Трамп соғлигидан жиддий хавотир, Путинни коронавирусдан қандай асрашмоқда? – O’zbekiston, Rossiya, AQSh, dunyo, yangiliklar

Трамп соғлигидан жиддий хавотир, Путинни коронавирусдан қандай асрашмоқда? - Коронавирус юқтирган АҚШ президентининг аҳволи, учинчи кундирки, дунёнинг нигоҳида. Худди шу манзарада Россия президентини коронавирусдан қандай асрашаётгани ҳам кўпчиликнинг эътиборини ўзига тортган бошқа бир мавзуга айланган.

Дунёнинг бу икки глобал лидери ўзининг глобал коронавирус пандемиясига ёндашуви, муносабати билан, ойларки, танқидлар остида қолиб келишади.

Худди шу боис, жаҳоннинг яқинда ҳажвий Шнобель мукофотига лойиқ, деб топилган саноқли президентларидан иккитаси бўлишади.

АҚШ президенти ўзи ва рафиқасининг коронавирус юқтирганини ўтган жума, 2 октябрь куни шахсан ўзи маълум қилган.

Бу ҳақдаги твитидан қисқа вақт ўтмай, Дональд Трампнинг касалхонага олиб кетилгани хабар берилган.

Трамп ўшандан буён касалхонада қолмоқда, соғлиги назорат остида.

Ўтган дам олиш кунларида унинг саломатлиги борасида бир-бирига қарама-қарши баёнотлар янграган, бу АҚШ президентининг аҳволи қанчалик жиддий эканига оид саволларни ҳам пайдо қилмай қўймаган.

Аввалига Дональд Трампнинг бугун, душанба куни касалхонани тарк этиши айтилган.

Аммо орада қонидаги кислород миқдори икки марта тушиб кетган, докторларнинг унга стероид беришларига тўғри келган.

Мутахассисларга кўра эса, бу каби муолажа, одатда, коронавирус аломатлари оғир кечаётган беморларга қўллаб келинган.

Оқ Уй шу пайтгача АҚШ президентида кузатилаётган Covid-19 белгилари "енгил" эканини айтиб келган.

Кеча, якшанба куни Дональд Трамп тарафдорларини олқишлаш учун машинасида жамоатчиликка кўриниш берган, ниқобда бўлган, лекин бунинг қанчалик хавфсиз амал бўлгани мазмунида аллақачон танқидлар остида қолишга ҳам улгурган.

Бу хусусда Оқ уй матбуот воизининг расман изоҳ беришига тўғри келган, Жуд Дир бу иш докторларнинг розилиги билан қилинганини айтган.

АҚШ дунённг энг кўп коронавирус тарқалган давлати бўлади, ҳозирга келиб штатларда жаъми коронавирусга чалинганлар сони 7 миллиондан ошган, улардан 200 мингги ҳаётдан кўз юмган.

Дональд Трампнинг ҳозирча касалхонада экани кўрилади.

Путин ва коронавирус

Худди шу манзарада Россия президентини коронавирусдан қандай асрашаётгани ҳам кўпчиликнинг эътиборини ўзига тортган бошқа бир мавзуга айланган.

Би-би-си Рус хизмати вазиятдан яхши хабардор манбалар билан боғланиб, бу саволга ойдинлик киритишга уринган.

Маълум бўлишича, Владимир Путинни коронавирусдан ҳимоя қилишга қаратилган кескин чора-тадбирлар март ойидан буён ҳануз кучда, на-да юмшатилган ва на-да бекор қилинган.

Президент қабулига кириш чекланган, ким бўлишидан қатъий назар, Путин билан юзма-юз учрашмоқчи бўлган одамнинг эса, коронавирусга текширувдан ўтиши, махсус санаторийларда тиббий гуруҳ назорати остида икки ҳафта крантиндан ўтиши шарт қилиб қўйилган.

Бу маълумотларни Би-би-си Рус хизмати билан суҳбатларида Россия президенти билан сўнгги ойларда кўришишга муваффақ бўлган одамлар тасдиқлашган, аммо улар ўз исм-шарифларини очиқлашни исташмаган.

Бу каби қатъий тартиб-қоидаларга риоя этишнинг имкони бўлмаган ҳолатларда эса, Путинга ижтимоий масофа сақлаши олдиндан айтилиши ҳам маълум бўлган.

Россия президентининг матбуот котиби Кремлда "махсус карантин чора-тадбирлари амалда эмаслиги", аммо коронавирусга текширувлар март ойидан буён тўхтамаганини айтган.

Маълум бўлишича, Путиннинг 24 март куни Коммунаркага қилган ташрифи ва бизнесменлар билан Ново-Огареводаги 26 март кунги учрашуви ортидан, унинг қабулига кирмоқчи бўлганлар учун коронавирусга тест шарт қилиб қўйилган.

Путин билан учрашиб, қўл сиқишиб, юзма-юз мулоқот қилишидан саноқли кун ўтиб, Коммунаркадаги юқумли касалликлар шифохонаси Бош врачида коронавирус аниқланганди.

Би-би-си аноним суҳбатдошлари тилга олган чекловлар хусусида изоҳ сўраб, Дмитрий Песковга ёзма мурожаат қилган, ҳалича ўз сўровига жавоб олгани кўзга ташланмайди.

Дунёнинг бошқа раҳбарлари ҳам аллақачон эҳтиёт чораларини кўра бошлашгани маълум.

Орада Россия Президентининг сўзчиси Дмитрий Песков Путиннинг ҳам коронавирусга мунтазам текширувдан ўтиб туришини айтган.

Песковга кўра, Путин "қанча керак бўлса, шунча марта коронавирусга текширилмоқда".

Коронавирус Ўзбекистон раҳбарининг доимий иш тартибига ўзгартиш киритгани маълум эмас.

Ўзбекистон раҳбари коронавирусга текшириб-текширилмагани ҳақида расмий маълумот йўқ, аммо унинг ҳам сўнгги пайтларда юз ниқобида кўриниш бераётгани кўзга ташланган.

Россия ва АҚШ дунёнинг энг катта сондаги Ўзбекистон фуқаролари турли иш, юмуш ва таҳсилда банд саноқли давлатларидан иккитаси бўлишади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek