Путин яна мақтанди: Спутник V Калашников каби ишончли - Россия Ковид дунё коронавирус koronavirus Covid-19 O'zbekiston dunyo yangiliklar

Россия президентининг мақтанишича, Спутник V вакцинаси Калашников автомати каби "ишончли". Путин "қизларидан бири ҳам худди шу вакцина билан эмланган". Аммо Россия президенти ўзининг қай бир вакцина билан эмлангани айтилмаган, номаълумлигича қолган. Ўзбекистонда "Спутник V фақат амалдорлар учунми?", деган эътирозлар юзага чиққан.

Спутник V Ўзбекистон ўз аҳолисини коронавирусга қарши оммавий эмлаётган учта вакцинадан биттаси бўлади.

Ўтган ой бу вакцинанинг дастлабки икки партияси Ўзбекистонга устма-уст олиб келинган, аммо бу ҳақдаги расмий хабарда унинг дозаси очиқланмаган.

Масъулларнинг яқинда қилган чиқишларидан унинг ҳозирча 50 минг доза экани маълум бўлган.

Бундан олдин Ўзбекистон Россиядан бир миллион доза Спутник V вакцинаси харид қилиш режасида экани хабар берилган.

Бунча миқдордаги вакцина учун сарф-харажатнинг ярмини асли ўзбекистонлик миллиардер Алишер Усмонов кўтариши айтилган.

Агар, расмий хабарларга таянилса, Спутник V Ўзбекистонда шу йилнинг февраль ойида оммавий фойдаланиш учун сертификатланган ва тасдиқланган.

Шу кунларда эса, "Ўзбекистонда Спутник V вакцинаси фақат амалдорлар учунми?", - деган саволлар ҳам ўртага чиққан.

Бу каби саволларга ҳатто мамлакат юқори мартабали масъуллари ўзларининг жавоб берганликлари ҳам кўрилган.

Таъбир жоиз, худди шу "савол-жавоб" тафсилотидан шу пайтгача пойтахт Тошкентдан 20 мингдан ошиқ кишининг айнан Спутник V билан эмлангани маълум бўлган.

Бу вакцина билан нега ҳамманинг бирдек эмланмаётгани саволига ойдинлик киритган Санитария-эпидемиологик осойишталик ва жамоат саломатлиги хизмати бошлиғи ўринбосари Россия вакцинасининг 6-7 май кунлари Ўзбекистоннинг барча ҳудудларига юборилишини ҳам билдириб ўтган.

Сўнгги кунларда эълон қилинаётган расмий статистика Спутник V ҳозир ўзбекистонликлар энг кўп эмланаётган иккита вакцинадан биттаси эканига далолат қилган.

"Калашниковдек ишончли"

Путин кеча, пайшанба куни Россиянинг коронавирусга қарши вакциналарини яна бир бор мақтаган.

Улар "Калашников" каби ишончли" эканини баён қилган.

Россия президентининг бу баёноти Спутник V нинг бир дозали, енгил шакли тақдим этилган бир манзарада янграган.

Россиянинг "Калашников" автомати, йилларки, дунёдаги энг оммабоп қуроллардан бири бўлиб келади.

Путиннинг бу сўзлари шу йил бошида австриялик шифокорнинг вакцинага берган баҳоси билан ҳамоҳанг янграган.

Спутник V коронавирусга қарши дунёдаги бир давлат мисолида расман қайддан ўтказилган биринчи вакцина бўлган.

Уни ўтган йил август ойида шахсан Россия президенти Владимир Путиннинг ўзи расман тақдим этган.

Вакцина шу пайтгача дунёнинг ўнлаб давлатларида расман қайддан ўтказилган.

Спутник V аллақачон Россиянинг "дипломатик ютуғи" сифатидаги баҳоларни олишга ҳам улгурган, Россиянинг бу вакцинаси Европада эпидемиологикдан кўра, сиёсий муаммолар яратаётганига оид жиддий хавотирларни ҳам пайдо қилган.

Спутник V

Спутник V худди Oxford/AstraZeneca ва Janssen/Johnson&Johnson вакциналари билан бир хил технология асосида яратилган.

Бу вакциналар аденавирус векторлари асосида ишлаб чиқилган.

Аммо жуда қисқа муддатда яратилгани, вакцина синовига оид тафсилотлар анчайин кеч эълон қилингани боис, самараси четда дастлаб жиддий шубҳа билан қарши олингани ҳам бор гап.

Шу йил февраль ойида The Lancet журналида эълон қилинган учинчи босқич синови натижалари эса, Россиянинг Спутник V си коронавирусга қарши 92 фоиз самарали эканини кўрсатган.

Бунинг ортидан, Спутник V Ғарбнинг Pfizer, Oxford/AstraZeneca, Moderna ва Janssen вакциналари қаторидан жой эгаллаганди.

Уни 2 дан 8C гача бўлган ҳароратда сақлаш мумкин (қиёс учун айтилса, стандарт музлатгич ҳарорати тахминан 3-5C), яъни сақлаш ва ташиш ҳам осон.

Спутник V нинг бошқа вакциналардан фарқли жиҳати ҳам бор, яъни 21 кунлик танаффус билан берилувчи биринчи ва иккинчи дозаси бир-биридан сал фарқ қилади.

Уларнинг иккаласи ҳам коронавируснинг ўзига хос "бошоқчасини" нишонга олади, аммо турли хил вектор - бошоқни танага олиб борувчи нейтралланган вирусдан фойдаланади.

Олимларнинг эътироф этишларича, бу иммунитетни янада кучайтиради - коронавирусдан узоқ муддатли ҳимояни таъминлаши мумкин.

Россиянинг ўзида Sputnik V билан эмлаш ишлари ўтган йил 5 декабрь куни бошланган. Шу йил январь ойида эса, аҳолисини оммавий эмлашга киришган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek