Ҳафсалам пир бўлди, ҳайрон қолдим, хафаман – АҚШ, Британия, БМТ АОКА амалига ўз муносабатини билдирди – Ўзбекистон ва дунё, Мирзиёев, O‘zbekiston, Mirziyoyev, yangiliklar

Ҳафсалам пир бўлди, ҳайрон қолдим, хафаман - АҚШ, Британия, БМТ АОКА ишига ўз муносабатини билдирди - АОКА ўтган ҳафта мамлакатдаги қатор етакчи интернет нашрларига расман хат йўллаган, уларни "жиддий ҳуқуқий оқибатлар" билан огоҳлантирганди.

Kun.uz, Газета.uz, Daryo.uz ва Podrobno.uz Ўзбекистон Ахборот ва оммавий коммуникациялар агентлигининг огоҳлантириш хатини ўз саҳифаларида чоп этишган, унга ўз муносабатларини билдиришган, буни ўз фаолиятлари, матбуот эркинлигига нисбатан босим ва эски даврнинг шамоли сифатида қабул қилишларини билдиришган. Бир-бирларинининг муносабатларини қўллашларини айтишган.

Агентлик нашрларнинг коронавирус статистикаси, газ ва электр таъминоти билан боғлиқ муаммоларга оид айрим материалларига ўз эътирозларини билдирган, мавзуларнинг бир томонлама, ҳиссиётга берилган ҳолда ёритилгани, ахборот тарқатиш жараёнида қатор қонунбузилиш ҳолатларига йўл қўйилгани аниқланганини таъкидлаган.

Таҳририятларни нохолисликда айблаган ва бунинг "жиддий ҳуқуқий оқибатлар"идан огоҳлантирганди.

Ўтган ҳафтанинг ўзида мазкур воқеъликка Буюк Британия, АҚШ, Германия элчилари ва БМТ нинг Ўзбекистондаги мувофиқлаштирувчиси ўз муносабатларини билдиришган, бу хусусда твит қилишган.

Жумладан, АҚШ элчиси Дэниель Розенблюм, "Ўзбекистон Ахборот ва оммавий коммуникациялар агентлигининг мустақил матбуотга босим ўтказиш билан боғлиқ сўнгги чораларидан ҳафсаласи пир бўлгани" ҳақида ёзган.

"Ўзбекистондаги улкан ислоҳотларнинг ижроси матбуотнинг эркин ва очиқ бўлишини тақозо этиши"ни айтган.

"АОКАнинг босими бунга мувофиқ эмас"лиги жумласи билан ўз твитига якун ясаган.

Буюк Британия элчиси эса, Ўзбекистондаги қатор интернет нашрлари билан боғлиқ янгиликка биринчилардан бўлиб муносабат билдирган.

"АОКАнинг оммавий ахборот воситаларини ривожлантиришни қўллаб-қувватлашга қаратилган мавқеининг, афтидан, сўнгги вақтларда қандай ўзгарганини кўришдан ҳайрон ва хафа" эканини айтган.

Тим Торлот, "Демократик жамиятни кучли ва эркин матбуотсиз қуриб бўлмаслиги"ни таъкидлаган.

Ўзбек тилидаги қатор твитларда Германия элчилиги ҳам элчи Гунтер Оверфельд АОКАнинг мустақил нашрларга қаратилган "танқидлари"дан ҳайратда экани ҳақида ёзган.

Твитларнинг бирида, "Агар аҳоли томонидан газ ва электр энергиясини етказиб бериш хизматларининг ёмон ишлаётгани ҳақида ҳақли танқид бўлса, матбуот ҳам бу ҳақда хабар беришга ҳақли", деган сўзларни ўқиш мумкин бўлган.

Бирлашган Миллатлар Ташкилотининг Ўзбекистондаги доимий мувофиқлаштирувчиси Ҳелена Фрейзер ҳам британ элчисидан кун ўтиб, бу хусусда ўз муносабатини билдирган.

Ҳелена Фрейзер аввалига БМТ Бош котибининг бу йилги Матбуот куни муносабати билан айтган сўзларини твит қилиб келтирган.

Унда Антониу Гутерриш "тақдим этган маълумот ва таҳлиллари, раҳбарларни ҳар бир соҳада ҳисоб бердиришга муваффақ бўлгани, ҳокимиятдагиларга ҳақиқатни айта олгани учун" оммавий ахборот воситаларига ўз миннатдорчилигини билдирган"и айтилган.

Ҳелена Фрейзер худди шу твитига БМТ Бош котиби ўшанда, "Барча ҳукуматларни "матбуот ходимларини ҳимоя қилиш, матбуот эркинлигини мустаҳкамлаш ва қўллаб-қувватлашга чақиргани"ни ҳам илова қилган.

Бунинг ортидан, БМТ мувофиқлаштирувчиси Kun.uz, Gazeta.uz ва бошқа оммавий ахборот воситалари билан боғлиқ Ўзбекистондаги сўнгги воқеалар манзарасида бу ҳақда тўхталиб ўтаётганини алоҳида қайд этган.

Ҳелена Фрейзер, "Президент Мирзиёев айтганидек, матбуот эркинлиги барқарор ривожланишга эришиш ва Ўзбекистон ҳукумати томонидан амалга оширилаётган улкан ислоҳотлар дастурининг ижроси учун жуда муҳим", деган сўзлар билан ўзининг сўнгги твитига якун ясаган.

АҚШ элчиси твит қилган 28 ноябрь куни эса, АОКА маҳаллий оммавий ахборот воситаларига юборилаётган огоҳлантириш хатлари юзасидан расмий баёнот берган.

Агентлик ўз баёнотида, "журналист ва блогерларга давлат органларининг ОАВ билан конструктив ва очиқ мулоқотда бўлишлари учун ҳар томонлама амалий ёрдам кўрсатишга тайёрлигини билдирган".

"Шунингдек, мамлакатда сўз эркинлиги ва оммавий ахборот воситалари ривожланишини таъминлашни кафолатлашини таъкидлаган".

Агентлик Ўзбекистонда сўз ва матбуот эркинлигини амалда таъминлаш, Ислом Каримов бошқаруви даврида танқидлар тиғига тутиб келинган ушбу соҳани том маънода ислоҳ этиш учун шахсан Президент Шавкат Мирзиёев ташаббуси билан ташкил этилган.

Яқинда Би-би-си Ўзбек хизматининг кичиккина сўрови аксарият ўзбекистонликларнинг мамлакатда сўз эркинлигини муҳим, деб билишларини кўрсатган.

Ўзбекистон яқин-яқингача сўз ва матбуот эркинлиги бўйича халқаро ҳисоботларнинг энг қуйи поғоналаридан бирини эгаллаб келган, дунёнинг "интернетнинг душмани" сифатида кўрилган саноқли давлатларидан бири бўлган.

Аммо янги Ўзбекистоннинг президенти Шавкат Мирзиёев ўзи қудратга келган қисқа вақтнинг ичида жаҳоннинг айрим нуфузли нашрлари томонидан, ҳаттоки, Хитойнинг ислоҳотчи лидери Дэн Сяопинга қиёсланган.

Қўл ураётган ислоҳотлари аллақачон дунёнинг демократия дарғаси сифатида эътироф этилувчи АҚШ ва унинг президенти томонидан олқишланаётган давлат раҳбари бўлади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek