turan yoo ta'u, amma biyyi Rippabilikni Islaamaa filannoowwan hedduu madaaltee jirti. Guutummaa gabaasa kanaa asiin argadhaa.

17. 23 Waxabajjii 2025Iraan haleellaan Ameerikaa malee Qaataar irratti hin qiyyaafanne jette

    Manni Maree Nageenyaa Biyyaalessaa Olaanaa Iraan ibsa baaseen, Iraan buufata humna qilleensaa Ameerikaa mancaastus haleellaan kuni ''Qaataariifi uummatasheerratti balaa hin fidu,'' jedhe.

    Dabaluunis, ''Iraan hariiroo seena-qabeessaafi gaarii Qaataar waliin qabdu eeguufi itti fufsiisuu feeti,'' jedha.

    ''Lakkoofsi misaayelaa Iraan fayyadamte hamma boombii Ameerikaan wiirtuulee nukilaaraa haleeluuf fayyadamtedha,'' jedha ibsi mana marichaa.

    Mootummaan Qaataar haleellaa misaa'elaa Iraan sirni ittisaa biyyattii qolachuu daqiiqaa muraasan dura himeera.

18. 23 Waxabajjii 2025Qaataar haleellaa buufata xiyyaaraa US irratti raawwatame 'cimsitee balaaleffatte'

    Mootummaan Qaataar kan haleellaa Buufata Xiyyaaraa Al-Udeid irratti raawwatame "cimsuun balaleffaterraa" amma deebii dhaga'aa jirra.

    Dubbi-himaan Ministeera Dhimma Alaa Qaataar, Maajed al-Ansaari toora X irratti akka barreessanitti: "Kun birmadummaa Mootummaa Qaataar, naannoo qilleensaashee, seera idil-addunyaa fi chaartara Dhaabbata Biyyoota Gamtoomanii ifatti akka cabsutti ilaalla," jedhaniiru.

    Sirni Ittisa Qilleensaa Qaataar, ''haleellaa kana milkaa'inaan fashaleessuun misaa'ela Iraan to'achuu, akkasumas buufatichi durfamee keessaa bahamee akka ture dubbatan.

    Itti dabaluun: "Miseensota Raayyaa Ittisa Biyyaa Qaataar, humnoota michuu fi kanneen biroo dabalatee, nageenya hojjettoota buufata kana mirkaneessuuf tarkaanfiiwwan barbaachisoo ta'an hundi fudhatameera."

    "Haleellaa kanaan miidhaan qaamaa ykn miidhaan namaa akka hin geenye mirkaneessina."

    Dubbi-himaan kun Qaataar ''maalummaa fi guddina haleellaa kanaan wal gitutti'' deebii kennuudhaaf mirga qabdi jedhu.

19. 23 Waxabajjii 2025Dowwadha: Ittisni qilleensaa Qaataar yeroo haleellaa Iraan qolatu

    Viidiyoon armaan gadii kun yeroo Iraan haleellaa buufata waraana Ameerikaa kan Qaataar keessaarratti dhukaafteetti ifa ittisa qilleensaa samii Qaataar irratti mul'ate agarsiisa.

    Ittisa qilleensaa samii halkanii bulchiinsa Galoo Galaanaarratti mul'atu kana dowwadhaa.

20. 23 Waxabajjii 2025Amma nu gahe, Iraan haleellaan biyyarratti raawwatamu 'deebii malee' hin hafu jette

    Akka midiyaaleen mootummaa gabaasanitti, amma ibsa Eegdota Warraaqsa Islaamaa Iraan irraa dabalataan dhagahaa jira.

    Gareen kun ergaan Iraan Waayit Haawusii fi michoota isheef ergite ''ifaa fi qabatamaadha'' jedha.

    "[Iraan] haala kamiinuu haleellaa walabummaa daangaa, birmadummaa fi nageenya biyyaashee irratti raawwatamu kamiyyuu deebii malee hin dhiiftu," jedha ibsi IRGC.