Путиннинг собиқ куёви "Сибур"даги жойини Франция собиқ бош вазирига бўшатди Dunyo Yangiliklar

Россиянинг энг йирик нефт-кимё компаниясининг директорлар кенгашини матбуотда Владимир Путиннинг собиқ куёви деб танилган бошқарувчиларидан бири тарк этган ва кенгаш сафида Франциянинг собиқ бош вазири пайдо бўлган.

«Сибур» компанияси бошқарув раиси ўринбосари ва ҳиссадор Кирилл Шамалов директорлар сафини тарк этди, аммо бошқарув таркибида қолади, деб ёзади РБК.

Айни дамда кенгашга Франциянинг собиқ бош вазири Франсуа Фийон қўшилди.

Шамалов ким?

Шамалов 2008 йилда, ҳали 26 ёшлигида «Сибур»нинг вице-президенти бўлганди. «Сибур» - Россиядаги энг катта нефт-кимё компанияси.

Бугунда 39 ёшида бўлган Шамаловни Россия матбуоти Президент Путиннинг собиқ куёви дея таърифлайди. У «Россия» банкининг эгаларидан бири Николай Шамаловнинг ўғли. Николай Шамалов Путиннинг яқин дўсти экани ишонилади.

Рейтер агентлиги хабар қилишича, 2013 йилда кичик Шамалов Катерина Тихоновага уйланган.

Рейтер ва Блумберг Тихоновани Путиннинг кенжа қизи деб аташган.

Путин Тихоновага оилавий алоқаси борлигини ҳеч қачон тасдиқламаган, аммо буни инкор ҳам қилмаган.

2018 йил январида Блумберг Шамалов ва Тихонова ажрашганларини ёзганди.

2014 йил сентябрида Путиннинг яна бир дўсти экани айтиладиган санкциялар остидаги миллиардер Геннадий Тимченко «Сибур»даги 17% акцияларини Кирилл Шамаловга сотган.

2017 йил апрелида Шамалов «Сибур»даги ўз акцияларидан 17 фоизини сотиб, ўз ҳиссасини 3,9%га туширган.

2016 йилда Форбс Шамаловлар оиласи Россиядаги энг бадавлат кланлардан бири эканини айтиб, уларнинг бойлигини 2,3 миллиард долларга баҳолаганди.

Нега Фийон?

Эндиликда компаниянинг директорлар кенгашида унинг бошқаруви вакилларидан фақат бир киши - бошқарув раиси Дмитрий Конов қоляпти. РБК бу ўзгаришларни «Сибур» сентябрда Татаристоннинг ТАИФ гуруҳига қўшилиши билан изоҳлаяпти. Нашрга кўра, айнан ТАИФнинг собиқ ҳиссадорлари Фийоннинг номзодини киритишган.

«Сибур»нинг РБКга айтишича, Фийон бошқарув, иқтисод ва бизнес-жараёнларда уникал тажриба ва чуқур билимга эга. Унга кўра, собиқ давлат амалдорларини стратегик бошқарув органларига тайинлаш глобал компаниялар орасида самарали ва кенг қўлланилувчи тажрибадир.

Нашрнинг эслатишича, «Сибур»дан ташқари Франция собиқ бош вазири аллақачон яна бир Россия компанияси - «Зарубежнефт» директорлар кенгашига сайланган.

2017 йил баҳорида Франция прокуратураси ўшанда Франция президентлигига номзод бўлган Фийонга қарши иш очганини эълон қилганди. У француз парламенти депутати бўлган даврида ўз оила аъзоларига сохта тўловлар қилишда гумон қилинган.

2020 йилда Фийон ўз хотини учун сохта иш ўрнини яратишда айбдор деб топилиб 5 йилга (уч йили шартли) озодликдан маҳрум этилишга ҳукм қилинган. Париждаги суд Фийонни давлат пулларини суиистемол қилишда айбдор деб топди. Бу йил ноябрида айни иш бўйича апелляция жараёни бошланди.

Фийон якка эмас

Фийон - йирик Россия компанияси директорлар кенгашидан ўрин олган ягона европалик юқори даражали сиёсатчи эмас.

Энг таниқли мисол - Германиянинг собиқ канцлери Герхард Шрёдер. У 2017 йилдан бери Россиянинг энг йирик нефт компанияси саналмиш «Роснефт»нинг директорлар кенгашига бошчилик қилади.

Шунингдек, Шрёдер Россия газини Европага етказишга ихтисослашган Nord Stream AG газ қувурлари операторининг ҳиссадорлари қўмитасига раислик қилади. Nord Stream 2 AG ижрочи директори Маттиас Варниг эса Путин билан ҳали шўролар ҳукумати давридан бери таниш.

"Лукойл" директорлар кенгашида Австриянинг собиқ вице-канцлери Волфганг Шюссел ва АҚШ давлат котибининг собиқ ёрдамчиси Тоби Тристер Гати ҳам бор.

Жорий йил июнида "Роснефт" директорлар кенгаши сафига Австриянинг собиқ ташқи ишлар вазири Карин Кнайсл ҳам қўшилди. 2018 йилда Путин унинг тўйига бориб, бирга вальс тушганди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek