Россия: Ўн минглаб одам намойишга чиқди, Ўзбекистон томони огоҳлантирди - Rossiya Navalniy Putin O‘zbekiston dunyo yangiliklar

Намойишлар пойтахт Москвадан тортиб, Владивосток, Сибирь қадар бўлиб ўтди. Энг кўп одам Москвада тўпланди. Санкциясиз намойишлар чоғида икки мингга яқин одам ҳибсга олинган. Ўзбекистон ўз фуқароларини бу намойишлардан четга туришга чақириб чиққан.

Намойишлар қамоқдаги Алексей Навальнийни қўллаб ўтказилган.

Ўн минглаб одам қамоқда очлик қилган мухолифат лидерига рисоладагидек тиббий ёрдам кўрсатилишини ҳам талаб қилишган.

Сўнгги кунларда Алексей Навальнийнинг ҳаётидан хавотирлар кучая бошлаган, унга зудлик билан даво кўрсатилмаса, бунинг оқибати ёмон бўлишидан қўрқувлар пайдо бўлган.

44 ёшли Алексей Навальний шу йил февраль ойида қамоққа ташланган, 31 март куни очлик эълон қилган.

Бунинг ортидан, унинг бел оғриғи ва оёғидаги увишишидан азоб чекаётгани маълум бўлган.

Мухолифат чоршанба кунги намойишларнинг бу яқин йиллардаги энг йириги бўлишига умид қилган.

Ўн минглаб одам чиққан бўлса-да, барибир, Алексей Навальнийни қўллаб шу йил январь ойида ўтказилганларидан кичик бўлиб чиққан.

Сўнгги хабарларга таянилса, бу гал жами 1700 дан ортиқ одам ҳибсга олинган, бу ҳақда "ОВД-Инфо" хабар берган.

Энг кўп ҳибслар Санкт-Петербург ҳисобига тўғри келиши маълум бўлган. Ҳибсдагиларнинг тақдири ҳозирча номаълум.

Россия полицияси эса, мамлакатнинг 29 шаҳрида 14 мингдан зиёд одам кўчага чиққанини айтган.

Россиядаги сўнгги намойишлар масъулларнинг кескин огоҳлантириши ва катта сондаги полиция кучларининг ҳозирлиги манзарасида бўлиб ўтган.

Улар томонидан ҳар қандай зўравонликнинг бостирилиши айтилган.

Намойишчиларга қарши электрошокерлар қўллангани, улардан айримларининг оёқлари синдирилганига оид хабарлар ҳам бор.

Намойишлар Россия Президенти Владимир Путиннинг Федерал мажлисга мурожаати билан бир кунга тўғри келган.

Кичик миқёсда бўлса-да, Европанинг айрим давлатларида ҳам Алексей Навальнийни қўллаб норозилик акциялари ўтказилгани маълум бўлган.

Россия дунёнинг энг катта сондаги Ўзбекистон фуқаролари турли иш, юмуш ва таҳсилда банд давлати бўлади.

Россияда биргина меҳнат муҳожирлигида банд Ўзбекистон фуқаролари ўзининг сони пандемиягача миллионларга нисбат бериб келинган.

Ўзбекистонлик энг кўп меҳнат муҳожирлари эса, Россиянинг оммавий норозилик намойишлари энг қизғин кечган икки йирик шаҳри - пойтахт Москва ва Санкт-Петербург ҳисобига тўғри келади.

Ташқи меҳнат миграцияси агентлиги эса, кеча, 21 апрель куни Россияда бўлиб турган Ўзбекистон фуқароларига мурожаат билан чиққан.

Агентлик уларнинг диққатини худди шу куни кутилаётган санкциясиз оммавий намойишларга қаратган.

Россияда бўлиб турган Ўзбекистон фуқароларидан бундай оммавий намойишларда иштирок этмаслик, мамлакат қонунларига риоя этиш ва одамлар кўп тўпланаётган жойларга бормасликни сўраган.

Ташқи меҳнат миграцияси агентлиги мурожаати сўнггида уларни бунинг оқибатлари билан ҳам огоҳлантирган.

Агентлик бу каби расман рухсат берилмаган тадбирларда қатнашиш чет эл фуқаролари учун Россия Федерацияси қонунларига мувофиқ жавобгарликка тортилиш ёки давлатдан мажбурий чиқариб юборишга олиб келишини яна бир бор эслатган.

Бундан аввал ҳам Россия бўйлаб Навальнийни қўллаб ўтказилган оммавий намойишлар фонида агентликнинг худди шунга ўхшаш мурожаат билан чиққани кўрилган.

Агентликнинг ҳар икки мурожаати ортидан ҳам бу каби жавобгарликка юз тутган ўзбекистонликлар бор-йўқлигига оид савол ҳозирча очиқ қолган.

Россияда шу йил январь ойида бўлиб ўтган илк оммавий норозилик намойишлари фонида Ўзбекистонда ҳам Алексей Навальний озодлиги талаби билан якка чиқишлар кузатилган.

Бунга айрим ўзбекистонликларнинг худди ўша кунлари ижтимоий тармоқларда тарқалган суратлари далолат қилган, бу суратлар кибер фазода бир хил қарши олинмаган, кенг муҳокамаларга ҳам сабаб бўлган.

Улардан бирининг онаси норозилик чиқиши сабаб, ўғлининг маҳаллий Ички ишлар бошқармасига чақирилганидан шикоят қилиб, қўйган пости ҳам кўрилган.

Шу йил март ойида эса, президент Шавкат Мирзиёев томонидан "Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида"ги қонун имзоланган.

Ўзбекистондаги масъул идоралар мазкур қонун билан Жиноят кодексига оммавий тартибсизликлар ва фуқароларга нисбатан зўравонлик қилишга омма олдида даъват қилганлик учун жавобгарлик киритилганини расман маълум қилишган.

Янги қонунчиликка кўра, мазкур қилмишни содир этган шахслар базавий ҳисоблаш миқдорининг 100 бараваридан 300 бараваригача жарима ёки 2 йилгача ахлоқ тузатиш ишлари ёхуд 3 йилдан 5 йилгача озодликни чеклаш ёки 3 йилдан 5 йилгача озодликдан маҳрум қилиш билан жазоланади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek