Humnoonni Yukireen iddoowwan Raashiyaan qabatte irraa fuudhuuf lolaa jiru - US

Haguuggii Tamsaasa Kallattii

1. 20 Bitooteessa 2022Haleellaa Raashiyaan raawwataa jirtu deeggarsa namoomaa danqe-Unicef

   

   Wojjataan Dhaabbata Daa'immanii UN-Unicef tokko BBCtti akka himeetti, jiraattoonni magaalaa kibba-bahaa Maaruupol deeggarsa baayyee kan barbaada yoo ta'u, garuu ammoo haleellaa waliirraa hin cinne Raashiyaan raawwataa jirtuu hojjattoota gargaarsaa danqeera.

   Joo Inglizii magaalaa lixaa Liviiv irraa BBCtti wayita dubbateetti, ''haala cimaa magaalattii keessa jiruu ibsuudhaaf jechaan rakkisaadha. Garuu hojjattoonni gargaarsaa hedduun yoo deeggarsicha qaqqabsiisuuf jedhaniitti balaaf saaxilamaa jiru,'' jedhe.

   ''Akkuma gama daandii deeggarsa namoomaatiin agarreetti, afaaniif tole jechuu danda'u garuu qabatamaan lafarra jiru baayyee addadha,'' jedhe.

   Dhimmichi namootaa naannicha keessaa baasuu qofa osoo hin taane, namoonni hundi gadhiisanii bahu waan hin dandenyeefu dhiyeessitiiwwan namoomaas qaqabsiisuun waan nu barbaachisuuf, gareewwan namoomaa haalaan akka hojjataniif hayyamuun barbaachisaa ta'u cimsuun himeera.

   Akkasumas Inglizii, biyyyattii guutuutti ''rakkoon daa'immanii'' mudachuu kaaseera.

   ''Kaleessa daa'ima Daanilo jedhamu kan kaansarii dhiigaa T-cell jedhamtu argeen ture. Daa'imtu kunis deeggarsa wallaansaa cimaa argachu qabdu asitti argaachu hindandeenyee,'' jedha.

   ''Garuu ammoo guyyaa hunda seenaa walfakkaataa dhagaha jirra. Isaan dura ammoo mucaa Andrei kan waggaa 15 fi boombii dhoka'een haadhasaa dhabee argeen ture. Torbaniin dura ammoo daa'ima torban 10 Anaa kan haatiishee murtee cimaa taasisuun kutaa daa'immanii hospitaala Kiyiiv keessatti dhiifteen arge. Anaan sababii rakkoo onnee qabduufi deeggarsa wal irraa hin cinnee barbaachisuuf haatishee kana gochu akka hindandeenye waan hubatteef hospitaaluma keessatti dhiisuuf dirqamte.''

   "Biyyatii keessatti rakkoon daa'imman mudataa kan jiru kanadha. Daa'imman daangaa qaxxamuruun baqataniifis rakkoon cimaatu jira. Walumaagalattis, baayyee kan bitaa namatti galuudha,'' jedhe Ingilzii.

2. 20 Bitooteessa 2022Xiyyaarri waraanaa Ameerikaa kufee caccabuun namoonni keessa turan afur du'an

3. 20 Bitooteessa 2022Raashiyaan yeroo jalqabaatiif misaa'eelii hayiparsoonikii fayyadamuu himte

4. 20 Bitooteessa 2022MM UK Booris Joonseen Chaayinaan Raashiyaa akka balaaleffattu gaaftan

   

   Madda suuraa, PA Media

   Ministirri Muummee UK Booris Joonseen Chaayinaan weerara Raashiyaa akka balaaleffatu jabeessanii gaafatan.

   Gaaffiifi deebii gaazexaa Sunday Times waliin taasisan irratti Joonsan waraana Addunyaa Lammaffaarratti Raashiyaa cinaa dhaabbachuun filannoo dogoggoraa turee jedhan.

   ''Hammuma yeroon sukkuu fi ajjeechaan Raashiyaa dabalaa adeeme, callisaanis ta'e ifaan weerara Putiin deeggaruun namootaaf baayyee ulfaataa fi siyaasaaniis saalfachiisaa ta'a'' ta'a jedhan.

   Amma Chaayinaan ejjennoo ishee walaba jettu irratti deebitee yaadaa jirti jedheen amana jedhan.

   Raashiyaan Chaayinaa irraa deeggarsa gaafatteetti jedhamuu hordofee, Chaayinaan deeggarsa ni laattiif yoo ta'ee gochi ishee balaa akka qabu pireezidant Joo Baayidan Jimaata akeekkachiisaniiru.

   Sanbata kaleessaa Ministirri Haajaa Alaa Chaayinaa Waang Yii ejjennoo biyya isaabii ''walabaa fi haqa'' jedhanii dhiibbaa qaama alaaf deebii akka hin laanne dubbatan.

   ''Ejjennoon warra Chaayinaa seenaa keessatti isa sirrii ta'uu yeroon ragaa ni baha'' jedhan.

5. 20 Bitooteessa 2022Qorattoonni hawaa Raashiyaa maaliif halluu Yukireen uffatan?

6. 20 Bitooteessa 2022Chaayinaan Raashiyaaf maal dhiyeessuu dandeessi?

   

   Madda suuraa, Getty Images

   Yukireen Sanbata kaleessaa Chaayinaan biyyoota lixaa waliin ta'uun weerara michuushee Raashiyaan raawwate akka balaaleeffattuuf gaaffatte.

   Chaayinaan Raashiyaa irraa faggaachusheetiin wanti agarsisu omtu hin jiru. Beejiingi waranicharraa haaluma dippilomaatiin of fageessuu waan barbaaddeef, weerara Raashiyaan raawwatte balaalleeffachuf UN keessatti osoo sagalee hin kenniin hafte.

   Haata'u malee Zaleenskiin waamicha taasiseef osoo hin turiin qondaalli motummaa Chaayinaa olaanoon tokkoo, uggurri weerara Raashiyaan raawwatteef jecha biyyoota Lixaatiin Raashiyaa irra kaa'amee baayyee ''kan nama aarsuudha'' jedhan.

   Akka qondaaltoota Ameerikaa eeruun gabaasa dhiyaatetti, Raashiyaan weerara Yukireen keessatti raawwattuuf deeggarsa meeshaa waraanaa Chaayinaa gaaffattee jirti.

   Chaayinaan ammoo kun sobaa fi gabaasa ''dogongorsiisaadha'' jette turte.

   Haata'u malee ofii Chaayinaan michuu isheetiif wayita ammaa qoqqophiin Mooskootti cimaa jiru kanatti maal dhiyeessuufii dandeessi laata?

   Chaayinaan gabaa boba'aa, gaaziifi cilee Raashiyaa guddaa keessaa tokko.

7. 20 Bitooteessa 2022Zeleenskiin paartilee Raashiyaa deeggaran 11 dhorkuu beeksise

   

   Madda suuraa, Ukrainian presidency

   Pirezidaantiin Yukireen Volodmiir Zelanskiin, paartiilee bulchiinsa Raashiyaa waliin hidhata qabaachuuf himataman dabalatee paartiilee siyaasaa 11 biyyattii keessatti sochii akka hin taasifneef dhorkuu beeksiise.

   Ibsa viidiyoo halkan keessa gadhiifameen, pirezidaantichi paartiilee gurguddoo mana maree Yukireen keessatti karaa bakka bu'ootasaaniin Raashiyaa deeggaran keessaa tokko kan ta'e 'Opposition Platform- For Life' dabalatee maqaa hedduu tarreessaniiru.

   Akkasumas paartiileen siyaasaa sochiinsaanii dhorkamee keessaa Paartii Shaariyaa, Paartii Soshaalisitii Tarkaanfataa Yukireen, Paartii soshaalisitii Yukireen, Soshaalisitoota fi kanneen biraas ni argamu.

   Ministirri Haqaa Yukireenis dhorkaa kana hojiirra oolchuuf battalumatti sochii akka eegalus pirezidaantichi himaniiru.

   Dhorkaan kunis hanga seerri waraanaa hojiirra oolfamaa jiruutti kan hojjatu jedhan Zelenskiin.

8. 20 Bitooteessa 2022Miidiyaalee Raashiyaa 1,500 Yukireen keessaa ugguraman

   Midiyaalee Raashiyaa erga waraanni eegalee kaasee Yukireen keessatti holoola Raashiyaa tamsaasan 1,500 ugguramusaanii, eejjansiin oduu Yukireen Interfax sanbattan irraa beeksiise.

   Eejjansichis Poolisii Biyyaaleessaa, ''Waliigalatti miidiyaalee holoola tamsaasan 1,500 ugguruu dandeenyeerra,'' jechuu eereera.

   ''Chaanaaliiwwan miidiyaa ugguraman kunneenis hordooftoota miiliyoona 15tti tilmaaman qabu.

   "Kana malees, maxxansiiwwan 3,178 kanneen yakkaa waraanaa fi du'aatii lammiilee Yukireen nagaa deeggaran akka fuularraa kaafaman taasifamaniiru.''

   Itti dabaluunis poolisiin miidiyaalee fi maxxansawwan kunneenis kan ugguruu danda'e, iyyatawwan Yukireenonni marsariitii fayyadaman karaa Teleegraamii poolisii-saayibarii Yukireen, StopRussiaChannel fi StopDrugsBot jedhamuutiin dhiyaate hordofuun jedheera.

9. 20 Bitooteessa 2022UKn jeettiiwwan dhuunfaa Raashaa waliin hidhata qaban balaliinsarraa dhorkite

   

   Madda suuraa, EPA

   UKn jeettiiwwan dhunfaa Raashaa waliin hindhata qabaachu malu jedhaman akka hin balaliine dhorkite.

   Ittigaafatamaan Geejjiba biyyatti Giraanti Shaapsi akka jedhaniitti, jeettiiwwan dhunfaa UK keessaa hanga ''hidhata isaan Raashaa waliin qabaachu malan qoratamuutti'' akka hin balaliineef dhorkaman.

   Ministeerri geejjibaa UK gochaa pirezidaantin Raashiyaa Vilaadmiir Putiin 'weerara seeraan alaa Yukireen irratti raawwateef' xiyyaarriwwan Raashiyaa, kanneen Raashiyaanotaan gaggeefaman ykn kireeffaman hundi akka UK keessa hin gallee ykn hin balaliinee ni dhorkuun tarkaanfii fudhata jedhan qondaalli kuni.

   Jeettiin Luxembour keessatti galmaa'e tokkos erga Bitooteessa 3 US irraa dhufeen booda Farnborough, magaalaa Landan irraa fageenya kilometira 55 irra qubachiifame. Qondaaltoonni UK abbaan qabeenyaa boba'aa Eugene Shvidler ergamaa akka ture amanu.

   Qajeelchi Geejjibaas wayita dhimmicha qoratuuttis hidhata namoota dhuunfaa waliin qaburratti yaada omaa akka hin kennine hime.

10. 20 Bitooteessa 2022Dogoggorri waraanaa Raashiyaan raawwatte maal fa'i?

11. 20 Bitooteessa 2022Odeessaalee keenya kallatiin deebineerra!

    

    Ashamaa, akkam jirtu hordoftoota BBC Afaan Oromoo?

    Gabaasni kallattii keenya kan Dilbata Bitootessa 20, 2022 kunoo taateewwan haaraa addunyaa asirraa eegaleera.

    Akkasumas gabaasa guyyoota darbaniilleen asiin gaditti argachuu dandeessu.

    Oolmaa Gaarii!

12. 19 Bitooteessa 2022'Walitti dhufeenyi Chaayinaafi Raashiyaa cimuu mala'

    

    Madda suuraa, Getty Images

    Sababii haala siyaasa tibbanaatiin walitti dhufeenyi Raashiyaafi Chaayinaa cimuu akka malu, Ministirri Dhimma Alaa Raashiyaa Seergee Laavroov himan.

    ''Wayita ammaa yoo biyyoon lixaa bu'uuraalee sirnoota idil-addunyaa hunda dadhabsisaa jiran kanatti, nuti ammoo, biyyoonni cimoon lamaan, attamiin addunyaa kana keessatti akka itti fufnu yaadutuu nu barbaachisa,'' jechuu saanii eejansii oduu Raashiyaa Interfax gabaase.

    Pirezidaantiin Ameerikaa Joo Baayidan marii hogganaa Chaayinaa Shii Jiiping waliin Jimaata darbe taasisaniin, Beejiingi yoo waraanicha keessatti Raashiyaaf deeggarsa taasifte 'balaa qabaachu malu' irratti akeekkachiisu isaa Waayiti Hawuus hime.

    Miidiyaan motummaa Chaayinaa akka gabaaseetti, Shii waraanicha akka ''fedhii eeyuutuu hintaaneetti'' ibsaniiru jedhe, garuu ammoo yoo ifatti pirezidaantii Putiin qeeqan ammoo dhagahamee hin beeku.

    Akka gabaasaalee miidiyaa dhiheenya kanaatti, Raashiyaan weerara Yukireen irratti deeggarsa meeshaa waraanaa akka taasiftuuf Chaayinaa gaaffatte jirti.

    Haata'u malee Raashiyaanis taatee Chaayinaan odeessa kana kufisuunsaanii ni yaadatama.

13. 19 Bitooteessa 2022Mariin Iraan gatii boba'aa salphisuu danda'a - Ministira Ayarlaand

    

    Madda suuraa, Getty Images

    Mariin nikuleeraa Iraan waliin ture eegaluunsaa gatii boba'aa sababii qoqqobbii Raashiyaarra kaa'ameen wal qabatee garmalee dabaleef furmaata ta'u akka malu Ministirri Dhimma Alaa Ayirlaand dubbatan.

    Simoon Koveenv akka jedhaniitti, waliigalteen haaraa dhuma torban kanaatti ni taasifama jedhanii abdatan, Iraan deebiitee gara gabaa dhiyeessiitti akka galtuuf carraa ni uumaaf.

    ''Akkuma waan waliigalteerra geenyeetti ilaalla,'' jedhan ministirichi, kan marii niikulaara Mana Maree Nageenyaa UN mijeessaa jiran wayita BBCtti himaniitti.

    ''Kunis yeroo barbaadnuutti oduu baay'ee gaariidha.''

    Teehiraan waliigalee niikuleeraa 2015 cabsiitee jirti jedhamun ture kan qoqqobbiin irra kaa'ame. Waliigalteen kunis Iraaniifi biyyoota jaha jidduutti kan taasifame ture.

    Waliigaltee haaraan kunis yoo hawwii meeshaalee waraanaa nikuleeraa gabbisuu dhaabde qoqqobbiiwwan kanneen kaan kaasuuf ta'a.

    UK fi Gamtaan Awurooppaa weerara pireezidantiin Raashiyaa Vilaadmiir Puutiin Yuukireen irratti raawwateef deebii kennuuf jecha boba'aa Raashiyaa irratti hirkachurraa walaba bahu barbaadu.

14. 19 Bitooteessa 2022Miisaa'eeloonni 'hayiparsoonikii' maaliidha?

    

    Madda suuraa, Getty Images

    Har'a ganama keessaa humnootiin Raashiyaa man-kuusaa meeshaalee waraanaa Yuukireen lafa jalaa kan Lixa biyyatiitti argamu misaa'eloota hayiparsoonikiin haleeluu beeksiisuu gabaasuun keenya ni yaadatama.

    Garuu meeshaalee waraanaa gosa attamiitti fayyadaman? Misaa'eeloonni Hayiparsoonikii samii ol fagoo keessa saffiisa sagalee dachaa shan caaluun balali'uu danda'u.

    Gosti misaa'eloota hayiparsoonikii jedhaman kunneenis misaa'eloota baraman kaan caalaa itti fayyadamuuf salphaa fi kan ittisa qilleensaa kamuu cabsuuf dandeettii qabaniidha.

    Raayyaan Ittisa Raashiyaa akka jedheetti, misaa'eloonni man-kuusaa meeshaalee waraanaa Yuukireen barbadeessuuf faayyidaarra oolfamanis kan fageenya kiloo meetira 2,000 ol irratti bakka qiyyeeffannaasaanii sirriin rukutaniidha.

    Bara darbe Raashiyaan dhukaasa yaalii miisaa'eela hayiparsoonikii milkaa'aa doonii waraanaa irraa gara qarqara Kaaba-Lixa galaana Adiitti dhukaasuu himtee turte.

    Raashiyaa waliinis biyyoonni akka Chaayinaa, US fi yoo xinnaate biyyoonni kaan shan teekinolojii misaa'elii hayiparsonkii kanarratti hojjataa jiru.

15. 19 Bitooteessa 2022Cheelsii bituuf warra fedhii agarsiisan keessaa eenyutuu carraa caalaa qaba?

16. 19 Bitooteessa 2022Yuukireen loltoota Raashiyaa 14,000 ajjeessuu himte

    

    Madda suuraa, Getty Images

    Qondaalli waraanaa Yuukireen, torbanoota sadan jalqabaa itti Mooskoon weerara biyyatiitti raawwattee keessatti loltoota Raashiyaa 14,000 ol ajjeessuu himan.

    Odeeffannoo qondaaltoonni Yuukireen toora Facebook irratti maxxansan kanaan, loltoonni Raashiyaa gara kuma 14 ta'anii ajjeefamaniiru jedhan.

    Akkasumas odeeffannichi dabaluun Mooskoon konkoolaataawwan sibiilaa loltootaa 1,470, taankiiwwan 60 fi jeettiiwwaniif hilikooptaroota 100 ol dabalatee, meeshaa waraanaa hedduu dhabu himeera.

    Haata'u malee odeeffannoo kana BBCn madda walaba ta'e irraa mirkaneeffachuu hin dandeenye. Odeeffannoo maddeen tikaa biyyoota Lixaa irraa argateen loltoonni gara 7,000 kan ajjeeffaman yoo ta'u kanneen 14,000 fi 21,000 jidduu ta'an irra ammoo miidhaan qaqqabeera.

    Odeeffannoon kunis ifa kan ta'e wayita humnootiin Yuukireen janaraala Raashiyaa shanaffaa ajjeessuu beeksiisaniitti.

    BBCn madda walabaa irraa mirkanneeffachu baatulleen, Leetenaant Janaraal Andirei Mordvichev ajajoota waraanaa Raashiyaa hanga ammaatti waraanaa kana keessaatti ajjeeffaman keessaa isa olaanaadha.

17. 19 Bitooteessa 2022Hawaa keessatti Raashiyaafi US ammallee walumaan hojjataa jiru

    

    Madda suuraa, EPA

    Dacheerratti nagana hin jiru, bakka dhipphoo buufata Hawaa Idil-addunyaa keessatti garuu Raashiyaafi US nagaadhumaan waliin hojjataa jiru.

    Qorattoonni hawaa Raashiyaa sadan- komaandar Oleeg Artemyeev, Deeniis Maatveev fi Sergeey Korsaakoov ergama ji'a ja'aafi walakkaatiif Jimaataa hawaarra nagaan quataniiru.

    Buufata Hawaa Idil-addunyaa (ISS) irratti waliin hojjecuuf US, Raashiyaafi biyoota kaan jidduutti wagga 23 dura waliigalteen taasifameedha.

    Qorattoonni kunneen sadan hawaa irratti garee miseensoota lammiilee Ameerikaa afur, kan Raashiyaa lamaafi Jarmanii tokkootiin haalaan simatamaniiru.

    Kunis erga oduun qorataa hawaa Ameerikaa Maarki Vaabdee Hei kan hawaa keessaa guyyoota 355’f turuun riikardii Naasaa cabse- gara lafaatti deebi’uuf buufata hawaa idil-addunyaarraa xiyyaar-samii Raashiyaatiin gara Kaazaakhstaan deebi’uun dhagahameen guyyoota muraaran booda.

    

    Madda suuraa, Reuters

18. 19 Bitooteessa 2022US meeshaaleen waraanaa akkamii Yukireeniif kenniti, jijjiirama akkamiimmoo fida?

19. 19 Bitooteessa 2022Raashiyaan kuusaa meeshaa Yukireen misaa’eelii 'hayipparsonikiin' haleeluu himte

    

    Madda suuraa, Reuters

    Dubbi himaan Ministira Ittisa Raashiyaa biyyi isaanii kuusaa meeshaa waraanaa lafa jalaa Yukireen miisaa’eeliiwwan hayiparsooniikiitti fayyadamuun barbaddeessuu hime.

    Igoor Konaashenkoov akka jedhaniitti, man-kusiichi kan misaa’eeloonniifi ‘‘meashaa waraanaa qilleensarraa loltoota Yukireen’’ ta’uun kan tajaajilu akka ta’e dubbatan.

    Raashaan garuu kanaan dura gonkumaa waraanicha keessatti miisaa’eeloota hayiparsoniikiitti fayyadamuu amante hin beektu turte.

    Misaa’eeloonni baalaastikii kunneenis kan ol fageenya samii keessa sagalee caalaa saffiisa dacha shaniitiin daangaa qaxaamuruun balalii’uu danda’aniidha.

    Akka waraanaa Raashiyaatti, sirni misaa’eelii ‘’Kinzhal’’ waraanicha keessatti fayyidaarra oolfamees kan fageenya km 2,000 (maayilsii 1,242) ol irratti eddo qiyyaafatame rukutuufi kan sirnoota ittisa misaa’eelii fi qilleensawwan jiran hunda bira darbuu danda’uudha.

20. 19 Bitooteessa 2022Mariin nagaa Raashiyaa fi Yuukireen maalirra jira?

    

    Madda suuraa, EPA

    Guraandhala 24 Raashiyaan Yuukireen erga weerarteen booda biyyoonni lamaan marsaa hedduuf waliin mari'atanii jiru.

    Marii kanaan biyyoonni lamaan waliigalteerra gahuuf hagam akka deeman baruun rakkisaadha.

    Jalqaba torbee kanaa, barruun Faayinaanshaal Taayims qabxiilee 15 biyyoonni lamaan irratti waliigaluu mala ifa godhee ture. Yuukireen fedhii miseensa NATO ta'uuf qabdu haquu, buufata waraanaas ta'e meeshaa waraanaa biyya kamiiyyuu keessummeessuu dhiisuun qabxiilee kanneen keessa jiru.

    Yuukireen gama isheen eegumsa biyyoota Lixaa akka argattu eerameera.

    Marii kanarratti Raashiyaa bakka bu'uun kan hirmaatu qondaalli olaanaa Mooskoo akka jedhutti biyyoonni lamaan Yuukireen biyya walabaa ta'uu irratti ejjennoon qaban walitti dhiyaateera.

    Gama Yuukireenin garuu ammallee marichi fagoo waan jiru fakkaata. Gorsaan pireezidantii Yuukiren Mikhaayiloo Podoliyaak kan maricha irratti hirmaatu ejjennoon Yuukireen hin jijjiiramne jedhe.

    "Sadarkaa mariin irra jiru, wanti warri Raashiyaa jedhan gaaffii gama isaaniin dhiyeeffatan qofa," jechuun tiwiitarii irratti barreesse.

    Ministirri Muummee Raashiyaa duraanii Mikhaayil Kasiyaanoov BBC'tti yoo dubbatan Vilaadimiir Puutiin waa'ee marii 'hin dhimmamu' furmaata karaa nagaa waraanicha xumuru 'kan lammileen Yuukireen itti waliigalan kennuufis hin jiru' jedhan.